Special

ଢେଙ୍କାନାଳ, ଏପ୍ରିଲ ୨୧(ଲୋକାଲ ୱାୟାର): ଢେଙ୍କାନାଳ ଲୋକସଭା ଆସନର ଦେଶର ରାଜନୀତିରେ ସ୍ୱତନ୍ତ୍ର ସ୍ଥାନ ରହିଛି ।

ଢେଙ୍କାନାଳ ଜିଲ୍ଲାର ସମସ୍ତ ୪ଟି- ହିନ୍ଦୋଳ, ପରଜଙ୍ଗ, କାମାକ୍ଷାନଗର ଓ ଢେଙ୍କାନାଳ ସଦର ବିଧାନସଭା ନିର୍ବାଚନମଣ୍ଡଳୀ ଏବଂ ଅନୁଗୁଳ ରାଜସ୍ୱ ଜିଲ୍ଲାର ୫ଟିରୁ ୩ଟି ବିଧାନସଭା କ୍ଷେତ୍ର ଯଥା-ଅନୁଗୁଳ, ତାଳଚେର ଓ ପାଲଲହଡ଼ାକୁ ନେଇ ଢେଙ୍କାନାଳ ସଂସଦୀୟ କ୍ଷେତ୍ର ଗଠିତ ।

ଏହାର ଭୋଟରଙ୍କ ସଂଖ୍ୟା ୧୪ ଲକ୍ଷ ୭୮ ହଜାର । ଏପ୍ରିଲ ୨୩ରେ ଏମାନେ ବାଛିବେ ରାଜନୈତିକ ପ୍ରତିନିଧି ।

ସଂସଦକୁ ନିର୍ବାଚିତ ହେବା ଲାଗି ଏହି ଆସନରେ ମୋଟ ୯ ଜଣ ପ୍ରାର୍ଥୀ ଥିଲେ ମଧ୍ୟ ମୁଖ୍ୟତଃ ବିଜେଡିର ମହେଶ ସାହୁ, ବିଜେପିର ରୁଦ୍ରନାରାୟଣ ପାଣି ଏବଂ କଂଗ୍ରେସର ବ୍ରିଗେଡିୟର କାମାକ୍ଷାପ୍ରସାଦ ସିଂହଙ୍କ ମଧ୍ୟରେ କଡ଼ା ମୁକାବିଲା ହେଉଛି ।

ଏହି ସଂସଦୀୟ କ୍ଷେତ୍ରରୁ ଚାରିଥର ନିର୍ବାଚିତ ହୋଇଥିବା, ତଥା ହ୍ୟାଟ୍ରିକ କରିଥିବା ବିଜେଡି ନେତା ତଥାଗତ ଶତପଥୀ ଚଳିତ ନିର୍ବାଚନ ପ୍ରକ୍ରିିୟା ଆରମ୍ଭର ଦିନ କେଇଟା ପୂର୍ବରୁ ଅଚାନକ ଭୋଟ ରାଜନୀତିକୁ ଗୁଡବାଏ କହିଥିଲେ । ଏହା ପରଠାରୁ ଏହି ଆସନ ଉପରେ ସମସ୍ତଙ୍କ ନଜର ରହିଛି ।

ଏକଦା ଏହି ଆସନ ଥିଲା କଂଗ୍ରେସର ଗଡ଼ ଏବଂ ପରେ ବିଗତ ୧୪ ବର୍ଷ ଧରି ବିଜେଡିର ପ୍ରିୟ ଆସନ ପାଲଟି ଯାଇଛି ।

କଂଗ୍ରେସରୁ ପ୍ରତିଦ୍ୱନ୍ଦ୍ୱିତା କରୁଥିବା ବ୍ରିଗେଡିୟର କାମାକ୍ଷାପ୍ରସାଦ ସିଂହ ଓରଫ କେପି ୧୯୬୭ରୁ ୧୯୯୯ ମଧ୍ୟରେ ଏଠାରୁ ୬ ଥର ବିଜୟର ସ୍ୱାଦ ପାଇଛନ୍ତି । ରାଜନୀତିରେ ସେ ପୋଖତ, ପ୍ରବୀଣ କହିଲେ ଅତ୍ୟୁକ୍ତି ହେବନାହିଁ ।

ଦଳରେ ଏକାଧିକ ଆଶାୟୀ ଥିଲେ ହେଁ ହାଇକମାଣ୍ଡ କେପିଙ୍କୁ ଟିକେଟ ଦେଇଥିଲେ । ଦଳର ଭୋଟବ୍ୟାଙ୍କ, ସଂଗଠନ ଓ ନିଜର ଲୋକପ୍ରିୟତା ଆଧାରରେ କେପି ବିଜୟ ଶିଡ଼ି ଚଢ଼ିବାକୁ ଆଶା ରଖିଛନ୍ତି ।

ଏବେ ଘରକୁ ଘର ବୁଲୁଛନ୍ତି, ଦଳର ପୁରୁଖା ନେତାଙ୍କୁ ଭେଟି ନୂଆ ରଣକୌଶଳ କରିଛନ୍ତି ।୨୦୧୪ରେ ସେ ମୈଦାନକୁ ଓହ୍ଲାଇ ନଥିଲେ ।

ଇତି ମଧ୍ୟରେ ସଂସଦୀୟ କ୍ଷେତ୍ରରେ ଅନେକ ନେତା କଂଗ୍ରେସର ହାତ ଛାଡ଼ି ଦେଇଛନ୍ତି । ଦଳ ଏକପ୍ରକାର ନେତାଶୂନ୍ୟ ଅବସ୍ଥାରେ ।

ତେଣୁ କେପିଙ୍କ ପାଇଁ କଂଗ୍ରେସ ଗଡ଼ ପୁନଃଦଖଲ ଏତେ ସହଜ ନୁହେଁ ବୋଲି ରାଜନୀତିକ ସମୀକ୍ଷକମାନେ ସ୍ପଷ୍ଟ ମତ ଦେଉଛନ୍ତି ।

ବିଜେପି ପାଇଁ ମୈଦାନରେ ଲଢ଼ୁଛନ୍ତି ପୂର୍ବତନ ରାଜ୍ୟସଭା ସାଂସଦ ରୁଦ୍ରନାରାୟଣ ପାଣି । ୨୦୧୪ ନିର୍ବାଚନରେ ସେ ତଥାଗତଙ୍କ ହାତରୁ ପରାଜୟ ଲଭିଥିଲେ ।

ଏଥର ପୁଣି ଦଳ ତାଙ୍କ ଉପରେ ଆସ୍ଥା ପ୍ରକଟ କରିଛି । ୨୦୧୪ ପରଠାରୁ ରୁଦ୍ର ନିର୍ବାଚନମଣ୍ଡଳୀରେ ନିଜର କାର୍ଯ୍ୟକଳାପ ଜାରି ରଖିଥିବାରୁ ଏହା ଏବେ ଭୋଟ ପ୍ରଚାର ବେଳେ ତାଙ୍କୁ ସହଜ ସ୍ଥିତିରେ ରଖୁଛି ।

ଅପରପକ୍ଷରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପାଇଁ ମଧ୍ୟ ଏହି ଆସନ ସମ୍ମାନର ପ୍ରଶ୍ନ । ସଂସଦୀୟ କ୍ଷେତ୍ରର ପ୍ରାୟ ୫ଟି ବିଧାନସଭା ଆସନରେ ବିଜେପି ଧୀରେ ଧୀରେ ବିଜେଡିକୁ ଟକ୍କର ଦେବା ସ୍ଥିତିକୁ ଆସିଥିବା ଦଳର ନେତା ଦାବି କରନ୍ତି ।

ଏହି କ୍ଷେତ୍ରରେ ବିଜେପି ରାଷ୍ଟ୍ରୀୟ ସଭାପତି ଅମିତ ଶାହ ଏବଂ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ରୁଦ୍ରଙ୍କ ପାଇଁ ପ୍ରଚାର କରିଛନ୍ତି ।

ଅପରପକ୍ଷରେ ତଥାଗତ ଯୁଦ୍ଧକୁ ଓହ୍ଲାଇବେନି କହିବା ପରେ ଆରମ୍ଭ ହୋଇଥିଲା ବିଜେଡିର ପ୍ରାର୍ଥୀ ଖୋଜା ।

