ପରିବେଶ

ଭବାନୀପାଟଣା, ଫେବ୍ରୁଆରି ୧୪ (ଲୋକାଲ ୱାୟାର): ରାସ୍ତା ଖଣ୍ଡେ କରିବା ଲାଗି ପ୍ରଶାସନ ପାଖରେ ଗୁହାରୀ କଲେ ବି ନଶୁଣିବାରୁ ନିଜ ଉଦ୍ୟମରେ କଳାହାଣ୍ଡି ଜିଲ୍ଲା ଲାଞ୍ଜିଗଡ ବ୍ଲକ ଅନ୍ତର୍ଗତ ଟୁରିସେମେଲ ଗାଁଲୋକେ ରାସ୍ତା ନିର୍ମାଣ କରୁଛନ୍ତି।

ହାତରେ ଖଣତି ଓ କୋଦାଳ ଆଉ ମୁଣ୍ଡରେ ଝୁଡି ଧରି ସକାଳୁ ସକାଳୁ ଗାଁର ଶତାଧିକ ମହିଳା ଓ ପୁରୁଷ ଗଲା କିଛିଦିନ ହେଲା ଶ୍ରମଦାନ କରି ରାସ୍ତା ତିଆରି କାମରେ ଲାଗିଛନ୍ତି।

ଟୁରିସେମେଲ ଗାଁରେ ରହନ୍ତି ପ୍ରାୟ ୫୦ ପରିବାର ଓ ଲୋକସଂଖ୍ୟା ୨୫୦।

ହେଲେ ଗାଁକୁ ଯିବା ପାଇଁ ରାସ୍ତା ନଥିବାରୁ ଲୋକେ ଦୀର୍ଘଦିନରୁ ସ୍ଥାନୀୟ ଲୋକପ୍ରତିନିଧିଙ୍କଠାରୁ ଜିଲ୍ଲା ପ୍ରଶାସନକୁ ଗୁହାରି ବିଫଳ ହେବାରୁ ନିଜେ ରାସ୍ତା ନିର୍ମାଣ ପାଇଁ ନିଷ୍ପତ୍ତି ନେଇଛନ୍ତି।

ପରିବାରରୁ ଜଣେ ଲେଖାଏଁ ସଦସ୍ୟ ଦୈନିକ ଶ୍ରମଦାନ କରି ପ୍ରାୟ ୫ କିଲୋମିଟର ପାହାଡ କାଟି ରାସ୍ତା ନିର୍ମାଣ କରବେ ଓ ପୁଇଗୁଡା ପର୍ଯ୍ୟନ୍ତ ରାସ୍ତା ସଂଯୋଗ କରିବେ ବୋଲି କହିଛନ୍ତି।

ଯେଉଁ ପରିବାର ସଦସ୍ୟ ଶ୍ରମଦାନରେ ଭାଗ ନେବେନାହିଁ, ସେମାନଙ୍କୁ ଦୈନିକ ୧୦୦ ଟଙ୍କା ଜରିମାନା ବ୍ୟବସ୍ଥା ବି ଗାଁଲୋକେ କରିଛନ୍ତି ।

ସେମାନଙ୍କର ଆଶା, ଆସନ୍ତା ୩ ମାସ ମଧ୍ୟରେ ଏହି ରାସ୍ତା ସମ୍ପୂର୍ଣ୍ଣ ହେବ ଏବଂ ସେମାନଙ୍କର ଦୁଃଖ ଯିବ।

ଲୋକାଲ୍ ଓ୍ବାୟାର୍

ପୁରୀ, ଫେବ୍ରୁଆରି ୧୩ (ଲୋକାଲ ୱାୟାର): ହିନ୍ଦୁ ଧର୍ମର ଆସ୍ଥା ଓ ବିଶ୍ୱାସ ସହ ଜଡ଼ିତ ପବିତ୍ର ସ୍ୱର୍ଗଦ୍ୱାରର ଉନ୍ନତିକରଣ କାର୍ଯ୍ୟ ଗୁରୁବାର ବିଧିବଦ୍ଧ ଆରମ୍ଭ ହୋଇଛି।

