Education

ଭୁବନେଶ୍ୱର, ଜୁନ୍ ୧୯ (ଲୋକାଲ ୱାୟାର) : ଅଖିଳ ଭାରତୀୟ ଆୟୁବିଜ୍ଞାନ ସଂସ୍ଥାନ (ଏମ୍ସ)ର ପୋଷ୍ଟ ଗ୍ରାଜୁଏଟ୍ ପାଠ୍ୟକ୍ରମ ପାଇଁ ଅନୁଷ୍ଠିତ ହୋଇଥିବା ପ୍ରବେଶିକା ପରୀକ୍ଷାରେ ଭୁବନେଶ୍ୱରସ୍ଥିତ ଏମ୍ସର ଛାତ୍ରୀ ଡା. ଭିନିଥା କେ ୧୦୦ ପ୍ରତିଶତ ମାର୍କ ରଖି ପ୍ରଥମ ସ୍ଥାନ ଅଧିକାର କରିଛନ୍ତି ।

ଏହି ପ୍ରବେଶିକା ପରୀକ୍ଷାର ୧୦୦ ସଫଳ ଛାତ୍ରଛାତ୍ରୀଙ୍କ ତାଲିକାରେ ଏମ୍ସ ଅନୁଷ୍ଠାନର ୨୯ ଜଣ ଛାତ୍ରଛାତ୍ରୀ ସ୍ଥାନ ପାଇଥିବା ବେଳେ ଭୁବନେଶ୍ୱର ଏମ୍ସର ୬ ଜଣ ଛାତ୍ରଛାତ୍ରୀ ରହିଛନ୍ତି ।

ଏହି ସଫଳତା ପାଇଁ ଭୁବନେଶ୍ୱର ଏମ୍ସର ନିର୍ଦ୍ଦେଶିକା ଗୀତାଞ୍ଜଳୀ ବତମାନ୍‌ବେନ୍ ଭିନିଥାଙ୍କ ସହ ସମସ୍ତ ଛାତ୍ରଛାତ୍ରୀଙ୍କୁ ଶୁଭେଚ୍ଛା ଜଣାଇଛନ୍ତି ।

ଏହାସହ ଅଧ୍ୟାପକ ଓ ଅଧ୍ୟାପିକାଙ୍କ ମାଗଦର୍ଶୀକାକୁ ମଧ୍ୟ ସେ ପ୍ରଶଂସା କରିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଜୁନ୍ ୧୧(ଲୋକାଲ ୱାୟାର): ରାଜ୍ୟରେ ଉଚ୍ଚଶିକ୍ଷା ବିଭାଗ ଦ୍ୱାରା ପରିଚାଳିତ ହେଉଥିବା ସମସ୍ତ ପରୀକ୍ଷା ବାତିଲ କରାଯାଇଥିବା ବେଳେ ବିକଳ୍ପ ମୂଲ୍ୟଶୟ ପ୍ରକ୍ରିୟାରେ ଫଳ ପ୍ରକାଶ ପାଇବ ବୋଲି ଗୁରୁବାର ଅନୁଷ୍ଠିତ କୁଳପତିମାନଙ୍କ ବୈଠକରେ ନିଷ୍ପତ୍ତି ହୋଇଥିବା ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ କହିଛନ୍ତି ।

ଗୁରୁବାର ରାଜ୍ୟର ସମସ୍ତ ସରକାରୀ ବିଶ୍ୱବିଦ୍ୟାଳୟର କୁଳପତି ଓ ଡିଗ୍ରୀ କଲେଜ ଅଧ୍ୟକ୍ଷମାନଙ୍କର ବୈଠକ ଭିଡିଓ କନଫରେନ୍ସିଂ ଜରିଆରେ ହୋଇଥିଲା ।

