କଳାହାଣ୍ଡି

ଭୁବନେଶ୍ୱର, ଜୁନ ୧୯(ଲୋକାଲ ୱାୟାର)ଏକବିଂଶ ଶତାଦ୍ଦୀରେ କଳାହାଣ୍ଡିର ରୂପାନ୍ତର ଉଲ୍ଲେଖନୀୟ – ମୁଖ୍ୟମନ୍ତ୍ରୀ ତୃତୀୟ ଲହର ପାଇଁ ପ୍ରସ୍ତୁତ ରହିବାକୁ ପୁଣି ପରାମର୍ଶ ଦେଲେ ମୁଖ୍ୟମନ୍ତ୍ରୀ, କୋଭିଡ ନିୟମ ପାଳିବାକୁ ନିବେଦନ କଲେ ।

ମୁଖ୍ୟମନ୍ତ୍ରୀଙ୍କ ହୃଦୟରେ ରହିଛି କଳାହାଣ୍ଡି – ଅନିଲ ଅଗ୍ରୱାଲ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଆଜି ଭିଡିଓ କନ୍‌ଫରେନ୍‌ସିଂ ଜରିଆରେ କଳାହାଣ୍ଡିର ଭବାନୀପାଟଣା ଠାରେ ବେଦାନ୍ତ ଗ୍ରୁପ ସହଯୋଗରେ ନିର୍ମିତ ଏକ ୨୦୦ ଶଯ୍ୟା ବିଶିଷ୍ଟ କୋଭିଡ ହସ୍‌ପିଟାଲ ଉଦ୍‌ଘାଟନ କରିଛନ୍ତି। ଏଥିରେ ୧୬ଟି ICU ଓ ୧୬ଟି HDU ଶଯ୍ୟା ସହିତ ଏକ ସ୍ବତନ୍ତ୍ର ଶିଶୁ ଚିକିତ୍ସା ୱାର୍ଡ ମଧ୍ୟ ରହିଛି ।

ଏଥିରେ ସମସ୍ତ ପ୍ରକାର ଆଧୁନିକ ଚିକିତ୍ସା ଉପକରଣ ରଖାଯାଇଛି । ଏହାଦ୍ବାରା କଳାହାଣ୍ଡି ଓ ଆଖପାଖ ଅଞ୍ଚଳର ଲୋକମାନେ ଉନ୍ନତମାନର କୋଭିଡ ଚିକିତ୍ସା ପାଇପାରିବେ ବୋଲି ମୁଖ୍ୟମନ୍ତ୍ରୀ କହିଛନ୍ତି।

ଏହି ହସ୍‌ପିଟାଲ ପାଇଁ ବେଦାନ୍ତ ଗ୍ରୁପ ତଥା ଏହାର ଅଧ୍ୟକ୍ଷ ଶ୍ରୀ ଅନିଲ ଅଗ୍ରୱାଲଙ୍କୁ ଧନ୍ୟବାଦ ଜଣାଇ ମୁଖ୍ୟମନ୍ତ୍ରୀ କହିଛନ୍ତି ଯେ ଏହି ହସ୍‌ପିଟାଲରେ ଚିକିତ୍ସା ଠାରୁ ଆରମ୍ଭ କରି ରୋଗ ନିରୂପଣ, ଔଷଧ, ଖାଦ୍ୟ ଆଦି ସବୁ ମାଗଣାରେ ଯୋଗାଇ ଦିଆଯିବ।

ମୁଖ୍ୟମନ୍ତ୍ରୀ କହିଥିଲେ ଯେ ଏକବିଂଶ ଶତାଦ୍ଦୀର କଳାହାଣ୍ଡି ବିଂଶ ଶତାଦ୍ଦୀର କଳାହାଣ୍ଡି ଠାରୁ ବହୁତ ଆଗକୁ ଯାଇପାରିଛି ।

ଗତ ଦୁଇ ଦଶକ ମଧ୍ୟରେ ବିକାଶର ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ପ୍ରଗତି କରିଛି । ଏ ରୂପାନ୍ତର ବାସ୍ତବିକ ଉଲ୍ଲେଖନୀୟ ବୋଲି ମୁଖ୍ୟମନ୍ତ୍ରୀ କହିଥିଲେ ।

କଳାହାଣ୍ଡି ଆଜି ସାରା ଦେଶକୁ ଖାଦ୍ୟ ଯୋଗାଉଛି ବୋଲି ପ୍ରକାଶ କରି ମୁଖ୍ୟମନ୍ତ୍ରୀ କହିଥିଲେ ଯେ କଳାହାଣ୍ଡିର ଏ ରୂପାନ୍ତର, କଳାହାଣ୍ଡି ଜିଲ୍ଲାର ଚାଷୀଭାଇ, ଯୁବସମାଜ ଓ ମା ମାନଙ୍କ ଉଦ୍ୟମ ଯୋଗୁ ସମ୍ଭବ ହୋଇପାରିଛି ।

କୋଭିଡ ମୁକାବିଲାରେ ରାଜ୍ୟର ପଦକ୍ଷେପ ସଂପର୍କରେ ଆଲୋକପାତ କରି ମୁଖ୍ୟମନ୍ତ୍ରୀ କହିଥିଲେ ଯେ ଗତ କିଛି ଦିନ ମଧ୍ୟରେ ରାଜ୍ୟରେ ୧୫ଟି ଅକ୍‌ସିଜେନ ପ୍ଲାଣ୍ଟ ପାଇଁ କାମ ଆରମ୍ଭ ହୋଇଛି ।

ଆଗାମୀ ଦୁଇ ମାସ ମଧ୍ୟରେ ଏଥିରୁ ଉତ୍ପାଦନ ଆରମ୍ଭ ହେବ। କୋଭିଡର ଦ୍ବିତୀୟ ଲହରରେ ରୋଗୀ ମାନଙ୍କୁ ଅକ୍‌ସିଜେନ ସ୍ତର କମିବା ଯୋଗୁ ସାରା ଦେଶରେ ଅକ୍‌ସିଜେନ ଯୋଗାଣ ଉପରେ ଅତ୍ୟଧିକ ଚାପ ସୃଷ୍ଟି ହୋଇଥିଲା ।

ଏଭଳି ସମୟରେ ଓଡିଶା ୧୮ଟି ରାଜ୍ୟକୁ ଅକ୍‌ସିଜେନ ଯୋଗାଇ ଅନେକ ମୂଲ୍ୟବାନ ଜୀବନ ବଞ୍ଚାଇପାରିଛି ।

ଏଭଳି ସଂକଟ ସମୟରେ ମାନବତାର ସେବା ପାଇଁ ସୁଯୋଗ ପାଇବା ଓଡିଶାବାସୀଙ୍କ ପାଇଁ ନିଶ୍ଚିତ ଭାବରେ ସମ୍ମାନର ବିଷୟ ବୋଲି ମୁଖ୍ୟମନ୍ତ୍ରୀ ମତପ୍ରକାଶ କରିଥିଲେ ।

କୋଭିଡର ଦ୍ବିତୀୟ ଲହରର ମୁକାବିଲାରେ କଳାହାଣ୍ଡିବାସୀ ଯେପରି ସାହସ ପ୍ରଦର୍ଶନ କରିଛନ୍ତି ସେଥିପାଇଁ ଜିଲ୍ଲାବାସୀଙ୍କୁ ତଥା ଡାକ୍ତର, ସ୍ବାସ୍ଥ୍ୟକର୍ମୀ, ଆଶା ଓ ଅଂଗନବାଡୀ କର୍ମୀ ମାନଙ୍କୁ ମୁଖ୍ୟମନ୍ତ୍ରୀ ଧନ୍ୟବାଦ ଦେଇଛନ୍ତି।

କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ତୃତୀୟ ଲହର ପାଇଁ ଏବେଠାରୁ ପ୍ରସ୍ତୁତ ରହିବାକୁ ପୁଣି ଥରେ ପରାମର୍ଶ ଦେଇ ଜନସାଧାରଣଙ୍କୁ ସମସ୍ତଙ୍କୁ ଡବଲ ମାସ୍କ ପିନ୍ଧିବା ସହିତ ଟିକା ନିଶ୍ଚୟ ନେବା ପାଇଁ ନିବେଦନ କରିଥିଲେ ।

