ଦୁର୍ଘଟଣା

ରାଉରକେଲା, ଡିସେମ୍ବର ୧୪ (ଲୋକାଲ ୱାୟାର): ସୁନ୍ଦରଗଡ଼ ଜିଲ୍ଲା ଉଜ୍ଜ୍ବଳପୁର ଫରେଷ୍ଟ ରେଞ୍ଜ ଅନ୍ତର୍ଗତ କେନ୍ଦୁଡିହିରେ ଜଙ୍ଗଲି ହାତୀ ଆକ୍ରମଣରେ ଜଣଙ୍କର ମୃତ୍ୟୁ ଘଟିଥିବା ଶନିବାର ଅଭିଯୋଗ ହୋଇଛି।

ବନ ବିଭାଗ ଅଧିକାରୀଙ୍କ ସୂଚନା ଅନୁସାରେ, କେନ୍ଦୁଡ଼ିହି ଗାଁର ପରୀକ୍ଷିତ ଗହିର ଜଙ୍ଗଲଜାତ ଦ୍ରବ୍ୟ ସଂଗ୍ରହ ଲାଗି ଜଙ୍ଗଲ ଭିତରକୁ ଯାଇଥିବାବେଳେ ଏକ ଦନ୍ତାହାତୀ ହାବୁଡ଼ରେ ପଡ଼ିଯାଇଥିଲେ ଓ ହାତୀଟି ତାଙ୍କୁ ଆକ୍ରମଣ କରିଥିଲା।

ଖବର ପାଇ ବନ ବିଭାଗ ଅଧିକାରୀ ଘଟଣାସ୍ଥଳରେ ପହଞ୍ଚିଛନ୍ତି।

ନିୟମ ଅନୁସାରେ, ପରୀକ୍ଷିତଙ୍କ ପରିବାରଲୋକଙ୍କୁ ଚାରି ଲକ୍ଷ ଟଙ୍କାର ଅନୁକମ୍ପାମୂଳକ ସହାୟତା ପ୍ରଦାନ କରାଯିବ ବୋଲି କୁହାଯାଇଛି।

ସୂଚନାଯୋଗ୍ୟ, ଏହି ଅଞ୍ଚଳରେ ଗତ ତିନି ମାସ ମଧ୍ୟରେ ଏହାକୁ ମିଶାଇ ହାତୀ ଦୁଇଟି ଜୀବନ ନେଲାଣି।

ଲୋକାଲ ୱାୟାର

ସମ୍ୱଲପୁର, ଡିସେମ୍ବର ୧୪ (ଲୋକାଲ ୱାୟାର) ସମ୍ବଲପୁର ଜିଲ୍ଲା ଯୁଯୁମୁରାଠାରେ ୫୫ ନମ୍ୱର ଜାତୀୟ ରାଜପଥରେ ଟ୍ରକ ଓ ଗ୍ୟାସ ଟ୍ୟାଙ୍କର ମୁହାଁମୁହିଁ ଧକ୍କା ହୋଇ ନିଆଁ ଲାଗିଯିବାରୁ ଦୁଇଜଣଙ୍କର ମୃତ୍ୟୁ ଘଟିଥିବା ପୁଲିସ ଶନିବାର କହିଛି।

ଲୁହା ବୋଝେଇ ଟ୍ରକଟି ସମ୍ୱଲପୁରରୁ ରେଢ଼ାଖୋଲ ଅଭିମୁଖେ ଯାଉଥିବା ବେଳେ ବିପରୀତ ପାର୍ଶ୍ଵରୁ ଆସୁଥିବା ଟ୍ୟାଙ୍କରକୁ ଧକ୍କା ଦେଇଥିଲା ।

ଫଳତଃ ଦୁଇଟିଯାକ ଗାଡିରେ ନିଆଁ ଲାଗିଯିବାରୁ ସେଥିରେ ଥିବା ଲୋକେ ବାହାରି ପାରିନଥିଲେ । ନିଆଁରେ ଦୁଇଜଣ ଜଳିଯାଇଥିବା ଜଣେ ସ୍ଥାନୀୟ ପୁଲିସ ଅଧିକାରୀ ସୂଚନା ଦେଇଛନ୍ତି ।

ମୃତକଙ୍କ ପରିଚୟ ମିଳିପାରି ନାହିଁ ।

ସ୍ଥାନୀୟ ଲୋକଙ୍କଠାରୁ ଖବର ପାଇ ଅଗ୍ନିଶମ ବାହିନୀ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ।

ସମ୍ବଲପୁର ଓ ଝାରସୁଗୁଡାର ଭାରତ ପେଟ୍ରୋଲିୟମ କର୍ପୋରେସନ ଲିମିଟେଡ (ବିପିସିଏଲ)ର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ପରିସ୍ଥିତି ତଦାରଖ କରିଛନ୍ତି ।

ଲୋକାଲ ୱାୟାର

ରାଉରକେଲା, ଡିସେମ୍ବର ୧୩ (ଲୋକାଲ ୱାୟାର): ତଳସରା ଥାନା ଅନ୍ତର୍ଗତ ସବଡେଗା-ବାଲିଶଙ୍କରା ରାସ୍ତାରେ ଶୁକ୍ରବାର ସକାଳେ ଏକ ମର୍ମତୁଦ ସଡ଼କ ଦୁର୍ଘଟଣାରେ ତିନି ଜଣ ବାଇକ୍ ଆରୋହୀଙ୍କର ମୃତ୍ୟୁ ଘଟିଛି।

ସକାଳୁ କୁହୁଡ଼ି ପଡ଼ିଥିବାବେଳେ ବାଇକଟି ସେଠାରେ ଛିଡ଼ା ହୋଇଥିବା ଏକ ଟ୍ରକକୁ ପଛରୁ ଧକ୍କା ଦେଇଥିଲା।

ଫଳରେ ଘଟଣାସ୍ଥଳରେ ତିନି ଜଣ ପ୍ରାଣ ହରାଇଥିବା ପୁଲିସ କହିଛି।

ମୃତକମାନଙ୍କର ପରିଚୟ ମିଳିନଥିବାବେଳେ ପୁଲିସ ଘଟଣାର ତଦନ୍ତ ଆରମ୍ଭ କରିଛି।

ଲୋକାଲ ୱାୟାର

ଭୁବନେଶ୍ବର, ଡିସେମ୍ବର ୧୩ (ଲୋକାଲ ୱାୟାର): କଟକ ଓ ଢେଙ୍କାନାଳରେ ଶୁକ୍ରବାର ବୃଦ୍ଧ ଦମ୍ପତିଙ୍କ ସମେତ ତିନି ଜଙ୍କ ହତ୍ୟା ଅଭିଯୋଗ ହୋଇଛି।

ଗତକାଲି ରାତିରେ ଢେଙ୍କାନାଳ ଜିଲ୍ଲା ନିହଳପ୍ରସାଦରେ ଜଣେ ୩୨ ବର୍ଷର ଯୁବକଙ୍କୁ ହତ୍ୟା କରାଯାଇଛି।

ମୃତକ ପୂର୍ଣ୍ଣଚନ୍ଦ୍ର ବେହେରା ସ୍ଥାନୀୟ ଏକ କ୍ରସର୍ ୟୁନିଟରେ କାମ କରୁଥିଲେ।

ପୁଲିସ ପୂର୍ଣ୍ଣଚନ୍ଦ୍ରଙ୍କ ମୃତଦେହ ଜବତ କରି ତଦନ୍ତ ଚଳାଇଛି।

ସେପଟେ କଟକ ମଧୁପାଟଣା ଥାନା ଅନ୍ତର୍ଗତ ବେଲେଶ୍ବର ଅଞ୍ଚଳରେ ଏକ ଦମ୍ପତିଙ୍କୁ ଗଳାକାଟି ହତ୍ୟା ଅଭିଯୋଗ ହୋଇଛି।

ଧାରୁଆ ଅସ୍ତ୍ରରେ କେହି ଦୁର୍ବୃତ୍ତ ସେମାନଙ୍କୁ ବେକ କାଟି ହତ୍ୟା କରିଥିବା ସନ୍ଦେହ କରାଯାଉଛି।

କଟକ ଡିସିପି ଅଖିଳେଶ୍ବର ସିଂ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛନ୍ତି।

ଲୋକାଲ ୱାୟାର

ଅନୁଗୁଳ, ଡିସେମ୍ବର ୧୨ (ଲୋକାଲ ୱାୟାର): ଅନୁଗୁଳ ଜିଲ୍ଲା ବାଲିପଟା ଗାଁ ନିକଟ ଦଶରା ପଡିଆ ଆଗରେ ଏକ ସ୍କୁଟିକୁ ଟ୍ରକ୍ ଧକ୍କା ଦେବା ଫଳରେ ଦୁଇ ଜଣଙ୍କ ମୃତ ଘଟିଛି।

ମୃତକମାନେ ହେଲେ ସ୍ଥାନୀୟ ଅଞ୍ଚଳର କବିତା ସାହୁ ଓ ତାଙ୍କ ପୁଅ ଶୁଭମ ସାହୁ।

ଶୁଭମଙ୍କ ଜନ୍ମଦିନ ପାଇଁ ବୁଢ଼ୀ ଠାକୁରାଣୀ ମନ୍ଦିରରୁ ଦର୍ଶନ ସାରି ଘରକୁ ଫେରୁଥିବା ବେଳେ ଏକ ଟ୍ରକ୍, ସ୍କୁଟିକୁ ପଛପଟୁ ଧକ୍କା ଦେଇଥିଲା।

ଫଳରେ ଘଟଣାସ୍ଥଳରେ ମାଆ ଓ ପୁଅଙ୍କର ମୃତ୍ୟୁ ହୋଇଥିଲା।

ମୃତ୍ୟୁ ପରେ ସ୍ଥାନୀୟ ଲୋକେ ୫୫ ନମ୍ବର ଜାତୀୟ ରାଜପଥ ଅବରୋଧ କରିଥିବାରୁ ଏହି ରାସ୍ତାରେ ଗାଡି ଚଳାଚଳ ବନ୍ଦ ରହିଛି।

ଘଟଣାସ୍ଥଳରେ ପୁଲିସ ପହଂଚି ଲୋକଙ୍କୁ ବୁଝାସୁଝା କରୁଛି ।

ଲୋକାଲ ୱାୟାର

ପୁରୀ, ଡିସେମ୍ବର ୧୧(ଲୋକାଲ ୱାୟାର): ପୁରୀ ବେଳାଭୂମିରେ ସମୁଦ୍ରରେ ବୁଡ଼ି ଯାଇ ମଙ୍ଗଳବାର ଜଣେ ପର୍ଯ୍ୟଟକଙ୍କ ମୃତ୍ୟୁ ହୋଇଥିବା ସ୍ଥାନୀୟ ଥାନା ପକ୍ଷରୁ ବୁଧବାର ସୂଚନା ଦିଆଯାଇଛି ।

ମହାରାଷ୍ଟ୍ରର ନାସିକରୁ ପୁରୀ ବୁଲିବାକୁ ଆସିଥିବା ଜଣେ ବ୍ୟକ୍ତି ସକାଳେ ଗାନ୍ଧୀ ଘାଟ ନିକଟରେ ସ୍ନାନ କରୁଥିବା ବେଳେ ଜୁଆରରେ ଭାସି ଯାଇଥିଲେ ।

ଅନ୍ୟ ପର୍ଯ୍ୟଟକମାନେ ଏହା ଦେଖି ଚିତ୍କାର କରିବାକୁ ଉପସ୍ଥିତ ଲାଇଫ ଗାର୍ଡମାନେ ଜୁଆର ମାଡ଼ରୁ ତାଙ୍କୁ ରକ୍ଷା କରି କୂଳକୁ ଆଣିଥିଲେ ।

ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲେ ମଧ୍ୟ ତାଙ୍କର ମୃତ୍ୟୁ ହୋଇଯାଇଥିଲା ବୋଲି ପୁଲିସ କହିଛି ।

ଲୋକାଲ ୱାୟାର

ଜୟପୁର, ଡିସେମ୍ବର ୧୦ (ଲୋକାଲ ୱାୟାର): କୋରାପୁଟ ଜିଲ୍ଲାର ପ୍ରସିଦ୍ଧ ଶୈବପୀଠ ଗୁପ୍ତେଶ୍ବରରେ ମଙ୍ଗଳବାର ଝୁଲନ୍ତା ଅବସ୍ଥାରେ ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି।

ଗୁପ୍ତେଶ୍ୱର ଗୁମ୍ଫା ଭିତରେ ଥିବା ଏକ କ୍ଲାମ୍ପରେ ଏହି ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଥିବା ସ୍ଥାନୀୟ ପୁଲିସ କହିଛି।

ଯୁବକଙ୍କ ପରିଚୟ ମିଳିପାରିନଥିବାବେଳେ ତାଙ୍କ ଘର ସମ୍ବଲପୁର ଅଞ୍ଚଳରେ ହୋଇଥିବା ପ୍ରାଥମିକ ତଦନ୍ତରୁ ପୁଲିସ ଜାଣିବାକୁ ପାଇଛି।

ଅପରପକ୍ଷରେ ଏହି ଶୈବପୀଠରେ ମୃତଦେହ ଉଦ୍ଧାର ହୋଇଥିବାରୁ ଠାକୁରଙ୍କ ଦୈନିକ ପୂଜାପାଠ ପ୍ରଭାବିତ ହୋଇଛି।

ଏନେଇ ମନ୍ଦିର ଶୋଧ ଓ ସ୍ବତନ୍ତ୍ର ରୀତିନୀତି ପରେ ଶ୍ରଦ୍ଧାଳୁମାନେ ଠାକୁରଙ୍କ ଦର୍ଶନ ପାଇପାରିବେ ବୋଲି ପୂଜକମାନେ କହିଛନ୍ତି।

ଲୋକାଲ ୱାୟାର

ମାଲକାନଗିରି, ଡିସେମ୍ବର ୯(ଲୋକାଲ ୱାୟାର): ଓଡ଼ିଶାର ମାଲକାନଗିରି ଜିଲ୍ଲାରେ ହୋଇଥିବା ବହୁ ନକ୍ସଲ ହିଂସାରେ ଲିପ୍ତ ସିପିଆଇ-ମାଓବାଦୀ କେନ୍ଦ୍ରୀୟ କମିଟି ନେତା ରାବୁଲୁ ଶ୍ରୀନିବାସ ଓରଫ ରମନ୍ନା (୫୬)ର ହୃଦଘାତରେ ମୃତ୍ୟୁ ହୋଇଥିବା ଛତିଶଗଡ଼ ପୁଲିସର ଗୁଇନ୍ଦା ଶାଖା ସୂଚନା ଦେଇଛି ।

ରମନ୍ନାକୁ ଧରିବା ପାଇଁ ବିଭିନ୍ନ ରାଜ୍ୟ ଓ କେନ୍ଦ୍ର ସରକାର ୭୦ ଲକ୍ଷରୁ ଅଧିକ ଟଙ୍କାର ପୁରସ୍କାର ଘୋଷଣା କରିଥିଲେ ।

ତେବେ ରମନ୍ନାର ମୃତ୍ୟୁ ନେଇ ନକ୍ସଲ ସଂଗଠନ ପକ୍ଷରୁ କୌଣସି ବିବୃତି ଦିଆଯାଇନାହିଁ ।

ତେଲଙ୍ଗାନାର ମୂଳବାସିନ୍ଦା ରମନ୍ନା ସଙ୍ଗଠନରେ ବୈଷୟିକ କମିଟି ମୁଖ୍ୟ ଥିଲା ଏବଂ ଟେକ୍ ରମନ୍ନା ନାମରେ ପରିଚିତ ଥିଲା ।

ଓଡ଼ିଶା, ଛତିଶଗଡ଼, ମହାରାଷ୍ଟ୍ର ଓ ତେଲଙ୍ଗାନାରେ ବହୁ ହିଂସାର ସେ ଥିଲା ମାଷ୍ଟରମାଇଣ୍ଡ ।
ଲୋକାଲ ୱାୟାର

ବାରିପଦା, ଡିସେମ୍ବର ୯ (ଲୋକାଲ ୱାୟାର): ସଦର ଥାନା ଅନ୍ତର୍ଗତ ଜ୍ୟୋତିପୁର ଜଙ୍ଗଲ ରାସ୍ତାରେ ବିବାହ ଭୋଜିରୁ ଫେରିବାବେଳେ ଦୁର୍ଘଟଣା ଘଟି ଦୁଇ ଜଣଙ୍କର ମୃତ ଘଟିଛି।

ମୃତକମାନେ ହେଲେ ଗୌତମ ମହାନ୍ତ ଓ ଅଜିତ ମହାନ୍ତ।

ଏମାନେ ହାତୀକୋଟ ଗାଁକୁ ଏକ ବିହାର ଭୋଜିରେ ଯୋଗଦେବାକୁ ଯାଇ ବାଇକରେ ଫେରୁଥିବାବେଳେ ସେମାନଙ୍କୁ ଏକ ଅଜଣା ଗାଡ଼ି ଧକ୍କା ଦେଇଥିବା ସନ୍ଦେହ କରାଯାଉଛି।

ଦୁର୍ଘଟଣା ପରେ ଉଭୟଙ୍କ ସାଙ୍ଗମାନେ ତୁରନ୍ତ ୧୦୮ ଆମ୍ବୁଲାନ୍ସ ଦ୍ୱାରା ମେଡିକାଲକୁ ଆଣିଥିଲେ।

ତେବେ ମେଡିକାଲରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଛନ୍ତି।

ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।

ଲୋକାଲ ୱାୟାର

ଭଦ୍ରକ, ଡିସେମ୍ବର ୯ (ଲୋକାଲ ୱାୟାର): ବିବାହ ସମୟରେ ଏକ ବାଇକ୍ ବାବଦ ୮୦ ହଜାର ଟଙ୍କା ଦେଇନପାରିବାରୁ ସିମୁଳିଆ ଥାନା ଅଞ୍ଚଳରେ ଜଣେ ନବବଧୂଙ୍କୁ ତାଙ୍କ ଶାଶୂଘରଲୋକ ମାରିଦେଇଥିବା ଅଭିଯୋଗ ହୋଇଛି।

ସୂଚନା ଅନୁସାରେ, ଗତ ଜୁଲାଇରେ ଖଇରା ଥାନା ରାମଚନ୍ଦ୍ରପୁରର ଭାଗବତ ଲେଙ୍କାଙ୍କ ଝିଅ ଲିଜାସ୍ମିତାଙ୍କୁ ସିମୁଳିଆ ଥାନା ଆନନ୍ଦପୁର ସାମିଲଗଡନ୍ତି ମୌଜାର ଶଙ୍କର୍ଷଣ ଲେଙ୍କାଙ୍କ ପୁଅ ସୁଶାନ୍ତ ଲେଙ୍କା ବିବାହ କରିଥିଲେ।

ବିବାହ ସମୟରେ ବରପକ୍ଷଙ୍କ ଦାବି ମୁତାବକ ନଗଦ ୫୫ ହଜାର ଟଙ୍କା ସହ ଅଳଙ୍କାର ଓ ଆସବାବପତ୍ର ସମେତ ପ୍ରାୟ ୧୦ ଲକ୍ଷ ଟଙ୍କା ମୂଲ୍ୟର ଯୌତୁକ ଦିଆଯାଇଥିଲା ।

ତେବେ ବିବାହ ପରେ ଲିଜାସ୍ମିତାଂକୁ ଶାଶୂଘରଲୋକେ ବାଇକ୍ ବାବଦରେ ୮୦ ହଜାର ଟଙ୍କା ଦାବି କରିଆସୁଥିଲେ ।

ତେବେ ଲିଜାସ୍ମିତାଙ୍କ ବାପଘରଲୋକେ ତାହା ଦେଇନପାରିବାରୁ ଶାଶୂଘରଲୋକ ଝିଅ ଉପରେ ଅକଥୀନୟ ନିର୍ଯାତନା ଦେଇଆସୁଥିବା ଲିଜାସ୍ମିତାଙ୍କ ବାପା ଖଇରା ଥାନାରେ ଅଭିଯୋଗ କରିଛନ୍ତି।

ଇତିମଧ୍ୟରେ ଶନିବାର ସନ୍ଧ୍ୟାରେ ବାଙ୍ଗାଲୋରରେ ଚାକିରି କରୁଥିବା ସୁଶାନ୍ତ ଫୋନ୍ ଯୋଗେ ଲିଜାସ୍ମିତା ବିଷ ଖାଇଦେଇଥିବା ସଂପର୍କରେ ତାଙ୍କ ବାପଘରଲୋକଙ୍କୁ ଜଣାଇଥିଲେ।

ବାପଘରଲୋକ ଭଦ୍ରକ ଜିଲ୍ଲା ମୁଖ୍ୟ ଡାକ୍ତରଖାନାରେ ପହଞ୍ଚିଲା ବେଳକୁ ଲିଜାସ୍ମିତା ପ୍ରାଣ ହରାଇସାରିଥିଲେ ଓ ତାଙ୍କ ଦେହର ବିଭିନ୍ନ ସ୍ଥାନରେ ମାଡଚିହ୍ନ ଥିବା ତାଙ୍କ ବାପା କହିଛନ୍ତି।

ଖଇରା ପୁଲିସ ମାମଲାର ତଦନ୍ତ କରୁଛି।

ଲୋକାଲ ୱାୟାର

ଭୁବନେଶ୍ବର, ଡିସେମ୍ବର ୮ (ଲୋକାଲ ୱାୟାର): ଏକ ହାଜତ ମୃତ୍ୟୁ ମାମଲାରେ ସଂପୃକ୍ତ ପୁଲିସ କର୍ମଚାରୀଙ୍କ ବିରୋଧରେ କି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି, ସେ ସଂପର୍କରେ ଡିଆଇଜିଙ୍କ ସମେତ କେନ୍ଦୁଝର ଜିଲ୍ଲାଜଜ୍ ଓ କେନ୍ଦୁଝର ଏସ୍.ପି.ଙ୍କୁ ଜାତୀୟ ମାନବାଧିକାର କମିଶନ ରିପୋର୍ଟ ତଲବ କରିଛନ୍ତି।

ସୁପ୍ରିମକୋର୍ଟ ଓକିଲ ତଥା ମାନବାଧିକାର କର୍ମୀ ରାଧାକାନ୍ତ ତ୍ରିପାଠୀଙ୍କ ଏକ ପିଟିସନ୍ ଆଧାରରେ କମିଶନ ଆସନ୍ତା ଛଅ ସପ୍ତାହ ମଧ୍ୟରେ ଏହି ରିପୋର୍ଟ ମାଗିଛନ୍ତି।

ଗତ ୨୦ ନଭେମ୍ବରରେ ବଡ଼ବିଲ ଥାନା ଅନ୍ତର୍ଗତ ଶେଡିଂ ବସ୍ତିର ସୁରେଶ ନାୟକଙ୍କର ଥାନା ହାଜରେ ମୃତ୍ୟୁ ହୋଇଥିଲା।

ପୁଲିସ ଥାର୍ଡ ଡିଗ୍ରୀ ପ୍ରୟୋଗ କରିବାରୁ ତାଙ୍କର ମୃତ୍ୟୁ ହୋଇଥିବା ଏହି ପିଟିସନରେ ଦର୍ଶାଯାଇଥିଲା।

ଏଥିପାଇଁ ସୁରେଶଙ୍କ ପରିବାରକୁ କ୍ଷତିପରୂରଣ ଦେବା ପାଇଁ ମଧ୍ୟ ଏହି ପିଟିସନରେ କୁହାଯାଇଥିଲା।

ଏହାରି ଆଧାରରେ ଜାତୀୟ ମାନବାଧିକାର କମିଶନ ସୁରେଶଙ୍କ ମୃତ୍ୟୁର କାରଣ ଓ କାର୍ଯ୍ୟାନୁଷ୍ଠାନ ରିପୋର୍ଟ ସମେତ ତଦନ୍ତ ରିପୋର୍ଟ, ପୋଷ୍ଟମର୍ଟମ୍ ରିପୋର୍ଟ, ପୋଷ୍ଟମର୍ଟମର ଭିଡିଓ, ଭିସେରା ରିପୋର୍ଟ, ପଞ୍ଚନାମା ଓ ମାଜିଷ୍ଟ୍ରେଟଙ୍କ ତଦନ୍ତ ରିପୋର୍ଟ ମାଗିଛନ୍ତି।

ଲୋକାଲ ୱାୟାର

ବାଲେଶ୍ବର, ଡିସେମ୍ବର ୮ (ଲୋକାଲ ୱାୟାର): ଶେରଗଡ଼ ନିକଟରେ ଏକ ଟ୍ରକ୍ ପଛରେ ମିନିବସ୍ ଧକ୍କା ହେବା ଫଳରେ ରବିବାର ତିନି ଜଣଙ୍କର ମୃତ୍ୟୁ ହୋଇଛି ଓ ୧୦ ଜଣ ଆହତ ହୋଇଛନ୍ତି।

ପୁଲିସର ସୂଚନା ଅନୁସାରେ, ବାଲିସାହି ଅଞ୍ଚଳର ୨୭ ଜଣ ଏକ ମିନି ବସରେ ମୟୂରଭଞ୍ଜର ପର୍ଯ୍ୟଟନସ୍ଥଳୀ ଦେବକୁଣ୍ଡକୁ ଯାଉଥିଲେ।

ଆଜି ଭୋର ପ୍ରାୟ ସାଢ଼େ ଚାରିଟା ସମୟରେ ଶେରଗଡ଼ ପେଟ୍ରୋଲପମ୍ପ ନିକଟରେ ଗାଡ଼ିଟି ଭାରସାମ୍ୟ ହରାଇ ଏକ ଟ୍ରକକୁ ପଛପଟୁ ଧକ୍କା ଦେଇଥିଲା।

ଫଳରେ ତ୍ରିନାଥ ଦାଶ, ବାପି ମିଶ୍ର ଓ ଗଙ୍ଗାଧର ଦାଶଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା।

ଗାଡ଼ିର ଡ୍ରାଇଭରଜଣକ ନିଶାଗ୍ରସ୍ତ ଥିବାରୁ ଏଭଳି ଘଟଣା ଘଟିଥିବା ଯାତ୍ରୀମାନେ ଅଭିଯୋଗ କରିଥିବାବେଳେ ଘଟଣାସ୍ଥଳରେ ଖନ୍ତାପଡ଼ା ପୁଲିସ ପହଞ୍ଚି ତଦନ୍ତ ଚଳାଇଛି।

ଆହତ ଦଶ ଜଣ ଯାତ୍ରୀଙ୍କ ମଧ୍ୟରୁ ଜଣେ ନାବାଳିକର ଅବସ୍ଥା ଗୁରୁତର ଥିବା ଜଣାପଡ଼ିଛି।

ବାଲେଶ୍ବର ଜିଲ୍ଲା ମୁଖ୍ୟ ଚିକିତ୍ସାଳୟରେ ଆହତଙ୍କ ଚିକିତ୍ସା ଚାଲିଛି।

ଲୋକାଲ ୱାୟାର

ଅନୁଗୁଳ, ଡିସେମ୍ବର ୭ (ଲୋକାଲ ୱାୟାର): ଛେଣ୍ଡିପଦା ବନାଞ୍ଚଳ ଅନ୍ତର୍ଗତ ଗୋପୀନାଥପୁର ଗାଁରେ ବାରହା ଶିକାରୀ ବିଛାଇଥିବା ବିଦ୍ୟୁତ ତାର ସଂସ୍ପର୍ଶରେ ଆସି ଜଣେ ଚାଷୀଙ୍କ ମୃତ୍ୟୁ ଅଭିଯୋଗ ହୋଇଛି।

