ଗଜପତି

ଭୁବନେଶ୍ୱର, ମେ ୨୧(ଲୋକାଲ ୱାୟାର): ପୁଣିଥରେ ମା’ମାନଙ୍କ ଉପରେ ନିଜର ଆସ୍ଥା ଜାହିର କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

କରୋନା ସଂକ୍ରମଣକୁ ଅଟକାଇବା ପାଇଁ ଅଙ୍ଗନବାଡ଼ି କର୍ମୀ, ଆଶାଦିଦି ଓ ମହିଳା ସ୍ୱୟଂ ସହାୟକ ଗୋଷ୍ଠୀମାନଙ୍କ ଦାୟିତ୍ୱବୋଧତାକୁ ଗୁରୁତର ସହ ବିଚାର କରାଯାଇଛି ।

ଗତବର୍ଷ କରୋନା ସମୟରେ ସରପଞ୍ଚ ମାନଙ୍କୁ ଜିଲ୍ଲାପାଳଙ୍କ ଦାୟିତ୍ୱ ଦିଆଯାଇଥିବା ବେଳେ ଚଳିତ ବର୍ଷ ପୁଣିଥରେ ସେହି ଦାୟିତ୍ୱକୁ ସରପଞ୍ଚ ମାନେ ସହୃଦୟତାର ସହ ପାଳନ କରିବାକୁ ମୁଖ୍ୟମନ୍ତ୍ରୀ ଆହ୍ୱାନ ଦେଇଛନ୍ତି ।

ମୁଖ୍ୟମନ୍ତ୍ରୀଙ୍କ ଏହି ଆହ୍ୱାନର ଦୁଇଦିନ ଭିତରେ ଗ୍ରାମୀଣ ସ୍ତରରେ କରୋନାକୁ ପରାଜୟ କରିବା ପାଇଁ ଆରମ୍ଭ ହୋଇଯାଇଛି ପ୍ରସ୍ତୁତି ।

କେଉଁଠି ସ୍ୱୟଂ ସହାୟକ ଗୋଷ୍ଠୀର ମା’ ମାନଙ୍କ ନେତୃତ୍ୱରେ ଘରେ ଘରେ ସର୍ଭେ ଆରମ୍ଭ ହେଲଣି ତ ଆଉ କେଉଁଠି ଆଶା କର୍ମୀମାନେ ନିଜ ଦାୟିତ୍ୱରୁ ଉଦ୍ଧ୍ୱର୍କୁ ଯାଇ ଲୋକଙ୍କୁ ମାଇକ୍ ଦ୍ୱାରା ସଚେତନ କଲେଣି ।

ଜିଲ୍ଲା ପ୍ରଶାସନ ସହାୟତାରେ ଓ କରୋନା ନିୟମକୁ ଅନୁପାଳନ କରି ଏସବୁ କାମ କରାଯାଉଛି ।

ଏନେଇ ସୁନ୍ଦରଗଡ ଜିଲ୍ଲା ପ୍ରଶାସନ ସହାୟତାରେ ଆଜି ଜିଲ୍ଲାର ସମସ୍ତ ଅଙ୍ଗନବାଡ଼ି ସେଣ୍ଟରରେ ଅଙ୍ଗନବାଡ଼ି କର୍ମୀମାନଙ୍କୁ ଅକ୍ସିମିଟିର ଓ ଥର୍ମାଲ ସ୍କାନର ଦିଆଯାଇଛି ।

ଅଭିଜ୍ଞ ପ୍ରଶିକ୍ଷକଙ୍କ ଦ୍ୱାରା ଏହାର ବ୍ୟବହାର ବାବଦରେ ମଧ୍ୟ ସେମାନଙ୍କୁ ଅବଗତ କରାଯାଇଛି ।

ଯାହାଦ୍ୱାରା ପ୍ରତ୍ୟେକ ଅଙ୍ଗନବାଡ଼ି କର୍ମୀ ଓ ଆଶା ଦିଦିମାନେ ନିଜ ନିଜ ଅଞ୍ଚଳରେ ଲୋକଙ୍କ ସର୍ବେକ୍ଷଣ ଠିକ୍ ଭାବେ କରିପାରିବେ ।

