ଖେଳ

କଟକ,ଜାନୁୟାରୀ ୧୯(ଲୋକାଲ ୱାୟାର) : ଗୋଟିଏ ଦିନରେ ଆନ୍ତର୍ଜାତିକ ଡିସକସ ରାଣୀ ପାର୍ବତୀ ସେଠୀ ଓ ତାଙ୍କ ପୁଅ ଆଦିତ୍ୟ ବେହେରା କୃତିତ୍ବ ଅର୍ଜନ କରିଥିବା ରବିବାର ଦିନ ଜଣେ କ୍ରୀଡା ସଙ୍ଗଠକ ପ୍ରକାଶ କରିଛନ୍ତି ।

ପୁଅର କୃତିତ୍ବରେ ମା’ ପାର୍ବତୀ ଖୁସି ବ୍ୟକ୍ତ କରିଛନ୍ତି ।

ସମ୍ବଲପୁରରେ ଅନୁଷ୍ଠିତ ୪ର୍ଥ ରାଜ୍ୟ ମାଷ୍ଟର୍ସ ଗେମ୍ସରେ ପାର୍ବତୀଙ୍କୁ ଡିସକସ ଏବଂ ସଟପୁଟରେ ସ୍ବର୍ଣ୍ଣ ପଦକ ମିଳିଛି ।

ସେହିପରି ସେଣ୍ଟ ଜାଭିୟର୍ସରେ ପଢୁଥିବା ତାଙ୍କ ପୁଅ ଆଦିତ୍ୟ କଟକରେ ଅନୁଷ୍ଠିତ ୫୦ମି. ଦୌଡରେ ସୂର୍ଣ୍ଣ ପଦକ ହାସଲ କରିଛନ୍ତି ।

ପାର୍ବତୀଙ୍କ ସ୍ବପ୍ନ ଥିଲା ଯେ ତାଙ୍କ ପୁଅ ମଧ୍ୟ ଆଥଲେଟିକରେ ନିଜେ କୃତିତ୍ବ ଅର୍ଜନ କରୁ। ଆଜି ତାଙ୍କର ଏହି ସ୍ବପ୍ନ ପୂରଣ ହୋଇଛି ।

ତାଙ୍କ ପୁଅ ସ୍ବର୍ଣ୍ଣ ଜିତିଥିବା ବେଳେ ମା’ ମଧ୍ୟ ସ୍ବର୍ଣ୍ଣ ପଦକ ଜିତି ଗୌରବ ଆଣିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଜାନୁଆରୀ ୧୮(ଲୋକାଲ ୱାୟାର): ଗୌହାଟୀରେ ଚାଲିଥିବା ଖେଲୋ ଇଣ୍ଡିଆ ଯୁବ କ୍ରୀଡ଼ାରେ ଓଡ଼ିଶାର ପ୍ରତ୍ୟାଶା ରାୟ ସୁଇମିଂରେ ରୌପ୍ୟ ପଦକ ଜିତିଥିବା ବେଳେ ଭାରୋତ୍ତୋଳନରେ ମୋତି ଜାତି ବ୍ରୋଞ୍ଜ ପଦକ ହାସଲ କରିଛନ୍ତି ।

୨୧ବର୍ଷରୁ କମ୍ ୧୦୦ମିଟର ବ୍ୟାକ୍ ଷ୍ଟ୍ରୋକରେ ପ୍ରତ୍ୟାଶା ୧ ମିନିଟ ୦୯.୩୮ ସେକେଣ୍ଡ ସମୟ ନେଇ ଦ୍ୱିତୀୟ ସ୍ଥାନରେ ରହିଥିଲେ ।

ପଶ୍ଚିମବଙ୍ଗର ସୌଦୀପ୍ତି ମଣ୍ଡଳ ୧ମିନିଟ୍ ୦୬.୭୧ସେକେଣ୍ଡ ନେଇ ପ୍ରଥମ ଏବଂ ଗୁଜରାଟର ମାନା ପଟେଲ ୧ମିନିଟ୍ ୧୨.୩୮ସେକେଣ୍ଡ ନେଇ ତୃତୀୟ ହୋଇଛନ୍ତି ।

