କାର୍ଯ୍ୟକ୍ରମ

ଭୁବନେଶ୍ୱର, ମାର୍ଚ୍ଚ ୩୦(ଲୋକାଲ ୱାୟାର): ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଅଧୀନ ଓଡ଼ିଆ ଭାଷା ପ୍ରତିଷ୍ଠାନର ନିର୍ଦ୍ଦେଶିକା ଭାବେ ଡ. ଭାଗ୍ୟଲିପି ମଲ୍ଲଙ୍କୁ ନିଯୁକ୍ତି ଦିଆଯାଇଛି ।

ସେ ରାଜ୍ୟ ସଂଗ୍ରହାଳୟର ନିଜ ଦାୟିତ୍ୱ ସହ ଏହି କାର୍ଯ୍ୟକୁ ଅତିରିକ୍ତ ଦାୟିତ୍ୱ ଭାବେ ପରବର୍ତ୍ତୀ ନିର୍ଦ୍ଦେଶନାମା ପର୍ଯ୍ୟନ୍ତ ତୁଲାଇବେ ।

ପୂର୍ବରୁ ଡ. ମଲ୍ଲ ଓଡ଼ିଶା ରାଜ୍ୟ ଅଭିଲେଖାଗାରର ଅଧୀକ୍ଷକ ଭାବେ ସଫଳତାର ସହ କାର୍ଯ୍ୟ କରିବା ସହିତ ବର୍ତ୍ତମାନ ରାଜ୍ୟ ସଂଗ୍ରହାଳୟର କୁ୍ୟରେଟର ଅଛନ୍ତି ।

ସେହିପରି ସଙ୍ଗୀତ ଗୁରୁ ଡ. ବିଜୟ କୁମାର ଜେନାଙ୍କୁ ଉକ୍ରଳ ସଙ୍ଗୀତ ମହାବିଦ୍ୟାଳୟର ଅଧ୍ୟକ୍ଷ ଭାବେ ନିଯୁକ୍ତି ଦିଆଯାଇଛି ।

ବର୍ତ୍ତମାନ ଡ. ଜେନା ଉକ୍ରଳ ସଙ୍ଗୀତ ମହାବିଦ୍ୟାଳୟ ଓଡ଼ିଶୀ କଣ୍ଠସଙ୍ଗୀତ ବିଭାଗର ମୁଖ୍ୟ ଅଧ୍ୟାପକ ଥିବାବେଳେ ପୂର୍ବରୁ ୨ବର୍ଷ ଓଡ଼ିଶା ସଙ୍ଗୀତ ନାଟକ ଏକାଡେମୀର ସଚିବ ଭାବେ କାର୍ଯ୍ୟ କରିଛନ୍ତି ।

ପୂର୍ବରୁ ଏହି ଦୁଇଟିଯାକ ପଦବିରେ ଡ. ତମସାରାଣୀ ଦାସମହାପାତ୍ର କାର୍ଯ୍ୟ କରୁଥିଲେ ।

ସେ ସୋମବାର ଅବସର ଗ୍ରହଣ କରିବା ପରେ ଉକ୍ତ ପଦବି ଲାଗି ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି ।

ଲୋକାଲ ୱାୟାର

ଭୁବନେଶ୍ୱର, ମାର୍ଚ୍ଚ ୧୧(ଲୋକାଲ ୱାୟାର): ଓଡ଼ିଆ ଭାଷାର ବ୍ୟବହାରକୁ ସୀମିତ କରାଯିବା ଉଚିତ ନୁହେଁ ।

ଏହାକୁ ଅଧିକ ରୁଦ୍ଧିମନ୍ତ କରିବା ସହିତ ସବୁ କ୍ଷେତ୍ରରେ ଏହାର ବହୁଳ ବ୍ୟବହାର କରାଯିବା ଉପରେ ଉଦ୍ୟମ ଆବଶ୍ୟକ ।

ଓଡ଼ିଆ ଭାଷାକୁ ଜ୍ଞାନଭଣ୍ଡାରର ଭାଷା ଭାବରେ ପ୍ରତିଷ୍ଠିତ କରିବା ଦିଗରେ ବୁଦ୍ଧିଜୀବୀ, ଗବେଷକ ଓ ବିଷେଜ୍ଞମାନେ ଆଗେଇ ଆସନ୍ତୁ ବୋଲି ପର୍ଯ୍ୟଟନ, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ କହିଛନ୍ତି ।

ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଆନୁକୂଲ୍ୟରେ ଓଡ଼ିଆ ଭାଷା ପ୍ରତିଷ୍ଠାନ ପକ୍ଷରୁ ବୁଧବାର ପୂର୍ବାହ୍ନରେ ସଂସ୍କୃତି ଭବନ ସମ୍ମିଳନୀ କକ୍ଷରେ ଓଡ଼ିଆ ଭାଷାର ଶାସ୍ତ୍ରୀୟ ମାନ୍ୟତା ଦିବସ ପାଳନ କରାଯାଇଥିଲା ।

ଓଡ଼ିଆକୁ ଶାସ୍ତ୍ରୀୟ ଭାଷା ଭାବରେ ଜାତୀୟ ସ୍ତରରେ ମାନ୍ୟତା ମିଳିବାର ଆଜି ଥିଲା ଷଷ୍ଠ ବର୍ଷ ପୂର୍ତ୍ତି ।

ଏଥିରେ ବିଭାଗୀୟ ମନ୍ତ୍ରୀ ଶ୍ରୀ ପାଣିଗ୍ରାହୀ ମୁଖ୍ୟ ଅତିଥି ଭାବେ ଯୋଗଦେଇ ନିଜ ବକ୍ତବ୍ୟ ରଖିଥିଲେ ।

ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ପ୍ରମୁଖ ଶାସନ ସଚିବ ମନୋରଞ୍ଜନ ପାଣିଗ୍ରାହୀ ସମ୍ମାନିତ ଅତିଥି ଭାବେ ଯୋଗଦେଇ ବିଭିନ୍ନ ଭାଷା ମଧ୍ୟରେ ରହିଥିବା ସାମ୍ୟ ଓ ସମ୍ପର୍କ ଉପରେ ଆଲୋକପାତ କରିଥିଲେ ।

ବିଭାଗୀୟ ନିର୍ଦ୍ଦେଶକ ତଥା ଅତିରିକ୍ତ ଶାସନ ସଚିବ ବିଜୟ କୁମାର ନାୟକ ଅନ୍ୟତମ ଅତିଥି ଭାବେ ଯୋଗଦେଇ ବକ୍ତବ୍ୟ ରଖିଥିଲେ ।

ପ୍ରସିଦ୍ଧ ଗବେଷକ ଓ ବିଦ୍ୱାନ ଡ. ରଜତ କୁମାର କର ଓଡ଼ିଆ ଭାଷାର ଶାସ୍ତ୍ରୀୟତା ଓ ଭାଷିକ ବୈଚିତ୍ର‌୍ୟ ଉପରେ ବକ୍ତବ୍ୟ ରଖିଥିଲେ ।

ବିଶିଷ୍ଟ ସମାଲୋଚକ ପ୍ରଫେସର ଡ. ଯତୀନ୍ଦ୍ର କୁମାର ନାୟକ ମୁଖ୍ୟ ବକ୍ତା ଭାବେ ଯୋଗଦେଇ ଭାଷାର ସମୃଦ୍ଧି ଦିଗରେ ଦେଖା ଦେଇଥିବା ବିବିଧ ଆହ୍ୱାନଗୁଡ଼ିକ ବାବଦରେ ସୂଚନା ଦେଇଥିଲେ ।

ଓଡ଼ିଆ ଭାଷାର ଅଭିବୃଦ୍ଧି ଏବଂ ପ୍ରସାର ନିମନ୍ତେ ବହୁମୁଖୀ ପଦକ୍ଷେପ ନିଆଯିବା ଉପରେ ଗୁରୁତ୍ୱାରୋପ କରିଥିଲେ ।

ଓଡ଼ିଆ ଭାଷା ପ୍ରତିଷ୍ଠାନର ନିର୍ଦ୍ଦେଶକ ଡ. ତମସାରାଣୀ ଦାସମହାପାତ୍ର ଏହି କାର୍ଯ୍ୟକ୍ରମ ପରିଚାଳନା କରିବା ସହିତ ପ୍ରାରମ୍ଭିକ ସୂଚନା ଦେଇ ଏପରି ଦିବସ ପାଳନର ତାତ୍ପର୍ଯ୍ୟ ବର୍ଣ୍ଣନା କରିଥିଲେ ।

କାର୍ଯ୍ୟକ୍ରମରେ ପ୍ରତିଷ୍ଠାନ ଦ୍ୱାରା ପ୍ରକାଶିତ ଦୁଇଟି ପୁସ୍ତକ ‘ଓଡ଼ିଆ ଭାଷାତତ୍ତ୍ୱ କୋଷ’ ଏବଂ ‘କାର୍ଯ୍ୟାଳୟ ନଥି’ ଅତିଥିମାନଙ୍କ ଦ୍ୱାରା ଲୋକାର୍ପିତ ହୋଇଥିଲା ।