କେବଳ ସେତିକି ନୁହଁ ଗାଁ କଲ୍ୟାଣ ସମିତି ସଦସ୍ୟମାନଙ୍କ ସହାୟତାରେ କରୋନା ସଂକ୍ରମଣକୁ ରୋକିବା ପାଇଁ ପ୍ରାଥମିକ ସ୍ତରରେ କେଉଁସବୁ ଉଦ୍ୟମ ହେବା ଦରକାର ତାହାର ଆଲୋଚନା କରାଯାଇଛି ।

ଜିଲ୍ଲାର ଆଦିବାସୀ ବହୁଳ ଲହୁଣିପଡା ଓ ଅନ୍ୟାନ୍ୟ ଅଞ୍ଚଳରେ ଗାଁ କଲ୍ୟାଣ ସମିତି ସମସ୍ୟ ମାନେ ହାତ ଧୋଇବାର ଅଭ୍ୟାସ କରିବା ସହ ଗାଁର ସମସ୍ତ ଅଧିବାସୀ ସାମାଜିକ ଦୂରତାର ଅନୁପାଳନ କରିବେ ବୋଲି ଶପଥ ନେଇଛନ୍ତି । ଏହା ଗ୍ରାମୀଣ ସ୍ତରରେ କରୋନା ରୋକିବା ଦିଗରେ ନଶ୍ଚିତ ଭାବେ ସହାୟକ ହେବ ।

ସେହିପରି ଗଞ୍ଜାମ ଜିଲ୍ଲା ବରଗାଁ ଗ୍ରାମପଞ୍ଚାୟତ ଆସିକା ବ୍ଲକର ମହୋଦଧି ସ୍ୱୟଂ ସହାୟିକା ଗୋଷ୍ଠୀର ସଦସ୍ୟମାନେ କରୋନା ପାଇଁ ଗାଁ ଗାଁରେ ସଚେତନତା ଅଭିଯାନ ଆରମ୍ଭ କରିଛନ୍ତି ।

କରୋନା ଭୂତାଣୁରୁ ନିଜକୁ ରକ୍ଷା କରିବା ପାଇଁ ୫ଟି ସାବଧାନତା ଉପରେ ଗୁରୁତ୍ୱ ଦେବାକୁ କହି ପ୍ଲାକାର୍ଡ ଧରି ଗାଁ ଗାଁରେ ଲୋକଙ୍କୁ ବୁଝାଇଛନ୍ତି ।

କେଉଁ ପରିସ୍ଥିତିରେ ଡାକ୍ତରଙ୍କ ପରାମର୍ଶ ନେବାକୁ ପଡ଼ିବ ସେ ଉପରେ ଲୋକଙ୍କୁ ସଚେତନ କରିଛନ୍ତି ।

ବଲାଙ୍ଗିର ଜିଲ୍ଲାରେ ବିଭିନ୍ନ ଗାଁ କଲ୍ୟାଣ ସମିତି ତରଫରୁ କରୋନା ମୁକାବିଲା ପାଇଁ ମହିଳାମାନେ ପଦାକୁ ପାଦ କାଢ଼ିଛନ୍ତି ।

କରୋନା ସଂକ୍ରମଣକୁ ରୋକିବା ପାଇଁ ଏମାନେ ଗାଁରେ ବୁଲି ମାଇକ୍ ଦ୍ୱାରା ଲୋକଙ୍କୁ ବୁଝାଉଛନ୍ତି ।

ଓଡିଶା ଲାଇଭଲିହୁଡ୍ ମିଶନ ଦ୍ୱାରା ଯାଜପୁର ଜିଲ୍ଲା ବଡ଼ଚଣା ବ୍ଲକ୍ର ୨୬ଟି ପଞ୍ଚାୟତରେ ଏନେଇ ସଚତତା ଅଭିଯାନ ଆରମ୍ଭ ହୋଇଛି ।

ଗଜପତି ଜିଲ୍ଲା ପ୍ରଶାସନ ସହାୟତାରେ ଆଜି ଅଶାଦିଦି ଓ ଅଙ୍ଗନବାଡ଼ି କର୍ମୀମାନେ ଘରକୁ ଘର ଯାଇ ଆର ଉଦୟଗିରି ବ୍ଲକ୍ରେ ଥର୍ମାଲ ସ୍କ୍ରିନିଂ କରିବା ସହ ମୋବାଇଲ ଟେଷ୍ଟିଂ ଟିମ୍ ସହାୟତାରେ ସବୁ ଲୋକଙ୍କର ଆଣ୍ଟିଜେନ୍ ଓ ଆରଟିପିସିଆର୍ ପରୀକ୍ଷା ଆରମ୍ଭ ହୋଇଛି ।

