Special

ଭୁବନେଶ୍ୱର, ଏପ୍ରିଲ ୧୫ (ଲୋକାଲ ୱାୟାର): ‘ନବୀନ ନବୀନ ଆମ ନବୀନ’, ‘ନବୀନ ବାବୁ ଆମର ନେତା’, ‘ଆମେ ନବୀନ ଫ୍ୟାନ୍’ । ସ୍ୱତନ୍ତ୍ର ଭାବେ ନବୀନ ପଟ୍ଟନାୟକଙ୍କୁ ନେଇ ପ୍ରସ୍ତୁତ ଏମିତି ଅନେକ ଗୀତ ଏବେ ସୋସିଆଲ ମିଡିଆରୁ ଆରମ୍ଭ କରି ଜନସଭାରେ ଭାଇରାଲ ହେବାର ଲାଗିଛି ।

ବିଭିନ୍ନ ମ୍ୟୁଜିକ୍ କମ୍ପାନୀ, ସଙ୍ଗୀତକାର, କଣ୍ଠଶିଳ୍ପୀ ନିଜସ୍ୱ ଉଦ୍ୟମରେ ଏହିଭଳି ଗୀତ କରିଛନ୍ତି । ଗୀତଗୁଡ଼ିକ ନିର୍ବାଚନ ଘୋଷଣାର ବହୁ ପୂର୍ବରୁ ସୋସିଆଲ୍ ମିଡିଆରେ ରିଲିଜ୍ ହୋଇ ବିଶେଷ ସଫଳତା ସାଉଁଟି ଚାଲିଛି ।

ଅଧିକାଂଶ ଗୀତରେ କଣ୍ଠଦାନ କରିଛନ୍ତି ଓଲିଉଡର ଷ୍ଟାର୍ ଗାୟକ ତଥା ନିକଟରେ ବିଜେଡିରେ ମିଶିଥିବା ହ୍ୟୁମାନ୍ ସାଗର ।

ପ୍ରାୟ ୧୨-୧୩ଟି ଗୀତ ସୋସିଆଲ୍ ମିଡିଆରେ ଭାଇରାଲ ହୋଇଛି । ସବୁଥିରେ ନବୀନଙ୍କୁ ଶୀର୍ଷରେ ରଖି ଗୀତ ହୋଇଛି, ତା’ ସହିତ ତାଙ୍କ ଡାଏଲଗ୍ ‘ଆପଣମାନେ ଖୁସି ତ?’କୁ ନେଇ ବି ଗୀତ ହୋଇଛି । ସମ୍ବଲପୁରୀ ଭାଷାରେ ବି ଗୀତ ହୋଇଛି ।

ଇଂ. ଦେବବ୍ରତ ମିଶ୍ର ପ୍ରଯୋଜିତ, ରତନ କୁମାର ପୂଜାହାରୀଙ୍କ ରଚିତ ସମ୍ବଲପୁରୀ ଗୀତ ‘ନବୀନ ବାବୁ ଆମର ନେତା’ ।

ଏହାକୁ ଗାଇଛନ୍ତି ଉମାକାନ୍ତ ବାରିକ ଓ ଜାଗୃତି ମିଶ୍ର । ଗୁରୁ ଶତପଥୀଙ୍କ ଗୀତ, କାର୍ତ୍ତିକ କୁମାରଙ୍କ ସଙ୍ଗୀତ ଏବଂ ସୋନାଲୀ ଶତପଥୀଙ୍କ ପ୍ରଯୋଜନାରେ ହ୍ୟୁମାନ୍ ସାଗର ଗାଇଛନ୍ତି ‘ଆପଣମାନେ ଖୁସି ତ?’ ।

ବିଦୁଲତା ପ୍ରଡକ୍ସନ୍ ନିବେଦିତ ଅଶ୍ୱିନୀ କୁମାର ରାଉତ ପ୍ରଯୋଜିତ ‘ଆମେ ନବୀନ ଫ୍ୟାନ୍’ । ଏହାକୁ ଗାଇଛନ୍ତି ହ୍ୟୁମାନ୍ ସାଗର । ଲେଖିଛନ୍ତି ପ୍ରମୋଦ ପରିଡ଼ା ଏବଂ ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ବିରାଜ ପ୍ରସାଦ ।

ପ୍ରଭାସ ବେହେରାଙ୍କ ସଙ୍ଗୀତ ଓ ନିର୍ଦ୍ଦେଶନାରେ ‘ନବୀନ ନବୀନ ଆମ ନବୀନ’ । ଏହାକୁ ଲେଖିଛନ୍ତି ଯୁଧିଷ୍ଟିର ଏବଂ ଗାଇଛନ୍ତି ସତ୍ୟ । ଅରମାନ୍ ମ୍ୟୁଜିକ୍ ପ୍ରସ୍ତୁତ ମୁନୁ ପାଗଳଙ୍କ ଗୀତ, ଜାପାନୀଙ୍କ ସଙ୍ଗୀତରେ ହ୍ୟୁମାନ୍ ଗାଇଛନ୍ତି ‘ନବୀନ ନବୀନ’ ।

ଇଂ. ଦେବବ୍ରତ ମିଶ୍ର ପ୍ରଯୋଜିତ ରତନ ପୂଜାହାରୀ ଗୀତ, ରେହାନ କମଳ ସଙ୍ଗୀତ ସଂଯୋଜନାରେ ମଣ୍ଟୁ ଛୁରିଆ ଗାଇଛନ୍ତି ସମ୍ବଲପୁରୀ ଗୀତ ‘ଆମର ଚିହ୍ନା ଶଙ୍ଖ ଚିହ୍ନା’ । ସାଇଦୀପ ସାହୁଙ୍କ ଗୀତ ରଚନା ଓ ନିର୍ଦ୍ଦେଶନାରେ ବିଷ୍ଣୁମୋହନ କବି ଗାଇଛନ୍ତି ‘ଆମ ନେତା ନବୀନ ବାବୁ’ ।

‘ନିମକି’ ଚଳଚ୍ଚିତ୍ରରେ ନବୀନଙ୍କୁ ନେଇ ଗୀତ ରହିଛି ‘ତୁମେ ଆଦର୍ଶର ଅବିଧାନ… ସ୍ୱଚ୍ଛତାର ସମ୍ବିଧାନ’ । ଆମ ସ୍ୱର ପକ୍ଷରୁ ଧନେଶ୍ୱର ମହାପାତ୍ରଙ୍କ ରଚନାରେ ନକୁଳଙ୍କ ସ୍ୱରରେ ‘ନବୀନ ବାବୁ କରେ ପ୍ରଣାମ’ ।

