ବରଗଡ

ଭୁବନେଶ୍ୱର,ମେ ୨୧(ଲୋକାଲ ୱାୟାର): ଆସନ୍ତା ୩ ଘଣ୍ଟାରେ ରାଜ୍ୟର ଅଧିକାଂଶ ଜିଲ୍ଲାରେ ଧୂଳିଝଡ଼, କାଳବୈଶାଖୀ ବର୍ଷା ଓ ବଜ୍ରପାତ ହେବାର ଆଶଙ୍କା ଥିବା ନେଇ ଭୁବନେଶ୍ୱରସ୍ଥିତ ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସତର୍କ ସୂଚନା ଜାରି କରାଯାଇଛି ।

ଗଞ୍ଜାମ, ଗଜପତି, ନୟାଗଡ଼, ଢେଙ୍କାନାଳ, କନ୍ଧମାଳ, କଟକ (କଟକ ସହର), ଖୋର୍ଦ୍ଧା (ଭୁବନେଶ୍ୱର), ଭଦ୍ରକ, ଯାଜପୁର, ଜଗତସିଂହପୁର, କେନ୍ଦ୍ରାପଡ଼ା, ମୟୂରଭଞ୍ଜ, କୋରାପୁଟ, ରାୟଗଡ଼ା, ସୁନ୍ଦରଗଡ଼, ଝାରସୁଗୁଡ଼ା ଓ ବରଗଡ ଜିଲ୍ଲା ପାଇଁ ସତର୍କ ସୂଚନା ଜାରି କରିଛି ପାଣିପାଗ ବିଭାଗ ।

ସେହିପରି କେନ୍ଦୁଝର, ନବରଙ୍ଗପୁର, ମାଲକାନଗିରି, ପୁରୀ, ବୌଦ୍ଧ, ଦେବଗଡ଼, ବାଲେଶ୍ୱର ଓ ସମ୍ବଲପୁରରେ ମଧ୍ୟ କାଳବୈଶାଖୀ ଆଶଙ୍କା ରହିଛି ।

ଏହି ସବୁ ଜିଲ୍ଲାରେ ସାଧାରଣରୁ ମଧ୍ୟମ ଧରଣର ବର୍ଷା ହେବା ସହ ଘଡଘଡି ଓ ବଜ୍ରପାତ ହେବ ବୋଲି ସତର୍କ କରାଯାଇଛି । ଏହା ସହ ୪୦ରୁ ୫୦ କିମି ବେଗରେ ପବନ ବହିପାରେ ।

ଲୋକଙ୍କୁ ନିରାପଦ ସ୍ଥାନକୁ ଯିବାକୁ ପାଣିପାଗ ବିଭାଗ ପରାମର୍ଶ ଦେଇଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଜାନୁଆରୀ ୪ (ଲୋକାଲ ୱାୟାର) : ବରଗଡ଼ ଜିଲ୍ଲା ଅତାବିରା ନିକଟସ୍ଥ ଲାଦେରପାଲି ଗ୍ରାମର ମଶାଣିଘାଟ ଓ ତାର ରାସ୍ତା ଶୋଚନୀୟ ହୋଇପଡ଼ିଥିବା ନେଇ କିଛି ଦିନ ପୂର୍ବେ ଲୋକାଲ ୱାୟାରରେ ଖବର ପ୍ରସାରଣ ହେବା ପରେ ସ୍ଥାନୀୟ ପ୍ରଶାସନ ମଶାଣିଘାଟ ଓ ରାସ୍ତା ତିଆରି କାର୍ଯ୍ୟ ଆରମ୍ଭ କରିଛି ।

ଏହି ମଶାଣିଘାଟକୁ ଶବ ନେଇ ଯିବା ବେଳେ ଲୋକମାନେ ବହୁ ଅସୁବିଧାର ସମ୍ମୁଖୀନ ହେଉଥିଲେ ।

ହେଲେ ଏବେ ଅତାବିରା ଏନଏସି ପକ୍ଷରୁ ରାସ୍ତା କାମ ଆରମ୍ଭ ହେଉଥିବାରୁ ଗ୍ରାମବାସୀ ଖୁସି ଜାହିର କରିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୨୮(ଲୋକାଲ ୱାୟାର): ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ସୋମବାର ତିନି ଜଣ କୋଟିପତିଙ୍କ ଘରେ ଭିଜିଲାନ୍ସ ଚଢ଼ାଉ ହୋଇଛି ।

