କେନ୍ଦ୍ରାପଡା

କେନ୍ଦ୍ରାପଡ଼ା, ଜାନୁଆରୀ ୨୩(ଲୋକାଲ ୱାୟାର): କେନ୍ଦ୍ରାପଡ଼ା ଜିଲ୍ଲାର ପଟ୍ଟାମୁଣ୍ଡାଇ ଅଞ୍ଚଳରେ ଭୋଜି ଖାଦ୍ୟରୁ ଏକ ମଲା ଚିତି ସାପ ବାହାରିବାରୁ ପ୍ରାୟ ୫୦ ଜଣ ଲୋକ ଆତଙ୍କିତ ହୋଇ ଚିକିତ୍ସିତ ହେବାକୁ ଡାକ୍ତରଖାନାରେ ପହଞ୍ଚିଥିବା ଏବଂ ସମସ୍ତେ ସୁସ୍ଥ ଥିବା ସ୍ଥାନୀୟ ଡାକ୍ତର ଗୁରୁବାର ସୂଚନା ଦେଇଛନ୍ତି ।

ପଟ୍ଟାମୁଣ୍ଡାଇ ବ୍ଲକ ଅଧୀନ ଚନ୍ଦନନଗର ପଞ୍ଚାୟତ ଦେଉଳି ଗ୍ରାମର ମା’ ସଙ୍କଟ ତାରିଣୀ ଠାକୁରାଣୀ ମନ୍ଦିରରେ ଗ୍ରାମ ମହିଳା କମିଟି ପକ୍ଷରୁ ବୁଧବାର ରାତି ଭୋଜି ହୋଇଥିଲା ।

ଗ୍ରାମର ବିଭିନ୍ନ ପରିବାର ଭୋଜି ଖାଦ୍ୟକୁ ଘରକୁ ନେଇ ଖାଇଥିଲେ ।

ତେବେ କମିଟିର ସଦସ୍ୟ ପ୍ରଭାତୀ ରାଣୀ ଦାସ ତାଙ୍କ ଘରକୁ ଭୋଜିରୁ ଯାଇଥିବା ଖାଦ୍ୟ ବାହାର କରିବାରୁ ସେଥିରୁ ଏକ ମଲା ଚିତି ସାପ ପାଇଥିଲେ ।

ଖବର ପ୍ରଚାର ହୋଇଯିବା ପରେ ପ୍ରାୟ ୩୦ ପରିବାରର ୫୦ରୁ ଅଧିକ ଲୋକ ପଟ୍ଟାମୁଣ୍ଡାଇ ଡାକ୍ତରଖାନାରେ ପହଞ୍ଚିଥିଲେ ।

କେହି କେହି ବି ଅସୁସ୍ଥତା ଅନୁଭବ କରୁଥିବା କହିଥିଲେ ।

ସମସ୍ତଙ୍କର ରକ୍ତ ପରୀକ୍ଷା ଏବଂ ଇସିଜି କରାଯିବା ପରେ ସୁସ୍ଥ ଥିବା ଡାକ୍ତର ଚନ୍ଦ୍ରଶେଖର ଦାସ କହିଛନ୍ତି ।

ଲୋକାଲ ୱାୟାର

କେନ୍ଦ୍ରାପଡ଼ା, ଜାନୁଆରୀ ୨୦ (ଲୋକାଲ ୱାୟାର): ଗତବର୍ଷ ଜାନୁଆରୀ ୨ର ମର୍ମନ୍ତୁଦ ଡଙ୍ଗାବୁଡ଼ି ଘଟଣା ପରେ ବି ଏବେ ପ୍ରତିଦିନ ଶହ ଶହ ପର୍ଯ୍ୟଟକ ବିପଜ୍ଜନକ ଭାବେ ଡଙ୍ଗାରେ ବସି ପ୍ରସିଦ୍ଧ ହୁକିଟୋଲା ଦ୍ବୀପ ବୁଲିବାକୁ ଯାଉଛନ୍ତି।