ଅପ୍ରତ୍ୟାଶିତ ଭାବେ ପାଲଲହଡ଼ା ବିଧାୟକ ମହେଶ ସାହୁଙ୍କୁ ଟିକେଟ ମିଳିଗଲା ।

ପାଲଲହଡ଼ା ଓ ତାଳଚେର ଅଞ୍ଚଳରେ ବେଶ୍ ପରିଚିତ ମହେଶ ୪ ଥର ବିଧାୟକ ହୋଇଥିଲେ ମଧ୍ୟ ସଂସଦୀୟ କ୍ଷେତ୍ର ପାଇଁ ନୂଆ ମୁହଁ ନିଶ୍ଚିତ ଭାବେ ।

୨୦୧୪ରେ ସେ ପାଲଲହଡ଼ାରେ ବିଧାୟକ ନିର୍ବାଚିତ ହୋଇଥିଲେ । ମହେଶ ତାଳଚେର ନିର୍ବାଚନମଣ୍ଡଳୀରୁ ବିଜେପି ଟିକେଟରେ ହ୍ୟାଟ୍ରିକ୍ ମଧ୍ୟ କରିଥିଲେ ।

୨୦୦୯ରେ ସେ ବିଜେପି ଛାଡ଼ି ବିଜେଡିରେ ସାମିଲ ହୋଇଥିଲେ କିନ୍ତୁ ତାଳଚେରରେ ପରାସ୍ତ ହୋଇଥିଲେ ।

କିନ୍ତୁ ବିଜେଡି ପାଇଁ ବଡ଼ ସମ୍ପତ୍ତି ନବୀନ ବ୍ରାଣ୍ଡ ଏବଂ ବିଭିନ୍ନ ଜନକଲ୍ୟାଣକାରୀ ଯୋଜନା ତାଙ୍କୁ ନିର୍ବାଚନ ବୈତରଣୀ ପାରି କରାଇବ ବୋଲି ମହେଶ ଆଶା ବାନ୍ଧିଛନ୍ତି ।

ବିଶେଷ କରି ୨୦୧୪ ନିର୍ବାଚନରେ ଏହି କ୍ଷେତ୍ରର ୭ଟି ଯାକ ବିଧାନସଭା ଆସନ ବିଜେଡି ଦଖଲ କରିଥିଲା । ତେଣୁ ଏହା ତାଙ୍କ ପାଇଁ ଭୋଟ ରୁଣ୍ଡାଇବାରେ ସାହାରା ହେବ ବୋଲି ସେ କୁହନ୍ତି ।

ଏହି ଆସନରେ ୧୯୫୭ରେ ଗଣତନ୍ତ୍ର ପରିଷଦର ସୁରେନ୍ଦ୍ର ମହାନ୍ତି, ୧୯୬୨ରେ କଂଗ୍ରେସର ବୈଷ୍ଣବଚରଣ ପଟ୍ଟନାୟକ, ୧୯୭୧ରେ କଂଗ୍ର୍ରେସର ଦେବେନ୍ଦ୍ର ଶତପଥି, ୧୯୭୭ରେ ଭାରତୀୟ ଲୋକଦଳର ଦେବେନ୍ଦ୍ର ଶତପଥି, ୧୯୮୯ରେ ଜନତା ଦଳର ଭଜମନ ବେହେରା ବିଜୟୀ ହୋଇଥିଲେ ।

ତେବେ କେପି ସିଂହଦେଓ ୧୯୬୭, ୧୯୮୦, ୧୯୮୪, ୧୯୯୧, ୧୯୯୬ ଏବଂ ୧୯୯୯ରେ ବିଜୟୀ ହୋଇଥିବା ବେଳେ ତଥାଗତ ଶତପଥୀ ୧୯୯୮, ୨୦୦୪, ୨୦୦୯ ଏବଂ ୨୦୧୪ରେ ନିର୍ବାଚିତ ହୋଇଥିଲେ । ଭୋଟ ଗଣତି ପରେ ଜଣାପଡ଼ିବ ଏଥର ଭୋଟର କାହା ମୁଣ୍ଡରେ ଶିରପା ବାନ୍ଧିଛନ୍ତି ।

ଲୋକାଲ ୱାୟାର

ସମ୍ବଲପୁର, ଏପ୍ରିଲ ୨୦(ଲୋକାଲ ୱାୟାର): ସମ୍ବଲପୁର ଲୋକସଭା ଆସନର ରାଜନୀତି ସମଗ୍ର ପଶ୍ଚିମ ଓଡ଼ିଶାକୁ ପ୍ରଭାବିତ କରୁଥିବାରୁ ଏହା ଉପରେ ସର୍ବଦା ସମସ୍ତଙ୍କ ନଜର ଥାଏ ।

ସମ୍ବଲପୁର ଜିଲ୍ଲାର ରେଙ୍ଗାଲି, ସମ୍ବଲପୁର, ରେଢ଼ାଖୋଲ, କୁଚିଣ୍ଡା, ଦେବଗଡ଼ ଜିଲ୍ଲାର ଦେବଗଡ଼ ଏବଂ ଅନୁଗୁଳ ଜିଲ୍ଲାର ଛେଣ୍ଡିପଦା ଏବଂ ଆଠମଲ୍ଲିକ ବିଧାନସଭା କ୍ଷେତ୍ର ରହିଛି ।

ଏ ପର୍ଯ୍ୟନ୍ତ ଏହି ଆସନରେ ହୋଇଥିବା ୧୬ଟି ନର୍ବାଚନରୁ କେବଳ କଂଗ୍ରେସ ୭ ଥର ବିଜୟୀ ହୋଇଥିବାରୁ ଏକଦା ଏହାକୁ କଂଗ୍ରେସର ଗଡ଼ ମଧ୍ୟ କୁହାଯାଉଥିଲା ।

ସମ୍ବଲପୁର ଲୋକସଭା ନିର୍ବାଚନମଣ୍ଡଳୀରେ ୩ଟି ଜିଲ୍ଲାର ୭ଟି ବିଧାନସଭା କ୍ଷେତ୍ରର ମୋଟ ୧୪ ଲକ୍ଷ ୬୭ ହଜାର ୫୩୬ ଜଣ ଭୋଟର ଅଛନ୍ତି ।

୨୦୧୯ ରଣାଙ୍ଗନରେ ବିଜେପି ଦେବଗଡ଼ ରାଜା ନିତେଶ ଗଙ୍ଗଦେବଙ୍କୁ ଓହ୍ଲାଇଥିବା ବେଳେ ବିଜେଡି ଅବସରପ୍ରାପ୍ତ ପ୍ରଶାସକ ନଳିନୀକାନ୍ତ ପ୍ରଧାନଙ୍କୁ ଏବଂ କଂଗ୍ରେସ ପୂର୍ବତନ ପିସିସି ମୁଖ୍ୟ ତଥା ପୂର୍ବତନ ସାଂସଦ ଶରତ ପଟ୍ଟନାୟକଙ୍କୁ ଅବତୀର୍ଣ୍ଣ କରାଇଛି ।

ବିଜେପି ପ୍ରାର୍ଥୀ ନିତେଶ ଗଂଗଦେବ ପୂର୍ବରୁ ବିଧାୟକ ରହିଆସିଛନ୍ତି । ସାଂଗଠନିକ ଦୃଷ୍ଟିରୁ ସମ୍ବଲପୁର ଲୋକସଭା କ୍ଷେତ୍ରର ୫ଟି ବିଧାନସଭା କ୍ଷେତ୍ରରେ ବିଜେପି ବିଜେଡିକୁ କଡ଼ା ଟକ୍କର ଦେଉଛି ।

ମୋଦିଙ୍କ ସମ୍ବଲପୁର ଗସ୍ତ ପରେ ମୋଦି ଲହରକୁ ନେଇ ନିତୀଶ ବେଶ୍ ଆଶାବାଦୀ । ଅବଶ୍ୟ ଏହି ଆସନ ୨ ଦଶନ୍ଧି ହେଲା କଂଗ୍ରେସ ଏବଂ ବିଜେଡି ମଧ୍ୟରେ ସୀମିତ ରହିଛି ।

କିନ୍ତୁ ୨୦୧୪ରେ ଏଠାରୁ ବିଜେପି କଡ଼ା ପ୍ରତିଦ୍ୱନ୍ଦ୍ୱିତା କରି ହାରିଥିଲା । ଏବର୍ଷ ମଧ୍ୟ ବିଜେପି ପ୍ରାର୍ଥୀ ନିତେଶ ଗଙ୍ଗଦେବ କଡ଼ା ଟକ୍କର ଦେଉଛନ୍ତି ।