ଶାଶ୍ୱତ ତ୍ରିପାଠୀଙ୍କ ‘ବାର୍ଥ ଡେ ନବୀନ’ । ଏଥିରେ କଣ୍ଠଦାନ ସାଙ୍ଗକୁ ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ଶାଶ୍ୱତ । ଗୀତ ଲେଖିଛନ୍ତି ଶରତ ସାହୁ । ଗୀତର ପ୍ରଯୋଜନା କରିଛନ୍ତି ନବଜୀବନ ପଣ୍ଡା ଏବଂ ସରୋଜ କୁମାର ପୁରୋହିତ । ଦୁର୍ଗା ମହାପାତ୍ରଙ୍କ ସଙ୍ଗୀତ ନିର୍ଦ୍ଦେଶନାରେ କଣ୍ଠଶିଳ୍ପୀ ଜୟଶ୍ରୀ ଧଳ ‘ଆପଣମାନେ ଖୁସି?’ ଗୀତ ଗାଇଛନ୍ତି । ଏହିଭଳି ଗୀତସବୁ ନବୀନଙ୍କୁ ନେଇ ପ୍ରସ୍ତୁତ ହୋଇଛି । ଏସବୁ ଗୀତ ୟୁଟ୍ୟୁବରେ ଲକ୍ଷାଧିକ ଲୋକଙ୍କୁ ଛୁଇଁ ପାରିଛି ।

ଲୋକାଲ ୱାୟାର

ଫୁଲବାଣୀ, ଏପ୍ରିଲ ୧୩(ଲୋକାଲ ୱାୟାର): କନ୍ଧମାଳ ଲୋକସଭା ଆସନ ଏମିତି ଏକ ଆସନ ଏହର ଭୌଗଳିକ ସୀମା ଚାରୋଟି ଜିଲ୍ଲାକୁ ପରିବ୍ୟାପ୍ତ । କନ୍ଧମାଳ ଜିଲ୍ଲାର ଫୁଲବାଣୀ, ଜି. ଉଦୟଗିରି, ବାଲିଗୁଡ଼ା, ବୌଦ୍ଧ ଜିଲ୍ଲାର ବୌଦ୍ଧ, କଣ୍ଟାମାଳ, ଗଂଜାମ ଜିଲ୍ଲାର ଭଞ୍ଜନଗର ଓ ନୟାଗଡ଼ ଜିଲ୍ଲାର ଦଶପଲ୍ଲା ବିଧାନସଭା ନିର୍ବାଚନମଣ୍ଡଳୀକୁ ନେଇ ଗଠିତ ଏହି ଲୋକସଭା ଆସନ ।

ଏଠାରେ ୨୦୧୯ ନିର୍ବାଚନରେ ବିଜେଡିରୁ ରାଜ୍ୟସଭା ସାଂସଦ ଅଚ୍ୟୁତ ସାମନ୍ତ, କଂଗ୍ରେସରୁ ମନୋଜ କୁମାର ଆଚାର୍ଯ୍ୟ ଏବଂ ବିଜେପିରୁ ଐର ଖାରବେଳ ସ୍ୱାଇଁ ପ୍ରାର୍ଥୀ ହୋଇଛନ୍ତି ।

ବିଜେଡି ପ୍ରାର୍ଥୀ ଅଚ୍ୟୁତ ସାମନ୍ତ ଜଣେ ଶିକ୍ଷାବିତ୍ ଭାବେ ରାଜ୍ୟରେ ବେଶ ପରିଚିତ । ଏକାଧିକ ଶିକ୍ଷାନୁଷ୍ଠାନ ପ୍ରତିଷ୍ଠା କରିଥିବାରୁ ସେ ରାଜ୍ୟବାସୀଙ୍କ ଚିହ୍ନା ମୁହଁ ।

ତେବେ ରାଜନୀତିରେ ନିକଟରେ ପାଦ ଥାପିଥିଲେ, ଯେତେବେଳେ ବିଜେଡି ସୁପ୍ରିମୋ ତାଙ୍କ ରାଜ୍ୟସଭାକୁ ପଠାଇଲେ । କନ୍ଧମାଳ ଆସନରେ ଏବେ ସେ ଭାଗ୍ୟ ପରୀକ୍ଷା କରୁଛନ୍ତି ।

ଏଠାରେ ୨୦୧୪ରେ ବିଜେଡିର ସାଂସଦ ଥିବା ପ୍ରତ୍ୟୁଷା ରାଜେଶ୍ୱରୀ ଦେବୀ ଅଚ୍ୟୁତଙ୍କ ପ୍ରବେଶରେ କ୍ଷୁବ୍ଧ ହୋଇ ବିଜେଡି ଛାଡ଼ି ବିଜେପିରେ ସାମିଲ ହୋଇଛନ୍ତି । ତେବେ ସେ କୌଣସି ଦଳରୁ ପ୍ର୍ରାର୍ଥୀ ହୋଇ ନାହାନ୍ତି ।

ଅଚ୍ୟୁତଙ୍କ ପାଇଁ ଅନ୍ୟ ଏକ ସମସ୍ୟା ହେଲା ‘ମାଟିର ପୁଅ’ ସ୍ଲୋଗାନ । ସେ କନ୍ଧମାଳ ଲୋକସଭା କ୍ଷେତ୍ର ବାହାରର ବାସିନ୍ଦା । ତଥାପି ଅଚ୍ୟୁତଙ୍କ ପାଇଁ ବଡ଼ ପ୍ଲସ ପଏଣ୍ଟ ଏହା ଯେ ସେ ବିଜେଡିରୁ ପ୍ରାର୍ଥୀ ହୋଇଛନ୍ତି ।

‘ନିରାମୟ’, ‘ଆହାର’, ‘କାଳିଆ’…ଏମିତି କେତେକ କ’ଣ ଯୋଜନା କରି ଗାଁ ଗଣ୍ଡାରେ ବିଜେଡି ଗତ ୧୭ ବର୍ଷ ମଧ୍ୟରେ ତାର ଦଳୀୟ ଚିହ୍ନକୁ ବ୍ରାଣ୍ଡ ଇମେଜ ଭାବେ ପ୍ରତିଷ୍ଠା କରିବାରେ ସଫଳ ହୋଇଛି । ଏହାସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ।

ଏହାହିଁ ତାଙ୍କୁ ନିର୍ବାଚନ ବୈତରଣୀ ପାରି କରାଇବ ବୋଲି ସେ ଆଶା ବାନ୍ଧିଛନ୍ତି । ଅବଶ୍ୟ ତାଙ୍କ ପ୍ର୍ରାର୍ଥିତ୍ୱରେ ଅସନ୍ତୁଷ୍ଟ ଥିବା ବିଜେଡି କର୍ମୀ ତାଙ୍କ ରାସ୍ତରେ ବଡ଼ ବାଧକ ହୋଇଛନ୍ତି ।