ବୈଠକର ନିଷ୍ପତ୍ତି ଅନୁସାରେ ଚଳିତ ବର୍ଷ ୟୁଜି ଓ ପିଜି ପାଠ୍ୟକ୍ରମର ଶେଷ ସେମିଷ୍ଟରର ବାକି ଥିବା ଥିଓରି ଓ ପ୍ରାକ୍ଟିକାଲର ସବୁ ପରୀକ୍ଷା ବାତିଲ ହେବ ।

ବିଶ୍ୱବିଦ୍ୟାଳୟ ଓ ସ୍ୱୟଂଶାସିତ ମହାବିଦ୍ୟାଳୟଗୁଡ଼ିକ ୟୁଜିସି ସୁପାରିଶ ଅନୁସାରେ ମୂଲ୍ୟାୟନ କରି ଅଗଷ୍ଟ ଶେଷ ସୁଦ୍ଧା ଫଳ ପ୍ରକାଶ କରିବେ ।

ସୁପାରିଶ ୱେଟେଜ୍ ଅନୁସାରେ ସମ୍ପୃକ୍ତ ବିଷୟର ଇଣ୍ଟରନାଲ୍ ମାର୍କ ଓ ପୂର୍ବ ସେମିଷ୍ଟର୍ ଗୁଡ଼ିକର ହାରାହାରି ମାର୍କକୁ ମିଶାଇ ଶେଷ ସେମିଷ୍ଟର୍ ମାର୍କ ଦିଆଯିବ ।

ଅଧିକ ମାର୍କ ପାଇବା ପାଇଁ ହକଦାର ବୋଲି ଭାବୁଥିବା ଛାତ୍ରଛାତ୍ରୀମାନେ ବିଶ୍ୱବିଦ୍ୟାଳୟ ଓ ସ୍ୱୟଂଶାସିତ ମହାବିଦ୍ୟାଳୟଗୁଡ଼ିକ ଦ୍ୱାରା ନଭେମ୍ବରରେ ହେବାକୁ ଥିବା ପରୀକ୍ଷାରେ ବସିବେ ।

ସେମାନଙ୍କ ସଂଶୋଧିତ ପରୀକ୍ଷା ଫଳ ଡିସେମ୍ବରରେ ପ୍ରକାଶ କରାଯିବ ।

ଶେଷ ସେମିଷ୍ଟରରେ ଗୋଟିଏ ବ୍ୟାକେ୍ ପେପର ଥିଲେ ତାହା ବାତିଲ ହୋଇ ବିକଳ୍ପ ମୂଲ୍ୟାୟ ହେବ ଏବଂ ଅଧିକ ପେପର ବ୍ୟାକ୍ ଥିଲେ ତାଙ୍କୁ ସାଧାରଣ ପରୀକ୍ଷା ଦେବାକୁ ପଡ଼ିବ ।

ତେବେ ମେଡିକାଲ୍ ପାଠ୍ୟକ୍ରମର ସମସ୍ତ ପରୀକ୍ଷା ଧାର୍ଯ୍ୟ ତାରିଖରେ ହେବ ବୋଲି ମନ୍ତ୍ରୀ ଡ. ସାହୁ କହିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଜୁନ୍ ୨(ଲୋକାଲ ୱାୟାର): ଲକ୍ ଡାଉନ-୪ ଶେଷ ହେବା ପରେ ଜୁନ୍ ୧ରୁ ରାଜ୍ୟରେ ଆରମ୍ଭ ହୋଇଥିବା ଲକ୍ ଡାଉନ-୫ରେ ସ୍କୁଲ, କଲେଜ ପରୀକ୍ଷାକୁ ଅନୁମତି ଦିଆଯିବ ବୋଲି ରାଜ୍ୟ ସରକାର ଏକ ସଂଶୋଧିତ ନିୟମାବଳୀରେ ମଙ୍ଗଳବାର ପ୍ରକାଶ କରିଛନ୍ତି ।

