ଝାରସୁଗୁଡା

ଝାରସୁଗୁଡ଼ା, ଅକ୍ଟୋବର ୧୬ (ଲୋକାଲ ୱାୟାର) : ଝାରସୁଗୁଡ଼ା ଜିଲ୍ଲା ବ୍ରଜରାଜନଗରସ୍ଥିତ ରାମପୁର ଧୋଉଡ଼ାପଡ଼ାରେ କୋଇଲା ଚୁଲା ନିଆଁରେ ଦମ୍ପତି ଜୀବନ୍ତ ଦଗ୍ଧ ହୋଇଯାଇଛନ୍ତି ବୋଲି ସ୍ଥାନୀୟ ପୁଲିସ ଶୁକ୍ରବାର କହିଛି ।

ମୃତ ସ୍ୱାମୀ ଓ ସ୍ତ୍ରୀ ହେଲେ ଗିରିବର ଦାଶ ଓ ଗୀତା ଦାଶ ।

ସୂଚନା ଅନୁସାରେ, ଗୀତା ଆଜିି ସକାଳେ କୋଇଲା ଚୁଲାକୁ ଘର ଭିତରକୁ ନେଉଥିବା ବେଳେ ଅସାବଧାନତା ହେତୁ ପିନ୍ଧିଥିବା ଶାଢୀରେ ନିଆଁ ଲାଗିଯାଇଥିଲା ।

ପତ୍ନୀଙ୍କ ଚିତ୍କାର ଶୁଣି ବଞ୍ଚାଇବାକୁ ଆସିଥିବା ଗିରିବର ବି ନିଆଁରେ ଜଳିଯାଇଥିଲେ ।

ଘଟଣାକୁ ସ୍ଥାନୀୟ ଲୋକ ପୁଲିସକୁ ଜଣାଇବା ପରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୧୬ (ଲୋକାଲ ୱାୟାର) : ଡବଲ ମର୍ଡର ଘଟଣାରେ ଗିରଫ ହୋଇଥିବା ବ୍ରଜରାଜନଗରର ପୂର୍ବତନ ବିଧାୟକ ଅନୁପ ସାଏର ସ୍ୱାସ୍ଥ୍ୟବସ୍ଥା ଗୁରୁତର ହେବାରୁ ତାକୁ ବିଳାସପୁରର ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଛି ବୋଲି ତାଙ୍କର ଜଣେ ସମ୍ପର୍କୀୟ ସୂଚନା ଦେଇଛନ୍ତି ।

ଅସୁସ୍ଥତା କାରଣରୁ ଅନୁପକୁ ଛତିଶଗଡ଼ ହାଇକୋର୍ଟ ୨ ମାସ ପାଇଁ ଅନ୍ତରୀଣ ଜାମିନ ପ୍ରଦାନ କରିଥିବା ସୂଚନା ମିଳିଛି ।

ଗତ ସେପ୍ଟେମ୍ବର ୨୫ ତାରିଖରେ ୨୫ ହଜାର ଟଙ୍କାର ବ୍ୟକ୍ତିଗତ ମୁଚାଳିକାରେ ତାକୁ ଜାମିନ ମିଳିଥିବା ଜଣାପଡିଛି ।

ସୂଚନାଯୋଗ୍ୟ, ରାୟଗଡ଼ ଜିଲ୍ଲାରେ ଘଟିଥିବା ଡବଲ୍ ମର୍ଡର ମାମଲାରେ ଅନୁପ ସାଏକୁ ଗିରଫ କରିଥିଲା ଛତିଶଗଡ଼ ପୁଲିସ ।

କଳ୍ପନା ଓ ତାଙ୍କ ଝିଅ ବବଲି ହତ୍ୟାକଣ୍ଡର ମୁଖ୍ୟ ଅଭିଯୁକ୍ତ ଥିଲେ ଅନୁପ ।

ଗିରଫ ପରେ ଛତିଶଗଡ଼ ରାଜ୍ୟର ରାୟଗଡ଼ସ୍ଥିତ ଜେଏମ୍‌ଏଫ୍‌ସି କୋର୍ଟରେ ଜାମିନ ନାମଞ୍ଜୁର ହେବା ପରେ ପୂର୍ବତନ ବିଧାୟକ ଜେଲ ଯାଇଥିଲେ ।