ମୁଖ୍ୟମନ୍ତ୍ରୀ କହିଥିଲେ ଯେ ମହାମାରୀ ହେଉ, ବା ପ୍ରାକୃତିକ ବିପର୍ଯ୍ୟୟ, ଆମେ ଯଦି ଠିକ୍‌ ଭାବରେ ଆଗରୁ ପ୍ରସ୍ତୁତ ହୋଇ ରହିବା, ତେବେ ଆମେ ନିଶ୍ଚୟ ବିଜୟ ଲାଭ କରିବା ।

ଏହି କାର୍ଯ୍ୟକ୍ରମରେ ଯୋଗ ଦେଇ ସ୍ବାସ୍ଥ୍ୟ ମନ୍ତ୍ରୀ ଶ୍ରୀ ନବ ଦାସ କଳାହାଣ୍ଡିରେ କୋଭିଡ ହସ୍‌ପିଟାଲ ସହିତ ମେଡିକାଲ କଲେଜ, ଜଳସେଚନର ବିକାଶ ଆଦି ବ୍ୟାପକ ବିକାଶମୂଳକ କାମ ପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଥିଲେ ।

ଶକ୍ତିମନ୍ତ୍ରୀ ଶ୍ରୀ ଦିବ୍ୟଶଂକର ମିଶ୍ର କହିଥିଲେ ଯେ କଳାହାଣ୍ଡିରେ କୋଭିଡ ମୁକାବିଲା ପାଇଁ ଦୁଇଟି ଅକ୍‌ସିଜେନ ପ୍ଲାଣ୍ଟ କରାଯାଇଛି, ହସ୍‌ପିଟାଲରେ ଭେଣ୍ଟିଲେଟର ବ୍ୟବସ୍ଥା କରାଯାଇଛି। ତେଣୁ କଳାହାଣ୍ଡିବାସୀ ଉନ୍ନତ କୋଭିଡ ଚିକିତ୍ସା ପାଇପାରିବେ ବୋଲି ସେ କହିଥିଲେ।

କାର୍ଯ୍ୟକ୍ରମରେ କଳାହାଣ୍ଡି ସାଂସଦ ଶ୍ରୀ ବସନ୍ତ ପଣ୍ଡା, ରାଜ୍ୟସଭା ସାଂସଦ ଶ୍ରୀ ସୁଜିତ୍‌ କୁମାର, ଧର୍ମଗଡ ଓ ଲାଞ୍ଜିଗଡର ବିଧାୟକ ଯୋଗ ଦେଇ କୋଭିଡ ହସ୍‌ପିଟାଲ ପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବଦ ଦେଇଥିଲେ .

ଏହି କାର୍ଯ୍ୟକ୍ରମରେ ଭିଡିଓ କନ୍‌ଫରେନ୍‌ସିଂ ଜରିଆରେ ଯୋଗ ଦେଇ ବେଦାନ୍ତ ଗ୍ରୁପ ଅଧ୍ୟକ୍ଷ ଶ୍ରୀ ଅନିଲ ଅଗ୍ରୱାଲ କଳାହାଣ୍ଡିର ବିକାଶ ଓ ଓଡିଶାର ସାମଗ୍ରିକ ବିକାଶ ପାଇଁ ମୁଖ୍ୟମନ୍ତ୍ରୀଙ୍କ ଉଚ୍ଚପ୍ରଶଂସା କରିଥିଲେ ।

ସେ କହିଥିଲେ ଯେ କଳାହାଣ୍ଡି ମୁଖ୍ୟମନ୍ତ୍ରୀଙ୍କ ହୃଦୟରେ ରହିଛି । ମୁଁ ତାଙ୍କୁ ଯେତେବେଳେ ଭେଟିଛି, ସେ ସବୁବେଳେ କଳାହାଣ୍ଡିର ବିକାଶ ସଂପର୍କରେ ମୋ ସହିତ ଆଲୋଚନା କରିଛନ୍ତି ।

ମୁଖ୍ୟମନ୍ତ୍ରୀ ସବୁବେଳେ ଲୋକଙ୍କ ଉନ୍ନତି ଓ ରାଜ୍ୟର ବିକାଶ କଥା ଚିନ୍ତା କରନ୍ତି। ବାତ୍ୟା ସମୟରେ ମୁଖ୍ୟମନ୍ତ୍ରୀ ଯେଉଁଭଳି ଭାବରେ ନେତୃତ୍ବ ନେଇ ମୁକାବିଲା କଲେ ଓ ଲୋକଙ୍କ ଜୀବନର ସୁରକ୍ଷା କଲେ, ତାହା ଆଜି ସମଗ୍ର ବିଶ୍ବରେ ଚର୍ଚ୍ଚାର ବିଷୟ ହୋଇଛି ।

ଆମେ ଅନେକ ରାଜ୍ୟରେ କାମ କରୁଛୁ, କିନ୍ତୁ ଓଡିଶାରେ କାମ କରିବାର ଅଭିଜ୍ଞତା ମୋତେ ସବୁଠାରୁ ଭଲ ଅନୁଭବ ଦେଇଛି ବୋଲି ସେ କହିଥିଲେ ।

ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଶ୍ରୀ ଭି.କେ. ପାଣ୍ଡିଆନ କାର୍ଯ୍ୟକ୍ରମ ପରିଚାଳନା କରିଥିଲେ।

କଳାହାଣ୍ଡି ଜିଲ୍ଲାପାଳ ସ୍ବାଗତ ଭାଷଣ ଦେଇଥିଲେ ଏବଂ ବେଦାନ୍ତ ର CFO ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଧନ୍ୟବାଦ ଅର୍ପଣ କରିଥିଲେ ।

କାର୍ଯ୍ୟକ୍ରମରେ ପଶ୍ଚିମ ଓଡିଶା ବିକାଶ ପରିଷଦର ଅଧ୍ୟକ୍ଷ, ମୁଖ୍ୟ ଶାସନ ସଚିବ, ଉନ୍ନୟନ କମିଶନର, ସ୍ବାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ, ଶିଳ୍ପ ବିଭାଗ ପ୍ରମୁଖ ସଚିବ ଓ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।

ଲୋକାଲ ୱାୟାର

ଭୁବନେଶ୍ୱର, ମେ ୨୮(ଲୋକାଲ ୱାୟାର): ଓଡ଼ିଶାର ସୁପରିଚିତ ତଥା ପ୍ରତିଷ୍ଠିତ ଲେଖକ, ଅଧ୍ୟାପକ ଡ. ଶୁଭେନ୍ଦୁ ମୁଣ୍ଡଙ୍କ ଆଜି ସକାଳେ ଭୁବନେଶ୍ୱର ଠାରେ ହୃଦଘାତରେ ଦେହାନ୍ତ ହୋଇଥିବା ତାଙ୍କ ସମ୍ପର୍କୀୟଙ୍କ ଠାରୁ ସୂଚନା ମିଳିଛି ।

ତାଙ୍କୁ ୭୦ ବର୍ଷ ବୟସ ହୋଇଥିଲା । ସେ ଜଣେ ପ୍ରଖ୍ୟାତ ସାହିତ୍ୟିକ ଭାବେ ଓଡ଼ିଶା ଏବଂ ଓଡ଼ିଶା ବାହାରେ ନିଜର ପରିଚୟ ଓ ପ୍ରତିଷ୍ଠା ବଜାୟ ରଖିଥିଲେ ।

ଆଜି ତାଙ୍କ ବିୟୋଗରେ ମର୍ମାହତ ସାହିତ୍ୟ ଓ ଅଧ୍ୟାପନା ଜଗତ । ସମସ୍ତେ ତାଙ୍କୁ ଏବଂ ତାଙ୍କ କୃତି, କୀର୍ତ୍ତିକୁ ଝୁରୁଛନ୍ତି ।

ରାଜ୍ୟପାଳ ପ୍ରଫେସର ଗଶେଶୀ ଲାଲ୍, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଶିଷ୍ଟ ବ୍ୟକ୍ତିବିଶେଷ ଗଭୀର ଶୋକ ପ୍ରକାଶ କରିଛନ୍ତି ।