ସ୍ୱତନ୍ତ୍ର ରିଲିଫ କମିଶନର (ଏସଆରସି)ଙ୍କ ପକ୍ଷରୁ ପ୍ରକାଶ କରାଯାଇଥିବା ଏହି ନିର୍ଦ୍ଦେଶାବଳୀ ଅନୁଯାୟୀ,ଜୁଲାଇ ୩୧ ତାରିଖ ସୁଦ୍ଧା ରାଜ୍ୟରେ ସ୍କୁଲ, କଲେଜ, କୋଚିଂ ସେଣ୍ଟର ଏବଂ ଅନ୍ୟାନ୍ୟ ସମସ୍ତ ଶିକ୍ଷାନୁଷ୍ଠାନ ବନ୍ଦ ଥିଲେ ମଧ୍ୟ ପରୀକ୍ଷା କରାଯିବା ସକାଶେ ଅନୁମତି ପ୍ରଦାନ କରାଯିବ ।

କୋଭିଡ-୧୯ ନିୟମ ଏବଂ ସାମାଜିକ ଦୂରତ୍ୱ ରକ୍ଷା କରି ଏହି ପରୀକ୍ଷା ଗୁଡ଼ିକ କିପରି ହେବ ତାହା ପରେ ନିଷ୍ପତ୍ତି ନିଆଯିବ ।

ଉଲ୍ଲେଖଯୋଗ୍ୟ, କରୋନା କଟକଣା ପାଇଁ ଦେଶବ୍ୟାପୀ ଲକ୍ ଡାଉନ ଘୋଷଣା ହେବାରୁ ବହୁ ସ୍କୁଲ ଓ କଲେଜରେ ସେମିଷ୍ଟର ପରୀକ୍ଷା ସ୍ଥଗିତ ରହିଛି ।

ଲୋକାଲ ୱାୟାର

ଭୁବନେଶ୍ୱର, ମେ ୨୬(ଲୋକାଲ ୱାୟାର): ଚଳିତ ବର୍ଷ ରାଜ୍ୟର ସମସ୍ତ ବିଶ୍ୱବିଦ୍ୟାଳୟ ଅଧୀନରେ ଥିବା ଯୁକ୍ତ ୩ ମହାବିଦ୍ୟାଳୟ ଏବଂ ସ୍ୱୟଂଶାସିତ ମହାବିଦ୍ୟାଳୟର ଯୁକ୍ତ ତିନି ଦ୍ୱିତୀୟ ଓ ଚତୁର୍ଥ ସେମିଷ୍ଟର ପରୀକ୍ଷା ଓ ସ୍ନାତକୋତ୍ତର ଶ୍ରେଣୀର ଦ୍ୱିତୀୟ ସେମିଷ୍ଟର ପରୀକ୍ଷା ହେବ ନାହିଁ ବୋଲି ମଙ୍ଗଳବାର ସମସ୍ତ ବିଶ୍ୱବିଦ୍ୟାଳୟର କୁଳପତିମାନଙ୍କ ସହ ଭିଡିଓ କନଫରେନ୍ସିଂରେ ହୋଇଥିବା ବୈଠକରେ ନିଷ୍ପତ୍ତି ହୋଇଥିବା ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ କହିଛନ୍ତି ।

ତେବେ ପୂର୍ବରୁ ହୋଇଥିବା ଏକ ନିଷ୍ପତ୍ତି ଅନୁସାରେ ଯୁକ୍ତ ୩ର ଷଷ୍ଠ ସେମିଷ୍ଟର ଫାଇନାଲ ପରୀକ୍ଷା ଓ ସ୍ନାତକୋତ୍ତର ଶ୍ରେଣୀର ଚତୁର୍ଥ ସେମିଷ୍ଟର ଫାଇନାଲ ପରୀକ୍ଷା ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ହେବ ।

ଯୁକ୍ତ ୩ର ଷଷ୍ଠ ସେମିଷ୍ଟର ଫାଇନାଲ ପରୀକ୍ଷା ଜୁନ୍ ୨୦ ତାରିଖ ପରେ ଆରମ୍ଭ ହୋଇ ଜୁଲାଇ ୨୪ ତାରିଖ ସୁଦ୍ଧା ଶେଷ ହେବ । ପରୀକ୍ଷା ଫଳ ଅଗଷ୍ଟ ୩୧ ତାରିଖ ସୁଦ୍ଧା ପ୍ରକାଶ ପାଇବ ।