ଲୋକାଲ ୱାୟାର

ଝାରସୁଗୁଡ଼ା, ସେପ୍ଟେମ୍ବର ୨୯(ଲୋକାଲ ୱାୟାର): ବୌଦ୍ଧର ଡେପୁଟି କଲେକ୍ଟର ଶରତ ବାଗଙ୍କୁ ପତ୍ନୀ ନିର୍ଯାତନା ଅଭିଯୋଗରେ ଗିରଫ କରାଯାଇଥିବା ବେଳେ ମଙ୍ଗଳବାର କୋର୍ଟରେ ସେ ପତ୍ନୀଙ୍କୁ କ୍ଷମା ପ୍ରାର୍ଥନା କରିବା ପରେ ସର୍ତ୍ତମୂଳକ ଜାମିନ ପାଇଥିବା ପୁଲିସ କହିଛି ।

ଶ୍ରୀ ବାଗଙ୍କ ନାମରେ ଅଭିଯୋଗ ହୋଇଥିଲା ଯେ ଅନ୍ୟ ଝିଅଙ୍କ ସହ ସମ୍ପର୍କ ଥିବାର ସେ କହିବାରୁ ସ୍ୱାମୀ ଓ ସମ୍ପର୍କୀୟମାନେ ତାଙ୍କୁ ମାଡ଼ ମାରିଥିଲେ ।

ଏ ନେଇ କୋଲାବିରା ଥାନା ଅଧୀନ ବିଟିଏମ ଫାଣ୍ଡିରେ ପତ୍ନୀ ଡାଲିଆ ଦେବନାଥ ଅଭିଯୋଗ କରିଥିଲେ । ବିଟିଏମ ପୁଲିସ ଶରତଙ୍କୁ ଗତକାଲି ରାତି ଗିରଫ କରିଥିଲେ ।

ମଙ୍ଗଳବାର ତାଙ୍କୁ କୋର୍ଟ ଚାଲାଣ କରାଯାଇଥିଲା । ତେବେ ସେ ପତ୍ନୀଙ୍କୁ କ୍ଷମା ପ୍ରାର୍ଥନା କରିବା ସହ ଭଲ ସମ୍ପର୍କରେ ପତ୍ନୀଙ୍କ ସହ ରହିବାକୁ କଥା ଦେଇଥିଲେ ।

ତେଣୁ କୋର୍ଟ ତାଙ୍କୁ ୫୦ ହଜାର ଟଙ୍କାର ବ୍ୟକ୍ତିଗତ ମୁଚାଲିକା ସହ ପୁଲିସକୁ ତଦନ୍ତରେ ସହଯୋଗ କରିବା, ନିର୍ଯାତନା ଘଟଣାର ପୁନରାବୃତ୍ତି ନକରିବା ସର୍ତ୍ତରେ ଜାମିନ ମଞ୍ଜୁର କରିଛନ୍ତି ।

ଲୋକାଲ ୱାୟାର

ଝାରସୁଗୁଡ଼ା, ସେପ୍ଟେମ୍ବର ୨୫ (ଲୋକାଲ ୱାୟାର) : ଝାରସୁଗୁଡ଼ା ଜିଲ୍ଲାରେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବାରୁ ଆଜିଠାରୁ ଆସନ୍ତା ୧୫ ଦିନ ଯାଏଁ ରାସ୍ତାକଡ଼ର ଫାଷ୍ଟଫୁଡ ଦୋକାନ ବନ୍ଦ ରଖିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।

ଦୋକାନୀଙ୍କ ଜୀବନ ଜୀବିକା ଯେଭଳି ପ୍ରଭାବିତ ନ ହେବ ସେଥିପାଇଁ ପ୍ରତି ବ୍ୟବସାୟୀଙ୍କୁ ୨୫୦୦ଟଙ୍କା ପ୍ରୋତ୍ସାହନ ରାଶି ପ୍ରଦାନ କରାଯିବ ବୋଲି ଜିଲ୍ଲାପାଳ ଘୋଷଣା କରିଛନ୍ତି ।

ଯେଉଁ ଦୋକାନୀ ନିୟମ ନ ମାନିବେ ସେମାନେ ଫାଇନ୍ ଗଣିବେ ।

ରାସ୍ତାକଡ଼ ଉଠା ଖାଦ୍ୟ ଦୋକାନ ଓ ଠେଲା ଗୁଡିକରେ ଲୋକଙ୍କ ପ୍ରବଳ ଭିଡ ହେଉଥିବାରୁ ସାମାଜିକ ଦୂରତା ସମେତ ଅନ୍ୟାନ୍ୟ କୋଭିଡ୍ ନିୟମର ଉଲ୍ଲଂଘନ କରାଯାଉଥିବାରୁ ଜିଲ୍ଲାପ୍ରଶାସନ ଏହି ନିଷ୍ପତି ନେଇଛି ।

