ନୟାଗଡ଼

ନୟାଗଡ଼, ସେପ୍ଟେମ୍ବର ୧୫(ଲୋକାଲ ୱାୟାର): ନୟାଗଡ଼ ଜିଲ୍ଲାର ଦଶପଲ୍ଲାଠାରେ ଏକ ମଙ୍ଗଳବାର ଏକ ଦୁର୍ଘଟଣା ପରେ ବାଇକ ସହ ବାଇକ ଆରୋହୀ ଜଳି ଯାଇଥିବା ସ୍ଥାନୀୟ ପୁଲିସ କହିଛି ।

ଦଶପଲ୍ଲା ଥାନା ଅନ୍ତର୍ଗତ ଜାତୀୟ ରାଜପଥ ନଂ-୫୭ର ରଙ୍ଗମାଟିଆଠାରେ ଏକ ଆମ୍ବୁଲାନ୍ସ ସହ ବିପରୀତ ଦିଗରୁ ଆସୁଥିବା ଏକ ବାଇକର ମୁହାଁମୁହିଁ ଧକ୍କା ହୋଇଥିଲା ।

ଦୁର୍ଘଟଣା ଏତେ ଭୟାବହ ଥିଲା ଯେ ବାଇକଟିରେ ନିଆଁ ଲାଗି ଯାଇଥିଲା ଏବଂ ଆରୋହୀ ଜଣକ ମଧ୍ୟ ଜଳି ଯାଇ ପ୍ରାଣ ହରାଇଥିଲେ ।

ସ୍ଥାନୀୟ ଅଗ୍ନିଶମ କର୍ମଚାରୀ ପହଞ୍ଚି ନିଆଁ ଲିଭାଇବା ପରେ ପୁଲିସ ମୃତଦେହକୁ ନିକଟସ୍ଥ ଡାକ୍ତରଖାନାକୁ ବ୍ୟବଚ୍ଛେଦ ପାଇଁ ପଠାଇଛି । ମୃତ ଯୁବକଙ୍କ ପରିଚୟ ମିଳିପାରିନଥିବା ପୁଲିସ କହିଛି ।

ଲୋକାଲ ୱାୟାର

ନୟାଗଡ଼, ସେପ୍ଟେମ୍ବର ୯ (ଲୋକାଲ ୱାୟାର) : ନୟାଗଡ଼ ଜିଲ୍ଲା ଇଟାମାଟି ଥାନା ବାଉଁଶିଆପଡ଼ା ମାଳିସାହି ଗାଁରେ ମଙ୍ଗଳବାର ରାତି ପ୍ରାୟ ୩ଟାରେ ଜମିବାଡି ବିବାଦ ନେଇ ଜଣେ ବ୍ୟକ୍ତିଙ୍କୁ ଅତି ବିଭତ୍ସ ଭାବେ ହତ୍ୟା କରାଯାଇଥିବା ନେଇ ଅଭିଯୋଗ ହୋଇଛି ବୋଲି ବୁଧବାର ସ୍ଥାନୀୟ ପୁଲିସ କହିଛି ।

ମୃତକ ଜଣକ ହେଲେ କ୍ଷେତ୍ରବାସୀ ମହାପାତ୍ର । ଗାଁ ଦାଣ୍ଡରେ କ୍ଷେତ୍ରବାସୀଙ୍କୁ ଗୋଡାଇ ଗୋଡାଇ ହାଣି ଦିଆଯାଇଛି ବୋଲି ଅଭିଯୋଗରେ କୁହାଯାଇଛି ।

ଗାଁ ଦାଣ୍ଡରେ ମୃତଦେହ ପଡି ରହିଥିବା ବେଳେ ପୁଲିସ ପହଞ୍ଚି ଜବତ କରିବା ସହ ତଦନ୍ତ ଆରମ୍ଭ କରିଛି ।

ହତ୍ୟା ଅଭିଯୋଗରେ ପୁଲିସ ୨ ଜଣକୁ ଅଟକ ରଖି ପଚରାଉଚରା କରୁଛି । ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ମଧ୍ୟ ପହଞ୍ଚି ତଦନ୍ତ ଆରମ୍ଭ କରିଛି ।

ସୂଚନା ଅନୁସାରେ, ଗତକାଲି ରାତିରେ ଗାଁର କିଛି ଲୋକଙ୍କ ସହିତ କ୍ଷେତ୍ରବାସୀଙ୍କର ଜମିବାଡି ବିବାଦକୁ ନେଇ ଝଗଡା ହୋଇଥିଲା । ଏନେଇ ସେ ଥାନା ଅଭିଯୋଗ କରିଥିଲେ ।

