ଗଞ୍ଜାମ

ଭୁବନେଶ୍ୱର, ମାର୍ଚ୍ଚ ୧୮(ଲୋକାଲ ୱାୟାର): ଓଡ଼ିଶା ସଙ୍ଗୀତ ନାଟକ ଏକାଡେମୀ ଓ ଭଞ୍ଜ ଗ୍ରାମ୍ୟ ବିକାଶ ପ୍ରତିଷ୍ଠାନ, କୁଲାଡ଼, ଗଞ୍ଜାମ ଭଞ୍ଜ ମଣ୍ଡପରେ ମିଳିତ ଆନୁକୂଲ୍ୟରେ ଆସନ୍ତା ୨୨ତାରିଖ ସନ୍ଧ୍ୟା ସାଢ଼େ ୬ଟାରେ ଅନୁଷ୍ଠିତ ହେବ ।

ଏଥିରେ ବିଶିଷ୍ଟ ସ୍ତମ୍ଭକାର ତଥା କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାରପ୍ରାପ୍ତ ଶିଶୁ ସାହିତ୍ୟ ଦାଶ ବେନହୁର ମୁଖ୍ୟ ଅତିଥି, ବିଶିଷ୍ଟ ଭଞ୍ଜ ସାହିତ୍ୟ ଆଲୋଚକ ପ୍ର. ଡ. ବାଉରୀବନ୍ଧୁ ସାହୁ ମୁଖ୍ୟ ବକ୍ତା ଭାବେ ଯୋଗଦେବେ ।

ଭଞ୍ଜ ଗ୍ରାମ୍ୟ ବିକାଶ ପ୍ରତିଷ୍ଠାନ, କୁଲାଡ଼ର ସଭାପତି ଡ. ଶାନ୍ତନୁ କୁମାର ରଥ ସଭାପତିତ୍ୱ କରିବେ । ଶେଷରେ ଲକ୍ଷ୍ମଣ କୁମାର ପଣ୍ଡା ଧନ୍ୟବାଦ ଦେବେ ।

ପୂଜ୍ୟପୂଜା ଅବସରରେ କବି ସମ୍ରାଟ ଉପେନ୍ଦ୍ର ଭଞ୍ଜଙ୍କ ରଚିତ ସଙ୍ଗୀତ ଗାନ କରାଯିବ ।

କରୋନା କଟକଣା ଭିତରେ ଏହି ସଭା ଆୟୋଜିତ ହେବ ବୋଲି ଏକାଡେମୀ ପକ୍ଷରୁ କୁହାଯାଇଛି ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୧୧(ଲୋକାଲ ୱାୟାର): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁବାର ଭିଡିଓ କନଫରେନ୍ସିଂ ଜରିଆରେ ଗଞ୍ଜାମ ଜିଲ୍ଲାର ହିଞ୍ଜିଳି ପୌର ପରିଷଦରେ ୨୮ କୋଟିରୁ ଅଧିକ ଟଙ୍କାର ବିଭିନ୍ନ ପ୍ରକଳ୍ପ ଉଦଘାଟନ କରିଛନ୍ତି ।

ଏହି ଅବସରରେ ମୁଖ୍ୟମନ୍ତ୍ରୀ କହିଥିଲେ, ପିଲାମାନେ ଏ ଜାତିର, ଦେଶର ଭବିଷ୍ୟତ । ଶିକ୍ଷା ହେଉଛି ପରିବର୍ତ୍ତନର ଚାବିକାଠି ।

ଶିକ୍ଷା ହେଉଛି ପ୍ରକୃତ ସଶକ୍ତିକରଣ । ତେଣୁ ହିଞ୍ଜିଳିରେ ସେ ଶିକ୍ଷାର ବିକାଶକୁ ଗୁରୁତ୍ୱ ଦେଇ ଆସିଛନ୍ତି ।

କୋଭିଡ ମହାମାରୀ ଯୋଗୁ ସେ ବହୁ ଦିନ ହେବ ହିଞ୍ଜିଳି ଯାଇ ପାରିନାହାନ୍ତି । ଶୀଘ୍ର ସେ ହିଞ୍ଜିଳି ଯିବାକୁ ମଧ୍ୟ ପ୍ରତିଶ୍ରୁତି ଦେଇଥିଲେ ।