ଲୋକାଲ ୱାୟାର

ଭୁବନେଶ୍ୱର, ସେପ୍ଟେମ୍ବର ୬ (ଲୋକାଲ ୱାୟାର) : ଝାରସୁଗୁଡ଼ା ଜିଲ୍ଳା ବନହରପାଲି ଠାରେ ଥିବା ଓପିଜିସିର ଇବ୍ ଥର୍ମାଲ ତାପଜ ବିଦ୍ୟୁତ୍ ପ୍ରକଳ୍ପରେ ତତଲା ପାଉଁଶ ପଡ଼ି ୬ ଶ୍ରମିକ ଆହତ ହୋଇଛନ୍ତି ବୋଲି ରବିବାର ସ୍ଥାନୀୟ ପୁଲିସ କହିଛି ।

ପୁଲିସ ସୂଚନା ଅନୁସାରେ, ଶନିବାର ରାତି ୮ଟା ୩୦ ମିନିଟରେ ପ୍ଲାଣ୍ଟର ହପର ଖସି ପଡିବାରୁ ତତଲା ପାଉଁଶ ବିଛାଇ ହୋଇ ପଡ଼ିଥିଲା ।

ତଳେ ଥିବା କର୍ମଚାରୀ ମାନଙ୍କ ଉପରେ ତତଲା ପାଉଁଶ ଗଦା ହୋଇ ଯାଇଥିଲା।

ଏଥିରେ ୬ ଜଣ ଶ୍ରମିକ ଆହତ ହୋଇଥିଲେ । ସେମାନଙ୍କୁ ପ୍ରଥମେ ଓପିଜିସି ଡାକ୍ତରଖାନାରେ ଭର୍ତ୍ତି କରାଯାଇଥିଲା ।

ସେମାନଙ୍କ ମଧ୍ୟରୁ ୩ ଜଣ ଗୁରୁତର ଅଛନ୍ତି । ଗୁରୁତରଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି ।

ଲୋକାଲ ୱାୟାର

ଭୁବନେଶ୍ୱର,ସେପ୍ଟେମ୍ବର ୨(ଲୋକାଲ ୱାୟାର): ଝାରସୁଗୁଡ଼ା ଜିଲ୍ଲା ବ୍ରଜରାଜନଗର ପୌର ପରିଷଦ ନିର୍ବାହୀ ଅଧିକାରୀ ଦିଲୀପ ପଟେଲଙ୍କ ଘରେ ବୁଧବାର ହୋଇଥିବା ଚଢ଼ାଉରେ ୩.୩୫ କୋଟି ଟଙ୍କାର ସମ୍ପତ୍ତି ଠାବ ହୋଇଥିବା ଭିଜିଲାନ୍ସ ପକ୍ଷରୁ କୁହାଯାଇଛି ।

ଅଦାଲତଙ୍କ ନିଦେ୍ର୍ଦଶରେ ଭିଜିଲାନ୍ସର ୪୦ରୁ ଅଧିକ ଅଫିସର ବୁଧବାର ସକାଳେ ଶ୍ରୀ ପଟେଲଙ୍କ ବ୍ରଜରାଜନଗର ପୌର କାର୍ଯ୍ୟାଳୟ, ଝାରସୁଗୁଡ଼ା ସରକାରୀ କ୍ୱାର୍ଟର୍ସ, ଝାରସୁଗୁଡ଼ା ବଢ଼େଇମୁଣ୍ଡାସ୍ଥିତ ଘର, କୋଲାବିରା ବ୍ଲକର ବେଲମୁଣ୍ଡା ପୈତୃକ ଘର, ସମାସିଂହାରେ ନିର୍ମାଣାଧୀନ ପେଟ୍ରୋଲ ପମ୍ପ ଓ ସୁନ୍ଦରଗଡ ଜିଲ୍ଲା କାଳୋବାହାଲ ଶ୍ୱଶୂର ଘରେ ଏକାକାଳୀନ ଚଢ଼ଉ କରିଥିଲେ ।