ରାଜ୍ୟପାଳ ଶୋକବାର୍ତ୍ତାରେ କହିଛନ୍ତି, ଡ. ମୁଣ୍ଡ ସାରସ୍ୱତ କୃତି ଓ କୀର୍ତ୍ତି ପାଇଁ ଚିରସ୍ମରଣୀୟ ହୋଇ ରହିବେ ।

ମୁଖ୍ୟମନ୍ତ୍ରୀ କହିଛନ୍ତି, ସେ ତାଙ୍କ ଅମଳିନ କୃତି ମଧ୍ୟରେ ବଞ୍ଚି ରହିବେ । କେନ୍ଦ୍ରମନ୍ତ୍ରୀ କହିଛନ୍ତି, ସାହିତ୍ୟ ଓ ଶିକ୍ଷାକ୍ଷେତ୍ରରେ ତାଙ୍କ ଅବଦାନ ଅତୁଳନୀୟ । ସମସ୍ତେ ଅମର ଆତ୍ମାର ସଦଗତି କାମନା କରି ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି ।

ବିଶିଷ୍ଟ ସାହିତି୍ୟକ, ଅଧ୍ୟାପକ ଡ. ଶୁଭେନ୍ଦୁ ମୁଣ୍ଡଙ୍କ ସମ୍ପର୍କରେ କିଛି…
– କଳାହାଣ୍ଡିର ସୁପୁତ୍ର, ସୁବିଖ୍ୟାତ ଓଡ଼ିଆ କବି, ସାହିତ୍ୟିକ, ଅନୁବାଦକ ଡ. ଶୁଭେନ୍ଦୁ ମୁଣ୍ଡ ।

ଡ. ମୁଣ୍ଡ ୧୯୫୧ ମସିହାରେ କଳାହାଣ୍ଡି ଜିଲ୍ଲା ଭବାନୀପାଟଣାରେ ଜନ୍ମଗ୍ରହଣ କରିଥିଲେ । ତାଙ୍କ ପିତା ଜଣେ ପ୍ରଖ୍ୟାତ କବି, ସାହିତ୍ୟିକ ଓ ଶିକ୍ଷାବିତ୍ ।

କଳାହାଣ୍ଡି ରତ୍ନ ସ୍ୱର୍ଗତ ପର୍ଶୁରାମ ମୁଣ୍ଡ ଏବଂ ମାତା ସ୍ୱର୍ଗତ ପ୍ରଭାମୟୀଙ୍କ ସୁପୁତ୍ର ଡ. ମୁଣ୍ଡ ।

– ଇଂରାଜୀ ସାହିତ୍ୟରେ ଶିକ୍ଷାଲାଭ ପରେ ଡ. ମୁଣ୍ଡ ଓଡ଼ିଶା ଶିକ୍ଷା ସେବାରେ ୧୯୭୩ ମସିହାରେ ଯୋଗଦେଇ ୩୬ ବର୍ଷ ଅଧ୍ୟାପନା ତଥା ଶିକ୍ଷାନୁଷ୍ଠାନ ପରିଚାଳନା କରି ବକ୍ସି ଜଗବନ୍ଧୁ ବିଦ୍ୟାଧର ମହାବିଦ୍ୟାଳୟର ଅଧ୍ୟକ୍ଷ ଭାବରେ ୨୦୦୯ମସିହାରେ ଅବସର ଗ୍ରହଣ କରିଥିଲେ ।

– ଉକ୍ରଳ ବିଶ୍ୱବିଦ୍ୟାଳୟରୁ ୧୯୯୬ ମସିହାରେ ପିଏଚଡି ଉପାଧି ପ୍ରାପ୍ତି ପରେ ବହୁ ଛାତ୍ରଛାତ୍ରୀଙ୍କୁ ଗବେଷଣା କାର୍ଯ୍ୟରେ ଦିଗଦର୍ଶନ ଦେବା ସହ ଭାରତ ତଥା ଭାରତ ବାହାରେ ଶତାଧିକ ସେମିନାର୍, ସମ୍ମିଳନୀ ଆଦିରେ ଯୋଗ ଦେଇ ଗବେଷଣା ନିବନ୍ଧ ପାଠ କରିଥିଲେ, ବକ୍ତୃତା ଦେଇଥିଲେ ଏବଂ ଅଧ୍ୟକ୍ଷତା କରିଥିଲେ ।

– ୧୯୯୧ ମସିହାରେ ବ୍ରିଟିଶ କାଉନ୍ସିଲ୍ ଦ୍ୱାରା ମନୋନୀତ ହୋଇ ସୁଇଜରଲ୍ୟାଣ୍ଡର ଅବେଡିନ୍ ବିଶ୍ୱବିଦ୍ୟାଳୟରେ ସେ ଏକ ସ୍ୱତନ୍ତ୍ର ତାଲିମ୍ ମଧ୍ୟ ପାଇଥିଲେ ।

ସ୍ୱକୀୟ ଗବେଷଣାର ଉକ୍ରର୍ଷ ଯୋଗୁ ସେ ବିଶ୍ୱବିଦ୍ୟାଳୟ ମକୁରି କମିଶନର ସମ୍ମାନଜନକ ରିସର୍ଚ୍ଚ ଆୱାର୍ଡ ପ୍ରାପ୍ତ ହୋଇଥିଲେ ।

– ଡ. ମୁଣ୍ଡ ୧୯୬୮ ମସିହାରୁ ଲେଖାଲେଖି କରି ଆସୁଥିଲେ । ତାଙ୍କ ଲେଖା ବିଭିନ୍ନ ପତ୍ରପତ୍ରିକାରେ ପ୍ରକାଶ ପାଇଛି ।

୧୯୭୨-୭୩ ମସିହା ପାଇଁ ସେ ଓଡ଼ିଆ ଯୁବ ଲେଖକ ସମ୍ମେଳନର ସାଧାରଣ ସମ୍ପାଦକ ଭାବେ ନିର୍ବାଚିତ ହୋଇଥିଲେ ।

୧୯୬୯-୭୦ ମସିହାରେ ଉପାନ୍ତ ଅଞ୍ଚଳ ଜୟପୁରଠାରେ ଓଡ଼ିଆ ଭାଷା ଓ ସାହିତ୍ୟ ପାଇଁ ବିଭିନ୍ନ କାର୍ଯ୍ୟକ୍ରମର ନେତୃତ୍ୱ ନେଇଥିଲେ ।

ତାଙ୍କର ବିଭିନ୍ନ ପତ୍ରପତ୍ରିକାରେ ପ୍ରକାଶିତ ଅଜସ୍ର କବିତା, ଗଳ୍ପ, ପ୍ରବନ୍ଧ/ସମାଲୋଚନା, ଅନୁବାଦ, ଭ୍ରମଣ ସାହିତ୍ୟ, ଆଦି ସହିତ ଅନେକ ପ୍ରକାଶିତ ଓଡ଼ିଆ ଓ ଇଂରାଜୀ ପୁସ୍ତକ ରହିଛି ।

ଅନେକ ଗବେଷଣାତ୍ମକ ସନ୍ଦର୍ଭ ଓ ବିଭିନ୍ନ ପତ୍ରିକାର ସମ୍ପାଦନା ଦାୟିତ୍ୱ ମଧ୍ୟ ତୁଲାଇଥିଲେ ।

 

କବିତା ସଙ୍କଳନ ଶବ୍ଦ ଫେଣା, ଗଳ୍ପ ସଙ୍କଳନ ଛକ, ପ୍ରବନ୍ଧ ନାଟକ ଜିଜ୍ଞାସା, ଅନୁବାଦ ଲୋଭୀ ବାଛୁରୀ, ଭ୍ରମଣ ସାହିତ୍ୟ ଦେଶ ଦେଶ ମଣିଷ ମଣିଷ ଆଦି ଅନ୍ୟତମ ।

– ଓଡ଼ିଶା ସାହିତ୍ୟ ଏକାଡେମୀ ତଥା କେନ୍ଦ୍ର ସାହିତ୍ୟ ଏକାଡେମୀର ବିଭିନ୍ନ କାର୍ଯ୍ୟକ୍ରମରେ ସେ ଗତ ୪୦ବର୍ଷ ଧରି ଭାଗ ନେଇ ଆସୁଥିଲେ ।