ଲୋକାଲ ୱାୟାର

ଭୁବନେଶ୍ୱର,ମେ ୨୧(ଲୋକାଲ ୱାୟାର): ଆସନ୍ତା ୩ ଘଣ୍ଟାରେ ରାଜ୍ୟର ଅଧିକାଂଶ ଜିଲ୍ଲାରେ ଧୂଳିଝଡ଼, କାଳବୈଶାଖୀ ବର୍ଷା ଓ ବଜ୍ରପାତ ହେବାର ଆଶଙ୍କା ଥିବା ନେଇ ଭୁବନେଶ୍ୱରସ୍ଥିତ ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସତର୍କ ସୂଚନା ଜାରି କରାଯାଇଛି ।

ଗଞ୍ଜାମ, ଗଜପତି, ନୟାଗଡ଼, ଢେଙ୍କାନାଳ, କନ୍ଧମାଳ, କଟକ (କଟକ ସହର), ଖୋର୍ଦ୍ଧା (ଭୁବନେଶ୍ୱର), ଭଦ୍ରକ, ଯାଜପୁର, ଜଗତସିଂହପୁର, କେନ୍ଦ୍ରାପଡ଼ା, ମୟୂରଭଞ୍ଜ, କୋରାପୁଟ, ରାୟଗଡ଼ା, ସୁନ୍ଦରଗଡ଼, ଝାରସୁଗୁଡ଼ା ଓ ବରଗଡ ଜିଲ୍ଲା ପାଇଁ ସତର୍କ ସୂଚନା ଜାରି କରିଛି ପାଣିପାଗ ବିଭାଗ ।

ସେହିପରି କେନ୍ଦୁଝର, ନବରଙ୍ଗପୁର, ମାଲକାନଗିରି, ପୁରୀ, ବୌଦ୍ଧ, ଦେବଗଡ଼, ବାଲେଶ୍ୱର ଓ ସମ୍ବଲପୁରରେ ମଧ୍ୟ କାଳବୈଶାଖୀ ଆଶଙ୍କା ରହିଛି ।

ଏହି ସବୁ ଜିଲ୍ଲାରେ ସାଧାରଣରୁ ମଧ୍ୟମ ଧରଣର ବର୍ଷା ହେବା ସହ ଘଡଘଡି ଓ ବଜ୍ରପାତ ହେବ ବୋଲି ସତର୍କ କରାଯାଇଛି । ଏହା ସହ ୪୦ରୁ ୫୦ କିମି ବେଗରେ ପବନ ବହିପାରେ ।

ଲୋକଙ୍କୁ ନିରାପଦ ସ୍ଥାନକୁ ଯିବାକୁ ପାଣିପାଗ ବିଭାଗ ପରାମର୍ଶ ଦେଇଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଜାନୁଆରୀ ୯(ଲୋକାଲ ୱାୟାର): ଓଡ଼ିଶା ସଙ୍ଗୀତ ନାଟକ ଏକାଡେମୀର ପରିଷଦରେ ଏବଂ ସଂସ୍କୃତି କ୍ଷେତ୍ରରେ ଗଜପତି ଜିଲ୍ଲାକୁ ଉପେକ୍ଷିତ କରାଯାଉଥିବା ନେଇ ସଂସ୍କୃତି ମନ୍ତ୍ରୀଙ୍କୁ ଚିଠି ଲେଖିଛନ୍ତି ବିଧାୟକ କେ. ନାରାୟଣ ରାଓ ।

ସେ ଚିଠିରେ ଲେଖିଛନ୍ତି, ଓଡ଼ିଶୀ ସଙ୍ଗୀତର ପ୍ରାଣକେନ୍ଦ୍ର ତଥା ପ୍ରଥମ ଓଡ଼ିଆ ନାଟକ ତଥା ରଙ୍ଗମଞ୍ଚକୁ ସୃଷ୍ଟି କରିଥିବା ପାରଳାମାଟି, ଗଜପତି ଜିଲ୍ଲାକୁ କ୍ରମାଗତ ଭାବେ ସାଂସ୍କୃତିକ କ୍ଷେତ୍ରରେ ରାଜ୍ୟ ସରକାର ଅବହେଳା କରି ଆସୁଛନ୍ତି ।

