ଜୟପୁର

ଜୟପୁର, ନଭେମ୍ବର ୨୬ (ଲୋକାଲ ୱାୟାର) : କୋରାପୁଟ ଜିଲ୍ଲା ସୁନାବେଡା ବସଷ୍ଟାଣ୍ଡରୁ କ୍ରାଇମବ୍ରାଞ୍ଚ ଏସଟିଏଫ୍ ୩ ଲକ୍ଷ ୨୮ ହଜାର ୩୦୦ ଟଙ୍କାର ନକଲି ନୋଟ୍ ଜବତ କରିବା ସହ ଜଣଙ୍କୁ ଗିରଫ କରିଛି ବୋଲି ଗୁରୁବାର ଜଣେ ଅଧିକାରୀ କହିଛନ୍ତି ।

ଗିରଫ ଅଭିଯୁକ୍ତ ଜଣକ କୋରାପୁଟ ନନ୍ଦପୁରର ଯୁବକ ଅନାମ ଖିଲୋ ।

ଏସଟିଏଫ ସୁନାବେଡା ଥାନାରେ ମାମଲା ରୁଜୁ କରିବା ସହ ଘଟଣାରେ ତଦନ୍ତ ଚଳାଇଛି ।

ଲୋକାଲ ୱାୟାର

ଜୟପୁର, ନଭେମ୍ବର ୨୦ (ଲୋକାଲ ୱାୟାର) : ଲାଞ୍ଚ ନେଇ ଭିଜିଲାନ୍ସ ହାତରେ ଧରା ପଡ଼ିଥିବା କୋରାପୁଟ ଜିଲ୍ଲା ନନ୍ଦପୁର ସିଡିପିଓ ସ୍ନିଗ୍ଧାରାଣୀ ମିଶ୍ରଙ୍କୁ ଜିଲ୍ଲାପାଳ ଚାକିରୀରୁ ନିଲମ୍ବିତ କରିଛନ୍ତି ।

ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ସେ କୋରାପୁଟ ଉପଜିଲ୍ଲାପାଳଙ୍କ କାର୍ଯ୍ୟାଳୟକୁ ରିପୋର୍ଟ କରିବେ ଓ ଉପଜିଲ୍ଲାପାଳଙ୍କ ନଜଣାଇ କୁଆଡେ ଯାଇପାରିବେ ନାହିଁ ବୋଲି ଜିଲ୍ଲାପାଳ କହିଛନ୍ତି ।

ସୁପରଭାଇଜର ମୋନାଲିସା ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ନନ୍ଦପୁର ସିଡିପିଓ ଭାର ତୁଲାଇବେ।

ସୂଚନା ଅନୁସାରେ, ଗତ ସେପ୍ଟେମ୍ବରରେ ୯ ଲକ୍ଷ ୪୭ ହଜାର ଟଙ୍କାର ଛତୁଆ ବିଲ ଓ ଏସଏଚଜି ଗ୍ରୁପର ପୁନଃ ଚୁକ୍ତିନାମା ପାଇଁ ସେ ଲାଞ୍ଚ ଦାବି କରିଥିଲେ । ଘଟଣା ନେଇ ଜୟପୁର ଭିଜିଲାନ୍ସ ଠାରେ ଅଭିଯୋଗ ପରେ ୮ଜଣିଆ ଟିମ୍ ନନ୍ଦପୁର ସ୍ଥିତ କାର୍ଯ୍ୟାଳୟରେ ଚଢାଉ କରିବା ସହ ସେମେଳିଗୁଡ଼ା ଓ ଡୁମୁରିପୁଟରେ ଏକକାଳୀନ ଚଢାଉ କରିଥିଲା ।

ଜୟପୁର, ନଭେମ୍ବର ୪ (ଲୋକାଲ ୱାୟାର) : କୋରାପୁଟ ଜିଲ୍ଲା ଲମତାପୁଟ ହନୁମାନ ଗାଁ ନିକଟରେ ମଙ୍ଗଳବାର ରାତିରେ ବିଏସଏଫ ଯବାନ ଏବଂ ପୁଲିସ ଗାଡ଼ି ଯାଞ୍ଚ ବେଳେ ଏକ ପିକଅପ୍ ଭ୍ୟାନରୁ ୮ କ୍ୱିଣ୍ଟାଲ ଗଞ୍ଜେଇ ଜବତ କରିଥିବା ନନ୍ଦପୁର ଏସଡିପିଓ ସଞ୍ଜୟ କୁମାର ମହାପାତ୍ର କହିଛନ୍ତି ।

