କେନ୍ଦ୍ରାପଡ଼ା, ମେ ୧୨(ଲୋକାଲ ୱାୟାର): କରୋନାର ଦ୍ୱିତୀୟ ଲହରରେ କ୍ଷତିଗ୍ରସ୍ତ ହୋଇଛନ୍ତି କେନ୍ଦ୍ରାପଡ଼ା ଜିଲ୍ଲାର ୫ ହଜାରରୁ ଅଧିକ ସମୁଦ୍ରକୂଳବାସୀ ।
ସାଧାରଣତଃ ଜିଲ୍ଲାର ସମୁଦ୍ରକୂଳ ଅଞ୍ଚଳରେ ରହୁଥିବା ମତ୍ସ୍ୟଜୀବୀ ପରିବାର ଶୁଖୁଆ ବିକ୍ରି କରି ନିଜର ପରିବାର ଚଳାଉଥିବା ବେଳେ ଏବେ ଲକ୍ଡାଉନ୍ ଯୋଗୁଁ ଦୀର୍ଘଦିନ ଧରି ତାହା ବନ୍ଦ ହୋଇ ରହିଛି ।
ଏ ବାବଦରେ ବତୀଘର ଗାଁର ମାଣିକ ଜେନା କହିଛନ୍ତି ତାଲବନ୍ଦ ଯୋଗୁଁ ଆମେ ଶୁଖୁଆ ନେଇ ସହରକୁ ଯାଇ ପାରୁନୁ । ଫଳରେ ଜୀବନ ଜୀବିକା ପ୍ରଭାବିତ ହେଉଛି ।
ବିଶେଷ କରି ଏହି କାମ ଉପରେ ନିର୍ଭର କରୁଥିବା ବ୍ୟବସାୟୀ ଓ ଉତ୍ପାଦନକାରୀ ପେଟପାଟଣା ପାଇଁ ଅଧିକ ସଂଘର୍ଷ କରୁଛନ୍ତି ।
ଗତବର୍ଷ କରୋନା ଯୋଗୁଁ ଆମେ ଅନେକ କ୍ଷତି ସହିଥିଲୁ । କରୋନାର ଦ୍ୱିତୀୟ ଲହରି କଟାଘାରେ ଚୂନ ବୋଳିଲା ଭଳି ସାବ୍ୟସ୍ତ ହୋଇଛି ।
କରୋନାର ଦ୍ୱିତୀୟ ଲହର ଅଧିକ ଦିନ ଯାଏଁ ଅନୁଭୂତ ହେବାର ସମ୍ଭବାନା ରହିଥିବାରୁ ଶୁଖୁଆ ବ୍ୟବସାୟୀମାନେ ଆମ ପାଖରୁ ଶୁଖୁଆ କିଣିବାକୁ ଆଗ୍ରହ ଦେଖାଉନାହାଁନ୍ତି ।
ସାଧାରଣତଃ ଏହି ସମୟ ବେଳକୁ ଶୁଖୁଆ ବ୍ୟବସାୟୀମାନେ ଆମଠାରୁ ସାମଗ୍ରୀ କିଣିବା ଆରମ୍ଭ କରି ଦିଅନ୍ତି । ଯାହାକି କଲିକତା, ବିଶାଖାପାଟଣା ଓ ଉତ୍ତର ପୂର୍ବ ରାଜ୍ୟଗୁଡ଼ିକୁ ପଠାଯାଏ । ମାତ୍ର ଚଳିତ ବର୍ଷ କରୋନା ଓ ଲକଡାଉନ୍ ଯୋଗୁଁ ଏଥିରେ ବ୍ୟତିକ୍ରମ ଦେଖା ଦେଇଛି ।
ଶୁଖୁଆ କିଣିବାରେ ଅନ୍ୟ ରାଜ୍ୟର ବ୍ୟବସାୟୀମାନେ ଆଗ୍ରହ ଦେଖାଉନଥିବା ବେଳେ ସରକାର ସମସ୍ତ ସୀମାବର୍ତ୍ତୀ ଜିଲ୍ଲାଗୁଡ଼ିକର ପ୍ରବେଶ ପଥକୁ ସିଲ୍ କରି ଦେଇଛନ୍ତି ।