ଜିଲ୍ଲାପାଳ ବଲବନ୍ତ ସିଂହ, ଓଡିଶା ସେତୁ ନିର୍ମାଣ ନିଗମ (ଓବିସିସି) ଓ ଫୋନିକ୍ସ ଫାଉଣ୍ଡେସନ୍ ଅଧିକାରୀଙ୍କ ଉପସ୍ଥିତିରେ ଆଜି ସକାଳେ ପୂଜାର୍ଚ୍ଚନା ପରେ ଏକ ଏକର ପରିମିତ ଅଞ୍ଚଳରେ ମାପଚୁପ କରାଯାଇଛି।

ସ୍ୱର୍ଗଦ୍ବାରର ଉନ୍ନତିକରଣ ପାଇଁ ରାଜ୍ୟ ସରକାର ୫ କୋଟି ଟଙ୍କାର ଅନୁଦାନ ଘୋଷଣା କରିବା ପରେ ପ୍ରଥମେ ଉଚ୍ଛେଦ କାର୍ଯ୍ୟ ଆରମ୍ଭ ହୋଇଥିଲା।

ପରେ ଏହାର ଅଧା ଅଂଶକୁ ଶବ ସତ୍କାର ପାଇଁ ସଂରକ୍ଷିତ ରଖାଯାଇ ଅନ୍ୟ ଅଂଶରେ ଥିବା ଟିକେଟ୍ ଘର, ପଥଶ୍ରାଦ୍ଧ ଗୃହ ଓ ଯାତ୍ରୀ ପ୍ରତୀକ୍ଷାଳୟ ଉଚ୍ଛେଦ କରାଯାଇ ଟିଣ ଚାଦର ଘେରାଇ ରଖାଯାଇଥିଲା।

ଏହି କ୍ରମରେ ଏଠାରେ ଥିବା ବିଜୁ ପଟ୍ଟନାୟକ ସମାଧିସ୍ଥଳକୁ ମଧ୍ୟ ସ୍ଥାନାନ୍ତର କରାଯାଇଥିଲା।

ସୂଚନାଯୋଗ୍ୟ, ଆନ୍ଧ୍ରପ୍ରଦେଶର ମହାପ୍ରସ୍ଥାନମ୍ ଢାଞ୍ଚାରେ ଏହି ଉନ୍ନୟନ କାର୍ଯ୍ୟ ଆରମ୍ଭ ହୋଇଛି।

ପୂର୍ବରୁ ହୋଇଥିବା ଡିଜାଇନରେ ସାମାନ୍ୟ ପରିବର୍ତ୍ତନ ହୋଇଥିବାବେଳେ ମୁଖ୍ୟ ରାସ୍ତା ସହ ଡାହାଣ ପାର୍ଶ୍ୱରେ ଉଚ୍ଛେଦ ହୋଇଥିବା ଖାଲି ସ୍ଥାନର ସମାନ୍ତରାଳ ଭାବେ ଏହି କାର୍ଯ୍ୟ କରାଯିବ।

ଓଡିଶା ସେତୁ ନିର୍ମାଣ ନିଗମ (ଓବିସିସି) ଓ ଫୋନିକ୍ସ ଫାଉଣ୍ଡେସନର ମିଳିତ ସହଯୋଗରେ ଶ୍ମଶାନ ଘାଟ ସୌନ୍ଦର୍ଯ୍ୟକରଣ କରାଯାଉଛି।

ପ୍ରଥମ ପର୍ଯ୍ୟାୟରେ ୧୪ ଯୋଡା ଶଵ ସତ୍କାର ପାଇଁ ବ୍ୟବସ୍ଥା ହେଉଛି ଏବଂ ୬ ମାସ ମଧ୍ୟରେ ଏହି ପ୍ରକଳ୍ପ ଶେଷ କରିବାକୁ ଲକ୍ଷ୍ୟ ରଖାଯାଇଛି।

ସେହିପରି ଦ୍ୱିତୀୟ ପର୍ଯ୍ୟାୟରେ ଶଵଦାହ ପିଣ୍ଡି, ଅସ୍ଥି ସଂରକ୍ଷଣ ଲକର୍, ସ୍ନାନାଗାର, ପାନୀୟ ଜଳ ବ୍ୟବସ୍ଥା ଓ ଯାତ୍ରୀ ପ୍ରତୀକ୍ଷାଳୟ ଭଳି ଆଧୁନିକିକରଣ ପ୍ରକଳ୍ପ କରାଯିବ।