ଏହି ଅବସରରେ ଆୟୋଜିତ ବିଭିନ୍ନ ବିଦ୍ୟାଳୟ ଓ ମହାବିଦ୍ୟାଳୟସ୍ତରୀୟ ପ୍ରତିଯୋଗିତାର ସଫଳ ଛାତ୍ରଛାତ୍ରୀମାନଙ୍କୁ ପୁରସ୍କୃତ କରାଯାଇଥିଲା । ଶେଷରେ କାର୍ଯ୍ୟାଳୟ ତତ୍ତ୍ୱାବଧାରକ ଇନ୍ଦ୍ରମଣି ତ୍ରିପାଠୀ ଧନ୍ୟବାଦ ଦେଇଥିଲେ ।

ଲୋକାଲ ୱାୟାର

ଭୁବନେଶ୍ୱର, ମାର୍ଚ୍ଚ ୯(ଲୋକାଲ ୱାୟାର): ରାସାୟନିକ ରଙ୍ଗ ପରିବର୍ତ୍ତେ ଜୈବିକ ହୋଲି ଖେଳିବାର ବାର୍ତ୍ତା ନେଇ ସୋମବାର ପିସିସି ସଭାପତି ନିରଞ୍ଜନ ପଟ୍ଟନାୟକ ଭୁବନେଶ୍ୱରର ପଳାସପଲ୍ଲୀ ସ୍ଥିତ ଅନ୍ଧ, ମୂକ ଓ ବଧିର ସଙ୍ଗଠନର ଅନ୍ତବାସୀଙ୍କ ସହ ନିଆରା ହୋଲି ଖେଳିଛନ୍ତି ।

ଏହି ଅବସରରେ ଶ୍ରୀ ପଟ୍ଟନାୟକ ପିଲାମାନଙ୍କୁ ପବିତ୍ର ଦୋଳ ଓ ହୋଲିର ହାର୍ଦ୍ଦିକ ଅଭିନନ୍ଦନ ଜଣାଇବା ସହ ସେମାନଙ୍କୁ ମିଷ୍ଟାନ୍ନ ଖୁଆଇ ହୋଲିି ପାଳିଥିଲେ ।

ଏହି ହୋଲିରେ ସାମିଲ ହୋଇଥିଲେ ‘ଗାଁର ନା ଗାଲୁଆପୁର’ ଚଳଚ୍ଚିତ୍ରର ଅଭିନେତା ପପୁ ପମପମଙ୍କ ସହ ଅଭିନେତ୍ରୀ ମନୀଷାଧର ମହାପାତ୍ର, ନିର୍ଦ୍ଦେଶକ ଜିତୁ ମହାପାତ୍ର, ପ୍ରଯୋଜକ ସମପ୍ରୀତ ମହାପାତ୍ର, ଉପଦେଷ୍ଟା ସନ୍ତୋଷ ମହାପାତ୍ର ଏବଂ କ୍ରିଏଟିଭ୍ ହେଡ୍ ପ୍ରଣୟ ଜେଠୀ ।

ସମସ୍ତେ ଛୋଟ ଛୋଟ ପିଲାମାନଙ୍କ ସହ କିଛି ସମୟ ହୋଲି ଖେଳିବା ସହ କରୋନା ଭାଇରସ ସମ୍ପର୍କେରେ ମଧ୍ୟ ସଚେତନ କରାଇଥିଲେ ।

ରାସାୟନିକ ରଙ୍ଗ ପରିବର୍ତ୍ତେ ଜୈବିକ କିମ୍ବା ଫୁଲରେ ହୋଲି ଖେଳିବା ପାଇଁ ସେମାନେ ପରାମର୍ଶ ଦେଇଥିଲେ ।

ଯୁକ୍ତାମୁଖୀ ଚାରିଟେବଲ ଟ୍ରଷ୍ଟର ଅଧ୍ୟକ୍ଷା ଶ୍ରୀୟାସ୍ମିତା ପଣ୍ଡାଙ୍କ ସଭାପତିତ୍ୱରେ ଆୟୋଜିତ ଏହି ନିଆରା କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟେରେ କଂଗ୍ରେସ ନେତା ଶୁଭେନ୍ଦୁ ମହାନ୍ତି, ରଶ୍ମି ମହାପାତ୍ର, ମିଲି ପଣ୍ଡା, ଦିଲ୍ଲୀପ ପଣ୍ଡା, ସୁବ୍ରମ ମହାପାତ୍ର ପ୍ରମୁଖ ଯୋଗ ଦେଇ ପିଲାମାନଙ୍କୁ ଉତ୍ସାହିତ କରିଥିଲେ ।