ମୃତକ ହେଲେ ସ୍ଥାନୀୟ ଅଞ୍ଚଳର ନବକିଶୋର ପ୍ରଧାନ ।

ନବକିଶୋର ବିଲକୁ ଧାନ ଜଗିବାକୁ ଯାଇଥିବା ସମୟରେ ବିଦ୍ୟୁତ ତାର ସଂସ୍ପର୍ଶରେ ଆସିଥିଲେ ।

ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିବା ସ୍ଥାନୀୟ ପୁଲିସ ଅଧିକାରୀ କହିଛନ୍ତି ।

ଗାଁ ଲୋକଙ୍କ ସହାୟତାରେ ପୁଲିସ ମୃତଦେହ ଜବତ କରି ଅଧିକ ତଦନ୍ତ ଜାରି ରଖିଛି ।

ଲୋକାଲ ୱାୟାର

କେନ୍ଦ୍ରାପଡ଼ା, ଡିସେମ୍ବର ୭(ଲୋକାଲ ୱାୟାର): କେନ୍ଦ୍ରାପଡ଼ା ଜିଲ୍ଲାର ପଟ୍ଟାମୁଣ୍ଡାଇଠାରେ ଶନିବାର ମଧ୍ୟାହ୍ନରେ ସ୍କୁଲ ଛାତ୍ରଛାତ୍ରୀଙ୍କୁ ନେଇ ଯାଉଥିବା ଏକ ଅଟୋ ଓଲଟି ପଡ଼ିବାରୁ ଜଣେ ଛାତ୍ରୀଙ୍କ ମୃତ୍ୟୁ ହୋଇଥିବା ବେଳେ ୩ ଜଣ ଆହତ ହୋଇଥିବା ସ୍ଥାନୀୟ ଲୋକେ କହିଛନ୍ତି ।

ଔପଦା ସରସ୍ୱତୀ ଶିଶୁ ମନ୍ଦିରର କେତେକ ଛାତ୍ରଛାତ୍ରୀ ଓ ଅନ୍ୟାନ୍ୟ କର୍ମଚାରୀଙ୍କୁ ମିଶାଇ ପ୍ରାୟ ୧୫ ଜଣ ଏକ ଅଟୋରେ ଯାଉଥିବା ବେଳେ ଗରା ଗ୍ରାମ ନିକଟରେ ଡ୍ରାଇଭର ନିୟନ୍ତ୍ରଣ ହରାଇବାରୁ ତାହା ଦୁର୍ଘଟଣାଗ୍ରସ୍ତ ହୋଇଥିଲା ।

ଦୁର୍ଘଟଣାସ୍ଥଳରେ ଗରା ଗ୍ରାମର ଜଣେ ଦ୍ୱିତୀୟ ଶ୍ରେଣୀ ଛାତ୍ରୀଙ୍କ ମୃତ୍ୟୁ ହୋଇଥିବା ବେଳେ ୩ ଜଣଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।

ଦୁର୍ଘଟଣା ପରେ ଡ୍ରାଇଭର ସେଠାରୁ ଖସି ଯାଇଥିବା ବେଳେ ଉତ୍ତ୍ୟକ୍ତ ଲୋକେ ଅଟୋଟିକୁ ଜାଳି ଦେଇଥିବା ଦେଖିବାକୁ ମିଳିଛି ।

ଲୋକାଲ ୱାୟାର

ଭୁବନେଶ୍ବର, ଡିସେମ୍ବର ୫ (ଲୋକାଲ ୱାୟାର): ବରମୁଣ୍ଡା ହାଉସିଂବୋର୍ଡ କଲୋନୀର ଏକ ଘରୁ ଗୁରୁବାର ସକାଳେ ଜଣେ ମହିଳା ବ୍ୟାଙ୍କ ମ୍ୟାନେଜରଙ୍କ ମୃତଦେହ ଝୁଲନ୍ତା ଅବସ୍ଥାରେ ଉଦ୍ଧାର ହୋଇଛି।

ମୃତକ ଆର. ରଞ୍ଜିତା ରାଓ ଅଶୋକ ନଗର ୟୁକୋ ବ୍ୟାଙ୍କରେ ସିନିୟର୍ ମ୍ୟାନେଜର୍ ଥିଲେ।

ରଞ୍ଜିତାଙ୍କ ଘର ନବରଙ୍ଗପୁର ଜିଲ୍ଲାରେ ହୋଇଥିବାବେଳେ ଏଠାରେ ସେ ବାପାମାଙ୍କ ସହ ଭଡ଼ାଘରେ ରହୁଥିଲେ।

ପରିବାରଲୋକଙ୍କ କହିବା ଅନୁସାରେ, ଗତକାଲି ରାତିରେ ରଞ୍ଜିତା ଅଫିସ୍‌ରୁ ଘରକୁ ଫେରି ରାତିରେ ଖାଇପିଇ ଶୋଇଥିଲେ ଓ ସେ ସ୍ବାଭାବିକ ଥିଲେ।

ପୁଲିସ୍‌ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ତଦନ୍ତ ଚଳାଇଛି।

ଲୋକାଲ ୱାୟାର

କେନ୍ଦ୍ରାପଡ଼ା, ଡିସେମ୍ବର ୪(ଲୋକାଲ ୱାୟାର): କେନ୍ଦ୍ରାପଡ଼ା ଜିଲ୍ଲା ସଦର ମହକୁମା ନିକଟରେ ବୁଧବାର ଅପରାହ୍ଣରେ ବାଇକରେ ଦୁଇ ଜଣ ଯୁବକ ଯାଉଥିବା ବେଳେ ଜଣଙ୍କ ପକେଟରେ ଥିବା ଏକ ମୋବାଇଲ ଫୋନ୍ ଫାଟିଯିବାରୁ ଯୁବକ ଦୁଇ ଜଣ ଗୁରୁତର ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଥିବା ସେମାନଙ୍କ ପରିବାର ପକ୍ଷରୁ କୁହାଯାଇଛି ।

ଜିଲ୍ଲାର ଆଳି ଥାନା ମହାଦେଈପାଟଣାର ଚନ୍ଦ୍ରମଣି ସେଠୀ ଓ ରାଜନଗର ଥାନା ଦାରୁହୁରା ଗ୍ରାମର ରାଜକିଶୋର ରାଉତ ଅପରାହ୍ଣରେ କେନ୍ଦ୍ରାପଡ଼ାରୁ କଟକ-ଚାନ୍ଦବାଲି ରାସ୍ତା ଦେଇ ଘରକୁ ଫେରୁଥିଲେ ।

କେନ୍ଦ୍ରାପଡ଼ା ସହର ଉପକଣ୍ଠ ଗରାପୁରଠାରେ ଚନ୍ଦ୍ରମଣିଙ୍କ ପକେଟରେ ଥିବା ଏକ ମୋବାଇଲ ଫୋନ୍ ବିସ୍ଫୋରଣ କରିଥିଲା ।

ଫଳରେ ଉଭୟ ଚନ୍ଦ୍ରମଣି ଓ ରାଜକିଶୋର ଆହତ ହୋଇଛନ୍ତି । ସେମାନଙ୍କୁ କେନ୍ଦ୍ରାପଡ଼ା ଡାକ୍ତରଖାନାରେ ଭର୍ତ୍ତି କରାଯାଇଛି ।

ଲୋକାଲ ୱାୟାର

ବାଲେଶ୍ୱର, ଡିସେମ୍ବର ୩(ଲୋକାଲ ୱାୟାର): ବାଲେଶ୍ୱର ଜିଲ୍ଲା ସଦର ଥାନାଞ୍ଚଳରେ ମଙ୍ଗଳବାର ଜଣେ ଯୁବକ ବାପା ସହ ଝଗଡ଼ା କରିବା ପରେ କ୍ଷୁବ୍ଧ ହୋଇ କଲୋନିରେ ବିଭିନ୍ନ ଲୋକଙ୍କର ୭ଟି ବାଇକ୍ ଜାଳି ଦେଇଥିବା ସ୍ଥାନୀୟ ପୁଲିସ କହିଛି ।

ସଦର ଥାନା ଅନ୍ତର୍ଗତ ଭୋଇ ସାହିର ସଞ୍ଜୟ ମହାନ୍ତିଙ୍କ ଘରେ ଝିଅ ବାହାଘର ପାଇଁ ପ୍ରସ୍ତୁତି ଚାଲିଥିଲା ।

ଏହି ସମୟରେ ସଞ୍ଜୟଙ୍କ ପୁଅ ସୌରଭ ନିଶା ଗ୍ରସ୍ତ ହୋଇ ଘରକୁ ଆସି କୌଣସି କାରଣରୁ ବାପାଙ୍କ ସହ ଝଗଡ଼ା କରିଥିଲା ।

ପରେ ସୌରଭ ଘରୁ ବାହାରି ଯାଇ କଲୋନିରେ ବିଭିନ୍ନ ଲୋକଙ୍କର ୭ଟି ବାଇକରେ ନିଆଁ ଲଗାଇ ଦେଇଥିଲା ।

ଖବର ପାଇ ଅଗ୍ନିଶମ ବାହାିନୀ କର୍ମଚାରୀ ପହଞ୍ଚି ନିଆଁକୁ ଆୟତ କରିଥିଲେ ମଧ୍ୟ ବାଇକ ଗୁଡ଼ିକ ସମ୍ପୂର୍ଣ୍ଣ ଜଳି ଯାଇଥିଲା ।

ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା । ସର୍ବସାଧାରଣଙ୍କ ସମ୍ପତ୍ତି ନଷ୍ଟ କରିଥିବାରୁ ସୌରଭ ନାମରେ ମାମଲା ରୁଜୁ ହୋଇଥିବା ସ୍ଥାନୀୟ ଥାନାର ଜଣେ ଅଧିକାରୀ କହିଛନ୍ତି ।

ଲୋକାଲ ୱାୟାର

ଭବାନୀପାଟଣା, ନଭେମ୍ବର ୩୦(ଲୋକାଲ ୱାୟାର): କଳହାଣ୍ଡି ଜିଲ୍ଲା କୋକସରା ବ୍ଲକ ଅଞ୍ଚଳରେ ଶନିବାର ମଧ୍ୟାହ୍ନରେ ପାଳଗଦାରେ ଖେଳୁଥିବା ବେଳେ ଅଗ୍ନିକାଣ୍ଡ ଘଟି ଗୁରୁତର ହୋଇଥିବା ୩ ଭଉଣୀଙ୍କର ସନ୍ଧ୍ୟା ବେଳେ ଡାକ୍ତରଖାନାରେ ମୃତ୍ୟୁ ହୋଇ ଯାଇଥିବା ସ୍ଥାନୀୟ ପୁଲିସ କହିଛି ।

କୋକସରା ବ୍ଲକ ମହିମା ପଞ୍ଚାୟତ ବିଜମରା ଗାଁର ହେମରାଜ ଦିଶାରୀଙ୍କ ଖଳାରେ ପାଳଗଦା ପାଖରେ ପୁଆଁଇବା ପାଇଁ ନିଆଁ ଜଳାଯାଇଥିଲା ।

ଅଚାନକ ପାଳଗଦାରେ ନିଆଁ ଲାଗି ଯାଇଥିଲା ଏବଂ ସେଠାରେ ଖେଳୁଥିବା ତିନି ଭଉଣୀ ରୋଜି (୪), ଡେଜି (୪) ଏବଂ ରଚନା ରାଉତ(୪) ଗୁରୁତର ଆହତ ହୋଇଥିଲେ ।

ଉଲ୍ଲେଖଯୋଗ୍ୟ, ରୋଜି ଓ ଡେଜି ହେମରାଜଙ୍କ ଜାଆଁଳା ଝିଅ ଏବଂ ରଚନା ସେମାନଙ୍କ ପିଉସୀ ଝିଅ ।

ସମସ୍ତଙ୍କୁ ଗ୍ରାମର ଲୋକେ କୋକସରା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ପରେ ସେମାନଙ୍କୁ ଭବାନୀପାଟଣା ଡାକ୍ତରଖାନା ପଠା ଯାଇଥିଲା । କିନ୍ତୁ ସେଠାରେ ସେମାନଙ୍କର ମୃତ୍ୟୁ ହୋଇ ଯାଇଥିବା କହିଛନ୍ତି ସ୍ଥାନୀୟ ଥାନାଧିକାରୀ ପୁଷ୍ପାଞ୍ଜଳି ନିଙ୍ଗି ।

ଲୋକାଲ ୱାୟାର

କେନ୍ଦୁଝର, ନଭେମ୍ବର ୩୦ (ଲୋକାଲ ୱାୟାର): ତେଲକୋଇ ବନାଞ୍ଚଳ ଟାଙ୍ଗିରି ଗାଁରେ ଶନିବାର ସକାଳେ ଏକ ଦନ୍ତା ହାତୀ ଆକ୍ରମଣରେ ଜଣେ ବୃଦ୍ଧାଙ୍କର ମୃତ୍ୟୁ ଘଟିଛି ।

ଗାଁରେ ଥିବା କାଜୁ ବଗିଚାରେ ସୁଆଗି ଜୁଆଙ୍ଗ ନାମକ ଏହି ବୃଦ୍ଧା ଏକ ଦନ୍ତା ହାବୁଡ଼ରେ ପଡିଯାଇଥିଲେ।

ହାତୀଟି ତାଙ୍କୁ ଶୁଣ୍ଢରେ ଉଠାଇ ଫୋପାଡି ଦେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି।

ସୁଆଗିଙ୍କ ସହିତ ବଗିଚାକୁ ଯାଇଥିବା ଅନ୍ୟ ଜଣେ ମହିଳା ଫୁଲମଣୀ ଜୁଆଙ୍ଗ ଅଳ୍ପକେ ବର୍ତ୍ତି ଯାଇଛନ୍ତି ।

ଘଟଣାସ୍ଥଳରେ ବନ କର୍ମଚାରୀ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।

କିଛି ଦିନ ହେଲା ଟାଙ୍ଗିରି ଗାଁ ପାଖ ଜଙ୍ଗଲରେ ଏକ ହାତୀପଲ ରହି ବ୍ୟାପକ ଫସଲ ନଷ୍ଟ କରୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।

ଲୋକାଲ ୱାୟାର

କଟକ, ନଭେମ୍ବର ୩୦ (ଲୋକାଲ ୱାୟାର): ମଙ୍ଗଳବାଗ ଛକରେ ଥିବା ଏକ ସର୍ଜିକାଲ ପ୍ଲାଷ୍ଟିକ ଗୋଦାମରେ ଅଗ୍ନିକାଣ୍ଡ ଘଟିଥିବାବେଳେ ଘଟଣାସ୍ଥଳରେ ୩ଟି ଦମକଳ ଗାଡି ପହଞ୍ଚି ନିଆଁକୁ ଆୟତ୍ତ କରିଥିବା ସୂଚନା ମିଳିଛି।

ମଙ୍ଗଳବାଗ ଆନ୍ଧ୍ର ବ୍ୟାଙ୍କ କୋଠାରେ ଥିବା ପ୍ଲାଷ୍ଟିକ ଗୋଦାମରୁ ନିଆଁ ଲାଗିଯାଇଥିବା ସଂପର୍କରେ ସ୍ଥାନୀୟ ଲୋକଙ୍କଠାରୁ ଖବର ପାଇ ଅଗ୍ନିଶମ ଗାଡି ପହଞ୍ଚିଥିଲା।

ନିଆଁକୁ ଆୟତ୍ତ କରାଯାଇଥିଲେ ମଧ୍ୟ ଧୂଆଁ ବ୍ୟାପିଥିବାରୁ ଫ୍ୟାନ ଓ ବିଭିନ୍ନ ସରଞ୍ଜାମର ସହଯୋଗରେ ତାକୁ ରୋକାଯାଉଛି ।

ତେବେ ନିଆଁ କେଉଁ କାରଣରୁ ଲାଗିଥିଲା, ତାହା ଜଣାପଡିନାହିଁ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୨୯(ଲୋକାଲ ୱାୟାର): ରାଜଧାନୀ ଭୁବନେଶ୍ୱରର ନୟାପଲ୍ଲୀ ଅଞ୍ଚଳର ଆଇଆରସି ଭିଲେଜରେ ଶୁକ୍ରବାର ସକାଳେ ବିଏମସିର ସଫେଇ କର୍ମଚାରୀ ଏକ ମଣିଷ କଙ୍କାଳ ଠାବ କରିବା ପରେ ଏହାର ତଦନ୍ତ ଆରମ୍ଭ ହୋଇଥିବା ସ୍ଥାନୀୟ ପୁଲିସ ସୂଚନା ଦେଇଛି ।

ସବୁ ଦିନ ଭଳି ସଫେଇ କର୍ମଚାରୀମାନେ ଶୁକ୍ରବାର ସକାଳେ ସଂପୃକ୍ତ ଅଞ୍ଚଳରେ ସଫେଇ କାମ କରୁଥିବା ବେଳେ ଅଚାନକ ସେମାନେ ଏକ ମଣିଷ କଙ୍କାଳ ପାଇଥିଲେ ।

ଏଥିରେ ମଣିଷର ଖପୁରି ଓ କେତେକ ହାଡ଼ ରହିଥିଲା । ଏ ସମ୍ପର୍କରେ ସେମାନେ ନୟାପଲ୍ଲୀ ଥାନାକୁ ଖବର ଦେଇଥିଲେ ।

ଫୋରେନନସିକ ଟିମ୍ ସହ ପୁଲିସ ସେଠାରେ ପହଞ୍ଚି ତଦନ୍ତ କରୁଛି । ଏଭଳି ଏକ ଜନଗହଳି ଅଞ୍ଚଳକୁ କିପରି ମଣିଷ କଙ୍କାଳ ଆସିଲା ତାହା ସମସ୍ତଙ୍କୁ ଆଚମ୍ବିତ କରିଛି ।

ପୁଲିସ ଫୋରେନସିକ ଟେଷ୍ଟ ପାଇଁ ହାଡ଼ ଗୁଡ଼ିକୁ ପଠାଇବା ପରେ ସଂପୃକ୍ତ ଅଞ୍ଚଳରେ ଲାଗିଥିବା ବିଭିନ୍ନ ସିସିଟିଭିର ଫୁଟେଜ ଯାଞ୍ଚ କରୁଥିବା ଜଣେ ଅଧିକାରୀ କହିଛନ୍ତି ।

ଲୋକାଲ ୱାୟାର

ଭଦ୍ରକ, ନଭେମ୍ବର ୨୯(ଲୋକାଲ ୱାୟାର): ଭଦ୍ରକ ଜିଲ୍ଲାର ବନ୍ତ ବଜାରରେ ଗୁରୁବାର ଦୁଇ ଜଣ ସ୍କୁଲ ଛାତ୍ରୀ ସାଇକେଲରେ ଯାଉଥିବା ବେଳେ ଜଣେ ଯୁବକ ସେମାନଙ୍କ ଉପରକୁ ଏସିଡ଼ ଫିଙ୍ଗିବାରୁ ସେମାନଙ୍କୁ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିବା ବେଳେ ଅଭିଯୁକ୍ତ ଯୁବକକୁ ଗିରଫ କରାଯାଇଥିବା ପୁଲିସ କହିଛି ।

ବନ୍ତ ବାଳିକା ଉଚ୍ଚ ବିଦ୍ୟାଳୟରେ ପଢୁଥିବା ୨ ଜଣ ନବମ ଶ୍ରେଣୀ ଛାତ୍ରୀ ଦୁଇଟି ସାଇକେଲରେ ସ୍କୁଲକୁ ଯାଉଥିବା ବେଳେ ସ୍ଥାନୀୟ ଥାନା ଛକ ଠାରୁ କିଛି ଦୂରରେ କର୍ଟାପଡ଼ା ଗ୍ରାମର ନନ୍ଦକିଶୋର ଦାସ ନାମକ ଯୁବକ ଏକ ବାଇକରେ ଆସି ଅଚାନକ ପଛ ପାଶ୍ୱର୍ରୁ ସେମାନଙ୍କ ଉପରକୁ ଏସିଡ ମାଡ଼ କରିଥିଲା ।

ଛାତ୍ରୀ ଦୁହେଁ ଚିକ୍ରାର କରି ତଳେ ପଡ଼ି ଯାଇଥିଲେ । ସ୍ଥାନୀୟ ଲୋକେ ସେମାନଙ୍କୁ ଡାକ୍ତରଖାନାକୁ ନେଇଥିବା ବେଳେ ପୁଲିସ ବଜାରେ ତଲାସୀ କରି ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଥିଲା ।

ଛାତ୍ରୀମାନଙ୍କ ଅଭିଭାବକ କହିଛନ୍ତି ଯେ କିଛି ଦିନ ତଳେ ସଂପୃକ୍ତ ଯୁବକ ଜଣେ ଛାତ୍ରୀଙ୍କୁ ବ୍ଲେଡରେ ଆକ୍ରମଣ କରିଥିଲା, ଯାହାର କି ପରେ ମୀମାଂସା ହୋଇଥିଲା ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୨୮(ଲୋକାଲ ୱାୟାର): ନିକଟରେ ଭୁବନେଶ୍ୱର ଉପକଣ୍ଠ ନନ୍ଦନକାନନ ପ୍ରାଣୀ ଉଦ୍ୟାନକୁ ୮ଟି ଆନାକୋଣ୍ଡା ଅଣାଯାଇଥିବା ବେଳେ ଗୁରୁବାର ଏଥିରୁ ଗୋଟିଏର ମୃତ୍ୟୁ ହୋଇଯାଇଥିବା କର୍ତ୍ତୃପକ୍ଷ ସୂଚନା ଦେଇଛନ୍ତି ।

୨ ଫୁଟ ୫ ଇଞ୍ଚ ଲମ୍ବର ଏହି ଅନାକୋଣ୍ଡାଟି କିଛି ଦିନ ଧରି ଅସୁସ୍ଥ ଥିଲା ।

ଏକ ସ୍ୱତନ୍ତ୍ର ଡାକ୍ତରୀ ଟିମ୍ ତାର ଚିକିତ୍ସା କରିଥିଲେ ମଧ୍ୟ ବଞ୍ଚାଇବାରେ ବିଫଳ ହୋଇଥିଲେ ।

ସୂଚନାଯୋଗ୍ୟ, ନନ୍ଦନକାନନର ଏକ ସ୍ୱତନ୍ତ୍ର ଟିମ୍ ମାଡ୍ରାସ ଯାଇ ଏମସିବିଟି (କ୍ରୋକୋଡାଏଲ୍ ବ୍ୟାଙ୍କ ଟ୍ରଷ୍ଟ)ରୁ ୮ଟି ଆନାକୋଣ୍ଡା ଗତ ଅକ୍ଟୋବର ୨୨ ତାରିଖରେ ଆଣିଥିଲେ ।

ପ୍ରାଣୀ ଉଦ୍ୟାନରେ ପହଞ୍ଚିବା ପରେ ସେମାନଙ୍କୁ ସ୍ୱତନ୍ତ୍ର ଖୁଆଡ଼ରେ ରଖାଯାଇଥିଲା ଏବଂ ପର୍ଯ୍ୟଟକମାନେ ସେମାନଙ୍କୁ ଦେଖିବାକୁ ନିତିଦିନ ଭିଡ଼ ଜମାଉଥିଲେ ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୨୭(ଲୋକାଲ ୱାୟାର): ନୟାଗଡ଼ ଓ ମୟୁରଭଞ୍ଜ ଜିଲ୍ଲାରେ ଭିନ୍ନ ଭିନ୍ନ ସ୍ଥାନରେ ବୁଧବାର ହାତୀ ଆକ୍ରମଣରେ ଦୁଇ ଜଣ ବୃଦ୍ଧା ପ୍ରାଣ ହରାଇଥିବା ବନ ବିଭାଗର ଅଧିକାରୀ ସୂଚନା ଦେଇଛନ୍ତି ।

ଖୋର୍ଦ୍ଧା ଜିଲ୍ଲା ଟାଙ୍ଗି ଥାନା ଅନ୍ତର୍ଗତ ଭଜାଗଡ଼ ଗ୍ରାମର ମୋତି ବେୱା (୭୦) ଜଙ୍କିଆ ଗ୍ରାମକୁ ଝିଅ ଘରକୁ ଯାଉଥିବା ବେଳେ କାଜୁ ଜଙ୍ଗଲରେ ହାତୀ ପଲଙ୍କ ହାବୁଡ଼ରେ ପଡ଼ିଥିଲେ ।

ହାତୀମାନେ ତାଙ୍କୁ ଘୋଷାଡ଼ି ଘୋଷାଡ଼ି ମାରି ଦେଇଥିଲେ । ପରେ ଗ୍ରାମ ଲୋକେ ମୃତ ଦେହ ଉଦ୍ଧାର କରିବା ସହ ବନ ବିଭାଗକୁ ଖବର ଦେଇଥିଲେ ।

ରେଡକ୍ରସ ପକ୍ଷରୁ ମୃତକଙ୍କ ପରିବାରକୁ ସ୍ଥାନୀୟ ତହସିଲଦାର ସୁଶାନ୍ତ କୁମାର ପତି ୧୦ ହଜାର ଟଙ୍କା ପ୍ରଦାନ କରିଛନ୍ତି ।

ପରେ ପରିବାରକୁ ୪ ଲକ୍ଷ ଟଙ୍କାର ସହାୟତା ମିଳିବ ବୋଲି କହିଛନ୍ତି ରେଞ୍ଜର ଶରତ ଚନ୍ଦ୍ର ଶତପଥି ।

ଦୀର୍ଘ ଦୁଇ ମାସ ହେଲା ୫୦ରୁ ଅଧିକ ହାତୀ ନୟାଗଡ଼ ଓ ଖୋର୍ଦ୍ଧା ଜିଲ୍ଲା ସୀମାରେ ଫସଲ ନଷ୍ଟ କରୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।

ଗତ ସପ୍ତାହରେ ଖୋର୍ଦ୍ଧା ଜିଲ୍ଲା ବୋଡଙ୍ଗ ଗ୍ରାମର ଜଣେ ବ୍ୟକ୍ତିଙ୍କୁ ମଧ୍ୟ ହାତୀ ଦଳି ଦେଇଥିଲା ।

ଅପରପକ୍ଷରେ, ମୟୁରଭଞ୍ଜ ଜିଲ୍ଲା ବୈଶିଙ୍ଗା ଥାନା ଅନ୍ତର୍ଗତ କୁସୁମପୁରା ଗ୍ରାମର ସ୍ୱର୍ଗତ ରାମ ମାର୍ଣ୍ଡିଙ୍କ ସ୍ତ୍ରୀ ସୀତା(୫୮) ଘରେ ଶୋଇଥିବା ବେଳେ ଏକ ଦନ୍ତା ଘର ଭାଙ୍ଗିଥିଲା ।

