କେନ୍ଦୁଝର

କେନ୍ଦୁଝର, ନଭେମ୍ବର ୧୬(ଲୋକାଲ ୱାୟାର): କେନ୍ଦୁଝର ଜିଲ୍ଲା ଯୋଡ଼ା ବ୍ଲକ ଅନ୍ତର୍ଗତ ବେଲଦା ଉଚ୍ଚ ପ୍ରାଥମିକ ବିଦ୍ୟାଳୟରେ ପ୍ରଧାନଶିକ୍ଷକଙ୍କ ବ୍ୟବହାରରେ ଅତିଷ୍ଠ ହୋଇ ୧୫ ଜଣ ଛାତ୍ରୀ ହଷ୍ଟେଲ ଛାଡ଼ି ଅନ୍ୟତ୍ର ଆଶ୍ରୟ ନେଇଥିବା ଅଭିଯୋଗ ହୋଇଛି ।

ହଷ୍ଟେଲ ନିକଟରେ ରହୁଥିବା ଜଣେ ଅଭିଭାବକଙ୍କ ଘରେ ଗତକାଲି ରାତିରେ ଆଶ୍ରୟ ନେଇଥିବା ଏହି ଛାତ୍ରୀମାନେ ସ୍କୁଲର ପ୍ରଧାନଶିକ୍ଷକ ବାଣେଶ୍ୱର ପାତ୍ରଙ୍କ ବିରୋଧରେ ଗଣମାଧ୍ୟମ ନିକଟରେ ଅଭିଯୋଗ କରିଛନ୍ତି ।

ପ୍ରଧାନଶିକ୍ଷକ ସେମାନଙ୍କୁ ବିଭିନ୍ନ କାମରେ ନିୟୋଜିତ କରିବା ସହ ନିର୍ଯାତନା ଦେଉଥିବା ଛାତ୍ରୀମାନେ କହିଛନ୍ତି । ଏପରିକି ସେ ନିଶାଗ୍ରସ୍ତ ଅବସ୍ଥାରେ ଛାତ୍ରୀମାନଙ୍କୁ ଖରାପ ମନ୍ତବ୍ୟ ଦେଉଥିବା ମଧ୍ୟ ଅଭିଯୋଗ ହୋଇଛି ।

ଘଟଣା ସମ୍ପର୍କରେ ଅବଗତ ହେବା ପରେ ସ୍ଥାନୀୟ ପୁଲିସ ପ୍ରଧାନଶିକ୍ଷକଙ୍କୁ ଅଟକ ରଖିଛି । ଅପରପକ୍ଷରେ ଏ ସମ୍ପର୍କରେ ଜାଣିବା ପରେ ପ୍ରଧାନଶିକ୍ଷକଙ୍କୁ ନିଲମ୍ବିତ କରାଯାଇଥିବା ଜିଲ୍ଲା ଶିକ୍ଷାଧିକାରୀ ସୂଚନା ଦେଇଛନ୍ତି ।

ଲୋକାଲ ୱାୟାର

କେନ୍ଦୁଝର, ନଭେମ୍ବର ୧୨ (ଲୋକାଲ ୱାୟାର): ପୁରୁଣା ସହର ୨୦ ନମ୍ବର ଜାତୀୟ ରାଜପଥ ବାଇପାସ ଶିରିଷପାଳ ଗାଁ ନିକଟରେ ଗାଡି ଯାଞ୍ଚ କରୁଥିବା ସମୟରେ ଟ୍ରକ୍ ଚାପାରେ ଜଣେ ଆର୍.ଟି.ଓ. କର୍ମଚାରୀଙ୍କ ମଙ୍ଗଳବାର ମୃତ୍ୟୁ ଘଟିଥିବା ସୂଚନା ମିଳିଛି।

ମୃତକ ବିଜୟ ମହାନ୍ତ ଆର୍.ଟି.ଓ. ଅଫିସର ଡ୍ରାଇଭର୍ ଥିଲେ।

ସୂଚନା ଅନୁସାରେ, ଜୁନିୟର ଏମ୍.ଭି.ଆଇ କାହ୍ନୁଚରଣ ବାନରାଙ୍କ ସହ ବିଜୟ ଗାଡ଼ି ଯାଞ୍ଚ କରୁଥିବାବେଳେ ବଡ଼ବିଲ ପଟୁ ଆସୁଥିବା ଏକ ଟ୍ରକକୁ ଅଟକାଇଥିଲେ।

ତେବେ ଟ୍ରକ ଚାଳକ ଗାଡ଼ି ନଅଟକାଇ ତାଙ୍କ ଉପରେ ଟ୍ରକ୍ ଚଢ଼ାଇଦେଇଥିବା ଜୁନିୟର ଏମ୍.ଭି.ଆଇ. କହିଛନ୍ତି ।

ବିଜୟଙ୍କ ମୃତଦେହ ଜିଲ୍ଲା ମୁଖ୍ୟ ଡାକ୍ତରଖାନାକୁ ଅଣାଯାଇଥିବା ବେଳେ ପୁଲିସ ଶବ ତଦନ୍ତ ଆରମ୍ଭ କରିଛି।