ଭାରୋତ୍ତୋଳନରେ ମୋତି ଜାନି ୨୧ବର୍ଷରୁ କମ୍ କାଟାଗୋରୀରେ ୫୫କିଲୋ ବର୍ଗରେ ମୋଟ ୧୫୮କିଲୋ ଉଠାଇ ବ୍ରୋଞ୍ଜ ପଦକ ପାଇଛନ୍ତି ।

ମହାରାଷ୍ଟ୍ରର ଅନନ୍ୟା ବିଜୟ ପାଟିଲ ୧୬୪କିଲୋ ଉଠାଇ ସ୍ୱର୍ଣ୍ଣ ପଦକ ଏବଂ କେରଳର ଅଭିରାମି ପି. ମାଥ୍ୟୁ ୧୬୦କିଲୋ ଉଠାଇ ରୌପ୍ୟ ପଦକ ପାଇଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଜାନୁଆରୀ ୧୬(ଲୋକାଲ ୱାୟାର): ଗୌହାଟୀରେ ଚାଲିଥିବା ତୃତୀୟ ଖେଲୋ ଇଣ୍ଡିଆ ଯୁବ କ୍ରୀଡ଼ାରେ ବୁଧବାର ଓଡ଼ିଶାର ସ୍ୱସ୍ତି ସିଂ ୩ ହଜାର ମିଟର ସାଇକେଲିଂରେ ସ୍ୱର୍ଣ୍ଣ ପଦକ ବିଜୟୀ ହୋଇପାରିଛନ୍ତି ।

ସ୍ୱସ୍ତି ୪ ମିନିଟ୍ ୨୦.୨୩୭ ସେକେଣ୍ଡ ନେଇ ରେସରେ ପ୍ରଥମ ସ୍ଥାନ ହାସଲ କରିଥିବା ବେଳେ ରାଜସ୍ଥାନର ମୋନିକା ଜାଟ୍ ଦ୍ୱିତୀୟ ଏବଂ କର୍ଣ୍ଣାଟକର କେ. ରଙ୍ଗାସ୍ୱାମୀ ସି ତୃତୀୟ ସ୍ଥାନରେ ଅଛନ୍ତି ।

ସ୍ୱସ୍ତି ଏ ପର୍ଯ୍ୟନ୍ତ ଏହି କ୍ରୀଡ଼ାରେ ମୋଟ୍ ୩ଟି ଇଭେଣ୍ଟରେ ଭାଗ ନେଇ ଜିତିଛନ୍ତି ୩ଟି ପଦକ । ଏଥିରେ ଅଛି ୨ଟି ସ୍ୱର୍ଣ୍ଣ ଓ ଗୋଟିଏ ରୌପ୍ୟ ।

ପୂର୍ବରୁ ସ୍ୱସ୍ତି ବାଳିକା ୨୧ ବର୍ଷରୁ କମ୍ ସ୍କ୍ରାଚ୍ ରେସ୍ ୭.୫ କି.ମିରେ ସ୍ୱର୍ଣ୍ଣ ଏବଂ ୨୧ ବର୍ଷରୁ କମ୍ ବାଳିକା ବ୍ୟକ୍ତିିଗତ ରୋଡ୍ ରେସରେ ରୌପ୍ୟ ପଦକ ଜିତିଥିଲେ ।

ପ୍ରତିଯୋଗିତାରେ ଏ ପର୍ଯ୍ୟନ୍ତ ଓଡ଼ିଶାର ପଦକ ସଂଖ୍ୟା ୭ରେ ପହଞ୍ଚିଛି । ଏଥିରେ ୪ ସ୍ୱର୍ଣ୍ଣ, ୨ ରୌପ୍ୟ ଓ ଗୋଟିଏ ବ୍ରୋଞ୍ଜ ପଦକ ରହିଛି ।