ବରଗଡ଼ ଜିଲ୍ଲା ଗାଇସିଲଟ ବ୍ଲକ ପଞ୍ଚାୟତ ଏକଜିକୁ୍ୟଟିଭ୍ ଅଫିସର ପାଣ୍ଡବ ନନ୍ଦଙ୍କ ଘରେ ହୋଇଥିବା ଚଢ଼ାଉରେ ତାଙ୍କର ୧ କୋଟି ୪୩ ଲକ୍ଷ ୩୦ ହଜାର ୮୨୦ ଟଙ୍କାର ସମ୍ପତ୍ତି ଥିବା ଜଣାପଡ଼ିଛି ।

ଚଢ଼ାଉ ବେଳେ ଠାବ ହୋଇଥିବା ସ୍ଥାବର ଓ ଅସ୍ଥାବର ସମ୍ପତ୍ତି ମଧ୍ୟରେ ଅଛି ଗାଇସିଲଟ ବ୍ଲକର କାଳଙ୍ଗପଲୀ ଗ୍ରାମରେ ଥିବା ଏକ ଦୁଇ ମହଲା କୋଠା (୭୪ ଲକ୍ଷ ୬୫ ହଜାର ୨୨୬ ଟଙ୍କା), ବଲାଙ୍ଗିର ଓ ବରଗଡ଼ ଜିଲ୍ଲାରେ ଥିବା ୧୨ଟି ପ୍ଲଟ ( ୩ ଲକ୍ଷ ୭୭ ହଜାର ୮ଶହ ଟଙ୍କା), ଦୁଇଟି ଦୁଇ ଚକିଆ (୧ ଲକ୍ଷ ୫୬ ହଜାର), ସୁନା ଗହଣା (୪୪ ହଜାର ୯୭୪ ଟଙ୍କା), ଘରକରଣା ସାମଗ୍ରୀ(୪ ଲକ୍ଷ ୮୮ ହଜାର ୨୧୯ ଟଙ୍କା) ଏବଂ ୩ ଲକ୍ଷ ୪୦ ହଜାର ୯୪୦ ଟଙ୍କା ଅଛି ।

ସେହିପରି ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକର ସମବାୟ ସମିତି ସମ୍ପାଦକଙ୍କ ଘରେ ହୋଇଥିବା ଚଢ଼ାଉରେ ୧ କୋଟି ୯ ଲକ୍ଷ ୪୭ ହଜାର ୪୩୩ ଟଙ୍କାର ସମ୍ପତ୍ତି ଠାବ ହୋଇଛି । ଏହା ମଧ୍ୟରେ ରହିଛି କଣ୍ଟାମଳରେ ଏକ ଦୁଇ ମହଲା କୋଠା (୨୫ ଲକ୍ଷ ଟଙ୍କା), କଣ୍ଟାମାଳରେ ଅନ୍ୟ ଏକ କୋଠା (୨୦ ଲକ୍ଷ ୧୦ ହଜାର ଟଙ୍କା), କଣ୍ଟାମାଳରେ ୪ଟି ପ୍ଲଟ (୮୬ ହଜାର ୬୮୩ ଟଙ୍କା), ଦୁଇଟି ଚାରି ଚକିଆ (୧୧ ଲକ୍ଷ ୬୭ ହଜାର ୯୮୪ ଟଙ୍କା), ଦୁଇଟି ଟ୍ରାକ୍ଟର (୧୨ ଲକ୍ଷ ୩୫ ହଜାର ୧୨୫ ଟଙ୍କା), ୬ଟି ଦୁଇ ଚକିଆ (୪ ଲକ୍ଷ ୭୯ ହଜାର ୬୮୨ ଟଙ୍କା), ଏକ ଧାନ ପିଟା ମେସିନ (୧ ଲକ୍ଷ ଟଙ୍କା), ବିଭିନ୍ନ ବ୍ୟାଙ୍କରେ ଜମା (୩ ଲକ୍ଷ ୫୫ ହଜାର ଟଙ୍କା), ସୁନା ଅଳଙ୍କାର (୧୯ ଲକ୍ଷ ୯୫ ହଜାର), ଘରକରଣା ସାମଗ୍ରୀ (୨ ଲକ୍ଷ ୯୮ ହଜାର ୯୬୯ ଟଙ୍କା) ଏବଂ ୭ ଲକ୍ଷ ୧୮ ହଜାର ୫ ଶହ ଟଙ୍କା ।

