ନୟାଗଡ଼

ଭୁବନେଶ୍ୱର,ନଭେମ୍ବର ୨୫(ଲୋକାଲ ୱାୟାର): ନୟାଗଡ଼ ଜିଲ୍ଲା ଯଦୁପୁରର ଅଶୋକ ସାହୁ ଏବଂ ସୌଦାମିନୀଙ୍କ ଝିଅ ପରୀକୁ ଅପହରଣ ଓ ହତ୍ୟା କରାଯାଇଛି ଏବଂ ଏହି ମାମଲାର ତଦନ୍ତ କ୍ରାଇମବ୍ରାଞ୍ଚ କରିବ ବୋଲି ବୁଧବାର ବିଧାନସଭାରେ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ନିଜ ବିବୃତିରେ କହିଛନ୍ତି ।

ସେ କହିଛନ୍ତି, ଯଦୁପୁର ଗ୍ରାମରେ ଗତ ଜୁଲାଇ ୨୩ ତାରିଖ ଅପରାହ୍ଣରେ ଅଖାବସ୍ତାରେ ବନ୍ଧା ହୋଇଥିବା ଜଣେ ଝିଅର ମୃତଦେହ ମିଳିଥିଲା । ପୁଲିସ ଓ ସାଇଣ୍ଟିଫିକ୍ ଟିମ୍ ତୁରନ୍ତ ତାହାର ତଦନ୍ତ କରିଥିଲେ ।

କଟକ ଏସସିବିରେ ମୃତଦେହ ବ୍ୟବଚ୍ଛେଦ କରାଯାଇଥିଲେ ମଧ୍ୟ ମୃତ୍ୟୁର କାରଣ ଜଣାପଡ଼ିନଥିଲା । ତେବେ ପ୍ରାୟ ୭ ଦିନ ତଳେ ମୃତ୍ୟୁ ହୋଇଥିବା କୁହାଯାଇଥିଲା ।

ଡିଏନଏ ପରୀକ୍ଷାରୁ ଝିଅଟି ଅଶୋକଙ୍କ ଝିଅ ପରୀ ବୋଲି ଚିହ୍ନଟ ହୋଇଥିଲା । ଏହି ମାମଲାର ତଦନ୍ତରେ ୪ ଜଣଙ୍କ ପଲିଗ୍ରାଫ୍ ପରୀକ୍ଷା ସହ ସନ୍ଦିଗ୍ଧଙ୍କ କଲ୍ ରେକର୍ଡ ଯାଞ୍ଚ କରାଯାଇଛି ।

ସନ୍ଦିଗ୍ଧଙ୍କ ବ୍ୟାଙ୍କ ଆକାଉଣ୍ଟ ମଧ୍ୟ ଯାଞ୍ଚ ହୋଇଛି ଏବଂ ୩୪ ଜଣଙ୍କୁ ପଚରାଉଚରା କରାଯାଇଛି । ଏହି ମାମଲାର ତଦନ୍ତ ଏବେ କ୍ରାଇମବ୍ରାଞ୍ଚ କରିବ ବୋଲି ସେ କହିଥିଲେ ।

ଲୋକାଲ ୱାୟାର

ନୟାଗଡ଼, ନଭେମ୍ବର ୨୪(ଲୋକାଲ ୱାୟାର): ନୟାଗଡ଼ ଜିଲ୍ଲା ଶରଣକୁଳରେ ମଙ୍ଗଳବାର ଅପରାହ୍ଣରେ ରାସ୍ତା ପାର୍ଶ୍ୱରେ ବିରି ପିଟୁଥିବା ଲୋକମାନଙ୍କ ଉପରେ ଏକ ଦ୍ରୁତଗାମୀ ଡମ୍ଫର ଚଢ଼ିଯିବାରୁ ୬ ଜଣଙ୍କର ଶୋଚନୀୟ ମୃତ୍ୟୁ ହୋଇଥିବା ସ୍ଥାନୀୟ ପୁଲିସ କହିଛି ।

