ବଲାଙ୍ଗିର

ବଲାଙ୍ଗିର, ଜାନୁଆରୀ ୩୧(ଲୋକାଲ ୱାୟର) ବହୁ ଚର୍ଚ୍ଚିତ ପାଟଣାଗଡ଼ ପାର୍ସଲ୍ ବୋମା ବିସ୍ଫୋରଣ ଏବଂ ଡବଲ୍ ମର୍ଡର୍ ମାମଲାରେ ଅଭିଯୁକ୍ତ ପୁଞ୍ଜିଲାଲ ମେହେରଙ୍କ ବିରୋଧରେ ପାଟଣାଗଡ଼ ଅତିରିକ୍ତ ସେସନ୍ସ ଜଜଙ୍କ କୋର୍ଟରେ ଗୁରୁବାର କ୍ରାଇମ ବ୍ରାଞ୍ଚ ଚୂଡ଼ାନ୍ତ ଚାର୍ଜସିଟ୍ ଦାଖଲ କରିଥିବା ଜଣେ ଅଧିକାରୀ ସୂଚନା ଦେଇଛନ୍ତି ।

ଗତ ଫେବ୍ରୁଆରୀ ୨୩ ତାରିଖରୁ ତଦନ୍ତ ଭାର ନେଇଥିବା କ୍ରାଇମବ୍ରାଞ୍ଚ ଟିମ୍ ଦୀର୍ଘ ୧୧ ମାସ ପରେ ତଦନ୍ତ ଶେଷ କରିଛି ।

ଏହି ମାମଲାରେ ୭୬ ଜଣଙ୍କ ସାକ୍ଷ୍ୟ, ସାଇଣ୍ଟିଫିକ୍ ବିଶେଷଜ୍ଞଙ୍କ ମତ, ତଥ୍ୟ ଆଉ ପ୍ରମାଣ, ଏମିତି ୬୫ ପୃଷ୍ଠା ସମ୍ବଳିତ ଚାର୍ଜସିଟକୁ ଧରି କ୍ରାଇମବ୍ରାଞ୍ଚର ଏକ ତିନି ଜଣିଆ ଟିମ୍ ପାଟଣାଗଡ଼ରେ ପହଞ୍ଚି ଏହା ଦାଖଲ କରିଛନ୍ତି ।

ଏହି ମାମଲାରେ ଗତ ଅଗଷ୍ଟ ମାସରେ କ୍ରାଇମବ୍ରାଞ୍ଚ ପ୍ରଥମ ପର୍ଯ୍ୟାୟ ଚାର୍ଜସିଟ୍ ଦାଖଲ କରିଥିବା ବେଳେ ଏବେ ଚୂଡ଼ାନ୍ତ ଚାର୍ଜସିଟ୍ ଦାଖଲ କରିଛି ।

ଉଲ୍ଲେଖଯୋଗ୍ୟ, ପଟାଣାଗଡ଼ ଭଇଁସା କଲେଜ ଅଧ୍ୟକ୍ଷ ପଦବି ହାତେଇବାରେ ବିଫଳ ହେବାରୁ ଇଂରାଜୀ ଅଧ୍ୟାପକ ପୁଞ୍ଜିଲାଲ୍ ମେହେର୍ କ୍ରୋଧିତ ହୋଇଥିଲା ।

ଏହି ରାଗରେ ପୁଞ୍ଜିଲାଲ୍ କଲେଜର ଅଧ୍ୟକ୍ଷା ସଞ୍ଜୁକ୍ତା ସାହୁଙ୍କୁ ସବୁଦିନ ପାଇଁ ବାଟରୁ ସଫା କରିବା ସହିତ ପୂରା ପରିବାରକୁ ମୂଳପୋଛ କରିବା ଲାଗି ଷଡ଼ଯନ୍ତ୍ର ରଚିଥିଲା ।

ସଞ୍ଜୁକ୍ତାଙ୍କ ପୁଅର ବିବାହ କାର୍ଯ୍ୟକ୍ରମ ମଧ୍ୟରେ ଉପହାର ଭାବେ ପାର୍ସଲ ବୋମା ପହଞ୍ଚାଇବାକୁ ଯୋଜନା କରିଥିଲା ।