ବିଶେଷ କରି ୭ଟି ବିଧାନସଭା କ୍ଷେତ୍ରରୁ ପ୍ରାୟ ୪ଟି ଆସନରେ ବିଜେପିର ସଙ୍ଗଠନ ବେଶ୍ ସୁଦୃଢ଼ ରହିଛି । ରାଜ୍ୟରେ ପରିବର୍ତ୍ତନର ହାୱା ଚାଲିଥିବା କହି ନିଜ ବିଜୟ ଉପରେ ନିତେଶ ବେଶ୍ ଆଶାବାଦୀ ରହିଛନ୍ତିି ।

ଅପରପକ୍ଷରେ କଂଗ୍ରେସ ପ୍ରାର୍ଥୀ ଶରତ ପଟ୍ଟନାୟକ ରାଜନୀତିରେ ପକ୍କା ଖେଳାଳି । କିନ୍ତୁ ତାଙ୍କ ପ୍ରାର୍ôଥତ୍ୱକୁ ନେଇ ଜିଲ୍ଲା କଂଗ୍ରେସରେ ବିଦ୍ରୋହ ଥିବାରୁ ତାଙ୍କୁ ଦଳୀୟ କର୍ମୀ କେତେଦୂୂର ସମର୍ଥନ ଦେବେ ତାହା ଜାଣିବା କଷ୍ଟକର ।

ଯଦି କଂଗ୍ରେସର ନୂଆ-ପୁରୁଣା ସମସ୍ତ ନେତା କର୍ମୀ ହାତ ମିଳାଇବେ ତେବେ ବିଜେଡି ଓ ବିଜେପି ପ୍ରାର୍ଥୀଙ୍କୁ କଂଗ୍ରେସ ଏଠାରେ କଡ଼ା ଟକ୍କର ଦେଇପାରିବ । ନଚେତ ଦଳ ପଛରେ ପଡ଼ିବା ନିଶ୍ଚିତ ।

ବିଜେଡି ଏଠାରେ ଓହ୍ଲାଇଛି ଅବସରପ୍ରାପ୍ତ ପ୍ରଶାସକ ନଳିନୀ ପ୍ରଧାନଙ୍କୁ । ରାଜନୀତି ମୈଦାନରେ ସେ ସମ୍ପୂର୍ଣ୍ଣ ନୂଆ । ସଙ୍ଗଠନ ସମ୍ପର୍କରେ ସେ ଅଜ୍ଞ ଏବଂ କର୍ମୀଙ୍କ ସାମନାରେ ନୂଆ ମୁହଁ ।

ତେଣୁ କର୍ମୀଙ୍କ ସମ୍ପୂର୍ଣ୍ଣ ସମର୍ଥନ ପାଇବା କଷ୍ଟକର ହେଉଛି । ପ୍ରଚାର ପାଇଁ ସେ କେବଳ ଦଳୀୟ ବିଧାୟକ ଏବଂ ତୁଙ୍ଗ ନେତାଙ୍କ ଉପରେ ନିର୍ଭରଶୀଳ । ତେବେ ତାଙ୍କର ଅମୋଘ ଅସ୍ତ୍ର ହେଲା ନବୀନ ବ୍ରାଣ୍ଡ୍ ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ଏବଂ ବିଜେଡି ସରକାରର ଜନକଲ୍ୟାଣ ଯୋଜନାଗୁଡ଼ିକୁ ଆଧାର କରି ସେ ନିର୍ବାଚନ ବୈତରଣୀ ପାରି ହୋଇ ଯିବେ ବୋଲି ନଳିନୀଙ୍କର ଦୃଢ଼ ବିଶ୍ୱାସ ।

ଶନିବାର ଖୋଦ୍ ମୁଖ୍ୟମନ୍ତ୍ରୀ ମଧ୍ୟ ଏହି ଲୋକସଭା ଆସନରେ ଧୂଆଁଧାର ପ୍ରଚାର କରୁଛନ୍ତି । ଶେଷ ମୁହୂର୍ତ୍ତରେ ତାଙ୍କ ପ୍ରଚାର ସବୁ ଗଣିତକୁ ପଛରେ ପକାଇ ବିଜେଡିକୁ ବିଜୟୀ କରାଇବ ବୋଲି ଦଳର ଅନେକ ତୁଙ୍ଗ ନେତା ଆଶା ପ୍ରକାଶ କରିଛନ୍ତି ।

ଏହି ଆସନରେ ଜାତି ଭୋଟର ଧ୍ରୁବୀକରଣ ଅନେକ ସମୟରେ ପ୍ରାର୍ଥୀମାନଙ୍କ ବିଜୟରେ ବଡ଼ ଭୂମିକା ନେଇଥାଏ ବୋଲି କେତେକ ସମୀକ୍ଷକ ଦାବି କରନ୍ତି ।

୨୦୧୯ରେ ମଧ୍ୟ ଏହାର ପୁନରାବୃତ୍ତି ହେବ ବୋଲି ସେମାନେ ପୂର୍ବାନୁମାନ କରୁଥିବା ବେଳେ ଅନ୍ୟ କେତେକ ସମୀକ୍ଷକଙ୍କ ମତରେ ଏଭଳି ଭୋଟର ପ୍ରତିଶତ ନଗଣ୍ୟ ।

୨୦୦୯ ନିର୍ବାଚନ ପୂର୍ବରୁ ଲଗାତର ୩ ଥର ଏହି ଆସନରୁ ବିଜେଡିର ତୁଙ୍ଗ ନେତା ପ୍ରସନ୍ନ ଆଚାର୍ଯ୍ୟ ବିଜୟୀ ହୋଇଥିଲେ ।

ତାଙ୍କ ପୂର୍ବରୁ ବରିଷ୍ଠ କଂଗ୍ରେସ ନେତା ଡା.କୃପାସିନ୍ଧୁ ଭୋଇ ୪ ଥର କ୍ଷମତା ଦଖଲ କରିସାରିଛନ୍ତି ।

୨୦୦୯ରେ ଏଠାରେ ଲଢ଼େଇ ମୁଖ୍ୟତଃ କଂଗ୍ରେସ, ବିଜେଡି ଏବଂ ବିଜେପି ମଧ୍ୟରେ ହୋଇଥିଲା ।

କଂଗ୍ରେସ ପ୍ରାର୍ଥୀ ଅମରନାଥ ପ୍ରଧାନ ନିକଟତମ ପ୍ରତିଦ୍ୱନ୍ଦ୍ୱୀ ରୋହିତ ପୂଜାରୀଙ୍କୁ ପରାସ୍ତ କରିଥିଲେ । ୨୦୧୪ରେ ବିଜେଡି ପ୍ରାର୍ଥୀ ନଗେନ୍ଦ୍ର ପ୍ରଧାନ ନିକଟତମ ପ୍ରତିଦ୍ୱନ୍ଦ୍ୱୀ ବିଜେପିର ବରିଷ୍ଠ ନେତା ସୁରେଶ ପୂଜାରୀଙ୍କୁ ପରାସ୍ତ କରିଥିଲେ ।

ଚଳିତ ନିର୍ବାଚନରେ ମୋଟ ୧୧ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି । ବିଜେଡି, ବିଜେପି ଓ କଂଗ୍ରେସ ପ୍ରାର୍ଥୀଙ୍କ ମଧ୍ୟରେ ମୁଖ୍ୟତଃ ଲଢ଼େଇ ହେଉଥିବା ବେଳେ ଆମ୍ବେଦକର ପାର୍ଟି ଅଫ୍ ଇଣ୍ଡିଆର ବିନୟ ଓସିଏନ, ଏସୟୁସିଆଇର ନବକିଶୋର ପ୍ରଧାନ, ଆମ୍ବେଦକର ନ୍ୟାସନାଲ୍ ପାର୍ଟିର ସନ୍ତୋଷିନୀ କର୍ଣ୍ଣ, ଗଣ୍ଡୱାନା ଗଣତାନ୍ତ୍ରିକ ପାର୍ଟିର ପ୍ରଭାତ କୁମାର ଧରୁଆ, ଭାରତ ପ୍ରଭାତ ପାର୍ଟିର ଆଶୁତୋଷ କୁମାର ହନୁମାନ, ପ୍ରଗତିଶୀଳ ସମାଜବାଦୀ ପାର୍ଟିର ଆତ୍ମାରାମ୍ ସୂପକାର, ବିଏସପିର ମହମ୍ମଦ ମୁସ୍ତୁକିମ୍ ଏବଂ ସ୍ୱଧୀନ ପ୍ରାର୍ଥୀ ଭାବେ କାହ୍ନୁଚରଣ ସାନବଡ଼ ମଧ୍ୟ ଲଢ଼ୁଛନ୍ତି ।