ଲୋକାଲ ୱାୟାର

ଭୁବନେଶ୍ୱର, ମାର୍ଚ୍ଚ ୫(ଲୋକାଲ ୱାୟାର): ସତ୍ୟ, ଧର୍ମ ଓ ଆଇନକୁ ଭଲ ପାଉଥିବା ଲୋକମାନେ ଅତୀତରେ ବଳିଦାନ ଦେଇଛନ୍ତି ବୋଲି ଶିକ୍ଷା ଓ ଅନୁସନ୍ଧାନ(ସୋଆ ଡିମଡ୍ ଟୁ ବି ୟୁନିଭର୍ସିଟି) ପକ୍ଷରୁ ଗୁରୁବାର ଅନୁଷ୍ଠିତ ଷଷ୍ଠ ସର୍ବଭାରତୀୟ ଲ’ ସ୍କୁଲ ମିଟ୍ ‘ଲିଗାଲ୍ ସ୍ପେକ୍ଟ୍ରା ୨୦୨୦’ର ଉଦଘାଟନୀ ସମାରୋହରେ ଯୋଗ ଦେଇ କହିଛନ୍ତି ରାଜ୍ୟପାଳ ପ୍ରଫେସର ଗଣେଶୀ ଲାଲ ।

ରାଜ୍ୟପାଳ କହିଥିଲେ, ଯେଉଁ ସମୟରେ ଯିଏ ସତ୍ୟ, ଧର୍ମ ଓ କାନୁନକୁ ଭଲ ପାଉଥିଲେ ସେମାନଙ୍କୁ ବଳିଦାନ ଦେବାକୁ ପଡ଼ଛି ।

ସକ୍ରେଟିସ୍‌, ଗାନ୍ଧୀ, ଯୀଶୁ ସମସ୍ତଙ୍କୁ ସତ୍ୟ ଓ ନ୍ୟାୟ ପାଇଁ ଦଣ୍ଡିତ ହେବାକୁ ପଡ଼ଛି ।

ହାଇକୋର୍ଟ ବାର୍ ଆସୋସିଏସନ ସଭାପତି ଗୋପାଳକୃଷ୍ଣ ମହାନ୍ତି ଅତିଥି ଭାବେ ଯୋଗ ଦେଇ କହିଥିଲେ, ଆଇନ ଛାତ୍ରମାନେ କେବଳ ଆଇନଜୀବୀ ଭାବେ ନୁହଁ ନୀତି ନିର୍ଦ୍ଧାରକ ତଥା ପ୍ରଶାସକ ଭାବେ ମଧ୍ୟ ଦାୟିତ୍ୱ ନିର୍ବାହ କରୁଛନ୍ତି ।

ଓଡ଼ିଶାର ଆଡଭୋକେଟ୍ ଜେନେରାଲ୍ ଅଶୋକ କୁମାର ପରିଜା କହିଥିଲେ, ଆଇନ ଶିକ୍ଷାର ଗୁଣାତ୍ମକ ମାନ ବୃଦ୍ଧି ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବିଷୟ ।

ସୋଆ ଭାରପ୍ରାପ୍ତ କୁଳପତି ପ୍ରଫେସର ସୁଦାମ ଚନ୍ଦ୍ର ସିଙ୍କ ଅଧ୍ୟକ୍ଷତାରେ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।

ଚାରି ଦିନ ଧରି ହେବାକୁ ଥିବା ଏହି ‘ଲିଗାଲ୍ ସ୍ପେକ୍ଟ୍ରା ୨୦୨୦’ରେ ପ୍ରଫେସର ପି.କେ ପଟ୍ଟନାୟକ ଓ ସୋଆ ନ୍ୟାସନାଲ୍ ଇନଷ୍ଟିଚ୍ୟୁଟ୍ ଅଫ୍ ଲ’ର ଡିନ୍ ପ୍ରଫେସର ଏସ୍ କେ ଆଜାଦ ମଧ୍ୟ ଉପସ୍ଥିତ ଥିଲେ ।

ଲୋକାଲ ୱାୟାର