୧୯୯୪ ମସିହାରେ କେନ୍ଦ୍ର ସାହିତ୍ୟ ଏକାଡେମୀ ଦ୍ୱାରା ମନୋନୀତ ହୋଇ ସେ ‘ଭିଜିଟିଙ୍ଗ୍ ଅଥର’ କାର୍ଯ୍ୟକ୍ରମରେ କର୍ଣ୍ଣାଟକ ଗସ୍ତ କରିଥିଲେ ।

ଓଡ଼ିଶା ସାହିତ୍ୟ ଏକାଡେମୀ ସଦସ୍ୟ ଭାବେ ୩ଥର ମନୋନୀତ ହୋଇଥିଲେ ।

୨୦୦୮-୧୩ ମସିହା ପର୍ଯ୍ୟନ୍ତ କେନ୍ଦ୍ର ସାହିତ୍ୟ ଏକାଡେମୀର ଓଡ଼ିଆ ଉପଦେଷ୍ଟା ପରିଷଦ ସଦସ୍ୟ ଭାବେ କାର୍ଯ୍ୟ କରିଥିଲେ ।

ଓଡ଼ିଶାର ବିଭିନ୍ନ ସାହିତ୍ୟ, ସାଂସ୍କୃତିକ ଅନୁଷ୍ଠାନ ସହିତ ଗତ ୫୦ବର୍ଷ ଧରି ଯୋଡ଼ି ହୋଇ ରହିଥିଲେ ।

– ଅନେକ ଅଭିଧାନିକ ତଥା ଓଡ଼ିଆ ଭାଷା ସମ୍ପର୍କିତ କାର୍ଯ୍ୟରେ ଡ. ମୁଣ୍ଡ ରହିଥିଲେ । ସେସବୁ ପୁସ୍ତକ ଆକାରରେ ପ୍ରକାଶ ପାଇଛି ।

କନ୍ନଡ଼ ଭାଷାରେ ଅନୁଦିତ ହୋଇ ଡ. ମୁଣ୍ଡଙ୍କ ସୀତାକାନ୍ତ ମହାପାତ୍ର ପୁସ୍ତକ କର୍ଣ୍ଣାଟକ ସାହିତ୍ୟ ଏକାଡେମୀ ଦ୍ୱାରା ୨୦୦୨ମସିହାରେ ପ୍ରକାଶ ପାଇଛି ।

ଫ୍ରେଞ୍ଚ ଭାଷାରେ ଡ. ମୁଣ୍ଡଙ୍କ ଲିଖିତ ଏକ ଗବେଷଣା ନିବନ୍ଧ ୨୦୧୩ରେ ଏକ ପୁସ୍ତକରେ ପ୍ରକାଶ ପାଇଛି ।

– ଭାରତୀୟ ଇଂରାଜୀ ସାହିତ୍ୟ, ଓଡ଼ିଆ ସାହିତ୍ୟ ତଥା ସଂସ୍କୃତି ଅଧ୍ୟୟନର ଗବେଷଣା ତଥା ପ୍ରକାଶନରେ ୧୯୮୮ ମସିହାରୁ ବ୍ୟାଗ୍ରତ ଡ. ମୁଣ୍ଡ ବିଶ୍ୱସ୍ତରରେ ଜଣେ ସୁପରିଚିତ ଗବେଷକ ଥିଲେ ।

ଦେଶ ବିଦେଶରେ ୮୦ରୁ ଊଦ୍ଧ୍ୱର୍ ସେମିନାରରେ ଅଂଶଗ୍ରହଣ କରି ଏହି ଉପରେ ବକ୍ତବ୍ୟ ରଖିଥିଲେ ।

ବିଶ୍ୱର ବିଭିନ୍ନ ଦେଶରୁ ପ୍ରକାଶିତ ପତ୍ରପତ୍ରିକା ତଥା ଗବେଷଣା ପୁସ୍ତକରେ ଡ. ମୁଣ୍ଡଙ୍କର ୭୧ଟି ନିବନ୍ଧ ପ୍ରକାଶିତ ।

ବହୁ ଆନ୍ତର୍ଜାତିକ ଶିକ୍ଷା କାର୍ଯ୍ୟକ୍ରମ ତଥା ଗବେଷଣା ସମ୍ବନ୍ଧିତ ଅନୁଷ୍ଠାନ ସହିତ ସେ ସମ୍ପୃକ୍ତ ଥିଲେ ।

ବହୁ ଗବେଷଣା ପତ୍ରିକାର ଉପଦେଷ୍ଟା, ରେଫରୀ ଆଦି ଦାୟିତ୍ୱ ତୁଲାଇବା ସହ ଭାରତ ତଥା ବୈଦେଶିକ ବିଶ୍ୱବିଦ୍ୟାଳୟମାନଙ୍କର ଗବେଷଣା ସନ୍ଦର୍ଭ, ବିଭିନ୍ନ ପ୍ରତିଯୋଗିତାର ବିଚାରକ ଭାବରେ ସେ ଦାୟିତ୍ୱ ତୁଲାଇ ଆସୁଥିଲେ ।

ଇଣ୍ଡିଆନ୍ ଆସୋସିଏସନ୍ ଫର୍ କମନୱେଲଥ ଲିଟରେଚର ଲାଙ୍ଗୁଏଜ୍ ଷ୍ଟଡିଜ୍ର ଉପାଧ୍ୟକ୍ଷ ଭାବେ ୨୦୦୮ରୁ ସେ ନିର୍ବାଚିତ ହୋଇ ଆସୁଥିଲେ ।

– ଭାରତର ପ୍ରାୟ ସମସ୍ତ ବିଶ୍ୱବିଦ୍ୟାଳୟ, ଉଚ୍ଚ ଶିକ୍ଷାନୁଷ୍ଠାନ ଆଦିରେ ବିଭିନ୍ନ ଗବେଷଣାମୂଳକ, ଶୈକ୍ଷିକ ତଥା ସାହିତ୍ୟିକ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ ।

ଏହାବ୍ୟତୀତ୍ ବହୁ ସ୍ୱନାମଧନ୍ୟ ବିଶ୍ୱବିଦ୍ୟାଳୟ, ଅନୁଷ୍ଠାନ ଦ୍ୱାରା ନିମନ୍ତ୍ରିତ ହୋଇ ୩୦ରୁ ଅଧିକ ବକ୍ତୃତା ପ୍ରଦାନ କରିଥିଲେ ।

ପୃଥିବୀର ବିଭିନ୍ନ ବିଶ୍ୱବିଦ୍ୟାଳୟରେ ଡ. ମୁଣ୍ଡଙ୍କ ଗବେଷଣା ପୁସ୍ତକ ବ୍ୟବହାର କରାଯାଏ ।

ଖ୍ୟାତିସମ୍ପନ୍ନ ଗବେଷକଗଣ ନିଜ ନିବନ୍ଧରେ ଡ. ମୁଣ୍ଡଙ୍କ ସ୍ଥାନିତ କରିଥାନ୍ତି ।

– ଶିକ୍ଷା ଓ ସାହିତ୍ୟ ଜଗତକୁ ବିଶେଷ ଅବଦାନ ପାଇଁ ସେ ଓଡ଼ିଶା ଓ ଓଡ଼ିଶା ବାହାରେ ବହୁ ସମ୍ମାନ ଓ ସମ୍ବର୍ଦ୍ଧନ ପାଇ ରାଜ୍ୟକୁ ଗୌରବାନ୍ୱିତ କରାଇଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଏପ୍ରିଲ ୧୨(ଲୋକାଲ ୱାୟାର): ବଲାଙ୍ଗିରର ରାଜେନ୍ଦ୍ର ବିଶ୍ୱବିଦ୍ୟାଳୟ ଓ କଳାହାଣ୍ଡି ବିଶ୍ୱବିଦ୍ୟାଳୟର ନୂତନ ତଥା ପ୍ରଥମ କୁଳପତିଙ୍କୁ ସୋମବାର ନିଯୁକ୍ତ କରିଛନ୍ତି ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ।

