ଅର୍ଥନୀତି

ଭୁବନେଶ୍ୱର, ମାର୍ଚ୍ଚ ୮(ଲୋକାଲ ୱାୟାର): ୟେସ୍ ବ୍ୟାଙ୍କରେ ଜମା ଥିବା ଶ୍ରୀମନ୍ଦିରର ୫୪୫ କୋଟି ଟଙ୍କା ଭବିଷ୍ୟତକୁ ନେଇ ରାଜ୍ୟ ରାଜନୀତି ସରଗରମ ହୋଇଥିବା ବେଳେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ଏହି ଟଙ୍କା ଫେରି ପାଇବା ଦିଗରେ ହସ୍ତକ୍ଷେପ କରିବାକୁ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ପତ୍ର ଲେଖି ଅନୁରୋଧ କରିଛନ୍ତି ।

ଶ୍ରୀ ପୂଜାରୀ ତାଙ୍କ ଚିଠିରେ ଲେଖିଛନ୍ତି, ୟେସ୍ ବ୍ୟାଙ୍କରେ ଥିବା ଶ୍ରୀମନ୍ଦିରର ୫୪୫ କୋଟି ଟଙ୍କାର ଜମା ମିଆଦ ଶୀଘ୍ର ଶେଷ ହେବାର ଥିଲା ।

ଏଭଳି ସମୟରେ ରିଜର୍ଭ ବ୍ୟାଙ୍କ ୟେସ୍ ବ୍ୟାଙ୍କକୁ ନିଜ କବଜାକୁ ନେବା ସହ ଅଧିକ ଅର୍ଥ ଉଠାଣ ଉପରେ କଟକଣା ଜାରି କରିଛନ୍ତି । ତେଣୁ ଶ୍ରୀମନ୍ଦିର ଟଙ୍କାର ଭବିଷ୍ୟତ ନେଇ ସନ୍ଦେହ ଉଠିଲାଣି ।

ପୁରୀ ଜଗନ୍ନାଥ ମନ୍ଦିର ପ୍ରଶାସନ ରାଜ୍ୟ ସରକାରଙ୍କ ଏକ ସାମ୍ବିଧାନିକ ସଂସ୍ଥା ।

ପ୍ରଭୁ ଜଗନ୍ନାଥଙ୍କ ସହ କୋଟି କୋଟି ଭକ୍ତଙ୍କ ଭାବାବେଗ ଜଡ଼ିତ ।

ଏଣୁ ଶ୍ରୀଜଗନ୍ନାଥଙ୍କ ଭକ୍ତଙ୍କ ସ୍ୱାର୍ଥକୁ ଦୃଷ୍ଟିରେ ରଖି ୟେସ୍ ବ୍ୟାଙ୍କରେ ଜମା ଥିବା ଅର୍ଥ ଫେରସ୍ତ ଉଦେ୍ଦଶ୍ୟରେ କେନ୍ଦ୍ର ଅର୍ଥମନ୍ତ୍ରୀ ଆରବିଆଇକୁ ନିଦେ୍ର୍ଦଶ ଦେବାକୁ ସେ ଅନୁରୋଧ କରିଛନ୍ତି ।

ଲୋକାଲ ୱାୟାର

କଟକ,ମାର୍ଚ୍ଚ ୩ (ଲୋକାଲ ୱାୟାର): ଗତ ବର୍ଷ ତୁଳନାରେ ଫେବ୍ରୁଆରି ମାସରେ ରାଜ୍ୟ ଜିଏସଟି ଆଦାୟରେ ୨୮ପ୍ରତିଶତ ଅଭିବୃଦ୍ଧି ଘଟିଥିବା ଜଣେ ପଦସ୍ଥ ଅଧିକାରୀ ମଙ୍ଗଳବାର ଦିନ ସୂଚନା ଦେଇଛନ୍ତି।

ରାଜ୍ୟରେ ଗତ ବର୍ଷ ଫେବୃଆରୀ ମାସରେ ୬୭୨.୯୯କୋଟି ଟଙ୍କା ଜିଏସଟି ଆଦାୟ ହୋଇଥିବା ବେଳେ ଏଥର ୮୦୪.୮୫ କୋଟି ଟଙ୍କା ହୋଇଛି।

ତେବେ ୨୦୧୯ଏପ୍ରିଲରୁ ୨୦୨୦ ଫେବ୍ରୁଆରି ମାସ ମଧ୍ୟରେ ୨୭୦୪୪.୩୭ କୋଟି ଟଙ୍କା ଉଭୟ ରାଜ୍ୟ ଓ କେନ୍ଦ୍ର ଜିଏସଟି ବାବଦରେ ଆଦାୟ ହୋଇଥିବା ବେଳେ ଗତ ବର୍ଷ ଏହି ସମୟ ମଧ୍ୟରେ ୨୪୩୫.୭୯କୋଟି ଟଙ୍କା ଆଦାୟ ହୋଇଥିଲା।