କଳାହାଣ୍ଡି ଜିଲ୍ଲା ଭବାନୀପାଟଣା ବ୍ଲକ ଥୁଆପଦର ପଞ୍ଚାୟତ ପିଇଓ ବାଲେଶ୍ୱର ନାୟକଙ୍କ ଘରେ ହୋଇଥିବା ଚଢ଼ାଉରେ ୯୬ ଲକ୍ଷ ୪୭ ହଜାର ୭୯୮ ଟଙ୍କାର ସମ୍ପତ୍ତି ଠାବ ହୋଇଛି ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୨୫ (ଲୋକାଲ ୱାୟାର) : ବରଗଡ଼ ଜିଲ୍ଲା ଅତାବିରାର ଅବସରପ୍ରାପ୍ତ ବ୍ୟାଙ୍କ ଅଧିକାରୀ ଜୟକିଶୋର ପ୍ରଧାନ ୬୪ ବର୍ଷ ବୟସରେ ନିଟ୍ ପରୀକ୍ଷାରେ ସଫଳତାର ସହ ଉର୍ତ୍ତୀର୍ଣ୍ଣ ହେବା ପରେ ବୁର୍ଲାସ୍ଥିତ ବୀର ସୁରେନ୍ଦ୍ର ସାଏ ଭେଷଜ ଶାସ୍ତ୍ର ଓ ଗବେଷଣା ପ୍ରତିଷ୍ଠାନ (ଭିମସାର)ରେ ଗୁରୁବାର ଏମବିବିଏସ ପାଠ୍ୟକ୍ରମରେ ନାମ ଲେଖାଇଛନ୍ତି।

ଫାର୍ମାସିଷ୍ଟ ଡିଗ୍ରୀଧାରୀ ପତ୍ନୀ ପ୍ରତିଭାଙ୍କ ସହଯୋଗରୁ ଛାତ୍ର ଜୀବନର ଅପୂର୍ଣ୍ଣ ଆଶା ପୂରଣ କରିବା ସୁଯୋଗ ମିଳିଛି ବୋଲି ଜୟକିଶୋର କହିଛନ୍ତି।

ବିଲାସପୁରରେ ତାଙ୍କ ବଡ଼ ଝିଅ ଜ୍ୟୋତିପ୍ରଭା ବେଚଲର୍ ଇନ୍ ଡେଣ୍ଟାଲ ସାଇନ୍ସ (ବିଡିଏସ)ର ଦ୍ୱିତୀୟ ବର୍ଷ ଛାତ୍ରୀ ହୋଇଥିବାବେଳେ ପୁଅ ଜୟଜିତ ଦଶମ ଶ୍ରେଣୀରେ ପଢୁଛନ୍ତି ।

ଜୟକିଶୋର ପିଲାଦିନରୁ ଡାକ୍ତର ହେବାକୁ ଲକ୍ଷ୍ୟ ରଖିଥିଲେ। ହେଲେ କୌଣସି କାରଣରୁ ତାଙ୍କର ଏହି ଇଚ୍ଛା ପୂରଣ ହୋଇ ପାରି ନ ଥିଲେ । ଯାହା ସେ ପରିଣତ ବୟସରେ ସାକାର କରି ସମସ୍ତଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୧୯(ଲୋକାଲ ୱାୟାର): ବରଗଡ଼ ଜିଲ୍ଲା ନୃସିଂହନାଥ ପୀଠରେ ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି) ଦ୍ୱାରା କଟେଜ୍ ଉଦଘାଟିତ ହୋଇଯାଇଛି । ଚାରୋଟି ଅତ୍ୟାଧୁନିକ ଆବାସ ସହ ରହିବା ବ୍ୟବସ୍ଥା ହୋଇଛି ।