ବିଶ୍ୱବିଦ୍ୟାଳୟର କୁଳାଧିପତି ତଥା ରାଜ୍ୟପାଳ ପ୍ରଫେସର ଉମାବଲ୍ଲଭ ମହାପାତ୍ରଙ୍କୁ ରାଜେନ୍ଦ୍ର ବିଶ୍ୱବିଦ୍ୟାଳୟର କୁଳପତିଭାବେ ନିଯୁକ୍ତ କରିଥିବାବେଳେ କଳାହାଣ୍ଡି ବିଶ୍ୱବିଦ୍ୟାଳୟ ଲାଗି ପ୍ରଫେସର ସଞ୍ଜୟ କୁମାର ଶତପଥୀଙ୍କୁ ନିଯୁକ୍ତ କରିଛନ୍ତି । ଆଗାମୀ ୪ ବର୍ଷ ପାଇଁ ନବ ନିଯୁକ୍ତ କୁଳପତିମାନେ ଏହି ଦାୟିତ୍ୱରେ ରହିବେ ।

ସୂଚନାଯୋଗ୍ୟ, ରାଜେନ୍ଦ୍ର ବିଶ୍ୱବିଦ୍ୟାଳୟ ପାଇଁ ନିଯୁକ୍ତ ହୋଇଥିବା ପ୍ରଫେସର ମହାପାତ୍ର ଉତ୍ତର ଓଡ଼ିଶା ବିଶ୍ୱବିଦ୍ୟାଳୟରେ ପ୍ରଫେସରଭାବେ ୩୩ ବର୍ଷର ଅଭିଜ୍ଞତା ରଖିଛନ୍ତି ।

ସେ ଗୋଟିଏ ପୁସ୍ତକ ରଚନା କରିଥିବାବେଳେ ତାଙ୍କ ଅଧୀନରେ ୧୪ ଜଣ ପିଏଚଡି ଏବଂ ୨୪ ଜଣ ଏମଫିଲ୍ ଡିଗ୍ରୀ ହାସଲ କରିଛନ୍ତି ।

ସେହିପରି କଳାହାଣ୍ଡି ବିଶ୍ୱବିଦ୍ୟାଳୟର ନବ ନିଯୁକ୍ତ କୁଳପତି ପ୍ରଫେସର ଶତପଥୀ ରେଭେନ୍ସା ବିଶ୍ୱବିଦ୍ୟାଳୟରୁ ବାଣିଜ୍ୟ ବିଭାଗରେ ୩୬ ବର୍ଷ ଅଧ୍ୟାପନା କରି ଅବସର ଗ୍ରହଣ କରିଛନ୍ତି ।

ସେ ୨୪ଟି ପୁସ୍ତକ ରଚନା କରିଥିବାବେଳେ ତାଙ୍କ ଅଧୀନରେ ୨୦ଜଣ ଛାତ୍ରଛାତ୍ରୀ ପିଏଚଡି ହାସଲ କରିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୧୭(ଲୋକାଲ ୱାୟାର): ପନ୍ଦର ଦିନ ମଧ୍ୟରେ କର୍ଲାପାଟ ଅଭୟାରଣ୍ୟରେ ୬ଟି ହାତୀଙ୍କ ମୃତ୍ୟୁ ପରେ ଚେଇଁ ଉଠିଛି ଜଙ୍ଗଲ ବିଭାଗ ।

ହାତୀମଡକକୁ ଅଟକାଇବା ପାଇଁ ଅଭୟାରଣ୍ୟ ପରିସରରେ ଟ୍ରାପ୍ ଓ ଡ୍ରୋନ୍ କ୍ୟାମେରେ ଲଗାଇଥିବା ବେଳେ ସେହିପରି ଥର୍ମାଲ ସ୍ପେନ୍ସିଙ୍ଗ ଡ୍ରେନ୍ କ୍ୟାମେରା ଦ୍ୱାରା ହାତୀ ଉତ୍ତାପରୁ ରୋଗ ଜାଣିବାର ସମସ୍ତ ବନେ୍ଦାବସ୍ତ କରାଯାଇଛି ।

ସାଧାରଣ ଡ୍ରୋନ୍ କ୍ୟାମେରାରେ ହାତୀର ଗତିବିଧି ଲକ୍ଷ୍ୟ କରାଯିବାକୁ ଥିବା ବେଳେ ଟ୍ରାପ୍ କ୍ୟାମେରା ନିକଟରେ କଦଳୀରେ ଆଣ୍ଟିବାୟୋଟିକ୍ ଦିଆଯାଇ ହାତୀର ଶାରୀରିକ ସୁସ୍ଥତା ବାବଦରେ ଜାଣିବାର ବ୍ୟବସ୍ଥା କରାଯାଇଛି ।

ଲୋକାଲ ୱାୟାର

ଭବାନୀପାଟଣା, ଜାନୁଆରୀ ୨୭(ଲୋକାଲ ୱାୟାର): ମୋବାଇଲ ଫୋନ୍ ଯୋଗେ ଜଣେ ବରିଷ୍ଠ ନାଗରିକଙ୍କୁ ୧ ଲକ୍ଷ ୧୯ ହଜାର ଠକେଇ ମାମଲାରେ ଭବାନୀପାଟଣା ପୁଲିସ ଉତ୍ତରପ୍ରଦେଶରୁ ୫ ଜଣଙ୍କୁ ଗିରଫ କରିଛି ।

ଉତ୍ତର ପ୍ରଦେଶର ହମିରପୁର ଜିଲ୍ଲା ଅନ୍ତର୍ଗତ ବେୱାରର ଅଭିଳାଷ ସିଂହ ନାମକ ବ୍ୟକ୍ତି ଭବାନୀପାଟଣା ସହରର ଜଣେ ବରିଷ୍ଠ ନାଗରିକଙ୍କୁ ଫୋନ କରି ନିଜକୁ ଜିଓ କଷ୍ଟୋମର କେୟାରର ଜଣେ ଏକଜିକୁ୍ୟଟିଭ୍ ଭାବେ ପରିଚୟ ଦେଇଥିଲା ।

ସଂପୃକ୍ତ ବ୍ୟକ୍ତି ଜିଓ କମ୍ପାନିରୁ ଏକ ଭିଭୋ ଫୋନ୍ ଓ ୨୦ ହଜାର ଟଙ୍କା ପୁରସ୍କାର ଜିତିଥିବା କହି କୌଶଳ କ୍ରମେ ଅଭିଳାଷ ବ୍ୟକ୍ତି ଓ ତାଙ୍କ ପତ୍ନୀଙ୍କ ଡେବିଟ କାର୍ଡର ନମ୍ବର, ମୋବାଇଲ ନମ୍ବର ଓ ଆଇଡି ନମ୍ବର ନେଇ ଯାଇଥିଲା ।

ଏହାପରେ ସେ ଦୁଇଟି ଦଫାରେ ଦୁଇ ଜଣଙ୍କ ଆକାଉଣ୍ଟରୁ ୯୯ ହଜାର ୮ଶହ ଏବଂ ୪୫ ହଜାର ୫୯୧ ଟଙ୍କା ହଡ଼ପ କରି ନେଇଥିଲା ।

ପୁଲିସ ଏହାର ତଦନ୍ତ କରି ଉତ୍ତର ପ୍ରଦେଶରୁ ଅଭିଳାଷ ସିଂହ, ପରଭେଜ ଅହମ୍ମଦ, ୱାହିଦ ଖାନ୍, ଶାହରୁକ ଖାନ ଏବଂ ଜୁନେଦ ଅହମଦଙ୍କୁ ଗିରଫ କରିଛି ।

ଲୋକାଲ ୱାୟାର

ଭବାନୀପାଟଣା, ଜାନୁଆରୀ ୧୪(ଲୋକାଲ ୱାୟାର): କଳାହାଣ୍ଡି ଗରିବୀର ପରୀକ୍ଷାଗାର ନୁହେଁ ବରଂ ବିକାଶର ମଡେଲ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁବାର କଳାହାଣ୍ଡି ଜିଲ୍ଲା ଗସ୍ତରେ ଯାଇ ଜୟପାଟଣା ବ୍ଲକ ଅନ୍ତର୍ଗତ ମଙ୍ଗଳପୁରଠାରେ ଆୟୋଜିତ ଜନସମାବେଶରେ ଉଦବୋଧନ ଦେଇ କହିଛନ୍ତି ।