ଲୋକାଲ ୱାୟାର

ଭୁବନେଶ୍ୱର, ଜାନୁଆରୀ ୧୪(ଲୋକାଲ ୱାୟାର): ଆସନ୍ତା ୨୫ ତାରିଖରୁ ଭାରତୀୟ ମହିଳା ହକି ଟିମର ନ୍ୟୁଜିଲାଣ୍ଡ ଟୁର୍ ଆରମ୍ଭ ହେଉଥିବା ବେଳେ ୨୦ ଜଣିଆ ଜାତୀୟ ଦଳରେ ଓଡ଼ିଶାର ୩ ଜଣ ଖେଳାଳି ସ୍ଥାନ ପାଇଥିବା ହକି ଇଣ୍ଡିଆ ପକ୍ଷରୁ ମଙ୍ଗଳବାର ସୂଚନା ଦିଆଯାଇଛି ।

ଟିମରେ ସ୍ଥାନ ପାଇଥିବା ଓଡ଼ିଶାର ୩ ଜଣ ଖେଳାଳି ହେଲେ ଦୀପଗ୍ରେସ ଏକ୍କା, ନମିତା ଟପ୍ପୋ ଏବଂ ଲିଳିମା ମିଞ୍ଜ୍ । ଜାନୁଆରୀ ୨୫ ତାରିଖରେ ଏହି ଟିମ୍ ନ୍ୟୁଜିଲାଣ୍ଡର ଅକଲାଣ୍ଡଠାରେ ନ୍ୟୁଜିଲାଣ୍ଡ ଡେଭଲପମେଣ୍ଟ ସ୍କ୍ୱାଡ୍ ସହ ପ୍ରଥମ ମ୍ୟାଚ୍ ଖେଳିବ ।

ନ୍ୟୁଜିଲାଣ୍ଡ ଜାତୀୟ ଦଳ ସହ ଭାରତ ଜାନୁଆରୀ ୨୭ ଓ ୨୯ ତାରିଖରେ ଦୁଇଟି ମ୍ୟାଚ୍ ଖେଳିବ ।

ଫେବ୍ରୁଆରୀ ୪ ତାରିଖରେ ବ୍ରିଟେନ ସହ ଏବଂ ପରଦିନ ଅର୍ଥାତ୍ ଫେବ୍ରୁଆରୀ ୫ ତାରିଖରେ ପୁନର୍ବାର ନ୍ୟୁଜିଲାଣ୍ଡ ସହ ଭାରତ ମ୍ୟାଚ୍ ଖେଳି ଗସ୍ତ ଶେଷ କରିବାର କାର୍ଯ୍ୟକ୍ରମ ରହିଛି ।

ଲୋକାଲ ୱାୟାର

ଭୁବନେଶ୍ବର, ଜାନୁଆରୀ ୧୪ (ଲୋକାଲ ୱାୟାର): ହରିଆଣାର ରୋହତକସ୍ଥିତ ଚୌଧୁରୀ ବଂଶୀଲାଲ କ୍ରିକେଟ ଷ୍ଟାଡିୟମରେ ଖେଳାଯାଇଥିବା ଗ୍ରୁପ୍-ସି ରଣଜୀ ମ୍ୟାଚର ଚତୁର୍ଥ ତଥା ଶେଷ ଦିନରେ ମଙ୍ଗଳବାର ହରିଆଣାକୁ ଓଡ଼ିଶା ଦଳ ଏକ ଓ୍ବିକେଟରେ ପରାସ୍ତ କରିଛି।

ବିଜୟ ପାଇଁ ୧୭୯ ରନର ଆବଶ୍ୟକତା ଥିବାବେଳେ ତୃତୀୟ ଦିନ ଖେଳ ଶେଷ ସୁଦ୍ଧା ଓଡ଼ିଶା ଦ୍ବିତୀୟ ଇନିଂସରେ ୧୪୭ ରନ୍ କରି ୭ଟି ଓ୍ବିକେଟ ହରାଇସାରିଥିଲା।

ତେବେ ଚତୁର୍ଥ ଦିନରେ ଦଳ ବିଜୟ ପାଇଁ ଆବଶ୍ୟକ ରନ୍ ସଂଗ୍ରହ କରିନେଇଥିଲା।

୧୧ଟି ଓ୍ବିକେଟ ନେଇଥିବା ସୂର୍ଯ୍ୟକାନ୍ତ ପ୍ରଧାନଙ୍କୁ ମ୍ୟାନ୍ ଅଫ୍ ଦ ମ୍ୟାଚ୍ ଘୋଷଣା କରାଯାଇଥିବାବେଳେ ଏହି ମ୍ୟାଚ୍ ଜିତି ଓଡ଼ିଶା ଆହୁରି ୬ ପଏଣ୍ଟ ହାସଲ କରିଛି।