ଏହି ପର୍ଯ୍ୟଟନସ୍ଥଳୀକୁ ରାଜ୍ୟ ତଥା ରାଜ୍ୟ ବାହାରୁ ବହୁ ପର୍ଯ୍ୟଟକ ଆସୁଥିବାରୁ ସେମାନଙ୍କ ସୁବିଧା ପାଇଁ ପର୍ଯ୍ୟଟନ ବିଭାଗ ପ୍ରାୟ ୧କୋଟି ଟଙ୍କା ଖର୍ଚ୍ଚ କରି ଏହି କଟେଜ୍ ନିର୍ମାଣ କରିଛି ।

ଏହାକୁ ବିଧାୟକ ବିଜୟ ରଞ୍ଜନ ସିଂ ବରିହା ଉଦଘାଟନ କରିଥିଲେ । ପର୍ଯ୍ୟଟନ ବିଭାଗ ସଚିବ ସଚ୍ଚିନ୍ ରାମଚନ୍ଦ୍ର ଯାଦବ ଓ ଓଟିଡିସି ଚେୟାରମ୍ୟାନ୍ ଶ୍ରୀମୟୀ ମିଶ୍ର , ପଦ୍ମପୁର ଉପଜିଲ୍ଲାପାଳ ତନ୍ମୟ କୁମାର ଦରବାନ, ବିଡିଓ ସୁରେନ୍ଦ୍ର କୁମାର, ଜିଲ୍ଲା ପର୍ଯ୍ୟଟନ ଅଧିକାରୀ ପ୍ରମୋଦ କୁମାର ଓ ଅନ୍ୟମାନେ ଉପସ୍ଥିତ ରହି କାର୍ଯ୍ୟକୁ ପ୍ରଶଂସା କରିଥିଲେ ।

ଲୋକାଲ ୱାୟାର

ବରଗଡ଼, ଡିସେମ୍ବର ୧୬(ଲୋକାଲ ୱାୟାର): ଭିଜିଲାନ୍ସ ଚଢ଼ାଉରେ ବରଗଡ଼ ଜିଲ୍ଲା ବିଜେପୁର ବ୍ଳକ ଗଣ୍ଠିଆପାଲି ପଞ୍ଚାୟତ ହାଇସ୍କୁଲ ପ୍ରଧାନ ଶିକ୍ଷକ ପ୍ରମୋଦ ପାଣିଗ୍ରାହୀଙ୍କର ୪ କୋଟି ଟଙ୍କାରୁ ଅଧିକ ପରିମାଣର ସମ୍ପତ୍ତି ଥିବା ଜଣାପଡ଼ିଥିବା ଅଧିକାରୀ ବୁଧବାର କହିଛନ୍ତି ।

ତାଙ୍କ କାର୍ଯ୍ୟାଳୟ ଓ ଘରେ ଚଢ଼ାଉ ବେଳେ ୪ କୋଟି ୪ ଲକ୍ଷ ୩୮ ହଜାର ୨୨୧ ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ଠାବ ହୋଇଛି ।

ବରଗଡ଼ ଜିଲ୍ଲା ବରପାଲି ବ୍ଲକ ତିଲେଇମାଲସ୍ଥିତ ପ୍ରମୋଦଙ୍କ ପୈତୃକ ଘର, ସୋନପୁର ଜିଲ୍ଲା ଡୁଙ୍ଗୁରିପାଲିସ୍ଥିତ ବାସଭବନ, ବଲାଙ୍ଗୀର ଜିଲ୍ଲା ଆଗଲପୁରସ୍ଥିତ ଘର ଏବଂ ବରଗଡ଼ ଜିଲ୍ଲା ଗଣ୍ଠିଆପାଲି ହାଇସ୍କୁଲରେ ଏକକାଳୀନ ଚଢ଼ାଉ ହୋଇଥିଲା ।