ତେବେ ଡ୍ରାଇଭରଙ୍କ ସହ ଜଣେ ଅଧିକାରୀ କିପରି ଗାଡ଼ି ଯାଞ୍ଚ କରୁଥିଲେ, ତାହା ଚର୍ଚ୍ଚାର ବିଷୟ ହୋଇଛି।

ଲୋକାଲ ୱାୟାର

କେନ୍ଦୁଝର, ନଭେମ୍ବର ୧୧ (ଲୋକାଲ ୱାୟାର): ପର୍ଯ୍ୟଟନ ଋତୁ ଆସିଲେ ସମସ୍ତଙ୍କର ମନେପଡ଼େ କେନ୍ଦୁଝର ଜିଲ୍ଲା।

ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ଏହି ଜିଲ୍ଲାରେ ଅନେକ ପର୍ଯ୍ୟଟନସ୍ଥଳୀ ଥିବାବେଳେ ଏଠାରେ ରହିଥିବା ଡ୍ୟାମଗୁଡ଼ିକର ଅବସ୍ଥିତି ବି କମ୍ ମନୋରମ ନୁହେଁ।

ଜିଲ୍ଲାରେ ଡ୍ୟାମ୍ ପର୍ଯ୍ୟଟନ କେନ୍ଦ୍ର ଭାବରେ ସାନମାଛକାନ୍ଦଣା ଡ୍ୟାମର ବଡ ଘାଗରା ଜଳପ୍ରପାତ, କାନଝରୀ ଓ ହଦଗଡ଼ ଡ୍ୟାମ୍ ଆଦିରେ ପର୍ଯ୍ୟଟକଙ୍କ ଭିଡ ଜମିଥାଏ ।

ଏହାବାଦ୍ ଜିଲ୍ଲାରେ ରହିଛି ରେମାଳ, ଜଗଦଳା, ସାପେଇ, ଅରଡେଇ ଆଦି ଆହୁରି ଅନେକ ଛୋଟବଡ ଡ୍ୟାମ, ଯାହାକି ପର୍ଯ୍ୟଟନସ୍ଥଳୀର ମାନ୍ୟତା ପାଇନଥିଲେ ମଧ୍ୟ ପର୍ଯ୍ୟଟକଙ୍କ ପାଇଁ କମ୍ ଆକର୍ଷଣୀୟ ନୁହେଁ।

ବଣପାହାଡ ଘେରା ଅଂଚଳରେ ଏସବୁ ରହିଥିବାରୁ ଏଠାରେ ବୋଟିଂ, ଆଲୋକ ବ୍ୟବସ୍ଥା ସାଂଗକୁ ରହିବା ଓ ଖାଦ୍ୟ ପାନୀୟ ବ୍ୟବସ୍ଥା କରାଗଲେ ଆହୁରି ପର୍ଯ୍ୟଟକ ଆସିପାରନ୍ତେ।

ତାହେଲେ ଆସନ୍ତୁ କେନ୍ଦୁଝର ଜିଲ୍ଲାର ଡ୍ୟାମ୍ ପର୍ଯ୍ୟଟନ ଉପରେ ଏକ ନଜର ପକାଇବା-

ସାନମାଛକାନ୍ଦଣା ଡ୍ୟାମ (ବଡ଼ଘାଗରା)

ରାଜାରାଜୁଡା ଅମଳରୁ କେନ୍ଦୁଝରଗଡକୁ ଜଳ ଯୋଗାଣ ପାଇଁ ସାନମାଛକାନ୍ଦଣା ନାଳ ଉପରେ ଏହି ଡ୍ୟାମ ନିର୍ମାଣ ହୋଇଥିଲା।

ଡ୍ୟାମ ପାଣି ଉପରୁ ଖସି ତଳେ ସୃଷ୍ଟି କରୁଥିବା ଜଳପ୍ରପାତ ବଡଘାଗରା ଜଳପ୍ରପାତ ଭାବେ ଜଣାଶୁଣା ।

ବଡଘାଗରା ଜଳପ୍ରପାତ ନିକଟରେ ରହିଛି ଏକ ମନ୍ଦିର ଓ ବିଦ୍ୟୁତ ଉତ୍ପାଦନ କେନ୍ଦ୍ର, ଯେଉଁଥିରୁ ଆଗରୁ ଦୈନିକ ପ୍ରାୟ ୧୦ କିଲୋଓ୍ବାଟ ବିଦ୍ୟୁତ ଉତ୍ପାଦନ ହେଉଥିଲା।

ଡ୍ୟାମ୍ ଜଳକୁ ପାଇପ ଦ୍ୱାରା ଉପରୁ ତଳକୁ ଅଣାଯାଇ ଏହାଦ୍ୱାରା ଟର୍ବାଇନ ଚଳାଇ ବିଦ୍ୟୁତ ଉତ୍ପାଦନ କରାଯାଉଥିବା ବେଳେ କିଛି ବର୍ଷ ହେଲା ଏହା ବନ୍ଦ ରହିଛି ।