ଏକ ଆତ୍ମଘାତୀ ପାର୍ସଲ୍ ବୋମା ପ୍ରସ୍ତୁତ କରି ତାହାକୁ ଧରି ରାୟପୁରରେ ପହଞ୍ଚିଥିଲା । ରାୟପୁର ଷ୍ଟେସନରେ ଓହ୍ଲାଇ ସେ ଏକ ଅଟୋ ରିକ୍ସାରେ କୋରିୟର୍ ସଂସ୍ଥାରେ ପହଞ୍ଚି ପାର୍ସଲକୁ ପାଟଣାଗଡ଼ ଭଇଁସା କଲେଜର ତତକାଳୀନ କଲେଜ ଅଧ୍ୟକ୍ଷାଙ୍କ ଘର ଠିକଣାରେ ପଠାଇଥିଲା ।

କୋରିଅରରେ ପାର୍ସଲ୍ ଯାଇ ୨୦୧୮ ଫେବ୍ରୁଆରୀ ୨୩ ତାରିଖ ଦିନ ସଞ୍ଜୁକ୍ତା ସାହୁଙ୍କ ଘର ଠିକଣାରେ ପହଞ୍ଚିଥିଲା ।

ଉପହାର ପାଇ ସଞ୍ଜୁକ୍ତାଙ୍କ ନବ ବିବାହିତ ପୁଅ ସୌମ୍ୟଶେଖର ସାହୁ ଉକ୍ତ ପାର୍ସଲଟିକୁ ଖୋଲିବା ମାତ୍ରେ ଘର ଭିତରେ ହଠାତ୍ ବିସ୍ଫୋରଣ ଘଟିଥିଲା ।

ଆତ୍ମଘାତୀ ବିସ୍ଫୋରଣରେ ସୌମ୍ୟଶେଖରଙ୍କ ସହ ତାଙ୍କ ଜେଜେମା’ଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ପତ୍ନୀ ରିମା ସାହୁ ଗୁରୁତର ହୋଇପଡ଼ିଥିଲେ । ଉକ୍ତ ଘଟଣା ରାଜ୍ୟବ୍ୟାପୀ ହଇଚଇ ସୃଷ୍ଟି କରିଥିଲା ।

ଉକ୍ତ ଘଟଣାରେ ମୃତ ସୌମ୍ୟଶେଖରଙ୍କ ସମ୍ପର୍କୀୟଙ୍କ ପକ୍ଷରୁ ବସନ୍ତ କୁମାର ସାହୁ ପାଟଣାଗଡ଼ ଥାନାରେ ଏତଲା ଦେଇଥିଲେ ।

ମାସେ କାଳ ପାଟଣାଗଡ଼ ତଥା ବଲାଙ୍ଗୀର ଜିଲ୍ଲା ପୁଲିସ୍ ଗୁଡ଼ିଏ ଛନ୍ଦି ହୋଇଥିଲେ ମଧ୍ୟ ବୋମା ବିସ୍ଫୋରଣ ଘଟଣା ବାବଦରେ କିମ୍ବା ଅଭିଯୁକ୍ତ ସମ୍ପର୍କରେ କିଛି ଜଣାପଡ଼ିଥିଲା । ଶେଷରେ ଏହି ଘଟଣାର ତଦନ୍ତ ଲାଗି ରାଜ୍ୟ ସରକାର କ୍ରାଇମବ୍ରାଞ୍ଚକୁ ତଦନ୍ତ ନିର୍ଦ୍ଦେଶ ଦେଇଥିଲେ ।

କ୍ରାଇମବ୍ରାଞ୍ଚ ଉକ୍ତ ଘଟଣାର ତଦନ୍ତଭାର ଗତ ମାର୍ଚ୍ଚ ୨୩ ତାରିଖରେ ନେଇଥିଲା । ବିଳମ୍ବରେ ହେଲେ ମଧ୍ୟ ଏହି ଘଟଣାରେ ତଦନ୍ତକାରୀ ଟିମ୍ ଖିଅ ପାଇଥିଲା ।