ସୀତା ଘରୁ ବାହାରି ଦୈାଡ଼ି ପଳାଉଥିବା ବେଳେ ଦନ୍ତା ତାଙ୍କୁ ପାଦରେ ଦଳି ଦେଇଥିବା ଗ୍ରାମର ଲୋକେ କହିଛନ୍ତି । ବନ ବିଭାଗ ଅଧିକାରୀ ଘଟଣାର ତଦନ୍ତ କରୁଛନ୍ତି ।

ଲୋକାଲ ୱାୟାର

ଝାରସୁଗୁଡ଼ା, ନଭେମ୍ବର ୨୭(ଲୋକାଲ ୱାୟାର): ଝାରସୁଗୁଡ଼ା ଜିଲ୍ଲାର ଲଇକେରା ଥାନା ଅନ୍ତର୍ଗତ ସାରସମାଳ ଗ୍ରାମର ରୋହିଦାସପଡ଼ା ଗ୍ରାମରେ ଜଣେ ମହିଳା ମଙ୍ଗଳବାର ରାତିରେ ଦୁର୍ବୃତ୍ତଙ୍କ ଗୁଳିମାଡ଼ରେ ପ୍ରାଣ ହରାଇଥିବା ଅଭିଯୋଗ ହୋଇଥିବା ବେଳେ ଏହାର କାରଣ ଅସ୍ପଷ୍ଟ ରହିଥିବା ସ୍ଥାନୀୟ ପୁଲିସ ବୁଧବାର ସୂଚନା ଦେଇଛି ।

ପ୍ରାଣ ହରାଇଥିବା ମହିଳାଙ୍କ ନାମ କନକ ରୋହିଦାସ । ତାଙ୍କ ସ୍ୱାମୀଙ୍କ ନାମ ସାନନ୍ଦ ରୋହିଦାସ ଏବଂ ତାଙ୍କର ଦୁଇଟି ସନ୍ତାନ ମଧ୍ୟ ଅଛନ୍ତି ।

ସ୍ୱାମୀ କହିଛନ୍ତି, ସେମାନେ ବୁଧବାର ସକାଳେ ଘର ବଗିଚାରେ କନକଙ୍କ ଗୁଳିବିଦ୍ଧ ରକ୍ତାକ୍ତ ଶରୀର ପଡ଼ିଥିବା ଦେଖିବାକୁ ପାଇଥିଲେ । ତାଙ୍କୁ ଡାକ୍ତରଖାନା ନିଆଯାଇଥିଲେ ମଧ୍ୟ ସେତେବେଳକୁ ମୃତ୍ୟୁ ହୋଇ ସାରିଥିଲା । ତେବେ ସେମାନେ ରାତିରେ ଗୁଳିମାଡ଼ ନେଇ କୌଣସି ଶବ୍ଦ ଶୁଣି ନଥିବା ସେ କହିଛନ୍ତି ।

ଘଟଣାର ତଦନ୍ତ କରାଯାଉଛି ଏବଂ ଶୀଘ୍ର ଘଟଣାର ସୁରାକ ମିଳିବା ଆଶା କରାଯାଉଛି ବୋଲି କହିଛନ୍ତି ଝାରସୁଗୁଡ଼ା ଏସପି ଅଶ୍ୱିନୀ କୁମାର ମହାନ୍ତି ।

ଲୋକାଲ ୱାୟାର

କଟକ, ନଭେମ୍ବର ୨୭(ଲୋକାଲ ୱାୟାର): କଟକ ଜିଲ୍ଲାର ଜଗତପୁୁର ଥାନାଞ୍ଚଳରେ ମଙ୍ଗଳବାର ରାତିରେ ଜଣେ ଯୁବତୀଙ୍କ ଏସିଡ ମାଡ଼ରେ ଜଣେ ଯୁବକ ଗୁରୁତର ଆହତ ହୋଇ କଟକ ବଡ଼ଡାକ୍ତରଖାନାରେ ଭର୍ତ୍ତି ହୋଇଥିବା ସ୍ଥାନୀୟ ପୁଲିସ ସୂଚନା ଦେଇଛି ।

ଜଗତପୁର ଥାନା ଅନ୍ତର୍ଗତ ଶିକାରିପୁର ଗ୍ରାମର ଅଲେଖ ବେହେରାଙ୍କୁ ସଂପୃକ୍ତ ଯୁବତୀ ଘର ବାହାରକୁ ରାତିରେ ଡାକିଥିଲେ ।

ଅଲେଖ ସେଠାରେ ପହଞ୍ଚିବା ପରେ କୌଣସି କାରଣରୁ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା ।

ଏହି ସମୟରେ ଯୁବତୀ ଜଣକ ଅଲେଖଙ୍କ ଉପରକୁ ଅଚାନକ ଏସିଡ଼ ଫିଙ୍ଗିଥିଲେ । ତାଙ୍କୁ ଗୁରୁତର ଅବସ୍ଥାରେ ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ସ୍ୱାସ୍ଥ୍ୟାବସ୍ଥା ସ୍ଥିର ଥିବା ଡାକ୍ତର କହିଛନ୍ତି ।

ଆହତ ଅଲେଖ ପୁଲିସକୁ କହିଛନ୍ତି, ବହୁ ଦିନ ପୂର୍ବେ ସଂପୃକ୍ତ ଯୁବତୀଙ୍କ ସହ ତାଙ୍କର ସମ୍ପର୍କ ଥିଲା । ଏହାକୁ ନେଇ ଯୁବତୀ ଜଣଙ୍କ ତାଙ୍କୁ ବ୍ଲାକମେଲ୍ କରୁଛନ୍ତି ।

ପୁଲିସ ଯୁବତୀଙ୍କ ଅଟକ ରଖିଥିଲେ ମଧ୍ୟ ସେ ବୟାନରେ କ’ଣ କହିଛନ୍ତି ତାହା ଜଣାପଡ଼ିନାହିଁ ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୨୭(ଲୋକାଲ ୱାୟାର): ଓଲିଉଡରେ ହାସ୍ୟ ଅଭିନେତା ଭାବେ ବେଶ ପରିଚୟ ବହନ କରି ଆସିଥିବା କଳାକାର ସୁମନ ମହାରଣା ଦୁର୍ଘଟଣାରେ ଆହତ ହୋଇଥିବା ପରିବାର ପକ୍ଷରୁ ମଙ୍ଗଳବାର କୁହାଯାଇଛି ।

ପୂରା ଇଣ୍ଡଷ୍ଟ୍ରିରେ ସୁମନ ନାମରେ ସେ ବେଶ୍ ଜଣାଶୁଣା ଓ ଚର୍ଚ୍ଚିତ । ଦୁଇ ଦିନ ତଳେ ଦୁର୍ଘଟଣା ଘଟିଥିଲାବେଳେ ସେ ଏମ୍ସରେ ଚିକିତ୍ସିତ ହୋଇ ଘରେ ରହିଛନ୍ତି । ତାଙ୍କ ମୁଣ୍ଡରେ ୫-୬ ଟି ଷ୍ଟିଚ୍ ପଡ଼ିବା ସହିତ ଛାତି, ହାତ ଓ ଡାହାଣ ଗୋଡ଼ରେ ଜୋର ଆଘାତ ଲାଗିଛି ।

ଶରୀରର ଅନେକ ସ୍ଥାନ ଖଣ୍ଡିଆ ଖାବରା ହୋଇଯାଇଛି । ଏ ସମ୍ପର୍କରେ ସୁମନ କହିଛନ୍ତି, ସେ ବନ୍ଧୁମାନଙ୍କ ସହିତ ସ୍କୁଟିରେ ସରକନ୍ତରା ଯାଉଥିଲେ ।

ଯେହେତୁ ତାଙ୍କ ଉଚ୍ଚତା ଛୋଟ ତେଣୁ ସେ ସ୍କୁଟି ଆଗରେ ଠିଆ ହୋଇଥିଲେ । ଅନ୍ୟ ଜଣେ ଚଲାଉଥିଲେ ।

ଆଗରୁ ଗାଡ଼ି ଆସିଯିବାରୁ ବ୍ରେକ୍ ମାରିବା ବେଳେ ଚକା ସ୍ଲିପ୍ କରିଯାଇଥିଲା ଏବଂ ମୁହଁ ମାଡ଼ି ତଳେ ପଡ଼ି ଯାଇଥିଲି ।

ଯାହାଫଳରେ ମୁଣ୍ଡ ଫାଟିବା ସହ ଅନେକ ସ୍ଥାନରେ ଶକ୍ତ ଆଘାତ ଲାଗିଥିଲା ବୋଲି ସୁମନ ନିଜେ କହିଛନ୍ତି । ଏହି ଖବର ଶୁଣି ସୁମନପ୍ରେମୀ ତାଙ୍କର ଆଶୁ ଆରୋଗ୍ୟ କାମନା କରିଛନ୍ତି ।

ଲୋକାଲ ୱାୟାର

ଭୁବନେଶ୍ବର, ନଭେମ୍ବର ୨୬ (ଲୋକାଲ ୱାୟାର): ଦୁର୍ଘଟଣାରେ ଆହତ ଛତିଶଗଡ ମୁଙ୍ଗେଲ ଜିଲ୍ଲାରେ ରହୁଥିବା ଓଡିଆ ଯୁବକଙ୍କ ଚିକିତ୍ସା ଲାଗି ସ୍ଵେଚ୍ଛାସେବୀ ସଂଗଠନ ୟୁଥ୍ ଏଗେନଷ୍ଟ କରପସନ୍ ଆର୍ଥିକ ସହାୟତା ନିବେଦନ କରିଛି ।

ଯୁବକଜଣକ ବରଗଡ ଜିଲ୍ଲା ଭଣ୍ଡାରପୁରୀର ସାମୁଏଲ ସୁନା ବୋଲି ଜଣାପଡିଛି ।

ସେ ଛତିଶଗଡ ଜିଲ୍ଲା ଲୋର୍ମିସ୍ଥିତ ନିଉ ଜେନେରେସନ୍ ପବ୍ଲିକ ସ୍କୁଲରେ ଶିକ୍ଷକତା କରନ୍ତି।

ରାସ୍ତାରେ ଯାଉଥିବା ସମୟରେ ଦୁର୍ଘଟଣା ଘଟି ତାଙ୍କୁ ଗୁରୁତର ଅବସ୍ଥାରେ ରାୟଗଡସ୍ଥିତ ଆରୋଗ୍ୟ ମେଡିକାଲରେ ଭର୍ତ୍ତି କରାଯାଇଛି ।

ତାଙ୍କ ଚିକିତ୍ସା ପାଇଁ ସ୍ଵେଚ୍ଛାସେବୀ ସଂଗଠନ ପକ୍ଷରୁ ଉଭୟ ଛତିଶଗଡ ଓ ଓଡିଶା ମୁଖ୍ୟମନ୍ତ୍ରୀଙ୍କୁ ନିବେଦନ କରାଯାଇଛି ।

ଲୋକାଲ ୱାୟାର

ରାଉରକେଲା, ନଭେମ୍ବର ୨୩ (ଲୋକାଲ ୱାୟାର): ସୁନ୍ଦରଗଡ଼ ଜିଲ୍ଲା କୁତ୍ରା ବ୍ଲକ ଅନ୍ତର୍ଗତ ଲକ୍ଷ୍ମୀପୋଷ ଲେଫ୍ରିପଡ଼ା ଥାନାଞ୍ଚଳରେ ରବିବାର ଅପରାହ୍ଣରେ ଏକ ବସ୍ ସହ ଆକ୍ଟିଭାର ଧକ୍କା ହେବାରୁ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ଆହତ ହୋଇଥିବା ସ୍ଥାନୀୟ ପୁଲିସ କହିଛି ।

ଅପରାହ୍ଣରେ ଦଲକି ପଟୁ କୁତ୍ରାକୁ ପବନପୁତ୍ର ନାମକ ଯାତ୍ରୀବାହୀ ବସ୍ ଯାଉଥିବା ସମୟରେ ଲକ୍ଷ୍ମୀପୋଷ ବସଷ୍ଟାଣ୍ଡ ନିକଟରେ ଏକ ଆକ୍ଟିଭାକୁ ମୁହାଁମୁହିଁ ଧକ୍କା ଦେଇଥିଲା ।

ଦୁର୍ଘଟଣାରେ ଆକ୍ଟିଭାରେ ଥିବା ଦଲକି ଗ୍ରାମର ହେମନ୍ତ ବୁଡା ଓ ସନ୍ଦିପ ପ୍ରଧାନଙ୍କର ଦୁର୍ଘଟଣାସ୍ଥଳରେ ମୃତ୍ୟୁ ଘଟିଥିଲା ।

ଗୁରୁତର ଆହତ କ୍ରିଷ୍ଣା ପ୍ରଧାନ ଓ ଦେବେନ୍ଦ୍ର ରାଉତଙ୍କୁ ଡାକ୍ତରଖାନା ନିଆଯାଇଥିଲା । ରାଜଗାଙ୍ଗପୁର ଡାକ୍ତରଖାନାରେ କ୍ରିଷ୍ଣାଙ୍କର ମୃତ୍ୟୁ ହୋଇଥିବା ବେଳେ ବୀରମିତ୍ରପୁର ଡାକ୍ତରଖାନାରେ ଦେବେନ୍ଦ୍ର ଚିକିତ୍ସାଧୀନ ଅଛନ୍ତି ।

ଦୁର୍ଘଟଣା ପରେ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିବା ବେଳେ ସ୍ଥାନୀୟ ପୁଲିସ ପହଞ୍ଚି ପରିସ୍ଥିତି ନିୟନ୍ତ୍ରଣ କରିଥିଲା ।

ଲୋକାଲ ୱାୟାର

ପୁରୀ, ନଭେମ୍ବର ୨୪(ଲୋକାଲ ୱାୟାର): ପୁରୀ ଜିଲ୍ଲାର ଚନ୍ଦ୍ରଭାଗା ବେଳାଭୂମି ସମୁଦ୍ରରେ ରବିବାର ଜଣେ ଯୁବକ ବୁଡ଼ି ଯାଇ ପ୍ରାଣ ହରାଇଥିବା ସ୍ଥାନୀୟ ପୁଲିସ କହିଛି ।

ପ୍ରାଣ ହରାଇଥିବା ଯୁବକ କଟକ ଜିଲ୍ଲା ନିଆଳି ନିକଟ କୋରକୋର ଗ୍ରାମର ସୌରଜିତ ରାଉତ(୧୮) ।

ସୌରଜିତ ସାଙ୍ଗମାନଙ୍କ କୋଣାର୍କ ବୁଲିବାକୁ ଆସି ଅପରାହ୍ନରେ ସମୁଦ୍ରରେ ସ୍ନାନ କରୁଥିଲେ ।

ଏହି ସମୟରେ ସେ ଗଭୀର ସମୁଦ୍ରକୁ ଜୁଆରରେ ଭାସି ଯାଇଥିଲେ । ଏହା ଦେଖି ସାଙ୍ଗମାନେ ଡାକ ପକାଇଥିଲେ ।

ସ୍ଥାନୀୟ ବ୍ୟବସାୟୀ ମାନେ ସମୁଦ୍ରରୁ ସୌରଜିତଙ୍କୁ ଉଦ୍ଧାର କରି ନିକଟସ୍ଥ ଡାକ୍ତରଖାନାକୁ ନେଇଥିଲେ ମଧ୍ୟ ତାଙ୍କର ମୃତ୍ୟୁ ହୋଇ ଯାଇଥିଲା ବୋଲି କହିଛନ୍ତି ସ୍ଥାନୀୟ ଥାନାର ଆଇଆଇସି ନିଳିମା ପଟ୍ଟନାୟକ ।

ଚନ୍ଦ୍ରଭାଗା ବେଳାଭୂମିରେ ଲାଇଫଗାର୍ଡ ମୁତୟନ ନ ଥିବାରୁ ଏଠାରେ ଅନେକ ସମୟରେ ଏଭଳି ଅଘଟଣ ହେଉଥିବା ସ୍ଥାନୀୟ ବ୍ୟବସାୟୀମାନେ ଅଭିଯୋଗ କରିଛନ୍ତି । ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ସେମାନେ ଦାବି କରିଛନ୍ତି ।

ଲୋକାଲ ୱାୟାର

ଯାଜପୁର, ନଭେମ୍ବର ୨୨(ଲୋକାଲ ୱାୟାର): ଯାଜପୁର ଜିଲ୍ଲାର ଯାଜପୁର-କେନ୍ଦୁଝର ରୋଡ ଷ୍ଟେସନ ନିକଟରେ ଶନିବାର ପୂର୍ବାହ୍ନରେ ଏକ ଟ୍ରେନ ଚକା ତଳେ ମା’ ଓ ଝିଅଙ୍କ ମୃତ୍ୟୁ ହୋଇଥିବା ବେଳେ ସେମାନେ ଆତ୍ମହତ୍ୟା କରିଥିବା ସନ୍ଦେହ କରାଯାଇଛି ।

ପ୍ରାଣ ହରାଇଥିବା ମହିଳା କାଠି ରଣା (୬୦) ଓ ତାଙ୍କ ଝିଅ ଗୁରୁବାରୀ ରଣା (୩୪)ଙ୍କ ଘର କୋରେଇ ଥାନା ଅନ୍ତର୍ଗତ ଚନ୍ଦମା ଗ୍ରାମରେ ।

ସ୍ଥାନୀୟ ଲୋକଙ୍କ ଠାରୁ ଖବର ପାଇ ରେଳବାଇ ପୁଲିସ ମୃତ ଦେହ ଦୁଇଟିକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ।

ଅଭାବରେ ଥିବାରୁ ମା’-ଝିଅ ଆତ୍ମହତ୍ୟା କରିଥିବା ସ୍ଥାନୀୟ ଲୋକେ କହୁଥିବା ବେଳେ ଏହାର ତଦନ୍ତ ଚାଲିଥିବା କହିଛନ୍ତି ସ୍ଥାନୀୟ ପୁଲିସ ଅଫିସର ।

ଲୋକାଲ ୱାୟାର

କୋରାପୁଟ, ନଭେମ୍ବର ୨୩ (ଲୋକାଲ ୱାୟାର): ଜୟପୁର ସହରର ବାରିଣୀପୁଟ ଅଞ୍ଚଳରେ ଦୁଇତାଲା କୋଠା ଭୁଶୁଡ଼ିବା ଘଟଣାରେ ଜଣେ ନାବାଳକ ପ୍ରାଣ ହରାଇଥିବାବେଳେ ପରିବାରର ଅନ୍ୟ ତିନି ଜଣ ସଦସ୍ୟଙ୍କୁ ଉଦ୍ଧାର କରାଯାଇଛି।

ଗତକାଲି ରାତି ପ୍ରାୟ ନଅଟା ସମୟରେ ଏହି କୋଠା ଭୁଶୁଡ଼ିବା ଫଳରେ ପରିବାରଲୋକେ ତାରି ଭିତରେ ଫଶି ରହିଥିଲେ।

ପ୍ରାୟ ଚାରି ଘଣ୍ଟାର ଅପରେସନ୍ ପରେ ଓଡ୍ରାଫ୍ ଟିମ୍, ଅଗ୍ନିଶମ ବାହିନୀ ଓ ସ୍ଥାନୀୟ ପୁଲିସ ପରିବାରର ତିନି ଜଣଙ୍କୁ ଧ୍ବଂସାବଶେଷ ତଳୁ ଉଦ୍ଧାର କରିପାରିଥିଲେ।

ତେବେ ଅନେକ ପ୍ରୟାସ ପରେ ମଧ୍ୟ ଦଶ ବର୍ଷର ବାଳକ ରାସେଲ୍ ଖେଲ୍ରାଙ୍କୁ ସୁରକ୍ଷିତ ଉଦ୍ଧାର କରାଯାଇପାରିନଥିବା କୋରାପୁଟ ଅତିରିକ୍ତ ଜିଲ୍ଲାପାଳ ଦେବେନ କୁମାର ପ୍ରଧାନ ସୂଚନା ଦେଇଛନ୍ତି।

ଉଦ୍ଧାର ହୋଇଥିବା ତିନିଜଣଙ୍କୁ ସ୍ଥାନୀୟ ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ସେମାନେ ବିପଦମୁକ୍ତ ଥିବା ଡାକ୍ତର କହିଛନ୍ତି।

କୋଠାଟି ଅସୁରକ୍ଷିତ ଅବସ୍ଥାରେ ଥିଲା ଓ ଏହି ଘଟଣା ପରେ ସହରରେ ଥିବା ଏଭଳି କୋଠା ଠାବ କରିବାକୁ ପ୍ରଶାସନ ନିଷ୍ପତ୍ତି ନେଇଥିବା ସୂଚନା ମିଳିଛି।

ଲୋକାଲ ୱାୟାର

ବାଲେଶ୍ୱର, ନଭେମ୍ବର ୨୨(ଲୋକାଲ ୱାୟାର): ହାଓଡ଼ାରୁ ଯଶୋବନ୍ତପୁର ଯାଉଥିବା ଦୂରନ୍ତ ଏକ୍ସପ୍ରେସ୍ (୧୨୨୩୪) ଶୁକ୍ରବାର ବାଲେଶ୍ୱର ଜିଲ୍ଲାର ରୂପସା ଷ୍ଟେସନରେ ଏକ ଦୁର୍ଘଟଣାରୁ ଅଳ୍ପକେ ବର୍ତ୍ତିଥିବା ବେଳେ ଟ୍ରେନଟି ୪ ଘଣ୍ଟା ଅଟକି ରହିଥିବା ରେଳପଥର ଜଣେ ଅଧିକାରୀ ସୂଚନା ଦେଇଛନ୍ତି ।

ଦୂରନ୍ତ ଏକ୍ସପ୍ରେସ୍ ଶୁକ୍ରବାର ଦିନ ୨ଟାରେ ବସ୍ତା ଷ୍ଟେସନ ଅତିକ୍ରମ କରିଥିଲା । କିନ୍ତୁ ରୁପସା ଷ୍ଟେସନରେ ପହଞ୍ଚିବା ପୂର୍ବରୁ ଟ୍ରେନଟି ଦୁର୍ଘଟଣାର ସମ୍ମୁଖୀନ ହୋଇଥିଲା ।

ଉକ୍ତ ସ୍ଥାନରେ ଇଞ୍ଜିନିୟରିଂ ବିଭାଗ ଦ୍ୱାରା ସିଲପଟ୍ ଗୋଟିଏ ପ୍ଲାଟଫର୍ମରୁ ଅନ୍ୟ ଏକ ପ୍ଲାଟଫର୍ମକୁ ସ୍ଥାନାନ୍ତର କରାଯାଉଥିଲା ।

କିନ୍ତୁ ଟ୍ରେନଟି ଚାଲି ଆସିବାରୁ କର୍ମଚାରୀମାନେ ଟ୍ରକ ଉପରେ ସିଲପଟ ପକାଇ ଦେଇ ଦୌଡ଼ି ପଳାଇଥିଲେ ।

ଟ୍ରେନର ଇଞ୍ଜିନ ସିଲପଟ ସହ ଧକ୍କା ଖାଇବାରୁ ଇଞ୍ଜିନ ଓ ବଗିର ହୋସ ପାଇପ୍, ଟାଙ୍କି ଇତ୍ୟାଦି କ୍ଷତିଗ୍ରସ୍ତ ହୋଇଥିଲା ।

ଏହା ପରେ ଇଞ୍ଜିନିୟରମାନେ ହୋସ ପାଇପ ଓ ଟାଙ୍କି ମରାମତି କରିଥିଲେ ଏବଂ ପ୍ରାୟ ୩ ଘଣ୍ଟା ୪୫ ମିନିଟ ବିଳମ୍ବରେ ଟ୍ରେନଟି ପୁଣି ଗନ୍ତବ୍ୟ ପଥରେ ଯାତ୍ରା କରିଥିଲା ।

ଲୋକାଲ ୱାୟାର

କଟକ,ନଭେମ୍ବର ୨୨ (ଲୋକାଲ ୱାୟାର): ଚଳିତ ବର୍ଷର ସେପ୍ଟେମ୍ବର ଓ ଅକ୍ଟୋବର ମାସରେ ସୁନ୍ଦରଗଡ ଜିଲ୍ଲାରେ ସର୍ବାଧିକ ୪୩ ଜଣ ରାସ୍ତା ଦୁର୍ଘଟଣାରେ ପ୍ରାଣ ହରାଇଥିବା ଜଣେ ସରକାରୀ ଅଧିକାରୀ ଗୁରୁବାର ଦିନ ସୂଚନା ଦେଇଛନ୍ତି ।

ଦୁର୍ଘଟଣାରେ ଖଣି ଖାଦନ ଓ ଶିଳ୍ପାଞ୍ଚଳର ଲୋକ ଅଳ୍ପ ପରିଶ୍ରମରେ ଅଧୀକ ରୋଜଗାର କରୁଥିବାରୁ ଏହି ଅର୍ଥରେ ମଦ୍ୟପାନ ଓ ଅନ୍ୟାନ୍ୟ ନିଶା ଦ୍ରବ୍ୟ କବଳରେ ପଡି ଗାଡି ଚାଳନା କରୁଥିବାରୁ ମୃତ୍ୟୁ ହାର ବୃଦ୍ଧି ପାଇଥିବା ଏକ ଆକଳନରୁ ସ୍ପଷ୍ଟ ହୋଇଛି ।

ରାସ୍ତା ଦୁର୍ଘଟଣା ଜନିତ ମଅତ୍ୟୁ ସଂଖ୍ୟାରେ ସୁନ୍ଦରଗଡ ପଛକୁ ରହିଛି କେନ୍ଦୁଝର ଏହି ଜିଲ୍ଲାରେ ୪୨ ଜଣ ମୃତ୍ୟୁ ମୁଖରେ ପଡିଥବବା ବେଳେ ମୟୁରଭଞ୍ଜରେ ୩୮ଜଣ ପ୍ରାଣ ହରାଇଛନ୍ତି ।

ଏହି ସମୟରେ କଟକରେ ୨୧, ଜଗତସିଂହପୁରରେ ୨୦, ଯାଜପୁରରେ ୨୭, କେନ୍ଦ୍ରାପଡାରେ ୫, ପୁରୀରେ ୧୬, ନୟାଗଡରେ ୧୦, ଖୋର୍ଦ୍ଧାରେ ୧୧, ବାଲେଶ୍ବରରେ ୩୬, ଭଦ୍ରକରେ ୮, ସମ୍ବଲପୁରରେ ୨୫, ବରଗଡରେ ୨୧, ଝାରସୁଗୁଡାରେ ୧୮,ବଲାଙ୍ଗୀରରେ ୨୨, ସୋନପୁରରେ ୧୦, ଦେବଗଡରେ ୧୧,ଢେଙ୍କାନାଳରେ ୨୩, ଅନୁଗୁଳରେ ୩୦, ଗଂଜାମରେ ୨୧, ଗଜପତିରେ ୨, ବ୍ରହ୍ମପୁରରେ ୧୧, କନ୍ଧମାଳରେ ୭, ବୌଦ୍ଧରେ ୭., କୋରାପୁଟରେ ୧୮, ନବରଙ୍ଗପୁରରେ ୧୧, ରାୟଗଡାରେ ୧୨, ମାଲକାନାଗିରିରେ ୬, କଳାହାଣ୍ଡିରେ ୮, ନୂଆପଡାରେ ୯, ରାଉରକେଲାରେ ୨୨, ଭୁବନେଶ୍ବର ସହରାଞ୍ଚରେ ୯ ଓ କଟକ ସହରାଞ୍ଚଳରେ ୧୯ଜଣ ଦୁର୍ଘଟଣାରେ ପ୍ରାଣ ହରାଇଛନ୍ତି ।