କୋଭିଡ ଯୁଦ୍ଧରେ ଗଞ୍ଜାମ ଜିଲ୍ଲାବାସୀଙ୍କ ପ୍ରଶଂସା କରି ସେ କହିଥିଲେ,କରୋନା ମହାମାରୀ ସହ ଆପଣମାନେ ଯେପରି ଲଢ଼ିଲେ, ଗଞ୍ଜାମ ଯେପରି ଲଢ଼ିଲା, ତାହା ସାରା ବିଶ୍ୱ ଦେଖିଛି ।

ଆପଣମାନଙ୍କ ସହଯୋଗରେ ଆଜି ଆମେ କରୋନାକୁ ନିୟନ୍ତ୍ରଣ କରିବାରେ ସଫଳ ହୋଇଛୁ । ଏ ଦିଗରେ ଗଞ୍ଜାମ ସାରା ବିଶ୍ୱରେ ପ୍ରଶଂସା ପାଇଥିଲା ।

ସେଥିପାଇଁ ମୁଁ ଆପଣମାନଙ୍କୁ ସମସ୍ତଙ୍କୁ, ଆମର ପଞ୍ଚାୟତ ପ୍ରତିନିଧିମାନଙ୍କୁ ମିଶନ ଶକ୍ତିର ମା’ ମାନଙ୍କୁ ଓ କୋଭିଡ ଯୋଦ୍ଧାମାନଙ୍କୁ ଧନ୍ୟବାଦ ଜଣାଉଛି ।

ଟିକାକରଣ ଆରମ୍ଭ ହୋଇଥିଲେ ମଧ୍ୟବିପଦ ଟଳି ନଥିବାରୁ ସମସ୍ତଙ୍କୁ ସତର୍କ ରହିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ ।

ଲୋକାଲ ୱାୟାର

ଭୁବନେଶ୍ୱର, ଜାନୁଆରୀ ୨୪(ଲୋକାଲ ୱାୟାର): ଚଳିତ ବର୍ଷ ଅଖ୍ୟାତ ଗ୍ରାମୀଣ କବି କାଳୁଚରଣ ପ୍ରଧାନ ପାଇବେ ସାହିତ୍ୟ ଚର୍ଚ୍ଚା ପୁରସ୍କାର ।

ଏନେଇ ପୁରସ୍କାରଟିର ଉଦ୍ୟୋକ୍ତା ସାହିତ୍ୟ ଚର୍ଚ୍ଚା ଇ-ପତ୍ରିକା ପକ୍ଷରୁ ଘୋଷଣା ହୋଇଛି । ଗଞ୍ଜାମ ଜିଲ୍ଲାର ଗୁଣ୍ଠପଡ଼ା ଗ୍ରାମର ଅନାଲୋଚିତ କବି ଶ୍ରୀ ପ୍ରଧାନ ।

ବୃତ୍ତିରେ ସେ ଜଣେ ବଢ଼େଇ । କିନ୍ତୁ ସେ ଏଯାବତ୍ ୭ଟି ଉଚ୍ଚକୋଟୀର କାବ୍ୟ ତଥା ତିନି ହଜାରରୁ ଉଦ୍ଧ୍ୱର୍ କବିତା ଲେଖିସାରିଲେଣି ।

‘କ’ ଅନୁପ୍ରାସରେ ତାଙ୍କ ଦ୍ୱାରା ରଚିତ ‘କର୍ଦ୍ଦମ କନ୍ୟା’ ଏକ ମନୋରମ କାବ୍ୟ । ଏସବୁ ଲେଖା ଏପର୍ଯ୍ୟନ୍ତ ପ୍ରକାଶିତ ହୋଇ ନାହିଁ ।