ପାହାଡ ଓ ଜଙ୍ଗଲ ପରିବେଷ୍ଟିତ ଏହି ରମଣୀୟ ସ୍ଥାନଟି କେନ୍ଦୁଝର ସହରରୁ ପ୍ରାୟ ୧୦ କିଲୋମିଟର ଦୂରରେ ରହିଛି ।

୪୯ ନମ୍ବର ଜାତୀୟ ରାଜପଥରେ ସମ୍ବଲପୁର ରାସ୍ତାରେ ଗଲେ ୬ କିଲୋମିଟର ଦୂରରେ ଥିବା ଅଞ୍ଜର ଗାଁରୁ ୪ କିଲୋମିଟର ଜଙ୍ଗଲ ରାସ୍ତାରେ ଗଲେ ଏହି ଡ୍ୟାମ ଓ ବଡଘାଗରା ଜଳପ୍ରପାତ ଦେଖିବାକୁ ମିଳେ ।

ଏହି ଜଳ ତଳକୁ ପ୍ରବାହିତ ହୋଇ ଏକ କିଲୋମିଟର ଦୂରରେ ଆଉ ଏକ ଜଳପ୍ରପାତ ସୃଷ୍ଟି କରିଛି, ଯାହା ସାନଘାଗରା ଜଳପ୍ରପାତ ଭାବେ ପରିଚିତ।

୧୯୭୮ ମସିହାରେ ପ୍ରତିଷ୍ଠିତ ଏହି ଡ୍ୟାମ୍ ଦେଖିବାକୁ ଓ ଏହି ଅଂଚଳରେ ବୁଲିବାକୁ ପର୍ଯ୍ୟଟକ ଆସିଥାନ୍ତି ।

କାନଝରୀ ଡ୍ୟାମ

ଜଙ୍ଗଲ ଓ ପାହାଡ ପରିବେଷ୍ଟିତ ଏହି ବୃହତ ଡ୍ୟାମ୍ ଦେଖିବାକୁ ଓ ଭୋଜିଭାତ କରିବାକୁ ବର୍ଷ ତମାମ ପର୍ଯ୍ୟଟକଙ୍କ ଭିଡ ଲାଗିଥାଏ ।

ଶାନ୍ତ ପରିବେଶ ସାଂଗକୁ ଏଠାରେ ଥିବା ଫୁଲ ବଗିଚା, ବିଶାଳକାୟ ଜଳଭଣ୍ଡାର ଓ ଏଠାରେ ଡଙ୍ଗାରେ ମାଛ ମାରିବା ଦୃଶ୍ୟ ପର୍ଯ୍ୟଟକଙ୍କୁ ଆକୃଷ୍ଟ କରିଥାଏ ।

୧୯୮୭ ମସିହାରେ ପ୍ରତିଷ୍ଠିତ ଏହି ବିସ୍ତୀର୍ଣ୍ଣ ଜଳଭଣ୍ଡାରଟି ଏକ ହ୍ରଦ ଭଳି ଦେଖାଯାଇଥାଏ ।

ଡ୍ୟାମର ଅପରପାର୍ଶ୍ୱରେ ଭୋଜିଭାତ କରିବା ସୁବିଧା ରହିଛି ।

ତେବେ ଜଳଭଣ୍ଡାରଟି ଗଭୀର ହୋଇଥିବାରୁ ଏଠାରେ ପାଣି ଭିତରେ ଗାଧୋଇବା ମନା ।

ଏଠାରୁ ପ୍ରାୟ ୩୦ କିଲୋମିଟର ଦୂରରେ ଘଟଗାଁ ମା ତାରିଣୀଙ୍କ ପୀଠ, ୪୦ କିଲୋମିଟର ଦୂରରେ ଗୁଣ୍ଡିଚାଘାଗି ଜଳପ୍ରପାତ, ୨୫ କିଲୋମିଟର ଦୂରରେ ପୌରାଣିକ ସୀତାବିଞ୍ଜ ପର୍ଯ୍ୟଟନ କେନ୍ଦ୍ର ରହିଛି।

ସେହିପରି ଜିଲ୍ଲା ମୁଖ୍ୟା କାର୍ଯ୍ୟାଳୟଠାରୁ ଏହାର ଦୂରତା ପ୍ରାୟ ୨୦ କିଲୋମିଟର।

କେନ୍ଦୁଝର ସହରରୁ ୨୧୫ ନମ୍ବର ଜାତୀୟ ରାଜପଥରେ ଘଟଗାଁ ଯିବା ବାଟରେ ଗୋପାଳପୁର ନିକଟରୁ ୫ କିଲୋମିଟର ଦୂରରେ ରହିଛି କାନଝରୀ ଡ୍ୟାମ୍ ।