ସେପ୍ଟେମ୍ବରରେ ମୋଟ ୩୧୫ଜଣଙ୍କ ଦୁର୍ଘଟଣା ଜନିତ ମୃତ୍ୟୁ ହୋଇଥିଲା ବେଳେ ଅକ୍ଟୋବରରେ ଏହା ୨୮୪କୁ ହ୍ରାସ ପାଇଛି ।

ଲୋକାଲ ୱାୟାର

ରାଉରକେଲା, ନଭେମ୍ବର ୧୮(ଲୋକାଲ ୱାୟାର): ସୁନ୍ଦରଗଡ଼ ଜିଲ୍ଲାର ବୀରମିତ୍ରପୁର ସ୍କ୍ରପ୍ ଗୋଦାମରେ ଗତକାଲି ଲୁଟ କରିଥିବା ପିପୁଲ୍ସ ଲିବରେସନ୍ ଫ୍ରଣ୍ଟ ଅଫ୍ ଇଣ୍ଡିଆ (ପିଏଲଏଫଆଇ)ର ୪ ଜଣ ସଦସ୍ୟଙ୍କୁ ଗିରଫ କରି ୩୦ ହଜାର ଟଙ୍କା, ପିସ୍ତଲ ଏବଂ ୨ଟି ଗୁଳି ଜବତ କରାଯାଇଥିବା ସୋମବାର ସୂଚନା ଦେଇଛନ୍ତି ସୁନ୍ଦରଗଡ଼ ଏସପି ସୌମ୍ୟା ମିଶ୍ର ।

ଗିରଫ ହୋଇଥିବା ୪ ଜଣ ହେଲେ ଲାସେର ଲାଲବାବୁ ମହାନନ୍ଦିଆ (୨୭), ପ୍ରମୋଦ ମିଞ୍ଜ (୨୯), ଜାମବାହାଲର ବୁତୁରୁ ଖଡ଼ିଆ ଓରଫ ଅରୁଣ (୨୭) ଏବଂ ଜଗଦୀଶପୁର ଗ୍ରାମର ରାଜମୋହନ କିଶାନ । ଝୁନମୁର ଗ୍ରାମର ଅର୍ଜୁନ ରାନା (୩୨) ଫେରାର ହୋଇ ଯାଇଛି ।

ଗତକାଲି ପୂର୍ବାହ୍ନ ୧୧ଟାରେ ଅଭିଯୁକ୍ତମାନେ ଦୁଇଟି ବାଇକରେ ସ୍କ୍ରାପ ଗୋଦାମକୁ ଆସି ଲକ୍ଷେ ଟଙ୍କା ମାଗିଥିଲେ ।

ଏତେ ଟଙ୍କା ନଥିବା ଗୋଦାମ ମାଲିକ କହିବାରୁ ସେମାନେ ପିସ୍ତଲ ଦେଖାଇ ଟ୍ର’ରୁ ଟଙ୍କା ଲୁଟ କରି ଫେରାର ହୋଇ ଯାଇଥିଲେ ବୋଲି କହିଛନ୍ତି ଏସପି ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୧୮ (ଲୋକାଲ ୱାୟାର): ଭୁବନେଶ୍ୱର ଅନ୍ତର୍ଜାତୀୟ ବିମାନ ବନ୍ଦର (ବିପିଏଆଇ)ରୁ ୨୦୧୭ରେ ପ୍ରଥମ ସିଧାସଳଖ ଅନ୍ତର୍ଜାତୀୟ ଉଡ଼ାଣ ଆରମ୍ଭ ହେବା ଦିନଠାରୁ ସୁନା ଚୋରା କାରବାର ଚାଲିଛି ।

ନଭେମ୍ବର ୧୪ରେ କଷ୍ଟମ ଅଧିକାରୀମାନେ କୁଆଲାଲମ୍ପୁର ବିମାନ ବନ୍ଦରରୁ ଆସୁଥିବା କୋଝିକୋଡ, କେରଳର ଜଣେ ଯାତ୍ରୀଙ୍କ ଠାରୁ ୫୨ ଲକ୍ଷ ଟଙ୍କାର ସୁନା ଜବତ କରିଥିଲେ ।

ସୁନା ଚୋରାଚାଲାଣକାରୀଙ୍କ ଯିବାଆସିବା ରାସ୍ତା ପାଲଟିଛି ବିପିଏଆଇ । ତେବେ ପରିସ୍ଥିତି ସେତେ ଗୁରୁତର ହୋଇନାହିଁ ।

ମୁମ୍ବାଇ, ଦିଲ୍ଲୀ, କୋଲକାତା, ଚେନ୍ନାଇ, ଚଣ୍ଡିଗଡ଼ ଓ ତିରୁବନନ୍ତପୁରମ ଅନ୍ତର୍ଜାତୀୟ ବିମାନ ବନ୍ଦରରୁ ବିପୁଳ ସୁନା ଚୋରାଚାଲାଣ ହେଉଛି ।

ଅନ୍ୟ ଗୁରୁତ୍ୱପୂର୍ଣ୍ଣ ବିମାନ ବନ୍ଦର ତୁଳନାରେ ଭୁବନେଶ୍ୱର ବିମାନ ବନ୍ଦରରେ ଚୋରାଚାଲାଣ କମ୍ ହେଉଛି ବୋଲି ବିପିଏଆଇର ସହକାରୀ କଷ୍ଟମ୍ସ କମିଶନର ବିସି ସିକଦାର କହିଛନ୍ତି ।

ଏପ୍ରିଲ ୨୦୧୭ରେ ମାଲେସିଆର ରାଜଧାନୀ କୁଆଲାଲମ୍ପୁରକୁ ଏୟାର ଏସିଆ ବିମାନ ପ୍ରଥମ ସିଧାସଳଖ ଅନ୍ତର୍ଜାତୀୟ ବିମାନ ଉଡ଼ାଣ କରିଥିଲା ।

ସେବେଠାରୁ ସୁନା ଚୋରା ଚାଲାଣ ଆରମ୍ଭ ହୋଇଥିବା ନଜରକୁ ଆସିଛି । ଚୋରାଚାଲାଣକାରୀ ନିୟମିତ ବ୍ୟବଧାନରେ ଧରା ପଡୁଛନ୍ତି ।

୨୦୧୮-୧୯ ଆର୍ଥିକ ବର୍ଷରେ ୨.୪୮ କୋଟି ଟଙ୍କାର ୭.୬ କିଲୋଗ୍ରାମ ସୁନା ଜବତ ହୋଇଥିଲା ।

୧୮ ଜଣ ସୁନା ଚୋରାଚାଲାଣକାରୀ ଗତ ଆର୍ଥିକ ବର୍ଷରେ ଗିରଫ ହୋଇଥିଲେ ।

ଚଳିତ ଆର୍ଥିକ ବର୍ଷର ଏପ୍ରିଲ ୧ରୁ ନଭେମ୍ବର ୧୪ ମଧ୍ୟରେ ୮୮ ଲକ୍ଷ ଟଙ୍କା ମୂଲ୍ୟର ୨.୪ କିଲୋଗ୍ରାମ ସୁନା ଜବତ ହୋଇଛି ଓ ୬ ଜଣଙ୍କୁ ଅଟକ ରଖାଯାଇଛି ।

ମୁଖ୍ୟତଃ ମାଲେସିଆ ଓ ଥାଇଲାଣ୍ଡ ଭଳି ଦକ୍ଷିଣ ଏସୀୟ ଦେଶଗୁଡ଼ିକରୁ ସୁନା ଚୋରାଚାଲାଣ ହୋଇଥାଏ ।

ଏପ୍ରିଲ ୧, ୨୦୧୮ରୁ ନଭେମ୍ବର ୨୦୧୯ ମଧ୍ୟରେ ଗିରଫ ୨୪ ଚୋରାଚାଲାଣକାରୀ ଭାରତୀୟ ।

ଦୁବାଇକୁ ସିଧାସଳଖ ବିମାନ ଉଡ଼ାଣ ଆରମ୍ଭ ହେବାକୁ ଯାଉଥିବାରୁ ଆଗାମୀ ଦିନରେ ଅଧିକ ସୁନା ଜବତ ହେବାର ଆଶଙ୍କା ରହିଛି ।

ଓଡ଼ିଶାର ଏକମାତ୍ର ଅନ୍ତର୍ଜାତୀୟ ବିମାନ ବନ୍ଦରରୁ ଚୋରା କାରବାର ରୋକିବା ପାଇଁ ଆମେ ନିଜ ଗୁଇନ୍ଦା ଓ ସୁରକ୍ଷା ନେଟୱର୍କ ମଜବୁତ କରିବାକୁ ଚେଷ୍ଟା କରୁଛୁ ।

ଚୋରାବେପାରୀମାନେ ଧରା ନପଡ଼ିବାକୁ ନୂଆ ନୂଆ କୌଶଳ ଆପଣାଉଛନ୍ତି ।

ଗତବର୍ଷ ଜଣେ ଚୋରାବେପାରୀ ନିଜ ପଗଡ଼ି ଭିତରେ ସୁନା ଚୋରାଚାଲାଣ କରୁଥିବା ବେଳେ ଧରା ପଡ଼ିଥିଲା ।

କିଛି ଦିନ ତଳେ ମହାରାଷ୍ଟ୍ରର ଜଣେ ମହିଳା ଯାତ୍ରୀ ମଳଦ୍ୱାରରେ କ୍ୟାପସୁଲରେ ସୁନା ଲୁଚାଇ ନେଉଥିଲେ ।

ହେଲେ ଦକ୍ଷ କଷ୍ଟମ ଅଧିକାରୀମାନଙ୍କ ନଜରରୁ ସେ ବର୍ତ୍ତି ପାରିନଥିଲେ ।
ଲୋକାଲ ୱାୟାର

କଟକ, ନଭେମ୍ବର ୧୮(ଲୋକାଲ ୱାୟାର): କୋରାପୁଟ ଜିଲ୍ଲାର କୁନ୍ଦୁଲି ନାବାଳିକା ବଳାତ୍କାର ଓ ଆତ୍ମହତ୍ୟା ଘଟଣାର ତଦନ୍ତ ପାଇଁ ଏସଆଇଟି (ସ୍ୱତନ୍ତ୍ର ତଦନ୍ତକାରୀ ଟିମ୍‌) ଗଠନ କରିବାକୁ ଓଡ଼ିଶା ହାଇକୋର୍ଟ ସୋମବାର ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିବା ଜଣେ ବରିଷ୍ଠ ଆଇନଜୀବୀ ସୂଚନା ଦେଇଛନ୍ତି ।

ପୂର୍ବତନ ସାଂସଦ ମହାମେଘବାହାନ ଐର ଖାରବେଳ ସ୍ୱାଇଁ ଓ କୁନ୍ଦୁଲି ପୀଡ଼ିତାଙ୍କ ମା’ ଡମାଇ ଛାଟିଙ୍କ ପକ୍ଷରୁ ଆଗତ ମାମଲା ଦୁଇଟିର ମିଳିତ ଶୁଣାଣି କରି ଓଡ଼ିଶା ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ୍ କେ.ଏସ୍‌. ଜାଭେରୀ ଏବଂ ବିଚାରପତି ଜଷ୍ଟିସ୍ କେ.ଆର. ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି ।

ଆସନ୍ତା ମାସ ୧୬ ତାରିଖରେ ମାମଲାର ପରବର୍ତ୍ତୀ ଶୁଣାଣି ପାଇଁ ତାରିଖ ଧାର୍ଯ୍ୟ କରାଯାଇଛି ।

ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ଯେ, ରାଜ୍ୟର ତିନୋଟି ପୁଲିସ ରେଞ୍ଜର ଡିଆଇଜିଙ୍କୁ ନେଇ ଏହି ଏସଆଇଟି ଗଠନ କରାଯିବ ।

କୋର୍ଟଙ୍କ ତଦାରଖରେ ସେମାନେ ତଦନ୍ତ କରିବେ । ଡିସେମ୍ବର ୧୬ ତାରିଖ ମଧ୍ୟରେ ଟିମ୍ ହାଇକୋର୍ଟରେ ତଦନ୍ତ ରିପୋର୍ଟ ଦାଖଲ କରିବ ।

ଉଲ୍ଲେଖଯୋଗ୍ୟ, ଗତ ଅଗଷ୍ଟ ୨ ତାରିଖରେ ଏହି ଘଟଣାରେ କ୍ରାଇମବ୍ରାଞ୍ଚ ତଦନ୍ତ ପ୍ରକ୍ରିୟାରେ କୋର୍ଟ ଅସନ୍ତୋଷ ପ୍ରକାଶ କରିଥିଲେ ।

ସେପ୍ଟେମ୍ବର ୪ରେ କ୍ରାଇମବ୍ରାଞ୍ଚ ମୁଦା ଲଫାପାରେ ତଦନ୍ତ ରିପୋର୍ଟ ଦାଖଲ କରିଥିଲା ।

ଆଜି ଖଣ୍ଡପୀଠ ମାମଲାର ଶୁଣାଣି କରି ଉପରୋକ୍ତ ନିର୍ଦ୍ଦେଶ ଦେଇଛନ୍ତି ।

ସ୍ମରଣଯୋଗ୍ୟ, ୨୦୧୭ ଅକ୍ଟୋବର ୧୦ ତାରିଖରେ କୋରାପୁଟ ଜିଲ୍ଲା ପଟ୍ଟାଙ୍ଗୀ ଥାନା କୁନ୍ଦୁଲି ଗ୍ରାମପଞ୍ଚାୟତର ସୋରିଷପଦର ଜଙ୍ଗଲରେ ଯବାନଙ୍କ ପୋଷାକରେ ଥିବା ୪ ଜଣ ବ୍ୟକ୍ତି ଜଣେ ନାବାଳିକାଙ୍କୁ ଗଣବଳାତ୍କାର କରିଥିବା ଅଭିଯୋଗ ହୋଇଥିଲା ।

ଏହି ଘଟଣାକୁ ନେଇ ବାଦବିବାଦ, ତଦନ୍ତ, ରାଜନୀତି ଚାଲିଥିବା ବେଳେ ନାବାଳିକା ଜଣକ ୨୦୧୮ ଜାନୁଆରୀ ୨୨ରେ ଆତ୍ମହତ୍ୟା କରିଥିଲେ ।

ରାଜ୍ୟ ସରକାର ଏହି ଘଟଣାରେ କ୍ରାଇମବ୍ରାଞ୍ଚ୍ ତଦନ୍ତ ନିର୍ଦ୍ଦେଶ ସହ ବିଚାର ବିଭାଗୀୟ ତଦନ୍ତ କମିସନ ବସାଇଥିଲେ ।

ଲୋକାଲ ୱାୟାର

ଭୁବନେଶ୍ବର, ନଭେମ୍ବର ୧୮ (ଲୋକାଲ ୱାୟାର): କନ୍ଧମାଳ ଜିଲ୍ଲା ଭାଲିଆଗୁଡ଼ା ଏନକାଉଣ୍ଟରକୁ ୭ ବର୍ଷ ପୂରିଥିବାବେଳେ ମୃତକଙ୍କ ପରିବାରକୁ ନ୍ୟାୟ ପ୍ରଦାନ ଦାବିରେ ସୋମବାର ବନବାସୀ ସୁରକ୍ଷା ପରିଷଦ ବିଧାନସଭା ଆଗରେ ବିକ୍ଷୋଭ ପ୍ରଦର୍ଶନ କରିଛି।

୧୪ ନଭେମ୍ବର, ୨୦୧୨ରେ ଗଞ୍ଜାମ ପୁଲିସ୍ ଓ ସୁରକ୍ଷା ବଳ ମିଶି ମାଓବାଦୀ ଆଳରେ କନ୍ଧମାଳ ଜିଲ୍ଲାର ୫ଜଣ ନିର୍ଦ୍ଦୋଷ ଆଦିବାସୀ ଓ ଦଳିତଙ୍କୁ ହତ୍ୟା କରିଥିଲେ ଓ ଏହି ମାମଲାରେ ଓଡିଶା ସରକାରଙ୍କ ମନୋଭାବ ନ୍ୟାୟିକ ବ୍ୟବସ୍ଥା ପ୍ରତି ଉପହାସ ବୋଲି ପରିଷଦ ଅଭିଯୋଗ କରିଛି।

ଆଜି ବନବାସୀ ସୁରକ୍ଷା ପରିଷଦ ନେତୃତ୍ବରେ ମିଥ୍ୟା ମକଦ୍ଦମା ବିରୋଧୀ ଅଭିଯାନ ଓ ଅନ୍ୟ କେତେକ ସଂଗଠନ ମୃତକଙ୍କ ବିଧବା ପତ୍ନୀମାନଙ୍କ ସହ ବିଧାନସଭା ଆଗରେ ବିକ୍ଷୋଭ କରିଥିଲେ ।

ଏଥିରେ ମିଥ୍ୟା ମକଦ୍ଦମା ବିରୋଧୀ ଅଭିଯାନର ରାଜ୍ୟ ଆବାହକ ନରେନ୍ଦ୍ର ମହାନ୍ତି, ସି.ପି.ଆଇ. (ଏମ୍‌.ଏଲ୍‌.)- ରେଡ୍ ଷ୍ଟାର୍ ନେତା ଶଙ୍କର ସାହୁ, ସି.ପି.ଆଇ. (ଏମ୍‌.ଏଲ୍‌) ଲିବରେସନର ରାଧାକାନ୍ତ ସେଠୀ, ବନବାସୀ ସୁରକ୍ଷା ପରିଷଦର ବଳଭଦ୍ର ମଲ୍ଲିକ ପିୟୁସିଏଲ୍‌ର ପ୍ରମୋଦିନୀ ପ୍ରଧାନ, ଗଣତାନ୍ତ୍ରିକ ଅଧିକାର ସୁରକ୍ଷା ସଂଗଠନର ଦେବ ରଞ୍ଜନ ପ୍ରମୁଖ ଯୋଗ ଦେଇଥିଲେ।

ସୂଚନାଯୋଗ୍ୟ, କନ୍ଧମାଳ-ଗଂଜାମ-ଗଜପତି ଜିଲ୍ଲା ସୀମାବର୍ତ୍ତୀ ଭାଲିଆଗୁଡାରେ ମାଓବାଦୀମାନେ ପ୍ରଜାକୋର୍ଟ କରୁଥିବା ଖବର ପାଇ ପୁଲିସ ପହଞ୍ଚି ନିରୀହ ପାଞ୍ଚ ଜଣ ସ୍ଥାନୀୟ ଲୋକଙ୍କୁ ଗୁଳି କରିଥିଲା।

ଏସ୍‌.ଆଇ.ଟି. ଗଠନ କରି ଏହି ଘଟଣାର ତଦନ୍ତ ସାଙ୍ଗକୁ ପ୍ରତି ମୃତକଙ୍କ ପରିବାରକୁ ୫୦ ଲକ୍ଷ ଟଙ୍କା ଲେଖାଏଁ କ୍ଷତିପୂରଣ ଓ ଏଥିରେ ସଂପୃକ୍ତ ପୁଲିସ୍ ଅଧିକାରୀମାନଙ୍କ ବିରୋଧରେ ନରହତ୍ୟା ଆଇନ ଅନୁସାରେ ମକଦ୍ଦମା ରୁଜୁ କରିବାକୁ ଆନ୍ଦୋଳନକାରୀମାନେ ଦାବି କରିଛନ୍ତି।

ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କୁ ଏହି ଦାବିପତ୍ର ପ୍ରଦାନ କରାଯାଇଛି।

ଲୋକାଲ ୱାୟାର

ଭୁବନେଶ୍ବର , ନଭେମ୍ବର ୧୮ (ଲୋକାଲ ୱାୟାର): ମଦ୍ୟପାନ କରି ଗାଡିଚାଳନା ଓ ଏଥିଯୋଗୁଁ ମୃତ୍ୟୁକୁ ଦେଖିଲେ ଓଡ଼ିଶା ଦ୍ଵିତୀୟ ସ୍ଥାନ ଅଧିକାର କରିଥିବା ପରିବହନ ମନ୍ତ୍ରାଳୟ ସୂଚନା ଦେଇଛି ।

ଗତବର୍ଷ ଅପେକ୍ଷା ମଦ୍ୟପାନ କରି ଗାଡି ଚାଳନା ଯୋଗୁଁ ସଡକ ଦୁର୍ଘଟଣାରେ ମୃତ୍ୟୁ ସଂଖ୍ୟା କମିଥିଲେ ବି ଏହା ଚିନ୍ତାଜନକ ସ୍ଥିତିରେ ରହିଛି।

ରିପୋର୍ଟରେ ଥିବା ତଥ୍ୟ ଅନୁସାରେ, ୨୦୧୭ରେ ମଦ୍ୟପାନ କରି ଗାଡି ଚାଳନା ଯୋଗୁଁ ୭୩୫ ଜଣଙ୍କ ମୃତ୍ୟୁ ହୋଇଥିବାବେଳେ ଚଳିତ ବର୍ଷ ୫୫୫ ଜଣ ପ୍ରାଣ ହରାଇଛନ୍ତି ।

ତେବେ ସଂଶୋଧିତ ମୋଟର ଯାନ ଆଇନ ଲାଗୁ ହେବା ଦ୍ଵାରା ଦୁର୍ଘଟଣାଜନିତ ମୃତ୍ୟୁ ସଂଖ୍ୟା ଆହୁରି କମ ହୋଇପାରିବ ବୋଲି ବିଶେଷଜ୍ଞମାନେ ମତ ଦେଇଛନ୍ତି, ରଣ ମଦ ପିଇ ଗାଡି ଚଳାଇଲେ ଚାଳକଙ୍କୁ ଦଶ ହଜାର ଟଙ୍କା ଜରିମାନା ଦେବାକୁ ପଡିବ ।

ନିସାସକ୍ତକୁ ଧରିବା ଲାଗି ଏବେ ଜାତୀୟ ରାଜପଥରେ ଘନ ଘନ ଯାଞ୍ଚ ହେଉଛି ଓ ପ୍ରତିଦିନ ହାରାହାରି ୧୨୦ ଜଣ ମଦ୍ୟପ ଗାଡିଚାଳକଙ୍କୁ ଗିରଫ କରାଯାଉଥିବା ପୁଲିସ ମହାନିର୍ଦ୍ଦେଶକ ବିଜୟ କୁମାର ଶର୍ମା ସୂଚନା ଦେଇଛନ୍ତି।

ଉଲ୍ଲେଖଯୋଗ୍ୟ, ଉତ୍ତରପ୍ରଦେଶରେ ମଦ୍ୟପାନ କରି ଗାଡି ଚାଳନା ଓ ଦୁର୍ଘଟଣା ସଂଖ୍ୟା ଦେଶରେ ସର୍ବାଧିକ ।

ଲୋକାଲ ୱାୟାର

କୋରାପୁଟ, ନଭେମ୍ବର ୧୭(ଲୋକାଲ ୱାୟାର): କୋରାପୁଟ ଜିଲ୍ଲାର ବୋରିଗୁମ୍ମା ବ୍ଲକ ଅଞ୍ଚଳରେ ଏକ ଗଛରୁ ଜଣେ ନାବାଳକ ଓ ଜଣେ ନାବାଳିକାଙ୍କ ଝୁଲନ୍ତା ମୃତଦେହ ରବିବାର ସକାଳେ ଉଦ୍ଧାର ହେବା ପରେ ସେମାନେ ପ୍ରେମ ସମ୍ପର୍କକୁ ନେଇ ଆତ୍ମହତ୍ୟା କରିଥିବା ଗ୍ରାମବାସୀ ସନ୍ଦେହ କରିଛନ୍ତି ।

ବୋରିଗୁମ୍ମା ବ୍ଲକ ଅନ୍ତର୍ଗତ କୁନ୍ଦରାଗୁଡ଼ା ଗ୍ରାମରେ ଏହି ଘଟଣା ଘଟିଛି । ମୃତକ ଦୁଇ ଜଣ ହେଲେ ଉକ୍ତ ଗ୍ର୍ରାମର ରଘୁନାଥ ଗୌଡ଼ (୧୭) ଏବଂ ଲକ୍ଷ୍ମୀ ଗୌଡ଼ (୧୫) ।

ସ୍ଥାନୀୟ ପୁଲିସ ସୂତ୍ରରୁ ପ୍ରକାଶ, ରଘୁନାଥ ଗତକାଲି ରାତି ୯ଟା ବେଳକୁ ଘରେ ଖାଇ ସାରି ବାହାରକୁ ଯାଇ ଆଉ ଫେରି ନଥିଲେ ।

ରବିବାର ସକାଳେ କେତେକ ଗାଈ ଚରାଳି ଗ୍ରାମ ପାଖରେ ଥିବା ଏକ ମିଲ୍ ପଛ ପାଖ ଗଛରେ ଉଭୟଙ୍କ ମୃତ ଦେହ ଝୁଲୁଥିବା ଦେଖି ଗ୍ରାମବାସୀଙ୍କୁ ସୂଚନା ଦେଇଥିଲେ ।

ପରିବାର ଲୋକଙ୍କ ଠାରୁ ସୂଚନା ପାଇ ପୁଲିସ ମୃତଦେହ ଦୁଇଟିକୁ ଜବତ କରି ବ୍ୟବଚ୍ଛେଦ ପାଇଁ ଡାକ୍ତରଖାନାକୁ ପଠାଇଛି ।

ତେବେ ଗ୍ରାମବାସୀ କହିଛନ୍ତି ଉଭୟେ ପରସ୍ପରକୁ ଭଲ ପାଉଥିଲେ, କିନ୍ତୁ ପରିବାର ପକ୍ଷରୁ ବିରୋଧ ହେବାରୁ ସେମାନେ ଆତ୍ମହତ୍ୟା କରିଛନ୍ତି ।

ଲୋକାଲ ୱାୟାର

ସମ୍ବଲପୁର, ନଭେମ୍ବର ୧୬ (ଲୋକାଲ ୱାୟାର) ସମ୍ବଲପୁର ଜିଲ୍ଲା କଲାଟିକୁଦ ବନବିଭାଗ ଅନ୍ତର୍ଗତ ଯୁଜୁମୁରାରେ ଏକ ଛୁଆ ହାତୀର ମୃତଦେହ ଉଦ୍ଧାର ହୋଇଥିବାବେଳେ ସେଠାରେ ବର୍ଷକରେ ତିନିଟି ହାତୀଙ୍କର ମୃତ୍ୟୁ ହୋଇଛି ।

ଆଜି ସକାଳୁ ଛୁଆ ହାତୀଟିର ମୃତଦେହ ଦେଖି ସ୍ଥାନୀୟ ଲୋକେ ବନବିଭାଗକୁ ଜଣାଇବା ପରେ ତାର ବ୍ୟବଚ୍ଛେଦ ହୋଇଥିଲା ।