ଠାବ ହୋଇଥିବା ସମ୍ପତ୍ତି ମଧ୍ୟରେ ଚାରୋଟି କୋଠା (୩ କୋଟି ୧୧ ଲକ୍ଷ ଟଙ୍କା), ବିଭିନ୍ନ ଗାଡ଼ି (୧୪ ଲକ୍ଷ ୫୪ ହଜାର ୨୧୯ ଟଙ୍କା), ୧୫ ଲକ୍ଷ ୬୩ ହଜାର ଟଙ୍କାର ବୀମା, ୮ ଲକ୍ଷ ୪୯ ହଜାର ଟଙ୍କାର ୩୧୭ ଗ୍ରାମର ସୁନାଗହଣା, ବ୍ୟାଙ୍କ ଲକରରେ ଥିବା ୪ ଲକ୍ଷ ୮୯ ହଜାର ଟଙ୍କାର ୧୯୦ ଗ୍ରାମ ସୁନାଗହଣା, ୧ ଲକ୍ଷ ୮୬ ହଜାର ଟଙ୍କାର ଇଲେକ୍ଟ୍ରୋନିକ୍ସ ସାମଗ୍ରୀ, ୩ ଲକ୍ଷ ୫ ହଜାର ଟଙ୍କାର ଆସବାବପତ୍ର, ୫୬ ହଜାର ଟଙ୍କାର ଜମାରାଶି, ୫ ଲକ୍ଷ ୫୬ ହଜାର ୬୦୦ ଟଙ୍କାର ବ୍ୟାଙ୍କ ଜମା ଏବଂ ନଗଦ ୧୯ ଲକ୍ଷ ୨୬ ହଜାର ଟଙ୍କା ଥିବା କହିଛନ୍ତି ବରଗଡ଼ ଭିଜିଲାନ୍ସ ଡିଏସପି ପରମେଶ୍ୱର କିଷାନ ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୧୩(ଲୋକାଲ ୱାୟାର): ବୁଣାକାରମାନଙ୍କୁ ବଜାର ସୁବିଧା ଯୋଗାଇ ଦେବା ସହ ସେମାନଙ୍କ ମଧ୍ୟରେ ଭାବ ବିନିମୟ ପାଇଁ ରାଜ୍ୟ ହସ୍ତତନ୍ତ ବିଭାଗ ବରଗଡ଼ ଜିଲ୍ଲା ବାଲିଯୋରିଠାରେ ଏକ ମୁକ୍ତାକାଶ ହାଟ ନିର୍ମାଣ କରୁଛି ।

ଯେଉଁଠି ଗ୍ରାହକଙ୍କ, ବ୍ୟବସାୟୀଙ୍କଠାରୁ ଆରମ୍ଭ କରି ଚାଷୀ, ତନ୍ତୀ, ବୁଣାକାର ସମସ୍ତଙ୍କ ପାଇଁ ବିଶ୍ୱସ୍ତରୀୟ ସୁବିଧା ମିଳିବ ।

ଅଢ଼େଇ କୋଟି ଟଙ୍କା ବ୍ୟୟ ଅଟକଳରେ ନିର୍ମାଣ କରାଯାଉଥିବା ଏହି ମୁକ୍ତାକାଶ ହସ୍ତତନ୍ତ ହାଟ କାମ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ଏହା ଏସିଆର ସର୍ବବୃହତ ମୁକ୍ତାକାଶ ହସ୍ତତନ୍ତ ହାଟ କରିବାକୁ ବିଭାଗ ଯୋଜନା କରିଛି ।

ମଣିପୁର ପରେ ଓଡ଼ିଶାରେ ଏଭଳି ଏକ ହସ୍ତତନ୍ତ ହାଟର ପରିକଳ୍ପନା କରାଯାଇଛି । ଗ୍ରାହକ ଓ ଚାଷୀ, ବୁଣାକାରଙ୍କ ସୁବିଧା ପାଇଁ ଏଠାରେ ୮୦ରୁ ୧୦୦ଟି ପିଣ୍ଡି ନିର୍ମାଣ ହେଉଛି ।

ଭିନ୍ନ ଭିନ୍ନ କରିଡର ଦ୍ୱାରା ଚାଷୀ, ବ୍ୟବସାୟୀ ଓ ଗ୍ରାହକଙ୍କୁ କିପରି ସୂତାଠାରୁ ଆରମ୍ଭ କୁକୁନ୍ ଯାଏଁ ପୁଣି ଫ୍ୟାବ୍ରିକରୁ ଆରମ୍ଭ କରି ଶାଢ଼ୀ, ରଙ୍ଗ, ଟାଏ ଆଣ୍ଡ ଡାଏ ସାମଗ୍ରୀ ଯାଏଁ ସବୁକିଛି ମିଳିବ ସେଥିପାଇଁ ବ୍ୟବସ୍ଥା ହେଉଛି ।