ଲୋକାଲ ୱାୟାର

କଟକ, ଏପ୍ରିଲ ୧୯(ଲୋକାଲ ୱାୟାର): କଟକ ଜିଲ୍ଲାର ୬ଟି ବିଧାନସଭା କ୍ଷେତ୍ର ବାରବାଟୀ-କଟକ, ଚୌଦ୍ୱାର-କଟକ, କଟକ ସଦର, ବାଙ୍କୀ, ବଡମ୍ବା, ଆଠଗଡ଼ ଏବଂ ନୟାଗଡ଼ ଜିଲ୍ଲାର ଖଣ୍ଡପଡ଼ା ବିଧାନସଭା ଆସନକୁ ନେଇ କଟକ ଲୋକସଭା ନିର୍ବାଚନମଣ୍ଡଳୀ ଗଠିତ ।

ବିଗତ ତିନି ଦଶନ୍ଧି ହେଲା ୧୯୮୯ ମସିହାରୁ ଅଣକଂଗ୍ରେସ ଗଡ଼ ରହିଛି କଟକ ସଂସଦୀୟ କ୍ଷେତ୍ର ।

୧୯୮୪ରେ ଶେଷ କଂଗ୍ରେସ ପ୍ରାର୍ଥୀ ଭାବେ ଜୟନ୍ତୀ ପଟ୍ଟନାୟକ ଏଠାରୁ ନିର୍ବାଚିତ ହୋଇଥିଲେ । ଏହା ପରଠାରୁ କଂଗ୍ରେସ ପାଇଁ ଏହି ଆସନ ଅପହଞ୍ଚ ହୋଇ ଯାଇଛି ।

ତେବେ ବିଗତ ୩୦ ବର୍ଷର ଅଣକଂଗ୍ରେସ ରାଜୁତି ମଧ୍ୟରେ ଏକା ଭର୍ତ୍ତୃହରି ମହତାବ ୨୧ ବର୍ଷ କଟକ ଆସନକୁ ନିଜ ଅକ୍ତିଆରରେ ରଖିବାରେ ସଫଳ ହୋଇଛନ୍ତି ।

୧୯୯୮ ମସିହାରେ ବିଜୁ ଜନତା ଦଳ ପ୍ରାର୍ଥୀ ଭାବେ କଟକରୁ ପ୍ରଥମ ଥର ପାଇଁ ନିର୍ବାଚିତ ହେବା ପରଠାରୁ ସେ ପରାଜୟ କ’ଣ ଜାଣନ୍ତି ନାହିଁ ।

୧୯୯୮, ୧୯୯୯, ୨୦୦୪, ୨୦୦୯ ଓ ୨୦୧୪..ଏମିତି ପାଞ୍ଚ ଥର ବିଜେଡି ଟିକେଟେ ସଂସଦକୁ ଗଲେଣି ସେ ।

ଏଥର ରଣାଙ୍ଗନରେ ପୁଣି ଥରେ ଭର୍ତ୍ତୃହରି ମହାତାବଙ୍କୁ ଓହ୍ଲାଇଛି ବିଜେଡି । ଅବଶ୍ୟ ତାଙ୍କ ପ୍ରାର୍ଥିତ୍ୱ ଘୋଷଣାରେ ଯଥେଷ୍ଟ ବିଳମ୍ବ ହୋଇଥିଲା ।

ତଥାପି ଭର୍ତ୍ତୃହରି ଖୁସ୍ । ୨୦୧୪ ନିର୍ବାଚନରେ ସେ ବିପୁଳ ଭୋଟରେ ବିଜୟୀ ହୋଇଥିବାରୁ ଚଳିତ ନିର୍ବାଚନରେ ମଧ୍ୟ ପ୍ରତିଦ୍ୱନ୍ଦ୍ୱୀଙ୍କୁ ସହଜରେ ହରାଇବାର ଆତ୍ମବିଶ୍ୱାସ ରଖିଛନ୍ତି ସେ ।

ଅନ୍ୟପକ୍ଷରେ କଂଗ୍ରେସ ମୈଦାନରେ ଛାଡ଼ିଛି ଭେଟେରାନ୍ ନେତା ପଞ୍ଚାନନ କାନୁନଗୋ । ଏକଦା ସେ ର‌୍ୟା ରାଜନୀତିରେ ଜଣେ ପ୍ରଖର ଅଣ-କଂଗ୍ରେସ ନେତା ଭାବେ ପରିଚିତ ଥିଲେ ।

କିନ୍ତୁ ଏବେ କଂଗ୍ରେସର ହାତ ଧରି କଟକ ରଣାଙ୍ଗନରେ ଭାଗ୍ୟ ପରୀକ୍ଷା କରୁଛନ୍ତି । ତାଙ୍କୁ କଂଗ୍ରେସର କର୍ମୀମହଲ କେତେଦୂର ସମର୍ଥନ ଜଣାଇବେ ଏବଂ ଭାଙ୍ଗି ଯାଇଥିବା କଂଗ୍ରେସ ଗଡ଼କୁ ସେ ପୁଣି ସଜାଡ଼ିବାରେ କ’ଣ ସକ୍ଷମ ହେବେ? ତାହା ଭବିଷ୍ୟତ କହିବ ।

ତେବେ ବିଜେପି ଏଠାରେ ପୁରୁଣା ରାଜନୈତିକ ମୁହଁ ବଦଳରେ ନୂଆ ମୁହଁ ଭାବେ ପୂର୍ବତନ ପୁଲିସ ଡିଜି ପ୍ରକାଶ ମିଶ୍ରଙ୍କୁ ପ୍ରାର୍ଥୀ କରିଛି ।

ଏହା ଦଳର ନେତା ଏବଂ କର୍ମୀମାନଙ୍କ ସମ୍ମୁଖରେ ଥିଲା ଏକ ଅଚାନକ ନିଷ୍ପତ୍ତି । ଗତ ପଂଚାୟତ ନିର୍ବାଚନରେ ଦଳ ଜିଲ୍ଲାର ଅନେକ ସ୍ଥାନରେ କଂଗ୍ରେସକୁ ତୃତୀୟ ସ୍ଥାନକୁ ଠେଲି ଦେଇ ବିଜେପି ବିଜେଡି ସହ ମୁକାବିଲାକୁ ଓହ୍ଲାଇଥିବା ଦେଖିବାକୁ ମିଳିଥିଲା ।

କିନ୍ତୁ ପ୍ରକାଶ ଏଥିରୁ ଫାଇଦା ଉଠାଇ ପାରିବେତ? ଜିଲ୍ଲାରେ ଥିବା ବିଜେପି କ୍ୟାଡର ବେସ୍ ତାଙ୍କୁ ସମର୍ଥନ କରୁଛି ତ? ପ୍ରକାଶ ଏବେ ଗାଁ ଗାଁ ବୁଲିି ଜନସମର୍ଥନ ଯୋଗାଡ଼ କରିବାରେ ଲାଗିଛନ୍ତି ।

ତାଙ୍କ ନାମ ସହ ବୁଦ୍ଧିଜୀବୀମାନେ ପୂର୍ବରୁ ବେଶ୍ ପରିଚିତ ଏହା ସତ୍ୟ । କିନ୍ତୁ ସେ ରାଜନୈତିକ ଚେହେରା ନୁହଁନ୍ତି ।

ତେଣୁ ଗ୍ରାମାଞ୍ଚଳ ଭୋଟ ତାଙ୍କ ସପକ୍ଷରେ ଯିବା କଷ୍ଟକର ହୋଇପାରେ ବୋଲି ସମୀକ୍ଷକମାନେ ଅନୁମାନ କରୁଛନ୍ତି ।

୨୦୧୪ ନିର୍ବାଚନ ବିଜେଡି ପାଇଁ ଏକତରଫା ବିଜୟ ଥିଲା । ପ୍ରାୟ ୩ ଲକ୍ଷରୁ ଅଧିକ ଭୋଟ୍ ବ୍ୟବଧାନରେ କଂଗ୍ରେସ ସାଂସଦ ପ୍ରାର୍ଥୀ ଅଭିନେତ୍ରୀ ଅପରାଜିତା ମହାନ୍ତିଙ୍କୁ ପରାସ୍ତ କରିଥିଲେ ଭର୍ତ୍ତୃହରି ।