ଲୋକାଲ୍ ଓ୍ବାୟାର୍

ବ୍ରହ୍ମପୁର, ଫେବ୍ରୁଆରୀ ୦୭(ଲୋକାଲ ୱାୟାର): ଦୁଇ ବର୍ଷ ତଳେ ବିଶ୍ବବ୍ୟାଙ୍କ ସହାୟତାରେ ବ୍ରହ୍ମପୁର ମହାନଗର ନିଗମ ପକ୍ଷରୁ ଆରମ୍ଭ ହୋଇଥିବା ରାସ୍ତା ନିର୍ମାଣ କାର୍ଯ୍ୟ ମନ୍ଥର ଗତିରେ ଚାଲିଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।

ଡିସେମ୍ବର ୨୦୧୭ରେ ଆରମ୍ଭ ହୋଇଥିବା ୨.୬ କିଲୋମିଟରର ଏହି ରାସ୍ତା କାମ ବର୍ଷକ ମଧ୍ୟରେ ସରିବାର ଥିଲେ ବି ବର୍ତ୍ତମାନ ସୁଦ୍ଧା ଏହା ଶେଷ ହୋଇପାରିନାହିଁ।

୪୬ କୋଟି ୨୦ ଲକ୍ଷ ଟଙ୍କା ବ୍ୟୟରେ ନିର୍ମିତ ହେଉଥିବା ଏହି ରାସ୍ତା କାମର ଅଗ୍ରଗତି ସଂପର୍କରେ ଜାଣିବାକୁ ନିକଟରେ ବିଶ୍ବବ୍ୟାଙ୍କର ତିନିଜଣିଆ ପ୍ରତିନିଧି ଦଳ ବ୍ରହ୍ମପୁର ଆସି ଅସନ୍ତୋଷ ପ୍ରକାଶ କରିଛନ୍ତି।

ଅପରପକ୍ଷରେ ଆସନ୍ତା ମାର୍ଚ୍ଚ ସୁଦ୍ଧା ଏହି କାମ ସାରିବାକୁ ମହାନଗର ନିଗମ ପ୍ରତିଶ୍ରୁତି ଦେଇଛି।

ବ୍ରହ୍ମପୁର ମହାନଗର ନିଗମ କମିଶନର୍ ଚକ୍ରବର୍ତ୍ତୀ ସିଂହ ରାଠୋର କହିଛନ୍ତି ଯେ, ଡିସେମ୍ବର ୨୦୧୮ରେ ଏହି କାମ ସରିବାର ଥିବାବେଳେ ଏଥିରେ ସଂପୃକ୍ତ ଠିକାଦାର ଏହାର ଅବଧି ଆଉ ବର୍ଷେ ବୃଦ୍ଧି କରିବାକୁ ଅନୁରୋଧ କରିଥିଲେ।

ଏବେ ଆସନ୍ତା ମାର୍ଚ୍ଚ ଭିତରେ କାମ ନସାରିଲେ ଏହି ଠିକାସଂସ୍ଥାକୁ କଳା ତାଲିକାଭୁକ୍ତ କରାଯିବ ବୋଲି ସେ ଚେତାବନୀ ଦେଇଛନ୍ତି।

ସୂଚନା ଅନୁସାରେ, ରାସ୍ତାରେ ଖର୍ଚ୍ଚ ହେବାକୁ ଥିବା ସମୁଦାୟ ୪୬ କୋଟି ୨୦ ଲକ୍ଷ ଟଙ୍କାରୁ ବର୍ତ୍ତମାନ ସୁଦ୍ଧା ମାତ୍ର ୧୦ କୋଟି ୨୦ ଲକ୍ଷ ଟଙ୍କା ଖର୍ଚ୍ଚ ହୋଇପାରିଛି।

କେବଳ ଏହି ରାସ୍ତା ନୁହେଁ, ବିଶ୍ବବ୍ୟାଙ୍କ ସହାୟତାରେ ୧୮ କୋଟି ୪୩ ଲକ୍ଷ ଟଙ୍କା ବ୍ୟୟରେ ହେବାକୁ ଥିବା ସାଢ଼େ ତିନି କିଲୋମିଟର ଲମ୍ବ ଡ୍ରେନେଜ୍ କାମ ମଧ୍ୟ ଅନୁରୂପ ଭାବେ ପଛରେ ପଡ଼ିଛି।