ସ୍ନାତକୋତ୍ତର ଶ୍ରେଣୀର ଚତୁର୍ଥ ସେମିଷ୍ଟର ଫାଇନାଲ ପରୀକ୍ଷା ଅଗଷ୍ଟ ୨୦ ତାରିଖ ସୁଦ୍ଧ ଶେଷ ହେବ । ପରୀକ୍ଷା ଫଳ ସେପ୍ଟେମ୍ବର ୨୦ ତାରିଖ ସୁଦ୍ଧା ପ୍ରକାଶ ପାଇବ ।

ବୈଠକର ନିଷ୍ପତ୍ତି ଅନୁସାରେ, ପ୍ରତମ ଥର ଯୁକ୍ତ ୩ ଏବଂ ପିଜି ପାଠ୍ୟସୂଚୀର ୨୫ ପ୍ରତିଶତ ପାଠ ଛାତ୍ରଛାତ୍ରୀଙ୍କ ଦ୍ୱାରା ସ୍ୱୟଂ ଅଧ୍ୟୟନ ମାଧ୍ୟମରେ କରାଯିବ ।

ଅନ୍ ଲାଇନ, ଅଫ୍ ଲାଇନ ଏବଂ ପାଠ୍ୟ ପୁସ୍ତକ ମାଧ୍ୟମରେ ଉନ୍ନତ ଷ୍ଟଡି ମ୍ୟାଟେରିଆଲ ଛାତ୍ରଛାତ୍ରୀଙ୍କୁ ଯୋଗାଇ ଦିଆଯିବ ।

ଲୋକାଲ ୱାୟାର

ଭୁବନେଶ୍ୱର, ମେ’ ୨୫ (ଲୋକାଲ ୱାୟାର) : ଆସନ୍ତାକାଲି ଠାରୁ ୬୦ଟି କେନ୍ଦ୍ରରେ ମାଟ୍ରିକ୍ ଖାତାଦେଖା ହେବ ବୋଲି ସୋମବାର ଗଣଶିକ୍ଷା ମନ୍ତ୍ରୀ ସମୀର ଦାଶ କହିଛନ୍ତି ।

କୋଭିଡ୍‌-୧୯ ନିୟମ ମାନି ଖାତା ମୂଲ୍ୟାୟନ ହେବ । ହାଇକୋର୍ଟଙ୍କ ନିର୍ଦ୍ଦେଶକୁ ମଧ୍ୟ ପାଳନ କରିବାକୁ ବ୍ୟବସ୍ଥା କରାଯାଇଛି ।

ସାମାଜିକ ଦୂରତା ସହ ସାନିଟାଇଜର ବ୍ୟବହାର ଉପରେ ଗୁରୁତ୍ୱ ଦିଆଯାଇଛି ।

୪୫ ଦିନ ଭିତରେ ଫଳାଫଳ ବାହାରିବ ବୋଲି ମନ୍ତ୍ରୀ କହିଛନ୍ତି ।

ଉଲ୍ଲେଖଯୋଗ୍ୟ, ପୂର୍ବରୁ ମାର୍ଚ୍ଚ ୧୯ ତାରିଖରେ ଗୋଟିଏ ଦିନ ପାଇଁ ଖାତା ମୂଲ୍ୟାୟନ ହୋଇଥିଲା। ଏହାପରେ ଲକ୍ ଡାଉନ୍ ହେବାରୁ ମୂଲ୍ୟାୟନ ସ୍ଥଗିତ ରହିଥିଲା ।