ଉକ୍ତ ଘଟଣାରେ ସ୍ଥାନୀୟ ଭଇଁସା କଲେଜର ଅଧ୍ୟାପକ ପୁଞ୍ଜିଲାଲ୍ ମେହେର୍ ସମ୍ପୃକ୍ତ ଥିବା ତଦନ୍ତକାରୀ ଅଧିକାରୀ ସୁରାକ୍ ପାଇଥିଲେ ।

ଅଭିଯୁକ୍ତର ଘରେ କ୍ରାଇମବ୍ରାଞ୍ଚ ଚଢ଼ଉ କରିବା ପରେ ତତକାଳୀନ ଅଧ୍ୟକ୍ଷା ସଞ୍ଜୁକ୍ତା ସାହୁଙ୍କ ଘରେ ବିସ୍ଫୋରଣ ହୋଇଥିବା ପାର୍ସଲ୍ ବୋମା ପୁଞ୍ଜିଲାଲ୍ ହିଁ ପ୍ରସ୍ତୁତ କରିଥିବାର ପ୍ରମାଣ ମିଳିଥିଲା ।

ଉକ୍ତ ଘଟଣାରେ କ୍ରାଇମବ୍ରାଞ୍ଚ ପୁଞ୍ଜିଲାଲକୁ ଗିରଫ କରିବା ରେ ତା’ ବିରୋଧରେ ଗୋଟିଏ ପରେ ଗୋଟିଏ ତଥ୍ୟ ଆଉ ପ୍ରମାଣ ଯୋଗାଡ଼ କରିବାରେ ଲାଗିପଡ଼ିଥିଲା ।

ବୋମା ପ୍ରସ୍ତୁତ ଲାଗି ପୁଞ୍ଜିଲାଲ୍ ବ୍ୟବହାର କରିବା ତରିକା, ବ୍ୟବହୃତ ସାମଗ୍ରୀ ଏବଂ ପ୍ରମାଣ ଉଡ଼ାଇବା ବ୍ୟବହାର କରିଥିବା କେତେକ ଜିନିଷପତ୍ର କ୍ରାଇମବାଞ୍ଚ ହାତରେ ପଡ଼ିଥିଲା ।

ଉକ୍ତ ଘଟଣାରେ ପୁଞ୍ଜିଲାଲ୍ ବିରୋଧରେ ପ୍ରମାଣ ଯୋଗାଡ଼ କରିବା ରାୟପୁର ଏବଂ ପାଟଣାଗଡ଼ରେ ବିଭିନ୍ନ ଅଞ୍ଚଳରୁ କ୍ରାଇମବ୍ରାଞ୍ଚ ଅନେକ ତଥ୍ୟ ଏବଂ ପ୍ରମାଣ ହାସଲ କରିଥିଲା ।

ବୈଷୟିକ ଶୈଳୀରେ ଅଭିଯୁକ୍ତ ବୋମା ପ୍ରସ୍ତୁତ କରିଥିବାରୁ ଜବତ ସାମଗ୍ରୀଗୁଡ଼ିକୁ ପରୀକ୍ଷା ନିରୀକ୍ଷା କରି ପ୍ରମାଣିତ କରିବା ପାଇଁ ରସୁଲଗଡ଼ସ୍ଥିତ ଫରେନସିକ ଲ୍ୟାବ୍ ଏବଂ ଗୁଜରାଟର ଗାନ୍ଧିନଗରସ୍ଥିତ ଫରେନସିକ୍ ଲ୍ୟାବକୁ ପୁଞ୍ଜିଲାଲର ଲ୍ୟାପଟପ୍, ହାର୍ଡଡିସ୍କ, ପେନ୍ ଡ୍ରାଇଭ୍, ଚିଠି ଆଦି ପରୀକ୍ଷା ପାଇଁ ପଠାଇଥିଲା ।