ଏଣୁ ଏହି ସମୟ ମଧ୍ୟରେ ଓଡିଶାର ହାରାହାରି ଅଭିବୃଦ୍ଧି ହାର ୧୧.୧୮ ପ୍ରତିଶତ ରହିଛି।

ତେବେ ରାଜ୍ୟ ଜିଏସଟି ଅନ୍ତର୍ଗତ ରାଜସ୍ବ ପୂର୍ବ ବର୍ଷ ତୁଳନାରେ ୩୮ ପ୍ରତିଶତ ବୃଦ୍ଧି ପାଇଛି।

ନିର୍ଦ୍ଧାରିତ ସମୟ ମଧ୍ୟରେ ଶତ ପ୍ରତିଶତ ରିଟର୍ଣ୍ଣ ପ୍ରକ୍ରିୟା ସାରିବାକୁ ରାଜ୍ୟ ବାଣିଜ୍ୟକର ଓ ଦ୍ରବ୍ୟ ଓ ସେବା କର ଆୟୁକ୍ତ ସୁଶୀଲ ଲୋହାନୀ ସର୍କଲ କାର୍ଯ୍ୟାଳୟ ଗୁଡିକୁ ନିର୍ଦ୍ଦେଶ ଦେଇଛନ୍ତି।

ଚଳିତ ଆର୍ଥିକ ବର୍ଷରେ ଅଧିକ ଟିକସ ଦାତା ରିଟର୍ଣ୍ଣ ଦାଖଲ କରିଛନ୍ତି।

ଚଳିତ ଆର୍ଥିକ ବର୍ଷର ୨୦୨୦ ଜାନୁଆରୀ ମାସରେ ୯୧ ପ୍ରତିଶତ ରିଟର୍ଣ୍ଣ ଦାଖଲ ହୋଇଛି।

ଗତ ବର୍ଷ ଏହି ସମୟ ମଧ୍ୟରେ ୬୭ ପ୍ରତିଶତ ଟିକସ ଦାତା ରିଟର୍ଣ୍ଣ ଦାଖଲ କରିଥିଲେ।

ଟିକସ ଫାଙ୍କୁଥିବା ସଂସ୍ଥା ଓ ବ୍ୟକ୍ତିବିଶେଷଙ୍କ ବିରୋଧରେ ଏନଫୋର୍ସମେଣ୍ଟ ଶାଖା ପକ୍ଷରୁ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

ଫଳରେ ଚଳିତ ବର୍ଷ ଏ ଯାବତ ୪୫ ହଜାର୬୩୯ଜଣ ନୂତନ ଟିକସଦାତା ଟିକସ ପରିସରଭୂକ୍ତ ହୋଇଛନ୍ତି।

ରିଟର୍ଣ୍ଣ ଦାଖଲ କରୁନଥିବା ୪୯ହଜାର୮୧ଜଣ ଓ ତୃଟିପୂର୍ଣ୍ଣ ରିଟର୍ଣ୍ଣ ଦାଖଲ ନେଇ ୧୧ ହଜାର ୧୨୧ଜଣଙ୍କୁ ନୋଟିସ ଜାରି ହୋଇଛି।

ଅନ୍ୟପଟରେ ନିର୍ଦ୍ଧାରିତ ସ୍ଥାନରେ ସେମାନଙ୍କ ପ୍ରତିଷ୍ଠାନ ନ ଥିବା ତଥା ନିୟମିତ ଟିକସ ଦେଉନଥିବାରୁ ରାଜ୍ୟରେ ୧୨ ହଜାର ୩ ଶହ ବ୍ୟବସାୟୀଙ୍କ ପଞ୍ଜିକରଣକୁ ରଦ୍ଦ କରାଯାଇଛି।

ରାଜ୍ୟରେ ବଡ ଧରଣର ଜିଏସଟି ଠକେଇରେ ସଂପୃକ୍ତ ଥିବା ୭ଜଣ ମାଷ୍ଟରମାଇଣ୍ଡଙ୍କୁ ଅଦ୍ୟାବଧି ଗିରଫ କରାଯାଇଛି।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୨୦ (ଲୋକାଲ ୱାୟାର): ବିଶ୍ୱ ଆର୍ଥିକ ମାନ୍ଦାବସ୍ଥା ଦ୍ୱାରା ପ୍ରଭାବିତ ହୋଇଛି ଓଡ଼ିଶା । ୨୦୧୮-୧୯ ଆର୍ଥିକ ବର୍ଷରେ ରାଜ୍ୟର ରପ୍ତାନୀ ପ୍ରାୟ ୧୦ ପ୍ରତିଶତ ହ୍ରାସ ପାଇଛି ।

ଓଡ଼ିଶା ଅର୍ଥନୈତିକ ସର୍ବେକ୍ଷଣ ୨୦୧୯-୨୦ରୁ ଜଣାପଡ଼ିଛି, ୨୦୧୫-୧୬ରେ ୧୯,୦୮୨ କୋଟି ତୁଳନାରେ ୨୦୧୬-୧୭ରେ ୪୦, ୮୭୨ କୋଟି ଟଙ୍କାର ରପ୍ତାନୀ କରି ଓଡିଶା, ଅଗ୍ରଣୀ ରାଜ୍ୟ (ଚାମ୍ପିଅନ ଷ୍ଟେଟ) ମାନ୍ୟତା ଲାଭ କରିଥିଲା ।