ତେଣୁ ଏହି କାରବାର ସମ୍ପୂର୍ଣ୍ଣ ବନ୍ଦ ରହିଛି ବୋଲି ଖରିନାସି ଅଞ୍ଚଳର ଶୁଖୁଆ ଉତ୍ପାଦନକାରୀ ବାସନ୍ତୀ ଦାସ କହିଛନ୍ତି ।
ଅପରପକ୍ଷେ ଚାହିଦା ହ୍ରାସ ଯୋଗୁଁ ସ୍ଥାନୀୟ ବଜାରରେ ଶୁଖୁଆର ମୂଲ୍ୟ ହ୍ରାସ ଘଟିଛି ।
ପୂର୍ବରୁ ଗୁଣାତ୍ମକ ମାନଥିବା ଶୁଖୁଆ କିଲୋପ୍ରତି ୨୦୦ରୁ ୩୦୦ ଟଙ୍କାରେ ବିକ୍ରି ହେଉଥିବା ବେଳେ ଏବେ ତାହା ୧୦୦ରୁ ୧୫୦ ଟଙ୍କାରେ ମିଳୁଛି ।
ସୁନିତି ଗାଁର ନଳିନି ମଣ୍ଡଳ କହିଛନ୍ତି ମୋ ପାଇଁ ଶୁଖୁଆ ବ୍ୟବସାୟ ହିଁ ଜୀବନ ଜୀବିକାର ଏକମାତ୍ର ଆଧାର । ଅନ୍ୟ କୌଣସି ବୃତ୍ତି ସହ ମୁଁ ଜଡ଼ିତ ନୁହେଁ । ଏହା ଏକ ଲାଭଜନକ ବ୍ୟବସାୟ । ମାତ୍ର ତାଲା ବନ୍ଦ ଯୋଗୁଁ ମୁଁ ଏବେ ବହୁତ ଅସୁବିଧାର ସମ୍ମୁଖୀନ ହେଉଛି ।
ସମୁଦ୍ରରେ ମାଛମାନଙ୍କର ପ୍ରଜନନ କ୍ଷମତା ବଢ଼ାଇବା ପାଇଁ ପ୍ରତିବର୍ଷ ଏପ୍ରିଲ ୧୫ରୁ ଜୁନ୍ ୧୫ ଯାଏଁ ସମୁଦ୍ର ଭିତରକୁ ମାଛ ଧରିବାକୁ ଯିବାରେ ବାରଣ ଥାଏ ।
ଏହି ଦୁଇ ମାସ ମତ୍ସଜୀବୀ ପରିବାରର ଲୋକେ ଶୁଖୁଆ ପ୍ରସ୍ତୁତ କରି ନିଜର ଜୀବିକା ନିର୍ବାହ କରିଥାନ୍ତି ।
ମାତ୍ର ଏବେ କରୋନା ଯୋଗୁଁ ବ୍ୟବସାୟୀମାନେ ଶୁଖୁଆ କିଣିବାରେ ଆଗ୍ରହ ଦେଖାଉନାହାନ୍ତି ବୋଲି ପାରାଦୀପ ଅଞ୍ଚଳର ଶୁଖୁଆ ଉତ୍ପାଦନକାରୀ ବିଜୟ ବେହେରା କହିଛନ୍ତି ।
ଶୁଖୁଆ ବ୍ୟବସାୟୀ ଅଜିତ ଦାସ କହିଛନ୍ତି ଆମେ ସାଧାରଣତଃ କଲିକତା, ଆନ୍ଧ୍ରପ୍ରଦେଶ, ତେଲଙ୍ଗାନା ଓ ଉତ୍ତର ପୂର୍ବ ରାଜ୍ୟମାନଙ୍କୁ ଶୁଖୁଆ ଯୋଗାଉ । ମାତ୍ର ଏବେ କରୋନାର ଦ୍ୱିତୀୟ ଲହର ଯୋଗୁଁ ଏହା ସମ୍ଭବ ହୋଇ ପାରୁନି ।
ଲୋକାଲ ୱାୟାର