କନ୍ଧମାଳ

ଭୁବନେଶ୍ୱର, ମାର୍ଚ୍ଚ ୧୫(ଲୋକାଲ ୱାୟାର): ରବିବାର ବିଳମ୍ବିତ ରାତିରେ ଏମିତି ଏକ ସାହାସିକତାର କାମ କରି ଦେଖାଇଛନ୍ତି କନ୍ଧମାଳ ଜିଲ୍ଲା ବାଲିଗୁଡ଼ା ବନଖଣ୍ଡ ଅଧିକାରୀ ଆଇଏଫଏସ୍ ବିଶ୍ୱନାଥ ନିଳାମ୍ବର ।

ନୂଆଗାଁ ବନାଞ୍ଚଳ ଅଧୀନରେ ଥିବା ଦୁଇଟି ପାହାଡର ୮ଟି ଜାଗାରେ ନିଆଁ ଲାଗିଥିବା ବେଳେ ବନାଞ୍ଚଳ ଅଧିକାରୀ ସରୋଜ କୁମାର ମଙ୍ଗରାଜ ନିଆଁ ଲିଭାଇବାକୁ ଯାଇ ଆହତ ହୋଇଥିଲେ । ଏ ଖବର ପାଇବା ପରେ ନିଜେ ବନଖଣ୍ଡ ଅଧିକାରୀ ଘଟଣା ସ୍ଥଳରେ ପହଞ୍ଚି

ବ୍ଲୋୟର ଧରି ନିଆଁକୁ ଆୟତ୍ତ କରିଥିଲେ । ରାତି ୧୦ଟା ୪୫ରୁ ରାତି ଗୋଟାଏ ପର୍ଯ୍ୟଡ଼୍ତ ଏହି ଅଭିଯାନ ଚାଲିଥିଲା । ଦୁଇଟି ଦଳରେ ପ୍ରାୟ ୧୦ ଜଣ କର୍ମକର୍ତ୍ତା ମିଶି ନିଆଁକୁ ଆୟତ୍ତ କରିଥିଲେ ।

ବନଖଣ୍ଡ ଅଧିକାରୀ ବିଶ୍ୱନାଥଙ୍କ ବ୍ଲୋୟର ଧରି ନିଜେ ନିଆଁ ଲିଭାଇବା ଖବର ଓ ଫଟୋ ଏବେ ସୋସିଆଲ୍ ମିଡିଆରେ ଭାଇରାଲ୍ ।

ଏ ବାବଦରେ ବନଖଣ୍ଡ ଅଧିକାରୀ ବିଶ୍ୱନାଥ ନିଳାମ୍ବର କହିଛନ୍ତି ଅଗ୍ନି ପ୍ରବଣ ମାସ ଆରମ୍ଭ ହେବା ଦିନରୁ ହିଁ ରାତ୍ରିକାଳୀନ ପାଟ୍ରୋଲିଂରେ ଆରମ୍ଭ ହୋଇଛି ।

ସାଟେଲାଇଟରେ ଖବର ଆସିବା ପରେ ପ୍ରତିଦିନ ବିଭିନ୍ନ ରେଞ୍ଜକୁ ଯିବା ଆରମ୍ଭ ହେଉଛି ।

ଏମିତିରେ ତ ସବୁ ରେଞ୍ଜ ଅଧିକାରୀ ଓ ଫରେଷ୍ଟରମାନେ କାମ କରୁଛନ୍ତି । କିନ୍ତୁ ମୁଁ ନିଜେ ଯିବା ଦିନରୁ ସେମାନଙ୍କ ଭିତରେ ଏକ ସାକାରାତ୍ମକ ଭାବନା ଜାଗ୍ରତ ହେବାର ମୁଁ ନିଜେ ଅନୁଭବ କରିଛି ।

ଲୋକାଲ ୱାୟାର

ଭୁବନେଶ୍ୱର, ମାର୍ଚ୍ଚ ୧୨(ଲୋକାଲ ୱାୟାର): ଜନସାଧାରଣଙ୍କ ସହଭାଗିତା ଯେକୌଣସି ବଡ଼ ସମସ୍ୟାର ସମାଧାନ କରିପାରେ ।

ଏକଥାକୁ ସତ କରି ଦେଖାଇଛନ୍ତି ମାଲକାନଗିରି ବନଖଣ୍ଡ ଅଧିକାରୀ ପ୍ରଦୀପ ମିରାସେ ।

ସ୍ଥାନୀୟ ବନ ସୁରକ୍ଷା ସମିତିର ସହଯୋଗରେ ସେ ଚଳିତ ବର୍ଷ ଜଙ୍ଗଲ ନିଆଁକୁ ନିୟନ୍ତ୍ରଣ କରିବାରେ ସଫଳ ହୋଇଛନ୍ତି ।