ଉଦବୋଧନ ଅବସରରେ ସେ ବିଜୁବାବୁଙ୍କର କଳାହାଣ୍ଡି ସହ ଥିବା ସମ୍ପର୍କର୍କୁ ମନେ ପକାଇ କହିଥିଲେ, ‘ବିଜୁ ବାବୁ ୯୦ ଦଶକରେ ମୁଖ୍ୟମନ୍ତ୍ରୀ ଥିବା ସମୟରେ ଭବାନୀପାଟଣା ଗସ୍ତ ସମୟରେ ତାଙ୍କ ଉପରେ କିଛି ପିଲା ପଥର ମାଡ଼ କରିଥିଲେ ।

ବିଜୁବାବୁ ତାଙ୍କ ବିଶାଳ ହୃଦୟରେ ସେହି ପିଲାମାନଙ୍କୁ କ୍ଷମା କରିଥିଲେ । ପରେ ତାଙ୍କ ପୁଅ ହିସାବରେ ମୁଁ ତାଙ୍କୁ ଏ ସମ୍ପର୍କରେ ପ୍ରଶ୍ନ କରିବାରୁ ସେ କହିଥିଲେ ନଥିଙ୍ଗ ଟୁ ବି ଓରିଡ୍ ।

କଳାହାଣ୍ଡିବାସୀ ମୋତ ବହୁତ ଭଲ ପାଆନ୍ତି । ମୁଁ ମଧ୍ୟ କଳାହାଣ୍ଡିକୁ ବହୁତ ଭଲ ପାଏ । କଳାହାଣ୍ଡି ମାଟିରେ ମୋଟ ଯେତିକି ବିନ୍ଦୁ ରକ୍ତ ପଡ଼ିଛି, କଳାହାଣ୍ଡିର ବିକାଶ ପାଇଁଁ ମୁଁ ତାଠୁ ୧୦ ଗୁଣ ଅଧିକ ପରିଶ୍ରମ କରିବି ।

୨୦୦୦ ମସିହାରେ ମୁଁ ମୁଖ୍ୟମନ୍ତ୍ରୀ ଦାୟିତ୍ୱ ନେବା ପରେ ଓଡ଼ିଶା ମା’ର ସେବା ପାଇଁ ସୁଯୋଗ ପାଇଥିଲି ଏବଂ ବିଜୁ ବାବୁଙ୍କର ସେହି କଥା ମୋ ମନକୁ ବାରମ୍ବାର ଆସୁଥିଲା ଏବଂ କଳାହାଣ୍ଡିର ବିକାଶ ପାଇଁ ମାର୍ଗ ଦେଖାଉଥିଲା । ଏ ଭିତରେ କଳାହାଣ୍ଡିର ଛବି ଉଜ୍ୱଳ ହୋଇଛି ।’

କୃଷି କ୍ଷେତ୍ରରେ କଳାହାଣ୍ଡିର ଉଚ୍ଚ ପ୍ରଶଂସା କରି ସେ କହିଥିଲେ, ଭୋକର ଭୂଗୋଳ କଳାହାଣ୍ଡିକୁ କୁହାଯାଉଥିବା ବେଳେ ଏବେ ଏହା ଭାତହାଣ୍ଡିରେ ପରିଣତ ହୋଇଛି ।

ଜିଲ୍ଲା ଧାନ ଉତ୍ପାଦନରେ ରାଜ୍ୟରେ ଦ୍ୱିତୀୟ ସ୍ଥାନ ହାସଲ କରିବା ସହ ଦେଶର ସାଧାରଣ ବଣ୍ଟନ ବ୍ୟବସ୍ଥାକୁ ଚାଉଳ ଯୋଗାଉଛି ।

୧୦ଟି ରାଜ୍ୟ କେନ୍ଦ୍ରୀୟ ଭଣ୍ଡାରକୁ ଯେତିକି ଚାଉଳ ଦେଉଛନ୍ତି, ଏହା କଳାହାଣ୍ଡି ସେତିକି ଚାଉଳ ଦେଉଛି ।

ଏହା କେବଳ କଳାହାଣ୍ଡିର ଚାଷୀଙ୍କ ଦୃଢ଼ ଇଚ୍ଛାଶକ୍ତି ଯୋଗୁ ହୋଇପାରିଛି । କଳାହାଣ୍ଡି ଜିଲ୍ଲାର ଚାଷୀଙ୍କ ବ୍ୟାଙ୍କ ଖାତାକୁ ସିଧାସଳଖ ୧୨ଶହ କୋଟି ଟଙ୍କା ଦିଆଯାଇଛି । ଜଳସେଚନ ସୁବିଧା ତିନିଗୁଣ ବୃଦ୍ଧି ପାଇଛି ।

ଏହି ଜିଲ୍ଲା ଦେଶରେ ସ୍ୱାସ୍ଥ୍ୟ ଓ ପୁଷ୍ଟି କ୍ଷେତ୍ରରେ ବେଷ୍ଟ ପରଫର୍ମିଙ୍ଗ ଜିଲ୍ଲା ହୋଇପାରିଛି ।

ମାଛ ଚାଷ କ୍ଷେତ୍ରରେ ମଧ୍ୟ ଦେଶରେ ଶ୍ରେଷ୍ଠ ଜିଲ୍ଲାର ମର୍ଯ୍ୟାଦା ପାଇପାରିଛି । ୨୦୦୦ ମସିହାରେ କଳାହାଣ୍ଡି ଜିଲ୍ଲାରେ ଶିଶୁ ମୃତ୍ୟୁହାର ପ୍ରତି ହଜାରରେ ୭୬ ଥିବା ବେଳେ ମାତୃ ମୃତୁ୍ୟହାର ୪୩୨ ଥିଲା ।

ଏବେ ସ୍ୱତନ୍ତ୍ର କାର୍ଯ୍ୟକ୍ରମ ଯୋଗୁ ବହୁ ମା ଓ ଶିଶୁଙ୍କ ଜୀବନ ରକ୍ଷା ହୋଇପାରିଛି ।’

ଇନ୍ଦ୍ରାବତୀ ନଦୀ ସମ୍ପର୍କରେ ସେ କହିଥିଲେ, ଇନ୍ଦ୍ରାବତୀ ଆମର ମା’ ଓ କଳାହାଣ୍ଡିର ଜୀବନରେଖା ।

ତାର ପ୍ରତିଟି ଜଳବିନ୍ଦୁ କଳାହାଣ୍ଡିକୁ ସମୃଦ୍ଧ କରିଛି । ମା’ ଇନ୍ଦ୍ରାବତୀର ଏହି ଅବଦାନକୁ ସମ୍ମାନ ଜଣାଇ ଏକ ସଂଗ୍ରହାଳୟ ଓ ଉଦ୍ୟାନ ନିର୍ମାଣ କରାଯିବ ।

ଏହି ସଂଗ୍ରହାଳୟ ସାରା ବିଶ୍ୱକୁ କଳାହାଣ୍ଡିର ରୂପାନ୍ତରର କାହାଣୀ କହିବ । ଏହି ଉଦ୍ୟାନ ଭିତରେ ମା’ ଇନ୍ଦ୍ରାବତୀଙ୍କ ଏକ ଭବ୍ୟମନ୍ଦିର ନିର୍ମାଣ କରାଯିବ ବୋଲି ସେ କହିଥିଲେ ।

ଆଜିର ଗସ୍ତ ଅବସରରେ ମୁଖ୍ୟମନ୍ତ୍ରୀ ୨୦୮୫ କୋଟି ଟଙ୍କାର ବିଭିନ୍ନ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିଥିଲେ ।

୫୪ଟି ପ୍ରକଳ୍ପର ଉଦଘାଟନ ଓ ୫୨ଟି ପ୍ରକଳ୍ପର ଶିଳାନ୍ୟାସ କରିଥିଲେ । ଏହି ପ୍ରକଳ୍ପ ଗୁଡ଼ିକ ମଧ୍ୟରେ ୯୮୭ କୋଟି ଟଙ୍କାର ଅପର ଇନ୍ଦ୍ରାବତୀ ଉଠାଜଳସେଚନ ବ୍ୟବସ୍ଥା ରହିଛି ।