ବ୍ୟବଚ୍ଛେଦ ରିପୋର୍ଟ ସ୍ପଷ୍ଟ ହୋଇନଥିବା ବେଳେ ବେଆଇନ ଶିକାର ଯୋଗୁଁ ମୃତ୍ୟୁ ହୋଇନଥିବା ଜଣାପଡିଛି।

ଉଲ୍ଲେଖଯୋଗ୍ୟ, ଏହା ପୂର୍ବରୁ ସେଠାରେ ଅକ୍ଟୋବର ୨୩ ଓ ନଭେମ୍ବର ୨୪ରେ ଦୁଇଟି ହାତୀଙ୍କର ମୃତ୍ୟୁ ହୋଇସାରିଛି ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୧୫(ଲୋକାଲ ୱାୟାର): ଯାଜପୁର ଜିଲ୍ଲା ହରିଦାସପୁର ମହିଳା ପିଇଓ ସ୍ମିତାରାଣୀ ବିଶ୍ୱାଳଙ୍କ ମୃତ୍ୟୁର ପ୍ରତିବାଦ କରିବାକୁ ଯାଇ ଶୁକ୍ରବାର ବିଜେପି ବିଧାୟକମାନେ ବିଧାନସଭାରେ ମୁହଁରେ କଳାପଟି ବାନ୍ଧିଥିବା ଦେଖିବାକୁ ମିଳିଥିଲା ।

ବିଜେପି ବିଧାୟକମାନେ ଗତକାଲି ବିଧାନସଭାରେ ସ୍ଲୋଗାନବାଜି କରିଥିବା ବେଳେ ଶୁକ୍ରବାର ଅଭିନବ ଢଙ୍ଗରେ ପ୍ରତିବାଦ ଜଣାଇଥିଲେ ।

କୌଣସି ସ୍ଲୋଗାନ ନ ଦେଇ ସେମାନେ ନିଜ ନିଜ ଆସନରେ ଛିଡ଼ା ହୋଇଥିଲେ ଏବଂ ମୁହଁରେ କଳାପଟି ବାନ୍ଧିଥିଲେ ।

ବାଚସ୍ପତି ସୂର୍ଯ୍ୟନାରାୟଣ ପାତ୍ରଙ୍କ ବାରମ୍ବାର ଅନୁରୋଧ ପରେ ସେମାନେ ନିଜ ଆସନରେ ବସିଥିଲେ ମଧ୍ୟ ଅନେକ ମୁହଁରୁ କଳାପଟି ଖୋଲି ନଥିଲେ ।

ତେବେ ଆଜି ପ୍ରଶ୍ନକାଳରେ କେହି ଭାଗ ନ ନେଇ କେବଳ ନିରବ ହୋଇ ବସିଥିଲେ ।

ଏହାର ସମାଧାନ ପାଇଁ ବାଚସ୍ପତି ପୂର୍ବାହ୍ନ ୧୧ଟା ପରେ ସର୍ବଦଳୀୟ ବୈଠକ ଡାକିଥିଲେ ।

ମଧ୍ୟ।ହ୍ନ ୧୨ଟାରେ ଶୂନ୍ୟକାଳ ଆରମ୍ଭ ହୋଇଥିଲା ଏବଂ ଗୃହକୁ ବିଜେପି ସଦସ୍ୟ ମାନେ ଆସିଥିଲେ ମଧ୍ୟ ନିରବ ପ୍ରତିବାଦ ଜଣାଇ ବସି ରହିଥିଲେ ।

ପୂର୍ବରୁ ଶୁକ୍ରବାର ସକାଳେ ରାଜ୍ୟ କାର୍ଯ୍ୟାଳୟରେ ବିରୋଧୀ ଦଳ ନେତା ପ୍ରଦୀପ୍ତ ନାଏକ ସାମ୍ବାଦିକ ସମ୍ମିଳନୀରେ କହିଥିଲେ, ସ୍ମିତାରାଣୀ ମୃତ୍ୟୁର ସିବିଆଇ ତଦନ୍ତ ପାଇଁ ଦଳ ଦାବି କରୁଛି ।

ଏହି ନ୍ୟାୟ ମିଳିବା ପର୍ଯ୍ୟନ୍ତ ଦଳ ପ୍ରତିବାଦ ଜାରି ରଖିବ ବୋଲି ସେ କହିଥିଲେ ।

ଲୋକାଲ ୱାୟାର

ଭଦ୍ରକ, ନଭେମ୍ବର ୧୫ (ଲୋକାଲ ୱାୟାର): ଭଦ୍ରକ ଜିଲ୍ଲା ଆରଡ଼ିସ୍ଥିତ ପ୍ରସିଦ୍ଧ ଶୈବପୀଠ ଆଖଣ୍ଡଳମଣି ମନ୍ଦିରର ଭଣ୍ଡାର ଘରେ ନିଆଁ ଲାଗିବାରୁ ଠାକୁରଙ୍କ ଅଳଙ୍କାର ସମେତ ସେଠାରେ ଥିବା ଅନ୍ୟ ସାମଗ୍ରୀ ଜଳିପୋଡ଼ି ପାଉଁଶ ହୋଇଯାଇଥିବା ଶୁକ୍ରବାର ସୂଚନା ମିଳିଛି।

ଗତକାଲି ରାତି ପ୍ରାୟ ଏଗାରଟା ସୁଦ୍ଧା ସମସ୍ତ ନୀତିକାନ୍ତି ସରିବା ପରେ ପୂଜକମାନେ ପହୁଡ଼ ଦେଇ ଯାଇଥିଲେ।

ତେବେ ରାତିରେ ପହରା ଦେଉଥିବା ୨ ଜଣ ଜଗୁଆଳି ରାତି ପ୍ରାୟ ଗୋଟାଏରେ ଭଣ୍ଡାରଘରୁ ପ୍ରବଳ ଧୂଆଁ ବାହାରୁଥିବା ଦେଖି ମନ୍ଦିର କର୍ମକର୍ତ୍ତାଙ୍କୁ ଅବଗତ କରିଥିଲେ।

ଖବର ପାଇ ଧାମନଗରରୁ ଅଗ୍ନିଶମ ବାହିନୀ ଆସି ନିଆଁକୁ ଆୟତ୍ତ କରିଥିଲେ ମଧ୍ୟ ଠାକୁରଙ୍କ ସମସ୍ତ ଅଳଙ୍କାର, ଆସବାବପତ୍ର ଓ ବାସନ ଆଦି ଲକ୍ଷାଧିକ ଟଙ୍କାର ସାମଗ୍ରୀ ପୋଡ଼ି ପାଉଁଶ ହୋଇଯାଇଥିଲା।

ଅଗ୍ନିକାଣ୍ଡର କାରଣ ଜଣାପଡ଼ି ନଥିବାବେଳେ ପୁଲିସ ତଦନ୍ତ ଚଳାଇଛି।

ଲୋକଲ ୱାୟାର

ଭୁବନେଶ୍ୱର, ନଭେମ୍ବର ୧୪(ଲୋକାଲ ୱାୟାର): ଭୁବନେଶ୍ୱରର ବିଜୁ ପଟ୍ଟନାୟକ ବିମାନବନ୍ଦରରେ ଜଣେ ଯାତ୍ରୀଙ୍କ ଠାରୁ ୫୨ ଲକ୍ଷ ଟଙ୍କାର ସୁନା ଜବତ ହୋଇଥିବା ବହିଃଶୁଳ୍କ ବିଭାଗ ପକ୍ଷରୁ ଗୁରୁବାର ସୂଚନା ଦିଆଯାଇଛି ।

ବୁଧବାର ରାତି ପ୍ରାୟ ୯ଟା ୪୫ ମିନିଟରେ ବିମାନବନ୍ଦରରେ ପହଞ୍ଚିଥିଲା କ୍ୱାଲାଲୁମ୍ପୁରରୁ ଆସିଥିବା ଏୟାର ଏସିଆର ଫ୍ଲାଇଟ-୩୦ ।

ଏହି ବିମାନରେ ଆସିଥିବା କେରଳ କୋଝିକୋଡର ଜଣେ ଯାତ୍ରୀଙ୍କ ଠାରୁ ଦୁଇଟି ସୁନା ବିସ୍କୁଟ ଜବତ ହୋଇଥିଲା । ଏହାର ଓଜନ ୧ କିଲୋ ୩୧୦ ଗ୍ରାମ ।

ସଂପୃକ୍ତ ଯାତ୍ରୀଙ୍କୁ ଅଟକ ରଖି ଜେରା କରାଯାଉଥିବା କହିଛନ୍ତି କଷ୍ଟମ ବିଭାଗ କମିଶନର ଦେବାଶିଷ ସାହୁ ।

ଉଲ୍ଳେଖଯୋଗ୍ୟ, ଗତ କେଇ ମାସ ମଧ୍ୟରେ ଏହି ବିମାନବନ୍ଦରରୁ ଅନେକ ବାର ସୁନା ଜବତ ହୋଇଥିବା ବେଳେ ନିକଟରେ ୧୨ ଲକ୍ଷ ଟଙ୍କାର ସିଗାରେଟ ମଧ୍ୟ ଜବତ ହୋଇଥିଲା ।

ଲୋକାଲ ୱାୟାର

ବାଲେଶ୍ୱର, ନଭେମ୍ବର ୪(ଲୋକାଲ ୱାୟାର): ବାଲେଶ୍ୱର ଜିଲ୍ଲାର ଖନ୍ତାପଡ଼ା ନିକଟରେ ଥିବା ଫାଲକନ୍ ଚିଙ୍ଗୁଡ଼ି କାରଖାନାରେ ବୁଧବାର ରାତିରେ ଗ୍ୟାସ୍ ଲିକ୍ ହୋଇ ଶତାଧିକ ଲୋକ ଅସୁସ୍ଥ ହେବା ଘଟଣାରେ କାରଖାନାର ୭ ଜଣ ଅଧିକାରୀଙ୍କୁ ଗିରଫ କରାଯାଇଥିବା ଜଣେ ବରିଷ୍ଠ ପୁଲିସ ଅଫିସର ସୂଚନା ଦେଇଛନ୍ତି ।

ଗିରଫ ହୋଇଥିବା ଅଧିକାରୀମାନଙ୍କ ମଧ୍ୟରେ ଅଛନ୍ତି ଫାଲକନ୍ ମେରାଇନ ଏକ୍ସପୋର୍ଟସ ପ୍ରନ୍ ପ୍ରୋସେସିଙ୍ଗ ଫ୍ୟାକ୍ଟୋରିର ଜେନେରାଲ ମ୍ୟାନେଜର, ପ୍ରଡକ୍ସନ ମ୍ୟାନେଜର, ମାନବ ସମ୍ବଳ ଅଧିକାରୀ, ଦୁଇ ଜଣ ସୁପରଭାଇଜର, ସିଫ୍ଟ-ଇନ-ଚାର୍ଜ ଏବଂ ସେଫଟି ମ୍ୟାନେଜର ।

ଖନ୍ତାପଡ଼ା ଥାନାରେ ଗ୍ୟାସ ଲିକ୍ ଘଟଣାକୁ ନେଇ ଏକ ମାମଲା ରୁଜୁ ହୋଇଛି ଏବଂ ୬ ଜଣିଆ ଫୋରେନସିକ୍ ଟିମ୍ କାରଖାନାରେ ତଦନ୍ତ କରିଥିବା କହିଛନ୍ତି ପୁଲିସ ଡିଜି ବିଜୟ କୁମାର ଶର୍ମା ।

ଗତକାଲି ଶତାଧିକ ଅସୁସ୍ଥ ଲୋକ ବିଭିନ୍ନ ଡାକ୍ତରଖାନାରେ ଭର୍ତ୍ତି ହୋଇଥିବା ବେଳେ ଜିଲ୍ଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ଏବଂ ଏସପି ବି.ଯୁଗଳ କିଶୋର ଘଟଣାସ୍ଥଳ ପରିଦର୍ଶନ କରିବା ସହ ଅସୁସ୍ଥଙ୍କ ଚିକିତ୍ସା ବ୍ୟବସ୍ଥା କରିଥିଲେ ।

କାରଖାନାକୁ ସିଲ୍ କରି ଦିଆଯାଇଛି ଏବଂ ତଦନ୍ତ ଆରମ୍ଭ ହୋଇଥିବା କହିଛନ୍ତି ପୂର୍ବାଞ୍ଚଳ ଆଇଜି ଦୀପ୍ତେଶ ପଟ୍ଟନାୟକ ।

ରାତିରେ ଶ୍ରମ ମନ୍ତ୍ରୀ ସୁଶାନ୍ତ ସିଂହ ମଧ୍ୟ ଡାକ୍ତରଖାନାରେ ପହଞ୍ଚି ଅସୁସ୍ଥଙ୍କ ଭଲ ମନ୍ଦ ବୁଝିଥିଲେ ।

ସେ କହିଛନ୍ତି, ଫ୍ରକ୍ଟୋରି ଆଣ୍ଡ ବଏଲର ବିଭାଗ ଏବଂ ଶ୍ରମ ବିଭାଗ ପକ୍ଷରୁ ଭିନ୍ନ ଭିନ୍ନ ଭାବେ ଏହି ଘଟଣାର ତଦନ୍ତ ସକାଶେ ନିର୍ଦ୍ଦେଶ ଦିଆଯାଇଛି ।

କାରଖାନାରେ ନାବାଳକମାନଙ୍କୁ ଶ୍ରମିକ ଭାବେ ନିୟୋଜିତ କରାଯାଇଥିଲା କି ତାର ମଧ୍ୟ ତଦନ୍ତ ହେବ ବୋଲି ସେ କହିଛନ୍ତି ।

ଅପରପକ୍ଷରେ ଡାକ୍ତରଖାନାରେ ଚିକିତ୍ସିତ ହେଉଥିବା ଅସୁସ୍ଥମାନଙ୍କ ସ୍ୱାସ୍ଥ୍ୟାବସ୍ଥା ଭଲ ଥିବା ବାଲେଶ୍ୱର ଡାକ୍ତରଖାନାର ଜଣେ ଡାକ୍ତର କହିଛନ୍ତି ।

ଲୋକାଲ ୱାୟାର

ବାଲେଶ୍ୱର, ନଭେମ୍ବର ୧୪(ଲୋକାଲ ୱାୟାର): ବାଲେଶ୍ୱର ଜିଲ୍ଲା ଖନ୍ତାପଡ଼ାସ୍ଥିତ ଫାଲକନ୍ ମେରାଇନ୍ ଏକ୍ସପୋର୍ଟ ଲିମିଟେଡରୁ ଗ୍ୟାସ୍ ଲିକ୍ ହୋଇ ଶତାଧିକ ଲୋକ ଅସୁସ୍ଥ ହେବା ଘଟଣରେ ମାମଲା ରୁଜୁ ହୋଇଥିବା ଡିଜିପି ବିଜୟ କୁମାର ଶର୍ମା କହିଛନ୍ତି ।

ଖନ୍ତାପଡ଼ା ଥାନାରେ ମାମଲା ରୁଜୁ ହେବା ପରେ ଘଟଣାର ତଦନ୍ତ କରିବା ପାଇଁ କାରଖାନାରେ ଫୋରେନସିକ୍ ଟିମ୍ ପହଞ୍ଚିଛନ୍ତି ।

କାରଖାନାର ୩ ଜଣ ଅଧିକାରୀଙ୍କୁ ଅଟକ ରଖି ପଚରାଉଚୁରା କରାଯାଇଥିବା ସେ କହିଛନ୍ତି ।

ତଦନ୍ତ ପରେ ଆବଶ୍ୟକ କାର୍ଯ୍ୟାନୁଷ୍ଠାନ ହେବ ବୋଲି ଡିଜିପି କହିଛନ୍ତି ।

ଅପରପକ୍ଷରେ ଜିଲ୍ଲାପାଳ କେ. ସୁଦର୍ଶନ ଚକ୍ରବର୍ତ୍ତୀ କହିଛନ୍ତି, କ୍ଲୋରିନ୍ ଗ୍ୟାସ ଯୋଗୁ ଲୋକମାନେ ଅଣନିଶ୍ୱାସୀ ହୋଇ ଅସୁସ୍ଥ ହୋଇପଡ଼ିଥିଲେ ।

ଘଟଣାରେ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ହେବ ବୋଲି ସେ କହିଛନ୍ତି ।

ତେବେ କାରଖାନାର ମୁଖ୍ୟ ଉଦ୍ୟୋଗପତି ତାରା ପଟ୍ଟନାୟକ ଗ୍ୟାସ୍ ଲିକ ଘଟଣାକୁ ଖଣ୍ଡନ କରିଛନ୍ତି ।

ସେ କହିଛନ୍ତି କ୍ଲୋରିନ୍ ଗ୍ୟାସ ନୁହେଁ ବରଂ ବ୍ଲିଚିଂ ପାଇଁ ଏଭଳି ସ୍ଥିତି ହୋଇଛି ।

ଅସୁସ୍ଥ ଲୋକମାନଙ୍କ ଚିକିତ୍ସା ଦିଗରେ କମ୍ପାନି ପକ୍ଷରୁ ସମସ୍ତ ସହାୟତା ଯୋଗାଇ ଦିଆଯାଉଛି ।

ଉଲ୍ଲେଖଯୋଗ୍ୟ, ପ୍ରାୟ ୩ ବର୍ଷ ତଳେ ଆରମ୍ଭ ହୋଇଥିବା ଏହି କାରଖାନାରେ ବାଲେଶ୍ୱର ସମେତ ବିଭିନ୍ନ ଜିଲ୍ଲାରୁ ୩ ହଜାରରୁ ଉର୍ଦ୍ଧ୍ବ ଶ୍ରମିକ ୨ଟି ସିଫ୍ଟରେ କାମ କରୁଛନ୍ତି ।

ସକାଳ ୬ରୁ ଅପରାହ୍ନ ୨ଟା ପର୍ଯ୍ୟନ୍ତ ‘ଏ’ ସିଫ୍ଟ, ଅପରାହ୍ନ ୩ରୁ ରାତି ୧୦ ପର୍ଯ୍ୟନ୍ତ ‘ବି’ ସିଫ୍ଟ କାର୍ଯ୍ୟ ଚାଲିଥାଏ ।

ବୁଧବାର ସନ୍ଧ୍ୟାରେ ଅଚାନକ ଗ୍ୟାସ୍ଲିକ୍ ହେବାରୁ ମହିଳାମାନଙ୍କ ସମେତ ଶତାଧିକ ଶ୍ରମିକ ଅସୁସ୍ଥ ହୋଇପଡ଼ିଥିଲେ ।

ସେମାନଙ୍କୁ ଖନ୍ତାପଡ଼ା, ସୋର ଏବଂ ବାଲେଶ୍ୱର ଡାକ୍ତରଖାନାରେ ଭର୍ତ୍ତି କରାଯାଇଥିଲା ।

ଦୀର୍ଘ ସମୟର ଚିକିତ୍ସା ପରେ ଅନେକ ସୁସ୍ଥ ହୋଇଥିବା ବେଳେ ରାତି ସୁଦ୍ଧା ଡାକ୍ତରଖାନାରେ ଭିଡ଼ ଲାଗି ରହିଥିଲା ।

ଜିଲ୍ଲାପାଳ, ଏସପି ବି. ଯୁଗଳ କିଶୋର କୁମାର ଏବଂ ଅନ୍ୟାନ୍ୟ ଅଧିକାରୀମାନେ ଉପସ୍ଥିତ ରହି ପରିସ୍ଥିତି ନିୟନ୍ତ୍ରଣ କରିଥିଲେ ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୧୪(ଲୋକାଲ ୱାୟାର): ରାଜଧାନୀ ଭୁବନେଶ୍ୱରରେ ବ୍ରାଉନସୁଗର କାରବାର କରୁଥିବା ଜଣେ ପୁଲିସ କନଷ୍ଟେବଳ ଗିରଫ ହୋଇଥିବା ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।

କମିଶନରେଟ ରିଜର୍ଭ ପୁଲିସ ବାରାକରେ ରହୁଥିବା କନଷ୍ଟେବଳ ଜେ. ଭାରିମଲ୍ଲ ବ୍ରାଉନସୁଗର ବିକୁଥିବା ନେଇ ବରିଷ୍ଠ ଅଧିକାରୀଙ୍କୁ ଖବର ମିଳିବା ପରେ କ୍ୟୁଏଟିକୁ ସୂଚନା ଦିଆଯାଇଥିଲା ।

ବୁଧବାର ସେ ନୟାପଲ୍ଲୀ ବେହେରା ସାହିରେ ବ୍ରାଉନସୁଗର ବିକୁଥିବା ବେଳେ ପୂର୍ବରୁ ତାଙ୍କୁ ପିଛା କରୁଥିବା କ୍ୟୁଏଟି ଟିମ୍ ତାଙ୍କୁ କାବୁ କରି ୩୦ ଗ୍ରାମ ବ୍ରଉନସୁଗର ଜବତ କରିଥିଲା ।

ତାଙ୍କ ସହ ଅନ୍ୟ କେଉଁମାନେ ଏହି କାରବାରରେ ସଂପୃକ୍ତ ଅଛନ୍ତି ସେ ନେଇ ତାଙ୍କୁ ଜେରା କରାଯାଉଛି ।

ଉଲ୍ଲେଖଯୋଗ୍ୟ, ଜେ. ଭାରିମଲଙ୍କ ନାଁରେ ଅନେକ ଅଭିଯୋଗ ରହିଛି । ୨୦୦୮ରେ ନୂଆପଲ୍ଲୀରେ ଘଟିଥିବା ଏକ ହତ୍ୟା ଘଟଣାରେ ପୁଲିସ୍ ତାଙ୍କୁ ଗିରଫ କରିଥିଲା ।

ପରେ ସେ ନିର୍ଦ୍ଦୋଷରେ ଖଲାସ ହୋଇଥିଲେ ମଧ୍ୟ ତିନି ବର୍ଷ ହେବ ବ୍ରାଉନସୁଗର କାରବାର ଚଳାଇଥିଲେ ବୋଲି ପୁଲିସ କହିଛି ।

ଲୋକାଲ ୱାୟାର

ବାଲେଶ୍ୱର, ନଭେମ୍ବର ୧୩(ଲୋକାଲ ୱାୟାର): ବାଲେଶ୍ୱର ଜିଲ୍ଲା ଖନ୍ତାପଡ଼ା ନିକଟ ଫାଲକନ୍ ଚିଙ୍ଗୁଡ଼ି ପ୍ରକ୍ରିୟାକରଣ ପ୍ଲାଣ୍ଟରେ ମଙ୍ଗଳବାର ରାତିରେ ବିଷାକ୍ତ ଗ୍ୟାସ ଲିକ୍ ହୋଇ ଶତାଧିକ ଶ୍ରମିକ ଅସୁସ୍ଥ ହୋଇ ଡାକ୍ତରଖାନାରେ ଭର୍ତ୍ତି ହୋଇଥିବା ସ୍ଥାନୀୟ ଲୋକେ କହିଛନ୍ତି ।

କେତେକ ଶ୍ରମିକ କହିଛନ୍ତି ମହିଳାଙ୍କ ସମେତ ଶହେରୁ ଅଧିକ ଅସୁସ୍ଥ ହୋଇ ଗୁରୁତର ଅଛନ୍ତି ।

ପ୍ରାୟ ୩୦ ଜଣଙ୍କୁ ଖନ୍ତାପଡ଼ା ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ୭୦ରୁ ଅଧିକଙ୍କୁ ବାଲେଶ୍ୱର ଓ ସୋରୋ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି ।

ବୁଧବାର ନାଇଟ୍ ସିଫ୍ଟରେ ଶ୍ରମିକ ମାନେ ଡ୍ୟୁଟି କରୁଥିବା ବେଳେ ଅଚାନକ ରାତି ୯ଟା ୩୦ରେ ବିଷାକ୍ତ ଗ୍ୟାସ୍ ଲିକ୍ ହୋଇଥିଲା ।

କେଇ ମିନିଟ ମଧ୍ୟରେ ଶତାଧିକ ଶ୍ରମିକ ସଂଜ୍ଞାହୀନ ହୋଇ ପଡ଼ିଥିଲେ ।

ସେମାନଙ୍କୁ ତୁରନ୍ତ ବିଭିନ୍ନ ସରକାରୀ ଓ ଘରୋଇ ଆମ୍ବୁଲାନ୍ସ, ସୋର, ନୀଳଗିରି ଏବଂ ବାଲେଶ୍ୱରରୁ ଆସିଥିବା ଅଗ୍ନିଶମ ଗାଡ଼ିରେ ବିଭିନ୍ନ ଡାକ୍ତରଖାନାକୁ ପଠାଯାଇଥିଲା ।

ଜିଲ୍ଲାପାଳ, ଏସପି ଏବଂ ସ୍ଥାନୀୟ ବରିଷ୍ଠ ପ୍ରଶାସନିକ ଅଧିକାରୀମାନେ ଘଟଣାସ୍ଥଳରେ ରହି ପରିସ୍ଥିତି ଉପରେ ନଜର ରଖିଛନ୍ତି ।

ଲୋକାଲ ୱାୟାର

ଭୁବନେଶ୍ବର, ନଭେମ୍ବର ୧୨ (ଲୋକାଲ ୱାୟାର): କିଛି ବାସ୍ତବ ଘଟଣା ବେଳେବେଳେ କାଳ୍ପନିକ ଭଳି ଲାଗେ, ଯେମିତି ରାଜଧାନୀ ଭୁବନେଶ୍ବରର ଜଣେ ପୁଅ ତାଙ୍କ ବାପା ମରିଗଲା ପରେ ବିଳାସପୂର୍ଣ୍ଣ ସ୍ବର୍ଗଯାତ୍ରା ଲାଗି ତାଙ୍କ ପ୍ରିୟ କାରକୁ ପୋଡ଼ି ଦେଇଛନ୍ତି।

ସୂଚନା ଅନୁସାରେ, ଭୁବନେଶ୍ବର ପଟିଆ ଅଞ୍ଚଳର ନିରଞ୍ଜନ ରାଉତଙ୍କ ବାପା କିଶୋର ଚନ୍ଦ୍ର ରାଉତ ପ୍ରାଣ ହରାଇବା ପରେ ପୁଅ ନିରଞ୍ଜନ ବାପା ବ୍ୟବହାର କରୁଥିବା କାରକୁ ମଶାଣିକୁ ନେଇ ଜାଳି ଦେଇଛନ୍ତି।

କିଶୋର ରାଉତ ଜଣେ ବ୍ୟବସାୟୀ ଓ ସେ କାର ଚଲାଇବାକୁ ଖୁବ ଭଲ ପାଉଥିଲେ ବୋଲି ସ୍ଥାନୀୟ ଲୋକ କହିଛନ୍ତି।