ଗତବର୍ଷ ୨ ଜାନୁଆରୀରେ ହୁକିଟୋଲା ଯିବା ବାଟରେ ଡଙ୍ଗାବୁଡ଼ି ଆଠ ଜଣ ପିଲାଙ୍କ ସମେତ ୧୦ ଜଣ ପ୍ରାଣ ହରାଇଥିଲେ ଏବଂ ଏହା ପରେ କେନ୍ଦ୍ରାପଡ଼ା ଜିଲ୍ଲା ପ୍ରଶାସନ ମାଛମରା ଡଙ୍ଗା ଓ ଅସୁରକ୍ଷିତ ଡଙ୍ଗା ଚଳାଚଳ ନିଷେଧ କରିଥିଲା।

କେବଳ ହୁକିଟୋଲା ନୁହେଁ, ଲାଇଟ୍ ହାଉସ୍, ଅଗରାନାସୀ, ମଦାଲି ସମେତ ଅନ୍ୟ ଦ୍ବୀପକୁ ବୁଲିଯିବା ପାଇଁ ଏସବୁ ଡଙ୍ଗା ଉପରେ କଟକଣା ଲଗାଇଥିଲା।

ତେବେ କେବଳ ନିର୍ଦ୍ଦେଶନାମା ଜାରି କରି ପ୍ରଶାସନ ଚୁପ୍ ରହିଥିବାରୁ ଏବେବି ପୂର୍ବଭଳି ଜୀବନକୁ ପାଣି ଛଡ଼ାଇ ପର୍ଯ୍ୟଟକମାନେ ଦେଶୀ ମାଛମରା ଡଙ୍ଗାରେ ଏସବୁ ପର୍ଯ୍ୟଟନସ୍ଥଳୀକୁ ଯାଉଛନ୍ତି।

ସ୍ଥାନୀୟ ଖରିନାସୀର ମତ୍ସ୍ୟଜୀବୀ ତଥା ଡଙ୍ଗା ମାଲିକ ବିକ୍ରମ ମଣ୍ଡଳ କହିଛନ୍ତି ଯେ, କେବଳ ଅଲିଭରିଡଲେ କଇଁଚଙ୍କ ସୁରକ୍ଷା ଲାଗି ନଭେମ୍ବର ପହିଲାରୁ ୩୧ ମେ ପର୍ଯ୍ୟନ୍ତ ଏହି ଅଂଚଳରେ ମାଛମରା ଉପରେ ଅଙ୍କୁଶ ଲଗାଯାଉଛି, ତେବେ ପର୍ଯ୍ୟଟକମାନେ ସେହି ଆଗଭଳି ବିପଜ୍ଜନକ ଅବସ୍ଥାରେ ସମୁଦ୍ର ଭିତରକୁ ଯାଉଛନ୍ତି।

“ମାଛମରା ବନ୍ଦ ଥିବାରୁ କେତେକ ଡଙ୍ଗାମାଲିକ ରୋଜଗାର ଆଶାରେ ଶୀତଦିନରେ ସେମାନଙ୍କ ଡଙ୍ଗାରେ ପର୍ଯ୍ୟଟକଙ୍କୁ ହୁକିଟୋଲା ଓ ବତୀଘର ବୁଲାଇନେଉଛନ୍ତି,” ବୋଲି କହିଛନ୍ତି ଜମ୍ବୁର ଜଣେ ଡଙ୍ଗା ମାଲିକ ଅର୍ଜୁନ ହାଲଦାର।

ମହାକାଳପଡ଼ା ବ୍ଲକରେ ଥିବା ଶହ ଶହ ବର୍ଷ ପୁରୁଣା ହୁକିଟୋଲା କୋଠା ଓ ବତୀଘର ଦ୍ବୀପରେ ଥିବା ଲାଇଟ ହାଉସ୍ ସବୁବେଳେ ପର୍ଯ୍ୟଟକଙ୍କ ଆକର୍ଷଣ ରହିଆସିଛି।

ତେବେ ସେମାନେ ଏସବୁ ସ୍ଥାନକୁ ଯାଉଥିବା ଡଙ୍ଗା ନିରାପଦ କି ନୁହେଁ, ତାର ତଦାରଖ କରିବାକୁ କେହି ନାହାନ୍ତି।

ଏପରିକି ଅନେକ ସମୟରେ ଅଣକୁଶଳୀ ଡଙ୍ଗାଚାଳକ ଭରସାରେ ସେମାନେ ସମୁଦ୍ର ଭିତରକୁ ଯିବା ପାଇଁ ବାଧ୍ୟ ହେଉଛନ୍ତି।