୨୦୧୯ ମସିହାରେ ମାଲକାନଗିରି ବନଖଣ୍ଡ ଅଧୀନରେ ୨୧୫୨ଟି ସ୍ଥାନରେ ନିଆଁ ଲାଗିଥିବା ବେଳେ ୨୦୨୦ରେ ଏହି ସଂଖ୍ୟା ୧୧୬୦ ଆଉ ଏବେ ଜାନୁୟାରୀରୁ ମାର୍ଚ୍ଚ ଯାଏଁ ମାତ୍ର ୨୩୦ଟି ସ୍ଥାନରେ ନିଆଁ ଲାଗିଛି ।

ଯାହାକି ଗତ ଦୁଇ ବର୍ଷର ଜଙ୍ଗଲ ନିଆଁର ପରିମାଣ ତୁଳନାରେ ଯଥେଷ୍ଟ କମ୍ । ଆଉ ଏସବୁ ସମ୍ଭବ ହୋଇଛି ସ୍ଥାନୀୟ ବନ ସୁରକ୍ଷା ସମିତି ଦ୍ୱାରା ।

ଚାରିଆଡ଼େ ଜଙ୍ଗଲ ଜଳୁଥିବା ଖବର ଲୋକଙ୍କୁ ବ୍ୟତିବ୍ୟସ୍ତ କରୁଥିବା ବେଳେ ମାଲକାନଗିରି ବନଖଣ୍ଡ ଏ ଦିଗରେ ନିଶ୍ଚିତ ଭାବେ ସମସ୍ତଙ୍କୁ ଆଶ୍ୱସ୍ତ କରିବ । ଗତ ଦୁଇ ବର୍ଷର ରେକର୍ଡକୁ ଭିତ୍ତିକରି ପ୍ରତି ବନାଞ୍ଚଳରେ ଫାୟାର୍ ପଏଣ୍ଟକୁ ଚିହ୍ନଟ କରାଯାଇଛି ।

ପାଖାପାଖି ୬୦୦ ବନ ସୁରକ୍ଷା ସମିତି, ବନ ବିଭାଗ କର୍ମଚାରୀଙ୍କ ମିଳିତ ପ୍ରାୟାସରେ ୨୭ଟି ଅତି ସମ୍ବେଦନଶୀଳ ଜଙ୍ଗଲ ନିଆଁ ଅଞ୍ଚଳକୁ ଆୟ କରିବାକୁ ଚେଷ୍ଟା କରାଯାଉଛି ।

ବନାଞ୍ଚଳ ଅଧୀନରେ ଥିବା ମହୁଲ ଗଛକୁ ଚିହ୍ନଟ କରି ସେଠାରେ ଆଗୁଆ କଣ୍ଟ୍ରୋଲ ବର୍ଣ୍ଣିଂ ପ୍ରକ୍ରିୟା କରାଯାଇଛି । ଫଳରେ ସ୍ଥାନୀୟ ଲୋକଙ୍କ ପାଇଁ ମହୁଲ ଗୋଟାଇବାରେ ଯେଉଁ ଅସୁବିଧା ଉପୁଜୁଥିଲା ତା’ର ସମାଧାନ ହୋଇ ପାରିଲା ।

‘ଆମ ଜଙ୍ଗଲ ଯୋଜନା’ରେ ଗାଁ ଗାଁରେ ବୈଠକ ଡାକି ଲୋକଙ୍କୁ ଜଙ୍ଗଲ ନିଆଁର ଭୟାବହତା, ଏନେଇ ଥିବା ଦଣ୍ଡ ବିଧାନ ବାବଦରେ ସଚେତନ କରାଯାଇ ପାରିଛି ।

ଫେବୃୟାରୀ ଅରମ୍ଭ ପୂର୍ବରୁ ପାଖାପାଖି ଏମିତି ୧୦୦ରୁ ଅଧିକ ସଚେତନତା କାର୍ଯ୍ୟକ୍ରମ ଗାଁଲୋକଙ୍କ ପାଇଁ ଗାଁ ଲୋକଙ୍କ ଦ୍ୱାରା କରାଯାଇଛି ।