ଚଢ଼ାଉ ବେଳେ ତଙ୍କ ଘରୁ ନଗଦ ୨୨ ଲକ୍ଷ ୫୪, ୭୧୫ ଟଙ୍କା ମିଳିଥିବା ବେଳେ ସମ୍ପତ୍ତି ମଧ୍ୟରେ ୭,୪୧,୯୫୧ ଟଙ୍କାର ଘରକରଣା ସାମଗ୍ରୀ, ଗୋଟିଏ କାର(୧୧ ଲକ୍ଷ), ସୁନାଗହଣା (୩ ଲକ୍ଷ ୩୫,୦୧୫ ଟଙ୍କା), ବିଭିନ୍ନ ବ୍ୟାଙ୍କରେ ଥିବା ଜମା (୫୯ ଲକ୍ଷ ୮୫ ହଜାର), ଏଲଆଇସି ବଣ୍ଡ୍ (୧୭ ଲକ୍ଷ ୭୧ ହଜାର ୨୫୮ ଟଙ୍କା) ଠାବ ହୋଇଛି ।

ଶ୍ରୀ ପଟେଲ ଝାରସୁଗୁଡ଼ା ସମେତ ବିଭିନ୍ନ ସହରରେ ୧୪ଟି ମୂଲ୍ୟବାନ ପ୍ଲଟ୍ (୧ କୋଟି ୬୫ ଲକ୍ଷ ୮୯ ହଜାର ୨୮୫ ଟଙ୍କା) କିଣିଥିବା ବେଳେ ସମ୍ପର୍କୀୟଙ୍କ ନାଁରେ ଝାରସୁଗୁଡ଼ା ସାମସିଂଘାରେ ଏକ ପେଟ୍ରୋଲ ପମ୍ପ (୭ ଲକ୍ଷ ୭୧ ହଜାର)କରିଥିବା ଭିଜିଲାନ୍ସ ଜାଣିବାକୁ ପାଇଛି ।

ତାଙ୍କୁ ଆସନ୍ତାକାଲି କୋର୍ଟ ଚାଲାଣ କରାଯିବ ବୋଲି ଭିଜିଲାନ୍ସ ଏସପି ସୁବାଷ ଚନ୍ଦ୍ର ସ୍ୱାଇଁ କହିଛନ୍ତି ।

ଲୋକାଲ ୱାୟାର

ଝାରସୁଗୁଡା, ଅଗଷ୍ଟ ୨୮ (ଲୋକାଲ ୱାୟାର) : ଝାରସୁଗୁଡ଼ା ଜିଲ୍ଲାରେ କରୋନା ସଂକ୍ରମଣ ବୃଦ୍ଧି ପାଉଥିବାରୁ ଝାରସୁଗୁଡ଼ା ସହରକୁ ୭ ଦିନ ପାଇଁ ସଟ୍‌ଡାଉନ୍ ଘୋଷଣା କରାଯାଇଛି ବୋଲି ଶୁକ୍ରବାର ଜିଲ୍ଲା ପ୍ରଶାସନ ସୂଚନା ଦେଇଛି ।

ଜିଲ୍ଲାରେ ଅଗଷ୍ଟ ୩୦ ତାରିଖରୁ ସେପ୍ଟେମ୍ବର ୫ ତାରିଖ ଯାଏ ସଟ୍‌ଡାଉନ୍ କଟକଣା ବଳବତ୍ତର ରହିବ ।

ହେଲେ ଗ୍ରୋସରୀ, ପରିବା, କ୍ଷୀର, ଅଣ୍ଡା ଓ ମାଛ ଦୋକାନ ସକାଳ ୬ଟାରୁ ୧୧ଟା ଯାଏଁ ଖୋଲା ରହିବ ।

ଜରୁରୀ ସେବାକୁ କଟକଣାରୁ ବାଦ୍ ଦିଆଯାଇଛି ।

ଉଲ୍ଲେଖଯୋଗ୍ୟ ଯେ, ଝାରସୁଗୁଡ଼ା ଜିଲ୍ଲାରୁ ଏ ପର୍ଯ୍ୟନ୍ତ ୧ ହଜାର ୩୩ ଜଣ କରୋନା ସଂକ୍ରମିତ ଚିହ୍ନଟ ହୋଇଥିବା ବେଳେ ୬୧୭ ଜଣ ସୁସ୍ଥ ହୋଇଛନ୍ତି ।

୪୧୫ ଜଣ ବିଭିନ୍ନ କୋଭିଡ୍ ହସ୍ପିଟାଲରେ ଚିକିତ୍ସିତ ହେଉଛନ୍ତି ଏବଂ ଜଣେ କରୋନା ଆକ୍ରାନ୍ତଙ୍କ ମୃତ୍ୟୁ ଘଟିଛି ।