ସେହିପରି ମେ ୨୦ରେ ଖାତା ଦେଖା ପାଇଁ ସ୍ଥିର ହୋଇଥିଲା । ହେଲେ ବାତ୍ୟା ଅମ୍ପନ ପାଇଁ ଏହା ଘୁଞ୍ଚାଇ ଦିଆ ଯାଇଥିଲା। ଶେଷରେ ମେ ୨୬ ତାରିଖରୁ ଖାତା ଦେଖା ପାଇଁ ସ୍ଥିର ହୋଇଛି ।

ଲୋକାଲ ୱାୟାର

ଭୁବନେଶ୍ୱର, ମେ ୨୨(ଲୋକାଲ ୱାୟାର): ଆସନ୍ତା ଜୁଲାଇ ୧ରୁ ୧୪ ତାରିଖ ପର୍ଯ୍ୟନ୍ତ କାଉନସିଲ୍ ଫର୍ ଇଣ୍ଡିଆନ୍ ସ୍କୁଲ ସାର୍ଟିଫିକେଟ୍ ପରୀକ୍ଷା (ସିଆଇଏସଇ)ର ବଳକା ଥିବା ଆଇସିଏସଇ(ଦଶମ) ଓ ଆଇଏସସି (ଦ୍ୱାଦଶ) ପରୀକ୍ଷା ହେବ ବୋଲି ଶୁକ୍ରବାର ବିଜ୍ଞପ୍ତି ପ୍ରକାଶ ପାଇଛି ।

ଉଲ୍ଲେଖଯୋଗ୍ୟ, କରୋନା ସଂକ୍ରମଣ ପାଇଁ ଆଇସିଏସଇର ୬ଟି ବିଷୟ ଓ ଆଇଏସସିର ୮ଟି ବିଷୟର ପରୀକ୍ଷା ସ୍ଥଗିତ ରହିଥିଲା ।

ସ୍ଥଗିତ ଥିବା ବିଷୟ ଗୁଡ଼ିକର ପରୀକ୍ଷା ଅନୁଷ୍ଠିତ ହେବା ପରେ ଫଳ ୬ରୁ ୮ ସପ୍ତାହ ମଧ୍ୟରେ ପ୍ରକାଶ ପାଇବ ।

ବିଜ୍ଞପ୍ତି ଅନୁସାରେ କୋଭିଡ-୧୯ର ସମସ୍ତ ଗାଇଡଲାଇନକୁ ପାଳନ କରି ପରୀକ୍ଷା ହେବ । ଛାତ୍ରଛାତ୍ରୀମାନେ ସାନିଟାଇଜର ଆଣିବେ ଏବଂ ପରୀକ୍ଷା ହଲରେ ସାମାଜିକ ଦୂରତ୍ୱ ଅବଲମ୍ବନ କରାଯିବ ।

ଛାତ୍ରଛାତ୍ରୀଙ୍କୁ ୧୦ଟା ୪୫ରେ ପ୍ରଶ୍ନପତ୍ର ଦିଆଯିବ ଏବଂ ୧୧ଟାରେ ପରୀକ୍ଷା ହେବ ବୋଲି ବିଜ୍ଞପ୍ତିରେ କୁହାଯାଇଛି ।

ଲୋକାଲ ୱାୟାର

ଭୁବନେଶ୍ୱର, ମେ’ ୧୯ (ଲୋକାଲ ୱାୟାର) : କରୋନାକୁ ଦୃଷ୍ଟିରେ ରଖି ଜେଇଇ ମେନ୍ ପ୍ରବେଶିକା ପରୀକ୍ଷାର ଅନ୍‌ଲାଇନ୍ ଆବେଦନ ତାରିଖକୁ ମେ’ ୨୪ ତାରିଖ ଯାଏଁ ବୃଦ୍ଧି କରାଯାଇଥିବା ନେଇ ମଙ୍ଗଳବାର ନ୍ୟାସନାଲ ଟେଷ୍ଟିଂ ଏଜେନ୍ସି (ଏନଟିଏ) ପକ୍ଷରୁ ବିଜ୍ଞପ୍ତି ଜାରି ହୋଇଛି ।