ସେହିପରି ୨୦୧୭-୧୮ରେ ୫୨,୬୭୭.୦୯ କୋଟି ଟଙ୍କା ତୁଳନାରେ ୨୦୧୮-୧୯ରେ ୪୭,୬୧୯.୬ କୋଟି ଟଙ୍କାର ସାମଗ୍ରୀ ରପ୍ତାନୀ ହୋଇଥିଲା ।

୨୦୧୫-୧୬ ଓ ୨୦୧୮-୧୯ ଆର୍ଥିକ ବର୍ଷକୁ ବାଦ ଦେଲେ ଗତ ପାଞ୍ଚଟି ଆର୍ଥିକ ବର୍ଷରେ ଓଡ଼ିଶାରୁ ରପ୍ତାନୀ ବୃଦ୍ଧି ପାଇଥିଲା ।

ବିଶ୍ୱ ଆର୍ଥିକ ମାନ୍ଦାବସ୍ଥା ଯୋଗୁଁ ୨୦୧୮-୧୯ରେ ଓଡ଼ିଶାରୁ ରପ୍ତାନୀ ପ୍ରାୟ ୫,୦୫୭ କୋଟି ଟଙ୍କା ହ୍ରାସ ପାଇଛି ।

ରାଜ୍ୟରୁ ୧୧ଟି ଭିନ୍ନ ଭିନ୍ନ ସାମଗ୍ରୀ ଯେପରିକି ଧାତବ ସାମଗ୍ରୀ, ଇଞ୍ଜିନିୟରିଂ ରାସାୟନିକ ଓ ଯୌଗିକ, ଖଣି, କୃଷି ଓ ଜଙ୍ଗଲ ସାମଗ୍ରୀ, ସାମୁଦ୍ରିକ, ହସ୍ତତନ୍ତ, ହସ୍ତଶିଳ୍ପ, ବୟନ, ଔଷଧ, ସଫ୍ଟୱେର, ଇଲେକ୍ଟ୍ରୋନିକ ଓ ଅନ୍ୟାନ୍ୟ ସେବା ରପ୍ତାନୀ ହୋଇଥାଏ ।

ଏସବୁ ମଧ୍ୟରୁ ଧାତବ ସାମଗ୍ରୀ ଅଧିକ ରପ୍ତାନୀ ହୋଇଥିଲା । ୨୦୧୮-୧୯ ରେ ଏହା ସମୁଦାୟ ରପ୍ତାନୀର ୫୫ ପ୍ରତିଶତ ଥିଲା ।

ସେହି ବର୍ଷର ରପ୍ତାନୀ ତାଲିକାର ଦ୍ୱିତୀୟରେ ଥିଲା ଖଣିଜ ଦ୍ରବ୍ୟ । ସମୁଦାୟ ବାର୍ଷିକ ରପ୍ତାନୀର ଏହା ୨୦ ପ୍ରତିଶତ ଥିଲା ।

ଅନ୍ୟ ଅଗ୍ରଣୀ ରପ୍ତାନୀ ସାମଗ୍ରୀ ହେଲା ଇଞ୍ଜିନିୟରିଂ/ରାସାୟନିକ ଓ ଯୌଗିକ (୫୪୧୫.୬୨ କୋଟି), ସଫ୍ଟୱେର ଓ ଇଲେକ୍ଟ୍ରୋନିକ୍ସ (୩୫୦୦ କୋଟି) ଓ ସାମୁଦ୍ରିକ ଦ୍ରବ୍ୟ (୨୮୨୫.୫୨ କୋଟି) ।

ତେବେ ୨୦୧୭-୧୮ରେ ୩୧,୫୬୬୬.୪୬ କୋଟି ଟଙ୍କାର ଧାତବ ସାମଗ୍ରୀ ରପ୍ତାନୀ ହୋଇଥିବା ବେଳେ ୨୦୧୮-୧୯ରେ ଏହା ୨୬,୦୮୨.୯୭ କୋଟିକୁ ହ୍ରାସ ପାଇଥିଲା ।

ସେହିପରି ଇଞ୍ଜିନିୟରିଂ, ରାସାୟନିକ ଓ ଯୌଗିକ ଉତ୍ପାଦ ୨୦୧୭-୧୮ରେ ୫୮୯୨.୭୩ କୋଟିରୁ ୨୦୧୮-୧୯ରେ ୫,୪୧୫.୬୨ କୋଟିକୁ ହ୍ରାସ ପାଇଥିଲା । ସାମୁଦ୍ରିକ ଦ୍ରବ୍ୟ, ସଫ୍ଟୱେର ଓ ଇଲେକ୍ଟ୍ରୋନିକ୍ସର ବୈଦେଶିକ ବାଣିଜ୍ୟ ମଧ୍ୟ ୨୦୧୭-୧୮ ତୁଳନାରେ ୨୦୧୮-୧୯ରେ କମ୍ ଥିଲା ।