ଏହାବାଦ୍ ଜୀବନ ତତ୍ତ୍ୱ ସମ୍ପର୍କରେ ଦୁଇଟି ପ୍ରବନ୍ଧ ମଧ୍ୟ ତାଙ୍କ ଦ୍ୱାରା ରଚିତ । ପୁରସ୍କାର ବାବଦରେ ତାଙ୍କୁ ମାନପତ୍ର, ୧୦ହଜାର ଟଙ୍କା ସହ ତାଙ୍କର ଏକ ଅପ୍ରକାଶିତ ପୁସ୍ତକର ପ୍ରକାଶନ ମଧ୍ୟ କରାଯିବ ।

ଆସନ୍ତା ଫେବ୍ରୁଆରୀରେ ଆୟୋଜିତ ଅନଲାଇନ୍ କାର୍ଯ୍ୟକ୍ରମରେ କବିଙ୍କୁ ପୁରସ୍କୃତ କରାଯିବ ।

ଲୋକାଲ ୱାୟାର

ବ୍ରହ୍ମପୁର, ଜାନୁଆରୀ ୧୯(ଲୋକାଲ ୱାୟାର): ଗଞ୍ଜାମ ଜିଲ୍ଲା ବ୍ରହ୍ମପୁରସ୍ଥିତ ଗୋଷାଣୀ ନୂଆଗାଁ, ମୀରାବିହାର ଠାରେ ୧୯୭୫ ମସିହାରେ ସ୍ଥାପିତ ଶ୍ରୀ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ରର ପ୍ରତିଷ୍ଠାତା ସ୍ୱର୍ଗତ ସାଧୁ ଚରଣ ପଟ୍ଟନାୟକଙ୍କ ସ୍ମୃତିରେ ଏକ ସ୍ୱତନ୍ତ୍ର ଡାକ ଲଫାପା ବ୍ରହ୍ମପୁର ମୁଖ୍ୟ ଡାକଘର ପ୍ରାଙ୍ଗଣରେ ଅନୁଷ୍ଠିତ ହୋଇଯାଇଛି ।

ସଂପୃକ୍ତ ବିଦ୍ୟାଳୟ ଓ ଡାକ ବିଭାଗର ମିଳିତ ଆନୁକୂଲ୍ୟରେ ଏଠାରେ ଆୟୋଜିତ ଉତ୍ସବରେ ଓଡିଶା ଡାକ ପରିମଣ୍ଡଳ,ଭୁବନେଶ୍ୱରର ମହାଡାକପାଳ କର୍ଣ୍ଣେଲ ଜଳେଶ୍ୱର କହଁର ମୁଖ୍ୟ ଅତିଥି ଭାବେ ଯୋଗଦେଇ ସ୍ୱତନ୍ତ୍ର ଡାକ ଲଫାଫାକୁ ଉନ୍ମୋଚନ କରିଥିଲେ ।

ସମ୍ମାନିତ ଅତିଥି ଭାବେ ବ୍ରହ୍ମପୁର ଡାକ ମୁଖ୍ୟାଳୟର ତତ୍ତ୍ୱାବଧାରକ ତାରିଣୀ ଚରଣ ପାଢୀ ଯୋଗଦେଇଥିବା ବେଳେ ଶ୍ରୀ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ରର ପ୍ରାକ୍ତନ ଅଧ୍ୟକ୍ଷ ଆଶିଷ କୁମାର ପାଠୀ, ବର୍ତ୍ତମାନର ଅଧ୍ୟକ୍ଷ ସସ୍ମିତା ପଣ୍ଡା, ବିଦ୍ୟାଳୟର ସେକ୍ରେଟାରୀ ଲଲାଟେନ୍ଦୁ ସାମନ୍ତ, ସାଉଥ୍ ଓଡିଶା ଫିଲାଟେଲିକ୍ ଆସୋସିଏସନର ସଭାପତି ଡଃ. ପ୍ରାଣଚାନ୍ଦ ପଣ୍ଡା ଓ ଅବସରପ୍ରାପ୍ତ ଭିଜିଲାନ୍ସ ମୁଖ୍ୟ(ଟେଲିକମ) ପ୍ରଭାତ ଚନ୍ଦ୍ର ପଟ୍ଟନାୟକ ପ୍ରମୁଖ ଅତିଥି ଭାବେ ଯୋଗଦେଇଥିଲେ ।