ସେହିପରି ଗତ ୨୧ ବର୍ଷ ଧରି, ଅର୍ଥାତ୍ ୧୯୯୬ରୁ ପ୍ରତି ନିର୍ବାଚନରେ ଏଠାରେ ଭୋଟର ବିଜେଡି ପ୍ର୍ରାର୍ଥୀଙ୍କ ମୁଣ୍ଡରେ ଭୋଟର ଶିରପା ବାନ୍ଧିଛନ୍ତି । ତେଣୁ ଏହି ଆସନ ଅଚ୍ୟୁତଙ୍କ ପାଇଁ ଯେତିକି ସମ୍ମାନର ବିଷୟ ନୁହେଁ, ତା ଠାରୁ ଅଧିକ ବିଜେଡି ପାଇଁ
।
ସେହିପରି ବିଜେପି ପ୍ରାର୍ଥୀ ଖାରବେଳ ସ୍ୱାଇଁ ମଧ୍ୟ ‘ମାଟିର ପୁଅ’ ସ୍ଲୋଗାନର ସମ୍ମୁଖିନ ହୋଇଛନ୍ତି । ଖାରବେଳ କନ୍ଧମାଳ ପାଇଁ ନୂଆ ମୁହଁ ।

ଅବଶ୍ୟ ସେ ରାଜନୀତି କିମ୍ବା ରାଜ୍ୟ ପାଇଁ ନୂଆ ନୁହଁନ୍ତି । ସେ ବାଲେଶ୍ୱରରୁ ୩ ଥର ସାଂସଦ ଥିଲେ । ବିଜେପି ଛାଡ଼ି ବହୁ ବର୍ଷ ଧରି ଉକ୍ରଳ ଭାରତ ଟ୍ୟାଗରେ ଚାଲିଥିଲେ ।

୨୦୧୯ରେ ଶେଷ ମୁହୂର୍ତ୍ତରେ ଉକ୍ରଳ ଭାରତ ଦଳକୁ ବିଜେପିରେ ମିଶାଇ ଦେଲେ ଓ କନ୍ଧମାଳ ଟିକେଟ୍ ପାଇଲେ । କିନ୍ତୁ କନ୍ଧମାଳର ପୂର୍ବତନ ବିଜେପି ସାଂସଦ ପ୍ରାର୍ଥୀ ସୁକାନ୍ତ ପାଣିଗ୍ରାହୀ ଏବଂ ତୃଣମୂଳ ବିଜେପି କର୍ମୀ ଖାରବେଳଙ୍କୁ ଗ୍ରହଣ କରିବାକୁ ନାରାଜ ।

ରାଜ୍ୟ ସରକାରଙ୍କ ଦୁର୍ନୀତି, ଅପାରଗତା ସହ କେନ୍ଦ୍ରର ମୋଦି ସରକାରଙ୍କ ସଫଳତାର କଥା କହି ସେ ଭୋଟ ଭିକ୍ଷା କରୁଛନ୍ତି । ଖାରବେଳ ଅସନ୍ତୁଷ୍ଟ ବିଜେଡି କର୍ମୀଙ୍କୁ ସାହାରା କରିବାକୁ ଯୋଜନା କରିଛନ୍ତି, ଠିକ୍ ଯେମିତି ଅଚ୍ୟୁତ ଅସନ୍ତୁଷ୍ଟ ବିଜେପି କର୍ମୀଙ୍କୁ ନିଜ ପକ୍ଷକୁ ଟାଣିବାରେ ବ୍ୟସ୍ତ ।

କଂଗ୍ରେସ ପ୍ରାର୍ଥୀ ମନୋଜ କୁମାର ଆଚାର୍ଯ୍ୟ ରାଜନୀତିରେ ନୂଆ ମୁହଁ । ତାଙ୍କ ଘର କନ୍ଧମାଳ ନିର୍ବାଚନମଣ୍ଡଳୀ ଅନ୍ତର୍ଗତ ବାଲିଗୁଡ଼ା । ନିର୍ବାଚନମଣ୍ଡଳୀରେ କଂଗ୍ରେସର ସ୍ଥିତି ସେତେ ଭଲ ନଥିଲେ ମଧ୍ୟ ସେ ସ୍ଥାନୀୟ ବାସିନ୍ଦା ହୋଇଥିବାରୁ ‘ମାଟିର ପୁଅ’ ସ୍ଲୋଗାନରେ ଭୋଟରଙ୍କ ଅନୁକମ୍ପା ଭୋଟ ପାଇବାର ଆଶା ରଖିଛନ୍ତି ।

ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ କନ୍ଧମାଳ ଜିଲ୍ଲା ପ୍ରତି ଅବହେଳା ଅଭିଯୋଗ କରି ଭୋଟ ସାଉଁଟିବାକୁ ପ୍ରୟାସ ଜାରି ରଖିଛନ୍ତି ।

ଏଠାରେ ୨୦୧୪ ନିର୍ବାଚନରେ ବିଜେଡି ପ୍ରାର୍ଥୀ ସ୍ୱର୍ଗତ ହେମେନ୍ଦ୍ର ଚନ୍ଦ୍ର ସିଂ ୪,୨୧,୪୫୮ ଭୋଟ୍ ପାଇ ବିଜୟୀ ହୋଇଥିଲେ । କଂଗ୍ରେସର ହରିହର କରଣ ୨,୪୦,୪୧୧ ଓ ବିଜେପିର ସୁକାନ୍ତ ପାଣିଗ୍ରାହୀ ୧,୦୮,୭୪୪ ଭୋଟ୍ ହାସଲ କରିଥିଲେ ।

 

ହେମେନ୍ଦ୍ରଙ୍କ ଦେହାନ୍ତ ପରେ ସେହି ବର୍ଷ ଉପନିର୍ବାଚନରେ ବିଜେଡି ପ୍ରାର୍ଥୀ ହୋଇଥିଲେ ପ୍ରତ୍ୟାଶା ରାଜେଶ୍ୱରୀ ସିଂ । ସ୍ୱାମୀଙ୍କ ମୃତ୍ୟୁ ପରର ଅନୁକମ୍ପା ସହ ବିଜେଡିର ପାରମ୍ପରିକ ଭୋଟ୍ ମିଶାଇ ସେ ପାଇଥିଲେ ୪,୭୭,୫୨୯ ଭୋଟ୍ ।

ବିଜେପି ପ୍ରାର୍ଥୀ ରୁଦ୍ରମାଧବ ରାୟ ୧,୭୮,୬୬୧ ପାଇ ଦ୍ୱିତୀୟ ସ୍ଥାନରେ ଥିବା ବେଳେ କଂଗ୍ରେସର ଅଭିମନ୍ୟୁ ବେହେରା ୯୦,୫୩୬ ଭୋଟ୍ ପାଇ ତୃତୀୟ ସ୍ଥାନକୁ ଖସିଥିଲେ ।

ଲୋକସଭା କ୍ଷେତ୍ରର ୭ଟି ବିଧାନସଭା କ୍ଷେତ୍ର ମଧ୍ୟରୁ ୨୦୧୪ରେ ୬ଟିରେ ବିଜେଡି ଓ କେବଳ ଜି. ଉଦୟଗିରିରେ କଂଗ୍ରେସ ବିଧାୟକ ଜିିତିଥିଲେ ।
ଏହାହିଁ ବିଜେଡି ପ୍ରାର୍ଥୀଙ୍କୁ ସୁବିଧାଜନକ ସ୍ଥିତିରେ ରଖୁଛି ।