ପୁଲିସ ତାଙ୍କ ସହିତ ଝଗଡା କରିଥିବା ଲୋକଙ୍କୁ ବୁଝାସୁଝା କରିବା ସହ ସକାଳେ ସମସ୍ୟାର ସମାଧନ କରାଯିବ ବୋଲି କହିଥିଲା ।

ଏହାପରେ କ୍ଷେତ୍ରବାସୀ ଘରକୁ ଫେରିଥିଲେ । ଫେରିବା ପରେ ତାଙ୍କୁ ହତ୍ୟା କରାଯାଇଛି ।

ଲୋକାଲ ୱାୟାର

ନୟାଗଡ଼, ଜୁନ୍ ୨୪ (ଲୋକାଲ ୱାୟାର) : କରୋନା ସଂକ୍ରମଣକୁ ଦୃଷ୍ଟିରେ ରଖି ନୟାଗଡ଼ ଜିଲ୍ଲାରେ ବୁଧବାର ଠାରୁ କଟକଣା ଜାରି କରିଛନ୍ତି ଜିଲ୍ଲାପାଳ ।

ଆଜିଠାରୁ ସମସ୍ତ ଦୋକାନ ବଜାର ସକାଳ ୬ଟାରୁ ଦିନ ଗୋଟାଏ ପର୍ଯ୍ୟନ୍ତ ଖୋଲା ରହିବ ।

ଅପରାହ୍ଣ ୧ଟାରୁ ପରଦିନ ସକାଳ ୬ଟା ଯାଏଁ ସମସ୍ତ ଦୋକାନ ବଜାର ବନ୍ଦ ରହିବ ।

ଏହି ସମୟ ମଧ୍ୟରେ କେବଳ ଔଷଧ ଦୋକାନ ଖୋଲା ରହିବ ।

ଏହାର ଖିଲାପ କଲେ ଆଇନ୍ ଅନୁଯାୟୀ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲା ପ୍ରଶାସନ କହିଛି ।

ଲୋକାଲ ୱାୟାର

ନୟାଗଡ଼, ଜୁନ୍ ୧୩ (ଲୋକାଲ ୱାୟାର) : ନୟାଗଡ଼ ଜିଲ୍ଲା ରଣପୁର ଅଞ୍ଚଳରରେ ଶନିବାର ଚଢାଉ କରି ୨ଟି କଲରାପତରିଆ ବାଘଛାଲ ଜବତ କରିଛି କ୍ରାଇମବ୍ରାଞ୍ଚ ସ୍ପେଶାଲ ଟାସ୍କ ଫୋର୍ସ (ଏସ୍‌ଟିଏଫ୍‌) ଟିମ୍ ।

ବାଘ ଛାଲ ରଖିଥିବା ଅଭିଯୋଗରେ ଜଣଙ୍କୁ ଗିରଫ କରିଛି ଏସ୍‌ଟିଏଫ୍ ।

ଏହି ବାଘଛାଲ ରାକେଟ୍‌ରେ ଆଉ କେତେ ଜଣ ସମ୍ପୃକ୍ତ ଅଛନ୍ତି ସେ ନେଇ ତଦନ୍ତ ଜାରି ରଖିଛି ଏସ୍‌ଟିଏଫ୍ ।

ଉଲ୍ଲେଖଯୋଗ୍ୟ, ଗତ ୮ତାରିଖରେ ମଧ୍ୟ ନୟାଗଡ଼ ଜିଲ୍ଲା ଦଶପଲ୍ଲା ଅଞ୍ଚଳରୁ ୨ଟି ବାଘଛାଲ ଓ ହରିଣ ଛାଲ ଜବତ ହୋଇଥିଲା । ଏଥିରେ ସମ୍ପୃକ୍ତ ଥିବା ଦୁଇ ଜଣଙ୍କୁ ଏସ୍‌ଟିଏଫ୍ ଗିରଫ କରିଥିଲା ।