ଅନ୍ତର୍ଜାତୀୟ ଫିଲାଟେଲିଷ୍ଟ ବିଜୟ କୁମାର ବିଶ୍ୱାଳଙ୍କ ଉଦ୍ୟମରେ ଏହି ସ୍ୱତନ୍ତ୍ର ଲଫାପା ଉନ୍ମୋଚନ କାର୍ଯ୍ୟ ସଂପାଦିତ ହୋଇଥିଲା ।

ଫିଲାଟେଲିଷ୍ଟ କାଶୀନାଥ ସାହୁ ଓ ମାନସ ଦାସ ପ୍ରମୁଖ କାର୍ଯ୍ୟକ୍ରମରେ ସହଯୋଗ କରିଥିଲେ ।

ଅନ୍ୟମାନଙ୍କ ମଧ୍ୟରେ ଭାଗିରଥୀ ମହାପାତ୍ର ଓ ବିକାଶ ଚନ୍ଦ୍ର ପାଢୀ ପ୍ରମୁଖ ଉପସ୍ଥିତ ଥିଲେ ।

ଲୋକାଲ ୱାୟାର

ବ୍ରହ୍ମପୁର, ଜାନୁଆରୀ ୧୮(ଲୋକାଲ ୱାୟାର): ବ୍ରହ୍ମପୁର ସହର ଉପକଣ୍ଠ ପଲ୍ଲୀଗୁମୁଲା ଗ୍ରାମ ନିକଟରେ ଏକ ଜେସିବି ଇଞ୍ଜିନ ମଧ୍ୟରେ ପଶି ଯାଇଥିବାରୁ ୨ଟି ସାପକୁ ସ୍ନେକ ହେଲ୍ପଲାଇନ ସଦସ୍ୟମାନେ ଉଦ୍ଧାର କରିଛନ୍ତି ।

ପଲ୍ଲୀଗୁମୁଲା ଗ୍ରାମସ୍ଥିତ ଏକ ବନ୍ଧର ସୌନ୍ଦର୍ଯ୍ୟକରଣ କାମରେ ମାଟି ଖୋଳିବାକୁ ଜେସିବି ମେସିନ ନିୟୋଜିତ ହୋଇଥିଲା ।

ପାଖରେ ଏକ ସିମେଣ୍ଟ ପାଇ ମଧ୍ୟରେ ଥିବା ଦୁଇଟି ଅଜଗର (ଗୋଟିଏ ୭ ଫୁଟ ଓ ଅନ୍ୟଟି ୧୧ଫୁଟ) ।

ସ୍ନେକ ହେଲପ ଲାଇନ ସଦସ୍ୟମାନେ ଖବର ପାଇ ସାପ ଦୁଇଟିକୁ ଉଦ୍ଧାର କରିବା ପରେ ଚିକିତ୍ସା କରିଥିଲେ । ପରେ ସଂରକ୍ଷିତ ଜଙ୍ଗଲରେ ସାପ ଦୁଇଟିକୁ ଛାଡ଼ି ଦିଆଯାଇଥିଲା ।

ଲୋକାଲ ୱାୟାର

ବ୍ରହ୍ମପୁର, ଜାନୁଆରୀ ୯(ଲୋକାଲ ୱାୟାର): ୨୫ ବର୍ଷର ଶାସନ କାଳରେ ବିଜେଡି ଓଡ଼ିଶାବାସୀଙ୍କ ସହ ବିଶ୍ୱାସଘାତକତା କରିଛି ବୋଲି ବିଜେପି ଜାତୀୟ ସାଧାରଣ ସମ୍ପାଦିକା ତଥା ଓଡ଼ିଶା ରାଜ୍ୟ ପ୍ରଭାରୀ ଡି.ପୁରନେ୍ଦଶ୍ୱରୀ ଶନିବାର ବ୍ରହ୍ମପୁର ଗସ୍ତ ଅବସରରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ।