ଏହି ଲୋକସଭା ଆସନ ପାଇଁ ଆସନ୍ତ ୧୮ ତାରିଖରେ ହେବ ମତଦାନ । ମଇଦାନରେ ରହିଛନ୍ତି ଅଚ୍ୟୁତ, ଖାରବେଳ ଓ ମନୋଜଙ୍କୁ ଛାଡ଼ିଦେଲେ ଅଛନ୍ତି ଆଉ ଦୁଇ ପ୍ରାର୍ଥୀ । ସିପିଆଇ(ଏମଏଲ)ର ଟୁନା ମଲ୍ଲିକ ଓ ବିଏସପି ପ୍ରାର୍ଥୀ ଅମିର ନାୟକ ମଧ୍ୟ ଲଢ଼େଇରେ ଅଛନ୍ତି ।

କନ୍ଧମାଳରେ କ’ଣ ହେବ? ଭୋଟର କାହା ମୁଣ୍ଡରେ ଶିରପା ବାନ୍ଧିବେ ତାହା କେବଳ ଭୋଟ ଗଣତି ପରେ ଜଣାପଡ଼ିବ ।

ଲୋକାଲ ୱାୟାର

ଭୁବନେଶ୍ୱର, ଏପ୍ରିଲ ୧୨(ଲୋକାଲ ୱାୟାର): ବର୍ତ୍ତମାନର ବରଗଡ଼ ଲୋକସଭା ଆସନ ବେଶୀ ପୁରୁଣା ନୁହେଁ । ପଚାଶ-ଷାଠିଏ ଦଶକରେ ଏହାର ଅସ୍ତିତ୍ୱ ଥିଲେ ମଧ୍ୟ ପରବର୍ତ୍ତୀ ଦିନରେ ଏହା ସମ୍ବଲପୁର ଲୋକସଭା ଆସନରେ ବିଲୀନ ହୋଇ ଯାଇଥିଲେ ।

୨୦୦୮ ମସିହାରେ ପୁଣି ଏହାର ପୁନର୍ଜନ୍ମ ହୋଇଥିଲା । ବରଗଡ଼ ଜିଲ୍ଲାର ୫ଟି ବିଧାନସଭା ଆସନ ପଦ୍ମପୁର, ବିଜେପୁର, ବରଗଡ଼, ଅତାବିରା ଓ ଭଟଲି ସମେତ ଝାରସୁଗୁଡ଼ା ଜିଲ୍ଲାର ୨ ନିର୍ବାଚନମଣ୍ଡଳୀ ଝାରସୁଗୁଡ଼ା ଓ ବ୍ରଜରାଜନଗରକୁ ନେଇ ନିର୍ବାଚନ ମାନଚିତ୍ରରେ ଏହି ସଂସଦୀୟ କ୍ଷେତ୍ର ପୁଣି ଅସ୍ତିତ୍ୱ ଜାହିର କରିଥିଲା

୨୦୧୯ ନିର୍ବାଚନରେ ଏଠାରେ ବିଜେଡି ତାର ବରିଷ୍ଠ ତଥା ଧୁରନ୍ଧର ନେତା ପ୍ରସନ୍ନ ଆଚାର୍ଯ୍ୟଙ୍କୁ ପ୍ରାର୍ଥୀ କରିଥିବା ବେଳେ ବିଜେପିର ବରିଷ୍ଠ ନେତା ସୁରେଶ ପୂଜାରୀ ଏବଂ କଂଗ୍ରେସର ଯୁବ ନେତା ପ୍ରଦୀପ ଦେବତା ତାଙ୍କ ସହ ମୁକାବିଲାରେ ଅଛନ୍ତି ।

ଏମାନଙ୍କ ବ୍ୟତୀତ ବିଏସପିରୁ କୌଶିକ ସୁନାଙ୍କ ସମେତ ଦୁଇଜଣ ସ୍ୱାଧୀନ ପ୍ରାର୍ଥୀ ପଶ୍ଚିମାଞ୍ଚଳ ବିକାଶ ପାର୍ଟିରୁ କୁଳମଣି ଉର୍ମା ଓ ଏମଡି ନିଜାମୁଦ୍ଧିନ ମଧ୍ୟ ଦୌଡ଼ରେ ଅଛନ୍ତି ।

କିନ୍ତୁ ଏଥର ଏହି ସଂସଦୀୟ କ୍ଷେତ୍ର ଉପରେ କେବଳ ରାଜ୍ୟ ନୁହେଁ ଜାତୀୟ ସ୍ତରର ସମୀକ୍ଷକଙ୍କ ନଜର ରହିଛି । କାରଣ ଏହି ଲୋକସଭା ଆସନ ଅନ୍ତର୍ଗତ ବିଜେପୁର ବିଧାନସଭା ଆସନରେ ଛିଡ଼ା ହୋଇଛନ୍ତି ଖୋଦ୍ ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ।

ବିଜେଡି ପ୍ରାର୍ଥୀ ପ୍ରସନ୍ନ ଆଚାର୍ଯ୍ୟ ଚାରି ଥର ସାଂସଦ ତଥା ଦୁଇଥର ରାଜ୍ୟର ମନ୍ତ୍ରୀ ହୋଇଥିଲେ । ରାଜ୍ୟର ଜଣେ ପୋଖତ ରାଜନେତା ଭାବେ ସେ ବେଶ୍ ପରିଚିତ । ସମଗ୍ର ଲୋକସଭା କ୍ଷେତ୍ରରେ ସେ ପୁରୁଣା ମୁହଁ ।

ପ୍ରସନ୍ନ ପୂର୍ବରୁ ସମ୍ବଲପୁର ଲୋକସଭା, ବରଗଡ଼ ବିଧାନସଭା, ବିଜେପୁର ବିଧାନସଭାରେ ନିର୍ବାଚନ ଲଢ଼ିଛନ୍ତି । ଏଥର ତାଙ୍କ ପାଇଁ ପ୍ଲସ ପଏଣ୍ଟ ହୋଇଛି ବିଜେପୁରରୁ ନବୀନଙ୍କ ପ୍ରତିଦ୍ୱନ୍ଦ୍ୱିତା । ଏହା ସମଗ୍ର ଲୋକସଭା କ୍ଷେତ୍ରରେ ବିଜେଡି ସପକ୍ଷରେ ବଡ଼ ହାୱା ସୃଷ୍ଟି କରିଛି ବୋଲି ଦଳର ଜଣେ ବରିଷ୍ଠ ନେତା କହିଛନ୍ତି ।

ଅପରପକ୍ଷରେ କଂଗ୍ରେସରୁ ପ୍ରଣୟ ସାହୁ, ଝାରସଗୁଡ଼ା ବିଧାୟକ ନବ ଦାସଙ୍କ ସମେତ ସୁବାସ ଚୌହାନ, ପୂର୍ବତନ ବିଧାୟକ ସାଧୁ ନେପାକଙ୍କ ବିଜେଡିରେ ଯୋଗଦାନ ଦଳ ପାଇଁ ବରଦାନ ସଦୃଶ ହୋଇଛି ।