ଏଠାରେ ଫାୟାର୍ ଲାଇନ୍ ଟ୍ରେସିଂ ପ୍ରକ୍ରିୟାକୁ ମଧ୍ୟ ବ୍ୟବସ୍ଥିତ ଢଙ୍ଗରେ ପରିଚାଳିତ ହୋଇଛି ।

୧୦ ଫୁଟ୍ ଓସାରର ୫ କିଲୋମିଟର ଦୈର୍ଘ୍ୟର ଗୋଟିଏ ଗୋଟିଏ ଜାଗା ଚିହ୍ନଟ କରି ଫାୟାର ଲାଇନ୍ ଟ୍ରେସିଂ କରି ଆରମ୍ଭରୁ ଶେଷ ଯାଏଁ ଏହାର ଭିଡିଓ ଡକୁ୍ୟମେଣ୍ଟେସନ୍ କରାଯାଇଛି ।

ଫଳରେ ପରିଚାଳନାଗତ ତ୍ରୁଟି ଉପୁଜିନି । ସ୍ଥାନୀୟ ଲୋକଙ୍କୁ ଶପଥ ପାଠ କରାଇ ଓ ଲୋକଗୀତ ଦ୍ୱାରା ମଧ୍ୟ ଜଙ୍ଗଲ ନିଆଁ ବାବଦରେ ମଧ୍ୟ ସଚେତନତା କରାଯାଉଛି ।

ବନ ବିଭାଗ ଦ୍ୱାରା ବାଲିମେଳା ଜଳଭଣ୍ଡାର ଅଞ୍ଚଳରେ ଥିବା ଜଙ୍ଗଲରେ ନିଆଁକୁ ଆୟତ୍ତ କରିବା ପାଇଁ ନିକଟରେ ‘ଗୁରୁପ୍ରିୟା’ ନାମରେ ଏକ ମୋଟର ବୋଟ ଆରମ୍ଭ କରାଯାଇଛି ।

ଯାହାକି ଜଳଭଣ୍ଡାର ଭିତରେ ଯେକୌଣସି ଜଙ୍ଗଲରେ ନିଆଁକୁ ଆୟତ୍ତ କରିବାରେ ସାହାଯ୍ୟ କରିବ ।

କେବଳ ସେତିକି ନୁହେଁ ଆନ୍ଧ୍ର ଓ ଓଡ଼ିଶା ଲୋକଙ୍କ ଦ୍ୱାରା ଏଠାରେ ବଡ଼ଯାତ୍ରା ନାମରେ ଆୟୋଜିତ ହେଉଥିବା ପାରମ୍ପରିକ ପୂଜାକୁ ମଧ୍ୟ ଆୟତ୍ତାଧୀନ କରାଯାଇଛି । ଏହି ପୂଜାରେ ଠାକୁରାଣୀ ଆନ୍ଧ୍ରରୁ ବାହାରି ମାଲକାନଗିରିରେ ପହଞ୍ଚିଥାନ୍ତି ।

ଏହି ସମୟରେ ପାରମ୍ପରିକ ଅଧିବାସୀମାନେ ଯିବା ଆସିବା ପାଇଁ ବ୍ୟବହାର କରୁଥିବା ମୋଟୁ, କାଳିମେଳା, ମାଲକାନଗିରି ରେଞ୍ଜ ଅଧୀନରେ ଥିବା ରାସ୍ତାରେ ପଡୁଥିବା ଜଙ୍ଗଲରେ ନିଆଁ ଲଗାଇଥାନ୍ତି । ତେଣୁ ଚଳିତ ବର୍ଷ ସେଠାରେ ବିଭାଗ ପାଟ୍ରୋଲଂ ବ୍ୟବସ୍ଥାକୁ କଡ଼ା କଡ଼ି କରିଛି ।

ସେହିପରି କନ୍ଧମାଳ ଜିଲ୍ଲା ବାଲିଗୁଡ଼ା ଫରେଷ୍ଟ ଡିଭିଜନ୍ ଜଙ୍ଗଲ ନିଆଁକୁ ନିୟନ୍ତ୍ରଣ କରିବାକୁ ଯାଇ ‘ରିଙ୍ଗ ଆଣ୍ଡଷ୍ଟ୍ରିପ୍ ଟେକ୍ନୋଲେଜି’କୁ ଆପଣେଇଛନ୍ତି ।
ମହୁଲ ଫୁଲ ଗୋଟାଇବା ପାଇଁ ଏଠାକାର ଆଦିବାସୀ ଲୋକମାନେ ଶୁଖିଲା ପତ୍ରକୁ ଜଳାଉଥିବା ବେଳେ ବନ ବିଭାଗ ପୂର୍ବରୁ ପ୍ରତିଷେଧକ ବ୍ୟବସ୍ଥା ଗ୍ରହଣ କରିଛି ।

ଡିଭିଜନ୍ ଅଧୀନରେ ଥିବା ମହୁଲ ଗଛ ଓ ଏହାର ଜିପିଏସ୍ ଠିକଣା ଟ୍ରେସିଂ କରାଯାଇ ଏହି ଗଛର ମାଲିକାନା ସ୍ୱତ୍ୱ ଥିବା ମୁରବିଙ୍କ ସହ ଆପୋଷ ଆଲୋଚନା କରାଯାଇଛି ।