ତେବେ ସର୍ବେକ୍ଷଣରେ ରପ୍ତାନୀରେ ହୋଇଥିବା ଏହି ହ୍ରାସକୁ ଗୌଣ ବୋଲି ଦର୍ଶାଯିବା ସହ ବିବିଧ କୃଷି ପରିବେଶ ଅଞ୍ଚଳ, ଜାତୀୟ ହାର ଠାରୁ ଅଧିକ ଜଙ୍ଗଲ ଓ ଅଧିକ ଖଣିଜ ସମ୍ପଦ ସାଙ୍ଗକୁ ରପ୍ତାନୀ ଅନୁକୂଳ ନୀତି ଓ ସରକାରୀ ପ୍ରୋତ୍ସାହନ ଯୋଗୁଁ ଓଡ଼ିଶା ନିକଟରେ ବୈଦେଶିକ ବାଣିଜ୍ୟ ବୃଦ୍ଧିର ଦକ୍ଷତା ରହିଛି ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୫(ଲୋକାଲ ୱାୟାର): ଚଳିତ ବର୍ଷ ସରେଳ ବଜେଟରେ ଓଡ଼ିଶା ପାଇଁ ୪୩୭୩ କୋଟି ଟଙ୍କାର ବ୍ୟବସ୍ଥା ଥିବା ରେଳବାଇ ପକ୍ଷରୁ ସୂଚନା ଦିଆଯାଇଛି ।

ସୂଚନାନୁସାରେ, ଗତ ବର୍ଷ ପୂର୍ବତଟ ରେଳପଥ ପାଇଁ ୭୦୧୦ କୋଟି ଟଙ୍କାର ବ୍ୟବୟ ବରାଦ କରାଯାଇଥିବା ବେଳେ ଚଳିତ ବର୍ଷ ଏହି ପରିମାଣ ହୋଇଛି ୫୮୬୫ କୋଟି ଟଙ୍କା ।

ଅପରପକ୍ଷରେ ଓଡ଼ିଶା ପାଇଁ ଗତ ଆର୍ଥିକ ବର୍ଷରେ ୫ ହଜାର ୯୯୩ କୋଟି ଟଙ୍କା ବ୍ୟୟବରାଦ କରାଯାଇଥିଲା । କିନ୍ତୁ ଚଳିତ ଆର୍ଥିକ ବର୍ଷ ଏହି ପରିମାଣ ୪୩୭୩ କୋଟି ଟଙ୍କାକୁ ହ୍ରାସ ପାଇଛି ।

ଚଳିତ ବଜେଟରେ ୧୦ଟି ନୂଆ ଲାଇନ ଏବଂ ୨୧ଟି ଲାଇନର ଦୋହରୀକରଣ କିମ୍ବା ତୃତୀୟ ଲାଇନ ନିର୍ମାଣ ପାଇଁ ବଜେଟରେ ବ୍ୟୟବରାଦ କରାଯାଇଛି ।

ସେହିପରି ଅନୁଗୁଳ ଇଲେକ୍ଟ୍ରିକ୍ ଲୋକୋ ସେଡ୍ ନିର୍ମାଣ (୧୦୦ ଇଞ୍ଜିନରୁ ୧୫୦) ୪ କୋଟି ଟଙ୍କା, ମାଣେଶ୍ୱର-ସାରଳା ରୋଡ ଟ୍ରେନ୍ ଲାଇନ ମରାମତି ପାଇଁ ୨୦ କୋଟି ଟଙ୍କା, କଳାହାଣ୍ଡି ବିଦ୍ୟୁତ୍ ଇଞ୍ଜିନ ୱାର୍କସପ ପ୍ରତିଷ୍ଠା ପାଇଁ ୧୮୦ କୋଟି ଏବଂ ଓଡ଼ିଶାରେ ରେଲୱେ ବିଦ୍ୟୁତୀକରଣ କାମ ପାଇଁ ୧୮୦ କୋଟି ଟଙ୍କାର ବ୍ୟବସ୍ଥା ରଖାଯାଇଥିବା ରେଳବାଇ ପକ୍ଷରୁ ସୂଚନା ଦିଆଯାଇଛି ।

ଲୋକାଲ ୱାୟାର

କଟକ,ଡିସେମ୍ବର ୨୧(ଲୋକାଲ ୱାୟାର): ରାଜ୍ୟର ଜିଏସଟି ଅଭିବୃଦ୍ଧି ହାର ଜାତୀୟ ହାର ଠାରୁ ଅଧିକ ରହିଥିବା ଓଡିଶା ଅର୍ଥ ସେବାର ଜଣେ ଅଧିକାରୀ ଶନିବାର ଦିନ କହିଛନ୍ତି।

ଗତ ବର୍ଷ ରାଜ୍ୟରେ ଏପ୍ରିଲରୁ ନଭେମ୍ବର ମଧ୍ୟରେ ୬୬୭୫.୮୩କୋଟି ଟଙ୍କା ଉଭୟ ରାଜ୍ୟ ଓ କେନ୍ଦ୍ର ଜିଏସଟି ବାବଦରେ ଆଦାୟ ହୋଇଥିଲା ବେଳେ ଏଥର ଏହି ସମୟ ମଧ୍ୟରେ ୮୬୮୩.୮୫କୋଟି ଟଙ୍କା ଆଦାୟ ହୋଇପାରିଛି ବୋଲି ସେ କହିଛନ୍ତି।