ହଦଗଡ଼ ଡ୍ୟାମ୍

କେନ୍ଦୁଝର ଜିଲ୍ଲାର ହାଟଡିହି ବ୍ଲକ ଶାଳନ୍ଦୀ ନଦୀ ଉପରେ ଥିବା ହଦଗଡ ଡ୍ୟାମ ପର୍ଯ୍ୟଟନସ୍ଥଳୀର ମାନ୍ୟତା ପାଇଥିବା ବେଳେ ଏଠାକୁ ବର୍ଷ ତମାମ ପର୍ଯ୍ୟଟକ ଆସିଥାନ୍ତି।

ଜଳଭଣ୍ଡାରର ମନୋରମ ଦୃଶ୍ୟ ବୁଲି ଦେଖିବା ସହ ଭୋଜିଭାତ କରିବାକୁ ଏଠାରେ ପ୍ରଶସ୍ତ ସ୍ଥାନ ରହିଛି ।

କେନ୍ଦୁଝର ଜିଲା ମୁଖ୍ୟାଳୟଠାରୁ ପ୍ରାୟ ୧୨୦ କିଲୋମିଟର, ଆନନ୍ଦପୁରଠାରୁ ୩୫ କିଲୋମିଟର ଏବଂ ଭଦ୍ରକଠାରୁ ୪୦ କିଲୋମିଟର ଦୂରରେ ରହିଛି ଏହି ରମଣୀୟ ସ୍ଥାନ ।

ଏଠାରେ ମଧ୍ୟ ହଦଗଡ ହସ୍ତୀ ସଂରକ୍ଷଣ ପ୍ରକଳ୍ପ ରହିଥିବା ବେଳେ ଜଙ୍ଗଲ ଓ ପାହାଡ଼ ଘେରରେ ଏହି ଡ୍ୟାମଟି ରହିଛି ।

ଜଳାଶୟ ମଧ୍ୟରେ ଏକ ଟାପୁ ଜଳଭଣ୍ଡାରର ଦୃଶ୍ୟକୁ ଅଧିକ ରୋମାଂଚକର କରିଥାଏ ।

ସେହିପରି ଏହି ଡ୍ୟାମ୍ ନିକଟରେ ରହିଛି ପୁରାତନ ଗଡଚଣ୍ଡି ମନ୍ଦିର ଏବଂ ଚକ୍ରତୀର୍ଥ।

ଏହି ସ୍ଥାନଟି ହାତୀ ତଥା ଅନ୍ୟ ବନ୍ୟଜନ୍ତୁ ଚଳପ୍ରଚଳ କରୁଥିବା ଅଂଚଳ ହୋଇଥିବାରୁ ରାତିରେ ଯିବା ସୁରକ୍ଷିତ ନୁହେଁ ।

ରେମାଳ ଡ୍ୟାମ୍

ଯାଜପୁର ଜିଲ୍ଲା ଡୁବୁରିରୁ ବ୍ରାହ୍ମଣୀପାଳ ଓ ହରିଚନ୍ଦନପୁର ଦେଇ ନରଣପୁର (କେନ୍ଦୁଝର) ଯିବା ରାସ୍ତାରେ ରେମାଳ ଡ୍ୟାମ୍ ପଡେ ।

ପର୍ଯ୍ୟଟକ ମାନେ ଏହି ସ୍ଥାନରେ ଜଳଭଣ୍ଡାରର ଦୃଶ୍ୟ ଉପଭୋଗ କରିବା ସହ ଭୋଜିଭାତ କରିଥାନ୍ତି।

୧୯୮୪ ମସିହାରେ ପ୍ରତିଷ୍ଠିତ ରେମାଳ ଡ୍ୟାମ ଠାରୁ ପ୍ରାୟ ୩୫ କିଲୋମିଟର ଦୂରରେ ରହିଛି ହରିଚନ୍ଦନପୁର ଓ ଘଟଗାଁ ବ୍ଲକ ସୀମାରେ ଥିବା ଗୁଣ୍ଡିଚାଘାଗୀ ଜଳପ୍ରପାତ ଓ ୪୦ କିଲୋମିଟର ଦୂରରେ ରହିଛି ଘଟଗାଁ ମା ତାରିଣୀ ପୀଠ ।

ଲୋକାଲ ୱାୟାର

କେନ୍ଦୁଝର, ନଭେମ୍ବର ୬ (ଲୋକାଲ ୱାୟାର) କେନ୍ଦୁଝର ଜିଲ୍ଲା ଘଟଗାଁ ବ୍ଲକ ୨୦ ନମ୍ବର ଜାତୀୟ ରାଜପଥ କଡରେ ଥିବା ଟେରାକୋଟା ଗ୍ରାମ ହଳଧରପୁରକୁ କ୍ରାଫ୍ଟଗ୍ରାମ ଭାବରେ ବିକଶିତ କରିବା ପାଇଁ ସରକାର ନିଷ୍ପତ୍ତି ନେଇଥିବା ବୁଧବାର ଜିଲ୍ଲା ପର୍ଯ୍ୟଟନ ଅଧିକାରୀ ରମେଶ ଚନ୍ଦ୍ର ନାୟକ କହିଛନ୍ତି ।