ଉଲ୍ଲେଖଯୋଗ୍ୟ ଏହି ମ୍ୟାଚର ପ୍ରଥମ ଇନିଂସରେ ହରିଆଣା ୯୦ ଓ ଦ୍ବିତୀୟ ଇନିଂସରେ ୧୬୦ ରନ୍ କରିଥିବାବେଳେ ଓଡ଼ିଶା ୧୬୦ ଓ ୯ ଓ୍ବିକେଟ ହରାଇ ୧୮୨ ରନ୍ କରିଥିଲା।

ସୂଚନାଯୋଗ୍ୟ, ଏହା ଓଡ଼ିଶାର ଲଗାତର ଚତୁର୍ଥ ରଣଜୀ ବିଜୟ।

ଲୋକାଲ ୱାୟାର

ଭୁବନେଶ୍ୱର, ଜାନୁଆରୀ ୬(ଲୋକାଲ ୱାୟାର): ଭୁବନେଶ୍ୱରର ଚନ୍ଦ୍ରଶେଖରପୁରସ୍ଥିତ ପୂର୍ବତଟ ରେଳବାଇ ଅଡିଟୋରିୟମରେ ସୋମବାର ଆୟୋଜିତ ପ୍ରଥମ ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ା ପ୍ରତିଯୋଗିତାର ଶୁଭାରମ୍ଭ କରିଛନ୍ତି କେନ୍ଦ୍ର କ୍ରୀଡ଼ା ଓ ଯୁବ ବ୍ୟାପାର ରାଷ୍ଟ୍ରମନ୍ତ୍ରୀ କିରେନ ରିଜିଜୁ ।

ଭୁବନେଶ୍ୱରରେ ଫେବୃଆରୀ ୨୨ ତାରିଖରୁ ମାର୍ଚ୍ଚ ୧ ତାରିଖ ପର୍ଯ୍ୟନ୍ତ ଖେଲୋ ଇଣ୍ଡିଆ ବିଶ୍ୱ ବିଦ୍ୟାଳୟ କ୍ରୀଡ଼ା ପ୍ରତିଯୋଗିତା ଆୟୋଜିତ ହେବ ବୋଲି ଏହି ଅବସରରେ ସୂଚନା ଦିଆଯାଇଛି ।

ଏହି ଅବସରରେ ସେ କହିଛନ୍ତି, ତୃଣମୂଳ ସ୍ତରରୁ କ୍ରୀଡ଼ାର ପ୍ରୋତ୍ସାହନ ଉଦ୍ଦେଶ୍ୟରେ ଭାରତ ସରକାର ପ୍ରତିବର୍ଷ ୪ଟି ପ୍ରମୁଖ କ୍ରୀଡ଼ା ପ୍ରତିଯୋଗିତା ଆୟୋଜନ ଲାଗି ନୀତିଗତ ନିଷ୍ପତ୍ତି ନେଇଛନ୍ତି ।

ଏହି ଚାରିଟି ପ୍ରମୁଖ କ୍ରୀଡ଼ା ପ୍ରତିଯୋଗିତା ଖେଲୋ ଇଣ୍ଡିଆ ଅଭିଯାନ ଅନ୍ତର୍ଗତ ଆୟୋଜନ କରାଯିବ । ଆସାମର ଗୌହାଟୀ ଠାରେ ଆସନ୍ତା ୧୦ ତାରିଖ ଠାରୁ ୨୨ ତାରିଖ ପର୍ଯ୍ୟନ୍ତ ଖେଲୋ ଇଣ୍ଡିଆ ଯୁବ କ୍ରୀଡ଼ା ପ୍ରତିଯୋଗିତା ଅନୁଷ୍ଠିତ ହେବ ।