ସେ କହିଛନ୍ତି, ରାଜ୍ୟରେ ଲୋକମାନେ ବହୁ ସମସ୍ୟାରେ ଥିବା ବେଳେ ରାଜ୍ୟ ସରକାର ବିକାଶର ମିଥ୍ୟ ପ୍ରଚାର ଚଳାଇଛନ୍ତି ।

ଗଞ୍ଜାମ ଜିଲ୍ଲାରେ ଶିଳ୍ପାୟନ କିମ୍ବା ରୋଜଗାର ନଥିବାରୁ ଲକ୍ଷ ଲକ୍ଷ ଲୋକ ରାଜ୍ୟ ବାହାରକୁ ଦାଦନ ଭାବେ ଖଟିବାକୁ ଯାଉଛନ୍ତି ।

ଗଞ୍ଜାମ ଜିଲ୍ଲାରେ ପ୍ରଧାନମନ୍ତ୍ରୀ ଆବାସ ଯୋଜନାରୁ ବହୁ ପ୍ରକୃତ ହିତାଧିକାରୀ ବାଦ୍ ପଡ଼ିଥିବା ବେଳେ ସ୍ଥାନୀୟ ମନ୍ତ୍ରୀଙ୍କ ସମର୍ଥକଙ୍କୁ ତାଲିକାରେ ସାମିଲ କରାଯାଇଛି ।

୨୦୧୪ ପରଠାରୁ ରାଜ୍ୟରେ ବିଜେପି ପ୍ରତି ସମର୍ଥନ ବଢ଼ୁଛି ଏବଂ ଆସନ୍ତା ନିର୍ବାଚନରେ ଦଳ ବିଜୟୀ ହେବ ବୋଲି ସେ କହିଥିଲେ ।

ଲୋକାଲ ୱାୟାର

ଭୁବନେଶ୍ୱର, ଜାନୁଆରୀ ୫(ଲୋକାଲ ୱାୟାର): ରାୟଗଡ଼ା ଜିଲ୍ଲାର ମୁନିଗୁଡ଼ା ଓ ବ୍ରହ୍ମପୁର ନିକଟରେ କ୍ରାଇମବ୍ରାଞ୍ଚ ଏସଟିଏଫ ଟିମ୍ ଏବଂ ଅବକାରୀ ବିଭାଗ ଭିନ୍ନ ଭିନ୍ନ ଚଢ଼ାଉରେ ପ୍ରାୟ ଦେଢ଼ କୋଟି ଟଙ୍କାର ଗଞ୍ଜେଇ ଜବତ କରିଥିବା ବେଳେ ୩ ଜଣଙ୍କୁ ଗିରଫ କରିଛି ।

ବ୍ରହ୍ମପୁର ଅବକାରୀ ବିଭାଗର କର୍ମଚାରୀମାନେ ରାଜପଥରେ ଏକ ନଡ଼ିଆକତା ବୋଝେଇ ଟ୍ରକ, ଏକ କାର ଏବଂ ଏକ ପିକ ଅପ୍ ଭ୍ୟାନକୁ ଅଟକାଇ ତଲାସୀ କରିବାରୁ ୧୧ କ୍ୱିଣ୍ଟାଲ ଗଞ୍ଜେଇ ଜବତ କରିଥିଲେ ।

ଜବତ ଗଞ୍ଜେଇର ବଜାର ମୂଲ୍ୟ ପ୍ରାୟ ୫୫ ଲକ୍ଷ ଟଙ୍କା ହେବ ବୋଲି କୁହାଯାଇଛି ।

ଏହି ଗଞ୍ଜେଇକୁ ଗଜପତିରୁ ଉତ୍ତରାଖଣ୍ଡ ନିଆଯାଉଥିବା ବେଳେ ଏହି କାରବାରରେ ଜଡ଼ିତ ତିନି ଜଣଙ୍କୁ ଗିରଫ କରାଯାଇଥିବା ବିଭାଗ ପକ୍ଷରୁ କୁହାଯାଇଛି ।