ଏହି ଗଞ୍ଜେଇର ଆନୁମାନିକ ମୂଲ୍ୟ ୮୦ ଲକ୍ଷରୁ ଅଧିକ ଟଙ୍କା ହେବ ବୋଲି ଜଣାପଡ଼ିଛି । ଗୋଟିଏ ବନ୍ଧୁକ ଓ ୨ଟି ଗୁଳି ମଧ୍ୟ ଜବତ କରାଯାଇଛି ।

ଅନ୍ଧାରର ସୁଯୋଗ ନେଇ ଗାଡ଼ିର ଡ୍ରାଇଭର ସମେତ ଅନ୍ୟମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ ।

ଲୋକାଲ ୱାୟାର

ଜୟପୁର, ଅକ୍ଟୋବର ୨୬ (ଲୋକାଲ ୱାୟାର) : କୋରାପୁଟ ଜିଲ୍ଲା ଲକ୍ଷ୍ମପୁର ବ୍ଲକ ସିଙ୍ଗାରାମ ରେଳ ଧାରଣରୁ ଗୋଟିଏ ପରିବାର ୩ ଜଣଙ୍କର ମୃତ ଦେହ ସୋମବାର ସକାଳେ ଉଦ୍ଧାର ହୋଇଛି ବୋଲି ସ୍ଥାନୀୟ ପୁଲିସ କହିଛି ।

ଟ୍ରେନ୍‌ରେ କଟି ଏମାନଙ୍କ ମୃତ୍ୟୁ ଘଟିଥିବା କୁହାଯାଉଛି । ମୃତକଙ୍କ ମଧ୍ୟରେ ପରିବାରର ବାପା, ପୁଅ ଓ ଝିଅ ଥିବା ଜଣାପଡ଼ିଛି ।

ପୁଡାପାଡୁ ଗାଁର ମାର୍କଣ୍ଡ ବିଶୋଇ ଓ ତାଙ୍କ ପୁଅ (୧୨) ଏବଂ ୯ ବର୍ଷର ଝିଅ ଅଛିନ୍ତି ।

ବର୍ତ୍ତମାନ ସୁଦ୍ଧା ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ପୁଲିସ ମୃତଦେହ ଜବତ କରି ଘଟଣାର ତଦନ୍ତ ଚଳାଇଛି ।

ଏହା ଆତ୍ମହତ୍ୟା, ହତ୍ୟା ନା ଦୁର୍ଘଟଣା ତାହା ତଦନ୍ତ ପରେ ଜଣାପଡ଼ିବ ବୋଲି ପୁଲିସ କହିଛି ।

ଲୋକାଲ ୱାୟାର

ଜୟପୁର, ଅକ୍ଟୋବର ୨୫ (ଲୋକାଲ ୱାୟାର) : କୋରାପୁଟ ଜିଲ୍ଲା ଲମତାପୁଟ ଅଞ୍ଚଳରେ ମାଓବାଦୀଙ୍କ ବିରୋଧରେ ପୋଷ୍ଟ ଲଗା ଯାଇଥିବା ଜଣାପଡ଼ିଛି ।

ଲମତାପୁଟର ଅନକାଡ଼େଲି ଓ ହନୁମାଲ ଆଦି ଅଞ୍ଚଳରେ ଏହି ପୋଷ୍ଟର ଲଗାଇଛନ୍ତି ମାଲକାନଗିରିର ବିଛିନ୍ନାଞ୍ଚଳ ଉନ୍ନୟନ ସମିତି।

ମାଓବାଦୀମାନେ ବିପ୍ଲବ ନାରେ ନିରୀହ ଆଦିବାସୀଙ୍କୁ ହତ୍ୟା କରୁଛନ୍ତି । ତାର ଦୃଢ ନିନ୍ଦା କରିଥିବା ଉଲ୍ଲେଖ କରିଛନ୍ତି ।