ଦୀର୍ଘ ୧୦ବର୍ଷ ହେଲା ଏକାଡେମୀର ପରିଷଦରେ ଗଜପତି ଜିଲ୍ଲାର କୌଣସି ଅନୁଷ୍ଠାନ କିମ୍ବା ବ୍ୟକ୍ତିବିଶେଷକୁ ଅନ୍ତର୍ଭୁକ୍ତ ନକରିବା ଅତ୍ୟନ୍ତ ଦୁର୍ଭାଗ୍ୟର ବିଷୟ ।

ଏପରିକି ଦୀର୍ଘ ୨୫ ବର୍ଷ ମଧ୍ୟରେ ଏଠାରେ କୌଣସି କଳାକାରଙ୍କୁ ଓଡ଼ିଶା ସଙ୍ଗୀତ ନାଟକ ଏକାଡେମୀ ଦ୍ୱାରା ପୁରସ୍କୃତ କରାନଯିବା ଯୋଗୁ ସ୍ଥାନୀୟ କଳାକାର ହତାଶ ହୋଇପଡ଼ିଛନ୍ତି ।

ଜିଲ୍ଲା ସଦରମହକୁମାରେ ସଂସ୍କୃତି ଭବନଟିଏ ନିର୍ମାଣ ହୋଇପାରୁନି । ଯାହା ସାଂସ୍କୃତିକ ବିକାଶ କ୍ଷେତ୍ରରେ ଘୋର ଅନ୍ତରାୟ ସୃଷ୍ଟି କରୁଛି ।

ଚଳିତ ପରିଷଦ ପାଇଁ ଜିଲ୍ଲା ପ୍ରଶାସନ ଏବଂ ମୁଁ ନିଜେ ଆମ ଜିଲ୍ଲାରୁ କୌଣସି ଅନୁଷ୍ଠାନ କିମ୍ବା ବ୍ୟକ୍ତିଙ୍କୁ ସଦସ୍ୟଭାବେ ଗ୍ରହଣ କରିବା ପାଇଁ ଅନୁରୋଧ କରିଥିଲେ ମଧ୍ୟ ଏଥିରେ ଗଜପତି ଜିଲ୍ଲାକୁ ସାମିଲ ନକରିବା ଗଜପତିବାସୀ ତଥା କଳାପ୍ରେମୀଙ୍କ ମନରେ ଅନେକ ପ୍ରଶ୍ନବାଚୀ ସୃଷ୍ଟି କରିଛି ।

ଲୋକାଲ ୱାୟାର

ପାରଳାଖେମୁଣ୍ଡି, ଜାନୁଆରୀ ୩(ଲୋକାଲ ୱାୟାର): ଗଜପତି ଜିଲ୍ଲା କାଶୀନଗରରେ ଗତ ମାସ ୧୬ ତାରିଖରେ ଜଣେ ବ୍ୟବସାୟୀଙ୍କ ୭ ବର୍ଷର ପୁଅକୁ ଅପହରଣ ଘଟଣାରେ ଜଣେ ନାବାଳକ ସମେତ ୮ ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିବା ରବିବାର କହିଛନ୍ତି ଏସପି ତପନ ପଟ୍ଟନାୟକ ।

ଅଭିଯୁକ୍ତମାନେ ଅପହୃତ ଶିଶୁଟିର ପିତାଙ୍କୁ ପ୍ରଥମେ ୫୦ ଲକ୍ଷ ଟଙ୍କା ମାଗିଥିଲେ ମଧ୍ୟ ପରେ ସାଢ଼େ ୭ ଲକ୍ଷ ଟଙ୍କା ନେଇ ଛାଡ଼ିଥିଲେ ।

ଗିରଫ ଅଭିଯୁକ୍ତମାନେ ହେଲେ କାଶୀନଗର ଅଞ୍ଚଳର କାର୍ମି ଚୈତନ୍ୟ (୧୯), ପ୍ରଶାନ୍ତ ଲିମା (୨୬), ଗୁନାପୁ କଲ୍ୟାଣ କୁମାର (୧୯), ବିନୋଦ ଲିମା (୨୨), ରବି ମାଛ (୨୨), ପୂର୍ଣ୍ଣଚନ୍ଦ୍ର ସଉରା (୨୦), ଜାକୋବ ମିଶାଲ୍ (୧୯) ଏବଂ ଜଣେ ନାବାଳକ ।