ଦୁର୍ଘଟଣାର ମୃତକଙ୍କ ମଧ୍ୟରେ ୩ ଜଣ ମହିଳା, ୨ ଜଣ ପୁରୁଷ ଏବଂ ଜଣେ ନାବାଳିକା ଅଛନ୍ତି ।

ଡମ୍ଫରର ଡ୍ରାଇଭର ଫେରାର ହୋଇ ଯାଇଥିବା ପୁଲିସ କହିଛି ।

ନୟାଗଡ଼-ଭଞ୍ଜନଗର ୨୧ନଂ. ରାଜ୍ୟ ରାଜପଥରେ ହୋଇଛି ଏହି ଦୁର୍ଘଟଣା ।

ଦ୍ରୁତି ଗତିରେ ଦୁଇଟି ଡମ୍ଫର ଆସୁଥିବା ବେଳେ ପ୍ରଥମ ଡମ୍ଫରଟି ଶରଣକୁଳ ବଜାରଠାରୁ କିଛି ଦୂରରେ ଦୁଇ ଜଣ ମହିଳାଙ୍କୁ ଧକ୍କା ଦେଇଥିଲା ଏବଂ କିଛି ବାଟ ଯିବା ପରେ ଆଉ ୪ ଜଣଙ୍କୁ ଧକ୍କା ଦେଇଥିଲା ।

ପୁଲିସ ଦ୍ୱିତୀୟ ଡମ୍ଫରର ଡ୍ରାଇଭରଙ୍କୁ ଅଟକ ରଖିଥିବା ବେଳେ ଦୁର୍ଘଟଣା ଘଟାଇଥିବା ଟ୍ରକ ଡ୍ରାଇଭରକୁ ଘୋଜା ଚାଲିଛି ।

ଉତ୍ତ୍ୟକ୍ତ ଲୋକେ ଡମ୍ଫରର କାଚ ଭଶଙ୍ଗି ଦେବା ସହ ମୃତକଙ୍କ ପରିବାର ପିଛା ୧୦ ଲକ୍ଷ ଟଙ୍କା ଲେଖାଏଁ କ୍ଷତିପୂରଣ ଦାବିରେ ରାସ୍ତାରୋକ କରିଛନ୍ତି ।

ଲୋକାଲ ୱାୟାର

ନୟାଗଡ଼, ନଭେମ୍ବର ୨୪(ଲୋକାଲ ୱାୟାର): ନୟାଗଡ଼ ଜିଲ୍ଲାର ଶରଣକୁଳଠାରେ ଏକ ଦ୍ରୁତଗାମୀ ଡମ୍ଫର ଧକ୍କାରେ ମଙ୍ଗଳବାର ଅପରାହ୍ଣଷର ୫ ଜଣଙ୍କର ମୃତୁ୍ୟ ହୋଇଥିବା ବେଳେ ୨ ଜଣ ଆହତ ହୋଇଥିବା ସ୍ଥାନୀୟ ଲୋକେ କହିଛନ୍ତି ।

ଶରଣକୁଳ ଚୁଡ଼ାମିଲ ନିକଟ ତଥା ବଜାର ଠାରୁ ଅନତି ଦୂରରେ ଲୋକମାନେ ରାସ୍ତା ପାର୍ଶ୍ୱରେ ଚାଲି ଚାଲି ଯାଉଥିବା ବେଳେ ଏକ ଦ୍ରୁତଗାମୀ ଡମ୍ଫର ଧକ୍କା ଦେଇଥିଲା ।

ମୃତକଙ୍କ ମଧ୍ୟରେ ୨ ଜଣ ମହିଳା ଓ ୩ ଜଣ ପୁରୁଷ ଅଛନ୍ତି । ଅନ୍ୟ ୨ ଜଣଙ୍କୁ ଆହତ ଅବସ୍ଥାରେ ଡାକ୍ତରଖାନା ନିଆଯାଇଛି । ପୁଲିସ ଡମ୍ଫରକୁ ଜବତ କରିଥିବା ବେଳେ ଡ୍ରାଇଭରକୁ ଅଟକ ରଖିଛି ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୧୬(ଲୋକାଲ ୱାୟାର): ରାଜଧାନୀର ଖଣ୍ଡଗିରି ଅଞ୍ଚଳରେ ପୁଲିସ ଜଣେ ଯୁବକକୁ ଗିରଫ କରିବା ସହ ତା’ଠାରୁ ୨୫ ଲକ୍ଷ ଟଙ୍କାର ବ୍ରାଉନସୁଗର ଓ ଏକ ଦେଶୀ ପିସ୍ତଲ ଜବତ କରିଥିବା ପୁଲିସ ସୋମବାର କହିଛି ।

ଗିରଫ ଯୁବକର ନାମ ମୁନା ସେଠୀ ଓ ସେ ନୟାଗଡ଼ ଜିଲ୍ଲା ଦଶପଲ୍ଲା ଅଞ୍ଚଳର ବାସିନ୍ଦା । ମୁନା ବ୍ରାଉନସୁଗର କାରବାର କରୁଥିବା ସୂଚନା ପାଇ ପୁଲିସ ବହୁ ଦିନ ହେଲା ତା’ ଉପେରେ ନଜର ରଖିଥିଲା ।