ଗତ ୨୦ ତାରିଖରେ ମାଲକାନଗିରି ଜିଲ୍ଲାର ଖଜୁରୀଗୁଡ଼ା ଅନ୍ତର୍ଗତ ଜୋଡାମ୍ବରରେ ନିରୀହ ଆଦିବାସୀ ଯୁବକ ଦାସ ଖେମୁଣ୍ଡୁଙ୍କୁ ହତ୍ୟା କରିବା ଘଟଣା ମାଓବାଦୀଙ୍କ ଅସଲ ମୁଖା ଖୋଲି ଦେଇଛି ବୋଲି ପୋଷ୍ଟରରେ ଉଲ୍ଲେଖ ରହିଛି ।

ଲୋକାଲ ୱାୟାର

ଜୟପୁର, ଅକ୍ଟୋବର ୧୮ (ଲୋକାଲ ୱାୟାର) : କୋରାପୁଟ ଜିଲ୍ଳା ଲମତାପୁଟ ଘଡାବେଡା ବ୍ରିଜ୍ ନିକଟରୁ ୭୦ ଲକ୍ଷ ଟଙ୍କାର ଗଞ୍ଜେଇ ଜବତ ହୋଇଛି ବୋଲି ମାଛକୁଣ୍ଡ ପୁଲିସ ରବିବାର କହିଛି ।

ପୁଲିସ ସୂଚନା ଅନୁସାରେ, ଏକ ନମ୍ବର ବିହୀନ ପିକଅପ୍ ଭ୍ୟାନରେ ଆନ୍ଧ୍ରପ୍ରଦେଶ ସୀମାନ୍ତ ଅଞ୍ଚଳରୁ ଜୟପୁରକୁ ଗଞ୍ଜେଇ ଚୋର ଚାଲାଣ ହେଉଥିବା ନେଇ ମାଛକୁଣ୍ଡ ପୁଲିସ ଖବର ପାଇଥିଲା ।

ଏହାପରେ ନନ୍ଦପୁର ଏସଡିପିଓ, ମାଛକୁଣ୍ଡ ଥାନା ଅଧିକାରୀ, ଲମତାପୁଟ ଫାଣ୍ଡି ଅଧିକାରୀ ଏବଂ ଜଲାପୁଟ ଫାଣ୍ଡି ଅଧିକାରୀ ୪ଟି ଟିମ୍ ଗଠନ କରି ମଟାମପୁଟ ଗାଁ ନିକଟରେ ଗାଡିକୁ ଅଟାଇଥିଲେ ।

ଘଟଣାସ୍ଥଳରେ ଡ୍ରାଇଭର ଫେରାର ହୋଇଥିବା ବେଳେ ଗାଡିକୁ ଯାଞ୍ଚ କରାଯିବାରୁ ୭ କେଜିରୁ ଊର୍ଦ୍ଧ୍ୱ ଗଞ୍ଜେଇ ଜବତ ହୋଇଛି ।

ଯାହାର ଅନୁମାନିକ ମୂଲ୍ୟ ୭୦ ଲକ୍ଷ ଟଙ୍କା ହେବ ବୋଲି ପୁଲିସ କହିଛି । ପୁଲିସ ଘଟଣାର ତଦନ୍ତ ଜାରି ରଖିଛି ।

ଲୋକାଲ ୱାୟାର

ଜୟପୁର, ସେପ୍ଟେମ୍ବର ୧୬ (ଲୋକାଲ ୱାୟାର) : କୋରାପୁଟ ଜିଲ୍ଲାର ଅପହଞ୍ଚ ଇଲାକାରେ ଆମ୍ବୁଲାନ୍ସ ସେବା ପହଞ୍ଚାଇବା ପାଇଁ କେନ୍ଦ୍ର ସରକାରଙ୍କ ଠାରୁ ମିଳିଥିବା ଏକ ସ୍ୱତନ୍ତ୍ର ଫଣ୍ଡରୁ ଜିଲ୍ଲାକୁ ୮ଟି ବାଇକ ଆମ୍ବୁଲାନ୍ସ ଆସିଛି ବୋଲି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ବୁଧବାର କହିଛନ୍ତି।