ଅପରପକ୍ଷରେ ରାୟଗଡ଼ା ଜିଲ୍ଲା ମୁନିଗୁଡ଼ାର ଟିକରପଦା ହରିଜନ ସାହି ନିକଟରେ ଏକ ୧୨ ଚକିଆ ଟ୍ରକକୁ ଆଜି କ୍ରାଇମବ୍ରାଞ୍ଚ ଏସଟିଏଫ ଟିମ୍ ଅଟକାଇ ତଲାସୀ କରିବାରୁ ବିପୁଳ ପରିମାଣର ଗଞ୍ଜେଇ ଜବତ କରିଛନ୍ତି ।

ଟ୍ରକରୁ ପ୍ରାୟ ୨ ଟନ୍ ଗଞ୍ଜେଇ ମିଳିଥିବା ବେଳେ ଏହାର ବଜାର ମୂଲ୍ୟ ପ୍ରାୟ ୧ କୋଟି ଟଙ୍କା ହେବ ।

ତେବେ ଟ୍ରକରେ ଥିବା ୩ ଜଣ ବ୍ୟକ୍ତି ଖସିଯିବାରେ ସକ୍ଷମ ହୋଇଛନ୍ତି । ସେମାନଙ୍କୁ ଚିହ୍ନଟ କରାଯାଇଛି ଏବଂ ଶୀଘ୍ର ଗିରଫ କରାଯିବ ବୋଲି ଏସଟିଏଫ ପକ୍ଷରୁ କୁହାଯାଇଛି ।

ଲୋକାଲ ୱାୟାର

ବ୍ରହ୍ମପୁର, ଜାନୁଆରୀ ୪(ଲୋକାଲ ୱାୟାର): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସୋମବାର ବ୍ରହ୍ମପୁର ରାମଲିଙ୍ଗେଶ୍ୱର ଜଳାଶୟର ପୁନରୁଦ୍ଧାର ଓ ସୌନ୍ଦର୍ଯ୍ୟକରଣ କାର୍ଯ୍ୟକୁ ଲୋକାର୍ପିତ କରିବା ସହ ଏହାକୁ ରୂପାନ୍ତରର ଅନନ୍ୟ ଉଦାହରଣ ଭାବେ ଉପସ୍ଥାପିତ କରାଯାଇଛି ।

ଦୀର୍ଘଦିନ ଧରି ଅବ୍ୟବହୃତ ଓ ଅସ୍ୱାସ୍ଥ୍ୟକର ପରିବେଶରେ ପଡ଼ି ରହିଥିବା ରାମଲିଙ୍ଗେଶ୍ୱର ଜଳାଶୟ ଆଜି ପର୍ଯ୍ୟଟକଙ୍କ ମୁଖ୍ୟ ଆକର୍ଷଣର କେନ୍ଦ୍ର ହୋଇପାରିଛି ।

ଚିତ୍ତାକର୍ଷକ ଆତସବାଜୀ, ଶିବ ତାଣ୍ଡବ ସ୍ତୋତ୍ରର ତାଳେ ତାଳେ ଲେଜର ଲାଇଟ ଓ ଏକ ସଙ୍ଗୀତମୟ ପରିବେଶ ମଧ୍ୟରେ ଏହାର ଆଜି ଲୋକାର୍ପଣ ହୋଇଛି ।

ଆଠ ଏକର ପରିମିତ ଜମିରେ ଥିବା ଏହି ପ୍ରାଚୀନ ଜଳାଶୟ ବ୍ରହ୍ମପୁରର ଏକ ପବିତ୍ର ପୁଷ୍କରିଣୀ ଭାବେ ପରିଚିତ ।

ଅବ୍ୟବହୃତ ହୋଇ ପଡ଼ି ରହିଥିବା ଏହି ଜଳାଶୟର ପୁନରୁଦ୍ଧାର କାମ ୧୨ କୋଟି ଟଙ୍କା ବ୍ୟୟରେ ୨୦୧୭ ମସିହାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିଦେ୍ର୍ଦଶରେ ଆରମ୍ଭ ହୋଇଥିଲା ।