ଗତ କେଇ ମାସ ଧରି ସେ ଖଣ୍ଡଗିରି ଥାନା ଅନ୍ତର୍ଗତ କଳିଙ୍ଗନଗର ଅଞ୍ଚଳରେ ଭଡ଼ାରେ ରହୁଥିଲା ।

ଆଜି ତାା’ ଘର ଉପରେ ଚଢ଼ାଉ କରି ଖଣ୍ଡଗିରି ପୁଲିସ ୨୫୪ ଗ୍ରାମର ବ୍ରାଉନ ସୁଗର ଜବତ କରିଥିଲା । ଜବତ ବ୍ରାଉନସୁଗରର ମୂଲ୍ୟ ୨୫ ଲକ୍ଷ ଟଙ୍କା ହେବ । ତା’ ନିକଟରୁ ଏକ କାର୍ ଓ ବାଇକ ମଧ୍ୟ ଜବତ କରାଯାଇଛି ।

ଏତେ ପରିମାଣର ବ୍ରାଉନସୁଗର ମୁନା କେଉଁଠାରୁ ଆଣିଲା ସେ ନେଇ ତଦନ୍ତ ଚାଲିଥିବା କହିଛନ୍ତି ଡିସିପି ଉମାଶଙ୍କର ଦାସ ।

ଉଲ୍ଲେଖଯୋଗ୍ୟ, ଗତ ମାସ ୩୧ ତାରିଖରେ କ୍ରାଇମବ୍ରାଞ୍ଚ ଏସଟିଏଫ ଖଣ୍ଡଗିରି ଥାନା ଅନ୍ତର୍ଗତ ବରମୁଣ୍ଡା ବସଷ୍ଟାଣ୍ଡରୁ ବାଲେଶ୍ୱର ଜିଲ୍ଲାର ଜଳେଶ୍ୱରରୁ ଆସିଥିବା ସେକ୍ ହସିମ ବକ୍ସଠାରୁ ପ୍ରାୟ ୧ କୋଟି ଟଙ୍କା (୧ କିଲୋ ୧୭୦ ଗ୍ରାମ)ର ବ୍ରାଉନସୁଗର ଜବତ କରିଥିଲା ।

ସେ ଖଣ୍ଡଗିରି ଅଞ୍ଚଳରେ କେତେକ ଯୁବକଙ୍କୁ ନିୟମିତ ବ୍ରାଉନସୁଗର ଯୋଗାଉଥିବା ସ୍ୱୀକାର କରିଥିଲା ।

ଲୋକାଲ ୱାୟାର

ନୟାଗଡ଼,ଅକ୍ଟୋବର ୨୦(ଲୋକାଲ ୱାୟାର): ନୟାଗଡ଼ରେ ଜଣେ ଯୁବକ ମଙ୍ଗଳବାର ଜାଲ୍ ନୋଟ୍ ଦେଇ ସୋ-ରୁମରୁ ବାଇକ୍ କିଣିବାକୁ ଉଦ୍ୟମ କରୁଥିବା ବେଳେ ଗିରଫ ହୋଇଥିବା ସ୍ଥାନୀୟ ପୁଲିସ କହିଛି ।

ନୟାଗଡ଼ ଜିଲ୍ଲା ଖଣ୍ଡପଡ଼ା ଥାନା ଅନ୍ତର୍ଗତ ଶରଧାପୁର ଗ୍ରାମର ଦିବ୍ୟ ହୋତା(୪୨) ୧ ଲକ୍ଷ ୨୫ ହଜାର ଟଙ୍କା ଦେଇ ସୋ-ରୁମରୁ ଏକ ବାଇକ୍ କିଣୁଥିଲେ ।

ତେବେ ସୋ-ରୁମ୍ ମାଲିକଙ୍କର ଏହା ଜାଲ ନୋଟ୍ ବୋଲି ସନ୍ଦେହ ହେବାରୁ ସେ ପୁଲିସକୁ ଖବର ଦେଇଥିଲେ ।

ପୁଲିସ ପହଞ୍ଚି ଦିବ୍ୟଙ୍କୁ ଜେରା କରିବା ପରେ ଜଣାପଡ଼ିଥିଲା ଏହା ଜାଲ ନୋଟ୍ ।

ଏହାପରେ ନୟାଗଡ଼ ସହରରେ ସେ ରହୁଥିବା ଭଡ଼ା ଘରୁ ଏକ କମ୍ପ୍ୟୁଟର, ପି୍ରଣ୍ଟର ଓ ଅନ୍ୟାନ୍ୟ ସରଞ୍ଜାମ ଜବତ କରାଯାଇଥିବା କହିଛନ୍ତି ସ୍ଥାନୀୟ ଥାନାଧିକାରୀ ଜୟଦୀପ ମହାନ୍ତି ।