ପରେ ସେମାନଙ୍କ ସହାୟତାରେ ସଂପୃକ୍ତ ଗଛର ତଳେ ଶୁଖିଲା ପତ୍ରକୁ ଜଳାଯାଇଛି । ଜନ ସହଭାଗିତାରେ ବନ ବିଭାଗର ଏହି ପ୍ରଚେଷ୍ଟାରେ ସେଠାରେ ଜଙ୍ଗଲ ନିଆଁକୁ ଗତ ଦୁଇ ବର୍ଷ ହେଲା ନିୟନ୍ତ୍ରଣ କରାଯାଇ ପାରୁଛି ।

୨୦୧୮ ମସିହାରେ ସେଠାରେ ବନ ବିଭାଗ ୨୩୯୮ଟି ସ୍ଥାନରେ ନିଆଁ ଲାଗିଥିବା ସ୍ଥାନ ଚିହ୍ନଟ କରିଥିବା ବେଳେ ୨୦୧୯ରେ ଏହି ସଂଖ୍ୟା ୨୦୪୭, ୨୦୨୦ରେ ୧୨୦୭କୁ ଖସିଛି ।

ଲୋକାଲ ୱାୟାର

ଭୁବନେଶ୍ୱର, ଜାନୁଆରୀ ୧୮ (ଲୋକାଲ ୱାୟାର) : ଆଭ୍ୟନ୍ତରୀଣ ଓଡିଶା ଏବଂ ଆଖପାଖ ଅଞ୍ଚଳରେ ସ୍ଥଳଭାଗରେ ସମୁଦ୍ର ପତନ ଠାରୁ ୦.୯ କିଲୋମିଟର ଉଚ୍ଚରେ ସୃଷ୍ଟି ହୋଇଥିବା ସାଇକ୍ଲୋନିକ୍ ପ୍ରବାହ ଏବେ ଦୁର୍ବଳ ହୋଇ ପଡ଼ିଥିବାରୁ ଆଗାମୀ ୨ରୁ ୩ ଦିନ ପର୍ଯ୍ୟନ୍ତ ରାଜ୍ୟର ବହୁ ଜିଲ୍ଲାରେ ରାତିର ସର୍ବନିମ୍ନ ତାପମାତ୍ରା ୩ରୁ ୪ ଡିଗ୍ରି ପର୍ଯ୍ୟନ୍ତ ହ୍ରାସ ପାଇବ ସହ ପ୍ରତ୍ୟୁଷରୁ ଘନରୁ ହାଲୁକା କୁହୁଡ଼ି ପଡ଼ିବ ବୋଲି ଆଜି ଅପରାହ୍ନରେ ଭୁବନେଶ୍ୱର ସ୍ଥିତ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ଜାରି ଏକ ବୁଲେଟିନରେ କୁହାଯାଇଛି।

ବୁଲେଟିନ୍ ଅନୁସାରେ, ଆଜିଠାରୁ ଆସନ୍ତାକାଲି ସକାଳ ପର୍ଯ୍ୟନ୍ତ ମୟୂରଭଞ୍ଜ, ଭଦ୍ରକ, ବାଲେଶ୍ୱର, କେନ୍ଦ୍ରାପଡା, ଜଗତସିଂହପୁର, କଟକ, ଅନୁଗୁଳ, ବୌଦ୍ଧ, କନ୍ଧମାଳ ଓ ନୟାଗଡ଼ ଜିଲ୍ଲାର ଗୋଟିଏ କିମ୍ବା ଦୁଇଟି ସ୍ଥାନରେ ଘନ କୁହୁଡି ହେବାର ସମ୍ଭାବନା ଅଧିକ ରହିଛି।

ସେହିଭଳି ମଙ୍ଗଳବାର ଓ ବୁଧବାର ଝାରସୁଗୁଡା, ସୁନ୍ଦରଗଡ, କେନ୍ଦୁଝର,ମୟୂରଭଞ୍ଜ, ଅନୁଗୁଳ ଓ ବୌଦ୍ଧ ଜିଲ୍ଲାର ଗୋଟିଏ କିମ୍ବା ଦୁଇଟି ସ୍ଥାନରେ ଘନ କୁହୁଡି ହେବାର ସମ୍ଭାବନା ରହିଛି। ଏ ସମସ୍ତ ଜିଲ୍ଲାକୁ ୟେଲୋ ଓ୍ଵାର୍ଣ୍ଣିଂ ଜାରି କରିଛି ପାଣିପାଗ ବିଭାଗ।