ଲୋକାଲ ୱାୟାର

ଝାରସୁଗୁଡ଼ା, ଅଗଷ୍ଟ ୨୦(ଲୋକାଲ ୱାୟାର): ସମଲିଙ୍ଗୀ ଯୌନ ସମ୍ପର୍କ ଅଭିଯୋଗରେ ଝାରସଗୁଡ଼ାସ୍ଥିତ ଏନଜିଓ (ସ୍ୱେଚ୍ଛାସେବୀ ସଂସ୍ଥା) ଫେଥ୍ ଆଉଟରିଚ୍ ର ପ୍ରତିଷ୍ଠାତା ତଥା ବ୍ରିଟିଶ ନାଗରିକ ଜନ୍ ପାଟ୍ରିକ ବ୍ରିଜ (୬୮)ଙ୍କୁ ଗିରଫ କରାଯାଇଥିବା ସ୍ଥାନୀୟ ପୁଲିସ କହିଛି ।

ଝାରସୁଗୁଡ଼ାସ୍ଥିତ ଏହି ଅନୁଷ୍ଠାନର ହଷ୍ଟେଲରେ ରହି ପଢ଼ୁଥିବା କନ୍ଧମାଳର ୧୬ ବର୍ଷର ଆଦିବାସୀ ବାଳକକୁ ଜନ୍ ନିର୍ଯାତନା ଦେଇଥିବା ସେ ଅଭିଯୋଗ ଆଣିଥିଲେ ।

ଗତ ବର୍ଷ ଜନଙ୍କ ସାଙ୍ଗରେ ସେ ରାୟଗଡ଼ା ଯାଇଥିବା ବେଳେ ତାଙ୍କୁ ନିର୍ଯାତନା ଦିଆଯାଇଥିବା ବାଳକ ଅଭିଯୋଗ କରିଛନ୍ତି ।

ଗତ ୧୪ ତାରିଖରେ ଥାନାରେ ଏହି ଅଭିଯୋଗ ଅଣାଯିବା ପରେ ଜନ୍ ଙ୍କ ନାମରେ ୩-ଏସସିଏସଟି ଆଇନ, ଆଇପିସି ୩୪୧ଏବଂ ୧୦-ପକ୍ସୋ ଆଇନ ଅନୁଯାୟୀ ମାମଲା ରୁଜୁ କରାଯାଇଛି ।

ତାଙ୍କ ଗିରଫ କରି କୋର୍ଟରେ ହାଜର କରାଯାଇଥିଲା ।

ଜାମିନ ଆବେଦନ ନାମଞ୍ଜୁର ହୋଇଯିବାରୁ ତାଙ୍କୁ ଜେଲ୍ ପଠାଇ ଦିଆଯାଇଥିବା କହିଛନ୍ତି ଝାରସୁଗୁଡ଼ା ଏସପି ରାହୁଲ ପି.ଆର ।

ଉଲ୍ଲେଖଯୋଗ୍ୟ, ପ୍ରାୟ ୨୫ ବର୍ଷ ତଳେ ଜନ୍ ଏବଂ ପତ୍ନୀ ଡେଲଫିନ୍ ଆଦିବାସୀ ପିଲାଙ୍କୁ ଶିକ୍ଷା ଦେବାକୁ ଝାରସୁଗୁଡ଼ାରେ ଏହି ସଂସ୍ଥା ଖୋଲିଥିଲେ ।

ସଂସ୍ଥାରେ ଏକ ବେବି କେୟାର ସେଣ୍ଟର ରହିଛି । ଏଥିସହ ଅନାଥ ଶିଶୁଙ୍କ ରହିବା ସକାଶେ ବ୍ୟବସ୍ଥା ରହିଛି ।

ପ୍ରାୟ ୪ ଶହ ପିଲାଙ୍କୁ ଏଠାରେ ରଖାଯାଇଛି ଏବଂ ସେମାନଙ୍କ ଖାଇବା, ପିନ୍ଧିବା, ପାଠ ପଢ଼ିବା ସବୁ ଖର୍ଚ୍ଚ ସଂସ୍ଥା ବହନ କରୁଛି ।

ସ୍ଥାନୀୟ ଅଞ୍ଚଳରେ ସ୍ୱେଚ୍ଛାସେବୀ ଭାବେ କାମ କରିବା ଲାଗି ଯୁବକଯୁବତୀଙ୍କୁ ମଧ୍ୟ ଏହି ସଂସ୍ଥା ପ୍ରଶିକ୍ଷଣ ପ୍ରଦାନ କରୁଛି ।