ସେ କହିଛନ୍ତି, କେନ୍ଦ୍ର ସରକାର ଖେଲୋ ଇଣ୍ଡିଆ ବିଦ୍ୟାଳୟସ୍ତରୀୟ କ୍ରୀଡ଼ା ପ୍ରତିଯୋଗିତା ଆୟୋଜନ ଲାଗି ନିଷ୍ପତ୍ତି ନେଇଛନ୍ତି । ଖେଲୋ ଇଣ୍ଡିଆ ପାରମ୍ପରିକ କ୍ରୀଡ଼ା ଏବଂ ଖେଲୋ ଇଣ୍ଡିଆ ଦିବ୍ୟାଙ୍ଗ କ୍ରୀଡ଼ା ପ୍ରତିଯୋଗିତା ବାର୍ଷିକ ବୈକଳ୍ପିକ ଭାବେ ଆୟୋଜନ କରାଯିବା ଲାଗି ନିଷ୍ପତ୍ତି ନିଆଯାଇଥିବା ଶ୍ରୀ ରିଜିଜୁ ପ୍ରକାଶ କରିଥିଲେ ।

ଶ୍ରୀ ରିଜିଜୁ କହିଥିଲେ ଯେ ସାରା ପୃଥିବୀରେ ଭାରତ ହେଉଛି ସବୁଠୁ ଯୁବ ରାଷ୍ଟ୍ର । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଆମ ସରକାର ଦେଶକୁ ଏକ କ୍ରୀଡ଼ା ମହାଶକ୍ତିରେ ପରିଣତ କରିବା ଲାଗି ନିର୍ଦ୍ଦିଷ୍ଟ ଲକ୍ଷ୍ୟ ଧାର୍ଯ୍ୟ କରିବା ସହ ବ୍ୟାପକ କାର୍ଯ୍ୟକ୍ରମ ହାତକୁ ନେଇଛନ୍ତି ।

ଭାରତ ସରକାର “ଗୋଟିଏ ରାଜ୍ୟ ଗୋଟିଏ କ୍ରୀଡ଼ା”ର ବିକାଶକୁ ପ୍ରାଥମିକତା ଦେବାର ନୀତି ଆରମ୍ଭ କରିବାକୁ ଯାଉଛନ୍ତି ।

ଏହି ଅବସରରେ ଶ୍ରୀ ରିଜିଜୁ ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ା ପ୍ରତିଯୋଗିତାର କ୍ରୀଡ଼ାସୂଚୀ ଉନ୍ମୋଚନ କରିଥିଲେ ।

କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ଯୋଗ ଦେଇ କେନ୍ଦ୍ର ପେଟ୍ରୋଲିୟମ ଓ ପ୍ରାକୃତିକ ବାଷ୍ପ ଏବଂ ଇସ୍ପାତ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଖେଲୋ ଇଣ୍ଡିଆ ଭଳି ଅଭିଯାନର ଆରମ୍ଭ ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଧନ୍ୟବାଦ ଜଣାଇଥିଲେ । ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ଦ୍ୱାରା କ୍ରୀଡ଼ାର ପ୍ରୋତ୍ସାହନ ମିଳିବା ସ୍ୱାଗତଯୋଗ୍ୟ ବୋଲି ସେ କହିଥିଲେ ।

ଖେଲୋ ଇଣ୍ଡିଆ ଭଳି ଅଭିଯାନ ଓଡ଼ିଶାର ଗ୍ରାମୀଣ ଓ ଆଦିବାସୀ ଅଞ୍ଚଳର କ୍ରୀଡ଼ା ପ୍ରତିଭାଙ୍କ ବିକାଶ ଲାଗି ମୂଳଦୁଆ ପ୍ରତିଷ୍ଠା କରିବ । ଏହି ଅବସରରେ ସେ ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ା ପ୍ରତିଯୋଗିତାର ଲୋଗୋ ଉନ୍ମୋଚନ କରିଥିଲେ ।

କାର୍ଯ୍ୟକ୍ରମରେ ଅନ୍ୟତମ ସମ୍ମାନିତ ଅତିଥି ଭାବେ ଯୋଗ ଦେଇ କେନ୍ଦ୍ର ମାନବ ସମ୍ବଳ ବିକାଶ ମନ୍ତ୍ରୀ ଡ. ରମେଶ ପୋଖରିୟାଲ ‘ନିଶଙ୍କ’ କହିଥିଲେ ଯେ ପ୍ରାଚୀନ କାଳରୁ ସମଗ୍ର ବିଶ୍ୱରେ ଜ୍ଞାନର ମହାଶକ୍ତି ଭାବେ ଖ୍ୟାତି ଲାଭ କରିଥିବା ଭାରତ ନିକଟରେ କ୍ରୀଡ଼ା ମହାଶକ୍ତି ହେବାର ଅପାର ସମ୍ଭାବନା ରହିଛି ।