ଗତ ବର୍ଷ ମାର୍ଚ୍ଚରେ ଏହି କାମ ଆରମ୍ଭ ହୋଇଥିଲା ଏବଂ ଏହା ଦେଢ଼ ମାସ ମଧ୍ୟରେ ସରିବାର ଥିଲେ ବି ବର୍ତ୍ତମାନ ସୁଦ୍ଧା ମାତ୍ର ୧ କୋଟି ୩୨ ଲକ୍ଷ ଟଙ୍କା ଖର୍ଚ୍ଚ ହୋଇପାରିଛି।

ଅଦିନିଆ ବର୍ଷା ଓ ଇଲେକ୍ଟ୍ରି ଖୁଣ୍ଟି ତଥା ପାଣି ପାଇପ୍ ସ୍ଥାନାନ୍ତର ଏବଂ ଜମି ଅଧିଗ୍ରହଣ ସମସ୍ୟା ଯୋଗୁଁ ଏଥିରେ ବିଳମ୍ବ ହୋଇଥିବା ମହାନଗର ନିଗମ କମିଶନର୍ କହିଛନ୍ତି।

ଏହି କାମ ମଧ୍ୟ ଆସନ୍ତା ମାର୍ଚ୍ଚ ଶେଷ ସୁଦ୍ଧା ସରିବ ବୋଲି ସେ ସୂଚନା ଦେଇଛନ୍ତି।

ଏସବୁ କାମ ସରିପାରୁନଥିବାରୁ ଲୋକେ ନାହିଁ ନଥିବା ସମସ୍ୟା ଭୋଗୁଥିବା ସ୍ଥାନୀୟ ପ୍ରେମ ନଗରର ଦୁର୍ଗାପ୍ରସାଦ ପଣ୍ଡା କହିଛନ୍ତି।

ବିଶେଷକରି ବର୍ଷା ହେଲେ ଏହି ରାସ୍ତାରେ ଯାତାୟାତ ଅସମ୍ଭବ ହୋଇପଡୁଥିବାରୁ ଲୋକେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି।

ଲୋକାଲ୍ ଓ୍ବାୟାର୍

କେନ୍ଦ୍ରାପଡ଼ା, ଫେବ୍ରୁଆରୀ ୫(ଲୋକାଲ ୱାୟାର): କେନ୍ଦ୍ରାପଡ଼ା ଜିଲ୍ଲାର ଭିତରକନିକା ଜାତୀୟ ଉଦ୍ୟାନ ନିକଟ ନଳିତାପଟିଆ ଗାଁରେ ଫେବ୍ରୁଆରୀ ୭ରୁ ଅନୁଷ୍ଠିତ ହେବାକୁ ଥିବା ତିନିଦିନିଆ ଭିତରକନିକା ଉତ୍ସବକୁ ପ୍ରବଳ ବର୍ଷା ଓ ଖରାପ ପାଗ ପାଇଁ ଫେବ୍ରୁଆରୀ ୧୪କୁ ଘୁଞ୍ଚାଇ ଦିଆ ଯାଇଛି ।

ପାଣିପାଗ ବିଭାଗ ଖରାପ ପାଗ ରହିବା ନେଇ ପୂର୍ବାନୁମାନ କରିଥିବାରୁ ତିନିଦିନିଆ ଭିତରକନିକା ଉତ୍ସବକୁ ଫେବ୍ରୁଆରୀ ୧୪ରୁ ୧୬ରେ ପାଳନ କରିବାକୁ ନିଷ୍ପତ୍ତି ହୋଇଛି ।

ପୂର୍ବରୁ ଏହି ଉତ୍ସବ ଫେବ୍ରୁଆରୀ ୭ରୁ ୯ ଯାଏଁ ଆୟୋଜିତ କରିବାକୁ ନିଷ୍ପ୍‌ତ୍ତି ହୋଇଥିଲା ।

ପର୍ଯ୍ୟଟନ, ଓଡିଶା ଭାଷା, ସାହିତ୍ୟ ଓ ସଂସ୍କୃତି ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ଫେବ୍ରୁଆରୀ ୧୪ରେ ଏହି ଉତ୍ସବକୁ ଉଦଘାଟନ କରିବେ ।

ବୁଧବାର ପ୍ରବଳ ବର୍ଷା ଯୋଗୁଁ ଉତ୍ସବ ପଡିଆ ଓଦା ହୋଇଯାଇଛି ବୋଲି ଭିତରକନିକା ଡିଏଫଓ ବିକାଶ ରଞ୍ଜନ ଦାଶ କହିଛନ୍ତି ।