ଲୋକାଲ ୱାୟାର

ଫୁଲବାଣୀ, ଜାନୁଆରୀ ୮(ଲୋକାଲ ୱାୟାର): କନ୍ଧମାଳ ଜିଲ୍ଲାର ଚକାପାଦ ନିକଟ ଜଙ୍ଗଲରେ ମାଓବାଦୀଙ୍କ ସହ ଗୁଳି ବିନିମୟ ପରେ ଯବାନମାନେ ଏକ ମାଓ କ୍ୟାମ୍ପକୁ ଧ୍ୱସ୍ତ କରିବା ସହ ହ୍ୟାଣ୍ଡ ଗ୍ରେନେଡ ଓ ବିସ୍ଫୋରକ ଜବତ କରିଥିବା ଶୁକ୍ରବାର କହିଛନ୍ତି କନ୍ଧମାଳ ଏସପି ବିନିତ ଅଗ୍ରୱାଲ ।

ସେ କହିଛନ୍ତି, ଗୁଇନ୍ଦା ସୂଚନା ଭିିତ୍ତିରେ ଏସଓଜି ଓ ଡିଭିଏଫ ଯବାନମାନେ ମିଳିତ ଭାବେ ଗତକାଲି ସକାଳେ ଏହି କମ୍ବିଂ ଅପରେସନ କରିଥିଲେ ।

ଅପରେସନ ସମୟରେ ଏକ ମାଓ କ୍ୟାମ୍ପ ଠାବ ହୋଇଥିଲା । ଚେତାବନୀ ସତ୍ତ୍ୱେ ମାଓଓବାଦୀମାନେ ଆତ୍ମସମର୍ପର୍ଣ କରିବା ପରିବର୍ତ୍ତେ ଗୁଳି ଚଳାଇଥିଲେ ।

ବାଧ୍ୟ ହୋଇ ଯବାନମାନେ ପାଲଟା ଜବାବ ଦେଇଥିଲେ । ପ୍ରାୟ ଅଧଘଣ୍ଟା ଧରରି ଗୁଳି ବିନିମୟ ହେବା ପରେ ମାଓବାଦୀମାନେ ପଛଘୁଞ୍ଚା ଦେଇ ଘଞ୍ଚ ଜଙ୍ଗଲ ମଧ୍ୟକୁ ଚାଲି ଯାଇଥିଲେ ।

କ୍ୟାମ୍ପରେ ପ୍ରାୟ ୧୫/୨୦ ଜଣ ମାଓବାଦୀ ଥିଲେ । ସେମାନଙ୍କ ମଧ୍ୟରୁ କେତେକ ଗୁଳି ବିନିମୟରେ ଆହତ ହୋଇଥିବା ଅନୁମାନ କରାଯାଉଛି ।

ମାଓ କ୍ୟାମ୍ପରୁ ହ୍ୟାଣ୍ଡ ଗ୍ରେନେଡ, ବିସ୍ଫୋରକ, ଡିଟୋନେଟର, ବ୍ୟାଟେରୀ ଏବଂ ମାଓ ପ୍ରଚାରପତ୍ର ଜବତ ହୋଇଥିବା ସେ କହିଛନ୍ତି ।

ଉଲ୍ଲେଖଯୋଗ୍ୟ, ଗତ କେଇ ମାସ ମଧ୍ୟରେ କନ୍ଧମାଳ ଜିଲ୍ଲାରେ ଗୁଳି ବିନିମୟରେ ୯ରୁ ଅଧିକ ମାଓବାଦୀ ନିହତ ହେଲେଣି ।

ଲୋକାଲ ୱାୟାର

ବ୍ରହ୍ମପୁର, ଡିସେମ୍ବର ୩(ଲୋକାଲ ୱାୟାର): ଗଜପତି ଜିଲ୍ଲାରେ ଗତ ୩ ଦିନ ଧରି ଏବଂ କନ୍ଧମାଳ ଜିଲ୍ଲାରେ ଗତ ଦୁଇ ଦିନ ଧରି ନୂଆ କରୋନା ଆକ୍ରାନ୍ତ ଚିହ୍ନଟ ହୋଇ ନଥିବାରୁ ଦୁଇ ଜିଲ୍ଲାର ଲୋକେ ଆଶ୍ୱସ୍ତ ହୋଇଛନ୍ତି ।

ଏହି ଦୁଇ ଆଦିବାସୀ ବହୁଳ ଜିଲ୍ଲାରେ ଏବେ ସକ୍ରିୟ କରୋନା ମାମଲା ୨୦ରୁ ତଳକୁ ଖସି ଆସିଛି ।

ଗତ ୭ ଦିନ ମଧ୍ୟରେ ଗଜପତି ଜିଲ୍ଲାରେ ମାତ୍ର ୨ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ତେବେ ଶେଷ ତିନି ଦିନରେ କେହି ଚିହ୍ନଟ ହୋଇନାହାନ୍ତି ।