ରସୁଲଗଡ଼ସ୍ଥିତ ଫରେନସିକ୍ ଲ୍ୟାବ୍ ଏବଂ ଗାନ୍ଧିନଗର ଫରେନସିକ୍ ଲ୍ୟାବରୁ ସାଇଣ୍ଟିଫିକ୍ ରିପୋର୍ଟ ଆସିବା ପରେ କ୍ରାଇମବ୍ରାଞ୍ଚ ତଦନ୍ତ ରିପୋର୍ଟ ଶେଷ କରିବା ସହ ଅନ୍ତିମ ପର୍ଯ୍ୟାୟ ଚାର୍ଜସିଟ୍ ପ୍ରସ୍ତୁତ କରିଛି ।

ଚାର୍ଜସିଟରେ ୭୬ ଜଣ ସାକ୍ଷୀ ରହିଛନ୍ତି । ଏହି ସାକ୍ଷୀ ତାଲିକାରେ କ୍ରାଇମବ୍ରାଞ୍ଚ ଆଇଜି ଅରୁଣ ବୋଥ୍ରାଙ୍କ ନାଁ ଥିବା ସୂଚନା ମିଳିଛି ।

ସେହିପରି ଅନ୍ୟତମ ପ୍ରମୁଖ ସାକ୍ଷୀଙ୍କ ମଧ୍ୟରେ ଦିଲ୍ଲୀର ଏକ ପ୍ରମୁଖ ଅନୁଷ୍ଠାନର ୨ ଜଣ ଫିଜିଓଲୋଜିଷ୍ଟଙ୍କ ନାମ ସମେତ ଭଇଁସା କଲେଜର ଅନେକ କର୍ମଚାରୀ ଏବଂ ବହୁ ପୁଲିସ୍ ଅଧିକାରୀମାନେ ଥିବା କ୍ରାଇମବ୍ରାଞ୍ଚର ଜଣେ ଅଧିକାରୀ କହିଛନ୍ତି ।

ଲୋକାଲ ୱାୟାର

ବଲାଙ୍ଗିର, ଜାନୁଆରୀ ୨୯(ଲୋକାଲ ୱାୟାର): ବଲାଙ୍ଗିର ଜିଲ୍ଲାରେ ଏକ ଦୈନିକ ଖବରକାଗଜର ଜଣେ କର୍ମଚାରୀଙ୍କୁ ହତ୍ୟା ଅଭିଯୋଗରେ ୩ ଜଣଙ୍କୁ ଟାଉନ ପୁଲିସ ମଙ୍ଗଳବାର ଅଟକ ରଖିଥିବା ଜଣେ ଅଫିସର କହିଛନ୍ତି

ଜଗତସିଂହପୁର ଜିଲ୍ଲାର ବାସିନ୍ଦା ପ୍ରତାପ ମହାପାତ୍ର ଗତ ଚାରି ମାସ ଧରି ବଲାଙ୍ଗିରରେ ଏକ ଦୈନିକ ଖବରକାଗଜର ପ୍ରସାରଣ ବିଭାଗ ମ୍ୟାନେଜର ଭାବେ କାର୍ଯ୍ୟ କରୁଥିଲେ ।

୨୮ ତାରିଖ ରାତି ପ୍ରାୟ ସାଢ଼େ ୧୧ଟା ବେଳେ ପ୍ରତାପ ବଲାଙ୍ଗିରରେ ନିଜ କାର୍ଯ୍ୟାଳୟକୁ ଚାଲି ଚାଲି ଯାଉଥିବା ବେଳେ ୩ ଜଣ ଯୁବକ ତାଙ୍କୁ ଅଟକାଇଥିଲେ ।

ପ୍ରତାପଙ୍କ ନିକଟରୁ ଯୁବକମାନେ ଲୁଟ କରିବାକୁ ଉଦ୍ୟମ କରିବାରୁ ସେ ବିରୋଧ କରିଥିଲେ । ଏହି ସମୟରେ ଜଣେ ଯୁବକ ଏକ ଭୁଜାଲି କାଢ଼ି ପ୍ରତାପଙ୍କୁ ଆକ୍ରମଣ କରିଥିଲା । ପ୍ରତାପଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା ।