ଓଡିଶାର ହାରାହାରି ଅଭିବୃଦ୍ଧି ହାର ୩୦.୦୮ ପ୍ରତିଶତ ରହିଥିଲା ବେଳେ ଏହା ସମଗ୍ର ଦେଶର ପ୍ରମୁଖ ରାଜ୍ୟ ମାନଙ୍କ ମଧ୍ୟରେ ସର୍ବାଧିକ ଓ ଜାତୀୟ ହାର ଠାରୁ ଅଧିକ । ଜାତୀୟ ଅଭିବୃଦ୍ଧି ହାର ଏହି ସମୟ ମଧ୍ୟରେ ମାତ୍ର ୧୧.୫୩ ପ୍ରତିଶତ।

ସେହିପରି ରାଜ୍ୟ ଜିଏସଟି ଅନ୍ତର୍ଗତ ରାଜସ୍ବ ପୂର୍ବ ବର୍ଷ ତୁଳନାରେ ୩୮ ପ୍ରତିଶତ ବୃଦ୍ଧି ପାଇଛି।

ନିର୍ଦ୍ଧାରିତ ସମୟ ମଧ୍ୟରେ ଶତପ୍ରତିଶତ ରିଟର୍ଣ୍ଣ ପ୍ରକ୍ରିୟା ସାରିବାକୁ ରାଜ୍ୟ ବାଣିଜ୍ୟକର ଓ ଦ୍ରବ୍ୟ ଓ ସେବା କର ଆୟୁକ୍ତ ସୁଶୀଲ କୁମାର ଲୋହାନୀ ସର୍କଲ କାର୍ଯ୍ୟାଳୟ ଗୁଡିକୁ ନିର୍ଦ୍ଦେଶ ଦେଇଛନ୍ତି ।

୨୦୧୮ ତୁଳନାରେ ଅଧିକ ଟିକସ ଦାତା ଏଥର ରିଟର୍ଣ୍ଣ ଦାଖଲ କରିଛନ୍ତି ।

୨୦୧୮ ଅକ୍ଟୋବର ମାସରେ ୬୫.୩୧ ପ୍ରତିଶତ ରିଟର୍ଣ୍ଣ ଦାଖଲ କରିଥିଲା ବେଳେ ଚଳିତ ବର୍ଷ ଅକ୍ଟୋବରରେ ୮୩.୫୦ପ୍ରତିଶତ ଟିକସ ଦାତା ରିଟର୍ଣ୍ଣ ଦାଖଲ କରିଥିବା ଜଣାପଡିଛି ।

ଟିକସ ଫାଙ୍କୁଥିବା ସଂସ୍ଥା ଓ ବ୍ୟକ୍ତି ବିଶେଷଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବାରୁ ଏହି ସଫଳତା ମିଳିଛି।

ଲୋକାଲ ୱାୟାର

ଭୁବନେଶ୍ୱର, ସେପ୍ଟେମ୍ବର ୬(ଲୋକାଲ ୱାୟାର): ୫-Ts( ଟିମ୍ ୱର୍କ, ଟ୍ରାନ୍ସପରେନ୍ସି, ଟ୍ରାନଫର୍ମେସନ ଓ ଟାଇମ ଲିମିଟ) ଶାସନର ଘୋଷଣାପତ୍ର ଭାବେ ରାଜ୍ୟ ସରକାରଙ୍କ କାର୍ଯ୍ୟସୂଚୀରେ ପ୍ରମୁଖତା ପାଇଛି ।

ହେଲେ ପ୍ରଶାସନିକ କାର୍ଯ୍ୟ ପଦ୍ଧତିରେ ସ୍ୱଚ୍ଛତା ଆଣିବା ପାଇଁ ଉଦ୍ଦିଷ୍ଟ ଆରଟିଆଇ ସୂଚନା ବ୍ୟବସ୍ଥା ସନ୍ତୋଷଜନକ କାମ କରୁନାହିଁ ।

ରାଜ୍ୟର ସମସ୍ତ ବିଭାଗ ଓ ଅଧସ୍ତନ ବିଭାଗର ତଥ୍ୟ ଜଣାଇବା ପାଇଁ ସରକାରଙ୍କ ଦ୍ୱାରା ବିକଶିତ ଆରଟିଆଇ ପୋର୍ଟାଲ (www.rtiodisha.in) ଗୁରୁତ୍ୱପୂର୍ଣ୍ଣ ବିଭାଗର ସୂଚନା ପ୍ରଦାନ କରିବାରେ ନିଷ୍କ୍ରିୟ ରହିବା ସାଙ୍ଗକୁ ବର୍ଷ ବର୍ଷ ଧରି ନୂଆ ସୂଚନା ଅପଡେଟ କରା ଯାଉନାହିଁ ।