“ପର୍ଯ୍ୟଟକଙ୍କ ସୁରକ୍ଷା ବିଷୟରେ ଚିନ୍ତା କରିବା ପ୍ରଶାସନର ଦାୟିତ୍ବ”, ବୋଲି କହନ୍ତି କେନ୍ଦ୍ରାପଡ଼ାର ଟୁର୍ ଅପରେଟର୍ ଅମର ଦାସ।

ହୁକିଟୋଲା ଦ୍ବୀପ ବନ ବିଭାଗ ଅଧୀନରେ ଥିବାବେଳେ ସମୁଦ୍ର ଭିତରକୁ ଡଙ୍ଗାରେ ଗଲାବେଳେ ପର୍ଯ୍ୟଟକଙ୍କ ପାଇଁ ଲାଇଫ୍ ଜାକେଟ୍ କେବଳ ନିୟମ ଅନୁସାରେ ବାଧ୍ୟତାମୂଳକ କରାଯାଇଛି। ଏହାକୁ କେହି ମାନୁନାହାନ୍ତି।

ଅପରପକ୍ଷରେ ସମୁଦ୍ର ମଧ୍ୟରେ ଥିବା ହୁକିଟୋଲା ଓ ବତୀଘର ସମେତ ଅନ୍ୟ ଜାଗା ବୁଲେଇନେଉଥିବା ଡଙ୍ଗାମାଲିକମାନଙ୍କୁ ଏନେଇ ସତର୍କ କରାଯାଇଥିବା ମହାକାଳପଡ଼ା ରେଞ୍ଜ ଅଫିସର୍ ସହଜିଚରଣ ବିଶ୍ବାଳ କହିଛନ୍ତି।

ଲୋକାଲ୍ ଓ୍ବାୟାର୍

କେନ୍ଦ୍ରାପଡ଼ା, ଜାନୁଆରୀ ୧୯ (ଲୋକାଲ ୱାୟାର): ଜିଲ୍ଲାର ସମୁଦ୍ରତଟରେ ଥିବା ଜଗତଜୋରା ଗାଁସ୍ଥିତ ମା ଦକ୍ଷିଣକାଳି ମନ୍ଦିରରୁ ଦୁର୍ବୃତ୍ତମାନେ ଦେବୀଙ୍କର ପ୍ରାୟ ପାଞ୍ଚ ଲକ୍ଷ ଟଙ୍କାର ସୁନା ଓ ରୁପା ଅଳଙ୍କାର ଲୁଟିନେଇଥିବା ସୂଚନା ମିଳିଛି।

ଶନିବାର ବିଳମ୍ବିତ ରାତିରେ ଏହି ଘଟଣା ଘଟିଥିବା ମନ୍ଦିରର ପରିଚାଳନା କମିଟି ମୁଖ୍ୟ ଗଗନ ପ୍ରଧାନ ସୂଚନା ଦେଇଛନ୍ତି।

ଦେବୀଙ୍କର ରୁପା ମୁକୁଟ ସାଙ୍ଗକୁ ତିନିଟି ସୁନା ଚେନ୍ ସହ ଅନ୍ୟ ଅଳଙ୍କାର ଓ ହୁଣ୍ଡିରେ ପଡ଼ିଥିବା ଦାନ ଟଙ୍କା ଲୁଟ୍ ହୋଇଥିବା ବେଳେ ପୁଲିସ ମନ୍ଦିର ପୂଜକମାନଙ୍କ ସମେତ କିଛି ଲୋକଙ୍କୁ ପଚରାଉଚରା କରିଥିବା ତଣ୍ଟିପାଳ ସାମୁଦ୍ରିକ ଥାନା ଆଇଆଇସି ଜ୍ୟୋତିରଂଜନ ସ୍ବାଇଁ କହିଛନ୍ତି।

ଏହି ପୀଠ ଉପରେ ସ୍ଥାନୀୟ ଲୋକଙ୍କର ପ୍ରଗାଢ଼ ବିଶ୍ବାସ ଥିବାରୁ ଏଠାରୁ ଲୁଟ୍ ଖବର ପାଇ ଆଜି ସକାଳେ ସ୍ଥାନୀୟ ଅଂଚଳରେ ଚାପା ଉତ୍ତେଜନା ପ୍ରକାଶ ପାଇଥିଲା।