ସେମାନଙ୍କ ଠାରୁ ୨.୨୧ ଲକ୍ଷ ଟଙ୍କା, କାର୍, ୫ଟି ବାଇକ୍ଏବଂ ୭ଟି ମୋବାଇଲ ଫୋନ୍ ଜବତ କରାଯାଇଛି ।

ସହଜରେ ଟଙ୍କା ରୋଜଗାର କରିବା ଲକ୍ଷ୍ୟରେ ଅଭିଯୁକ୍ତମାନେ ଏହି କାଣ୍ଡ ଘଟାଇଥିଲେ ।

ଅପହୃତ ଶିଶୁର ପିତା କାଜୁ ବ୍ୟବସାୟୀ ଜାମି ଗୋପୀ ଟଙ୍କା ଦେଇ ପୁଅକୁ ମୁକୁଳାଇଥିଲେ ମଧ୍ୟ ପୁଲିସକୁ ଭୟରେ କିଛି କହି ନଥିଲେ । ତଥାପି ପୁଲିସ ସନେ୍ଦହରେ ଘଟଣାର ତଦନ୍ତ ଚଳାଇଥିଲା ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୨୦(ଲୋକାଲ ୱାୟାର): ପର୍ଯ୍ୟଟନ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ଜିରାଙ୍ଗ ଗସ୍ତରେ ଯାଇ ବିିଭିନ୍ନ ପ୍ରକଳ୍ପର ଶୁଭାରମ୍ଭ କରିଛନ୍ତି ।

ପଦ୍ମସରବର ଠାରେ ୫୨ଲକ୍ଷ ଟଙ୍କାର ପିଆନୋ କି ୱେୟାର ପ୍ରକଳ୍ପ, ହରଭାଙ୍ଗି ଡ୍ୟାମକୁ ଆହୁରି ଆକୃଷ୍ଟ କରିବା ପାଇଁ ୨୫ଲକ୍ଷ ଟଙ୍କାର ୱାଚ୍ ଟାୱାର୍, ସିଟିଂ ବେଞ୍ଚ, ଟଏଲେଟ୍ କମ୍ପ୍ଲେକ୍ସ ଓ ଅନ୍ୟାନ୍ୟ ପ୍ରକଳ୍ପ, ଖସଡ଼ା ଜଳପ୍ରପାତ ଠାରେ ୩୫ଲକ୍ଷ ଟଙ୍କାର ଏକ ପିକିନିକ୍ ପିଣ୍ଡିର ଶୁଭ ଉଦଘାଟନ କରିଥିଲେ ।

ଏହି ଅବସରରେ ଶ୍ରୀ ପାଣିଗ୍ରାହୀ କହିଥିଲେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଜପତି ଜିଲ୍ଲାର ଜିରାଙ୍ଗର ଉନ୍ନତି ପାଇଁ ଯେଉଁ ସ୍ୱପ୍ନ ଦେଖିଥିଲେ ତାହା ପର୍ଯ୍ୟଟନ ବିଭାଗ ଦ୍ୱାରା ସଫଳ ରୂପ ନେବାକୁ ଯାଉଛି ।

ଏହି କାର୍ଯ୍ୟକ୍ରମରେ ସାଂସଦ ଚନ୍ଦ୍ରଶେଖର ସାହୁ, ମୋହନା ବିଧାୟକ ଦାଶରଥୀ ଗମାଙ୍ଗ ଓ ଗଜପତି ଜିଲ୍ଲାପାଳ ପ୍ରମୁଖ ଉପସ୍ଥିତ ଥିଲେ ।

ଲୋକାଲ ୱାୟାର

ବ୍ରହ୍ମପୁର, ଡିସେମ୍ବର ୧୧ (ଲୋକାଲ ୱାୟାର): ଋଣ ଠକେଇ ଅଭିଯୋଗରେ ଗଜପତି ଜିଲ୍ଲା ପାରଳାଖେମୁଣ୍ଡିରେ ଥିବା ବ୍ରହ୍ମପୁର କେନ୍ଦ୍ରୀୟ ସମବାୟ (ବିସିସି) ବ୍ୟାଙ୍କ ମହିଳା ଶାଖାର ବଣିଆ କେ. ଗୋପୀ ଓ ତକ୍ରାଳୀନ ମ୍ୟାନେଜର ଆର. ଭୁଜଙ୍ଗ ରାଓଙ୍କୁ ଗିରଫ କରାଯାଇଛି ।