ୱେବସାଇଟ୍ରେ ପୁରୁଣା ତଥ୍ୟ ରହୁଛି ।ଆରଟିଆଇ ନିୟମର ଧାରା ୪ ଅନୁଯାୟୀ ପ୍ରତିବର୍ଷ ସମସ୍ତ କାର୍ଯ୍ୟାଳୟ ୧୭ ପ୍ରକାରର ସୂଚନା ଅପଡେଟ କରିବେ ।

ଜଣେ ପୋର୍ଟାଲ ବ୍ରାଉଜ୍ କଲେ ପ୍ରାୟ ସମସ୍ତ କାର୍ଯ୍ୟାଳୟର ଅଦରକାରୀ ସୂଚନା ସହ ଲିଙ୍କ୍ ଆସୁଛି । କୌଣସି ବିଭାଗ ଓ ଅଧସ୍ତନ କାର୍ଯ୍ୟାଳୟ ୨୦୧୯ ପର୍ଯ୍ୟନ୍ତ ତଥ୍ୟ ଅପଡେଟ କରିନାହାନ୍ତି ।

ସଂସଦୀୟ ବ୍ୟାପାର ବିଭାଗର ତଥ୍ୟ ୨୦୧୪ ପର୍ଯ୍ୟନ୍ତ ଅପଡେଟ ହୋଇଛି । ଯେଉଁ ତଥ୍ୟ ଦିଆଯାଇଛି ସେଗୁଡି଼କ ଲୋକଙ୍କ କାମରେ ଆସିଲା ଭଳି ନୁହେଁ ।

ଓଡ଼ିଶା ବିଧାନସଭାର ତଥ୍ୟ ୨୦୧୩ରେ ଶେଷ ଥର ଅପଡେଟ୍ ହୋଇଥିଲା ।ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗର କିଛି ତଥ୍ୟ ୨୦୧୭ରେ ଅପଡେଟ୍ ହୋଇଥିବା ବେଳେ ଆଉ କିଛି ୨୦୧୮ରେ ଅପଡେଟ୍ ହୋଇଛି ।

ଓଡିଶା ରାଜ୍ୟ ଏଡସ ନିୟନ୍ତ୍ରଣ ସୋସାଇଟି ୨୦୧୨ରୁ ତଥ୍ୟ ଅପଡେଟ କରିନଥିବା ବେଳେ ଓଡ଼ିଶା ରାଜ୍ୟ ସମବାୟ ବ୍ୟାଙ୍କ କୌଣସି ତଥ୍ୟ ଦେଇନାହିଁ ।

ସେହିପରି ରାଜ୍ୟ ସମାଜ କଲ୍ୟାଣ ବୋର୍ଡ ୨୦୦୯ରୁ ତଥ୍ୟ ଅପଡେଟ୍ କରିନାହିଁ ।ମହିଳା ଓ ଶିଶୁ ବିକାଶ ବିଭାଗର ଗୁରୁତ୍ୱପୂର୍ଣ୍ଣ ସୂଚନା ୨୦୧୬ରୁ ଅପଡେଟ୍ ହୋଇନାହିଁ ।

୨୦୦୮-୦୯ ପର୍ଯ୍ୟନ୍ତ ବିଭାଗର ବଜେଟ ସୂଚନା ଉପଲବ୍ଧ ରହିଛି ।ମାଲକାନଗିରି ଜିଲ୍ଲାର କାଳିମେଳା ତହସିଲ ସମ୍ପର୍କରେ କୌଣସି ସୂଚନା ନାହିଁ ।

ଯଦିଓ ପୋର୍ଟାଲ ୨୦୧୮ ପର୍ଯ୍ୟନ୍ତ ଅପଡେଟ ହୋଇଥିବା କୁହାଯାଉଛି ।ଓଡ଼ିଶା ଖଣି ନିଗମର ସୂଚନା ୨୦୧୬ରୁ ଅପଡେଟ୍ ହୋଇନାହିଁ ଓ ଏହି ଧନୀ ନିଗମର ବଜେଟ ସମ୍ପର୍କରେ କୌଣସି ସୂଚନା ନାହିଁ ।

କୃଷି ଓ କୃଷକ ସଶକ୍ତିକରଣ ବିଭାଗର ସୂଚନା ୨୦୧୭ରୁ ଅପଡେଟ୍ ହୋଇନାହିଁ ଓ ୨୦୦୮-୦୯ର ବଜେଟ ପୋର୍ଟାଲରେ ରହିଛି ।

ରାଜ୍ୟ ମହିଳା କମିଶନଙ୍କ ପୋର୍ଟାଲ ୨୦୧୪ ଯାଏଁ ଅପଡେଟ ହୋଇଛି ।ଅନଲାଇନ ଆରଟିଆଇ ଆବେଦନ ସିଷ୍ଟମରେ ତ୍ରୁଟି ଯୋଗୁଁ ଆରମ୍ଭ ବେଳ ଠାରୁ ବେକାର ହୋଇପଡ଼ିଛି ।