ପୁଷ୍କରିଣୀର ମଧ୍ୟସ୍ଥଳରେ ଭଗବାନ ଶଙ୍କରଙ୍କର ୩୫ ଫୁଟ ଉଚ୍ଚତା ବିଶିଷ୍ଟ ଏକ ସୁଦୃଶ୍ୟ ପ୍ରତିଭୂର୍ତ୍ତି ଶୋଭା ପାଉଛି ଏବଂ ଚତୁଃପାଶ୍ୱର୍ରେ ଉଦ୍ୟାନ ଏହାକୁ ଅଧିକ ଆକର୍ଷଣୀୟ କରି ତୋଳିଛି ।

ଲୋକାର୍ପଣ ଅବସରରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଏହି ପୁଷ୍କରିଣୀର ଐତୀହ୍ୟ କହିବା ସହ ଏହାକୁ ପରିଷ୍କାର ରଖିବାକୁ ଲୋକମାନଙ୍କୁ ଆହ୍ୱାନ ଦେଇଥିଲେ ।

କୋଭିଡ ଯୁଦ୍ଧରେ ଗୁରୁତ୍ୱପୂର୍ଣ୍ଣ ଅବଦାନ ପାଇଁ ସେ ଗଞ୍ଜାମ ଜିଲ୍ଲାବାସୀଙ୍କୁ ପ୍ରଶଂସା କରିଥିଲେ ।

ବହ୍ମପୁରରେ ଏକ ଷ୍ଟାଡିୟମ କାର୍ଯ୍ୟ ଚାଲିଥିବା ବେଳେ ୪୨ କୋଟି ଟଙ୍କା ବ୍ୟୟରେ ବର୍ଜ୍ୟ ପରିଚାଳନା କେନ୍ଦ୍ର ନିର୍ମାଣ ଶେଷ ପର୍ଯ୍ୟାୟରେ ଥିବା ସେ କହିଥିଲେ ।

ସହରରେ ଟ୍ରାଫିକ ନିୟନ୍ତ୍ରଣ ପାଇଁ ରିଙ୍ଗ ରୋଡ କାମ ମଧ୍ୟ ଚାଲିଥିବା ସେ କହିଥିଲେ ।

ଆଜିର କାର୍ଯ୍ୟକ୍ରମରେ ଜଙ୍ଗଲ ଓ ପରିବେଶ ମନ୍ତ୍ରୀ ବିକ୍ରମ କେଶରୀ ଆରୁଖ, ସାଂସଦ ଚନ୍ଦ୍ରଶେଖର ସାହୁ, ୫-ଟି ସଚିବ ଭି.କେ. ପାଣ୍ଡିଆନ ଉପସ୍ଥିତ ଥିଲେ ।

ଲୋକାଲ ୱାୟାର

ବ୍ରହ୍ମପୁର, ଡିସେମ୍ବର ୩୧(ଲୋକାଲ ୱାୟାର): ଗଞ୍ଜାମ ଜିଲ୍ଲାର ଟାମଣାସ୍ଥିତ ନର୍ସରୀ ଫାର୍ମରୁ ଆଜି ଏକ ସ୍ୱତନ୍ତ୍ର ଗାଡ଼ିରେ ଗୋଠଛଡ଼ା ହାତୀ ଛୁଆକୁ ଢେଙ୍କାନାଳ ଜିଲ୍ଲାର କପିଳାସ ଚିଡ଼ିଆଖାନାକୁ ପଠାଯାଇଛି ।

ପ୍ରାୟ ଦୁଇ ଶହ ରୁ ଅଧିକ କିଲୋମିଟର ହାତୀ ଛୁଆଟିକୁ ନିଆଯାଉଥିବାରୁ ତା ସହ ୧୨ ଜଣ ବନ କର୍ମଚାରୀଙ୍କୁ ପଠାଯାଇଛି ।

ବାଟରେ ଛୁଆଟିର ଖାଇବା ଓ ସ୍ୱାସ୍ଥ୍ୟ ପ୍ରତି ସମ୍ପୂର୍ଣ୍ଣ ଭାବେ ଧ୍ୟାନ ରଖାଯିବ । କପିଳାସ ଜଙ୍ଗଲରେ ଏବେ ତିନୋଟି ଅଣ୍ଡିରା ଓ ଗୋଟିଏ ମାଇ ହାତୀ ଅଛି ।