ଲୋକାଲ ୱାୟାର

ନୟାଗଡ଼, ଅକ୍ଟୋବର ୧୪ (ଲୋକାଲ ୱାୟାର) : ନୟାଗଡ଼ ଜିଲ୍ଲା ଦଶପଲ୍ଲା ଡିହଗାଁରେ ବୁଧବାର ସକାଳେ ବଜ୍ରପାତରେ ୨ ଜଣଙ୍କ ମୃତ୍ୟୁ ଘଟିଥିବା ସ୍ଥାନୀୟ ଲୋକେ କହିଛନ୍ତି ।

ଘରେ ଥିବା ବେଳେ ବଜ୍ରପାତରେ ଉଦ୍ୟନାଥ ପ୍ରଧାନ ଓ ଆଶାଲତା ସାହୁ ଗୁରୁତର ଆହତ ହୋଇଥିଲେ ।

ଉଭୟଙ୍କୁ ଚିକିତ୍ସା ପାଇଁ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା ।

ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ ।

ଲୋକାଲ ୱାୟାର

ନୟାଗଡ଼, ସେପ୍ଟେମ୍ବର ୨୭(ଲୋକାଲ ୱାୟାର): ନୟାଗଡ଼ ଜିଲ୍ଲାର ରଣପୁର ଥାନାଞ୍ଚଳରେ ସମ୍ପତ୍ତି ଲୋଭରେ ଜଣେ ଯୁବକ ସମ୍ପର୍କୀୟ ନାବାଳକକୁ ହତ୍ୟା କରିଥିବା ନେଇ ଅଭିଯୋଗ ହୋଇଥିବା ସ୍ଥାନୀୟ ପୁଲିସ ରବିବାର କହିଛି ।

ଶନିବାର ବିଳମ୍ବିତ ରାତିରେ ରଣପୁର ଥାନା ଅନ୍ତର୍ଗତ ମହତପଲ୍ଲା ଗ୍ରାମର ଜୟନ୍ତୀ ବେହେରାଙ୍କ ୧୪ ବର୍ଷର ପୁତ୍ର ସୁମନ୍ତ ବେହେରାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି ।

ସୁମନ୍ତଙ୍କ ପିତାଙ୍କର ୮ ବର୍ଷ ତଳେ ମୃତ୍ଯୁ ହୋଇଥିଲା । ଏହାପରେ ତାଙ୍କ ପରିବାରକୁ ୫ ଲକ୍ଷ ଟଙ୍କାର ସହାୟତା ମିଳିଥିଲା ।

ଏହି ସହାୟତା ଅର୍ଥ ପାଇଁ ସମ୍ପର୍କୀୟ ସୋମନାଥ ବେହେରା ସୁମନ୍ତଙ୍କୁ ହତ୍ୟା କରିଥିବା ଅଭିଯୋଗ ହୋଇଛି । ସୁମନ୍ତ ନବମ ଶ୍ରେଣୀରେ ପଢ଼ୁଥିଲେ ।

ସୁମନ୍ତଙ୍କ ମା’ ଜୟନ୍ତୀ ବିଦ୍ୟାଳୟରେ ରୋଷେୟା ଭାବେ କାମ କରି ପରିବାର ଖର୍ଚ୍ଚ ଉଠାଉଥିଲେ ।

ମୃତ ଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଯିବା ପରେ ଅଭିଯୁକ୍ତକୁ ଅଟକ ରଖି ହତ୍ୟା ଅଭିଯୋଗର ତଦନ୍ତ ଚାଲିଥିବା କହିଛନ୍ତି ରଣପୁର ଥାନାଧିକାରୀ ଜ୍ୟୋତିରଞ୍ଜନ ପଣ୍ଡା ।

ଲୋକାଲ ୱାୟାର

ନୟାଗଡ଼, ସେପ୍ଟେମ୍ବର ୧୫(ଲୋକାଲ ୱାୟାର): ନୟାଗଡ଼ ଜିଲ୍ଲାର ଦଶପଲ୍ଲାଠାରେ ଏକ ମଙ୍ଗଳବାର ଏକ ଦୁର୍ଘଟଣା ପରେ ବାଇକ ସହ ବାଇକ ଆରୋହୀ ଜଳି ଯାଇଥିବା ସ୍ଥାନୀୟ ପୁଲିସ କହିଛି ।