ଏହି ଅବସରରେ ସେ ପ୍ରତିଯୋଗିତାର ମାସ୍କଟ ‘ଜୟ’ ଓ ‘ବିଜୟ’ର ଉନ୍ମୋଚନ କରିଥିଲେ ।

କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଥିଲେ ଯେ ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ା ପ୍ରତିଯୋଗିତା ଓଡ଼ିଶାରେ ଆୟୋଜିତ ହେବା ସୌଭାଗ୍ୟର ବିଷୟ । ସମଗ୍ର ଦେଶରେ ଓଡ଼ିଶା କ୍ରୀଡ଼ା ରାଜଧାନୀ ଭାବେ ଉଭା ହୋଇଛି । ତିନି ଜଣ କେନ୍ଦ୍ର ମନ୍ତ୍ରୀଙ୍କ ଉପସ୍ଥିତିରେ ଏହି କ୍ରୀଡ଼ା ପ୍ରତିଯୋଗିତାର ଶୁଭାରମ୍ଭ ହୋଇଛି ।

ଏଥିରେ ପାଖାପାଖି ୧୦୦ ବିଶ୍ୱବିଦ୍ୟାଳୟରୁ ୪ ହଜାରରୁ ଅଧିକ ପ୍ରତିଯୋଗୀ ବିଭିନ୍ନ କ୍ରୀଡ଼ା ପ୍ରତିଯୋଗିତାରେ ଅଂଶଗ୍ରହଣ କରିବେ ।

କାର୍ଯ୍ୟକ୍ରମରେ ରାଜ୍ୟ ଉଚ୍ଚ ଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ, କ୍ରୀଡ଼ା ମନ୍ତ୍ରୀ ତୁଷାରକାନ୍ତି ବେହେରା, କେନ୍ଦ୍ର କ୍ରୀଡ଼ା ଏବଂ ଯୁବ ବ୍ୟାପାର ବିଭାଗ ସଚିବ ରାଧେଶ୍ୟାମ ଜୁଲାନିୟାଁ, ରାଜ୍ୟ କ୍ରୀଡ଼ା ଓ ଯୁବ ବ୍ୟାପାର ସଚିବ ବିଶାଳ ଦେବ ଯୋଗ ଦେଇଥିଲେ ।

ଲୋକାଲ ୱାୟାର

ଭୁବନେଶ୍ଵର, ଜାନୁୟାରୀ ୨ (ଲୋକାଲ ୱାୟାର): କ୍ରୀଡ଼ା, ବିପର୍ଯ୍ୟୟ ପ୍ରଶମନ ଓ ସାମାଜିକ କଲ୍ୟାଣ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ୨୦୧୯ରେ ଓଡ଼ିଶା ଅନେକ ଜାତୀୟ ଓ ଅନ୍ତର୍ଜାତୀୟ ସମ୍ମାନ ହାତେଇପାରିଛି।

ଏହାରି ଉପରେ ଆସନ୍ତୁ ଏକ ନଜର ପକାଇବା

୧- ଡିସେମ୍ବର ୯ରେ ‘ଜାଗା ମିଶନ’ ପାଇଁ ଓଡ଼ିଶା ମିଳିତ ଜାତିସଂଘ ସହଭାଗିତାରେ ଇଂଲଣ୍ଡର ୱାର୍ଲ୍ଡ ହାବିଟାଟ୍ ସଂସ୍ଥା ପକ୍ଷରୁ ଦିଆଯାଉଥିବା ‘ୱାର୍ଲ୍ଡ ହାବିଟାଟ୍ ଆୱାର୍ଡ’ ପାଇଁ ମନୋନୀତ ହୋଇଛି ।