ତେବେ କୋଭିଡ ମହାମାରୀ ପାଇଁ ଗତ ମାର୍ଚ୍ଚ ମାସରୁ ସଂସ୍ଥାଟି ବନ୍ଦ ରହିଛି ।

ଅପରପକ୍ଷରେ ନ୍ୟୁଜିଲାଣ୍ଡର ଏକ ସଂସ୍ଥାରୁ ଫେଥ୍ ଆଉଟରିଚ୍ ଯେଉଁ ଉଦ୍ଦେଶ୍ୟରେ ଅର୍ଥ ସହାୟତା ଆଣୁଛି ତାକୁ ସେ ଦିଗରେ ଖର୍ଚ୍ଚ ନ କରି ଅନ୍ୟ କ୍ଷେତ୍ରରେ ଖର୍ଚ୍ଚର୍ କରୁଥିବା ଅଭିଯୋଗ ମଧ୍ୟ ହୋଇଥିଲା ।

ନ୍ୟୁଜିଲାଣ୍ଡ ସ୍ଥିତ ଭାରତୀୟ ଦୂତାବାସରୁ ଏହି ଅଭିଯୋଗ ଭାରତ ସରକାରଙ୍କ ନିକଟକୁ ଆସିଥିଲା ।

ତେଣୁ କେନ୍ଦ୍ର ସରକାରଙ୍କ ଠାରୁ ସୂଚନା ପାଇ ରାଜ୍ୟ ସରକାର ଏ ସମ୍ପର୍କରେ ତଦନ୍ତ ପାଇଁ ଝାରସୁଗୁଡ଼ା ଜିଲ୍ଲାପାଳ ଓ ଏସପିଙ୍କୁ କିଛି ଦିନ ତଳେ ନିର୍ଦ୍ଦେଶ ଦେଇଥିଲେ ।

ଉଲ୍ଲେଖଯୋଗ୍ୟ, ଦୁଇ ବର୍ଷ ମଧ୍ୟରେ ଅନାଥାଶ୍ରମ ନିର୍ଯାତନା ମାମଲାରେ ସଂସ୍ଥା ମୁଖ୍ୟ ଗିରଫ ହେବା ଏହା ଦ୍ୱିତୀୟ ଘଟଣା ।

୨୦୧୮ ଡିସେମ୍ବରରେ ଢେଙ୍କାନାଳସ୍ଥିତ ଶିଶୁ ଗୃହ ଗୁଡ ନ୍ୟୁଜ୍ ଇଣ୍ଡିଆ ଡ୍ରିମ ସେଣ୍ଟରର ମୁଖ୍ୟ ଫୈଜ ରେହମନଙ୍କୁ ମଧ୍ୟ ସମାନ ଧରଣର ଅଭିଯୋଗରେ ଗିରଫ କରାଯାଇଥିଲା ।

ଶିଶୁଗୃହର ନାବାଳିକାମାନେ ମୁଖ୍ୟଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣିଥିଲେ ।

ଯୁକ୍ତରାଷ୍ଟ୍ର ଆମେରିକାରେ ଥିଓଲୋଜି ଉପରେ ପଢ଼ୁଥିବା ପାଦ୍ରୀ ଫୈଜ ରେହମନ ଏବେ ଢେଙ୍କାନାଳ ଜେଲରେ ଅଛନ୍ତି ।

ହାଇକୋର୍ଟ ଦୁଇ ଥର ତାଙ୍କ ଜାମିନ ଆବେଦନକୁ ନାମଞ୍ଜୁର କରିଛି ଏବଂ ପୁଲିସ ଚାର୍ଜସିଟ୍ ଦାଖଲ କରିବା ପରେ ମାମଲାର ଶୁଣାଣି ଆରମ୍ଭ ହୋଇଯାଇଛି ।

ଲୋକାଲ ୱାୟାର

ଝାରସୁଗୁଡ଼ା, ଅଗଷ୍ଟ ୧୩ (ଲୋକାଲ ୱାୟାର) : ଝାରସୁଗୁଡ଼ା ସହରର ମୁଙ୍ଗାପଡ଼ାରେ ଏକ ଧଳ କାଉ ଉଦ୍ଧାର କରାଯାଇଛି ବୋଲି ଗୁରୁବାର ସ୍ଥାନୀୟ ରେଞ୍ଜ ଅଫିସର ଜଣେ ଅଧିକାରୀ ଗୁରୁବାର କହିଛନ୍ତି ।