ଆରଟିଆଇ ନିୟମର ଧାରା ୪(୪) ଅନୁଯାୟୀ ସମସ୍ତ ଲଗାତର ଦିଆଯାଉଥିବା ସୂଚନା ଓଡ଼ଆରେ ଉପଲବ୍ଧ ହେବ ।

ତେବେ କୌଣସି ବିଭାଗ ଆରଟିଆଇ ସୂଚନା ଓଡ଼ିଆରେ ଦେବାକୁ ପଦକ୍ଷେପ ନେଉ ନାହାନ୍ତି ।

ରାଜ୍ୟ ସରକାର ଓଡ଼ିଆ ଭାଷା ଆଇନ ସଂଶୋଧନ କରିଛନ୍ତି ଓ ଓଡ଼ିଆ ଭାଷାରେ ସରକାରୀ ପତ୍ର ବିନିମୟ ପାଇଁ ନିର୍ଦ୍ଦେଶନାମା ଜାରି କରିଛନ୍ତି ।

ହେଲେ ଏହାର ରୂପାୟନ କେବଳ କାଗଜପତ୍ରରେ ସୀମିତ ରହିଛି ।

ଲୋକାଲ ୱାୟାର

ଭୁବନେଶ୍ୱର, ସେପ୍ଟେମ୍ବର ୫(ଲୋକାଲ ୱାୟାର): ଚୀନର ଗ୍ୱାଙ୍ଗଝାଓଠାରେ ଆୟୋଜିତ ଓଡ଼ିଶାର ପୁଞ୍ଜିନିବେଶ ରୋଡ ସୋରେ ରାଜ୍ୟ ଶିଳ୍ପମନ୍ତ୍ରୀ ଦିବ୍ୟଶଙ୍କର ମିଶ୍ର ଯୋଗ ଦେଇ ଓଡ଼ିଶାରେ ପୁଞ୍ଜିନିବେଶ କରିବାକୁ ସେଠାକାର ନିବେଶକମାନଙ୍କୁ ଆହ୍ୱାନ ଦେଇଛନ୍ତି ।

ଶିଳ୍ପମନ୍ତ୍ରୀ କହିଥିଲେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ଓଡ଼ିଶାର ବହୁ ବିକାଶ ଘଟିଛି । ଉନ୍ନତ ଭିତ୍ତିଭୂମି ଓ ଦକ୍ଷ ମାନବ ସମ୍ବଳ ଜରିଆରେ ଓଡ଼ିଶାରେ ବ୍ୟାପକ ଶିଳ୍ପ ପ୍ରତିଷ୍ଠା ପାଇଁ ଅନୁକୂଳ ବାତାବରଣ ହୋଇଛି ।

ରାଜ୍ୟ ସରକାର ନିବେଶକମାନଙ୍କୁ ସବୁ ପ୍ରକାର ସୁବିଧା ସୁଯୋଗ ଯୋଗାଇବା ପାଇଁ ପ୍ରତିଶ୍ରୁତିବଦ୍ଧ ।

ଇପିକଲ ପରିଚାଳନା ନିର୍ଦ୍ଦେଶକ ତଥା ଶିଳ୍ପ ବିଭାଗ ସ୍ୱତନ୍ତ୍ର ସଚିବ ନୀତିନ ଜୱାଲେ ମଧ୍ୟ କାର୍ଯ୍ୟକ୍ରମରେ ଯୋଗ ଦେଇ ଓଡ଼ିଶାର ଶିଳ୍ପ ଅନୁକୂଳ ବାତାବରଣ ସମ୍ପର୍କରେ କହିଥିଲେ ।

ଲୋକାଲ ୱାୟାର

କଟକ,ସେପ୍ଟେମ୍ବର ୫ (ଲୋକାଲ ୱାୟାର): ସଂପ୍ରତି ଦେଶରେ ଆର୍ଥିକ ମାନ୍ଦାବସ୍ଥାର ପ୍ରଭାବ ବିଭିନ୍ନ ସେକ୍ଟର ଉପରେ ପଡୁଥିଲେ ହେଁ ଭାରତୀୟ ଜୀବନବୀମା ପଲିସି କ୍ରୟ ଉପରେ ଏହାର କୌଣସି ପ୍ରଭାବ ପଡିନାହିଁ ଓ ପ୍ରିମିୟମ ଆୟ କ୍ଷେତ୍ରରେ କଟକ ଡିଭିଜନ ସମଗ୍ର ଦେଶରେ ଶୀର୍ଷ ସ୍ଥାନ ଅଧିକାର କରିଛି ବୋଲି ବରିଷ୍ଠ ମଣ୍ଡଳ ପ୍ରବନ୍ଧକ ଅଶୋକ ରାଉତରାୟ ବୁଧବାର ଦିନ ସୂଚନା ଦେଇଛନ୍ତି ।

ରାଉତରାୟ କହିଛନ୍ତି ଯେ କଟକ ଡିଭିଜନ ଗତ ଆର୍ଥିକ ବର୍ଷରେ ୬୪୫.୬୨କୋଟି ଟଙ୍କା ନୂତନ ପ୍ରିମିୟମ ବାବଦରେ ଆୟ କରିଥିଲା।

ଚଳତ ଆର୍ଥିକ ବର୍ଷରେ କଟକ ମଣ୍ଡଳ ୫ଲକ୍ଷ ୬୦ ହଜାର ନୂତନ ପଲିସି ଓ ୯୦୦ କୋଟି ଟଙ୍କାର ବାର୍ଷିକ ପ୍ରିମିୟମ ଆୟର ଲକ୍ଷ୍ୟ ରଖିଛି।