ଦୁର୍ଗମ ଅଞ୍ଚଳ କୁହାଯାଉଥିବା ନାରାୟଣପାଟଣା, ବନ୍ଧୁ ଗାଁ, ଲମତାପୁଟ, ଦାସମନ୍ତପୁର ଭଳି ବ୍ଲକରେ ଏହି ବାଇକ ଆମ୍ବୁଲାନ୍ସ କାମ କରିବ ।

ତେବେ ଏହା କେବେ ଠାରୁ ଆରମ୍ଭ ହେବ ଏବଂ ଏହାର ଦାୟିତ୍ୱ କାହାକୁ ଦିଆଯିବ ସେ ନେଇ ୨ରୁ ୩ଦିନ ମଧ୍ୟରେ ନିଷ୍ପତି ନିଆଯିବ ବୋଲି ସେ ସୂଚନା ଦେଇଛନ୍ତି ।

ଉଲ୍ଲେଖଯୋଗ୍ୟ, କୋରାପୁଟ ଜିଲ୍ଲାର ବହୁ ଦୁର୍ଗମ ଓ ଅପହଞ୍ଚ ଇଲାକାକୁ ଅମ୍ବୁଲାନ୍ସ ସେବା ପହଞ୍ଚି ପାରୁ ନ ଥିବାରୁ ରୋଗୀ ଖଟିଆ ଓ ଭାରରେ ବୁହା ହେଉଥିବା ଚିତ୍ର ଦେଖିବାକୁ ମିଳିଥାଏ ।

ଏବେ ଏ ସମସ୍ତ ଅଞ୍ଚଳକୁ ବାଇକ୍ ଆମ୍ବୁଲାନ୍ସ ପହଞ୍ଚିବ ଓ ରୋଗୀ ଠିକ୍ ସମୟରେ ସ୍ୱାସ୍ଥ୍ୟ ସେବା ପାଇ ପାରିବେ ବୋଲି ଆଶା ରଖିଛନ୍ତି ସ୍ଥାନୀୟ ଲୋକେ ।

ଲୋକାଲ ୱାୟାର

ଜୟପୁର, ସେପ୍ଟେମ୍ବର ୬ (ଲୋକାଲ ୱାୟାର) : କୋରାପୁଟ ଜିଲ୍ଲା ଲକ୍ଷ୍ମୀପୁରର ବିଜେଡି ବିଧାୟକ ପ୍ରଭୁ ଜାନି କରୋନାରେ ଆକ୍ରାନ୍ତ ହୋଇଥିବା ନେଇ ନିଜେ ସୂଚନା ଦେଇଛନ୍ତି ।

ସେ ଏବେ ହୋମ ଆଇସୋଲେସନରେ ଅଛନ୍ତି । ତାଙ୍କ ସଂସ୍ପର୍ଶରେ ଅସିଥିବା ଲୋକଙ୍କୁ ପରୀକ୍ଷା କରାଇ ନେବାକୁ ସେ ପରାମର୍ଶ ଦେଇଛନ୍ତି ।

ଉଲ୍ଲେଖଯୋଗ୍ୟ, ରାଜ୍ୟରେ ୩ ଜଣ ମନ୍ତ୍ରୀ, ୩ ଜଣ ସାଂସଦ, ଜଣେ କେନ୍ଦ୍ରମନ୍ତ୍ରୀ ଏବଂ ବହୁ ବିଧାୟକଙ୍କ ସମେତ ରାଜନେତା କରୋନାରେ ଆକ୍ରାନ୍ତ ହେଲେଣି ।

ଲୋକାଲ ୱାୟାର

ଜୟପୁର, ଜୁଲାଇ ୨୪(ଲୋକାଲ ୱାୟାର): କରୋନା ସଂକ୍ରମଣ ରୋକିବାକୁ କୋରାପୁଟ ଜିଲ୍ଲାର ଜୟପୁର ସହରକୁ ୪ ଦିନ ପାଇଁ ସଟ୍ ଡାଉନ କରିବାକୁ ଶୁକ୍ରବାର ସ୍ଥାନୀୟ ମୁ୍ୟନିସିପାଲିଟି କର୍ତ୍ତୃପକ୍ଷ ଘୋଷଣା କରିଛନ୍ତି ।