ନୂତନ ସଦସ୍ୟ ଭାବେ ହାତୀ ଛୁଆଟିକୁ ଏବେ କ୍ୱାରେଣ୍ଟାଇନରେ ରଖାଯାଇ କରୋନା ଟେଷ୍ଟ କରାଯିବ ।

ତା’ ପରେ ତାକୁ ଏକ ସ୍ୱତନ୍ତ୍ର କୋଠରୀରେ କିଛି ଦିନ ରଖାଯିବ । ଅନ୍ୟ ହାତୀଙ୍କ ସହ କ୍ରମେ ସେ ମିଳାମିଶା କରିବା ପରେ ତାକୁ ବାହାରକୁ ଛଡ଼ା ଯିବ ବୋଲି କହିଛନ୍ତି ଢେଙ୍କାନାଳ ଡିଏଫଓ ।

ଅପରପକ୍ଷରେ ଟାମଣା ନର୍ସରୀରୁ ହାତୀ ଛୁଆଟିକୁ ନିଆଯିବା ସମୟରେ ସୃଷ୍ଟି ହୋଇଥିବା ଏକ ଭାବ ବିହ୍ୱଳ ପରିବେଶ ।

ତାକୁ ଦୁଇ ଦିନ ଧରି ବନ କର୍ମଚାରୀମାନେ କ୍ଷୀର, ଲାକ୍ଟୋଜେନ, ସେରେଲାକ, କଦଳୀ, ଗ୍ଲୁକୋଜ ଓ ଯଥେଷ୍ଟ ପାଣି ଦେଇଥିଲେ ।

ସ୍ଥାନୀୟ କର୍ମଚାରୀଙ୍କ ସହ ଛୁଆଟି ସମ୍ପୂର୍ଣ୍ଣ ମିଶି ଯାଉଥିବା ଭଳି ଦେଖିବାକୁ ମିଳିଥିଲା ।

ସୂଚନାଯୋଗ୍ୟ, ଗତ ମଙ୍ଗଳବାର ବାହୁଦା ନଦୀର ସୁରଳ ନିକଟ ହ୍ରଦରେ ହାତୀ ପଲ ପଶିଥିବା ବେଳେ ଏହି ଛୁଆ ହାତୀଟିକୁ ଛାଡ଼ି ଦେଇଥିଲେ ।

ପରେ ସ୍ଥାନୀୟ ଲୋକେ ଓ ବନ କର୍ମଚାରୀ ଆପ୍ରାଣ ଉଦ୍ୟମ କରିଥିଲେ ମଧ୍ୟ ଛୁଆଟିକୁ ହାତୀ ପଲ ଆଉ ସାଙ୍ଗରେ ନେଇ ନଥିଲେ ।

ଦିନ ସାରା ଛୁଆଟି ହାତୀ ପଲ ନିକଟକୁ ଯେତେବେଳେ ଯାଉଥିଲା, ତାକୁ ମା’ ହାତୀ ନେବାକୁ ଉଦ୍ୟମ କରୁଥିଲେ ମଧ୍ୟ ଦନ୍ତାହାତୀ ଘଉଡ଼ାଇବାରେ ଲାଗିଥିଲା ।

ସାଧାରଣତଃ ମଣିଷ ସାଙ୍ଗରେ କୌଣସି ହାତୀ ମିଶିଥିଲେ ତାକୁ ହାତୀପଲ ଆଉ ସହଜରେ ଗ୍ରହଣ କରନ୍ତି ନାହିଁ । ଏ କ୍ଷେତ୍ରରେ ତାହାହିଁ ଦେଖିବାକୁ ମିଳିଥିଲା ।

ତେଣୁ ବନ କର୍ମଚାରୀ ବାଧ୍ୟ ହୋଇ ହାତୀ ଛୁଆଟିକୁୁ ଆଣି ଟାମଣା ନର୍ସରୀ ଫାର୍ମରେ ରଖିଥିଲେ ।

ଲୋକାଲ ୱାୟାର