ଶ୍ରୀ ମହତାବ ମୋଟ୍ ୫ ଲକ୍ଷ ୨୬ ହଜାର ୮୫ ଖଣ୍ଡ ଭୋଟ ପାଇଥିବା ବେଳେ ନିକଟତମ ଅପରାଜିତା ପାଇଥିଲେ ମାତ୍ର ୨ ଲକ୍ଷ ୧୯ ହଜାର ୩୨୩ ଖଣ୍ଡ ଭୋଟ୍ ।

ତୃତୀୟ ସ୍ଥାନରେ ଥିଲେ ବିଜେପି ପ୍ରାର୍ଥୀ ତଥା ପୂର୍ବତନ ମନ୍ତ୍ରୀ ସମୀର ଦେ ।ତାଙ୍କୁ ମିଳିଥିଲା ପାଖାପାଖି ଦେଢ଼ ଲକ୍ଷ ଭୋଟ୍ ।

ଏଥର ଭର୍ତ୍ତୃହରିଙ୍କ ପାଇଁ ସମସ୍ୟା ଛିଡ଼ା କରିଛନ୍ତି ବିଜେପିର କେନ୍ଦ୍ରୀୟ ନେତା । ସେମାନଙ୍କ ଘନ ଘନ ପ୍ରଚାର ବିଜେଡି ଭୋଟବ୍ୟାଙ୍କକୁ ଭାଙ୍ଗି ଦେବାର ସମ୍ଭାବନା ଅଛି ବୋଲି ଖୋଦ୍ ବିଜେଡିର କେତେକ ଯୁବ ନେତା ପ୍ରକାଶ କରୁଛନ୍ତି ।

ଅବଶ୍ୟ ବିଭିନ୍ନ ବିଧାନସଭା କ୍ଷେତ୍ରର ବିଜେଡିର ସ୍ଥିତି ଅନ୍ୟ ଦୁଇ ଦଳ ତୁଳନାରେ ବେଶ୍ ସୁଦୃଢ଼ । କିନ୍ତୁ ସାଂସଦ ପ୍ରାର୍ଥର୍ୀଙ୍କ ସପକ୍ଷରେ ଏହି ଭୋଟ ରୂପାନ୍ତରିତ ହେବା ପଥରେ ମୋଦି ଲହରୀ ପ୍ରତିବନ୍ଧକ ହୋଇପାରେ ବୋଲି କୁହାଯାଉଛି ।

ପୂର୍ବର୍ରୁ ପ୍ରତି ନିର୍ବାଚନରେ ଭର୍ତ୍ତୃହରିଙ୍କ ସମ୍ମୁଖରେ ପ୍ରତିଦ୍ୱନ୍ଦ୍ୱୀ ଭାବେ ରହୁଥିଲେ କଂଗ୍ରେସ ପ୍ରାର୍ଥୀ । କିନ୍ତୁ ସମ୍ଭବତଃ ପ୍ରଥର ଥର ପାଇଁ ବିଜେପି ସହ ସିଧାସଳଖ ତାଙ୍କର ଲଢ଼େଇ ହେବ ।

ଉଲ୍ଲେଖଯୋଗ୍ୟ, ରାଜ୍ୟର ଏକ ଗୌରବମୟ ଲୋକସଭା ଆସନ ଭାବେ କଟକ ପରିଚିତ । କଟକ ଲୋକସଭାରୁ ନିର୍ବାଚିତ ଏକାଧିକ ସାଂସଦ କ୍ୟାରିଅର ଭିତରେ ରାଜ୍ୟପାଳ, ମୁଖ୍ୟମନ୍ତ୍ରୀ ଓ କେନ୍ଦ୍ରମନ୍ତ୍ରୀ ଭଳି ଉଚ୍ଚ ପଦବି ଅଧିକାର କରିବାରେ ସକ୍ଷମ ହୋଇଛନ୍ତି ।

କଟକ ଲୋକସଭାକୁ ତିନି ଜଣ ମୁଖ୍ୟମନ୍ତ୍ରୀ, ତିନି ଜଣ ରାଜ୍ୟପାଳ, ଚାରିଜଣ କେନ୍ଦ୍ରମନ୍ତ୍ରୀ ଅତୀତରେ ପ୍ରତିନିଧିତ୍ୱ କରିଛନ୍ତି ।

ଓଡ଼ିଶାର ପ୍ରଥମ ମୁଖ୍ୟମନ୍ତ୍ରୀ ହରେକୃଷ୍ଣ ମହତାବ, ତିନି ଥର ମୁଖ୍ୟମନ୍ତ୍ରୀ ପଦବି ଅଳଙ୍କୃତ କରିଥିବା ବରିଷ୍ଠ କଂଗ୍ରେସ ନେତା ଜାନକୀ ବଲ୍ଲଭ ପଟ୍ଟନାୟକ ଓ ଦୁଇ ଥର ମୁଖ୍ୟମନ୍ତ୍ରୀ ହୋଇଥିବା ବିଜୁ ପଟ୍ଟନାୟକ ଅତୀତରେ କଟକ ଲୋକସଭାର ସାଂସଦ ଥିଲେ ।

ହରେକୃଷ୍ଣ ମହତାବ ୧୯୫୨ ମସିହାରେ, ଜାନକୀ ବଲ୍ଲଭ ପଟ୍ଟନାୟକ ୧୯୭୧ ଓ ୧୯୮୦ରେ, ବିଜୁ ପଟ୍ଟନାୟକ ୧୯୯୬ରେ କଟକ ସାଂସଦ ଭାବେ ନିର୍ବାଚିତ ହୋଇଥିଲେ ।

କଟକରୁ ସାଂସଦ ଭାବେ ନିର୍ବାଚିତ ନିତ୍ୟାନନ୍ଦ କାନୁନଗୋ ରାଜ୍ୟପାଳ ପଦବି ମଧ୍ୟ ଅଳଙ୍କୃତ କରିଥିଲେ ।

ହରେକୃଷ୍ଣ ମହତାବ ବମ୍ବେର ରାଜ୍ୟପାଳ ରହିଥିବା ବେଳେ କଟକରୁ ଦୁଇ ଥର ନିର୍ବାଚିତ ନିତ୍ୟାନନ୍ଦ କାନୁନଗୋ ପରବର୍ତ୍ତୀ ସମୟରେ ଗୁଜରାଟର ରାଜ୍ୟପାଳ ଭାବେ ନିଯୁକ୍ତି ପାଇଥିଲେ ।

ଜାନକୀବଲ୍ଲଭ ଆସାମର ରାଜ୍ୟପାଳ ଭାବେ ଦାୟିତ୍ୱ ନିର୍ବାହ କରିଥିଲେ । ତେଣୁ ଏଭଳି ଏକ ସମ୍ମାନଜନକ ଆସନରେ କିଏ ଜିଣିବ ତାହା କେବଳ ଭୋଟ ଗଣତି ପରେ ସ୍ପଷ୍ଟ ହେବ ।

ଲୋକାଲ ୱାୟାର

ପୁରୀ, ଏପ୍ରିଲ ୧୮(ଲୋକାଲ ୱାୟାର): ମହାପ୍ରଭୁ ଜଗନ୍ନାଥଙ୍କ ଧାମ ଶ୍ରୀକ୍ଷେତ୍ର ପୁରୀ । ପୁରୀ ଲୋକସଭା ଆସନ ଉପରେ କେବଳ ଓଡ଼ିଶା ନୁହେଁ ସମଗ୍ର ଦେଶର ନଜର । ଏଠାରେ ବିଜୟ ଧ୍ୱଜା ବାନ୍ଧିବାକୁ ସମସ୍ତ ରାଜନୈତିକ ଦଳର ଆଗ୍ରହ ହେବା ସ୍ୱାଭାବିକ ।

୨୦୧୯ ନିର୍ବାଚନ ପାଇଁ ପୁରୀ ଲୋକସଭା ଆସନରେ ବିଜ ଜନତା ଦଳ ତାର ଜଣେ ବରିଷ୍ଠ ଳଢ଼ୁଆ ରାଜନେତା ପିନାକୀ ମିଶ୍ରଙ୍କୁ ଛିଡ଼ା କରାଇଛି । ବିଜେପି ଦଳର ରାଷ୍ଟ୍ରୀୟ ମୁଖପାତ୍ରଙ୍କୁ ମୈଦାନରେ ଓହ୍ଲାଇଥିବା ବେଳେ କଂଗ୍ରେସର ଟିକେଟ ହାତେଇଛନ୍ତି ନବାଗତ ସତ୍ୟ ପ୍ରକାଶ ନାୟକ ।