ଏପରିକି ସ୍ଥାନୀୟ ଲୋକେ ଅଭିଯୁକ୍ତଙ୍କ ଗିରଫ ଦାବିରେ ମନ୍ଦିର ସାମ୍ନାରେ ଧାରଣାରେ ବସିଥିଲେ।

ସୂଚନାଯୋଗ୍ୟ, ଗତବର୍ଷ ଭିତରକନିକା ଅଭୟାରଣ୍ୟ ଅଂଚଳରେ ଥିବା ପ୍ରାଚୀନ ନାୟକବାବୁ ମନ୍ଦିରରୁ ଦୁର୍ବୃତ୍ତମାନେ ମୁଗୁନି ପଥରରେ ନିର୍ମିତ ଏକ ମୂର୍ତ୍ତି ଚୋରି ନେଇଥିଲେ।

ସେହିପରି ପ୍ରାୟ ଆଠ ମାସ ତଳେ ଜିଲ୍ଲାର ରାଜକନିକା ଥାନା ଅନ୍ତର୍ଗତ ଗିରିଆ ଗାଁରେ ଥିବା ୩୫୦ ବର୍ଷ ପୁରୁଣା ରାଧାକାନ୍ତଜୀଉ ମନ୍ଦିରରୁ ବହୁ ଅଳହଙ୍କାର ଚୋରି କରିନେଇଥିଲେ।

ଲୋକାଲ୍ ଓ୍ବାୟାର୍

କେନ୍ଦ୍ରାପଡା, ଜାନୁଆରୀ ୧୯(ଲୋକାଲ ୱାୟାର): ଭିତରକନିକା ଜାତୀୟ ଉଦ୍ୟାନକୁ ଅତି ସମ୍ବେଦନଶୀଳ ଅଞ୍ଚଳ ଭାବେ ଚିହ୍ନଟ କରିବାକୁ କେନ୍ଦ୍ର ସରକାର ନେଇଥିବା ନିଷ୍ପତ୍ତିକୁ ସ୍ଥାନୀୟ ବାସିନ୍ଦା ପ୍ରଶଂସା କରିଛନ୍ତି ।

ସ୍ଥାନୀୟ ପ୍ରଶାସନ ଦ୍ୱାରା ହୋଇଥିବା ଜନଶୁଣାଣି ଅବସରରେ ମତ୍ସ୍ୟଜୀବ. ଜଙ୍ଗଲବାସୀ ଓ ପରିବେଶବିତ୍ ସରକାରଙ୍କ ଏହି ନିଷ୍ପତ୍ତିକୁ ସ୍ୱାଗତ କରିଥିଲେ ।

ଜିଲ୍ଲାର ଉପକୂଳ ଅଞ୍ଚଳ ପ୍ରବନ୍ଧନ ଯୋଜନାର ଚିଠା ପ୍ରସ୍ତୁତି ପାଇଁ ଏହି ଜନଶୁଣାଣି ହୋଇଥିଲା ।

ପୂର୍ବରୁ ସରକାର ଉପକୂଳ ନିୟନ୍ତ୍ରଣ ଜୋନ୍ ନିୟମ ଅନୁଯାୟୀ ଜୁଆରିଆ ନଦୀର ଉଚ୍ଚ ଜୁଆର ରେଖାର ୧୦୦ ମିଟର ଅଞ୍ଚଳ ଓ ମୁହାଣ ଅଞ୍ଚଳରେ ବିଭିନ୍ନ ପ୍ରକାର ନିର୍ମାଣ କାମ ନିଷିଦ୍ଧ କରିଥିଲେ ।

ପରେ କେନ୍ଦ୍ର ସରକାର ଏହାକୁ ୧୦୦ ମିଟରରୁ ୫୦ ମିଟରକୁ ହ୍ରାସ କରିଛନ୍ତି ।

ଜନଶୁଣାଣୀରେ ବହୁ ଉପକୂଳ ବାସିନ୍ଦା ଏହି ହ୍ରାସ ଅଞ୍ଚଳକୁ ସମର୍ଥନ କରିଥିଲେ ବୋଲି ଡିଏଫଓ ବିକାଶ ରଞ୍ଜନ ଦାଶ ଲୋକାଲ ୱାୟାରକୁ କହିଛନ୍ତି ।