ତେବେ ବିଜେପି ଏଠାରେ ପ୍ରାର୍ଥୀ କରିଛି ଦଳର ପୁରୁଖା ନେତା ସୁରେଶ ପୂଜାରୀଙ୍କୁ । ବରଗଡ଼ ଲୋକସଭା ଆସନ ତାଙ୍କ ପାଇଁ ନୂଆ ହୋଇଥିଲେ ମଧ୍ୟ ସେ ପୂର୍ବରୁ ୨୦୧୪ ନିର୍ବାଚନରେ ସମ୍ବଲପୁରରୁ ପ୍ରତିଦ୍ୱନ୍ଦ୍ୱିତା କରି ଦ୍ୱିତୀୟ ସ୍ଥାନରେ ଥିବା ବେଳେ ତା’ପୂର୍ବ ନିର୍ବାଚନରେ ବ୍ରଜରାଜନଗର ବିଧାନସଭା ଆସନରୁ ଲଢ଼ି ପରାଜିତ ହୋଇଥିଲେ ।

ବ୍ରଜରାଜନଗରରୁ ପୂର୍ବରୁ ତିନି ଥର ନିର୍ବାଚନ ଲଢ଼ିଥିବାରୁ ଝାରସୁଗୁଡ଼ା ଜିଲ୍ଲାରେ ତାଙ୍କ ଭଲ ସଂଗଠନ ରହିଛି ।

ଅବଶ୍ୟ ବିଜେପି ଏକ କ୍ୟାଡରଭିତ୍ତିକ ଦଳ ହୋଇଥିବାରୁ ସଙ୍ଗଠନ ହିଁ ସୁରେଶଙ୍କ ପାଇଁ ବଡ଼ ଭରସା । କିନ୍ତୁ ବିଜେପିରୁ ସୁବାସ ଚୌହାନଙ୍କ ଇସ୍ତଫା ଦଳର ପ୍ରଦର୍ଶନ ଉପରେ ଏଠାରେ ପ୍ରଭାବ ପକାଇବ ବୋଲି ସମୀକ୍ଷକମାନେ ଅନୁୁମାନ କରୁଛନ୍ତି ।

କାରଣ ୨୦୧୪ ନିର୍ବାଚନରେ ସେ ମାତ୍ର ୧୧ ହଜାର ଭୋଟରେ ଏହି ଲୋକସଭା ଆସନରେ ବିଜେପି ପ୍ରାର୍ଥୀ ଭାବେ ପରାଜିତ ହୋଇଥିଲେ । ସୁବାସ ଦଳ ଛାଡ଼ିବା ପରେ ତୃଣମୂଳ ସ୍ତରରେ ଏହାର କ’ଣ ପ୍ରଭାବ ପଡ଼ିଛି ତାହା ଆକଳନ କରିବା କଷ୍ଟକର ବୋଲି କହିଛନ୍ତି ଖୋଦ୍ ବିଜେପିର ଜଣେ ନେତା ।

ତେବେ ମୋଦି ହାୱା ତାଙ୍କ ନିଜର ନିର୍ମଳ ଚେହେରା ତାଙ୍କୁ ନିର୍ବାଚନ ବୈତରଣୀ ପାରି କରିବ ବୋଲି ସୁରେଶ ଆଶା ବାନ୍ଧିଛନ୍ତି ।

କିନ୍ତୁ କଂଗ୍ରେସ ଜଣେ ସଂପୂର୍ଣ୍ଣ ନବାଗତ ଯୁବନେତା ପ୍ରଦୀପ ଦେବତାଙ୍କୁ ବାଛି ତୃଣମୂଳ ସ୍ତରରୁ ଦଳକୁ ଭିନ୍ନ ଏକ ବାର୍ତ୍ତା ଦେଇଛି । ଅଞ୍ଚଳର ସାମାଜିକ କ୍ଷେତ୍ରରେ ତାଙ୍କର ସ୍ୱତନ୍ତ୍ର ପରିଚୟ ଥିବାରୁ ଏହା ତାଙ୍କୁ ସହାୟକ ହେବ ।

କଂଗ୍ରେସର ଏହି ଲୋକସଭା କ୍ଷେତ୍ରର ପ୍ରାୟ ସମସ୍ତ ବିଧାନସଭା ଅଞ୍ଚଳରେ ସଙ୍ଗଠନ ଦୃଢ଼ ଥିବାରୁ ଏବଂ ରାହୁଲ ଗାନ୍ଧୀଙ୍କ ପ୍ରଚାର ତାଙ୍କ ପାଇଁ ବିଜୟ ରାସ୍ତା ଖୋଲିବ ବୋଲି ପ୍ରଦୀପ ଆଶା କରନ୍ତି ।

ଅପରପକ୍ଷରେ, ତିନୋଟି ଯାକ ଦଳରେ ପ୍ରାର୍ଥିତ୍ୱକୁ ନେଇ ଥିବା କିଛିଟା ଅସନ୍ତୋଷ ମତଦାନକୁ କିଭଳି ପ୍ରଭାବିତ କରିବ ତାହା ମଧ୍ୟ ପ୍ରଶ୍ନର ବିଷୟ ହୋଇଛି । ୨୦୧୪ ନିର୍ବାଚନରେ ଏଠାରେ ବିଜେଡି, ବିଜେପି ଓ କଂଗ୍ରେସ ପ୍ରଥମ, ଦ୍ୱିତୀୟ ଓ ତୃତୀୟରେ ଥିଲେ ।

ତେଣୁ ବିଜେଡିର ପଲା ଭାରି ରହିବା ସ୍ୱାଭାବିକ । ତଥାପି ନିର୍ବାଚନ ଫଳାଫଳକୁ ଜାତି ଆଧାରରେ ଭୋଟ ବି ପ୍ରଭାବିତ କରିପାରେ ବୋଲି ଜଣେ ସମୀକ୍ଷକ କହିଛନ୍ତି । ଚାଷୀଙ୍କ ବିକାଶ ପ୍ରସଙ୍ଗ ଓ କୁଲିତା ସମ୍ପ୍ରଦାୟର ଭୋଟ ହିଁ ଫଳାଫଳକୁ ଓଲଟ ପାଲଟ କରିବାର ଦକ୍ଷତା ରଖିଥିବା କୁହାଯାଉଛି ।

ତେବେ ବରଗଡ଼ ଯୁଦ୍ଧରେ କିଏ ହେବ ବିଜୟୀ ତାହା କେବଳ ମତଦାତାଙ୍କ ଏପ୍ରିଲ ୧୮ର ମତଦାନ ଉପରେ ନିର୍ଭର କରେ ଏବଂ ଭୋଟ ଗଣତି ପରେ ସ୍ପଷ୍ଟ ହୋଇଯିବ ।