ବନ ବିଭାଗ, ଜିଲ୍ଲା ପ୍ରଶାସନ ଓ ପର୍ଯ୍ୟଟନ ବିଭାଗ ମିଳିତ ଭାବେ ଆୟୋଜନ କରୁଥିବା ଏହି ଉତ୍ସବଟି ଦେଶର ଦ୍ୱିତୀୟ ବୃହତ ହେନ୍ତାଳ ବଣରେ ହେଉଥିବାରୁ ଅନେକ ପର୍ଯ୍ୟଟକଙ୍କୁ ଆକର୍ଷିତ କରିବ ।

ଏହି ଉତ୍ସବ ପାଇଁ ଜିଲ୍ଲା ପ୍ରଶାସନ ୩୦ ଲକ୍ଷ ଟଙ୍କା ଖର୍ଚ୍ଚ କରିବ । ସୁନ୍ଦର ଜଳାଶୟ ସହିତ ସବୁଜ ହେନ୍ତାଳ ବଣ ଓ କୁମ୍ଭୀର, ପକ୍ଷୀ, ସାପ ଓ ଅନ୍ୟ ଜୀବଜନ୍ତୁ ଏହି ଉଦ୍ୟାନର ସମ୍ପତି ।

ଏଠାକାର ମନୋରମ ଦୃଶ୍ୟ ଓ ଶାନ୍ତ ପରିବେଶରେ ଯେକେହି ମୋହିତ ହେବ । ବନ୍ୟପ୍ରାଣୀଙ୍କୁ ଅସୁବିଧାରେ ନପକାଇବା ପାଇଁ ଉଦ୍ୟାନ ଠାରୁ ୬ କିଲୋମିଟର ଦୂର ନଳିତାପାଟିଆ ଗାଁରେ ଏହି ଉତ୍ସବ ଆୟୋଜନ କରିବାକୁ ନିଷ୍ପତି ହୋଇଛି ।

ଭିତରକନିକା ଜାତୀୟ ଉଦ୍ୟାନରେ ଚିତ୍ରା ହରିଣ, ଲୁଣି ପାଣି କୁମ୍ଭୀର, ଗୋଧି, ଅଜଗର ଓ ସମ୍ଭର ଭଳି ଅନେକ ପ୍ରଜାତିର ବନ୍ୟଜନ୍ତୁ ବାସ କରନ୍ତି ।

ଶୀତଦିନେ ବହୁ ସଂଖ୍ୟାରେ ଭ୍ରମଣକାରୀ ପକ୍ଷୀ ଏଠାକୁ ଆସିଥାନ୍ତି । ଏହି ଉତ୍ସବ ପକ୍ଷୀ ସଂରକ୍ଷଣ, କୁମ୍ଭୀର ଓ ଅନ୍ୟ ପଶୁଙ୍କ ସମ୍ପର୍କରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବ ବୋଲି ବନ ଅଧିକାରୀ କହିଛନ୍ତି ।

ତିନିଦିନିଆ ଉତ୍ସବରେ ଫଟୋ ପ୍ରଦର୍ଶନୀ, ସେମିନାର ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେବ । ଭିତରକନିକା ଓ ଅନ୍ୟ ବନ୍ୟପ୍ରାଣୀଙ୍କ ସମ୍ପର୍କରେ ଏହି ଅବସରରେ ଫିଲ୍ମ ପ୍ରଦର୍ଶିତ ହେବ ।

ଲୋକାଲ ୱାୟାର

ଭବାନୀପାଟଣା, ଫେବୃଆରୀ ୧ (ଲୋକାଲ ୱାୟାର)କଳାହାଣ୍ଡି ଜିଲ୍ଲାର ଗୋଲାମୁଣ୍ଡା ବ୍ଲକରେ ୮ଟି ପଞ୍ଚାୟତର ବାସିନ୍ଦା ଏବେ ବି ବିପଦଜନକ ଅବସ୍ଥାରେ ଦେଶୀ ଡଙ୍ଗା
ରେ ତେଲ ନଦୀରେ ଯିବା ଆସିବା କରୁଥିବା ଜଣେ ଗ୍ରାମବାସୀ ଶନିବାର କହିଛନ୍ତି ।