୨୦୧୮-୧୯ ଆର୍ଥିକ ବର୍ଷରେ କଟକ ଏଲଆଇସି ଡିଭିଜନ ୫ ଲକ୍ଷ ୧୦ହଜାର୫୪୪ଟି ନୂତନ ପଲିସି କରି ସର୍ବଭାରତୀୟ ସ୍ତରରେ ପ୍ରଥମ ସ୍ଥାନ ଅଧିକାର କରିଛି ।

କଟକ ମଣ୍ଡଳ ଅଧିନସ୍ଥ ଭଦ୍ରକ ଶାଖା ନୂତନ ପଲିସି କରିବାରେ ସମଗ୍ର ଦେଶରେ ତୃତୀୟ ସ୍ଥାନ ଦଖଲ କରିଛି ।

ଲୋକାଲ ୱାୟାର

ଭୁବନେଶ୍ୱର, ଅଗଷ୍ଟ ୨୧(ଲୋକାଲ ୱାୟାର): ଇଣ୍ଡିଆନ୍ ଚାମ୍ବର ଅଫ୍ କମର୍ସ (ଆଇସିସି) ପକ୍ଷରୁ ଭୁବନେଶ୍ୱରରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇ କୋଲକାତା ସ୍ଥିତ ଅଷ୍ଟ୍ରେଲିଆ ବାଣିଜ୍ୟ ଦୂତାବାସର ବାଣିଜ୍ୟ ରାଷ୍ଟ୍ରଦୂତ ଆଣ୍ଡ୍ର‌୍ୟୁ ଫର୍ଡ ଓଡ଼ିଶାର ବ୍ୟବସାୟୀମାନଙ୍କୁ ଅଷ୍ଟ୍ରେଲିଆରେ ପୁଞ୍ଜି ଖଟାଇବାକୁ ଆହ୍ୱାନ ଦେଇଛନ୍ତି ।

ସେ କହିଛନ୍ତି, ବାଣିଜ୍ୟ ପାଇଁ ଅନୁକୂଳ ପରିବେଶ ଥିବା ରାଷ୍ଟ୍ର ତାଲିକାରେ ଅଷ୍ଟ୍ରେଲିଆ ରହିଛି ।

ତେଣୁ ଓଡ଼ିଶାର ବ୍ୟବସାୟୀମାନେ ପୁଞ୍ଜି ନିବେଶ କରିବାକୁ ଆଗ୍ରହୀ ହେଲେ ସେମାନଙ୍କୁ ସମସ୍ତ ପ୍ରକାର ସହାୟତା ଯୋଗାଇ ଦିଆଯିବ ।

ଅପରପକ୍ଷରେ, ଭାରତରେ ସମ୍ବଳ ଓ ଶକ୍ତି, ଶିକ୍ଷା, ଦକ୍ଷତା ବିକାଶ, ପର୍ଯ୍ୟଟନ, ଖାଦ୍ୟ ପ୍ରକ୍ରିୟାକରଣ, ସ୍ୱାସ୍ଥ୍ୟସେବା ଓ ବନ୍ଦର ଭଳି ୧୦ଟି ପ୍ରମୁଖ କ୍ଷେତ୍ରରେ ଅଷ୍ଟ୍ରେଲିଆ ନିବେଶ କରିବାକୁ ଲକ୍ଷ୍ୟ ରଖିଛି ।

ଓଡ଼ିଶା ସମେତ ୧୦ଟି ରାଜ୍ୟକୁ ଅଷ୍ଟ୍ରେଲିଆ ଏଥିପାଇଁ ପସନ୍ଦ କରିଛି ।୨୦୩୫ ସୁଦ୍ଧା ଭାରତରେ ଅଷ୍ଟ୍ରେଲିଆ ପୁଞ୍ଜିନିବେଶ ୭ ଲକ୍ଷ କୋଟି ଟଙ୍କା ଟପିବ ବୋଲି ସେ ଆଶା ପ୍ରକାଶ କରିଥିଲେ ।

ଫର୍ଡଙ୍କ ଗସ୍ତ ଅବସରରେ ଅଷ୍ଟ୍ରେଲିଆ ଟ୍ରେଡ୍ କମିସନର ବିଜନେସ୍ ଡେଭଲପମେଣ୍ଟ ମ୍ୟାନେଜର ପାର୍ଥ ସେନ,ଆଇସିସି ଓଡ଼ିଶା ରାଜ୍ୟ ପରିଷଦର କୋର୍ ସଦସ୍ୟା ଏଭିପି ନିଳଞ୍ଜନା ମୁଖାର୍ଜୀ, ଓଡ଼ିଶା ରାଜ୍ୟ ପରିଷଦ ସହ-ଅଧ୍ୟକ୍ଷ ଜେ ବି ପାଣି ପ୍ରମୁଖ ଉପସ୍ଥିତ ଥିଲେ ।

ଲୋକାଲ ୱାୟାର