ବ୍ୟାଙ୍କର ଭାରପ୍ରାପ୍ତ ମ୍ୟାନେଜର ବିନୋଦ କୁମାର ନନ୍ଦଙ୍କ ଅଭିଯୋଗ କ୍ରମେ ଉଭୟଙ୍କୁ ଗିରଫ କରାଯିବା ସହ ଗୁରୁତ୍ୱପୂର୍ଣ୍ଣ କାଗଜପତ୍ର ଓ ନକଲି ବନ୍ଧକ ସୁନା ଜବତ ହୋଇଛି ।

ଅଧିକ ତଦନ୍ତ ଜାରି ରହିଛି ବୋଲି ପାରଳାଖେମୁଣ୍ଡି ଥାନା ଆଇଆଇସି ବିବେକାନନ୍ଦ ସ୍ୱାଇଁ କହିଛନ୍ତି ।

୨୦୧୬-୧୭ରେ ବଣିଆ କେ. ଗୋପୀ ପ୍ରାୟ ୪୮୦ ଗ୍ରାମ ସୁନା ବନ୍ଧା ରଖି ୬.୮୪ ଲକ୍ଷ ଟଙ୍କା ଋଣ ନେଇଥିଲେ । ଏବେ ଋଣର ପରିମାଣ ୧୧.୫୩ ଲକ୍ଷ ଟଙ୍କା ରହିଛି ।

ବିସିସି ବ୍ୟାଙ୍କ ପ୍ରଶାସକ ତଥା ଗଞ୍ଜାମ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେଙ୍କ ନିଦେ୍ର୍ଦଶ କ୍ରମେ ଗଞ୍ଜାମ ଡିଆରସିଏସ ବିଶ୍ୱରଞ୍ଜନ ଦାଶ ଏହି ମାମଲାର ତଦନ୍ତ କରିଥିଲେ । ତଦନ୍ତ ବେଳେ ବନ୍ଧକ ସୁନା ନକଲି ବୋଲି ଜଣା ପଡ଼ିଥିଲା ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୪(ଲୋକାଲ ୱାୟାର): ‘ମୋ ସ୍କୁଲ ‘ ଅଭିଯାନର ୧୯ତମ କାର୍ଯ୍ୟକାରୀ ପରିଷଦ ବୈଠକ ବିଦ୍ୟାଳୟ ଓ ଗଣଶିକ୍ଷା ବିଭାଗର ପ୍ରମୁଖ ଶାସନସଚିବ ସତ୍ୟବ୍ରତ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ବେଳେ ବୈଠକରେ ୧୦.୭୫ କୋଟି ଟଙ୍କାର ପ୍ରକଳ୍ପକୁ ଅନୁମୋଦନ ମିଳିଛି ।

ବୈଠକରେ ରାଜ୍ୟର ୨୮ଟି ଜିଲ୍ଲାର ୨୬୫୭ଟି ବିଦ୍ୟାଳୟର ପ୍ରକଳ୍ପକୁ ସ୍ୱୀକୃତି ପ୍ରଦାନ କରାଯାଇଛି ।

ଏ ପର୍ଯ୍ୟନ୍ତ ବିଭାଗରେ ୨୦ ହଜାର ଛାତ୍ରଛାତ୍ରୀଙ୍କୁ ସଂଶ୍ଳିଷ୍ଟ କରାଯାଇପାରିଛି ।

ବୈଠକରେ ଗଜପତିରେ ୫୩.୭୨ ଲକ୍ଷ ଟଙ୍କା, ସୁନ୍ଦରଗଡ଼ରେ ୪୬.୭୨ ଲକ୍ଷ, କଳାହାଣ୍ଡିରେ ୩୬.୦୭ ଲକ୍ଷ, ବାଲେଶ୍ୱରରେ ୩୫.୯୨ ଲକ୍ଷ ଏବଂ କଟକରେ ୨୧.୯୩ ଲକ୍ଷ ଟଙ୍କା ପୁରାତନ ଛାତ୍ରଛାତ୍ରୀମାନେ ପ୍ରଦାନ କରିଥିବା ଜଣାପଡ଼ିଛି ।

ଲୋକାଲ ୱାୟାର

ବ୍ରହ୍ମପୁର, ଡିସେମ୍ବର ୩(ଲୋକାଲ ୱାୟାର): ଗଜପତି ଜିଲ୍ଲାରେ ଗତ ୩ ଦିନ ଧରି ଏବଂ କନ୍ଧମାଳ ଜିଲ୍ଲାରେ ଗତ ଦୁଇ ଦିନ ଧରି ନୂଆ କରୋନା ଆକ୍ରାନ୍ତ ଚିହ୍ନଟ ହୋଇ ନଥିବାରୁ ଦୁଇ ଜିଲ୍ଲାର ଲୋକେ ଆଶ୍ୱସ୍ତ ହୋଇଛନ୍ତି ।