ଲୋକାଲ ୱାୟାର

ଭୁବନେଶ୍ୱର, ଏପ୍ରିଲ ୧୧(ଲୋକାଲ ୱାୟାର): ଓଡ଼ିଶା ରାଜନୈତିକ ଇତିହାସ ସହ ପଟ୍ଟନାୟକମାନେ ଅଙ୍ଗାଙ୍ଗୀ ଭାବେ ଜଡ଼ିତ । ଭାରତ ସ୍ୱାଧୀନତା ପରର ପ୍ରାୟ ୭୦ ବର୍ଷ ମଧ୍ୟରୁ ଓଡ଼ିଶା ରାଜନୀତି ୪୦ ବର୍ଷରୁ ଅଧିକ ଜଣେ ନା ଜଣେ ପଟ୍ଟନାୟକଙ୍କ ଦ୍ୱାରା ନିୟନ୍ତ୍ରିତ ହେଉଛି ।

ଯଦି ନବୀନ ପଟ୍ଟନାୟକଙ୍କ ନେତୃତ୍ୱରେ ବିଜେଡି ପଞ୍ଚମ ଥର କ୍ଷମତା ହାସଲ କରିବାରେ ସଫଳ ହୁଏ ତେବେ ଏହି ସମୟ ବଢ଼ିବ । ବିଜୁ ପଟ୍ଟନାୟକଙ୍କ ଠାରୁ ଆରମ୍ଭ ଏହି ଧାରା ବିଜୁଙ୍କ ପୁଅ ନବୀନ ପଟ୍ଟନାୟକ କ୍ଷମତାକୁ ନ ଆସିବା ପର୍ଯ୍ୟନ୍ତ ଜାନକୀ ପଟ୍ଟନାୟକଙ୍କ ଦ୍ୱାରା ଜାରି ରହିଥିଲା ।

ମିଳିତ ଭାବେ ଏମାନେ ଚାରି ଦଶନ୍ଧିରୁ ଅଧିକ ସମୟ ମୁଖ୍ୟମନ୍ତ୍ରୀ ଭାବରେ ରହିଛନ୍ତି । ବିଜୁ ସାତ ବର୍ଷ (୧୯୬୧-୬୩, ୧୯୯୦-୯୫), ଜାନକୀ ବଲ୍ଲଭ ୧୫ ବର୍ଷ (୧୯୮୦-୮୫, ୧୯୮୫-୮୯ ଓ ୧୯୯୫-୯୯) ଏବଂ ନବୀନ ୧୯ ବର୍ଷ (୨୦୦୦ ମସିହାରୁ ଏପର୍ଯ୍ୟନ୍ତ । ଏହା ଭିତରେ ଓଡ଼ିଶା ଆଉ ୧୧ ଜଣ ମୁଖ୍ୟମନ୍ତ୍ରୀଙ୍କୁ ଦେଖିଥିଲା ।

ସାଂପ୍ରତିକ ପରିସ୍ଥିତିରେ ବିଜୁ ପଟ୍ଟନାୟକଙ୍କ ପରିବାରରୁ ରାଜନୀତିକୁ ଆସିବାରେ ନବୀନ ଏକମାତ୍ର ବ୍ୟକ୍ତି । ୭୩ ବର୍ଷୀୟ ନବୀନ ଏ ଯାଏଁ ପରିବାରର କୌଣସି ସଦସ୍ୟଙ୍କୁ ରାଜନୀତିକୁ ଆଣି ନାହାନ୍ତି । ଭଉଣୀ ଗୀତା ମେହେଟ୍ଟା ଲୋକଲୋଚନ ଆଢୁଆଳରେ ରହିବାକୁ ପସନ୍ଦ କରୁଥିବା ବେଳେ ବଡ଼ ଭାଇ ପ୍ରେମ ପଟ୍ଟନାୟକ ନୂଆଦିଲ୍ଲୀରେ ବ୍ୟବସାୟ ଦେଖାଶୁଣା କରୁଛନ୍ତି ।

ଓଡ଼ିଶାରେ କଂଗ୍ରେସର ପ୍ରଥମ ପରିବାର ଭାବେ ପରିଚିତ ଜେବି ପରିବାର ଦଳକୁ ହାତମୁଠାରେ ରଖିଥିଲେ ବି ଦଳ ରାଜ୍ୟରେ ଚମକ ହରାଇଛି ।

ଜାନକୀ ବଲ୍ଲଭ ଓ ବିଜୁ ରାଜନୈତିକ ପ୍ରତିଦ୍ୱନ୍ଦ୍ୱୀ ହୋଇଥିଲେ ବି ଜାନକୀଙ୍କ ଜ୍ୱାଇଁ ସୌମ୍ୟରଂଜନ ତଥା ବିଜେଡି ରାଜ୍ୟସଭା ସାଂସଦ ଏଥର ବିଜେଡି ଖଣ୍ଡପଡା ବିଧାନସଭା ଆସନରୁ ପ୍ରାର୍ଥୀ ହୋଇଛନ୍ତି । କଂଗ୍ରେସ ଦଳ ଜାନକୀଙ୍କ ପୁଅକୁ ବେଗୁନିଆ (ବାପା ଜାନକୀ ଏଠାରୁ ଦୁଇ ଥର ବିଧାୟକ ଥିଲେ)ରୁ ବିଧାୟକ ପ୍ରାର୍ଥୀ ଭାବେ ଘୋଷଣା କରିଥିଲେ । ତେବେ ପ୍ରାରମ୍ଭିକ ଭାବେ ସେ ନିର୍ବାଚନ ଲଢ଼ିବାକୁ ଇଚ୍ଛୁକ ଥିବା ବେଳେ ପରେ ଓହରି ଯାଇଥିଲେ ।

ଓଡ଼ିଶା ପ୍ରଦେଶ କଂଗ୍ରେସ କମିଟିର ସଭାପତି ଥିବା ସୌମ୍ୟଙ୍କ ବଡ଼ ଭାଇ ନିରଞ୍ଜନ ଘଷିପୁରା ଓ ଭଣ୍ଡାରୀପୋଖରୀ ବିଧାନସଭା ଆସନରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି । ନିରଞ୍ଜନଙ୍କ ପୁଅ ନବଜ୍ୟୋତି ରାଜନୀତିରେ ପ୍ରବେଶ କରି ବାଲେଶ୍ୱର ସଂସଦୀୟ ଆସନରୁ କଂଗ୍ରେସ ପ୍ରାର୍ଥୀ ହୋଇଛନ୍ତି । ଜାନକୀଙ୍କ ତିନିଟି ଯାକ ପାଳିରେ ନିରଞ୍ଜନ ତାଙ୍କ କ୍ୟାବିନେଟରେ ମନ୍ତ୍ରୀ ହୋଇଥିଲେ ।