ଦଶପଲ୍ଲା ଥାନା ଅନ୍ତର୍ଗତ ଜାତୀୟ ରାଜପଥ ନଂ-୫୭ର ରଙ୍ଗମାଟିଆଠାରେ ଏକ ଆମ୍ବୁଲାନ୍ସ ସହ ବିପରୀତ ଦିଗରୁ ଆସୁଥିବା ଏକ ବାଇକର ମୁହାଁମୁହିଁ ଧକ୍କା ହୋଇଥିଲା ।

ଦୁର୍ଘଟଣା ଏତେ ଭୟାବହ ଥିଲା ଯେ ବାଇକଟିରେ ନିଆଁ ଲାଗି ଯାଇଥିଲା ଏବଂ ଆରୋହୀ ଜଣକ ମଧ୍ୟ ଜଳି ଯାଇ ପ୍ରାଣ ହରାଇଥିଲେ ।

ସ୍ଥାନୀୟ ଅଗ୍ନିଶମ କର୍ମଚାରୀ ପହଞ୍ଚି ନିଆଁ ଲିଭାଇବା ପରେ ପୁଲିସ ମୃତଦେହକୁ ନିକଟସ୍ଥ ଡାକ୍ତରଖାନାକୁ ବ୍ୟବଚ୍ଛେଦ ପାଇଁ ପଠାଇଛି । ମୃତ ଯୁବକଙ୍କ ପରିଚୟ ମିଳିପାରିନଥିବା ପୁଲିସ କହିଛି ।

ଲୋକାଲ ୱାୟାର

ନୟାଗଡ଼, ସେପ୍ଟେମ୍ବର ୯ (ଲୋକାଲ ୱାୟାର) : ନୟାଗଡ଼ ଜିଲ୍ଲା ଇଟାମାଟି ଥାନା ବାଉଁଶିଆପଡ଼ା ମାଳିସାହି ଗାଁରେ ମଙ୍ଗଳବାର ରାତି ପ୍ରାୟ ୩ଟାରେ ଜମିବାଡି ବିବାଦ ନେଇ ଜଣେ ବ୍ୟକ୍ତିଙ୍କୁ ଅତି ବିଭତ୍ସ ଭାବେ ହତ୍ୟା କରାଯାଇଥିବା ନେଇ ଅଭିଯୋଗ ହୋଇଛି ବୋଲି ବୁଧବାର ସ୍ଥାନୀୟ ପୁଲିସ କହିଛି ।

ମୃତକ ଜଣକ ହେଲେ କ୍ଷେତ୍ରବାସୀ ମହାପାତ୍ର । ଗାଁ ଦାଣ୍ଡରେ କ୍ଷେତ୍ରବାସୀଙ୍କୁ ଗୋଡାଇ ଗୋଡାଇ ହାଣି ଦିଆଯାଇଛି ବୋଲି ଅଭିଯୋଗରେ କୁହାଯାଇଛି ।

ଗାଁ ଦାଣ୍ଡରେ ମୃତଦେହ ପଡି ରହିଥିବା ବେଳେ ପୁଲିସ ପହଞ୍ଚି ଜବତ କରିବା ସହ ତଦନ୍ତ ଆରମ୍ଭ କରିଛି ।

ହତ୍ୟା ଅଭିଯୋଗରେ ପୁଲିସ ୨ ଜଣକୁ ଅଟକ ରଖି ପଚରାଉଚରା କରୁଛି । ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ମଧ୍ୟ ପହଞ୍ଚି ତଦନ୍ତ ଆରମ୍ଭ କରିଛି ।

ସୂଚନା ଅନୁସାରେ, ଗତକାଲି ରାତିରେ ଗାଁର କିଛି ଲୋକଙ୍କ ସହିତ କ୍ଷେତ୍ରବାସୀଙ୍କର ଜମିବାଡି ବିବାଦକୁ ନେଇ ଝଗଡା ହୋଇଥିଲା । ଏନେଇ ସେ ଥାନା ଅଭିଯୋଗ କରିଥିଲେ ।

ପୁଲିସ ତାଙ୍କ ସହିତ ଝଗଡା କରିଥିବା ଲୋକଙ୍କୁ ବୁଝାସୁଝା କରିବା ସହ ସକାଳେ ସମସ୍ୟାର ସମାଧନ କରାଯିବ ବୋଲି କହିଥିଲା ।

ଏହାପରେ କ୍ଷେତ୍ରବାସୀ ଘରକୁ ଫେରିଥିଲେ । ଫେରିବା ପରେ ତାଙ୍କୁ ହତ୍ୟା କରାଯାଇଛି ।

ଲୋକାଲ ୱାୟାର