ଏହି ଦୁଇ ଆଦିବାସୀ ବହୁଳ ଜିଲ୍ଲାରେ ଏବେ ସକ୍ରିୟ କରୋନା ମାମଲା ୨୦ରୁ ତଳକୁ ଖସି ଆସିଛି ।

ଗତ ୭ ଦିନ ମଧ୍ୟରେ ଗଜପତି ଜିଲ୍ଲାରେ ମାତ୍ର ୨ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ତେବେ ଶେଷ ତିନି ଦିନରେ କେହି ଚିହ୍ନଟ ହୋଇନାହାନ୍ତି ।

ଜିଲ୍ଲାରେ ମୋଟ ୩୯୫୧ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୩୯୦୪ ଜଣ ସୁସ୍ଥ ହୋଇଛନ୍ତି । ଏବେ ପ୍ରାୟ ୧୪ ଜଣ ଚିକିତ୍ସିତ ହେଉଥିବା ବେଳେ ସେମାନଙ୍କ ସ୍ୱାସ୍ଥ୍ୟାବସ୍ଥା ଭଲ ଅଛି ।

ମେ ୨୩ରେ ଜିଲ୍ଲାର ପ୍ରଥମ କୋଭିଡ ରୋଗୀ ଚିହ୍ନଟ ହୋଇଥିଲେ । ସେହିପରି କନ୍ଧମାଳ ଜିଲ୍ଲାରେ ଦୁଇ ଦିନ ଧରି କୌଣସି ନୂଆ ଆକ୍ରାନ୍ତ ନାହାନ୍ତି ।

ଜିଲ୍ଲାରେ ମୋଟ କରୋନା ଆକ୍ରାନ୍ତ ୫ ହଜାର ୯୦୮ ଥିବା ବେଳେ ୫ ହଜାର ୮୫୭ ଜଣ ସୁସ୍ଥ ହୋଇଛନ୍ତି ।

ଗୁରୁବାର ଦିନ ଜିଲ୍ଲାରେ ସକ୍ରିୟ ମାମଲା ୧୮କୁ ହ୍ରାସ ପାଇଛି ।

ଏ ପର୍ଯ୍ୟନ୍ତ କରୋନାରେ ଗଜପତି ଜିଲ୍ଲାରେ ୩୨ ଏବଂ କନ୍ଧମାଳ ଜିଲ୍ଲାରେ ୩୩ ଜଣ କରୋନାରେ ପ୍ରାଣ ହରାଇଛନ୍ତି ।

ଲୋକାଲ ୱାୟାର

ବ୍ରହ୍ମପୁର, ନଭେମ୍ବର ୨୮(ଲୋକାଲ ୱାୟାର): ଶନିବାର ଗଜପତି ଓ କନ୍ଧମାଳ ଜିଲ୍ଲାରୁ କେହି ବି କରୋନା ପଜିଟିଭ ଚିହ୍ନଟ ହୋଇନାହାନ୍ତି ।

ପ୍ରଥମ ଥର ପାଇଁ କନ୍ଧମାଳ ଜିଲ୍ଲାରେ କରୋନା ପଜିଟିଭଙ୍କ ସଂଖ୍ୟା ଶୂନ ଥିବା ବେଳେ ଗଜପତି ଜିଲ୍ଲାରେ ଗତ ସପ୍ତାହକ ମଧ୍ୟରେ ଦ୍ୱିତୀୟ ଥର ଏହି ସଫଳତା ଦୋହରାଇଛି ।

ନଭେମ୍ବର ୨୨ରେ ଗଜପତି ଜିଲ୍ଲାରେ କରୋନା ପଜିଟିଭଙ୍କ ସଂଖ୍ୟା ଶୂନ ଥିଲା । ଶନିବାର ୬୦୪ ନମୁନା ପରୀକ୍ଷା ହୋଇଥିଲା ।

ସମସ୍ତ ରିପୋର୍ଟ ନେଗେଟିଭ ଆସିଛି ବୋଲି ଜିଲ୍ଲାର ଜଣେ ବରିଷ୍ଠ ଅଧିକାରୀ କହିଛନ୍ତି ।

ସେହିପରି କନ୍ଧମାଳ ଜିଲ୍ଲା ପ୍ରଶାସନ ପରୀକ୍ଷା କରିଥିବା ୮୨୦ ନମୁନା ମଧ୍ୟରୁ ସମସ୍ତଙ୍କ ରିପୋର୍ଟ ନେଗେଟିଭ ଆସିଛି ।