୭ଟି ବିଧାନସଭା କ୍ଷେତ୍ର; ପୁରୀ, ବ୍ରହ୍ମଗିରି, ସତ୍ୟବାଦୀ, ଚିଲିକା, ପିପିଲି, ରଣପୁର ଓ ନୟାଗଡ଼କୁ ନେଇ ଗଠିତ ହୋଇ ପୁରୀ ଲୋକସଭା କ୍ଷେତ୍ର ।

୧୯୯୮ରୁ କ୍ରମାଗତ ଏହି ଆସନରେ ବିଜେଡି ବିଜୟୀ ହୋଇ ଚାଲିଛି । ତେଣୁ ପିନାକୀ ଚଳିତ ନିର୍ବାଚନ ତାଙ୍କ ପାଇଁ ସହଜ ହେବ ବୋଲି ଆଶା କରିଛନ୍ତି । ଗତ ଦୁଇଟି ନିର୍ବାଚନରେ ସେ ଥରେ ବିଜେପି ଓ ଥରେ କଂଗ୍ରେସ ପ୍ରାର୍ଥୀଙ୍କୁ ହରାଇଛନ୍ତି ।

ସେ ପୁରୀ ଆସନରେ ଚିହ୍ନା ମୁହଁ । ଏଥିସହ ଏହା ଅନ୍ତର୍ଜତ ବିଭିନ୍ନ ବିଧାନସଭା କ୍ଷେତ୍ରରେ ବିଜେଡି ନେତାଙ୍କ ଦବଦବା ରହିଆସିଛି । ବିଜେଡି ସରକାରଙ୍କ ଜନାଭିମୁଖୀ କାର୍ଯ୍ୟକ୍ରମ ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ଆଧାରରେ ପିନାକୀ ଭୋଟ ପ୍ରଚାର ଚଳାଇଛନ୍ତି ।

ବିଜେପି ପ୍ରାର୍ଥୀ ସମ୍ବିତ ପାତ୍ର ଦଳର ମୁଖପାତ୍ର ଭାବେ ଟିଭି ପରଦାରେ ସମସ୍ତଙ୍କ ପାଇଁ ଚିହ୍ନା ମୁହଁ କହିଲେ ଅତ୍ୟୁକ୍ତି ହେବ ନାହିଁ । ଟିକେଟ ପାଇବା ପରଠାରୁ ପ୍ରଭୁ ଜଗନ୍ନାଥଙ୍କ ନାମକୁ ଆଶ୍ରା କରି ଭୋଟ ପ୍ରଚାର ଚଳାଇଛନ୍ତି ।

୨୦୦୯ରେ ଏଠାରେ ବିଜେପି ପ୍ରଥମ ଥର ପ୍ରାର୍ଥୀ ଦେଇ ୨୩% ଭୋଟ ପାଇପାରିଥିଲା । ସମ୍ବିତ ଏବେ ଭୋଟ ପ୍ରଚାର ଯେତିକି କରୁଛନ୍ତି, ଧୋତି ଗାମୁଛା ପିନ୍ଧି ଘର ଘର ବୁଲିବା ସହ ନିଜକୁ ଶ୍ରୀଜଗନ୍ନାଥଙ୍କ ବଡ଼ ଭକ୍ତ ଭାବେ ମଧ୍ୟ ପରିଚୟ ଦେବାକୁ ସେତିକି ଚେଷ୍ଟା କରୁଛନ୍ତି ।

ତାଙ୍କର ବଡ଼ ଅସ୍ତ୍ର ମୋଦି ଲହରୀ । ତାଙ୍କ ମତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନୀତି ଆଦର୍ଶରେ ଲୋକେ ପ୍ରଭାବିତ ହୋଇଛନ୍ତି ଏବଂ ଓଡ଼ିଶାରେ ଏବେ ପରିବର୍ତ୍ତନର ହାୱା ପ୍ରବାହିତ ହେଉଛି । ଏହା ତାଙ୍କୁ ବିଜୟ ପଥରେ ନେଇ ଯିବ ବୋଲି ସେ କୁହନ୍ତି ।

ଅପରପକ୍ଷରେ ସତ୍ୟପ୍ରକାଶ ନାୟକ ସାମ୍ବାଦିକତାରୁ ରାଜନୀତିକୁ ଡେଇଁଛନ୍ତି । ରାଜ୍ୟର ଭିନ୍ନ ଭିନ୍ନ ଚ୍ୟାନେଲରେ ଟକ୍ ସୋ କରି ସେ ଗଣମାଧ୍ୟମରେ ସ୍ୱତନ୍ତ୍ର ପରିଚୟ ପାଇଥିଲେ । ଘର ତାଙ୍କର ଭଦ୍ରକରେ । ପୂର୍ବରୁ ତାଙ୍କ ଭାଇ ରାଜନୀତିରେ ରହିଛନ୍ତି ।

ସତ୍ୟପ୍ରକାଶ ଅଚାନକ କଂଗ୍ରେସରେ ଯୋଗ ଦେଇ ପିସିସି ମୁଖପାତ୍ର ହୋଇଥିଲେ ଏବଂ ପୁରୀ ସଂସଦୀୟ କ୍ଷେତ୍ରରୁ ପ୍ରାର୍ଥୀ ମଧ୍ୟ ହୋଇଗଲେ । ବିଭିନ୍ନ ବିଧାନସଭା କ୍ଷେତ୍ରରେ କଂଗ୍ରେସର ନିଜସ୍ୱ ପାରମ୍ପରିକ ଭୋଟ ବ୍ୟାଙ୍କ ଥିବା ତାଙ୍କର ଯୁକ୍ତି ।

ଏଥିସହ ରାହୁଲ ଗାନ୍ଧୀଙ୍କ ଯୁବ ନେତୃତ୍ୱ ପ୍ରତି ଭୋଟର ଏବେ ଆସ୍ଥା ପ୍ରକଟ କରିବେ ବୋଲି ସେ ଆଶା ବାନ୍ଧିଛନ୍ତି ।। ୨୦୦୯ ପୂର୍ବରୁ ବିଜେଡି-ବିଜେପି ମେଣ୍ଟ ଥିବା ବେଳେ ଚିଲିକା ଆସନକୁ ବିଜେପି ତିନିଥର ଦଖଲ କରିଥିଲା ।

ଅତୀତକୁ ଦୃଷ୍ଟି ପକାଇଲେ, ଏହି ସଂସଦୀୟ ଆସନର ବିଧାନସଭା କ୍ଷେତ୍ର ଗୁଡ଼ିକ ମଧ୍ୟରେ ପୁରୀ, ନୟାଗଡ଼ ଓ ପିପିଲିରେ ବିଜେଡି କ୍ରମାଗତ ବିପୁଳ ବିଜୟ ଜାରି ରଖିବାରେ ସଫଳ ହୋଇଛି

୨୦୦୯ରେ ବିଜେଡି ଜିତିଥିଲା । ରଣପୁରରେ ବି ବିଜେପି ଥିଲା । କିନ୍ତୁ ପରେ ବିଜେଡି ଦୁଇଥର ହାତେଇପାରିଛି ।

ଅବଶ୍ୟ ସତ୍ୟବାଦୀ ଆସନ ଉଭୟ ଦଳକୁ ଅଡ଼ୁଆ । ଏଠାରେ ସବୁବେଳେ କଂଗ୍ରେସ କିମ୍ବା ସ୍ୱାଧୀନ ପ୍ରାର୍ଥୀ ବିଜୟୀ ରହିଛନ୍ତି । ବ୍ରହ୍ମଗିରିରେ ବିଜେଡି-କଂଗ୍ରେସ ମୁକାବିଲାର ଚିତ୍ର ସମଗ୍ର ରାଜ୍ୟବାସୀ ଜାଣନ୍ତି ।

ଏଠାରେ ୨୦୦୦ ପରେ ଦୁଇଥର ବିଜେଡି ଓ ଦୁଇଥର କଂଗ୍ରେସ ବିଜୟୀ ହୋଇଛନ୍ତି । ତେବେ ଦିବଙ୍ଗତ ନେତା ଲଲାଟେନ୍ଦୁ ବିଦ୍ୟାଧର ମହାପାତ୍ର (ଲୁଲୁ)ଙ୍କ ପରଲୋକ ପରେ କଂଗ୍ରେସ ଦୁର୍ଗ ଏଠାରେ ଭୁଶୁଡ଼ି ପଡ଼ିଛି ଏବଂ ତାଙ୍କ ପରିବାର ପଦ୍ମ ଧରିଛନ୍ତି ।