ଗ୍ରାହକ, ଚାଷୀ, ବୁଣାକାର, ବ୍ୟବସାୟୀ, ଇ- କମର୍ସ ଅଧିକାରୀଙ୍କ ପାଇଁ ଏଠାରେ ସମସ୍ତ ପ୍ରକାର ସୁବିଧା କରାଯାଉଛି । ହାଟ ପାଇଁ ବିଲଡିଂ କାମ ଶେଷ ପର୍ଯ୍ୟାୟରେ ଥିବା ବେଳେ ପାଚେରୀ ଓ ପାର୍କିଂ କାମ ବି ସରିଛି ।

ବରଗଡ଼ ଜିଲ୍ଲା ମୁଖ୍ୟାଳୟଠାରୁ ୧୨ କିଲୋମିଟର ଦୂରରେ ପଡୁଥିବା ଏହି ହାଟ ପ୍ରତି ଶୁକ୍ରବାର ଦିନ ହୋଇଥାଏ । ସକାଳ ୪ଟାରୁ ଦିନ ୧୦ ଭିତରେ ଏହି ହାଟରେ ପାଖାପାଖି ୫ କୋଟି ଟଙ୍କାର ବ୍ୟବସାୟ ହୋଇଥାଏ ।

ବର୍ତ୍ତମାନ ସାପ୍ତାହିକ ଶୁକ୍ରବାର ଏହି ହାଟ ହେଉଥିବା ବେଳେ ଏଠାରୁ ବର୍ଷକୁ ୬୦ କୋଟି ବ୍ୟବସାୟ ହେଉଛି ।

ହସ୍ତତନ୍ତ ସହ ଜଡ଼ିତ ସମସ୍ତ ସାମଗ୍ରୀ ଗୋଟିଏ ଛାତ ତଳେ ଉପଲବ୍ଧ ହେଉଥିବାରୁ ଓଡ଼ିଶା ବ୍ୟତୀତ ମଧ୍ୟପ୍ରଦେଶ, ଛତିଶଗଡ, ପଶ୍ଚିମବଙ୍ଗରୁ ବି ବ୍ୟବସାୟୀମାନେ ଏଠାରେ ଆସି ଜମା ହୁଅନ୍ତି ।

ତେଣୁ ଆଗାମୀ ଦିନରେ ଏହା ବିଶ୍ୱସ୍ତରୀୟ ହେଲେ ଆୟ ମଧ୍ୟ ବଢ଼ିବ ବୋଲି ରାଜ୍ୟ ହସ୍ତତନ୍ତ ବିଭାଗ ଆଶା କରିଛି ।

କେବଳ ସେତିକି ନୁହେଁ ରାଜ୍ୟ ହସ୍ତତନ୍ତ ବିଭାଗ ରାଜ୍ୟ ପର୍ଯ୍ୟଟନ ବିଭାଗ ସହ ମିଶି ଗ୍ରାମୀଣ ପର୍ଯ୍ୟଟନ ଆଧାରରେ ଓ ଓଡ଼ିଶା ବାଏ ରୋଡରେ ଏହାକୁ ଯୋଡ଼ିବାକୁ ଚିନ୍ତା କରିଛି ।

ଜିଲ୍ଲା ମୁଖ୍ୟାଳୟଠାରୁ ମାତ୍ର ୧୫ କିଲୋମିଟର ଦୂରରେ ରାସ୍ତା କଡ଼ରେ ଏହି ହାଟ ପଡୁଥିବାରୁ ଓ ଏହା ଓଡ଼ିଶାର ପାରମ୍ପରିକ ହସ୍ତତନ୍ତର ଏକ ମୁକ୍ତାକାଶ ହାଟ ହୋଇଥିବାରୁ ଏଥିପ୍ରତି ପର୍ଯ୍ୟଟକ ଆକୃଷ୍ଟ ହେବେ ।