ଏହା ଦ୍ୱାରା ୨୫ ହଜାର ୨୭୫ ହେକ୍ଟର ଜମି ଜଳସେଚିତ ହୋଇପାରିବ ।ଏଥିରେ ୪୩.୨୬ କିଲୋମିଟର କଂକ୍ରିଟ କେନାଲ ଥିବା ବେଳେ ୧୧୪୨ କିଲୋମିଟର ଭୂତଳ ପାଇପ ଲାଇନ ରହିଛି ।

କୋକସରା, ଜୟପାଟଣା ଓ ଧର୍ମଗଡ଼ ବ୍ଲକର ୩ ଲକ୍ଷ ଚାଷୀ ଉପକୃତ ହେବେ । ମଙ୍ଗଳପୁର ବ୍ୟାରେଜରୁ ଜଳସେଚନ କରାଯିବ ।

ଏଥିସହ ୨୦ କୋଟି ଟଙ୍କାର ୧୦ଟି ପାନୀୟ ଜଳ ପ୍ରକଳ୍ପ ଓ ୪.୮୩ କୋଟି ଟଙ୍କାର ୧୩ଟି ଚେକ୍ ଡ୍ୟାମ ମଧ୍ୟ ବିଭିନ୍ନ ଯୋଜନାରେ ରହିଛି ।

ଫୁଡପାର୍କ, ନୂଆ ବିଦ୍ୟୁତ୍ ଫିଡର ଲାଇନ, ଭବାନୀପାଟଣାରେ ନୂଆ ବସଷ୍ଟାଣ୍ଡ, ରାସ୍ତାଘାଟ ଓ ସେତୁ ଇତ୍ୟାଦି ରହିଛି ।

ଏହି କାର୍ଯ୍ୟକ୍ରମରେ ମନ୍ତ୍ରୀ ଟୁକୁନି ସାହୁ, ମନ୍ତ୍ରୀ ରଘୁନନ୍ଦନ ଦାସ ଏବଂ ମନ୍ତ୍ରୀ ଦିବ୍ୟଶଙ୍କର ମିଶ୍ର ଉଦବୋଧନ ଦେଇଥିଲେ ।

ପ୍ରିନ୍ସ ଡ୍ୟାନ୍ସ ଗ୍ରୂୁପ ଆକର୍ଷଣୀୟ ନୃତ୍ୟ ଦ୍ୱାରା କଳାହାଣ୍ଡିର ବିକାଶକୁ ଉପସ୍ଥାପନ କରିଥିଲେ ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୨୮(ଲୋକାଲ ୱାୟାର): ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ସୋମବାର ତିନି ଜଣ କୋଟିପତିଙ୍କ ଘରେ ଭିଜିଲାନ୍ସ ଚଢ଼ାଉ ହୋଇଛି ।

ବରଗଡ଼ ଜିଲ୍ଲା ଗାଇସିଲଟ ବ୍ଲକ ପଞ୍ଚାୟତ ଏକଜିକୁ୍ୟଟିଭ୍ ଅଫିସର ପାଣ୍ଡବ ନନ୍ଦଙ୍କ ଘରେ ହୋଇଥିବା ଚଢ଼ାଉରେ ତାଙ୍କର ୧ କୋଟି ୪୩ ଲକ୍ଷ ୩୦ ହଜାର ୮୨୦ ଟଙ୍କାର ସମ୍ପତ୍ତି ଥିବା ଜଣାପଡ଼ିଛି ।

ଚଢ଼ାଉ ବେଳେ ଠାବ ହୋଇଥିବା ସ୍ଥାବର ଓ ଅସ୍ଥାବର ସମ୍ପତ୍ତି ମଧ୍ୟରେ ଅଛି ଗାଇସିଲଟ ବ୍ଲକର କାଳଙ୍ଗପଲୀ ଗ୍ରାମରେ ଥିବା ଏକ ଦୁଇ ମହଲା କୋଠା (୭୪ ଲକ୍ଷ ୬୫ ହଜାର ୨୨୬ ଟଙ୍କା), ବଲାଙ୍ଗିର ଓ ବରଗଡ଼ ଜିଲ୍ଲାରେ ଥିବା ୧୨ଟି ପ୍ଲଟ ( ୩ ଲକ୍ଷ ୭୭ ହଜାର ୮ଶହ ଟଙ୍କା), ଦୁଇଟି ଦୁଇ ଚକିଆ (୧ ଲକ୍ଷ ୫୬ ହଜାର), ସୁନା ଗହଣା (୪୪ ହଜାର ୯୭୪ ଟଙ୍କା), ଘରକରଣା ସାମଗ୍ରୀ(୪ ଲକ୍ଷ ୮୮ ହଜାର ୨୧୯ ଟଙ୍କା) ଏବଂ ୩ ଲକ୍ଷ ୪୦ ହଜାର ୯୪୦ ଟଙ୍କା ଅଛି ।

ସେହିପରି ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକର ସମବାୟ ସମିତି ସମ୍ପାଦକଙ୍କ ଘରେ ହୋଇଥିବା ଚଢ଼ାଉରେ ୧ କୋଟି ୯ ଲକ୍ଷ ୪୭ ହଜାର ୪୩୩ ଟଙ୍କାର ସମ୍ପତ୍ତି ଠାବ ହୋଇଛି । ଏହା ମଧ୍ୟରେ ରହିଛି କଣ୍ଟାମଳରେ ଏକ ଦୁଇ ମହଲା କୋଠା (୨୫ ଲକ୍ଷ ଟଙ୍କା), କଣ୍ଟାମାଳରେ ଅନ୍ୟ ଏକ କୋଠା (୨୦ ଲକ୍ଷ ୧୦ ହଜାର ଟଙ୍କା), କଣ୍ଟାମାଳରେ ୪ଟି ପ୍ଲଟ (୮୬ ହଜାର ୬୮୩ ଟଙ୍କା), ଦୁଇଟି ଚାରି ଚକିଆ (୧୧ ଲକ୍ଷ ୬୭ ହଜାର ୯୮୪ ଟଙ୍କା), ଦୁଇଟି ଟ୍ରାକ୍ଟର (୧୨ ଲକ୍ଷ ୩୫ ହଜାର ୧୨୫ ଟଙ୍କା), ୬ଟି ଦୁଇ ଚକିଆ (୪ ଲକ୍ଷ ୭୯ ହଜାର ୬୮୨ ଟଙ୍କା), ଏକ ଧାନ ପିଟା ମେସିନ (୧ ଲକ୍ଷ ଟଙ୍କା), ବିଭିନ୍ନ ବ୍ୟାଙ୍କରେ ଜମା (୩ ଲକ୍ଷ ୫୫ ହଜାର ଟଙ୍କା), ସୁନା ଅଳଙ୍କାର (୧୯ ଲକ୍ଷ ୯୫ ହଜାର), ଘରକରଣା ସାମଗ୍ରୀ (୨ ଲକ୍ଷ ୯୮ ହଜାର ୯୬୯ ଟଙ୍କା) ଏବଂ ୭ ଲକ୍ଷ ୧୮ ହଜାର ୫ ଶହ ଟଙ୍କା ।

କଳାହାଣ୍ଡି ଜିଲ୍ଲା ଭବାନୀପାଟଣା ବ୍ଲକ ଥୁଆପଦର ପଞ୍ଚାୟତ ପିଇଓ ବାଲେଶ୍ୱର ନାୟକଙ୍କ ଘରେ ହୋଇଥିବା ଚଢ଼ାଉରେ ୯୬ ଲକ୍ଷ ୪୭ ହଜାର ୭୯୮ ଟଙ୍କାର ସମ୍ପତ୍ତି ଠାବ ହୋଇଛି ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୨୪(ଲୋକାଲ ୱାୟାର): କଳାହାଣ୍ଡି ଜିଲ୍ଲାର ନର୍ଲା ବ୍ଲକ୍ ସଦର ମହକୁମା ଠାରୁ ୨୦ କିଲୋମିଟର ଦୂରରେ ଅବସ୍ଥିତ ଲାଖପଦର ଗାଁ ।