ସିସିଟିଭି ଫୁଟେଜ ଆଧାରରେ ତଦନ୍ତ କରି ପୁଲିସ ମଙ୍ଗଳବାର ସକାଳେ ସ୍ୱାଧୀନ ମେହେର, ତପନ ନାୟକ ଏବଂ ତାପସ ନାଗଙ୍କୁ ଅଟକ ରଖାଯାଇଛି । ଏସପି କେ.ଶିବାସୁବ୍ରମଣି ନିଜେ ଅଭିଯୁକ୍ତମାନଙ୍କୁ ଜେରା କରିଛନ୍ତି ।

ଅଭିଯୁକ୍ତ ସ୍ୱାଧୀନ ହିଁ ଘଟଣାର ମୁଖ୍ୟ ବୋଲି ସେ ସୂଚନା ଦେଇଛନ୍ତି । ତଦନ୍ତ ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ହେବ ବୋଲି ସେ କହିଛନ୍ତି ।

ଏହି ଘଟଣାକୁ ବରିଷ୍ଠ ସାମ୍ବାଦିକମାନେ ତୀବ୍ର ନିନ୍ଦା କରିଛନ୍ତି । ସ୍ୱର୍ଗତ ପ୍ରତାପଙ୍କର ପତ୍ନୀ ଓ ୩ ବର୍ଷର ଏକ ପୁତ୍ର ସନ୍ତାନ ଅଛି ।

ଲୋକାଲ ୱାୟାର

ଭୁବନେଶ୍ୱର,ଜାନୁଆରୀ ୬(ଲୋକାଲ ୱାୟାର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜାନୁଆରୀ ୧୬ ପରିବର୍ତ୍ତେ ୧୫ ତାରିଖରେ ବଲାଙ୍ଗିର ଗସ୍ତରେ ଆସିବେ ବୋଲି ରବିବାର ରାଜ୍ୟ ବିଜେପି ବିଧାୟକ ଦଳ ନେତା କେ.ଭି. ସିଂହଦେଓ ସୂଚନା ଦେଇଛନ୍ତି ।

ପୂର୍ବରୁ ପ୍ରଧାନମନ୍ତ୍ରୀ ଜାନୁଆରୀ ୧୬ ତାରିଖରେ ବଲାଙ୍ଗିର ଗସ୍ତରେ ଆସିବେ ବୋଲି ଧାର୍ଯ୍ୟ ହୋଇଥିଲା । ଏବେ କୌଣସି କାରଣରୁ ଗସ୍ତ କାର୍ଯ୍ୟକମରେ ପରିବର୍ତ୍ତନ କରାଯାଇ ଗୋଟିଏ ଦିନ ପୂର୍ବରୁ ଧାର୍ଯ୍ୟ କରାଯାଇଛି ବୋଲି ସେ କହିଛନ୍ତି

ଗସ୍ତ ଅବସରରେ ପ୍ରଧାନମନ୍ତ୍ରୀ ଉଭୟ ସରକାରୀ ଏବଂ ଦଳୀୟ କାର୍ଯ୍ୟକ୍ରମରେ ସାମିଲ ହେବେ ।

ଉଲ୍ଲେଖ ଯୋଗ୍ୟ, ନିକଟରେ ପ୍ରଧାନମନ୍ତ୍ରୀ ଖୋର୍ଦ୍ଧା ଓ ବାରିପଦା ଗସ୍ତରେ ଆସି ଉଭୟ ସରକାରୀ ଓ ଦଳୀୟ କାର୍ଯର୍୍ୟକ୍ରମରେ ସାମିଲ ହୋଇଛନ୍ତି ।

ଲୋକାଲ ୱାୟାର

ବଲାଙ୍ଗିର,ଡିସେମ୍ବର ୨୪(ଲୋକାଲ ୱାୟର) ବଲାଙ୍ଗିରରେ ଓଡ଼ିଶା ହାଇକୋର୍ଟର ଏକ ସ୍ଥାୟୀ ବେଞ୍ଚ୍ ପ୍ରତିଷ୍ଠା ଦାବିରେ ଜଏଣ୍ଟ ଆକ୍ସନ କମିଟି ଆନ୍ଦୋଳନକୁ ବ୍ୟାପକ କରି ସୋମବାର ଠାରୁ ୩୦ ତାରିଖ ପର୍ଯ୍ୟନ୍ତ ଜିଲ୍ଲାର ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ଘୋଷଣା କରିଛନ୍ତି ।