ଗଜପତି ଓ କନ୍ଧମାଳ ଜିଲ୍ଲାରେ ସମୁଦାୟ କରୋନା ରୋଗୀଙ୍କ ସଂଖ୍ୟା ଯଥାକ୍ରମେ ୩୯୪୯ ଓ ୫୮୮୮ ରହିଛି ।

ଗଜପତି ଜିଲ୍ଲାରେ ପ୍ରଥମ ଥର ପାଇଁ ସକ୍ରିୟ କରୋନା ରୋଗୀଙ୍କ ସଂଖ୍ୟା ୨୦ରୁ କମ୍ ରହିଛି ।

ଜିଲ୍ଲାରେ ସୁସ୍ଥ ସଂଖ୍ୟା ୨୮୯୭କୁ ବୃଦ୍ଧି ପାଇଥିବା ବେଳେ ମୃତ୍ୟୁ ସଂଖ୍ୟା୩୨ରେ ସ୍ଥିର ରହିଛି ।

ସେହିପରି କନ୍ଧମାଳ ଜିଲ୍ଲାରେ ସକ୍ରିୟ ରୋଗୀଙ୍କ ସଂଖ୍ୟା ୨୧କୁ ଖସି ଆସିଛି ।

ଜିଲ୍ଲାରେ ୫୮୩୪ ସୁସ୍ଥ ହୋଇଥିବା ବେଳେ ମୃତ୍ୟୁ ସଂଖ୍ୟା ୩୩ରେ ସ୍ଥିର ରହିଛି ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୨୭(ଲୋକାଲ ୱାୟାର): ପାରଳାଖେମୁଣ୍ଡି ବିଧାୟକଙ୍କ ସମ୍ପର୍କୀୟଙ୍କୁ ଆକ୍ରମଣ କରିଥିବା ଅଭିଯୋଗରେ ଶୁକ୍ରବାର ପୁଲିସ ୪୦ ବର୍ଷୀୟ ମହିଳା ସମେତ ତାଙ୍କର ୨୦ ବର୍ଷୀୟ ପୁଅକୁ ଗିରଫ କରିଛି ।

ମିଳିଥିବା ସୂଚନା ଅନୁସାରେ ବୁଧବାର ସନ୍ଧ୍ୟାରେ ଗଜପତି ଜିଲ୍ଲାର ପାରଳାଖେମୁଣ୍ଡି ଏରଡେଲାଷ୍ଟ୍ରିଟ୍ ସ୍ଥିତ ବାସଭବନରେ ବିଧାୟକ କେ ନାରାୟଣ ରାଓଙ୍କ ସମ୍ପର୍କୀୟା ପି.ତିଳୋତ୍ତମା ଏକା ଥିବା ବେଳେ ତାଙ୍କ ଉପରକୁ ମରଣାନ୍ତକ ଆକ୍ରମଣ କରିଥିଲେ ଏସ୍ କଟମ୍ମା, ପୁଅ ଏସ୍ ତେଜା ରାଓ ଓ ବନ୍ଧୁ ଜି. ରୋହିତ ।

ପୁଲିସ ଏହି ଘଟଣାରେ ଦୁଇଜଣଙ୍କୁ ଗିରଫ କରିବା ସହ ଦୁଇଟି ମୋଟର ସାଇକେଲ, ୩ଟି ମୋବାଇଲ ଓ ସେମାନଙ୍କର ଜୋତା ଜବତ୍ କରିଛି ।

ଅଭିଯୁକ୍ତ ମହିଳା ବିଧାୟକଙ୍କ ସମ୍ପର୍କୀୟଙ୍କ ସହ କଥା ହେଉଥିବା ବେଳେ ଅନ୍ୟ ଦୁଇଜଣ ତାଙ୍କ ତଣ୍ଟିଚିପି ଦେବାକୁ ଚେଷ୍ଟା କରିଥିଲେ ।

ଘଟଣାସ୍ଥଳରେ ପଡ଼ୋଶୀ ପହଞ୍ଚିବା ଫଳରେ ଅଭିଯୁକ୍ତମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ ।

ଲୋକାଲ ୱାୟାର