୬୫ ବର୍ଷୀୟ କିଶୋରଙ୍କ ମୃତ୍ୟୁ ମଧ୍ୟ ଏକ କାର ଦୁର୍ଘଟଣାରେ ହୋଇଥିଲା, ଏଥିରେ ମର୍ମାହତ ହୋଇ ବାପା ସ୍ଵର୍ଗରେ ଏହି ଗାଡ଼ି ଚଳାଇବେ ବୋଲି ବିଶ୍ବାସ କରି ତାକୁ ଜାଳିଦେଇଥିବା ଜଣାପଡିଛି।

ଏହାର ଏକ ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।

ନିରଞ୍ଜନ ମାନସିକ ସନ୍ତୁଳନ ହରାଇ ଏଭଳି ପଦକ୍ଷେପ ନେଇଥିବା ମାନସିକରୋଗ ବିଶେଷଜ୍ଞ ଡାକ୍ତର ସମ୍ରାଟ କର କହିଛନ୍ତି।

ଏପ୍ରକାର ବ୍ୟବହାରକୁ ପୋଷ୍ଟ ଟ୍ରମାଟିକ୍ ଷ୍ଟ୍ରେସ୍ ଡିଜଅର୍ଡର୍ ବୋଲି କୁହାଯାଉଥିବା ସେ ସୂଚନା ଦେଇଛନ୍ତି।

ଲୋକାଲ ୱାୟାର୍

କେନ୍ଦୁଝର, ନଭେମ୍ବର ୧୨ (ଲୋକାଲ ୱାୟାର): ପୁରୁଣା ସହର ୨୦ ନମ୍ବର ଜାତୀୟ ରାଜପଥ ବାଇପାସ ଶିରିଷପାଳ ଗାଁ ନିକଟରେ ଗାଡି ଯାଞ୍ଚ କରୁଥିବା ସମୟରେ ଟ୍ରକ୍ ଚାପାରେ ଜଣେ ଆର୍.ଟି.ଓ. କର୍ମଚାରୀଙ୍କ ମଙ୍ଗଳବାର ମୃତ୍ୟୁ ଘଟିଥିବା ସୂଚନା ମିଳିଛି।

ମୃତକ ବିଜୟ ମହାନ୍ତ ଆର୍.ଟି.ଓ. ଅଫିସର ଡ୍ରାଇଭର୍ ଥିଲେ।

ସୂଚନା ଅନୁସାରେ, ଜୁନିୟର ଏମ୍.ଭି.ଆଇ କାହ୍ନୁଚରଣ ବାନରାଙ୍କ ସହ ବିଜୟ ଗାଡ଼ି ଯାଞ୍ଚ କରୁଥିବାବେଳେ ବଡ଼ବିଲ ପଟୁ ଆସୁଥିବା ଏକ ଟ୍ରକକୁ ଅଟକାଇଥିଲେ।

ତେବେ ଟ୍ରକ ଚାଳକ ଗାଡ଼ି ନଅଟକାଇ ତାଙ୍କ ଉପରେ ଟ୍ରକ୍ ଚଢ଼ାଇଦେଇଥିବା ଜୁନିୟର ଏମ୍.ଭି.ଆଇ. କହିଛନ୍ତି ।

ବିଜୟଙ୍କ ମୃତଦେହ ଜିଲ୍ଲା ମୁଖ୍ୟ ଡାକ୍ତରଖାନାକୁ ଅଣାଯାଇଥିବା ବେଳେ ପୁଲିସ ଶବ ତଦନ୍ତ ଆରମ୍ଭ କରିଛି।

ତେବେ ଡ୍ରାଇଭରଙ୍କ ସହ ଜଣେ ଅଧିକାରୀ କିପରି ଗାଡ଼ି ଯାଞ୍ଚ କରୁଥିଲେ, ତାହା ଚର୍ଚ୍ଚାର ବିଷୟ ହୋଇଛି।

ଲୋକାଲ ୱାୟାର

କଟକ,ନଭେମ୍ବର ୧୦ (ଲୋକାଲ ୱାୟାର): କଟକ ବିଡାନାସୀର ଏକ ପରିତ୍ୟକ୍ତ କୂଅରୁ ରବିବାର ଦିନ ଗୋଟିଏ ଷଣ୍ଢକୁ ଉଦ୍ଧାର କରାଯାଇଥିବା ସ୍ଥାନୀୟ ପୁଲିସ କହିଛି ।

ଶନିବାର ବିଳମ୍ବିତ ରାତିରେ ବିଡାନାସୀ ବସୁନ୍ଧରା ଲେନରେ ଥିବା ଏକ ପରିତ୍ୟକ୍ତ କୂଅରେ ଏହି ଷଣ୍ଢଟି ଗଳି ପଡିଥିଲା ।

ସକାଳେ ସ୍ଥାନୀୟ ଅଞ୍ଚଳର କିଛି ବ୍ୟକ୍ତି ପ୍ରାତଃଭ୍ରମଣରେ ଯାଉଥିବା ବେଳେ ଉକ୍ତ କୂଅ ଭିତରୁ ଷଣ୍ଢଟିକୁ ଦେଖିବାକୁ ପାଇଥିଲେ ।

ଖବର ପାଇ ଅଗ୍ନିଶମ ବାହିନୀ ପହଞ୍ଚି ପ୍ରାୟ ୧ ଘଣ୍ଟା ଅକ୍ଳାନ୍ତ ପରିଶ୍ରମ କରିବା ପରେ କୂଅ ଭିତରୁ ଷଣ୍ଢକୁ ସୁରକ୍ଷିତ ଭାବେ ଉଦ୍ଧାର କରିଥିଲେ ।

ଲୋକାଲ ୱାୟାର

କଟକ,ନଭେମ୍ବର ୧୦ (ଲୋକାଲ ୱାୟାର): ଶ୍ରୀରାମ ଚନ୍ଦ୍ର ଭଞ୍ଜ ମେଡିକାଲ କଲେଜ ଓ ହସ୍ପିଟାଲ(ଏସସିବିଏମସିଏଚ)ରେ ଚିକିତ୍ସା ଅବହେଳାରୁ ଜଣେ ଶିଶୁର ମୃତ୍ୟୁ ହୋଇଥିବା ଅଭିଯୋଗର ତଦନ୍ତ ପାଇଁ ରବିବାର ଦିନ ବିଶେଷଜ୍ଞ ଡାକ୍ତରମାନଙ୍କୁ ନେଇ ଏକ ଟିମ ଗଠନ କରାଯାଇଥିବା ଅଧିକ୍ଷକ ପ୍ରଫେସର ଡାକ୍ତର ସରୋଜ ସାହୁ କହିଛନ୍ତି ।

ନ୍ୟୁରୋ ସର୍ଜରୀ ବିଭାଗର ବିଭାଗୀୟ ମୁଖ୍ୟ ପ୍ରଫେସର ଡାକ୍ତର ସୁଧାଂଶୁ ଶେଖର ମିଶ୍ରଙ୍କ ନେତୃତ୍ୱରେ ଗଠିତ ଏହି ଟିମରେ ଭେଷଜ ବିଗଭାର ବିଭାଗୀ ମୁଖ୍ୟ ପ୍ରଫେସର ଡାକ୍ତର ବିରଞ୍ଚି ନାରାୟଣ ମହାପାତ୍ର ରହିଥିବା ବେଳେ ଜଣେ ଶିଶୁରୋଗ ବିଶେଷଜ୍ଞ, ପ୍ରଶାସନିକ ଅଧିକାରୀ କଳ୍ପତରୁ ବେହେରା ଓ ସର୍ଜରୀ ବିଭାଗର ଜଣେ ସହକାରୀ ପ୍ରଫେସର ରହିଛନ୍ତି ।

ଏହି ଟିମ ଅଭିଯୋଗର ତଦନ୍ତ କରି ଆସନ୍ତା ୨ ଦିନ ମଧ୍ୟରେ ରିପୋର୍ଟ ପ୍ରଦାନ କରିବେ ।

ରିପୋର୍ଟ ପ୍ରଦାନ ପରେ ଆବଶ୍ୟକୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ଲୋକାଲ ୱାୟାର

ମାଲକାନଗିରି, ନଭେମ୍ବର ୧୦(ଲୋକାଲ ୱାୟାର): ମାଲକାନଗିରି ଜିଲ୍ଲାର ଏମଭି-୭୯ ଥାନାଞ୍ଚଳର ଏକ ଆଦିବାସୀ ଗ୍ରାମରେ ଅଜଣା ରୋଗରେ ଦଇ ସପ୍ତାହରେ ୬ ଜଣ ଶିଶୁଙ୍କ ମୃତ୍ୟୁ ହେବା ଯୋଗୁ ଅଞ୍ଚଳବାସୀ ଆତଙ୍କିତ ହୋଇପଡ଼ିଛନ୍ତି ।

ପରିସ୍ଥିତି ଗୁରୁତର ହେଉଥିବା ଲକ୍ଷ୍ୟ କରି ଜିଲ୍ଲା ସ୍ୱାସ୍ଥ୍ୟ ବିଭାଗର ଏକ ଟିମ୍ ଉକ୍ତ ଗ୍ରାମକୁ ଯାଇ ରୋଗାକ୍ରାନ୍ତ ଶିଶୁମାନଙ୍କ ରକ୍ତ ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଇଥିବା ଜିଲ୍ଲାର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।

ଏମଭି-୭୯ ଥାନା ଅନ୍ତର୍ଗତ ଟିଗଲପଞ୍ଚାୟତ ନିକଟବର୍ତ୍ତୀ ତାମନପାଲି ଆଦିବାସୀ ଗ୍ରାମରେ ଦୁଇ ସପ୍ତାହ ମଧ୍ୟରେ ୬ଜଣ ଶିଶୁଙ୍କ ମୃତ୍ୟୁ ହୋଇଥିବା ବେଳେ ୭ ଜଣ ଆକ୍ରାନ୍ତ ହୋଇଛନ୍ତି ।

କିଛି ଦିନ ହେଲା ଶିଶୁମାନେ ଜ୍ୱର ଓ ଝାଡ଼ାରେ ଆକ୍ରାନ୍ତ ଥିଲେ । ତେବେ ଅଚାନକ ଜଣଙ୍କ ପରେ ଜଣେ ଶିଶୁଙ୍କ ମୃତ୍ୟୁ ହୋଇଥିଲା ।

୭ ଆକ୍ରାନ୍ତ ଶିଶୁଙ୍କୁ କାଲିମେଳା ଡାକ୍ତରଖାନାରେ ଚିକିତ୍ସା ପରେ ଘରକୁ ପଠାଯାଇଛି ।

ଉଲ୍ଲେଖଯୋଗ୍ୟ, ୨୦୧୬ ମସିହାରେ ଜେଇ (ଜାପାନିଜ୍ ଏନସେଫାଲାଇଟ୍ସ ତଥା ମସ୍ତିଷ୍କ ପ୍ରଦାହ) ରୋଗରେ ଜିଲ୍ଲାରେ ଶତାଧିକ ଶିଶୁଙ୍କର ମୃତ୍ୟୁ ଘଟିଥିଲା ।

ସ୍ୱତନ୍ତ୍ର ଡାକ୍ତରୀ ଟିମଙ୍କ ଚିକିତ୍ସା ଫଳରେ ସେତେବେଳେ ରୋଗ ନିୟନ୍ତ୍ରଣକୁ ଆସିଥିଲେ ମଧ୍ୟ ଆଦିବାସୀମାନେ ଏବେ ବି ଡାକ୍ତରୀ ଚିକିତ୍ସା ପରିବର୍ତ୍ତେ ଗୁଣିଗାରେଡ଼ି ଓ ଦିଶାରୀମାନଙ୍କ ଉପରେ ବେଶି ନିର୍ଭର କରୁଛନ୍ତି ।

ଏବେ ଦୁଇ ଦିନ ମଧ୍ୟରେ ୬ ଜଣ ଶିଶୁଙ୍କ ମୃତ୍ୟୁ ହେବା ପରେ ଲୋକମାନେ ଦିଶାରୀମାନଙ୍କ ପାଖକୁ ଦୌଡ଼ବା ଆରମ୍ଭ କରିଥିବା ଦେଖିବାକୁ ମିଳିଛି ।

ଜିଲ୍ଲା ମୁଖ୍ୟ ସ୍ୱାସ୍ଥ୍ୟ ଅଧିକାରୀ ଡା ଅଜୟକୁମାର ବୌଠାରୁ ସ୍ୱତନ୍ତ୍ର ଡାକ୍ତରୀ ଦଳ ନେଇ ଗ୍ରାମରେ ଆକ୍ରାନ୍ତ ଶିଶୁମାନଙ୍କ ରକ୍ତ ନମୁନା ସଂଗ୍ରହ କରି ପରୀକ୍ଷା ପାଇଁ ଭୁବନେଶ୍ୱର ପଠାଇଛନ୍ତି ।

ଡାକ୍ତରୀ ଟିମ୍ ଗ୍ରାମରେ ଏବେ କ୍ୟାମ୍ପ୍ କରି ରହିଛନ୍ତି । ତେବେ ଏହା କୌଣସି ଭୟାନକ ରୋଗ ନୁହେଁ ବରଂ ଥଣ୍ଡାରୁ ନିମୋନିଆରେ ଆକ୍ରାନ୍ତ ହୋଇ ଶିଶୁମାନଙ୍କ ମୃତ୍ୟୁ ହୋଇଥିବା ସେ କହିଛନ୍ତି ।

ଶିଶୁମାନଙ୍କୁ ବିଳମ୍ବରେ ଡାକ୍ତରଖାନା ଅଣାଯାଉଥିବାରୁ ଏଭଳି ସ୍ଥିତି ହେଉଥିବା ସେ କହିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୮ (ଲୋକାଲ ୱାୟାର): ରାଜଧାନୀ ଭୁବନେଶ୍ୱରର ଖଣ୍ଡଗିରି ଥାନାଞ୍ଚଳରେ ଗୁରୁବାର ସନ୍ଧ୍ୟାରେ ଅପରାଧୀଙ୍କ ଗୁଳିମାଡ଼ରେ ପୁଅର ମୃତ୍ୟୁ ହୋଇଥିବା ବେଳେ ବାପା ଗୁରୁତର ଆହତ ହୋଇ ଡାକ୍ତରଖାନାରେ ଚିକିତ୍ସିତ ହେଉଥିବା ସ୍ଥାନୀୟ ପୁଲିସ କହିଛି ।

ପ୍ରାଥମିକ ତଦନ୍ତରୁ ଏହି ଘଟଣା ବ୍ରାଉନସୁଗର କାରବାରକୁ କେନ୍ଦ୍ର କରି ହୋଇଥିବା ଅନୁମାନ କରାଯାଉଥିବା ଜଣେ ପୁଲିସ ଅଫିସର କହିଛନ୍ତି ।

ଗୁଳିମାଡ଼ରେ ଅନିଲ ଜେନା ନାମକ ଯୁବକ ପ୍ରାଣ ହରାଇଥିବା ବେଳେ ବାପା ଅଭିମନ୍ୟୁ ଜେନା ଆହତ ହୋଇଛନ୍ତି ।

ଏହି ଥାନାଞ୍ଚଳ ସରକନ୍ତାର ଗ୍ରାମର ଭରତ ଓରଫ ବାପି ଓ ବାହାଦଲପୁରର ହାପି ଦୀର୍ଘ ଦିନ ଧରି ଉକ୍ତ ଅଞ୍ଚଳରେ ବିଭିନ୍ନ ଯୁବକଙ୍କ ଜରିଆରେ ବ୍ରାଉନ ସୁଗର ବିକ୍ରି କରୁଥିବା ଅଭିଯୋଗ ହୋଇ ଆସୁଥିଲା ।

ଏହାକୁ ଅନିଲ କ୍ରମାଗତ ବିରୋଧ କରି ଆସୁଥିଲେ । ତେଣୁ ତାଙ୍କୁ ବିଭିନ୍ନ ସମୟରେ ବାପି ଓ ହାପି ଧମକ ମଧ୍ୟ ଦେଉଥିଲେ । ଏହାସତ୍ତେ୍ୱ ଅନିଲ ନିଶା ବେପାର ବିରୋଧରେ ଲୋକଙ୍କୁ ସଙ୍ଗଠିତ କରୁଥିଲେ ।

ଗୁରୁବାର ମଧ୍ୟ ଅନିଲ କିଛି ଯୁବକଙ୍କୁ ନିଶା ବିରୋଧରେ ବୁଝାଇଥିଲେ । ସନ୍ଧ୍ୟା ସମୟରେ ସେ ଗ୍ରାମ ମନ୍ଦିର ପାଖ ଦୋକାନରେ ବସିଥିବା ବେଳେ ହାପି ଓ ବାପି ଏକ ବାଇକରେ ପହଞ୍ଚି ତାଙ୍କ ଉପରକୁ ଅଚାନକ ଗୁଳିମାଡ଼ କରିଥିଲେ ।

ଏହା ଦେଖି ମନ୍ଦିରରେ ଥିବା ବାପା ଅଭିମନ୍ୟୁ ଦୌଡ଼ି ଆସିବାରୁ ତାଙ୍କ ଗୋଡ଼କୁ ମଧ୍ୟ ଗୁଳିମାଡ଼ କରିଥିଲେ । ଘଟଣା ପରେ ଅପରାଧୀ ଦ୍ୱୟ ବାଇକ ଛାଡ଼ି ଚମ୍ପଟ ମାରିଥିଲେ ।

ଆହତ ବାପା-ପୁଅଙ୍କୁ ଡାକ୍ତରଖାନା ନିଆଯାଇଥିଲା । ସେଠାରେ ଡାକ୍ତର ଅନିଲଙ୍କୁ ମୃତ ଘୋଷଣା କରିଥିଲେ । ଘଟଣାସ୍ଥଳକୁ ବାଇକ ଜବତ ହୋଇଛି ଏବଂ ତଦନ୍ତ ଚାଲିଛି ବୋଲି କହିଛନ୍ତି ଜଣେ ବରିଷ୍ଠ ପୁଲିସ ଅଫିସର ।

ଲୋକାଲ ୱାୟାର

କଟକ,ନଭେମ୍ବର ୮ (ଲୋକାଲ ୱାୟାର): ବିଶିଷ୍ଟ ତବଲା ବାଦକ ଚନ୍ଦ୍ରକାନ୍ତ ମୁଖିଙ୍କର ଅଲିଶା ବଜାରସ୍ଥିତ ବାସଭବନରେ ମଙ୍ଗଳବାର ଦିନ ପରଲୋକ ଘଟିଥÒବା ପରିବାର ଲୋକଙ୍କ ଠାରୁ ଜଣାପଡିଛି୤ ମୃତ୍ୟୁ ବେଳକୁ ତାଙ୍କୁ ୮୬ ବର୍ଷ ବୟସ ହୋଇଥିଲା୤ ମୃତ୍ୟୁ ଶଯ୍ୟା ନିକଟରେ ତାଙ୍କର ୪ ଝିଅ, ଜ୍ୱାଇଁ, ବୋହୂ, ନାତି, ନାତୁଣୀ ଓ ପରିବାର ବର୍ଗ ଉପସ୍ଥିତ ଥିଲେ ।

ତାଙ୍କର ମୃତ୍ୟୁ ଖବର ପ୍ରଚାରିତ ହେବା ପରେ କଳାକାର ମହଲ ଓ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଥିଲା ।

ସ୍ୱର୍ଗତ ମୁଖି କୋଲକାତାରେ କଳାକାର ଜୀବନ ଆରମ୍ଭ କରିଥିଲେ ।

ମୁମ୍ବାଇସ୍ଥିତ ଅଖିଳ ଭାରତ ଗାନ୍ଧର୍ବ ବିଶ୍ୱବିଦ୍ୟାଳୟରୁ ତବଲାରେ ସେ ବିଶାରଦ ଡିଗ୍ରୀ ହାସଲ କରିଥିଲେ ।

ଏହାପରେ ସେ ଦୂରଦର୍ଶନ ଓ ଆକାଶବାଣୀ କେନ୍ଦ୍ରର ଜଣେ ସ୍ବୀକୃତପ୍ରାପ୍ତ କଳାକାର ଭାବେ ଯୋଗ ଦେଇଥିଲେ ।

ତାଙ୍କର ଉଲ୍ଲେଖନୀୟ ଯନ୍ତ୍ର ସଙ୍ଗୀତ ପାଇଁ ସେ ବହୁ ଅନୁଷ୍ଠାନ ପକ୍ଷରୁ ସମ୍ମାନୀତ ହୋଇଥିଲେ।

ନ୍ୟାସନାଲ ମ୍ୟୁଜିକ ଆସୋସିଏସନର ଅଧ୍ୟକ୍ଷ ଭାବେ ମଧ୍ୟ ସେ ଦାୟିତ୍ୱ ଗ୍ରହଣ କରି ସୂଚାର ରୂପେ କାର୍ଯ୍ୟ ସମ୍ପାଦନ କରିଥିଲେ ।

ବିଶିଷ୍ଟ ସଙ୍ଗୀତଜ୍ଞ ଅକ୍ଷୟ ମହାନ୍ତି, ପ୍ରଫୁଲ୍ଲ କର, ସୁନନ୍ଦା ପଟ୍ଟନାୟକ, ସୁବାଶ ଦାଶ, ହରିପ୍ରସାଦ ଚୌରାସିଆ ଓ ହରମୋହନ ଖୁଣ୍ଟିଆଙ୍କ ବିଭିନ୍ନ କାର୍ଯ୍ୟକ୍ରରେ ସେ ତବଲା ବାଦକ ଭାବେ ସେ ନିଜର ଏକ ସ୍ବତନ୍ତ୍ର କରିଚୟ ସୃଷ୍ଟି କରିପାରିଥିଲେ ।

ଲୋକାଲ ୱାୟାର

ଅନୁଗୁଳ,ନଭେମ୍ବର ୦୭ (ଲୋକାଲ ୱାୟାର) ଆଜମେରରୁ ପୁରୀ ଯାଉଥିବା ଟ୍ରେନରେ ଅନୁଗୁଳ ଜିଲ୍ଲା ହଣ୍ଡପା ଷ୍ଟେସନ ନିକଟରେ ଇଞ୍ଜିନରେ ଗୁରୁବାର ନିଆଁ ଲାଗିଥିବା ବେଳେ ଦମକଳ ବାହିନୀତାକୁ ତୁରନ୍ତ ଆୟତ୍ତ କରିଥିବା ଜଣେ ସ୍ଥାନୀୟ ଅଧିକାରୀ କହିଛନ୍ତି।

ଏହି ଅଗ୍ନିକାଣ୍ଡରେ ବିଶେଷ କ୍ଷୟକ୍ଷତି ହୋଇ ନଥିବା ଜଣାପଡିଛି। କେଉଁ କାରଣରୁ ନିଆଁ ଲାଗିଲା ତାହା ଜଣାପଡି ନଥିବା ସେ କହିଛନ୍ତି ।

ଅନ୍ୟ ଏକ ଇଞ୍ଜିନ ସାହାଯ୍ୟରେ ଉକ୍ତ ଟ୍ରେନ ନିଜ ଗନ୍ତବ୍ଯସ୍ଥଳ ଅଭିମୁଖେ ଯାତ୍ରା କରିଥିବା ସେ କହିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୬(ଲୋକାଲ ୱାୟାର): ଶିକ୍ଷା ଓ ଅନୁସନ୍ଧାନ (ଡିମଡ ଟୁ ବି ୟୁନିଭର୍ସିଟି) ପରିଚାଳିତ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ଆଣ୍ଡ ସମ୍ ହସ୍ପିଟାଲ୍ ଡାକ୍ତରଙ୍କର ଆଉ ଏକ ବଡ଼ ସଫଳତା ।

ଜଟିଳ ଅସ୍ତ୍ରୋପଚାର ଜରିଆରେ ୧୮ ବର୍ଷୀୟ ଯୁବକଙ୍କୁ ସମ୍ପୂର୍ଣ୍ଣ ସୁସ୍ଥ କଲେ ଡାକ୍ତର ।

ସମ୍ ହସ୍ପିଟାଲର ସର୍ଜିକାଲ୍ ଗ୍ୟାଷ୍ଟ୍ରୋଲୋଜି ବିଭାଗର ମୁଖ୍ୟ ତଥା ଆସୋସିଏଟ୍ ପ୍ରଫେସର ଡକ୍ଟର ପ୍ରେମାନନ୍ଦ ପଟ୍ଟନାୟକ ସଫଳ ଅସ୍ତ୍ରୋପଚାର ଜରିଆରେ ଛତିଶଗଡ଼ର ଯୁବକଙ୍କୁ ରୋଗମୁକ୍ତ କରିଛନ୍ତି ।

ଛତିଶଗଡ଼ର ୧୮ ବର୍ଷୀୟ ଗରିବ ପରିବାରର ଯୁବକ ଦୁଇ ବର୍ଷ ତଳେ ଭୁଲବଶତଃ ସାବୁନ୍ ତିଆରି ପାଇଁ ବ୍ୟବହୃତ କେମିକାଲ୍ ସଲ୍ୟୁସନକୁ ପିଇ ଦେଇଥିଲେ ।

ଏହା ଫଳରେ ତାଙ୍କର ଖାଦ୍ୟ ନଳୀ ଗୁରୁତର ଭାବେ ନଷ୍ଟ ହୋଇଯାଇଥିଲା । ସେ କୌଣସି ପ୍ରକାର ଖାଦ୍ୟ ଏପରିକି ଛେପ ଢୋକିବାରେ ମଧ୍ୟ ସମର୍ଥ ହୋଇପାରୁ ନ ଥିଲେ । କେବଳ ଫୁଡପାଇପ୍ ଜରିଆରେ ତରଳ ପଦାର୍ଥ ଶରୀରକୁ ନେଉଥିଲେ ।

ଖାଦ୍ୟ ଗ୍ରହଣ କରିବାରେ ଅସମର୍ଥ ଏହି ଯୁବକ ଧୀରେ ଧୀରେ ସମ୍ପୂର୍ଣ୍ଣ ଦୁର୍ବଳ ହେବାକୁ ଲାଗିଥିଲେ ।

ଶେଷରେ ସେ ଗତ ମାସ ସମ୍ ହସ୍ପିଟାଲରେ ଭର୍ତ୍ତି ହୋଇଥିଲେ । ପରୀକ୍ଷା ନିରୀକ୍ଷା ପରେ ଡକ୍ଟର ପଟ୍ଟନାୟକ ତାଙ୍କର ଅପରେସନ୍ ପାଇଁ ନିଷ୍ପତ୍ତି ନେଇଥିଲେ ।

କୋଲନ୍ ପୁଲଅପ୍ ସର୍ଜରୀ ମାଧ୍ୟମରେ ଲାର୍ଜ ଇଣ୍ଟେଷ୍ଟାଇନ ର କିଛି ଅଂଶକୁ ନେଇ ଉପର ଅଂଶରେ ଯୋଡ଼ି ଖାଦ୍ୟନଳୀ ତିଆରି କରିଥିଲେ । ଆଠ ଘଣ୍ଟା ଧରି ଚାଲିଥିବା ଏହି ଅପରେସନ୍ କଷ୍ଟସାଧ୍ୟ ଥିଲା ।

ଅସ୍ତ୍ରୋପଚାର ପରେ ବର୍ତ୍ତମାନ ରୋଗୀଟି ସମ୍ପୂର୍ଣ୍ଣ ସୁସ୍ଥ ଅଛି ଏବଂ ଖାଦ୍ୟ ଗ୍ରହଣ କରିବାରେ ସମର୍ଥ ହୋଇପାରିଛି ।