ତେବେ ସତ୍ୟପ୍ରକାଶ ଏଥର ଲୁଲୁଙ୍କ ପୁରୁଣା ସହଯୋଗୀମାନଙ୍କୁ ନିଜ ପକ୍ଷକୁ ନେବାକୁ ଉଦ୍ୟମ ଚଳାଇଛନ୍ତି । ଏହି ଲୋକସଭା ନିର୍ବାଚନମଣ୍ଡଳୀରେ ମୋଟ ୧୪ ଲକ୍ଷ ୪ ହଜାର ୫୮୧ ଜଣ ମତଦାତା ରହିଛନ୍ତି ।

ଏଠାରୁ ଭିନ୍ନ ଭିନ୍ନ ସମୟରେ କଂଗ୍ରେସର ବ୍ରଜମୋହନ ମହାନ୍ତି ଦୁଇଥର, ଜନତା ଦଳର ନୀଳମଣି ରାଉତରାୟ ଥରେ, ଜନତା ଦଳ ଓ ବିଜେଡିରୁ ବ୍ରଜକିଶୋର ତ୍ରିପାଠୀ ୪ ଥର, କଂଗ୍ରେସ ଓ ବିଜେଡିରୁ ପିନାକୀ ମିଶ୍ର ୩ ଥର ବିଜୟ ସ୍ୱାଦ ପାଇଛନ୍ତି ।

ଚଳିତ ନିର୍ବାଚନରେ ପ୍ରମୁଖ ତିନି ଦଳକୁ ଛାଡ଼ିଦେଲେ ବହୁଜନ ସମାଜ ପାର୍ଟିର ନୃସିଂହ ଚରଣ ଦାସ, ଅଖିଳ ଭାରତ ହିନ୍ଦୁ ମହାସଭାର ଜୟପ୍ରକାଶ ସେଠୀ, ସିପିଆଇ-ଏମଏଲ ଲିବରେସନର ମନ୍ଦାକିନୀ ସେଠୀ, ସିପିଆଇ-ଏମଏଲ ରେଡଷ୍ଟାରର ରଞ୍ଜନ ମିଶ୍ର ଏବଂ କଳିଙ୍ଗ ସେନାର ସବ୍ୟସାଚୀ ମହାପାତ୍ର ମୈଦାନରେ ଅଛନ୍ତି । କିନ୍ତୁ ଏମାନଙ୍କ ମଧ୍ୟରୁ ନିର୍ବାଚନ ଫଳକୁ ପ୍ରଭାବିତ କରିବାର କ୍ଷେମତା କାହାରି ନାହିଁ କହିଲେ ଚଳେ ।

ଭୋଟ ଗଣତି ପରେ ଜଣାପଡ଼ିବ ବିଜେଡି, ବିଜେପି କିମ୍ବା କଂଗ୍ରେସ କାହା ମୁଣ୍ଡରେ ଭୋଟର ବିଜୟ ଧ୍ୱଜା ବାନ୍ଧିଛନ୍ତି ।

ଲୋକାଲ ୱାୟାର

କେନ୍ଦୁଝର, ଏପ୍ରିଲ ୧୭(ଲୋକାଲ ୱାୟାର): ଏକଦା କଂଗ୍ରେସର ଦବଦବା ଥିବା କେନ୍ଦୁଝର ଲୋକସଭା ଆସନରେ ୧୯୯୮ ପରଠାରୁ ଅଣ-କଂଗ୍ରେସ ଦଳ ଗୁଡ଼ିକର ରାଜୁତି ଚାଲିଛି । ଖଣି, ଖାଦାନ, ଜଙ୍ଗଲ ଓ ଆଦିବାସୀଙ୍କ ପାଇଁ ରାଜ୍ୟ ରାଜନୀତିରେ ଗୁରୁତ୍ୱ ବହନ କରୁଥିବା ଏହି ଆସନରେ ଏଥର ତ୍ରିମୁଖୀ ଲଢ଼େଇ ଚାଲିଛି ।

ଏଥର ଏହି ଆସନରେ ବିଜେପି ଦଳର ପୁରୁଣା ମୁହଁ ଅନନ୍ତ ନାୟକଙ୍କୁ ମୈଦାନରେ ଛାଡ଼ିଥିବା ବେଳେ କଂଗ୍ରେସ ନବାଗତ ମୋହନ ହେମ୍ବ୍ରମ ଏବଂ ବିଜେଡି ନବାଗତା ଚନ୍ଦ୍ରାଣୀ ମୁର୍ମୁଙ୍କୁ ପ୍ରାର୍ଥୀ କରିଛି ।

ବିଜେପି ପ୍ର୍ରାର୍ଥୀ ଅନନ୍ତ ନାୟକ (୪୯) ବିଜେପିରୁ ଦୁଇ ଥର ସାଂସଦ ଭାବେ ଏହି ଆସନରୁ ପ୍ରତିନିଧିତ୍ୱ କରିଛନ୍ତି । ଡିପ୍ଲୋମା ଇଞ୍ଜିନିୟର ଅନନ୍ତ ପଞ୍ଚମ ଥର ପାଇଁ ଦଳୀୟ ପ୍ରାର୍ଥୀ ହୋଇଛନ୍ତି । ଜିଲ୍ଲାରେ ଜଣେ ଅଭିଜ୍ଞ ରାଜନେତା ଭାବେ ସେ ପରିଚିତ ଏବଂ ଦୁଇ ଦଶନ୍ଧି ଧରି ଜନସାଧାରଣଙ୍କ ସହ ଅଛନ୍ତି ।

ଜିଲ୍ଲାର ନିର୍ଦ୍ଦିଷ୍ଟ କେତେକ ଅଞ୍ଚଳରେ ତାଙ୍କର ଦୃଢ଼ ସଙ୍ଗଠନ ମଧ୍ୟ ରହିଛି । ତେଣୁ କେନ୍ଦୁଝର ଆସନ ନିଜ ଖାତାକୁ ନିଶ୍ଚିତ ଯିବ ବୋଲି ବିଜେପି ମୁଖିଆ ମାନେ ଆଶା ରଖିଛନ୍ତି ।

ଅପରପକ୍ଷରେ ମାତ୍ର ୨୫ ବର୍ଷ ବୟସରେ ଶାସକ ବିଜେଡିର ଟିକେଟ ପାଇବାରେ ସଫଳ ହୋଇଛନ୍ତି ଚନ୍ଦ୍ରାଣୀ ମୁର୍ମୁ । କୁହାଯାଉଛି ସେ ୨୦୧୯ ନିର୍ବାଚନରେ ରାଜ୍ୟର ସର୍ବକନିଷ୍ଠ ପ୍ରାର୍ଥୀ । ତେବେ ତାଙ୍କର ବଡ଼ ପରିଚୟ ହେଲା ସେ ପୂର୍ବାତନ କଂଗ୍ରେସ ସାଂସଦ ହରିହର ସୋରେନଙ୍କ ନାତୁଣୀ ।

ରାଜନୀତିରେ ନବାଗତ ହୋଇଥିଲେ ମଧ୍ୟ ସେ ଅଞ୍ଚଳରୁ ଅଞ୍ଚଳ ବୁଲି ନିଜର ଲୋକସମ୍ପର୍କ ବଢ଼ାଇବାରେ ସଫଳ ହେଉଛନ୍ତି ।

ଚଳିତ ନିର୍ବାଚନରେ ତାଙ୍କ ଭୂମିକା ବେଶ୍ ଗୁରୁତ୍ୱପୂର୍ଣ୍ଣ ବୋଲି ସମୀକ୍ଷକମାନେ କୁହନ୍ତି ।

କାରଣ କେନ୍ଦୁଝର ରାଜନୀତିରେ ନିଜର ସ୍ୱତନ୍ତ୍ର ପରିଚୟ ରଖିଥିବା ଚମ୍ପୁଆ ବିଧାୟକ ସନାତନ ମହାକୁଡ଼ଙ୍କ ଆଶୀର୍ବଦ ଚନ୍ଦ୍ରାଣୀଙ୍କ ଉପରେ ରହିଛି । କୁହାଯାଉଛି ସନାତନ ହିଁ ଚନ୍ଦ୍ରାଣୀଙ୍କୁ ରାଜନୀତିକୁ ଆଣିଛନ୍ତି ।