ଲୋକାଲ ୱାୟାର

ବରଗଡ଼, ନଭେମ୍ବର ୨୫ (ଲୋକାଲ ୱାୟାର) : ବରଗଡ଼ ଜିଲ୍ଲା ଭଟଲି ଫରେଷ୍ଟ ରେଞ୍ଜ ଅନ୍ତର୍ଗତ ଖଜୁରିଆ ଠାରେ ବୁଧବାର କ୍ରାଇମବ୍ରାଞ୍ଚ ଏସଟିଏଫ୍ କଲରାପତରିଆ ବାଘର ଛାଲ ସହ ବାଘର ନଖ ଓ ଦାନ୍ତ ଜବତ କରିଛି ବୋଲି ଜଣେ ଅଧିକାରୀ ସୂଚନା ଦେଇଛନ୍ତି ।

ଘଟଣା ଏସଟିଏଫ ୩ ଜଣଙ୍କୁ ଅଟକ ରଖି ପଚରାଉଚରା କରଉଛି ।

ବାଘ କେବେ ଶିକାର ହୋଇଥିଲା, ଏହା ପଛରେ ଆଉ କେଉଁମାନେ ଅଛନ୍ତି , ଏହା କେଉଁଠିକୁ ଚାଲାଣ କରିବାର ଥିଲା, ସେ ନେଇ ଏସଟିଏଫ ତଦନ୍ତ କରୁଛି ।

ଲୋକାଲ ୱାୟାର

ବରଗଡ଼, ନଭେମ୍ବର ୨୩ (ଲୋକାଲ ୱାୟାର) : ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ସୋମବାର ବରଗଡ ଜିଲ୍ଲା ଯୋଗାଣ ବିଭାଗର ଜୁନିୟର ଆକାଉଣ୍ଟାଣ୍ଟ କମ୍ବୁପାଣି ମିଶ୍ରଙ୍କ ସରକାରୀ କାର୍ଯ୍ୟାଳୟ ସମେତ ୪ଟି ସ୍ଥାନରେ ଚଢାଉ ଜାରି ରହିଛି ବୋଲି ଭିଜିଲାନ୍ସ ପକ୍ଷରୁ କୁହାଯାଇଛି ।

ଶ୍ରୀ ମିଶ୍ରଙ୍କ ସୋନପୁର ଜିଲ୍ଲା ଡୁଙ୍ଗୁରିପାଲି ହଳଦୀ ଗାଁ ସ୍ଥିତ ପୈତୃକ ବାସଭବନ, ବଲାଙ୍ଗିର ଜିଲ୍ଲା ଠିକାଦାରପଡାସ୍ଥିତ ବାସଭବନ, ବରଗଡ ଖଜୁରଟିକାସ୍ଥିତ ଭଡା ଘରେ ଏକକାଳୀନ ଭିଜିଲାନ୍ସ ଟିମ୍ ପକ୍ଷରୁ ଚଢାଉ ଜାରି ରହିଛି ।

ତାଙ୍କ ଘରୁ ବହୁ ଗୁରୁତ୍ବପୂର୍ଣ୍ଣ କାଗଜପତ୍ର ସହ ଏକାଧିକ ବ୍ୟାଙ୍କ୍ ଆକାଉଣ୍ଟ ଜବତ କରାଯାଇଛି।

ତେବେ କେତେ ଟଙ୍କା ଜବତ ହୋଇଛି ସେ ନେଇ ସ୍ପଷ୍ଟ ସୂଚନା ମିଳିପାରିନାହିଁ ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୨୩ (ଲୋକାଲ ୱାୟାର) : ରାଜ୍ୟରେ ଆଉ ୧୭ଜଣ କରୋନା ଆକ୍ରାନ୍ତଙ୍କ ମୃତ୍ୟୁ ହୋଇଛି ବୋଲି ସୋମବାର ସ୍ୱାସ୍ଥ୍ୟ ବିଭାଗ କହିଛି ।