ଏକ କମିଟି ବୁଧବାର ଉକ୍ତ ଅଂଚଳ ଯାଇ ଅନୁଧ୍ୟାନ କରିବା ପରେ ଶ୍ରୀ ନାୟକ ଏହା କହିଛନ୍ତି।

ଅଞ୍ଚଳ ପରିଦର୍ଶନ କରିଥିବା କମିଟି ର ସଦସ୍ୟ ମାନେ ହ୍ୟାଣ୍ଡଲୁମ, ଟେକ୍ସଟାଇଲ ଓ ହ୍ୟାଣ୍ଡିକ୍ରାଫ୍ଟ ବିଭାଗ ର ଯୁଗ୍ମ ସଚୀବ ବି.କେ.ପତି ଓ ହସ୍ତକଳା ଓ କୁଟୀରଶିଳ୍ପ ନିର୍ଦ୍ଦେଶାଳୟର ସ୍ୱତନ୍ତ୍ର ଅଧିକାରୀ ସନାତନ ନାୟକ ।

ଠିକ ସେହି ପରି ବାଟହରିଚନ୍ଦନପୁର ଠାରେ ପର୍ଯ୍ୟଟକ ମାନଙ୍କ ପାଇଁ ଏକ କ୍ରାଫ୍ଟ ଟୁରିଜିମ ସେଂଟର ପ୍ରତିଷ୍ଠା କରାଯିବା ପାଇଁ ନିଷ୍ପତ୍ତି ହୋଇଥିବା ସେ କହିଛନ୍ତି।

ଏଥିପାଇଁ ପାଖାପାଖି ୧ ଏକର ଜମି ଚିହ୍ନଟ କରାଯାଇଥିବା ବେଳେ ଭିତ୍ତିଭୂମିର ବିକାଶ କରିବା ପାଇଁ ୧ କୋଟି ଟଙ୍କା ବ୍ୟୟ ଅଟାକଳ କରାଯାଇଛି।

ଜିଲ୍ଲା ବାହରୁ ଆସୁଥିବା ପର୍ଯ୍ୟଟକଙ୍କୁ ଟେରାକୋଟା ସାମଗ୍ରୀ ବିଷୟରେ ଅବଗତ କରିବା ପାଇଁ ଏହି କେନ୍ଦ୍ର ପ୍ରତିଷ୍ଠା କରାଯାଉଛି।

ଏଠାରେ ପର୍ଯ୍ୟଟକ ମାନଙ୍କ ସୁବିଧା ପାଇଁ ବିଶ୍ରାମ ଗୃହ ତଥା ଖାଦ୍ୟ ପାନୀୟ ଆଦିର ବ୍ୟବସ୍ଥା କରାଯିବ ।

ସେହିପରି ଟେରାକୋଟା ସାମଗ୍ରୀ ର ପ୍ରଦର୍ଶନ ପାଇଁ ସେଠାରେ ଟ୍ରେନିଂ କମ ଡିସପ୍ଲେ ସେଂଟର ପ୍ରତିଷ୍ଠା କରାଯିବ । ସେଠାରେ ଟରୋକୋଟା ସାମଗ୍ରୀ ବିକ୍ରି ବ୍ୟବସ୍ଥା ରହିବ ।

ସରକାର ଟୁରିଷ୍ଟ ଗାଇଡ ନିଯୁକ୍ତ କରିବେ।

ସେମାନେ ପର୍ଯ୍ୟଟକ ଙ୍କୁ କଳାଗ୍ରାମ ବୁଲାଇଦେଖାଇବେ ।

ଏହା ଛଡା ଆଖପାଖରେ ଥିବା ପର୍ଯ୍ୟଟନ କେନ୍ଦ୍ର ସମ୍ବନ୍ଧରେ ଅବଗତ କରାଇବା ସହ ସହାୟତା କରିବେ ।

ଜିଲ୍ଲାରେ ପ୍ରଥମ କରି ଟେରାକୋଟା କାରୁକାର୍ଯ୍ୟ କୁ ପର୍ଯ୍ୟଟନ ର ମାନ୍ୟତା ଦେଇ ଅଧିକ ଆକର୍ଷଣୀୟ କରିବା ପାଇଁ ସରକାର ପଦକ୍ଷେପ ନେଇଛନ୍ତି।

ଲୋକାଲ ୱାୟାର

କେନ୍ଦୁଝର, ନଭେମ୍ବର ୬ (ଲୋକାଲ ୱାୟାର): ଭୁବନେଶ୍ବର ଶାରୀରିକ ତାଲିମ କେନ୍ଦ୍ରର ଜଣେ ଛାତ୍ର ଅଢ଼େଇ ଶହ କିଲୋମିଟର ବାଟ ଆସି ଥାଲାସେମିଆ ଆକ୍ରାନ୍ତ ଜଣେ ପାଞ୍ଚବର୍ଷର ଶିଶୁକୁ ବିରଳ ଓ-ପଜିଟିଭ୍ ଗ୍ରୁପର ରକ୍ତଦାନ କରିଛନ୍ତି। ରକ୍ତଦାତା ଛାତ୍ରଙ୍କ ନାଁ ଶୁଭାଶିଷ ପ୍ରଧାନ।