ଏପରିକି ଯେଉଁ ଦିନ ଚନ୍ଦ୍ରାଣୀ ନାମାଙ୍କନ ପତ୍ର ଦାଖଲ କଲେ, ତାଙ୍କ ସହ ସନାତନ ଉପସ୍ଥିତ ଥିବା ଦେଖିବାକୁ ମିଳିଥିଲା । ସନା ସେନା ରୂପରେ ହେଉ କିମ୍ବା ସନାତନଙ୍କ ସମର୍ଥକ ଭାବେ ହେଉ ଜିଲ୍ଲାର ଅନେକ ସ୍ଥାନରେ ତାଙ୍କର ଲୋକପ୍ରିୟତା ରହିଛି ।

ଏହା ହିଁ ଚନ୍ଦ୍ରାଣୀଙ୍କ ପାଇଁ ନିର୍ବାଚନକୁ ସହଜ କରିବ ବୋଲି ଆଶା କରାଯାଇଛି ।କଂଗ୍ରେସର ନବାଗତ ପ୍ରାର୍ଥୀ ମୋହନ ହେମ୍ବ୍ରମଙ୍କ ପାଇଁ ରାଜନୀତି ନୁଆ ନୁହେଁ ।

ସେ ଏକଦା ଭୁବନେଶ୍ୱରରେ କର୍ପୋରେଟର ଭାବେ କାର୍ଯ୍ୟ କରୁଥିଲେ । ତାଙ୍କୁ ଦଳ ପ୍ରଥମେ ତେଲକୋଇ ବିଧାନସଭା ଆସନରେ ପ୍ରାର୍ଥୀ କରିଥିଲା । ପରେ ଟିକେଟ ବଦଳାଇ ତାଙ୍କୁ ଲୋକସଭା ଆସନରେ ପ୍ରାର୍ଥୀ କରାଯାଇଛି ।

ଏହା ପିସିସି ସଭାପତି ନିରଞ୍ଜନ ପଟ୍ଟନାୟକ ଏବଂ ପୂର୍ବତନ ପିସିସି ସଭାପତି ଜୟଦେବ ଜେନାଙ୍କ ନିଜ ଜିଲ୍ଲା ହୋଇଥିଲେ ମଧ୍ୟ ବିଗତ ବର୍ଷ ମାନଙ୍କରେ ଦଳର ସାଙ୍ଗଠନିକ ରୂପ ଏଠାରେ ବିଗିଡ଼ିବାରେ ଲାଗିଛି ।

ତେଣୁ ମୋହନ ଏହାକୁ କେତଦୂର ସଜାଡ଼ି ପାରିବେ ଏବଂ ଜିଲ୍ଲା ବାସୀଙ୍କ ଭରସା ଜିତିବେ ତାହା ଉପରେ ସମୀକ୍ଷକମାନେ ପ୍ରଶ୍ନବାଚୀ ଲଗାଉଛନ୍ତି ।

ତେବେ କେନ୍ଦୁଝର ଜିଲ୍ଲାରେ ବିଧାୟକ ସନାତନ ସମସ୍ତ ରାଜନୈତିକ ଦଳ ସହ ସମାନ୍ତରାଳ ଭାବେ ନିଜର ଏକ ସଙ୍ଗଠନ ଚଳାଇଥିବାରୁ ତାଙ୍କ ସମର୍ଥନ ଉପରେ ପ୍ରାର୍ଥୀମାନଙ୍କ ହାରଜିତ ନିର୍ଭର କରୁଛି ।

ଯଦି ତାଙ୍କ ସଙ୍ଗଠନର ତୃଣମୂଳ କର୍ମୀମାନେ ବିଜେଡି ସହ ଥିବା ଶତ୍ରୁତାକୁ ଭୁଲି ମୈଦାନକୁ ଓହ୍ଲାଇନ୍ତି ତେବେ ବିଜେଡି ପାଇଁ ନିର୍ବାଚନ ବୈତରଣୀ ସହଜ ହୋଇଯିବ ।

କିନ୍ତୁ ଯଦି ସନାତନଙ୍କ ସଙ୍ଗଠନ ବିଜେଡି ଠାରୁ ଦୂରତ୍ୱ ରକ୍ଷା କରେ ତେବେ ଏହା ବିଜେପି ଓ କଂଗ୍ରେସକୁ ପରୋକ୍ଷ ଭାବେ ଲାଭଦାୟକ ହେବ ବୋଲି କୁହାଯାଉଛି ।

ଏହି ୩ ପ୍ରମୁଖ ପ୍ରାର୍ଥୀଙ୍କୁ ଛାଡ଼ିଦେଲେ ଅନ୍ୟ ୫ ଜଣ ପ୍ରାର୍ଥୀ ମଧ୍ୟ ଲଢ଼େଇରେ ଅଛନ୍ତି ।

ସେମାନେ ହେଲେ ବହୁଜନ ସମାଜ ପାର୍ଟିରୁ ଦୁର୍ଗା ଚନ୍ଦ୍ର ପିଙ୍ଗୁଆ, ଅଲ ଇଣ୍ଡିଆ ଫରୱାର୍ଡ ବ୍ଲକରୁ ପ୍ରଫୁଲ୍ଲ ନାୟକ, ବହୁଜନ ମୁକ୍ତି ପାର୍ଟିରୁ ରମେଶ ଲାଗୁରୀ, ରାଷ୍ଟ୍ରୀୟ ସ୍ୱାଧୀନ ମୋର୍ଚ୍ଚାରୁ ଡାକ୍ତର ସୁଦର୍ଶନ ଲୋହାର ଏବଂ ଅଖିଳ ଭାରତ ହିନ୍ଦୁ ମହାସଭାରୁ ଲାଲମୋହନ ହାଁସଦାଃ ପ୍ରାର୍ଥୀ ହୋଇଛନ୍ତି ।

ଉଲ୍ଲେଖଯୋଗ୍ୟ, ୧୯୫୧-୫୨ ପ୍ରଥମ ଲୋକସଭା ନିର୍ବାଚନରେ ଏହି ଆସନ କେନ୍ଦୁଝର, ଯାଜପୁର ନିର୍ବାଚନମଣ୍ଡଳୀ ଭାବେ ପରିଚିତ ଥିଲା । କଂଗ୍ରେସର ଭୁବନାନନ୍ଦ ଦାସ ପ୍ରଥମ ସାଂସଦ ଭାବେ ନିର୍ବାଚିତ ହୋଇଥିଲେ । ୧୯୫୭ ମସିହାରେ ଏହି ନିର୍ବାଚନମଣ୍ଡଳୀ ଗଠନ ହୋଇଥିଲା ।

ସେବେଠାରୁ ଏହି ଭିନ୍ନ ଭିନ୍ନ ସମୟରେ ସ୍ୱାଧୀନ ଏବଂ କଂଗ୍ରେସ ପ୍ରାର୍ଥୀ ଭାବେ ଲକ୍ଷ୍ମୀନାରାୟଣ ଭଞ୍ଜଦେଓ ଦୁଇଥର, ସ୍ୱତନ୍ତ୍ର ପାର୍ଟିର ଗୁରୁଚରଣ ନାଏକ ଥରେ, କଂଗ୍ରେସ ପ୍ରାର୍ଥୀ କୁମର ମାଝୀ, ଭାରତୀୟ ଲୋକଦଳ ଏବଂ ଜନତା ଦଳରୁ ଗୋବିନ୍ଦ ମୁଣ୍ଡା ତିନିଥର, କଂଗ୍ରେସରୁ ହରିହର ସୋରେନ୍ ଦୁଇଥର, କଂଗ୍ରେସରୁ ମାଧବ ସର୍ଦ୍ଦାର, ବିଜେପିରୁ ଉପେନ୍ଦ୍ରନାଥ ନାଏକ, ବିଜେପିରୁ ଅନନ୍ତ ନାଏକ ଦୁଇଥର,ବିଜେଡିରୁ ଯଶୋବନ୍ତ ନାରାୟଣ ସିଂ ଲାଗୁରୀ ଏବଂ ତାଙ୍କ ପତ୍ନୀ ଶକୁନ୍ତଳା ଲାଗୁରୀ ବିିଜୟୀ ହୋଇଛନ୍ତି ।

ନିର୍ବାଚନରେ ତିନି ପ୍ରମୁଖ ଦଳ କଂଗ୍ରେସ, ବିଜେଡି ଏବଂ ବିଜେପିର ରଣନୀତି ଅବା ସନାତନଙ୍କ ଗୋଟି ଚାଳନା ଭୋଟରମାନଙ୍କୁ କାହା ସପକ୍ଷରେ ଛିଡ଼ା କରାଇବ ତାହା ହିଁ କେବଳ ମତଗଣନା ପରେ ସ୍ପଷ୍ଟ ହୋଇପାରିବ ।

ଲୋକାଲ ୱାୟାର