ଜିଲ୍ଲାରେ ମୋଟ ୩୯୫୧ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୩୯୦୪ ଜଣ ସୁସ୍ଥ ହୋଇଛନ୍ତି । ଏବେ ପ୍ରାୟ ୧୪ ଜଣ ଚିକିତ୍ସିତ ହେଉଥିବା ବେଳେ ସେମାନଙ୍କ ସ୍ୱାସ୍ଥ୍ୟାବସ୍ଥା ଭଲ ଅଛି ।

ମେ ୨୩ରେ ଜିଲ୍ଲାର ପ୍ରଥମ କୋଭିଡ ରୋଗୀ ଚିହ୍ନଟ ହୋଇଥିଲେ । ସେହିପରି କନ୍ଧମାଳ ଜିଲ୍ଲାରେ ଦୁଇ ଦିନ ଧରି କୌଣସି ନୂଆ ଆକ୍ରାନ୍ତ ନାହାନ୍ତି ।

ଜିଲ୍ଲାରେ ମୋଟ କରୋନା ଆକ୍ରାନ୍ତ ୫ ହଜାର ୯୦୮ ଥିବା ବେଳେ ୫ ହଜାର ୮୫୭ ଜଣ ସୁସ୍ଥ ହୋଇଛନ୍ତି ।

ଗୁରୁବାର ଦିନ ଜିଲ୍ଲାରେ ସକ୍ରିୟ ମାମଲା ୧୮କୁ ହ୍ରାସ ପାଇଛି ।

ଏ ପର୍ଯ୍ୟନ୍ତ କରୋନାରେ ଗଜପତି ଜିଲ୍ଲାରେ ୩୨ ଏବଂ କନ୍ଧମାଳ ଜିଲ୍ଲାରେ ୩୩ ଜଣ କରୋନାରେ ପ୍ରାଣ ହରାଇଛନ୍ତି ।

ଲୋକାଲ ୱାୟାର

ବ୍ରହ୍ମପୁର, ଡିସେମ୍ବର ୨(ଲୋକାଲ ୱାୟାର): ମାଓବାଦୀ ସଙ୍ଗଠନର ପିଏଲଜିଏ ସପ୍ତାହ ଆଜିଠାରୁ ଆରମ୍ଭ ହୋଇଥିବାରୁ ଦକ୍ଷିଣ ଓଡ଼ିଶାରେ ବସ୍ ଚଳାଚଳ ବାଧାପ୍ରାପ୍ତ ହୋଇଛି ।

ଓଡ଼ିଶା ରାଜ୍ୟ ସଡ଼କ ପରିବହନ (ଓଏସଆରଟିସି) ୧୪ଟି ରୁଟରେ ବସ୍ ଚଳାଚଳ ବନ୍ଦ ରଖିଥିବା ବେଳେ ୫ଟି ରୁଟରେ ଡାଇଭର୍ଟ କରାଯାଇଛି ।

ଓଏସଆରଟିସି ବସ୍ ଚଳାଚଳ ବନ୍ଦ ରଖିଥିଲେ ମଧ୍ୟ ବେସରକାରୀ ବସ୍ ଚଳାଚଳ ଯର୍ଥରୀତି ଚାଲିଛି ।

ମାଲକାନଗିରି ସମେତ ମାଓ ଉପଦ୍ରୁତ ଜିଲ୍ଲା ଗୁଡ଼ିକରେ ଡିସେମ୍ବର ୨ରୁ ୮ ପର୍ଯ୍ୟନ୍ତ ବସ୍ ଚଳାଚଳ ବନ୍ଦ ରଖାଯାଇଥିବା ଓଏସଆରଟିସିର ବରିଷ୍ଠ ଅଧିକାରୀ କହିଥିବା ବେଳେ ପରିସ୍ଥିତି ଉପରେ ନଜର ରଖି ନିଷ୍ପତ୍ତି ନିଆଯିବ ବୋଲି କହିଛନ୍ତି ବେସରକାରୀ ବସ୍ ସଂଘର ବରିଷ୍ଠ କର୍ମକର୍ତ୍ତା ।

ପରିସ୍ଥିତିକୁ ଦଖେି ବିଭିନ୍ନ ସମ୍ବେଦନଶୀଳ ଅଞ୍ଚଳରେ କମ୍ବିଂ ତ୍ୱରାନ୍ୱିତ କରାଯାଇଥିବା କହିଛନ୍ତି କନ୍ଧମାଳ ଏସପି ବିନିତ ଅଗ୍ରୱାଲ ।