ଅଧିକାରୀଙ୍କ ସୂଚନା ଅନୁସାରେ, କାଉଟି ବୁଧବାର ଅପରାହ୍ଣରେ ଦିପ୍ତେଶ ସୋନିଙ୍କ ଘର ଆଗରେ ଥିବା ଗେଟ୍‌ରେ ବସିଥିଲା । ସେ ଉଡି ପାରୁ ନ ଥିବା ଦେଖି ଦିପ୍ତେଶ କାଉଟିକୁ ଉଦ୍ଧାର କରି ଏକ ପଞ୍ଜୁରୀରେ ରଖିଥିଲା ।

ଏନେଇ ବନ ବିଭାଗକୁ ଜଣାଇଥିଲେ । ବନ କର୍ମଚାରୀ ପହଞ୍ଚିବା ପରେ କାଉଟିକୁ ହସ୍ତାନ୍ତର କରିଥିଲେ ।  

ଉଦ୍ଧାର କାଉଟିକୁ ବର୍ତ୍ତମାନ ଝାରସୁଗୁଡ଼ା ରେଞ୍ଜ ଅଫିସରେ ରଖାଯାଇଛି । କାଉଟି ଉଡ଼ିବା ପାଇଁ ସକ୍ଷମ ହେଲେ ଛାଡ଼ି ଦିଆଯିବ ବୋଲି ବନ ବିଭାଗ ପକ୍ଷରୁ କୁହାଯାଇଛି।

ଲୋକାଲ ୱାୟାର

ଝାରସୁଗୁଡା, ଅଗଷ୍ଟ ୫(ଲୋକାଲ ୱାୟାର): କରୋନାରୁ ସୁସ୍ଥ ହୋଇ କ୍ୱାରେଣ୍ଟାଇନ କେନ୍ଦ୍ରରେ ସଙ୍ଗରୋଧରେ ଥିବା ଗୋଟିଏ ପରିବାରର ୧୭ ସଦସ୍ୟଙ୍କ ଜୀବନ ଦୁର୍ବିସହ ହୋଇପଡ଼ିଛି ।

ଅସ୍ଥାୟୀ ସ୍ୱାସ୍ଥ୍ୟ କେନ୍ଦ୍ରରେ ସେମାନଙ୍କ ରହିବାକୁ ବିରୋଧ କରି ଗାଁ ଲୋକେ ବିଦ୍ୟୁତ କାଟି ଦେବା ସହିତ କରୋନା ସଂକ୍ରମଣ ଭୟରେ ଖାଦ୍ୟ ଯୋଗାଣ ବନ୍ଦ କରି ଦେଇଥିଲେ ।

ସ୍ଥିତି ସଙ୍ଗୀନ ହେବାରୁ ପ୍ରଶାସନକୁ ହସ୍ତକ୍ଷେପ କରିବାକୁ ପଡ଼ିଥିଲା । ଝାରସୁଗୁଡ଼ା ଜିଲ୍ଲା କୋଲାବିରା ବ୍ଲକ ଅନ୍ତର୍ଗତ ପରମାଣପୁରରେ ଏପରି ଦୁଃଖଦ ଘଟଣା ଘଟିଛି ।

କୋଲାବିରା ବ୍ଲକ ରଘୁନାଥପଲ୍ଲୀ ବାସିନ୍ଦା ଏହି ପରିବାରର ୮ ଶିଶୁଙ୍କ ସମେତ ୨୭ ସଦସ୍ୟ କରୋନା ପଜିଟିଭ ଚିହ୍ନଟ ହୋଇଥିଲେ ।

ସେମାନଙ୍କ ମଧ୍ୟରୁ ୧୯ ସୁସ୍ଥ ହୋଇଥିବା ବେଳେ ଜଣେ ୭୪ ବର୍ଷୀୟ ସଦସ୍ୟଙ୍କ ମୃତ୍ୟୁ ହୋଇଛି । ଅନ୍ୟମାନେ ଚିକିତ୍ସାଧୀନ ଅଛନ୍ତି ।

ଜୁଲାଇ ୨୭ରେ ବଡ ଭାଇ ଓ ମୋତେ ପରମାଣପୁର ଅସ୍ଥାୟୀ ସ୍ୱାସ୍ଥ୍ୟ କେନ୍ଦ୍ରକୁ ନିଆ ଯାଇଥିଲା । ପରେ ପରିବାରର ଆଉ ୧୭ ସଦସ୍ୟଙ୍କୁ ସେଠାକୁ ନିଆ ଯାଇଥିଲା ।