ଜନଶୁଣାଣିରେ କିଛି ମତ୍ସ୍ୟଜୀବୀ, ଚିଙ୍ଗୁଡ଼ି ଘେରି ମାଲିକ ଓ ଅନ୍ୟମାନେ ଉପକୂଳ ନିୟନ୍ତ୍ରଣ ଜୋନ ନିୟମନ ମ୍ୟାପ ଜାରି କରିବାକୁ ଦାବି କରିଥିଲେ ।

ରାଜ୍ୟ ସରକାରଙ୍କ ଦ୍ୱାରା ପରିଚାଳିତ ଓଡ଼ିଶା ସ୍ପେଶ ଆପ୍ଲିକେସନ ସେଣ୍ଟର (ଓସାକ) ଏହି ମ୍ୟାପ ପ୍ରସ୍ତୁତ କରୁଛନ୍ତି ବୋଲି ସେମାନଙ୍କୁ ସୂଚନା ଦିଆଯାଇଥିଲା ।

ତେବେ ଜାତୀୟ ଉଦ୍ୟାନ ଠାରୁ ଦୂରରେ ଥିବା କିଛି ଗାଁକୁ ଅଣସୂଚିତ କରିବାକୁ ରାଜକନିକାର ଅବସରପ୍ରାପ୍ତ ଶିକ୍ଷକ କାଳିପ୍ରସନ୍ନ ନାୟକ ସରକାରଙ୍କ ନିକଟରେ ଦାବି ଜଣାଇଥିଲେ ।

ରାଜକନିକା ଓ ରାଜନଗରର କିଛି ଚିଙ୍ଗୁଡ଼ି ଚାଷୀ ଅଭିଯୋଗ କରିଥିଲେ ସେମାନଙ୍କ ଚିଙ୍ଗୁଡ଼ି ଘେରି ପଞ୍ଜିକୃତ ହୋଇଥିଲେ ମଧ୍ୟ ଅଧିକାରୀମାନେ ଘେରି ଭାଙ୍ଗି ଦେଉଛନ୍ତି ବୋଲି ଅଭିଯୋଗ କରିଥିଲେ ।

ଲୋକାଲ ୱାୟାର

କେନ୍ଦ୍ରାପଡ଼ା, ଜାନୁଆରୀ ୧୭(ଲୋକାଲ ୱାୟାର): ଘନ କୁହୁଡ଼ି ଯୋଗୁ ଶୁକ୍ରବାର କେନ୍ଦ୍ରାପଡ଼ା ଜିଲ୍ଲାର ରାଜନଗର ନିକଟ ସମୁଦ୍ରରେ ଏକ ବୋଟ୍ ବାଟବଣା ହୋଇ ପ୍ରାୟ ଦୁଇ ଘଣ୍ଟା ଅଟକି ରହିବା ପରେ ତାକୁ ମେରାଇନ୍ ପୁଲିସର ସ୍ୱତନ୍ତ୍ର ଟିମ୍ ଉଦ୍ଧାର କରି ଧାମରା ଜେଟିକୁ ନେଇଥିବା ସୂଚନା ମିଳିଛି ।

ସକାଳେ ତାଳଚୁଆରୁ ଏକ ମୋଟର ବୋଟ୍ ମହିଳା ଓ ଶିଶୁଙ୍କ ସମେତ ପ୍ରାୟ ୩୦ ଜଣ ଯାତ୍ରୀଙ୍କୁ ନେଇ ବ୍ରାହ୍ମଣୀ-ବୈତରଣୀ ମୁହାଣ ଦେଇ ଚାନ୍ଦବାଲି ଅଭିମୁଖେ ଯାତ୍ରା କରିଥିଲା । କିନ୍ତୁ ଘନ କୁହୁଡ଼ି ଯୋଗୁ ସମୁଦ୍ର ମଧ୍ୟରେ ବୋଟଟି ବାଟବଣା ହୋଇଥିଲା ।

କିଛି ସମୟ ପରେ ଏହା ଧାମରା ନିକଟକୁ ଚାଲି ଯାଇଥିବା ବୋଟର ଚାଳକ ଜାଣିବାକୁ ପାଇଥିଲେ । ତେଣୁ ସେ ବୋଟକୁ ଆଉ ଆଗକୁ ନ ନେଇ ସେ ସମୁଦ୍ର ମଧ୍ୟରେ ବୋଟକୁ ଲଙ୍ଗର ପକାଇ ରଖିଥିଲେ ।