୧୦ଜଣ ଗରିବ ମହିଳା ଆର୍ଥିକ ଦୃଷ୍ଟିକୋଣରୁ ସ୍ୱାବଲମ୍ବୀ ହେବା ଲକ୍ଷ୍ୟ ନେଇ ୨୦୦୯ ମସିହାରେ କେଦାରଗୌରୀ ସ୍ୱୟଂ ସହାୟକ ଗୋଷ୍ଠୀ ଗଠନ କରିଥିଲେ ।

ମିଶନ ଶକ୍ତି କର୍ମକର୍ତ୍ତାଙ୍କ ସହାୟତାରେ ମାଛ ଚାଷ ପାଇଁ ଗ୍ରାମ ପଞ୍ଚାୟତ ପୋଖରୀ ଗୁଡ଼ିକର ଦୀର୍ଘମିଆଦୀ ଲିଜ୍ ପାଇଁ ୨୦୧୯ରେ ପୋଖରୀ ନିଲାମ ପ୍ରକ୍ରିୟାରେ ଅଂଶଗ୍ରହଣ କଲେ ।

ଚୟନ ପ୍ରକ୍ରିୟାରେ ସଫଳ ହେବା ପରେ ୧୪ ଏକର ପରିମିତ ପଞ୍ଚାୟତ ପୋଖରୀକୁ ୩ବର୍ଷ ପାଇଁ ଲିଜ୍ ସୂତ୍ରରେ ନେଇ ମାଛଚାଷ ଆରମ୍ଭ କଲେ ।

ବ୍ୟବସାୟିକ ଭିତ୍ତିରେ ମାଛ ଚାଷ ପାଇଁ ତାଲିମ ନେବା ସହ ମିଶନ ଶକ୍ତି ସହାୟତାରେ ୩ ଲକ୍ଷ ଟଙ୍କା ବ୍ୟାଙ୍କ ଋଣ ନେଇ ୩ କ୍ୱିଣ୍ଟାଲ ମାଛ ଯାଅାଁଳ ଛାଡ଼ି ଥିଲେ ।

ମିଶନ ଶକ୍ତି ଜୀବିକା ସଂଯୋଜନା କାର୍ଯ୍ୟକ୍ରମ ମାଧ୍ୟମରେ ଏହି ଏସଏଚଜି ମତ୍ସ୍ୟ ନିଦେ୍ର୍ଦଶାଳୟ ତରଫରୁ ୩.୬ ଲକ୍ଷ ଟଙ୍କାର ଇନପୁଟ୍ ସବସିଡି ପାଇ ପାରିଛନ୍ତି ।

କୋଭିଡ୍ – ୧୯ ଲକଡାଉନ୍ ସମୟରେ ୧.୫ ଲକ୍ଷ ଟଙ୍କା ମୂଲ୍ୟର ପ୍ରାୟ ୧୦ କ୍ୱିଣ୍ଟାଲ ମାଛ ଉତ୍ପାଦନ କରି ସ୍ଥାନୀୟ ବଜାରରେ ବିକ୍ରି କରିଛନ୍ତି ।

ଏ ପର୍ଯ୍ୟନ୍ତ ପ୍ରାୟ ୨.୧ ଲକ୍ଷ ଟଙ୍କାର ଲାଭ ପାଇଥିବା ଏହି ମହିଳାମାନେ ଶେଷ ଅମଳ ବେଳକୁ ଆଖିଦୃଶିଆ ଲାଭ ପାଇବେ ବୋଲି ଆଶା ରଖିଛନ୍ତି ।

କେଦାରଗୌରୀ ଏସଏଚଜି ସଭାପତି କମଳି ଭୋଇ କହିଛନ୍ତି, ଏହା ଆମର ନିୟମିତ ଘର ଖର୍ଚ୍ଚ ପାଇଁ ଯଥେଷ୍ଟ ଆର୍ଥିକ ସହଯୋଗ କରିପାରିଥିବାରୁ ଆମେ ମାନେ ବହୁତ ଖୁସି ।

ଆମ ପାଇଁ ମାଛ ଚାଷ କେବଳ ଜୀବିକା ନୁହେଁ, ଏହା ଆମକୁ ସାମାଜିକ ପରିଚୟ, ପ୍ରତିଷ୍ଠା ଏବଂ ଆତ୍ମବିଶ୍ୱାସ ଆଣିଦେଇଛି । ଏଥିପାଇଁ ଆମେ ମିଶନ ଶକ୍ତି ନିକଟରେ କୃତଜ୍ଞ ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୨୩ (ଲୋକାଲ ୱାୟାର) : ଦକ୍ଷିଣ-ପୂର୍ବ ତଥା ସଂଲଗ୍ନ ଦକ୍ଷିଣ-ପୂର୍ବ ବଙ୍ଗୋପସାର ଅଞ୍ଚଳରେ ସୃଷ୍ଟ ଲଘୁଚାପ ୱେଲମାର୍କରେ ପରିଣତ ହୋଇଥିବା ବେଳେ ଆହୁରି ଘନୀଭୂତ ହୋଇ ଅବପାତର ରୂପ ନେଇପାରେ ।

ଆଗାମୀ ୨୪ ଘଣ୍ଟାରେ ଆହୁରି ଘନୀଭୂ ହୋଇ ସାମୁଦ୍ରିକ ଝଡ ବା ବାତ୍ୟାର ରୂପନେଇ ପାରେ ବୋଲି ଭୁବନେଶ୍ୱରସ୍ଥିତ ଆଞ୍ଚଳିକା ପାଣିପାଗ ବିଜ୍ଞାନ କେନ୍ଦ୍ର ସୋମବାର ସୂଚନା ଦେଇଛି ।

ଏହା ପ୍ରଭାବରେ ଆସନ୍ତା ୨୫ରୁ ଓଡ଼ିଶାର କିଛି ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ରହିଛି ।

ଲଘୁଚାପଟି ପଶ୍ଚିମ-ଉତ୍ତରପଶ୍ଚିମକୁ ମୁହାଁଇ ୨୫ ସୁଦ୍ଧା ତାମିଲନାଡୁ ଓ ପୁଡୁଚେରୀ ଉପକୂଳ ଛୁଇଁବ ।

ଏହାର ପ୍ରଭାବ ସିଧାସଳଖ ଓଡ଼ିଶା ଉପରେ ନାହିଁ ବୋଲି ପାଣିପାଗ ବିଭାଗ କହିଛି ।

ପ୍ରଭାବରେ ୨୫ରୁ ଦକ୍ଷିଣ ଓଡ଼ିଶାର କିଛି ସ୍ଥାନରେ ଏବଂ ୨୬ରେ ଅଧିକାଂଶ ସ୍ଥାନରେ ସ୍ୱଳ୍ପରୁ ମଧ୍ୟମ ବର୍ଷା ହେବାର ସମ୍ଭାବନା ରହିଛି।

ଆଜି କନ୍ଧମାଳ, ଅନୁଗୁଳ, ମୟୂରଭଞ୍ଜ, କଳାହାଣ୍ଡି, ଗଜପତି, ରାୟଗଡ଼ା ଓ ଢେଙ୍କାନାଳ ଜିଲ୍ଲାର କେତେକ ସ୍ଥାନରେ ବର୍ଷା ସମ୍ଭାବନା ରହିଛି ।

୨୫ ତାରିଖରେ କୋରାପୁଟ, ରାୟଗଡ଼ା ଓ ଗଜପତିରେ ପ୍ରବଳ ବର୍ଷା ଆଶଙ୍କା ଥିବାରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି ।

୨୬ ତାରିଖରେ ଗଜପତି ଓ ରାୟଗଡ଼ାରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ଥିବାବେଳେ କନ୍ଧମାଳ, ନବରଙ୍ଗପୁର, କଳାହାଣ୍ଡି ମାଲକାନଗିରି ଓ କୋରାପୁଟ ଜିଲ୍ଲାରେ ପ୍ରବଳ ବର୍ଷା ସମ୍ଭାବନା ରହିଛି ବୋଲି ପାଣିପାଗ କେନ୍ଦ୍ର କହିଛି । ଏ ସମସ୍ତ ଜିଲ୍ଳାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି ।

ଲୋକାଲ ୱାୟାର