ରାଜ୍ୟର ବିଭିନ୍ନ ଡାକ୍ତରଖାନାକୁ ଯାଇ ଏଯାବତ୍ ଆଠ ଥର ରକ୍ତଦାନ କରିସାରିଥିବା ଶୁଭାଶିଷ କହିଛନ୍ତି ଯେ, ଓ-ପଜିଟିଭ୍ ଗ୍ରୁପର ରକ୍ତ ମିଳିବା କଷ୍ଟକର। ତେବେ ସେ ଫୋନ୍ କଲ୍ ପାଇଲେ ଡାକ୍ତରଖାନା ଯାଇ ରକ୍ତଦାନ କରିବାକୁ ପଛାନ୍ତି ନାହିଁ।

ଘଟଗାଁର ପାଞ୍ଚ ବର୍ଷର ଶିଶୁ ବାବୁସେନ ମହାନ୍ତଙ୍କୁ ଶୁଭାଶିଷ ରକ୍ତଦାନ କରିଛନ୍ତି।

ଜନ୍ମରୁ ଥାଲାସେମିଆ ଆକ୍ରାନ୍ତ ବାବୁସେନ ପ୍ରତି ମାସ କେନ୍ଦୁଝର ଜିଲ୍ଲା ମୁଖ୍ୟ ଡାକ୍ତରଖାନା ଆସି ରକ୍ତ ନେଉଥିବାବେଳେ ଏଥର ଗତ ରବିବାର ତାଙ୍କୁ ବାପାମା ଡାକ୍ତରଖାନା ଆଣିଥିଲେ ବି ରକ୍ତ ଯୋଗାଡ଼ ହୋଇପାରିନଥିଲା।

କୌଣସି ସୂତ୍ରରୁ ଶୁଭାଶିଷଙ୍କ ଠିକଣା ପାଇ ସେମାନେ ତାଙ୍କୁ ଯୋଗାଯୋଗ କରିବା ପରେ ଶୁଭାଶିଷ ମଙ୍ଗଳବାର ଡାକ୍ତରଖାନା ଆସି ରକ୍ତଦାନ କରିଥିଲେ।

କମ୍ ବୟସରେ ଶୁଭାଶିଷଙ୍କ ଏହି ମହାନତା ତାଙ୍କୁ ପ୍ରଶଂସାର ପାତ୍ର କରିଛି।

ସେପଟେ ରକ୍ତ ଭଣ୍ଡାରରେ ରକ୍ତ ମହଜୁଦ ନଥିବାରୁ ରୋଗୀମାନେ ବହୁ ହଇରାଣ ହରକତ ହେବା ସହ ବାଧ୍ୟହୋଇ ବାହାରୁ ରକ୍ତ କିଣୁଥିବା ସ୍ବେଚ୍ଛାସେବୀ ମଗନ ମଲ୍ଲିକ କହିଛନ୍ତି।

ଏ କ୍ଷେତ୍ରରେ ସ୍ବାସ୍ଥ୍ୟ ବିଭାଗ ପଦକ୍ଷେପ ନେବାକୁ ସେ ଦାବି କରିଛନ୍ତି।

ତେଣେ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡାକ୍ତର ଅଶୋକ କୁମାର ଦାସ କହିଛନ୍ତି ଯେ, ସମସ୍ୟାର ସମାଧାନ ଲାଗି ଆଗାମୀ ଦିନରେ ଅଧିକରୁ ଅଧିକ ରକ୍ତଦାନ ଶିବିରର ଆୟୋଜନ କରିବାକୁ ନିଷ୍ପତ୍ତି ହୋଇଛି।

ଲୋକାଲ ୱାୟାର

କେନ୍ଦୁଝର, ନଭେମ୍ବର ୫ (ଲୋକାଲ୍ ଓ୍ବାୟାର୍): ରକ୍ଷଣାବେକ୍ଷଣ ଅଭାବରୁ ବିଶ୍ବର ସବୁଠାରୁ ଉଚ୍ଚ ପ୍ରଭୁ ବଳଦେବଜୀଉଙ୍କ ରଥ ମନ୍ଦିର ଆଗରେ ପଡ଼ିରହିଥିବାରୁ ଏହାକୁ ନେଇ ବିଭିନ୍ନ ମହଲରେ ଅସନ୍ତୋଷ ଦେଖାଦେଇଛି।

୨୦୧୮ ଡିସେମ୍ବରରେ କେନ୍ଦୁଝର ରଥ ଭାବେ ପରିଚିତ ଶ୍ରୀବଳଦେବଜୀଉଙ୍କ ୭୨ ଫୁଟ ଉଚ୍ଚତାର ଏହି ରଥକୁ ଗ୍ଲୋବାଲ୍ ରେକର୍ଡସ୍ ଆଣ୍ଡ ରିସର୍ଚ୍ଚ ଫାଉଣ୍ଡେସନ୍ ବିଶ୍ବର ଉଚ୍ଚତମ ରଥର ମାନ୍ୟତା ଦେଇଥିଲା, ଯାହା ପୁରୀର ଶ୍ରୀଜଗନ୍ନାଥ ମନ୍ଦିରର ରଥଗୁଡ଼ିକଠାରୁ ମଧ୍ୟ ଡେଙ୍ଗା।