ସୌମ୍ୟ ଓ ନିରଞ୍ଜନଙ୍କ ପଟ୍ଟନାୟକ ପରିବାରର ମାଇନିଂ ଠାରୁ ଆରମ୍ଭ କରି ଅଟୋମୋବାଇଲ, ରିୟଲ ଇଷ୍ଟେଟରୁ ମିଡିଆ, ଶିକ୍ଷା ଠାରୁ ସିଫୁଡ ଆଦି କ୍ଷେତ୍ରରେ ବ୍ୟବସାୟ ରହିଛି ।

ପଟ୍ଟନାୟକମାନେ ଜାତିରେ କରଣ । ଏହି ଉଚ୍ଚଜାତି ଓଡ଼ିଶା ଜନସଂଖ୍ୟାର ଏକ ଭାଗରୁ ବି କମ୍ ହୋଇଥିଲେ ବି ରାଜ୍ୟ ରାଜନୀତିରେ ସେମାନଙ୍କ ପ୍ରଭୁତ୍ୱ ବିସ୍ତାର କରିଛନ୍ତି । କାରଣ, ଜାତିଆଣ ଭିତ୍ତିରେ ଓଡ଼ିଶାରେ ଭୋଟ ହୁଏ ନାହିଁ । ଓଡ଼ିଶା ଜନସଂଖ୍ୟାର ୨୨.୮୫% ଅନୁସୂଚିତ ଜନଜାତି, ୧୭.୧୩% ଅନୁସୂଚିତ ଜାତି ଓ ପଛୁଆ ବର୍ଗ ୫୪% ।

ସ୍ୱାଧୀନତା ପରେ ଅନ୍ୟ ରାଜ୍ୟ ଭଳି ଓଡ଼ିଶାରେ ବଂଶବାଦ ରାଜନୀତି କାୟା ବିସ୍ତାର କରିଛି । ରାଜନୈତିକ ସ୍ଥାନ ହାସଲ ପ୍ରତିଯୋଗିତାରେ ନେତାମାନେ କ୍ଷମତା ବଜାୟ ରଖିବାକୁ ଯଥାସାଧ୍ୟ ଉଦ୍ୟମ କରନ୍ତି ବୋଲି କହିଛନ୍ତି ଉକ୍ରଳ ବିଶ୍ୱବିଦ୍ୟାଳୟର ରାଜନୀତି ବିଜ୍ଞାନ ବିଭାଗର ଅବସରପ୍ରାପ୍ତ ପ୍ରଫେସର ଅମରେଶ୍ୱର ମିଶ୍ର ।

ଏଭଳି ସମାନ ପରିସ୍ଥିତି ପରିବାର ରାଜନୀତିକୁ ନିୟନ୍ତ୍ରଣ କରୁଥିବା ଆଉ କିଛି ରାଜ୍ୟ ଯେପରିକି ବିହାର, ତାମିଲନାଡୁ, ଆନ୍ଧ୍ରପ୍ରଦେଶରେ ମଧ୍ୟ ଦେଖାଯାଏ ବୋଲି କହିଛନ୍ତି ସମ୍ବଲପୁର ବିଶ୍ୱବିଦ୍ୟାଳୟର ସୋସିଓଲଜି ବିଭାଗର ଅବସରପ୍ରାପ୍ତ ପ୍ରଫେସର ଶୁକଦେବ ନାୟକ ।

ଲୋକାଲ ୱାୟାର

ଆସିକା, ଏପ୍ରିଲ ୧୦(ଲୋକାଲ ୱାୟାର): ବିଗତ ଦୁଇ ଦଶନ୍ଧି ଧରି ଆସିକା ଲୋକସଭା ଆସନ ବିଜେଡିର ଗଡ଼ ଭାବେ ପରିଚିତ ହୋଇଛି ।

ଆଠଟି ନିର୍ବାଚନରେ ବିଜେଡି ପ୍ରାର୍ଥୀ ବିପୁଳ ଭୋଟରେ ବିଜୟୀ ହୋଇଛନ୍ତି । କଂଗ୍ରେସ ମୁଖ୍ୟ ପ୍ରତିଦ୍ୱନ୍ଦ୍ୱୀ ହୋଇଥିଲେ ମଧ୍ୟ ବିଜୟର ସ୍ୱାଦ ପାଇବା କଷ୍ଟ ହୋଇଛି ସର୍ବଦା ।

ଏଥର କିନ୍ତୁ କଂଗ୍ରେସ ଏହି ଆସନରେ ସିପିଆଇ ସହ କରିଛି ମେଣ୍ଟ ଏବଂ ଆସନ ମଧ୍ୟ ସିପିଆଇ ପ୍ରାର୍ଥୀଙ୍କୁ ଛାଡ଼ି ଦେଇଛି । ତେଣୁ ଏଠାରେ ମୈଦାନରେ ମୁଖ୍ୟତଃ କଂଗ୍ରେସ, ବିଜେଡି ଓ ବିଜେପି ପ୍ରାର୍ଥୀଙ୍କ ମଧ୍ୟରେ ଲଢ଼େଇ ଚାଲିଛି ।

ବିଜେଡିରୁ ପ୍ରମିଳା ବିଶୋୟୀ, ସିପିଆଇରୁ ରାମକୃଷ୍ଣ ପଣ୍ଡା ଏବଂ ବିଜେପିରୁ ଅନିତା ଶୁଭଦର୍ଶିନୀ ଆସିକା ମୈଦାନରେ ନିଜ ଭାଗ୍ୟ ପରୀକ୍ଷା କରୁଛନ୍ତି ।

ଖଲ୍ଲିକୋଟ, କବିସୂର୍ଯ୍ୟନଗର, ଆସିକା, ପୋଲସରା, ସୋରଡ଼ା, ସାନଖେମୁଣ୍ଡି ଏବଂ ହିଞ୍ଜିଳି ବିଧାନସଭା କ୍ଷେତ୍ରକୁ ନେଇ ଏହି ଲୋକସଭା ଆସନ ଗଠିତ ।

୨୦୧୯ ନିର୍ବାଚନରେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଆସିକା ଆସନରେ ରାଜନୀତିରେ ସମ୍ପୂର୍ଣ୍ଣ ନବାଗତା ପ୍ରମିଳା ବିଶୋୟୀଙ୍କୁ ଛିଡ଼ା କରାଇ ସମସ୍ତଙ୍କୁ ଚକିତ କରିଛନ୍ତି ।

ପ୍ରମିଳା ମହିଳା ସ୍ୱୟଂ ସହାୟିକା ଗୋଷ୍ଠୀ ଗଠନ କରି ଆସିକା ଅଞ୍ଚଳରେ ପରିଚିତ ହୋଇଥିଲେ ।

ତେବେ ନବୀନଙ୍କ ମହିଳା କାର୍ଡ ରାଜନୀତି ବିଶାରଦମାନଙ୍କୁ ଚକିତ କରିଥିଲେ ବି ମତଦାତା କେତେଦୂର ଏହାକୁ ଗ୍ରହଣ କରିବେ ତାହା କହିବା ମୁସ୍କିଲ୍ ।