ଏହି ଯାତ୍ରା କରୁଥିବା ଅଧିକାଂଶ ଲୋକ ଗରିବ । ଅନ୍ୟ ରାସ୍ତା ଦେଇ ସଦରମହୁକୁମା ଭବାନୀପାଟଣାକୁ ଯିବାକୁ ହେଲେ ବଡଚେରଗାଁ, ଉଛୁଲା, ଚହାକା, ନୂଆଗାଁ ଆଦି ପଞ୍ଚାୟତର ଅଧିବାସୀଙ୍କୁ ୬୦ ରୁ ୮୦ କିଲୋମିଟର ଯିବାକୁ ପଡିଥାଏ ।

କିନ୍ତୁ ନଦୀ ରାସ୍ତା ଦେଇ ଗଲେ ସେମାନଙ୍କୁ ମାତ୍ର ୨୫ ରୁ ୩୦ କିଲୋମିଟର ପଡିଥାଏ ।

ଖରା ଓ ଶୀତ ଦିନରେ ଲୋକେ ଠିକ ଭାବରେ ଉକ୍ତ ଦେଶୀ ଡଙ୍ଗାରେ ନଦୀ ପାର ହେଉଥିବା ବେଳେ ବର୍ଷା ଦିନ ଆସିଲେ ଲୋକେ ଭଗବାନକୁ ଡାକି ନଦୀରେ ଯାତ୍ରା କରିଥାନ୍ତି ।

ଗୋଲାମୁଣ୍ଡା ବ୍ଳକ ଉକ୍ତ ଅଞ୍ଚଳର ବଡଚେରଗାଁ,ଉଛୁଲା,ଚହାକା,ନୂଆଗାଁ ପଞ୍ଚାୟତର ହଜାର ହଜାର ଜନସାଧାରଣ ସ୍ୱାସ୍ଥ୍ୟ ହେଉ ଅବା ନିତିଦିନିଆ ବ୍ୟବସାୟୀକ କାମ ପାଇଁ ଜିଲ୍ଲାର ସଦରମହୁକୁମା ଭବାନୀପାଟଣା ଉପରେ ନିର୍ଭର କରନ୍ତି ।

ଲୋକାଲ ୱାୟାର

ଭୁବନେଶ୍ବର, ଫେବ୍ରୁଆରୀ ୦୧(ଲୋକାଲ ୱାୟାର): ଏଣିକି ଭୁବନେଶ୍ବର ରାସ୍ତାରେ ଖୋଲା ଗାଈଗୋରୁ ଛାଡ଼ିଲେ ସଂପୃକ୍ତ ଗୋରୁମାଲିକଙ୍କଠାରୁ ଭୁବନେଶ୍ବର ମହାନଗର ନିଗମ ପାଞ୍ଚ ହଜାର ଟଙ୍କାର ଜରିମାନା ନେବ।

ଶୁକ୍ରବାର ମହାନଗର ନିଗମର ଅତିରିକ୍ତ କମିଶନର ଅବନିକାନ୍ତ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିଥିବାନ ବବୈଠକରେ ଏହି ନିଷ୍ପତ୍ତି ହୋଇଥିବା ସୂଚନା ମିଳିଛି।

ଭୁବନେଶ୍ବର ମହାନଗର ନିଗମ ଅଞ୍ଚଳରେ ପ୍ରାୟ ୧୨ ହଜାର ଗୃହପାଳିତ ଗାଈଗୋରୁ ଥିବାର ପଶୁସମ୍ପଦ ବିଭାଗ କହୁଥିବାବେଳେ ବିଭିନ୍ନ ସମୟରେ ଗୃହପାଳିତ ଗାଈଗୋରୁ ବିଭିନ୍ନ ରାସ୍ତାରେ ବୁଲି ସମସ୍ୟା ସୃଷ୍ଟି କରୁଥିବା ଅଭିଯୋଗ ହୁଏ।

ଏହାକୁ ଦୃଷ୍ଟିରେ ରଖି ଆସନ୍ତା ମାର୍ଚ୍ଚରୁ ଗୃହପାଳିତ ଗାଈଗୋରୁଙ୍କୁ ରାସ୍ତା ଉପରେ ଦେଖିଲେ ମହାନଗର ନିଗମର ସ୍ବତନ୍ତ୍ର ସ୍କ୍ବାଡ୍ ତାକୁ କାଞ୍ଜିଆହୁଦାକୁ ନେଇଯିବେ।