ତେବେ ଦୁଃଖର କଥା ହେଉଛି, ଏହି ରଥଯାତ୍ରା ସରିଯିବା ପରେ ଏହି ରଥର ସଂରକ୍ଷଣ କଥା ସମସ୍ତେ ଭୁଲିଯାଉଥିବାରୁ ଏହା ଖରାବର୍ଷାରେ ପଡ଼ିରହିଛି।

ଖୋଲା ଜାଗାରେ ବିନା ସୁରକ୍ଷା ଓ ସଂରକ୍ଷଣରେ ରେକର୍ଡଧାରୀ ଏହି ରଥ ପଡ଼ିରହିଥିବାରୁ ଏହାର ସୌନ୍ଦର୍ଯ୍ୟ ହାନି ଘଟୁଥିବା ସ୍ଥାନୀୟ ଶ୍ରଦ୍ଧାଳୁ ତଥା ବୁଦ୍ଧିଜୀବୀ ନିମାଇଁ ଚରଣ ଦାସ କହିଛନ୍ତି।

ପୁରୁଣା କେନ୍ଦୁଝରର ଖୋଲା ଜାଗାରେ ରଥଟି ରଖାଯାଇଥିବାରୁ ସହରର ଆଖପାଖ ଅଞ୍ଚଳରୁ ପ୍ରତିଦିନ ଆସୁଥିବା ଉଠା ଦୋକାନୀମାନେ ଏହାର ଚାରିପଟେ ବସି ବିକ୍ରିବଟା କରୁଛନ୍ତି।

ସେହିପରି ଏହା ବୁଲା କୁକୁର ଓ ଗାଈଙ୍କର ଆଶ୍ରୟସ୍ଥଳୀ ପାଲଟିଛି।

ପ୍ରତିବର୍ଷ ରଥଯାତ୍ରା ଆସିଲେ ଏହାକୁ ଖୋଜାହୁଏ ଏବେ ବର୍ଷସାରା ଅପଚରା ହୋଇ ପଡ଼ିରହିଥାଏ।

ତେଣୁ ଯଦି ଏହାକୁ ସୁରକ୍ଷିତ ରଖାଯାନ୍ତା, ତେବେ ପରବର୍ତ୍ତୀ ରଥଯାତ୍ରା ବେଳେ ଏହାର ମରାମତି ଲାଗି କମ୍ କାଠ ଦରକାର ପଡ଼ନ୍ତା ବୋଲି ପରିବେଶବିତ୍ ରମେଶ ଚନ୍ଦ୍ର ମିଶ୍ର କହିଛନ୍ତି।

ଅନ୍ୟପକ୍ଷରେ ରଥଟି ଜିଲ୍ଲା ପାଇଁ ଗୌରବ ଆଣିଦେଇଛି, ତେଣୁ ଏହାର ସୁରକ୍ଷା ଜିଲ୍ଲା ପ୍ରଶାସନ କରୁ ବୋଲି ସ୍ଥାନୀୟ ବୁଦ୍ଧିଜୀବୀ ଅଲେଖ ଚନ୍ଦ୍ର ପାତ୍ର ଦାବି କରିଛନ୍ତି।

ପ୍ରତିଦିନ ଶ୍ରୀବଳଦେବଜୀଉଙ୍କ ଦର୍ଶନ ଲାଗି ଦୂରଦୂରାନ୍ତରୁ ଆସୁଥିବା ଶ୍ରଦ୍ଧାଳୁଙ୍କ ପାଇଁ ଏହି ରଥ ହେଉଛି ଅନ୍ୟତମ ଆକର୍ଷଣ।

ତେଣୁ ଏହାକୁ ବ୍ୟାରିକେଡ୍ କରି ରଖାଯିବାକୁ ମଧ୍ୟ ଶ୍ରଦ୍ଧାଳୁମାନେ ଦାବି ଉଠାଇଛନ୍ତି।

ଅପରପକ୍ଷରେ ରଥର ସଂରକ୍ଷଣ ଲାଗି ପ୍ରଶାସନ ପ୍ରୟାସ କରୁଥିବା ଦେବୋତ୍ତର ଅଧିକାରୀ ତଥା ଉପଜିଲ୍ଲାପାଳ ରାମଚନ୍ଦ୍ର କିସ୍କୁ ସୂଚନା ଦେଇଛନ୍ତି ।

ଲୋକାଲ୍ ଓ୍ବାୟାର୍

କେନ୍ଦୁଝର, ନଭେମ୍ବର ୦୩ (ଲୋକାଲ ୱାୟାର )ପାଟଣା ବ୍ଲକ ଅନ୍ତର୍ଗତ କଣ୍ଟିଆପଡା ପଞ୍ଚାୟତ ମାନପୁର ଗ୍ରାମର ଖମଣ ସାହି ନିକଟ ପୋଖରୀ ହୁଡା ବୁଦାମୂଳରୁ ରବିବାର ସକାଳୁ ଗ୍ରାମବାସୀଙ୍କ ଦ୍ୱାରା ଏକ ନବଜାତ ଶିଶୁପୁତ୍ରକୁ ଉଦ୍ଧାର କରିଥିବା ଗ୍ରାମବାସୀ ସୂଚନା ଦେଇଛନ୍ତି।