ଏହି ଅପରେସନରେ ଡକ୍ଟର ପଟ୍ଟନାୟକଙ୍କ ସମେତ ଡକ୍ଟର ସୁମିତ ମହାନ୍ତି, ଡକ୍ଟର ସତ୍ୟପ୍ରକାଶ ରାୟ ଚୌଧୁରୀ ଏବଂ ନିଶ୍ଚେତକ ଡକ୍ଟର ଶାଶ୍ୱତ ପଟ୍ଟନାୟକ ସହଯୋଗ କରିଥିଲେ ।

ସୁସ୍ଥ ହେବା ପରେ ସେ ଏକ ନୂଆ ଜୀବନ ପାଇଲେ ବୋଲି ସମ୍ପୃକ୍ତ ଯୁବକ କହିଛନ୍ତି ।

ଲୋକାଲ ୱାୟାର

ଝାରସୁଗୁଡ଼ା, ନଭେମ୍ବର ୬(ଲୋକାଲ ୱାୟାର): ଝାରସୁଗୁଡ଼ା ଜିଲ୍ଲାର ବ୍ରଜରାଜନଗରଠାରେ କେତେକ ଦୁର୍ବୃତ୍ତଙ୍କ ଗୁଳିମାଡ଼ରେ ଜଣେ ଯୁବକଙ୍କ ମୃତ୍ୟୁ ହୋଇଥିବା ସ୍ଥାନୀୟ ପୁଲିସ ବୁଧବାର ସୂଚନା ଦେଇଛି ।

ମୃତ ଯୁବକଙ୍କ ନାମ ମଣ୍ଟୁ ଘୋଷ (୩୨) ଏବଂ ସେ ଏକ ହତ୍ୟା ମାମଲାରେ ଏବେ ଜେଲରେ ଥିବା କୁଖ୍ୟାତ ଅପରାଧୀ ସୋନୁ ଘୋଷର ଭାଇ ବୋଲି ପୁଲିସ କହିଛି ।

ମଙ୍ଗଳବାର ରାତି ପ୍ରାୟ ୮ଟାରେ ମଣ୍ଟୁ ସବୁ ଦିନ ଭଳି ବ୍ରଜରାଜନଗର ବଜାରରେ ଥିବା ଲକ୍ଷ୍ମୀ କାଫେକୁ ଜଳଖିଆ ଖାଇବାକୁ ଆସିଥିଲେ ।

ଖାଇସାରି ସେ ବିଲ୍ ଦେଉଥିବା ବେଳେ ଅଚାନକ ଦୁଇ ଜଣ ଯୁବକ ପହଞ୍ଚି ତାଙ୍କ ମୁଣ୍ଡକୁ ଲକ୍ଷ୍ୟ କରି ଦୁଇ ରାଉଣ୍ଡ ଗୁଳିମାଡ଼ କରି ଚମ୍ପଟ ମାରିଥିଲେ ।

ମଣ୍ଟୁଙ୍କୁ ଗୁରୁତର ଅବସ୍ଥାରେ ଏମସିଏଲ୍ କେନ୍ଦ୍ରୀୟ ଚିକିତ୍ସାଳୟକୁ ନିଆଯାଇଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

ମଣ୍ଟଙ୍କ ନାମରେ ମଧ୍ୟ ବିଭିନ୍ନ ଥାନାରେ ମାମଲା ରହିଛି । କିଛି ଦିନ ତଳେ ବ୍ରଜରାଜନଗରରେ ଅମିତ ଧଳ ନାମକ ଯୁବକଙ୍କୁ ହତ୍ୟା କରାଯାଇଥିଲା ।

ଏହି ମାମଲାରେ ସୋନୁ ଘୋଷ ଗିରଫ ହୋଇ ଜେଲରେ ଅଛି । ତେବେ ସୋନୁଙ୍କ ଅନୁପସ୍ଥିତିରେ ତାଙ୍କ ଗ୍ୟାଙ୍ଗର କାରବାର ମଣ୍ଟୁ ବୁଝାସୁଝା କରୁଥିଲେ ।

ସୋନୁଙ୍କ ବିରୋଧ ପକ୍ଷ ତାଙ୍କୁ ହତ୍ୟା କରିଥାଇପାରନ୍ତି ବୋଲି ଜଣେ ପୁଲିସ ଅଫିସର କହିଛନ୍ତି ।

ଲୋକାଲ ୱାୟାର

ନବରଙ୍ଗପୁର,ନଭେମ୍ବର ୦୫(ଲୋକାଲ ୱାୟାର): ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ପିଲା ଜନ୍ମ ଦେଇ ସାରିଲା ପରେ ଜଣେ ମହିଳା ଡାକ୍ତରଖାନାର ଦ୍ଵିତୀୟ ମହଲାରୁ ଡେଇଁ ମୃତ୍ୟୁ ମୁଖରେ ପଡିଥିବା ମଙ୍ଗଳବାର ଜଣେ ପୁଲିସ ଅଧିକାରୀ କହିଛନ୍ତି ।

ସେ ମାନସିକ ଭାରସାମ୍ୟ ହରାଇଥିବା ସନ୍ଦେହ କରାଯାଇଥିବା ବେଳେ ପୁଲିସ ଏହାର ତଦନ୍ତ କରୁଛି।

ଡାବୁଗାଁ ବ୍ଲକ ଡଙ୍ଗରା ଗାଁର ଧର୍ମୁ ଭଦ୍ରାଙ୍କ ସ୍ତ୍ରୀ ଜେମାଙ୍କ ଗର୍ଭ ଯନ୍ତ୍ରଣା ହେବାରୁ ତାଙ୍କୁ ୩୧ ତାରିଖରେ ନବରଙ୍ଗପୁର ଜିଲ୍ଲା ମୁଖ୍ୟ ଡାକ୍ତରଖାନାରେ ପରିବାର ଲୋକେ ଭର୍ତ୍ତି କରିଥିଲେ ଏବଂ ଅସ୍ତ୍ରୋପଚାର ପରେ ତାଙ୍କର ଏକ ପୁତ୍ର ସନ୍ତାନ ଜନ୍ମ ହୋଇଥିଲା।

ଅସ୍ତ୍ରୋପଚାର ପରେ ତାଙ୍କ ସ୍ୱାସ୍ଥ୍ୟ ଅବସ୍ଥା ଠିକ୍‌ ଥିଲା ।

ତେବେ ଅପରାହ୍ନରେ ମେଡିକାଲ୍‌ର ଦ୍ୱିତୀୟ ମହଲାରୁ ସେ ଡେଇଁବାକୁ ଯାଉଥିବା ଦେଖି ତାଙ୍କ ଶାଶୂ ଅଟକାଇବାକୁ ଚେଷ୍ଟା କରି ବିଫଳ ହୋଇଥିଲେ।

ଫଳରେ ଜେମାଙ୍କ ମୃତ୍ୟୁ ଘଟିଥିଲା । ପୁଲିସ ମୃତଦେହ ଜବତ କରିଛି।

ଲୋକାଲ ୱାୟାର

ମାଲକାନଗିରି, ନଭେମ୍ବର ୨ (ଲୋକାଲ ୱାୟାର): ମାଲକାନଗିରି ଜିଲ୍ଲା ମାଥିଲି ଥାନା ଅନ୍ତର୍ଗତ ମାଳିଗୁଡ଼ା ଗାଁରେ ଗୁଣି ଗାରେଡ଼ି ସନ୍ଦେହରେ ବାପପୁଅଙ୍କୁ ହତ୍ୟା କରାଯାଇଥିବା ଶନିବାର ଅଭିଯୋଗ ହୋଇଛି।

ମାଥିଲି ଥାନା ଆଇଆଇସି ଜନ୍ କୁଜୁରଙ୍କ ସୂଚନା ଅନୁସାରେ, ଗତକାଲି ବିଳମ୍ବିତ ରାତିରେ ଗାଁର ଦୁଇ ଜଣ ବ୍ୟକ୍ତି ଗୁଣି ଗାରେଡ଼ି ସନ୍ଦେହରେ ସଦନ ମାଳି ଓ ତାଙ୍କ ପୁଅ ନୀଳାଦ୍ରି ମାଳିଙ୍କୁ ପିଟି ପିଟି ହତ୍ୟା କରିଛନ୍ତି।

ହତ୍ୟାକାଣ୍ଡ ପରେ ଦୁଇ ଅଭିଯୁକ୍ତ ମାଥିଲି ଥାନାରେ ଆସି ଆତ୍ମସମର୍ପଣ କରିଛନ୍ତି।

ସେପଟେ ଗାଁ ମୁଣ୍ଡ ନଦୀକୂଳରୁ ବାପପୁଅଙ୍କ ମୃତଦେହ ମିଳିଥିବାବେଳେ ପୁଲିସ ତଦନ୍ତ ଚଳାଇଛି।

ସୂଚନାଯୋଗ୍ୟ, ସଦନଙ୍କ ପରିବାର ଗୁଣି ଗାରେଡ଼ି କରୁଥିବା ସନ୍ଦେହରେ ଗାଁଲୋକ ସେମାନଙ୍କୁ ବାସନ୍ଦ କରିଦେଇଥିଲେ।

ଲୋକାଲ ୱାୟାର

ପାଲଲହଡ଼ା, ନଭେମ୍ବର ୨ (ଲୋକାଲ ୱାୟାର): ଅନୁଗୁଳ ଜିଲ୍ଲା ପାଲଲହଡା ଥାନା ଅନ୍ତର୍ଗତ ସିଡିଙ୍ଗ ଗାଁରେ ଶନିବାର ବଡ଼ଭାଇର ମୃତଦେହ ଦେଖି ସାନଭାଇ ପ୍ରାଣ ହରାଇବା ଘଟଣା ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି କରିଛି।

ସୂଚନା ଅନୁସାରେ, ଗାଁର ଦୀପକ ପାଲ କ୍ୟାନସରରେ ପୀଡିତ ହୋଇ କଟକରେ ଚିକିତ୍ସିତ ହେଉଥିଲେ ଓ ସେଠାରେ ତାଙ୍କର ମୃତ୍ୟୁ ହେବା ପରେ ଗତକାଲି ସନ୍ଧ୍ୟାରେ ତାଙ୍କ ମୃତଦେହ ଗାଁକୁ ଅଣା ଯାଇଥିଲା ।

ସେଠାରେ ଦୀପକଙ୍କ ମୃତଦେହ ଦେଖି ତାଙ୍କ ସାନଭାଇ ତ୍ରିମୂଳ କାନ୍ଦି କାନ୍ଦି ଅଚେତ ହୋଇଯାଇଥିଲେ ଓ ତାଙ୍କୁ ପାଲଲହଡା ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା ।

ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

ଶନିବାର ଏକାଠି ଦୁଇ ଭାଇଙ୍କ ଶବ ସତ୍କାର କରା ଯାଇଛି ।

ଲୋକାଲ ୱାୟାର

ତାଳଚେର, ନଭେମ୍ବର ୧ (ଲୋକାଲ ୱାୟାର): ସ୍ଥାନୀୟ ବିଧାୟକ ବ୍ରଜକିଶୋର ପ୍ରଧାନଙ୍କ ବାସଭବନରେ ଦୁର୍ବୃତ୍ତମାନେ ନିଆଁ ଲଗାଇବା ଉଦ୍ୟମ କରିଥିବା ଶୁକ୍ରବାର ଅଭିଯୋଗ ହୋଇଛି।

ବ୍ରଜକିଶୋରଙ୍କ ଭାଇ ରାଜକିଶୋର ପ୍ରଧାନ ଏନେଇ ଥାନାରେ ଅଭିଯୋଗ କରିଛନ୍ତି।

ରାଜକିଶୋରଙ୍କ ସୂଚନା ଅନୁସାରେ, ଗତକାଲି ବିଳମ୍ବିତ ରାତିରେ ଦୁର୍ବୃତ୍ତମାନେ ବ୍ରଜ କିଶୋର ପ୍ରଧାନଙ୍କ ହାଣ୍ଡିଧୂଆଁସ୍ଥିତ ପୈତୃକ ବାସଭବନ ଆସି ତାଙ୍କ ବାପା ଶୋଇଥିବା କୋଠରୀର ଝରକାରେ ଟାୟାର ଓ କିରୋସିନ ଢାଳି ନିଆଁ ଲଗାଇ ଦେଇଥିଲେ ।

ତେବେ ଜଳନ୍ତା ଟାୟାରଟି ତଳେ ପଡିଯିବାରୁ ଝରକାରେ ନିଆଁ ଲାଗି ପାରିନଥିଲା ଓ ଏକ ବଡ଼ ଧରଣର ଅଗ୍ନିକାଣ୍ଡରୁ ତାଙ୍କ ଘର ଓ ବାପା ବର୍ତ୍ତି ଯାଇଥିଲେ।

ରାଜନୈତିକ ଶତ୍ରୁତା କିମ୍ବା କୋଇଲା ମାଫିଆମାନେ ଉଦ୍ଦେଶ୍ୟମୂଳକ ଭାବେ ଏଭଳି କାଣ୍ଡ ଭିଆଇଥିବା ରାଜକିଶୋର ଅଭିଯୋଗ କରିଥିବାବେଳେ ପୁଲିସ ଘଟଣାର ତଦନ୍ତ ଚଳାଇଛି।

ସୂଚନାଯୋଗ୍ୟ, ପୂର୍ବରୁ ବିଧାୟକ ବ୍ରଜ କିଶୋର ପ୍ରଧାନଙ୍କ ଭୁବନେଶ୍ୱରସ୍ଥିତ ବାସଭବନରେ ମଧ୍ୟ ନିଆଁ ଲଗାଇବା ଉଦ୍ୟମ ହୋଇଥିଲା ଓ ଏଥିରେ ଦୁଇଟି କାର, ବାଇକ୍ ସମେତ କିଛି ଆସବାବପତ୍ର ପୋଡି ଯାଇଥିଲା ।

ଲୋକାଲ ୱାୟାର

ଯାଜପୁର, ନଭେମ୍ବର ୧ (ଲୋକାଲ ୱାୟାର): ଯାଜପୁର ଜିଲ୍ଲା ହରିଦାସପୁର ପିଇଓ (ପଞ୍ଚାୟତ ଏକଜିକ୍ୟୁଟିଭ୍ ଅଫିସର) ସ୍ମିତାରାଣୀ ବିଶ୍ୱାଳଙ୍କ ମୃତ୍ୟୁ ଘଟଣାକୁ ନେଇ ରାଜନୀତି ଥମି ନଥିବା ବେଳେ ଶୁକ୍ରବାର ବିଜେପିର ଏକ ପ୍ରତିନିଧି ଦଳ ସ୍ମିତାରାଣୀଙ୍କୁ ପିତା ସଦାନନ୍ଦ ବିଶ୍ୱାଳଙ୍କୁ ଭେଟିଥିବା ଜଣାପଡ଼ିଛି ।

ବିରୋଧୀ ଦଳ ନେତା ପ୍ରଦୀପ୍ତ ନାୟକଙ୍କ ନେତୃତ୍ୱରେ ବିଷ୍ଣୁ ସେଠୀ, ସୁକାନ୍ତ ନାୟକ, ମୋହନ ମାଝୀ, ମୁକେଶ ମହାଲିଙ୍ଗା, ଗୋଲଖ ମହାପାତ୍ର, କାଳନ୍ଦୀ ସାମଲ ଏବଂ ଠାକୁର ରଞ୍ଜିତ ଦାସ ପ୍ରମୁଖ ନେତା ଶ୍ରୀ ବିଶ୍ୱାଳଙ୍କୁ ଭେଟି ଆଲୋଚନା କରିଛନ୍ତି ।

ଅପରପକ୍ଷରେ ଶ୍ରୀ ବିଶ୍ୱାଳ ନିଜ ଜୀବନ ପ୍ରତି ବିପଦ ଥିବା ଦର୍ଶାଇ ଓଡ଼ିଶା ଛାଡ଼ି ଦିଲ୍ଲୀରେ ଥିବା ପୁଅ ପାଖକୁ ଚାଲି ଯିବାକୁ ନିଷ୍ପତ୍ତି ନେଇଥିବା ଆଜି ଗଣମାଧ୍ୟମ ପ୍ରତିନିଧିଙ୍କୁ କହିଥିଲେ ।

ଏହାପୂର୍ବରୁ ମଧ୍ୟ ସ୍ମିତାରାଣୀଙ୍କ ସ୍ୱାମୀ ସୁଶିଲ ବିଶ୍ୱାଳ ଗତ ମାସ ୨୨ ତାରିଖରେ ଓଏଚଆରସିଙ୍କୁ ଭେଟି ପତ୍ନୀଙ୍କ ମୃତ୍ୟୁର ନିରପେକ୍ଷ ତଥା ସିବିଆଇ ତଦନ୍ତ ଦାବି କରିଥିଲେ ।

ଉଭୟ ବିଜେପି ଓ କଂଗ୍ରେସ ପକ୍ଷରୁ ମଧ୍ୟ ବାରମ୍ବାର ଏହି ଘଟଣାର ସିବିଆଇ ଏବଂ ହାଇକୋର୍ଟ ବିଚାରପତିଙ୍କ ଦ୍ୱାରା ତଦନ୍ତ ସକାଶେ ଦାବି ହୋଇ ଆସିଛି ।

ସ୍ମରଣଯୋଗ୍ୟ, ସ୍ମିତାରାଣୀ ଘଟଣା ଦିନ ହରିଦାସପୁରରେ ଭତ୍ତା ବଣ୍ଟନ କରିବା ପରେ ସ୍ଥାନୀୟ ଜନୈକା ସରପଞ୍ଚଙ୍କ ସ୍ୱାମୀ ରୂପେଶ ଭଦ୍ରାଙ୍କ ଅତିଥି ଭବନରେ ଆତ୍ମହତ୍ୟା କରିଥିବା ଅଭିଯୋଗ ହୋଇଥିଲା ।

ରୂପେଶଙ୍କୁ ପୁଲିସ ଗିରଫ କରିଥିଲେ ମଧ୍ୟ ଏହା ଏକ ହତ୍ୟାକାଣ୍ଡ ବୋଲି ଅଭିଯୋଗ ହୋଇ ଆସୁଛି । ଯାହାକୁ କି ସ୍ଥାନୀୟ ଏସପି ଚରଣ ସିଂ ମୀନା ଅସ୍ୱୀକାର କରିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୩୧(ଲୋକାଲ ୱାୟାର): ୨୦୧୨ ମସିହା ଏପ୍ରିଲ ୧ ତାରିଖରେ ରାଜଧାନୀର ଖଣ୍ଡଗିରି ଥାନାଞ୍ଚଳରେ ଜଣେ ଯୁବକଙ୍କୁ ପିଟିପିଟି ହତ୍ୟା କରିଥିବା ମାମଲାରେ ଭୁବନେଶ୍ୱର ଅତିରିକ୍ତ ସେସନ୍ସ ଜଜ୍ ଗୁରୁବାର ୧୦ ଜଣ ଅଭିଯୁକ୍ତଙ୍କୁ ଆଜୀବନ ଜେଲ୍ ଦଣ୍ଡାଦେଶ ଶୁଣାଇଥିବା ଜଣେ ବରିଷ୍ଠ ଆଇନଜୀବୀ ସୂଚନା ଦେଇଛନ୍ତି ।

ଘଟଣା ଦିନ ଥିଲା ଶ୍ରୀରାମନବମୀ । ସନ୍ଧ୍ୟାରେ ଘାଟିକିଆ ଅଞ୍ଚଳର ସନ୍ଦୀପ ନନ୍ଦ ଏକ ବାଇକରେ ଘରକୁ ଫେରୁଥିବା ବେଳେ ପୂର୍ବ ବିବାଦକୁ କେନ୍ଦ୍ର କରି ଅଭିଯୁକ୍ତମାନେ ତାଙ୍କୁ ମରଣାନ୍ତକ ଆକ୍ରମଣ କରିବା ସହ ତାଙ୍କ ଉପରେ ବାଇକ୍ ଚଢ଼ାଇ ଦେଇଥିବା ଅଭିଯୋଗ ହୋଇଥିଲା ।

ପରେ ଡାକ୍ତରଖାନାରେ ତାଙ୍କର ମୃତ୍ୟୁ ହୋଇ ଯାଇଥିଲା ।
ଏହି ଘଟଣାରେ ଅଭିଯୋଗ ହେବା ପରେ ପୁଲିସ ତଦନ୍ତ କରି ଅଭିଯୁକ୍ତମାନଙ୍କୁ ଗିରଫ କରିଥିଲା ।

ମାମଲାରେ ପୁଲିସ ତଦନ୍ତ ପରେ ପ୍ରାୟ ଦେଢ଼ ଶହ ପୃଷ୍ଠାର ଚାର୍ଜ ସିଟ୍ କୋର୍ଟରେ ଦାଖଲ କରିଥିଲା ।

୧୨ ଜଣଙ୍କ ସାକ୍ଷ୍ୟ ପ୍ରମାଣ ଆଧାରରେ ବିଚାରପତି ଅଭିଯୁକ୍ତମାନଙ୍କୁ ୧୦ ବର୍ଷ ଜେଜଲ୍ ଓ ୧୦ ହଜାର ଟଙ୍କା ଲେଖାଏଁ ଦଣ୍ଡାଦେଶ ଶୁଣାଇଛନ୍ତି ।

ଆସାମୀ ମାନେ ହେଲେ ଘାଟିକିଆ ଗାଁର ମୁଖ୍ୟ ଅଭିଯୁକ୍ତ ଅଶୋକ ବାଉତ(୩୫), ଆଶିଷ କୁମାର ବେହେରା (୨୬), ଶୈଳେନ୍ଦ୍ର ସାମନ୍ତ ରାୟ (୪୧), ପ୍ରଭାତ ରଞ୍ଜନ ବେହେରା (୩୪), ତ୍ରିଲୋଚନ ବେହେରା (୩୪), ଛବିନ୍ଦ୍ର ବେହେରା (୩୭), ସୁନିଲ୍ କୁମାର ସାମନ୍ତରାୟ (୩୬), ଘନଶ୍ୟାମ ବାଉତ (୩୮), ପ୍ରକାଶ ଚନ୍ଦ୍ର ବେହେରା (୩୪) ଏବଂ ବିଷ୍ଣୁ ପ୍ରସାଦ ବେହେରା (୩୫) । ସରକାରଙ୍କ ପକ୍ଷରୁ ମାମଲା ପରିଚାଳନା କରିଥିଲେ ସୁରେନ୍ଦ୍ର କୁମାର ବାରିକ୍ ଏବଂରଞ୍ଜିତ ମହାପାତ୍ର ।

ଲୋକାଲ ୱାୟାର

ବାଲେଶ୍ଵର, ଅକ୍ଟୋବର ୩୧ (ଲୋକାଲ ୱାୟାର) ବାଲେଶ୍ୱର ଜିଲ୍ଲା ନୀଳଗିରି ଥାନା ଅନ୍ତର୍ଗତ ପୋଡ଼ାଶୂଳ ଅଞ୍ଚଳରେ ୩୩ କେଭି ବିଦ୍ୟୁତ ତାର ସଂସ୍ପର୍ଶରେ ଆସି ଗୁରୁବାର ଜଣଙ୍କର ମୃତ୍ୟୁ ଘଟିଛି

ମୃତକ ଜଣକ ହେଲେ ସ୍ଥାନୀୟ ଅଞ୍ଚଳର ଦୟାନିଧି ଶତପଥୀ ।

ସେ କଦଳୀ ଗଛ ପୋତୁଥିବାବେଳେ ବାଡି ଭିତର ଦେଇଯାଇଥିବା ୩୩ କେଭି ଲାଇନ ସଂସ୍ପର୍ଶରେ ଆସି ପଡିଯାଇଥିଲେ ।

ସେଠାରୁ ତାଙ୍କୁ ତୁରନ୍ତ ନୀଳଗିରି ହସ୍ପିଟାଲକୁ ଅଣାଯାଇଥିଲା।

ମାତ୍ର ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିବା ଜଣାପଡିଛି ।

ଲୋକାଲ ୱାୟାର

ନବରଙ୍ଗପୁର, ଅକ୍ଟୋବର ୩୦ (ଲୋକାଲ ୱାୟାର): ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ଅନ୍ତର୍ଗତ ମହେନ୍ଦ୍ରୀ ଛକ ନିକଟରେ ବୁଧବାର ଏକ ଘରୋଇ ଯାତ୍ରୀବାହୀ ବସ ଯାଉଥିବା ସମୟରେ ରାସ୍ତା ଉପରେ ଚାରିଟି ଚକ ବାହାରିପଡିଥିବା ସୂଚନା ମିଳିଛି।

ଏମ.ଏସ.ବି ନାମକ ଏକ ଘରୋଇ ଯାତ୍ରୀବାହୀ ବସ ଉମରକୋଟରୁ ନବରଙ୍ଗପୁର ଅଭିମୁଖେ ଯାଉଥିବା ବେଳେ ୩୯ ନମ୍ବର ରାଜପଥ ଉପରେ ଗାଡିର ଚକ ବାହାରି ପଡିଥିଲା ।

ଫଳରେ ଗାଡିଟି ଭାରସାମ୍ୟ ହରାଇ ରାସ୍ତାକଡ଼କୁ ଚାଲିଯାଇଥିଲା।

ଗାଡିଟି ସାମ୍ଭାବ୍ୟ ଦୁର୍ଘଟଣାରୁ ବର୍ତ୍ତି ଯାଇଥିବାବେଳେ ସେଥିରେ ଥିବା ସମସ୍ତ ଯାତ୍ରୀ ସୁରକ୍ଷିତ ଥିବା ସୂଚନା ମିଳିଛି।

ଲୋକାଲ ୱାୟାର

ପାରାଦୀପ, ଅକ୍ଟୋବର ୩୦(ଲୋକାଲ ୱାୟାର): ପାରାଦୀପ ବନ୍ଦର ପି.ଆଇ.ସି.ଟି. ବର୍ଥରେ ଦୁର୍ଘଟଣା ଘଟି ଜଣେ ଶ୍ରମିକ ଗୁରୁତର ହେବା ନେଇ ବୁଧବାର ସେଠାରେ ଶ୍ରମିକ ଅଶାନ୍ତି ଦେଖାଦେଇଛି।

ସୂଚନା ଅନୁସାରେ, ମନୋଜ ମଲିକ ନାମକ ଶ୍ରମିକଜଣକ ପି.ଆଇ.ସି.ଟି. ବର୍ଥରେ କାମ କରୁଥିବାବେଳେ ଏଥିରେ ଦୁର୍ଘଟଣା ଘଟି ତାଙ୍କ ବାମ ଗୋଡ଼ କଟିଯାଇଛି।

ବାରମ୍ବାର ବର୍ଥରେ ଏଭଳି ଦୁର୍ଘଟଣା ଘଟୁଥିବା ଦର୍ଶାଇ ଶତାଧିକ ଶ୍ରମିକ ଫାଟକରେ ତାଲା ପକାଇ ଟାୟାର ଜାଳି ରାସ୍ତା ଅବରୋଧ କରିଛନ୍ତି।