ଲୋକାଲ ୱାୟାର

ବ୍ରହ୍ମପୁର, ନଭେମ୍ବର ୨୮(ଲୋକାଲ ୱାୟାର): ଶନିବାର ଗଜପତି ଓ କନ୍ଧମାଳ ଜିଲ୍ଲାରୁ କେହି ବି କରୋନା ପଜିଟିଭ ଚିହ୍ନଟ ହୋଇନାହାନ୍ତି ।

ପ୍ରଥମ ଥର ପାଇଁ କନ୍ଧମାଳ ଜିଲ୍ଲାରେ କରୋନା ପଜିଟିଭଙ୍କ ସଂଖ୍ୟା ଶୂନ ଥିବା ବେଳେ ଗଜପତି ଜିଲ୍ଲାରେ ଗତ ସପ୍ତାହକ ମଧ୍ୟରେ ଦ୍ୱିତୀୟ ଥର ଏହି ସଫଳତା ଦୋହରାଇଛି ।

ନଭେମ୍ବର ୨୨ରେ ଗଜପତି ଜିଲ୍ଲାରେ କରୋନା ପଜିଟିଭଙ୍କ ସଂଖ୍ୟା ଶୂନ ଥିଲା । ଶନିବାର ୬୦୪ ନମୁନା ପରୀକ୍ଷା ହୋଇଥିଲା ।

ସମସ୍ତ ରିପୋର୍ଟ ନେଗେଟିଭ ଆସିଛି ବୋଲି ଜିଲ୍ଲାର ଜଣେ ବରିଷ୍ଠ ଅଧିକାରୀ କହିଛନ୍ତି ।

ସେହିପରି କନ୍ଧମାଳ ଜିଲ୍ଲା ପ୍ରଶାସନ ପରୀକ୍ଷା କରିଥିବା ୮୨୦ ନମୁନା ମଧ୍ୟରୁ ସମସ୍ତଙ୍କ ରିପୋର୍ଟ ନେଗେଟିଭ ଆସିଛି ।

ଗଜପତି ଓ କନ୍ଧମାଳ ଜିଲ୍ଲାରେ ସମୁଦାୟ କରୋନା ରୋଗୀଙ୍କ ସଂଖ୍ୟା ଯଥାକ୍ରମେ ୩୯୪୯ ଓ ୫୮୮୮ ରହିଛି ।

ଗଜପତି ଜିଲ୍ଲାରେ ପ୍ରଥମ ଥର ପାଇଁ ସକ୍ରିୟ କରୋନା ରୋଗୀଙ୍କ ସଂଖ୍ୟା ୨୦ରୁ କମ୍ ରହିଛି ।

ଜିଲ୍ଲାରେ ସୁସ୍ଥ ସଂଖ୍ୟା ୨୮୯୭କୁ ବୃଦ୍ଧି ପାଇଥିବା ବେଳେ ମୃତ୍ୟୁ ସଂଖ୍ୟା୩୨ରେ ସ୍ଥିର ରହିଛି ।

ସେହିପରି କନ୍ଧମାଳ ଜିଲ୍ଲାରେ ସକ୍ରିୟ ରୋଗୀଙ୍କ ସଂଖ୍ୟା ୨୧କୁ ଖସି ଆସିଛି ।

ଜିଲ୍ଲାରେ ୫୮୩୪ ସୁସ୍ଥ ହୋଇଥିବା ବେଳେ ମୃତ୍ୟୁ ସଂଖ୍ୟା ୩୩ରେ ସ୍ଥିର ରହିଛି ।

ଲୋକାଲ ୱାୟାର

କଟକ, ନଭେମ୍ବର ୨୫(ଲୋକାଲ ୱାୟାର): ୨୦୧୭ ମସିହାରେ ଅପରେସନ ଦ୍ୱାରା ଅଲଗା କରାଯାଇଥିବା ଯୋଡ଼ାମୁଣ୍ଡ ଶିଶୁ ଜଗା-କାଳିଆଙ୍କ ମଧ୍ୟରୁ କାଳିଆର ବୁଧବାର ରାତି କଟକ ଏସସିବି ମେଡିକାଲରେ ମୃତ୍ୟୁ ହୋଇଥିବା କହିଛନ୍ତି ଏସସିବିର ଜରୁରିକାଳୀନ ଅଧିକାରୀ ଡାକ୍ତର ଭୁବନାନନ୍ଦ ମହରଣା ।