ରାଜ୍ୟର ମହାନଗର ନିଗମ ଓ ପୌରାଞ୍ଚଳରେ ରହୁଥିବା ବସ୍ତିବାସିନ୍ଦାଙ୍କୁ ଜମିର ସ୍ୱତ୍ୱାଧିକାର ଦେବା ଏବଂ ଘର ଯୋଗାଇଦେବାକୁ ୨୦୧୮ ନଭେମ୍ବରରେ ପୁରୀରେ ମୁଖ୍ୟମନ୍ତ୍ରୀ ‘ଜାଗା ମିଶନ’ର ଶୁଭାରମ୍ଭ କରିଥିଲେ ।

୨- ଡିସେମ୍ବର ପ୍ରଥମ ସପ୍ତାହରେ ଜାଗା ମିଶନ୍’ ଜରିଆରେ ସହରୀ ଗରିବଙ୍କୁ ଜମି ଯୋଗାଣରେ ସଫଳତା ପାଇଁ ହାଇଦ୍ରାବାଦରେ ଜିଓସ୍ମାର୍ଟ ମିଡିଆ ଆଣ୍ଡ କମ୍ୟୁନିକେସନ୍ ପକ୍ଷରୁ ଆୟୋଜିତ ଦ ଇଣ୍ଡିଆ ଜିଓସ୍ପାଟିଆଲ୍ ଏକ୍ସିଲେନ୍ସ ଆୱାର୍ଡ଼ ଉତ୍ସବରେ ଓଡ଼ିଶା ଓ ଟାଟା ଟ୍ରଷ୍ଟକୁ ପୁରସ୍କାର ପ୍ରଦାନ କରାଯାଇଛି ।

ରାଜ୍ୟରେ ଜାଗା ମିଶନରେ ଡ୍ରୋନ୍ ଜରିଆରେ ୪ ମାସ ମଧ୍ୟରେ ୧୦୯ଟି ସହରର ୧୮୮୬ଟି ବସ୍ତିରେ ସର୍ଭେ କରାଯାଇପାରିଥିବା ନଗର ଉନ୍ନୟନ ବିଭାଗ ପକ୍ଷରୁ କୁହାଯାଇଛି ।

୩- କ୍ରୀଡାର ପ୍ରଚାର ପ୍ରସାର ସାଙ୍ଗକୁ କ୍ରୀଡ଼ା ଆୟୋଜନ କ୍ଷେତ୍ରରେ ଅବଦାନ ପାଇଁ ଏଫଆଇସିସିଆଇ ଇଣ୍ଡିଆ ସ୍ପୋର୍ଟସ ଆୱାର୍ଡ ଓ ଅନେକ ସ୍ପୋର୍ଟସ ଆୱାର୍ଡର ମଧ୍ୟ ଅଧିକାରୀ ହୋଇଛି ।

୪- ସେହିପରି ନଭେମ୍ବରରେ ଜାତୀୟ କ୍ରୀଡା ହକିର ବିଶ୍ବସ୍ତରରେ ପ୍ରଚାର ଓ ପ୍ରସାର କରିଥିବାରୁ ହକି ଫେଡେରେସନ ପକ୍ଷରୁ ଏଫଆଇଏଚ ପ୍ରେସିଡେଣ୍ଟସ ଆୱାର୍ଡ ଅର୍ଜନ କରିଛି ।

୫- ସେହିପରି ଫେବ୍ରୁଆରୀରେ ରାଜ୍ୟ ବିପର୍ଯ୍ୟୟ ପ୍ରଶମନ ପ୍ରାଧିକରଣ (ଓଏସଡମା)କୁ ସ୍କଚ୍ ଆୱାର୍ଡ ପ୍ରଦାନ କରାଯାଇଥିଲା।

୬- ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଅନ୍ତର୍ଗତ ମହିଳାଙ୍କ ସ୍ୱାସ୍ଥ୍ୟର ବିକାଶ ନେଇ ନଭେମ୍ବର ମାସରେ ଓଡ଼ିଶା ସ୍କଚ ସ୍ୱାସ୍ଥ୍ୟ ଭାରତ ଗୋଲ୍ଡ ଆୱାର୍ଡରେ ସମ୍ମାନିତ ହୋଇଥିଲା।

ଲୋକାଲ ୱାୟାର୍