ଲୋକାଲ ୱାୟାର

ନୟାଗଡ଼, ଜୁନ ୮(ଲୋକାଲ ୱାୟାର): ନୟାଗଡ଼ ଜିଲ୍ଲା ଦଶପଲ୍ଲା ଅଞ୍ଚଳରେ କ୍ରାଇମବ୍ରାଞ୍ଚ ଏସଟିଏଫ (ସ୍ପେଶାଲ ଟାସ୍କ ଫୋର୍ସ) ଅଧିକାରୀମାନେ ବାଘ ଓ ହରିଣ ଚମଡ଼ା ଜବତ କରିବା ସହ ଏହି ରାକେଟରେ ସଂପୃକ୍ତ ୨ ଜଣଙ୍କୁ ଗିରଫ କରିଥିବା ବରିଷ୍ଠ ଅଧିକାରୀ ସୋମବାର କହିଛନ୍ତି ।

ଦଶପଲ୍ଲାର ଗିରିପୂଜା ଜଙ୍ଗଲରେ ବାଘ ଚମଡ଼ା ବିକିବାକୁ କେତେକ ବ୍ୟକ୍ତି ଉଦ୍ୟମ କରୁଥିବା ଖବର ପାଇବା ପରେ ଏସଟିଏଫ ପକ୍ଷରୁ ଉକ୍ତ ଅଞ୍ଚଳରେ ଗତକାଲି ସନ୍ଧ୍ୟାରେ ଚଢ଼ାଉ କରାଯାଇଥିଲା ।

ଚଢ଼ାଉ ବେଳେ ପ୍ରତାପ କୁମାର ନାୟକ ଓ କିଶୋର ଚନ୍ଦ୍ର ଦେହୁରୀ ନାମକ ଦୁଇ ବ୍ୟକ୍ତିଙ୍କୁ ଗିରଫ କରାଯାଇଥିଲା ।

ସେମାନଙ୍କ ଠାରୁ ୨ଟି କଲରାପତରିଆ ବାଘ ଚମଡ଼ା ଓ ୨ଟି ହରିଣ ଚମଡ଼ା ଜବତ କରାଯାଇଥିଲା । ଆଜି ସେମାନଙ୍କୁ ଦଶପଲ୍ଲା କୋର୍ଟରେ ହାଜର କରାଯାଇଛି ।

ଜବତ ହୋଇଥିବା ଚମଡ଼ା ଗୁଡ଼ିକୁ ଡେରାଡୁନ ସ୍ଥିତ ୱାଇଲ୍ଡ ଲାଇଫ ଇନଷ୍ଟିଚୁ୍ୟଟକୁ ରାସାୟନିକ ପରୀକ୍ଷା ପାଇଁ ପଠାଇ ଦିଆଯାଇଛି ।

ଗିରଫ ଦୁଇ ବ୍ୟକ୍ତିଙ୍କୁ ରିମାଣ୍ଡରେ ଅଣାଯାଇ ଏହି ରାକେଟରେ ଥିବା ଅନ୍ୟମାନଙ୍କୁ ଧରିବାକୁ ଉଦ୍ୟମ କରାଯିବ ବୋଲି ଏସଟିଏଫର ଅଧିକାରୀ କହିଛନ୍ତି ।

ଲୋକାଲ ୱାୟାର

ନୟାଗଡ଼, ଜୁନ୍ ୪ (ଲୋକାଲ ୱାୟାର) : ନୟାଗଡ଼ ଜିଲ୍ଲା ମୁଖ୍ୟଚିକିତ୍ସାଳୟର ଜଣେ ଷ୍ଟାଫ୍ ନର୍ସ କରୋନା ଆକ୍ରାନ୍ତ ହୋଇଛନ୍ତି ବୋଲି ଗୁରୁବାର ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ (ସିଡ଼ିଏମ୍‌ଓ) କହିଛନ୍ତି ।

ସିଡିଏମ୍‌ଓ କହିଛନ୍ତି, କାର୍ଯ୍ୟରତ ଷ୍ଟାଫ ନର୍ସଙ୍କ ସ୍ୱାବ ୭ ଦିନ ପୂର୍ବରୁ ଟେଷ୍ଟ ନିମନ୍ତେ ଯାଇଥିଲା ।

ଗତକାଲି ରିପୋର୍ଟ ପଜିଟିଭ ଆସିଛି । ନର୍ସ ଜଣକ ପୂର୍ବରୁ କରୋନା ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିଲେ।