ଏହି ସୂଚନା ପାଇବା ପରେ ଧାମରା ମେରାଇନ ଥାନାର ଏକ ୬ ଜଣିଆ ଟିମ୍ ସମୁଦ୍ରକୁ ଯାଇ ବୋଟଟିକୁ ବାଟ କଢ଼ାଇ ଜେଟିକୁ ଆଣିଥିଲେ ବୋଲି ଥାନାର ଜଣେ ଅଧିକାରୀ କହିଛନ୍ତି ।

ତେବେ ଦିଗ ନିର୍ଣ୍ଣୟକାରୀ ଯନ୍ତ୍ର ଅଚଳ ଥିବାରୁ ଚାଳକ କୁହୁଡ଼ଇ ମଧ୍ୟରେ ବାଟ ପାଇ ନଥିଲେ ବୋଲି କହିଛନ୍ତି ବୋଟର ଜଣେ ଯାତ୍ରୀ ।

ଉଲ୍ଲେଖଯୋଗ୍ୟ, କୁହୁଡ଼ି ଯୋଗୁ ଗତକାଲି ଚିଲିକାରେ ମଧ୍ୟ ଏକ ଯାତ୍ରୀବାହୀ ଡଙ୍ଗା ବାଟବଣା ହୋଇ ଅଟକି ରହିଥିଲା ।

ଲୋକାଲ ୱାୟାର

କେନ୍ଦ୍ରାପଡ଼ା, ଜାନୁଆରୀ ୧୨(ଲୋକାଲ ୱାୟାର): ଆଶା ଓ ଆଶଙ୍କାରେ ଦିନ କାଟୁଛନ୍ତି କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ବ୍ଲକର ବାଛରା ଗାଁର ବାସନ୍ତୀ ମଲ୍ଲିକ ଓ ତାଙ୍କ ପରିବାରବର୍ଗ ।

ସବୁବେଳେ ଟିଭିରୁ ଇରାନ ଓ ଇରାକ ସ୍ଥିତି ସମ୍ପର୍କରେ ସବିଶେଷ ଖବର ଦେଖୁଛନ୍ତି ।

ଇରାକରେ ଅଶାନ୍ତି ଖବର ପାଇଲେ ବାଗଦାଦରେ ପାଣିପାଇପ ମିସ୍ତ୍ରୀ କାମ କରୁଥିବା ସ୍ୱାମୀ ଗୋଲଖ ମଲ୍ଲିକ (୫୫)ଙ୍କ ପାଇଁ ବାସନ୍ତୀ ଭୟ ଓ ଆତଙ୍କରେ ଶିହରି ଉଠନ୍ତି । ଆମେ ଇରାକର ବର୍ତ୍ତମାନ ପରିସ୍ଥିତିକୁ ନେଇ ଚିନ୍ତିତ ।

କ’ଣ ହୋଇଛି ଜାଣିନଥିଲେ ବି ଇରାକରେ ଯୁଦ୍ଧ ସ୍ଥିତି ସୃଷ୍ଟି ହୋଇଛି ବୋଲି ଆମକୁ ଅନେକେ କହୁଛନ୍ତି ।

ସ୍ୱାମୀଙ୍କ ସହ ଯୋଗାଯୋଗ କରିବାର ମୁଖ୍ୟ ମାଧ୍ୟମ ମୋବାଇଲ ଫୋନ । ମୁଁ ଶନିବାର ତାଙ୍କ ସହ କଥା ହୋଇଥିଲି ।

ଇରାକ ସ୍ଥିତି ଗମ୍ଭୀର ରହିଥିଲେ ବି ସେ ଓ କମ୍ପାନୀର ଅନ୍ୟ କର୍ମଚାରୀମାନେ ସୁରକ୍ଷିତ ଥିବା କହିଥିଲେ ।

ତାଙ୍କ ସୁରକ୍ଷା ପାଇଁ ପ୍ରାର୍ଥନା କରୁଛୁ ବୋଲି ବାସନ୍ତୀ କହିଛନ୍ତି । ବାଗଦାଦରୁ ଗୋଲଖ ଲୋକାଲ ୱାୟାର ସହ କଥା ହୋଇ ଇରାକ ପରିସ୍ଥିତି ଉତ୍ତେଜନାପୂର୍ଣ୍ଣ ଥିଲେ ବି ସେ ନିରାପଦ ଥିବା କହିଛନ୍ତି ।