ଆଜି ଠାରୁ ମେ’ ୨୪ ତାରିଖ ସନ୍ଧ୍ୟା ୫ଟା ପର୍ଯ୍ୟନ୍ତ ଆବେଦନ କରିପାରିବେ ଏବଂ ରାତି ସାଢେ ୧୧ଟା ଯାଏ ଫି’ ପୈଠ କରି ପାରିବେ ।

ଛାତ୍ରଛାତ୍ରୀ http://jeemain.nta.nic.in/ ୱେବସାଇଟ୍‌ରେ ପରୀକ୍ଷା ସମ୍ବନ୍ଧିତ ସବିଶେଷ ତଥ୍ୟ ପାଇପାରିବେ ।

ଦେଶ ବାହାରେ ଯାଇ ପଢିବାକୁ ଚାହୁଁଥିବା ଛାତ୍ରୀଛାତ୍ରୀମାନେ ଏବେ କରୋନା ପାଇଁ ବିଦେଶ ଯାଇ ପାରିବେ ନାହିଁ ।

ଫଳରେ ବହୁ ପିଲା ଜେଇଇ ପ୍ରବେଶିକା ପରୀକ୍ଷା ପାଇଁ ଆବେଦନ କରିବାର ସମ୍ଭାବନା ରହିଛି । ଏହାକୁ ଦୃଷ୍ଟିରେ ରଖି ଏନଟିଏ ଆବେଦନ ତାରିଖ ବୃଦ୍ଧି କରିଥିବା କହିଛି ।

ଲୋକାଲ ୱାୟାର

ଭୁବନେଶ୍ୱର, ମେ ୧୮(ଲୋକାଲ ୱାୟାର): କରୋନା ପାଇଁ ସ୍ଥଗିତ ଥିବା ସିବିଏସଇ ଦଶମ ଓ ଦ୍ୱାଦଶର ବାକି ଥିବା ପରୀକ୍ଷା ଜୁଲାଇ ୧ ତାରିଖରୁ ୧୫ ତାରିଖ ମଧ୍ୟରେ ଅନୁଷ୍ଠିତ ହେବ ବୋଲି ସିବିଏସଇ ପକ୍ଷରୁ ସୋମବାର କୁହାଯାଇଛି ।

ନର୍ଥ ଇଷ୍ଟ ଦିଲ୍ଲୀରେ ବାକି ଥିବା ଦଶମ ଶ୍ରେଣୀ ପରୀକ୍ଷା ହେବ ଏବଂ ଦ୍ୱାଦଶ ପରୀକ୍ଷା ଦେଶବ୍ୟାପୀ ଅନୁଷ୍ଠିତ ହେବ ।

ପରୀକ୍ଷାର୍ଥୀମାନେ ସ୍ୱଚ୍ଛ ବୋତଲରେ ସାନିଟାଇଜର ଆଣି ପରୀକ୍ଷା ହଲକୁ ଆସିବେ ।

ସମସ୍ତେ ମୁହଁରେ ମାସ୍କ ପିନ୍ଧିବା ବାଧ୍ୟତାମୂଳକ । ଅସୁସ୍ଥ ଅନୁଭବ କରୁଥିବା ପରୀକ୍ଷାର୍ଥୀଙ୍କୁ ଅନୁମତି ମିଳିବ ନାହିଁ ।

ପରୀକ୍ଷା ହଲ୍ ରେ ସାମାଜିକ ଦୂୂରତ୍ୱ ଅବଲମ୍ବନ ହେବ । ୧୦ଟାରେ ଛାତ୍ରଛାତ୍ରୀଙ୍କୁ ପ୍ରଶ୍ନ ଦିଆଯିବ ।

୧୦ଟା ୧୫ରେ ଉତ୍ତର ଖାତା ମିଳିବ ଏବଂ ସାଢ଼େ ୧୦ଟାରେ ସେମାନେ ଉତ୍ତର ଲେଖିବା ଆରମ୍ଭ କରିବେ ।

ଲୋକାଲ ୱାୟାାର