କରୋନାରେ ଜୀବନ ହରାଇଥିବା ୧୭ ଜଣଙ୍କ ମଧ୍ୟରୁ ଭୁବନେଶ୍ୱର ଓ ସୁନ୍ଦରଗଡରୁ ସର୍ବାଧିକ ୪ ଜଣ ଲେଖାଏଁ, ସମ୍ବଲପୁର ଜିଲ୍ଲାରୁ ୩ ଜଣ, ବରଗଡ ଓ ଝାରସୁଗୁଡା ଜିଲ୍ଲାରୁ ୨ ଜଣ ଲେଖାଏଁ ଏବଂ ବଲାଙ୍ଗୀର ଓ କେନ୍ଦ୍ରାପଡା ଜିଲ୍ଲାରୁ ଜଣେ ଲେଖାଏଁ ଅଛନ୍ତି ।

ଭୁବନେଶ୍ୱରର ୪ ମୃତକଙ୍କ ମଧ୍ୟରୁ ଜଣେ ମହିଳା (୫୫) ଓ ୩ ଜଣ ପୁରୁଷ (୮୪, ୩୪ ଓ ୬୫ ବର୍ଷ) ଅଛନ୍ତି ।

ସୁନ୍ଦରଗଡ଼ ଜିଲ୍ଲାର ୪ ମୃତକ ମଧ୍ୟରୁ ଜଣେ ମହିଳା (୫୦) ଓ ୩ ଜଣ ପୁରୁଷ (୮୪, ୫୩ ଓ ୭୦ ବର୍ଷ) ଅଛନ୍ତି ।

ସମ୍ବଲପୁରର ୩ ମୃତକ ହେଲେ ପୁରୁଷ (୫୨, ୭୨ ଓ ୫୬ ବର୍ଷ) ।

ବରଗଡ଼ରେ ୨ ପୁରୁଷ (୬୦ ଓ ୫୩ ବର୍ଷ)ଙ୍କ ଜୀବନ ନେଇଛି କରୋନା ।

ଝାରସୁଗୁଡ଼ାର ୨ ମୃତକ ପୁରୁଷ (୭୩ ଓ ୫୬ ବର୍ଷ) ।

ବଲାଙ୍ଗୀରରେ ଜଣେ ବ୍ୟକ୍ତି (୩୬) ଓ କେନ୍ଦ୍ରାପଡ଼ାରେ ଜଣେ ପୁରୁଷ (୭୦) ପ୍ରାଣ ହରାଇଛନ୍ତି ।

ଏମାନେ ସମସ୍ତେ କରୋନା ପଜିଟିଭ ଚିହ୍ନଟ ହେଲା ପରେ ହସ୍ପିଟାଲରେ ଭର୍ତ୍ତି ହୋଇଥିଲେ । ଚିକିତ୍ସାଧିନ ଅବସ୍ଥାରେ ସମସ୍ତଙ୍କର ମୃତ୍ୟୁ ହୋଇଛି ।

ଏବେ ରାଜ୍ୟରେ କରୋନା ଜନିତ ମୃତ୍ୟୁ ସଂଖ୍ୟା ୧୬୫୭କୁ ବୃଦ୍ଧି ହୋଇଛି ।

ଆଉ ୫୩ ଜଣ କରୋନା ପଜିଟିଭଙ୍କର ମୃତ୍ୟୁ ଘଟିଥିଲେ ବି କରୋନା ଯୋଗୁ ସେମାନଙ୍କ ମୃତ୍ୟୁ ହୋଇନଥିବା ସରକାର କହିଛନ୍ତି ।

ଏ ସମସ୍ତଙ୍କୁ ମିଶାଇ ରାଜ୍ୟରେ ଏ ପର୍ଯ୍ୟନ୍ତ ମୋଟ ୧,୭୧୦ ଜଣ କରୋନା ଆକ୍ରାନ୍ତଙ୍କ ମୃତ୍ୟୁ ହୋଇଛି ।

ରାଜ୍ୟରେ ଏବେ ସୁଦ୍ଧା ୩, ୧୪, ୬୨୯ ଜଣ ପଜିଟିଭ ଚିହ୍ନଟ ହୋଇଥିବାବେଳେ ୩, ୦୫, ୮୩୧ ଜଣ ସୁସ୍ଥ ହୋଇଛନ୍ତି ।

୭,୧୦୬ ଜଣ ବିଭିନ୍ନ କୋଭିଡ୍ ହସ୍ପିଟାଲରେ ଚିକିତ୍ସିତ ହେଉଛନ୍ତି ।

ଲୋକାଲ ୱାୟାର