ଆମେ ବାଗଦାଦର କଡ଼ା ପହରା ଥିବା ଗ୍ରୀନ ଜୋନ ନିକଟରେ ରହୁଛୁ । ଇରାକ ରାଜଧାନୀରୁ ବିସ୍ଫୋରଣ ଓ ସାଇରନ ଶବ୍ଦ ଆମେ ଶୁଣିପାରୁଛୁ ।

ନିକଟରେ ବହୁ ସଂଖ୍ୟାରେ ବିକ୍ଷୋଭକାରୀ ଗ୍ରୀନ ଜୋନ ନିକଟରେ ଥିବା ଆମେରିକୀୟ ଦୂତାବାସ ଉପରେ ଆକ୍ରମଣ କରିବାରୁ ଆମେ ଡରି ଯାଇଥିଲୁ ।

ଭାରତୀୟ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିବା ପାଇଁ ତାଙ୍କ ମୋବାଇଲ ନମ୍ବର ୦୦-୯୬-୪୭୮୨୭୮୫୪୧୮୬ ପ୍ରକାଶିତ କରିବାକୁ ଗୋଲଖ ଲୋକାଲ ୱାୟାରକୁ ଅନୁରୋଧ କରିଛନ୍ତି ।

ସେହିପରି ମଦନପୁର ଗାଁର ୬୨ ବର୍ଷୀୟ ସଦାଶିବ ରାଉତ ଓ ଗୋଗୁଆ ଗାଁର ୬୪ ବର୍ଷୀୟ ସକିଲ ଖାନ ଚିନ୍ତାରେ ଅଛନ୍ତି ।

ସଦାଶିବଙ୍କ ପୁଅ ଭାସ୍କର ନଜଫ ସହରରେ ପାଣି ପାଇପ କାମ କରୁଥିବା ବେଳେ ସକିଲଙ୍କ ପୁଅ କୟୁମ ତେହେରାନର ଏକ ଗ୍ୟାରେଜରେ ମେକାନିକ ଅଛି ।

କେବଳ ବାସନ୍ତୀ, ସଦାଶିବ ଓ ସକିଲ ନୁହେଁ ସେ ଅଂଚଳର ଅନେକେ ଦୁଶ୍ଚିନ୍ତାରେ ଦିନ କାଟୁଛନ୍ତି ।

ପଟ୍ଟାମୁଣ୍ଡାଇର ଶ୍ରମିକ ନେତା ବାବାଜୀ ପରିଡ଼ା କହିଛନ୍ତି କେନ୍ଦ୍ରାପଡ଼ା ଜିଲ୍ଲାର ୨ଶହରୁ ଅଧିକ ଲୋକ ପାଣିପାଇପ ମିସ୍ତ୍ରୀ ଭାବେ ଇରାକ ଓ ଇରାନରେ କାମ କରୁଛନ୍ତି ।

ସେଠାରେ ଲାଗି ରହିଥିବା ଅଶାନ୍ତି ଯୋଗୁଁ ପଟ୍ଟାମୁଣ୍ଡାଇ, ମହାକାଳପଡ଼ା ଓ ରାଜନଗର ବ୍ଲକର ଅନେକ ପରିବାର ସାମାଜିକ ଓ ଆର୍ଥିକ ଅନିଶ୍ଚିତତା ଦେଇ ଗତି କରୁଛନ୍ତି ।

କେନ୍ଦ୍ରାପଡା ଜିଲ୍ଲା ଶ୍ରମ ଅଧିକାରୀ ରାମଚନ୍ଦ୍ର ନାୟକଙ୍କୁ ଯୋଗାଯୋଗ କରିବାରେ ସେ କହିଛନ୍ତି କେନ୍ଦ୍ରାପଡ଼ାର ଅଞ୍ଚଳର ଲୋକେ ବିଭିନ୍ନ ଦେଶରେ କାମ କରୁଛନ୍ତି ।