ଫଳରେ ବନ୍ଦରର ନିଷିଦ୍ଧାଞ୍ଚଳରେ ଥିବା ପି.ଆଇ.ସି.ଟି. ବର୍ଥରେ କାର୍ଯ୍ୟ ସଂପୂର୍ଣ୍ଣ ବାଧାପ୍ରାପ୍ତ ହୋଇଛି।

ବନ୍ଦର କର୍ତ୍ତୃପକ୍ଷ ଶ୍ରମିକଙ୍କ ସୁରକ୍ଷା ପ୍ରତି ଦୃଷ୍ଟି ଦେଉନଥିବା ଆନ୍ଦୋଳନକାରୀମାନେ ଅଭିଯୋଗ କରିଛନ୍ତି।

ଲୋକାଲ ୱାୟାର

ଜଗତସିଂହପୁର, ଅକ୍ଟୋବର ୨୯(ଲୋକାଲ ୱାୟାର): ଜଗତସିଂହପୁର ଜିଲ୍ଲାର ଏରସମା ଡାକ୍ତରଖାନାରେ ମଙ୍ଗଳବାର ଦୁର୍ଘଟଣାରେ ଆହତ ହୋଇଥିବା ଜଣେ ଯୁବକଙ୍କୁ ଠିକ୍ ସମୟରେ ଅକ୍ସିଜେନ୍ ଦିଆ ନଯିବାରୁ ତାଙ୍କର ମୃତ୍ୟୁ ହୋଇଥିବା ପରିବାର ପକ୍ଷରୁ ଅଭିଯୋଗ କରାଯାଇଛି ।

ଏରସମା-ଚଟୁଆ ରାସ୍ତା ପାଶ୍ୱର୍ରେ ଥିବା ନିଜ ଚିଙ୍ଗୁଡ଼ି ଘେରିରେ ଦ୍ୱିପ୍ରହର ସମୟରେ କାମ ସାରି ବାରବାଟିଆ ତନ୍ତିଆ ଗ୍ରାମର ୱାର୍ଡମେମ୍ବର ସୁଶାନ୍ତ ସ୍ୱାଇଁ ବିଶ୍ରାମ ନେଉଥିଲେ ।

ଏହି ସମୟରେ ଢିଙ୍କିଆର ତପନ ସୂତାର ପତ୍ନୀ ଓ ପିଲାଙ୍କ ସହ ବାଇକରେ ଯାଉଥିଲେ ।

କୌଣସି କାରଣରୁ ଭାରସାମ୍ୟ ହରାଇ ତପନଙ୍କ ବାଇକ୍ ପୂର୍ବରୁ ରାସ୍ତା ପାଶ୍ୱର୍ରେ ପାର୍କ କରାଯାଇଥିବା ୨ଟି ବାଇକ୍ ସହ ଧକ୍କା ଖାଇବା ପରେ ସୁଶାନ୍ତଙ୍କୁ ଧକ୍କା ଦେଇଥିଲା ।

ତପନ, ପତ୍ନୀ ଓ ତାଙ୍କ ପିଲା ଆହତ ହୋଇଥିଲେ ମଧ୍ୟ ସୁଶାନ୍ତ ଗୁରୁତର ଆହତ ହୋଇଥିଲେ ।

ତାଙ୍କୁ ପରିବାର ଲୋକେ ଏରସମା ଡାକ୍ତରଖାନାକୁ ନେଇଥିଲେ ମଧ୍ୟ ସେଠାରେ ମୃତ୍ୟୁ ହୋଇ ଯାଇଥିଲା ।

ତେବେ ଡାକ୍ତରଖାନାରେ ଅକ୍ସିଜେନ ଦିଆଯିବାରେ ବିଳମ୍ବ ହେବାରୁ ସୁଶାନ୍ତଙ୍କ ମୃତ୍ୟୁ ହୋଇଥିବା ପରିବାର ପକ୍ଷରୁ ଅଭିଯୋଗ ହୋଇଛି ।

ସୁଶାନ୍ତ ପରିବାରକୁ କ୍ଷତିପୂରଣ ପ୍ରଦାନ ଦାବିରେ ଲୋକମାନେ ଏରସମା ଡାକ୍ତରଖାନା ସମ୍ମୁଖରେ ଧାରଣା ଦେଇଥିଲେ ।

ଏସଡିପିଓ ଦୀପକ ରଞ୍ଜନ ଜେନା, ବିଡିଓ କୈଳାସ ବେହେରା ପହଞ୍ଚି ରେଡକ୍ରସରୁ କ୍ଷତିପୂରଣ ଦେବାକୁ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା ।

ଅପରପକ୍ଷରେ ଡାକ୍ତରଖାନାରେ ଅକ୍ସିଜେନ୍ ଥିବାବେଳେ କେଉଁ କାରଣରୁ ରୋଗୀଙ୍କ ମୃତ୍ୟୁ ହେଲା ତଦନ୍ତ ହେବ ବୋଲି କହିଛନ୍ତି ଏରସମା ମେଡିକାଲ ଅଫିସର ଅମୀୟ କୁମାର ସ୍ୱାଇଁ ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୨୮(ଲୋକାଲ ୱାୟାର): କେଶବିନ୍ୟାସକାରୀ ମାନି(୨୫)ଙ୍କ ପରଲୋକ ହୋଇଯାଇଛି ।

କଟକରେ ଜନ୍ମିତ ମାନି କିଛି ଦିନ ହେବ ନିମୋନିଆ ଏବଂ ଜଣ୍ଡିସରେ ପୀଡ଼ିତ ଥାଇ ଚିକିତ୍ସିତ ହେଉଥିଲେ ।

ଭୁବନେଶ୍ୱରରେ ଚିକିତ୍ସିତ ହେବା ପରେ ତାଙ୍କୁ ଢେଙ୍କାନାଳ ନିଆଯାଇଥିଲା । ସେଠାରେ ଶନିବାର ଦିନ ତାଙ୍କର ପରଲୋକ ହୋଇଯାଇଥିଲା ।

ମାନି ଚଳଚ୍ଚିତ୍ର ଜଗତରେ ସମସ୍ତଙ୍କ ପ୍ରିୟ ଥିଲେ । ମାନି ଭଲ ହେୟାର ଡିଜାଇନିଂ କରିବା ସହିତ ଶାନ୍ତ, ସରଳ ଏବଂ ମେଳାପି ସ୍ୱଭାବର ଥିଲେ । ତେଣୁ ମାନିଙ୍କୁ ସମସ୍ତେ ବହୁତ ଭଲ ପାଆନ୍ତି ।

ବ୍ୟକ୍ତିଗତ ଭାବେ ମଧ୍ୟ ସେ ସମସ୍ତଙ୍କ ଶ୍ରଦ୍ଧାଭାଜନ ଥିଲେ । ତାଙ୍କର ପରିବାର ସହିତ ଆଉ ୨ ଉଭଣୀ ମଧ୍ୟ ଅଛନ୍ତି ।

ବିଶେଷ ଭାବରେ ମାନି ଓଲିଉଡ଼ର ଆଗଧାଡ଼ିର ନାୟିକା ଝିଲକୀଙ୍କ ବ୍ୟକ୍ତିଗତ ହେୟାର୍ ଡିଜାଇନିଂ କରୁଥିଲେ ।

ମାନି ଧାରାବାହିକ ‘ଗାୟତ୍ରୀ’ରୁ ତାଙ୍କର କ୍ୟାରିୟର ଆରମ୍ଭ କରିଥିଲେ । ପରେ ଧାରାବାହିକ ‘ସ୍ୱାଭିମାନ’ରେ କାମ କରିଥିଲେ ।

ଚଳଚ୍ଚିତ୍ରରେ ମଧ୍ୟ କାମ କରିଥିଲେ । ‘ମିଷ୍ଟର୍ କହ୍ନେୟା’, ‘ବେବି’, ‘ଅଗସ୍ତ୍ୟା’, ‘ପ୍ୟାର୍ ଅଲଗା ପ୍ରକାର’, ‘ଓଲେ ଓଲେ ଦିଲ୍ ବୋଲେ’, ‘ବ୍ଲାକମେଲ୍‌’, ‘ବିଜୁ ବାବୁ’ ଆଦି ଚଳଚ୍ଚିତ୍ରରେ ସେ ହେୟାର୍ ଡିଜାଇନର ଭାବେ କାମ କରିଥିଲେ ।

ଏବେ ବି ତାଙ୍କର ଚଳଚ୍ଚିତ୍ର ‘ବାଜିବଲୋ ସାହାନାଇ’ ମୁକ୍ତିଲାଭ ଅପେକ୍ଷାରେ ରହିଛି ।

ତାଙ୍କ ପରଲୋକରେ ଓଲିଉଡ଼ରେ ଶୋକର ଛାୟା ଖେଳିଯାଇଛି । ପ୍ରଯୋଜକ ସଞ୍ଜୟ ନାୟକ, ରବୀନ୍ଦ୍ର ପଣ୍ଡା, ନିର୍ଦ୍ଦେଶକ ମୁରଲୀକ୍ରିଷ୍ଣା, ଆଶୁତୋଷ ମହାପାତ୍ର, ଦିଲ୍ଲପ ପଣ୍ଡା, ଅଶୋକ ପତି, ସୁଶାନ୍ତ ମଣି, ବସନ୍ତ ସାହୁ, ଟି. ଗଣେଶ, ପ୍ରମୁଖ ମାନିଙ୍କ ବିୟୋଗରେ ଶୋକବ୍ୟକ୍ତ କରିଛନ୍ତି ।

ସେହିପରି ସୁପରଷ୍ଟାର୍ ସିଦ୍ଧାନ୍ତ ମହାପାତ୍ର, ମିହିର ଦାସ, ସାଂସଦ ତଥା ଅଭିନେତା ଅନୁଭବ ମହାନ୍ତି, ବର୍ଷା ପ୍ରିୟଦର୍ଶିନୀ, ଝିଲକୀ, ଜ୍ୟୋତି, ରବି ମିଶ୍ର, ପମୁ ପମପମ୍‌, ଡିସ୍କୋ ରେଡି ପ୍ରମୁଖ ଗଭୀର ଶୋକପ୍ରକାଶ କରିଛନ୍ତି ।

ଲୋକାଲ ୱାୟାର

କେନ୍ଦୁଝର, ଅକ୍ଟୋବର ୨୮ (ଲୋକାଲ ୱାୟାର): ଜିଲ୍ଲାର ସୋସୋ ଥାନା ଅନ୍ତର୍ଗତ ସଢ଼ା ଛକରେ ଏକ ଘରେ ଅଗ୍ନିକାଣ୍ଡ ଘଟି ଜଣେ ବ୍ୟକ୍ତି ଜୀବନ୍ତ ଦଗ୍ଧ ହୋଇଯାଇଥିବା ସୋମବାର ସୂଚନା ମିଳିଛି।

ମୃତକ ହେଉଛନ୍ତି ଆନନ୍ଦପୁର ତହସିଲ କାର୍ଯ୍ୟାଳୟର କିରାଣୀ ଶୁକଦେବ ମୁଣ୍ଡା।

ଗତକାଲି ରାତିରେ ଶୁକଦେବ ଘରେ ଶୋଇଥିବା ଅବସ୍ଥାରେ ନିଆଁ ଲାଗିଯାଇଥିଲା ଓ ସେ ଘରୁ ବାହାରିପାରିନଥିଲେ।

ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁ ନିଭାଇଥିବାବେଳେ ପୁଲିସ ପୋଡ଼ିଯାଇଥିବା ମୃତଦେହ ଜବତ କରି ତଦନ୍ତ ଚଳାଇଛି।

ଅଗ୍ନିକାଣ୍ଡ କେମିତି ଘଟିଲା, ତାର କାରଣ ଜଣାପଡ଼ିନାହିଁ।

ଲୋକାଲ ୱାୟାର

ତାଳଚେର, ଅକ୍ଟୋବର ୨୬(ଲୋକାଲ ୱାୟାର): ଅନୁଗୋଳ ଜିଲ୍ଲା ତାଳଚେର ଜଗନ୍ନାଥ ଓପନ କାଷ୍ଟ ମାଇନ୍ସରେ ସର୍ଟ ସର୍କିଟ ଯୋଗୁଁ ଏକ ୧୨୦୦ ଏଚ୍.ପି.ର ପିସି ମେସିନ ଜଳି ଯାଇଥିବା ସୂଚନା ମିଳିଛି।

ମାଟି କାଟିବା କାମ କରୁଥିବାବେଳେ ମେସିନଟି ସଂପୂର୍ଣ୍ଣ ଜଳିଯାଇଥିଲା, ତେବେ ଏଥିରେ ପିସି ଅପରେଟର୍ ବର୍ତ୍ତି ଯାଇଛନ୍ତି ।

ଜଳିଯାଇଥିବା ମେସିନର ଆନୁମାନିକ ମୂଲ୍ୟ ପ୍ରାୟ ୩ କୋଟି ହେବ ବୋଲି କୁହାଯାଇଛି।

ଜଗନ୍ନାଥ ଖଣିରେ ଏହି ମେସିନ୍ ମାଟି କାଟିବା କାମ କରୁଥିବା ବେଳେ ଏହି ଅଗ୍ନିକାଣ୍ଡ ଘଟିଛି ।

ଏମ୍.ସି.ଏଲ୍. କର୍ତ୍ତୃପକ୍ଷଙ୍କ ଅବହେଳାରୁ ଏହିପରି ଘଟଣା ବାରମ୍ବାର ଘଟୁଥିବା ଶ୍ରମିକ ସଂଘ ଅଭିଯୋଗ କରିଛି ।

ଲୋକାଲ ୱାୟାର

ବଲାଙ୍ଗିର, ଅକ୍ଟୋବର ୨୬ (ଲୋକାଲ ୱାୟାର): ମଦ ପିଇ ନିଶାଗ୍ରସ୍ତ ଅବସ୍ଥାରେ ଜଣେ ବ୍ୟକ୍ତିଙ୍କ ଘରେ ପ୍ରବେଶ କରି ପାଟିତୁଣ୍ଡ କରିବା ଅଭିଯୋଗରେ ବଲାଙ୍ଗିର ଜିଲ୍ଲା ସଦର ମହକୁମାରେ ଜଣେ ଡାକ୍ତରଙ୍କୁ ଥାନାରେ ଅଟକ ରଖାଯାଇଥିବା ସ୍ଥାନୀୟ ପୁଲିସ ଶନିବାର ସୂଚନା ଦେଇଛି ।

ବଲାଙ୍ଗିର ଜିଲ୍ଲା ସଦର ମହକୁମା ଡାକ୍ତରଖାନାରେ କ୍ୟାନ୍ସର ନୋଡାଲ ଅଫିସର ଭାବେ କାର୍ଯ୍ୟରତ ଡାକ୍ତର ଅବିନାଶ ମିଶ୍ର ଭୋର୍ ୩ଟା ବେଳେ ରେଳ ଷ୍ଟେସନ ନିକଟରେ ଜଣଙ୍କ ଘରେ ପ୍ରବେଶ କରି ପାଟିତୁଣ୍ଡ କରିଥିଲେ ।

ଘର ମାଲିକଙ୍କ ଠାରୁ ସୂଚନା ପାଇ ଏକ ପିସିଆର ଭ୍ୟାନ ସେଠାରେ ପହଞ୍ଚିଥିଲା । ନିଶାଗ୍ରସ୍ତ ଡାକ୍ତରଙ୍କୁ ଟାଉନ ଥାନାକୁ ନେଇ ଜେରା କରାଯାଉଥିବା ବେଳେ ତାଙ୍କ ବାଇକରୁ ଏକ ମଦ ବୋତଲ ଜବତ ହୋଇଥିବା ପୁଲିସ କହିଛି ।

ଲୋକାଲ ୱାୟାର

କଟକ, ଅକ୍ଟୋବର ୨୬(ଲୋକାଲ ୱାୟାର): ରବିବାର ୨୭ ତାରିଖ ଦିନ ଆଲୋକର ପର୍ବ ଦୀପାବଳୀ ପାଇଁ କୌଣସି ଅଘଟଣର ମୁକାବିଲା କରିବା ନିମନ୍ତେ ଅଗ୍ନିଶମ ବିଭାଗ ପକ୍ଷରୁ ସ୍ୱତନ୍ତ୍ର ପଦକ୍ଷେପ ସ୍ବରୂପ କଟକ ସହରରେ ୪ଟି ଅସ୍ଥାୟୀ ଦମକଳ କେନ୍ଦ୍ର ଖୋଲାଯିବ ବୋଲି ବୋଲି ଜିଲ୍ଲା ଅଗ୍ନିଶମ ଅଧିକାରୀ ଶନିବାର ଦିନ କହିଛନ୍ତି ।

ସହରର ବିଡାନାସୀ, ବକ୍ସିବଜାର,ଚାଉଳିଆଗଞ୍ଜ ଠାରେ ସ୍ଥାୟୀ ଦମକଳ କେନ୍ଦ୍ର ରହିଥିଲେ ମଧ୍ୟ ଗୌରୀଶଙ୍କର ପାର୍କ, କଲେଜଛକ, ଶିଶୁଭବନ ଓ ଖାନନଗର ଠାରେ ଏହି ୪ଟି ଅସ୍ଥାୟୀ କେନ୍ଦ୍ର ସ୍ଥାପନ କରାଯିବ ।

ଏସବୁ କେନ୍ଦ୍ରରେ ନିଆଁ ଲିଭା ଗାଡି ସହିତ ପ୍ରାୟ ୬୫ଜଣ କର୍ମଚାରୀ ସର୍ବଦା ପ୍ରସ୍ତୁତ ହୋଇରହିବେ ।

ଅଗ୍ନିଶମ ବିଭାଗ ପକ୍ଷରୁ ବକ୍ସିବଜାର ଦମକଳ କେନ୍ଦ୍ର ଠାରେ ଏକ ୨୪ ଘଣ୍ଟିଆ ନିୟନ୍ତ୍ରଣ କକ୍ଷ ଖୋଲାଯିବ ।

କଟକ ସହରରେ ଗଳିକନ୍ଦି ରାସ୍ତା ଥିବାରୁ ଏଠାରେ ସହଜରେ ପହଞ୍ଚି ପାରୁଥÒବା ଛୋଟ ଗାଡି ଗୁଡିକୁ ସଜାଗ ରଖାଯିବା ସହ ମିଷ୍ଟ ବାଇକ ବା ୱାଟର ମିଷ୍ଟ ସିଷ୍ଟମ ମଧ୍ୟ ଉପଲବ୍ଧ ହେବ ।

ଏହା ବ୍ୟତୀତ କଟକ ସହରର ଚାଉଳିଆଗଞ୍ଜ, ବିଡାନାସୀ ଓ ବକ୍ସିବଜାର ସମେତ ସହର ଉପକଣ୍ଠ ଚୌଦ୍ୱାର ଓ ବାରଙ୍ଗସ୍ଥିତ ସ୍ଥାୟୀ ଦମକଳ କେନ୍ଦ୍ରର ୧୦୦ ଜଣ କର୍ମଚାରୀ ମଧ୍ୟ ଦୀପାବଳୀ ଅଘଟଣ ଲାଗି ସଜାଗ ରହିବେ। ସହରର ବାଣ ଦୋକାନ ଗୁଡିକୁ ମଧ୍ୟ ଅଗ୍ନିଶମ ବିଭାଗ ପକ୍ଷରୁ ଯାଞ୍ଚ କରାଯାଉଥିବା ସେ କହିଛନ୍ତି ।

ଲୋକାଲ ୱାୟାର

ଜଗତସିଂହପୁର, ଅକ୍ଟୋବର ୨୬(ଲୋକାଲ ୱାୟାର): ନଅ ବର୍ଷ ଧରି ବିବାହ କରି ଖୁସିରେ ଦାମ୍ପତ୍ୟ ଜୀବନ ବିତାଉଥିବା ବେଳେ ଜଣେ ସ୍ୱାମୀ ପତ୍ନୀକୁ ହତ୍ୟା କରି ଜାଳି ଦେବା ପରେ ଥାନାରେ ଆତ୍ମସମର୍ପଣ କରିଥିବା ଭଳି ଅଭାବନୀୟ ଘଟଣା ଜଗତସିଂହପୁର ଥାନାଞ୍ଚଳରେ ଘଟିଥିବା ସ୍ଥାନୀୟ ପୁଲିସ କହିଛି ।

ଜଗତସିଂହପୁର ଥାନା ତରିକୁନ୍ଦ(ଧନିପୁର) ନିକଟ ସାନ ତିହଡ଼ା ଗ୍ରାମରେ ଗୁରୁବାର ବିଳମ୍ବିତ ରାତ୍ରିରେ ଏହି ହତ୍ୟା କାଣ୍ଡ ଘଟିଛି ।

ନଅ ବର୍ଷ ତଳେ ଆମ୍ବଦରଡ଼ ଗ୍ରାମର ପ୍ରଶାନ୍ତ କୁମାର ଖଟୁଆଙ୍କ ଝିଅ ରଶ୍ମିତାଙ୍କୁ ବିବାହ କରିଥିଲେ ସାନତିହଡ଼ା ଗ୍ରାମର ରୁଦ୍ର ପ୍ରସନ୍ନ ।

ରୁଦ୍ର ବ୍ୟବସାୟ କରି ଉଭୟଙ୍କର ୮ ବର୍ଷର ପୁଅଟିଏ ଅଛି । ରୁଦ୍ରଙ୍କ ବଡ଼ ଭାଇ କୁକୁଡ଼ା ଫାର୍ମ ନିକଟରେ ସପତ୍ନୀକ ରହୁଥିଲେ ।

ଗୁରୁବାର ରାତିରେ ରୁଦ୍ରଙ୍କ ପୁଅ ବଡ଼ବାପା, ବଡ଼ବୋଉଙ୍କ ପାଖକୁ ଶୋଇବାକୁ ଚାଲି ଯାଇଥିଲେ ।

ସନ୍ଧ୍ୟାରେ ରୁଦ୍ରଙ୍କୁ ପତ୍ନୀ ପକୁଡ଼ି କରି ଖାଇବାକୁ ମଧ୍ୟ ଦେଇଥିଲେ । ବିଳମ୍ବିତ ରାତ୍ରିରେ ରୁଦ୍ର ପତ୍ନୀଙ୍କ ମୁଣ୍ଡକୁ ହେମଦସ୍ତାରେ ଛେଚି ହତ୍ୟା କରିବା ପରେ ମୃତଦେହକୁ ରୋଷେଇ ଘର ପାଖ ଅଗଣାକୁ ଘୋଷାରି ଆଣି ଜାରକିନରେ ଥିବା ୫ ଲିଟର କିରାସିନି ସହ ନିଜ ବାଇକରୁ ପେଟ୍ରୋଲ କାଢ଼ି ମୃତଦେହରେ ଢାଳି ନିଆଁ ଲଗାଇ ଦେଇଥିଲା ।

ସାରା ରାତି ରୁଦ୍ର ମୃତଦେହକୁ ଜାଳିଥିଲେ ମଧ୍ୟ ପାହାନ୍ତା ବେଳକୁ ଗୋଟିଏ ଗୋଡ଼ ବାକି ରହି ଯାଇଥିଲା ।

ଏହି ସମୟରେ ତାଙ୍କ ଭାଇ ଆସି ପହଞ୍ଚି ଏହା ଦେଖି ହତବାକ୍ ହୋଇ ତୁରନ୍ତ ରୁଦ୍ରକୁ ଥାନାରେ ଆତ୍ମସମର୍ପଣ କରିବାକୁ କହିଥିଲେ । ରୁଦ୍ର ଜଗତସିଂହପୁର ଥାନାକୁ ଆସି ଆତ୍ମସମର୍ପଣ କରିଥିଲା ।

ଜଗତସିଂହପୁର ଏସଡିପିଓ ପ୍ରକାଶ ଚନ୍ଦ୍ର ପାଲ, ଥାନାଧିକାରୀ ରଜନୀକାନ୍ତ ମିଶ୍ର ଘଟଣାସ୍ଥଳକୁ ଯାଇ ତଦନ୍ତ କରିଛନ୍ତି ।

ରୁଦ୍ରଙ୍କୁ ଗିରଫ କରି ଜେରା କରାଯାଉଥିବା ବେଳେ ଚରିତ୍ରକୁ ସନ୍ଦେହ କରି ସେ ଏପରି କାଣ୍ଡ କରିଥିବା ପୁଲିସ କହିଛି ।

ଲୋକାଲ ୱାୟାର

କେନ୍ଦୁଝର, ଅକ୍ଟୋବର ୨୫ (ଲୋକାଲ ୱାୟାର) ଆନନ୍ଦପୁର ଉପଖଣ୍ଡ ଅଞ୍ଚଳରେ ଦୁଇଟି ପୃଥକ ପୃଥକ ସ୍ଥାନରେ କାନ୍ଥପଡି ଦୁଇ ଜଣ ମହିଳା ଗୁରୁତର ଆହତ ହୋଇଥିବା ବେଳେ ସେମାନଙ୍କୁ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଚିକିତ୍ସା ପାଇଁ ଭର୍ତ୍ତି କରା ଯାଇଥିବା ଗ୍ରାମବାସୀ ଶୁକ୍ରବାର କହିଛନ୍ତି।

ସେମାନେ ହେଲେ ଆନନ୍ଦପୁର ଥାନା ପଚାଙ୍ଗ ଗ୍ରାମର ଇତିଶ୍ରୀ ନାୟକ ଏବଂ ଘସିପୁରା ଥାନା ଭଣ୍ଡାରିଡିହା ପଞ୍ଚାୟତ ବସନ୍ତପୁରା ଗ୍ରାମର ମାଇନା ହାଂସଦା ।

ଲଗାଣ ବର୍ଷା ଯୋଗୁଁ କାନ୍ଥ ଭୁଷୁଡ଼ି ଥିବା ଗ୍ରାମବାସୀ କହିଛନ୍ତି।

ଇତିଶ୍ରୀ ଗୁରୁବାର ସନ୍ଧ୍ୟାରେ ରୋଷେଇ କରୁଥିବା ବେଳେ ମାଟି କାନ୍ଥ ତାଙ୍କ ଉପରେ ଧସିପଡିଥିଲା।

ପରିବାର ଲୋକେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାରକରି ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଛନ୍ତି ।

ସେହିଭଳି ମାଇନା ତାଙ୍କର ୨ ପୁଅଙ୍କ ସହ ଗୁରୁବାର ରାତିରେ ଶୋଇଥିବା ବେଳେ ମାଟି କାନ୍ଥ ତାଙ୍କ ଉପରେ ପଡିଯାଇଥିଲା।

କାନ୍ଥତଳେ ମାଇନା ଚାପିହୋଇ ଗୁରୁତର ଆହତ ହୋଇଥିବାବେଳେ ୨ ପୁଅମାନେ ଅଳ୍ପକେ ବର୍ତ୍ତିଯାଇଥିଲେ।

ମାଇନାଙ୍କୁ ଚିକିତ୍ସା ପାଇଁ ଆନନ୍ଦପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିବା ଜଣାପଡିଛି। ଉଭୟଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି।

ଲୋକାଲ ୱାୟାର