ପୋଖରୀକୁ ଶୌଚ ପାଇଁ ଯାଇଥିବା ସମୟରେ ଶିଶୁଟିର କାନ୍ଦ ଶୁଣି ବୁଦାମୂଳକୁ ଯାଇ ଲୋକେ ଶିଶୁ ପୁତ୍ରଟିକୁ ଦେଖି ସ୍ଥାନୀୟ ଆଶାକର୍ମୀ ବଉଳ ମହାନ୍ତଙ୍କୁ ଖବର ଦେଇଥିଲେ।

ଆଶାକର୍ମୀ ଘଟଣା ସ୍ଥଳରେ ପହଞ୍ଚି ଶିଶୁ ପୁତ୍ରଟିକୁ ଗ୍ରାମବାସୀଙ୍କ ଉପସ୍ଥିତିରେ ଉଦ୍ଧାର କରି ୧୦୮ ଆମ୍ବୁଲାନ୍ସକୁ ଖବର ଦେଇଥିଲେ। ଉଦ୍ଧାର ଶିଶୁପୁତ୍ରଟିକୁ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି।

ନବଜାତ ଶିଶୁଟିର ଓଜନ ୨ କେଜି ୪୦୦ ଗ୍ରାମ ଥିବାବେଳେ ଶିଶୁଟି ସୁସ୍ଥ ଥିବା ଓ ସାମାନ୍ୟ ଥଣ୍ଡାରେ ପୀଡିତ ଥିବା ଜଣାପଡିଛି।

ଲଜ୍ୟାକୁ ଡରି କେହି ଜନ୍ମଦାତ୍ରୀ ମା ଶିଶୁଟିକୁ ବୁଦା ମୂଳେ ଛାଡି ପଳାଇଥିବା ଲୋକଙ୍କ ମଧ୍ୟରେ ଚର୍ଚ୍ଚା ବିଷୟ ହୋଉଛି।

ଶିଶୁଟିର ଉଦ୍ଧାର ଖବର ଜଣାପଡିବା ପରେ ଜିଲ୍ଲା ଶିଶୁ ମଙ୍ଗଳ କମିଟି ମଧ୍ୟ ଘଟଣା ଉପରେ ନଜର ରଖିଛି।

ଲୋକାଲ ୱାୟାର

କେନ୍ଦୁଝର, ନଭେମ୍ବର ୨ (ଲୋକାଲ ୱାୟାର): କେନ୍ଦୁଝର ନଗର ଭବନଠାରେ ଭ୍ରଷ୍ଟାଚାର ଓ ଦୁର୍ନୀତି ହଟାଇବାରେ ସହଯୋଗ କରିବାକୁ ଲୋକାୟୁକ୍ତ ଅଧ୍ୟକ୍ଷ ଜଷ୍ଟିସ ଅଜିତ ସିଂହ ଜନସାଧାରଣଙ୍କୁ ଆହ୍ଵାନ ଦେଇଛନ୍ତି ।

ଜିଲ୍ଲା ଓ ସେସନ୍ସ ଜଜ ବେଣୁଧର ପାତ୍ରଙ୍କ ସଭାପତିତ୍ୱରେ ଆୟୋଜିତ ରାଜ୍ୟ ଲୋକାୟୁକ୍ତ ଆଇନ ୨୦୧୪ ସଂପର୍କିତ ସଚେତନତା କାର୍ଯ୍ୟକ୍ରମରେ ସେ ଠକେଇ ଓ ଦୁର୍ନୀତିର ଶିକାର ନହେବାକୁ ସେ ସମସ୍ତଙ୍କୁ ପରାମର୍ଶ ଦେଇଛନ୍ତି ।

କାର୍ଯ୍ୟକ୍ରମରେ ଓଡିଶା ଲୋକାୟୁକ୍ତ ସଦସ୍ୟ ଜଷ୍ଟିସ ଡକ୍ଟର ଦେଵବ୍ରତ ସ୍ୱାଇଁ, ରାଜେନ୍ଦ୍ର ପ୍ରସାଦ ଶର୍ମା, ଜଷ୍ଟିସ ବି.କେ.ନାୟକ, ଲୋକାୟୁକ୍ତ ସଚିବ ମାନସ ରଞ୍ଜନ ତ୍ରିପାଠୀ, କେନ୍ଦୁଝର ଜିଲ୍ଲାପାଳ ଆଶିଷ ଥାକରେ ଓ ଏସପି ମିତ୍ରଭାନୁ ମହାପାତ୍ର ଯୋଗ ଦେଇଥିଲେ।

ଲୋକାଲ ୱାୟାର