ସରକାର ବିଦେଶରେ ରହୁଥିବା ଶ୍ରମିକଙ୍କୁ ସହାୟତା ପ୍ରଦାନ ପାଇଁ ୧୮୯୯୩୪୫୬୭୦୩ ଟୋଲ ଫ୍ରି ନମ୍ବର ଜାରି କରିଛନ୍ତି ।

ଏଯାଏଁ ସେମାନଙ୍କୁ ଇରାନ ଓ ଇରାକରେ କାମ କରୁଥିବା ଲୋକଙ୍କ ଠାରୁ କୌଣସି ସୂଚନା ମିଳିନାହିଁ ।

ଆମେ ଇରାକ ଓ ଇରାନରେ କାମ କରୁଥିବା ଶ୍ରମିକଙ୍କ ଦୁର୍ଦ୍ଦଶା ସମ୍ପର୍କରେ କୌଣସି ଖବର ପାଇନାହିୁଁ ।

ସେମାନଙ୍କ ଠାରୁ କିମ୍ବା ସେମାନଙ୍କ ସମ୍ପର୍କୀୟଙ୍କ ଠାରୁ ସୂଚନା ପାଇଲେ ଆମେ ସେମାନଙ୍କୁ ସାହାଯ୍ୟ କରିବୁ ବୋଲି ସେ କହିଛନ୍ତି ।

ଲୋକାଲ ୱାୟାର

କେନ୍ଦ୍ରାପଡ଼ା, ଜାନୁଆରୀ ୯(ଲୋକାଲ ୱାୟାର): କେନ୍ଦ୍ରାପଡ଼ା ଜିଲ୍ଲାରେ ବଙ୍ଗୋପସାଗର ଉପକୂଳ ରାଜନଗର ବ୍ଲକର ପେଣ୍ଠ ଗ୍ରାମରେ ଥିବା ଭାରତର ଦିତୀୟ ଏବଂ ଓଡ଼ିଶାର ସର୍ବପ୍ରଥମ ଜିଓ ସିନ୍ଥେଟିକ୍ ୱାଲରେ ଗୁରୁବାର ପୁଣି ଥରେ ଅଗ୍ନକାଣ୍ଡ ହୋଇଥିବା ବେଳେ ଏହାର କାରଣ ଅଜଣା ଥିବା ସ୍ଥାନୀୟ ଅଗ୍ନିଶମ ବାହିନୀ ପକ୍ଷରୁ କୁହାଯାଇଛି ।

ଗୁରୁବାର ଭୋର୍ ସମୟରେ ସିନ୍ଥେଟିକ୍ ୱାଲରେ ନିଆଁ ଲାଗି ଯାଇଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ ।

ବନ ବିଭାଗ ଓ ତଟବନ୍ଧ ବିଭାଗକୁ ଖବର ଦିଆଯିବା ପରେ ରାଜନଗର ଅଗ୍ନିଶମ ବାହିନୀ ପହଞ୍ôଚ ନିଆଁ ଲିଭାଇଥିଲେ ।

ଅଗ୍ନିକାଣ୍ଡରେ ୨୦ ଫୁଟ ଲମ୍ୱ ଓ ୧୦ ଫୁଟ ଚଉଡ଼ାରେ ଥିବା ପ୍ରାୟ ୩୦ଟି ଗ୍ୟାବିନ ବକ୍ସ ପୋଡ଼ିଯାଇଥିବା କହିଛନ୍ତି ତଟବନ୍ଧ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ଉମେଶ ଚନ୍ଦ୍ର ସ୍ୱାଇଁ ।

ତେବେ ଅଗ୍ନିକାଣ୍ଡର କାରଣ ଜଣାପଡ଼ି ନଥିବା ସେ କହିଛନ୍ତି ।

ଉଲ୍ଲେଖଯୋଗ୍ୟ, ରାଜନଗର ବ୍ଲକ ପେଣ୍ଠ ନିକଟରେ ସମୁଦ୍ର କୂଳ ଲଂଘୁଥିବାରୁ ପ୍ରାକୃତିକ ଉପାୟରେ ସମୁଦ୍ର ଜୁଆରକୁ ପ୍ରତିରୋଧ କରିବାକୁ ୫୦୫ ମିଟର ଲମ୍ବର ଜିଓ ସିନ୍ଥେଟିକ ୱାଲ୍ ନିର୍ମାଣ କରାଯାଇଥିଲା ।

ଲୋକାଲ ୱାୟାର