ଜୁଲାଇ ୨୮ ତାରିଖ ପର୍ଯ୍ୟନ୍ତ କେବଳ ଅତ୍ୟାବଶ୍ୟକ ସାମଗ୍ରୀ ବ୍ୟତୀତ ଅନ୍ୟ କୌଣସି ଦୋକାନ ବଜାର ଖୋଲିବା ଉପରେ କଟକଣା କରାଯାଇଛି ।

ସରକାରୀ/ ବେସରକାରୀ କାର୍ଯ୍ୟାଳୟ ବନ୍ଦ ରହିବା ସହ ଗାଡ଼ିମୋଟର ଚଳାଚଳ ମଧ୍ୟ ବନ୍ଦ ରହିବ ବୋଲି କୁହାଯାଇଛି ।

ଉଲ୍ଲେଖଯୋଗ୍ୟ, କୋରାପୁଟ ଜିଲ୍ଲାରେ ଶୁକ୍ରବାର ୩୩ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ।

ଏମାନଙ୍କୁ ମିଶାଇ ଜିଲ୍ଲାରେ ମୋଟ ୪୧୪ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ସେମାନଙ୍କ ମଧ୍ୟରୁ ୧୫୮ ଜଣ ସୁସ୍ଥ ହୋଇଥିବା ବେଳେ ୨୫୬ ଜଣ ଚିକିତ୍ସିତ ହେଉଥିବା ସ୍ୱାସ୍ଥ୍ୟ ବିଭାଗ କହିଛି ।

ଲୋକାଲ ୱାୟାର

ଜୟପୁର,ଏପ୍ରିଲ ୨୭ (ଲୋକାଲ ୱାୟାର): ଜିଲ୍ଲା ପ୍ରଶାସନ ଦ୍ୱାରା ପନିପରିବାର ଦାମ୍ ଧାର୍ଯ୍ୟ ହେଲା ପରେ ଏବେ ଲୋକମାନେ ଟିକେ ଆଶ୍ୱସ୍ତି ଲାଭ କରିଛନ୍ତି ।

ସ୍ୱେଚ୍ଛାସେବୀ ସଙ୍ଗଠନମାନଙ୍କ ସହାୟତାରେ ଜିଲ୍ଲାର ବିଭିନ୍ନ ସ୍ଥାନକୁ କିପରି କଞ୍ଚା ପନିପରିବା ଠିକ୍ ଭାବେ ପହଞ୍ଚିପାରିବ ସେ ଦିଗରେ ମଧ୍ୟ ସ୍ଥାନୀୟ ଜନସାଧାରଣ ଦୃଷ୍ଟି ଦେବା ଆରମ୍ଭ କରିଛନ୍ତି ।

ଲକ୍ ଡାଉନ୍ ଯୋଗୁଁ କଞ୍ଚା ପନିପରିବା; ଚାଷୀଙ୍କ ପାଖରୁ ବଜାରକୁ ଆସିବା ସମ୍ଭବ ହୋଇପାରୁନି ।

ଆମଦାନୀ କମ୍ କାରଣରୁ ଗତ କିଛି ଦିନ ହେବ ପନିପରିବା ଦର ଅହେତୁକ ଭାବେ ବୃଦ୍ଧି ଘଟିଥିଲା ।

ଆମଦାନୀ ଓ ରପ୍ତାନୀ ପ୍ରକ୍ରିୟାକୁ ଠିକ୍ କରି ସାଧାରଣ ଖାଉଟିଙ୍କୁ କିପରି ଉଚିତ ଦାମ୍ରେ ଅତ୍ୟାବଶ୍ୟକ ସାମଗ୍ରୀ ଯୋଗାଇ ହେବ ସେ ଦିଗରେ ଜିଲ୍ଲା ପ୍ରଶାସନ କାମ ଆରମ୍ଭ କରିଛି ।