ତେବେ ମତଦାତାଙ୍କ ପାଇଁ ପ୍ରମିଳା ନୁହେଁ ବରଂ ନବୀନଙ୍କ ନାମ ହିଁ ଭରସାର ଅନ୍ୟ ରୂପ ବୋଲି କୁହନ୍ତି ବରିଷ୍ଠ ବିଜେଡି ନେତା ।

ଏହି ଲୋକସଭା କ୍ଷେତ୍ରର ହିଂଜିଳି ବିଧାନସଭା ଆସନରୁ ନିଜେ ନବୀନ ପଟ୍ଟନାୟକ ଲଢୁଥିବାରୁ ଏହାର ପ୍ରଭାବ ସମ୍ପୂର୍ଣ୍ଣ ଲୋକସଭା ଆସନରେ ପଡ଼ିବ ବୋଲି କୁହାଯାଉଛି । ୪ଟି ବିଧାନସଭା ଆସନ(ଖଲ୍ଲିକୋଟ, କବିସୂର୍ଯ୍ୟନଗର, ଆସିକା ଓ ସାନଖେମୁଣ୍ଡି)ରେ ଦଳ ମହିଳା ପ୍ରାର୍ଥୀଙ୍କୁ ଉତାରିଛି ।

ଏହା ଦଳର ମହିଳା ଲୋକସଭା ପ୍ରାର୍ଥୀ ପ୍ରମିଳାଙ୍କୁ ସହାୟକ ହେବ ବୋଲି ବିଜେଡିର ଜଣେ ବରିଷ୍ଠ ନେତା କହିଛନ୍ତି ।

ସିପିଆଇ ପ୍ରାର୍ଥୀ ରାମକୃଷ୍ଣ ପଣ୍ଡାଙ୍କ ଘର ପିତଳ ଗାଁ । ଉଭୟ ସିପିଆଇ ଓ କଂଗ୍ରେସର କର୍ମୀ ହିଁ ତାଙ୍କର ମୁଖ୍ୟ ସମ୍ବଳ ।

ଯଦି କଂଗ୍ରେସ କର୍ମୀମାନେ ତାଙ୍କୁ ଗ୍ରହଣ କରନ୍ତି ତେବେ ସେ ବିଜେଡିକୁ କଡ଼ା ଟକ୍କର ଦେବା ନିଶ୍ଚିତ ।

ଏହି ଲୋକସଭା ଆସନରେ ପୂର୍ବରୁ ସିପିଆଇର ପ୍ରଭାବ ରହି ଆସିଛି । ୧୯୯୯ ନିର୍ବାଚନରେ ବିଜେଡିର ମୁଖ୍ୟ ପ୍ରତିଦ୍ୱନ୍ଦ୍ୱୀ ଥିଲେ ସିପିଆଇ ନେତା ଦ୍ୱିତୀକୃଷ୍ଣ ପଣ୍ଡା ।

୪ଟି ବିଧାନସଭା ଅଞ୍ଚଳରେ ଦଳର ମଜବୁତ କର୍ମୀ ରହିଛନ୍ତି । ଏଥିସହ କଂଗ୍ରେସ କର୍ମୀଙ୍କ ସହାୟତା ମିଳିଗଲେ ବିଜୟ ନିଶ୍ଚିତ ବୋଲି କୁହନ୍ତି ଦଳର ପ୍ରାର୍ଥୀ ରାମକୃଷ୍ଣଙ୍କ ସମର୍ଥକ ।ବିଜେପି ପ୍ରାର୍ଥୀ ଅନିତା ଶୁଭଦର୍ଶିନୀ ରାଜନୀତି ପରିବାରରୁ ଆସିଛନ୍ତି ।

ତାଙ୍କ ପିତା ରାମକୃଷ୍ଣ ପଟ୍ଟନାୟକ ୬ ଥର ବିଧାୟକ ନିର୍ବାଚିତ ହେବା ସହ କେଇଥର ମନ୍ତ୍ରୀ ମଧ୍ୟ ହୋଇଛନ୍ତି । ପ୍ରବୀଣ ରାଜନେତା ଭାବେ ସେ ଅଞ୍ଚଳରେ ବେଶ୍ ପରିଚିତ ମୁହଁ । ମା’ କୁମୁଦିନୀ ପଟ୍ଟନାୟକ ପୂର୍ବତନ ସାଂସଦ ଭାବେ ପରିଚିତ ।

କଂଗ୍ରେସର ନିଜସ୍ୱ ପ୍ରାର୍ଥୀ ନଥିବାରୁ ଏବଂ ବିଜେଡି ପ୍ରାର୍ଥୀ ଚୟନରେ ଥିବା ଅସନ୍ତୋଷକୁ ସେ ପାଥେୟ କରି ଆସିକା ଆସନରେ ପଦ୍ମ ଫୁଟାଇବାକୁ ଆଶା ବାନ୍ଧିଛନ୍ତି । ରାମକୃଷ୍ଣ ଜଣେ ପୁରୁଣା ବିଜୁ ସହଯୋଗୀ ହୋଇଥିବାରୁ ପକ୍କା ବିଜୁ ପ୍ରେମୀମାନେ ତାଙ୍କ ଝିଅଙ୍କୁ ସମର୍ଥନ କରିବେ ବୋଲଚି ଅନିତାଙ୍କ ସମର୍ଥକମାନେ କୁହନ୍ତି ।

ଅତୀତରେ ଏହି ଆସନରୁ ବିଜୁ ପଟ୍ଟନାୟକ ଥରେ ଏବଂ ନବୀନ ପଟ୍ଟନାୟକ ତିନି ଥର ନିର୍ବାଚିତ ହୋଇଛନ୍ତି ।

ଏଥିସହ ଭିନ୍ନ ଭିନ୍ନ ସମୟରେ ଦୂତିକୃଷ୍ଣ ପଣ୍ଡା, ମୋହନ ନାୟକ, ଅନନ୍ତ ତ୍ରିପାଠୀ ଶର୍ମା, ରାମଚନ୍ଦ୍ର ରଥ, ସୋମନାଥ ରଥ, ଅନନ୍ତ ନାରାୟଣ ସିଂଦେଓ, କୁମୁଦିନୀ ପଟ୍ଟନାୟକ, ହରିହର ସ୍ୱ।।ଇଁ, ନିତ୍ୟାନନ୍ଦ ପ୍ରଧାନ, ଲଡ଼ୁକିଶୋର ସ୍ୱାଇଁ ପ୍ରମୁଖ ନିର୍ବାଚିତ ହୋଇଛନ୍ତି ।

ଏଥର ଏହି କ୍ଷେତ୍ରର ଭୋଟର କାହା ଉପରେ ଭରସା କରି ତାଙ୍କୁ ସଂସଦକୁ ପଠାଇବେ ତାହା ହିଁ କେବଳ ଭୋଟ ଗଣତି ପରେ ସ୍ପଷ୍ଟ ହୋଇପାରିବ ।

ଲୋକାଲ ୱାୟାର