ସଂପୃକ୍ତ ଷ୍ଟାଫ୍ ନର୍ସଙ୍କୁ ଭୁବନେଶ୍ୱର ସ୍ଥିତ କୋଭିଡ୍ ହସ୍ପିଟାଲକୁ ସ୍ଥାନାନ୍ତର କରାଯାଇଛି । ମେଡିକାଲର ସବୁ ୱାର୍ଡକୁ ଭଲ ଭାବେ ସାନିଟାଇଜ୍ କରାଯାଉଛି ।

୭ ଦିନ ଧରି ନର୍ସଜଣକ ଜିଲ୍ଲା ମୁଖ୍ୟ ଚିକିତ୍ସାଳୟରେ ରୋଗୀଙ୍କ ଚିକିତ୍ସାରେ ନିୟୋଜିତ ଥିବାରୁ ବହୁ ଲୋକ ତାଙ୍କ ସଂସ୍ପର୍ଶରେ ଆସିଥିବା ସନ୍ଦେହ କରାଯାଉଛି ।

ଲୋକାଲ ୱାୟାର

ନୟାଗଡ,ମେ ୬ (ଲୋକାଲ ୱାୟାର) : ନୟାଗଡ ଜିଲ୍ଲା ରଣପୁର ଥାନା ଅଞ୍ଚଳରେ ବୁଧବାର ସକାଳେ ଘଟିଥିବା ଏକ ଅଗ୍ନିକାଣ୍ଡରେ ମା’ ଓ ଶିଶୁକନ୍ୟାଙ୍କ ମୃତ୍ୟୁ ଘଟିଥିବା ବେଳେ ତାଙ୍କ ୩ ବର୍ଷ ବୟସର ଶିଶୁପତ୍ରର ଅବସ୍ଥା ସଙ୍କକଟାପନ୍ନ ଥିବା ଜଣେ ପୁଲିସ ଅଧିକାରୀ କହିଛନ୍ତି।

ରଣପୁର ଥାନା ଗୋପାଳ ଗାଁରେ ଏହି ଅଗ୍ନିକାଣ୍ଡ ଘଟିଥିଲା ।

ଏ ସମ୍ପର୍କରେ ଏକ ମାମଲା ରୁଜୁ ହୋଇଛି ପୁଲିସ ଘଟଣାର ତଦନ୍ତ କରୁଛି।

ଅଗ୍ନିକାଣ୍ଡରେ ମୃତ ମହିଳା ହେଲେ ଗୋପାଳ ବେହେରାଙ୍କ ପତ୍ନୀ ଓ ତାଙ୍କ ୫ ବର୍ଷ ବୟସର ଶିଶୁକନ୍ୟା।

ଲୋକାଲ ୱାୟାର

ନୟାଗଡ଼, ମେ’ ୬ (ଲୋକାଲ ୱାୟାର) : ବୁଧବାର ୫-ଟି ସଚିବ ଭି.କେ ପାଣ୍ଡିଆନ୍ ଓ ଉନ୍ନୟନ କମିଶନର ସୁରେଶ ମହାପତ୍ର ନୟାଗଡ଼ ଜିଲ୍ଲା ରଣପୁର ବ୍ଲକ ଚାନ୍ଦପୁର ସ୍ଥିତ କୋଭିଡ୍‌-୧୯ ହସ୍ପିଟାଲ ପରିଦର୍ଶନ କରିଛନ୍ତି ।

ଏହି ହସ୍ପିଟାଲରେ କରୋନା ରୋଗୀଙ୍କ ଚିକିତ୍ସା ପାଇଁ ୧୦୦ଟି ବେଡ୍ ପ୍ରସ୍ତୁତ କରାଯାଇଥିବା ବେଳେ ୧୩ ଜଣ ଡାକ୍ତର ଅଛନ୍ତି ।

ଦୁଇ ସଚିବ ପ୍ରତିଟି ୱାର୍ଡ ବୁଲି କରୋନା ଆକ୍ରାନ୍ତଙ୍କ ପାଇଁ କିଭଳି ବ୍ୟବସ୍ଥା କରାଯାଇଛି ତାହା ଦେଖିଛନ୍ତି ।

ଏହି ସମୟରେ ନୟାଗଡ଼ ଜିଲ୍ଲାପାଳ ପୋମା ଟୁଡୁ, ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଶ୍ୱେତ ମହାପାତ୍ର, କୋଭିଡ୍ ହସ୍ପିଟାଲର ମୁଖ୍ୟ ଚିକିତ୍ସାଧିକାରୀ ବି. ସୁରିୟା ରାଓ ଓ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।

ଲୋକାଲ ୱାୟାର