ମିଳିଥିବା ସୂଚନା ଅନୁସାରେ ଜିଲ୍ଲାର ଦଶମନ୍ତପୁର, ପଟାଣି ସେମିଳିଗୁଡ଼ା, ନନ୍ଦପୁର, ଲମଟାପୁଟ, ବୈପାରୀଗୁଡ଼ା, କୁନ୍ଦରା, ବୋରିଗୁମ୍ମା, ଆଦି ଅଞ୍ଚଳରେ ଚାଷୀମାନେ ପନିପରିବା ଚାଷ କରୁଥିବା ବେଳେ ଦେଶବ୍ୟାପୀ ଲକ୍ ଡାଉନ୍ କାରଣରୁ ସେମାନେ ସେମାନେ ବଜାରକୁ ପହଞ୍ଚି ପାରୁନାହାନ୍ତି ।

ତେଣୁ ସେମାନେ ବାଧ୍ୟହୋଇ ନିଜ ଦ୍ୱାରା ଚଷ କରାଯାଇଥିବା ଫସଲ ନେଇ ସ୍ଥାନୀୟ ବଜାର ଯଥା କେନ୍ଦୁଲି, ବୋରିଗୁମ୍ମା, କୋଟପାଡ଼, କୋରାପୁଟ ଓ ଜୟପୁର ଆସି ପହଞ୍ଚୁଛନ୍ତି ।

ଯାହାକି ପରବର୍ତ୍ତୀ ସମୟରେ ଅନ୍ୟ ଜିଲ୍ଲା ଓ ରାଜ୍ୟକୁ ରପ୍ତାନୀ ହେଉଛି ।

ଲକ୍ ଡାଉନ୍ ଯୋଗୁଁ ଚାଷୀମାନଙ୍କଠାରେ ଫସଲ ଥାଇ ମଧ୍ୟ ସେମାନେ ତାହାକୁ ଗ୍ରାହକଙ୍କ ପାଖରେ ପହଞ୍ଚାଇବାରେ ଅସମର୍ଥ ହେଉଛନ୍ତି ।

ଫଳରେ ପନିପରିବା ଦର କିଲୋପ୍ରତି ୪୦ ଟଙ୍କା ଲେଖାଏଁ ବଢ଼ିଯାଇଛି ।
ଓରମାସ ପକ୍ଷରୁ ମିଳିଥିବା ସୂଚନା ଅନୁସାରେ ୧୧୨ ଜଣ ବ୍ୟବସାୟୀଙ୍କୁ ଏହି କାମରେ ନିୟୋଜିତ କରାଯାଇଛି ।

ଏମାନେ କେବଳ କେତ୍ରା ବିକ୍ରେତାଙ୍କ ସମସ୍ୟାର ସମାଧାନ କରୁନାହାନ୍ତି । ବରଂ କଳାବଜାରୀକୁ ରୋକିବାରେ ମଧ୍ୟ ସଫଳ ହେଉଛନ୍ତି ।

ବର୍ତ୍ତମାନ ୨୦ଟି ଟ୍ରକ୍ ସାହାଯ୍ୟରେ ପନିପରିବା ବିଭିନ୍ନ ଅଞ୍ଚଳକୁ ରପ୍ତାନୀ କରାଯାଇ ପାରିଛି ।

ବ୍ୟବସାୟୀମାନଙ୍କ ନିରନ୍ତର ସେବା ଯୋଗୁଁ ପନିପରିବା ଦାମ୍ ପାଖାପାଖି କିଲୋପ୍ରତି ୨୫ ଟଙ୍କା ଲେଖାଏଁ କମିଛି ।

ଜିଲ୍ଲା ଓର୍ମାସ ଅଧିକାରୀ କହିଛନ୍ତି ଚାଷୀମାନଙ୍କ ବଜାର ନେଣ ଦେଣକୁ ଦେଖିବା ସହ ଆମେ ସ୍ୱେଚ୍ଛାସେବୀ ସଙ୍ଗଠନମାନଙ୍କ କାମ ଉପରେ ମଧ୍ୟ ଗୁରୁତ୍ୱ ଦେଉଛୁ ।

ଜିଲ୍ଲା ପ୍ରଶାସନ ଏଣିକି ସବୁ ଏଜେନ୍ସିମାନଙ୍କ ପାଖକୁ ଯାଇ ପନିପରିବାର ବିକ୍ରିବଟା ଉଚିତ ମୂଲ୍ୟରେ କିପରି କରାଯାଇପାରିବ ସେ ଦିଗରେ ତଦାରଖ କରୁଛି ।

ଲୋକାଲ ୱାୟାର