୨୦୧୫ ଏପ୍ରିଲ ୯ ତାରିଖରେ କନ୍ଧମାଳ ଜିଲ୍ଲା ମାଳିପଡ଼ା ଗ୍ରାମରେ ଜନ୍ମିତ ଏହି ଯୋଡ଼ାମୁଣ୍ଡ ଶିଶୁଙ୍କୁ ୨୦୧୭ ଅଗଷ୍ଟରେ ଏମ୍ସରେ ଅସ୍ତ୍ରୋପଚାର ଦ୍ୱାରା ଅଲଗା କରାଯାଇଥିଲା ।

ରାଜ୍ୟ ସରକାର ମଧ୍ୟ ଏଥିପାଇଁ ଆର୍ଥିକ ସହାୟତା ଯୋଗାଇ ଦେଇଥିଲେ । ରାଜ୍ୟ ସରକାରଙ୍କ ନିଷ୍ପତ୍ତି କ୍ରମେ ଓ ଏମ୍ସର ପରାମର୍ଶରେ ୨୦୧୯ ସେପ୍ଟେମ୍ବର ୭ରୁ କଟକର ଏସସିବିକୁ ସେମାନଙ୍କୁ ସ୍ଥାନାନ୍ତର କରାଯାଇଥିଲା ।

ତେବେ ଗତ କିଛି ଦିନ ହେବ କାଳିଆ ଅସୁସ୍ଥ ହୋଇ ପଡ଼ିବାରୁ ଭେଣ୍ଟିଲେଟର ସପୋର୍ଟରେ ରଖାଯାଇଥିଲା । ଆଜି ତାର ମୃତ୍ୟୁ ହୋଇଯାଇଛି ।

ଲୋକାଲ ୱାୟାର

ଫୁଲବାଣୀ, ନଭେମ୍ବର ୨୪(ଲୋକାଲ ୱାୟାର): କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ବ୍ଲକର ବିଇଓ ଚିତ୍ତରଞ୍ଜନ ସିଂ ମଙ୍ଗଳବାର ୫ ହଜାର ଲାଞ୍ଚ ନେଉଥିବା ଧରାପଡ଼ିବା ପରେ ତାଙ୍କୁ ଗିରଫ କରାଯାଇଥିବା ଭିଜିଲାନ୍ସ ପକ୍ଷରୁ କୁହାଯାଇଛି ।

ଦାରିଙ୍ଗବାଡ଼ିରେ ବ୍ଲକରେ ପୂର୍ବରୁ କାର୍ଯ୍ୟରତ ଜନୈକ ସହାୟକ ଶିକ୍ଷକଙ୍କ ପରଲୋକ ପରେ ତାଙ୍କ ପୁତ୍ର ଶିବ ଶଙ୍କର ପଟ୍ଟନାୟକ ଥଇଥାନ ଯୋଜନାରେ ଚାକିରି ପାଇବାକୁ ଆବେଦନ କରିଥିଲେ ।

ତେବେ ଫାଇଲ କାମ କରିବାକୁ ବ୍ଲକର ବିଇଓ ଚିତ୍ତରଞ୍ଜନ ସିଂ ତାଙ୍କୁ ୫ ହଜାର ଟଙ୍କା ଲାଞ୍ଚ ମାଗିଥିଲେ ।

ଏ ନେଇ ଶିବଶଙ୍କର ଭିଜିଲାନ୍ସ ନିକଟରେ ଅଭିଯୋଗ କରିଥିଲେ । ପୂର୍ବ ଯୋଜନାନୁୁସାରେ ମଙ୍ଗଳବାର ଶିବଶଙ୍କର ଚିତ୍ତରଞ୍ଜନଙ୍କୁ ତାଙ୍କ କାର୍ଯ୍ୟାଳୟରେ ଲାଞ୍ଚ ଟଙ୍କା ଦେଇଥିଲେ ।

ଏହି ସମୟରେ ପୂର୍ବରୁ ପ୍ରସ୍ତୁତ ଥିବା ଭିଜିଲାନ୍ସ ଟିମ୍ ଚଢ଼ାଉ କରି ଲାଞ୍ଚ ଟଙ୍କା ଜବତ କରିବା ସହ ଚିତ୍ତରଞ୍ଜନଙ୍କୁ ଗିରଫ କରିଛନ୍ତିି ।

ଏଥିସହ ତାଙ୍କ କାର୍ଯ୍ୟାଳୟ ଓ ବାଲିଗୁଡ଼ାସ୍ଥିତ ବାସଭବନରେ ମଧ୍ୟରେ ଏକକାଳୀନ ଭିଜିଲାନ୍ସ ପକ୍ଷରୁ ଚଢ଼ାଉ ଜାରି ଥିବା କୁହାଯାଇଛି ।

ଲୋକାଲ ୱାୟାର