ସେହି ରାତିରେ ପରମାଣପୁର ଓ ଆଖପାଖ ଅଞ୍ଚଳର ଲୋକେ କ୍ୱାରେଣ୍ଟାଇନ କେନ୍ଦ୍ର ଆଗରେ ରୁଣ୍ଡ ହୋଇ ପରିବାର ସଦସ୍ୟଙ୍କୁ ସ୍ଥାନାନ୍ତର କରିବାକୁ ଦାବି କରିଥିଲେ ।

ଗାଁଲୋକେ କେନ୍ଦ୍ରକୁ ବିଦ୍ୟୁତ ଯୋଗାଣ ବିଚ୍ଛିନ୍ନ କରିଦେବା ସହ ଖାଦ୍ୟ ଯୋଗାଣ ବନ୍ଦ କରି ଦେଇଥିଲେ ।

ଆମେ ୮ ଘଣ୍ଟାରୁ ଅଧିକ ସମୟ ଉପାସ ରହିଥିଲୁ । ପିଲାମାନେ ବି ଗ୍ରାମବାସୀଙ୍କ ରୋଷରୁ ବାଦ ପଡି ନଥିଲେ ବୋଲି ଘଟଣା ସମ୍ପର୍କରେ ବର୍ଣ୍ଣନା କରି ଜଣେ ପରିବାର ସଦସ୍ୟ କହିଛନ୍ତି ।

ଗ୍ରାମବାସୀମାନେ କାହା କଥା ଶୁଣିନଥିଲେ । ଆମକୁ ହୋମ କ୍ୱାରେଣ୍ଟାଇନରେ ରଖିବାକୁ ଜିଲ୍ଲା ପ୍ରଶାସନ ପ୍ରତିଶ୍ରୁତି ଦେବା ପରେ ଗ୍ରାମବାସୀମାନେ ଶାନ୍ତ ହୋଇଥିଲେ ।

ରଘୁନାଥପଲ୍ଲୀ ଫେରିବା ପରେ ପରିବାରଟି ପୁଣି ଗାଁ ଲୋକଙ୍କ ରୋଷର ଶିକାର ହୋଇଥିଲା । ସେମାନଙ୍କୁ ବାହାରେ ରଖିବାକୁ ଗାଁଲୋକେ ଦାବି କରିଥିଲେ ।

ପିଲାମାନଙ୍କ ସହ ସମସ୍ତ ସଦସ୍ୟ ଘରୁ ୧୨ଦିନ ନବାହାରିବାକୁ ଅଣ୍ଡରଟେକିଂ ସ୍ୱାକ୍ଷର କରିବା ପରେ ଆମକୁ ଗାଁରେ ରହିବାକୁ ଅନୁମତି ମିଳିଥିଲା ।

୧୨ ଦିନ ସଙ୍ଗରୋଧ ପରେ ବି ଆମ ପରିବାରକୁ ଏମିତି ବାସନ୍ଦ କରାଯିବ ବୋଲି ମୋର ଅନୁମାନ ।

ଭଗବାନଙ୍କୁ ପ୍ରାର୍ଥନା କରୁଛି ଆଉ କାହା ସହ ଏପରି ନଘଟୁ । ସାମାଜିକ ବାସନ୍ଦ ବିରୋଧରେ ରାଜ୍ୟ ସରକାର ଗାଁଲୋକଙ୍କୁ ସଚେତନ କରାନ୍ତୁ ବୋଲି ଅନୁରୋଧ କରିଛନ୍ତି ପୀଡ଼ିତ ପରିବାରର ଜଣେ ବ୍ୟକ୍ତି ।

ସ୍ଥାନୀୟ ଲୋକଙ୍କ ମନରେ କୋଭିଡ ପ୍ରତି ଅମୂଳକ ଭୟ ସୃଷ୍ଟି ହୋଇଛି । କୋଭିଡ-୧୯ ରୋଗୀ ସୁସ୍ଥ ହୋଇ ଘରକୁ ଫେରି ସଙ୍ଗରୋଧରେ ରହିଲେ କୌଣସି ବିପଦ ନାହିଁ ବୋଲି ଆମେ ଲୋକଙ୍କୁ ବୁଝାଉଛୁ ।

ପରମାଣପୁରରେ ଯାହା ଘଟିଲା ତାର ପୁନରାବୃତ୍ତି ହେବ ନାହିଁ । ସ୍ଥିତି ପ୍ରଶାସନ ନିୟନ୍ତ୍ରଣରେ ଅଛି ବୋଲି ଝାରସୁଗୁଡ଼ା ଜିଲ୍ଲାପାଳ ସରୋଜ କୁମାର ସାମଲ କହିଛନ୍ତି ।

ଲୋକାଲ ୱାୟାର