ସଂପୃକ୍ତ ଗାଈମାଲିକଙ୍କୁ ପାଞ୍ଚଚ ହଜାର ଟଙ୍କା ଜରିମାନା ଦେଇ ତାଙ୍କ ଗାଈ ମୁକୁଳାଇବାକୁ ପଡ଼ିବ।

ସେହିପରି ଦ୍ୱିତୀୟ ଥର ଏପରି ହେଲେ ସଂପୃକ୍ତ ମାଲିକଙ୍କୁ ଆଉ ଗାଈଟିକୁ ଫେରାଯିବ ନାହିଁ ଏବଂ ଏହି ଗାଈକୁ ବିଏମ୍‌ସି ସ୍ୱୟଂ ସହାୟକ ଗୋଷ୍ଠୀକୁ ହସ୍ତାନ୍ତର କରିଦେବା ନିଷ୍ପତ୍ତି ହୋଇଛି।

ଲୋକାଲ୍ ଓ୍ବାୟାର୍

ବ୍ରହ୍ମପୁର, ଜାନୁଆରୀ ୨୮ (ଲୋକାଲ ୱାୟାର): ଆସନ୍ତା ୩୧ ପହିଲାରୁ ବ୍ରହ୍ମପୁରରେ କଠିନ ବର୍ଜ୍ୟବସ୍ତୁ ପରିଚାଳନା ପ୍ଲାଣ୍ଟ କାର୍ଯ୍ୟ କରିବ।

ବ୍ରହ୍ମପୁର ମହାନଗର ନିଗମ ପକ୍ଷରୁ ସହର ଉପକଣ୍ଠରେ ୪୨ କୋଟି ଟଙ୍କାରେ ନିର୍ମିତ ହେଉଥିବା ଏହି ପ୍ରକଳ୍ପରେ ଏବେ ଯନ୍ତ୍ରପାତି ସଂଯୋଗ କାମ ଚାଲିଛି।

“ଆସନ୍ତା ମାର୍ଚ୍ଚ ୩୧ ସୁଦ୍ଧା ଉଭୟ କଠିନ ଓ ଓଦା ବର୍ଜବସ୍ତୁ ପରିଚାଳନା ପ୍ରକଳ୍ପ କାର୍ଯ୍ୟ ସରିବ ଏବଂ ଏପ୍ରିଲ ପହିଲାରୁ ଏହା କାର୍ଯ୍ୟକାରୀ ହେବ” ବୋଲି କହିଛନ୍ତି ବ୍ରହ୍ମପୁର ମହାନଗଦର ନିଗମ କମିଶନର୍ ଚକ୍ରବର୍ତ୍ତୀ ସିଂହ ରାଠୋର।

ପ୍ରକଳ୍ପ ପାଇଁ ମହାରାଷ୍ଟ୍ରର ଏକ କମ୍ପାନୀ ସହ ମହାନଗର ନିଗମ ଚୁକ୍ତି କରିଥିଲା ଏବଂ ୬ ଏକର ଜାଗା ଉପରେ କମ୍ପାନୀ ଜୁନ ୨୦୧୮ରେ କାମ ଆରମ୍ଭ କରିଥିଲା।

ଏହି ପ୍ରକଳ୍ପ ଆଗାମୀ ୨୦ ବର୍ଷ ଯାଏ କାର୍ଯ୍ୟ କରିବ ଏବଂ ଦୈନିକ ଏହା ୧୫୦ରୁ ୩୦୦ ଟନ୍ ବର୍ଜ୍ୟବସ୍ତୁ ପରିଚାଳନା କରିପାରିବ।

ସହରରେ ୫ଟି ଡମ୍ପିୟାର୍ଡ ପ୍ରତିଷ୍ଠା କରି ସେଠାରୁ ଏଠାକୁ ସିଧାସଳଖ ବର୍ଜ୍ୟବସ୍ତୁ ଅଣାଯିବା ବ୍ୟବସ୍ଥା ହୋଇଛି।

ଆମ୍ବପୁଆ, ନୀଳକଣ୍ଠନଗର, ନୂଆ ବସଷ୍ଟାଣ୍ଡ, ଆସ୍କାରୋଡ ଓ ହରଡ଼ାଖଣ୍ଡି ଅଂଚଳରେ ଏହି ଡମ୍ପିଂୟାର୍ଡ ରହିବ ବୋଲି ସୂଚନା ମିଳିଛି।

ଲୋକାଲ୍ ଓ୍ବାୟାର୍