ଫଳରେ ଜିଲ୍ଲାରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ସମସ୍ତ କାର୍ଯ୍ୟାଳୟ, ବ୍ୟାଙ୍କ ବନ୍ଦ ରହିଛି । ଜିଲ୍ଲାର ପ୍ରାୟ ୩ଶହରୁ ଅଧିକ ସଙ୍ଗଠନ ଏବଂ ବାର୍ ଆସୋସିଏସନ୍ ଏହି ଆନ୍ଦୋଳନରେ ସାମିଲ ହେବା ସହ ଗତ ୩ ତାରିଖରୁ ଜିଲ୍ଲାପାଳଙ୍କ କାର୍ଯ୍ୟାଳୟ, ତହସିଲ ଓ କୋର୍ଟ ବନ୍ଦ ରଖିଛନ୍ତି ।

ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆନ୍ଦୋଳନକାରୀମାନେ ଗଣଧାରଣା ଜାରି ରଖିଛନ୍ତି । ତୁରନ୍ତ ସରକାର ବଲାଙ୍ଗିରଠାରେ ହାଇକୋର୍ଟର ସ୍ଥାୟୀ ବେଞ୍ଚ ପ୍ରତିଷ୍ଠା ପାଇଁ ଘୋଷଣା ନ କଲେ ଆନ୍ଦୋଳନକୁ ଅଧିକ ବ୍ୟାପକ କରିବାକୁ ଜଏଣ୍ଟ ଆକ୍ସନ କମିଟି ପକ୍ଷରୁ ଚେତାବନୀ ଦିଆଯାଇଛି ।

ଲୋକାଲ ୱାୟର

ବଲାଙ୍ଗିର, ଡିସେମ୍ବର ୩(ଲୋକାଲ ୱାୟର) ଆଇନଜୀବୀ ଓ କେନ୍ଦ୍ରୀୟ କ୍ରିୟାନୁଷ୍ଠାନ କମିଟି ପକ୍ଷରୁ ସ୍ଥାୟୀ ହାଇକୋର୍ଟ ବେଞ୍ଚ୍ ଦାବିରେ ସୋମବାର ବଲାଙ୍ଗିର ଜିଲ୍ଲାରେ ବନ୍ଦ ଡାକରା ଦିଆଯାଇଥିବାରୁ ଜନଜୀବନ ସମ୍ପୂର୍ଣ୍ଣ ଅଚଳ ହୋଇପଡ଼ିଛି ।

ସ୍କୁଲ, କଲେଜ ଆଦି ଶିକ୍ଷାନୁଷ୍ଠାନ, ଦୋକାନ ବଜାର, ମାର୍କେଟ କମ୍ପେ୍ଲକ୍ସ, ସରକାରୀ ଏବଂ ବେସରକାରୀ କାର୍ଯ୍ୟାଳୟ ସବୁ କିଛି ବନ୍ଦ ରହିଛି । ରାଜପଥରେ ଗାଡ଼ିମୋଟର ଚଳାଚଳ ମଧ୍ୟ ଠପ୍ ହୋଇଯାଇଛି । ବ୍ୟବସାୟୀ ସଂଘ, ବସ୍-ଟ୍ରକ ମାଲିକ ସଂଘ ସମେତ ବିଭିନ୍ନ ରାଜନୈତିକ ଦଳ ମଧ୍ୟ ଏହି ବନ୍ଦକୁ ସମର୍ଥନ ଜଣାଇଛନ୍ତି ।

ବନ୍ଦ ସମର୍ଥକମାନେ ଚବିଶ ଘଣ୍ଟିଆ ରେଳକୋକୋ ଡାକରା ଦେଇ ବଲାଙ୍ଗିର ଷ୍ଟେସନଠାରେ ଧାରଣା ଦେଇଛନ୍ତି । ତେଣୁ ବନ୍ଦକୁ ଦୃଷ୍ଟିରେ ରଖି ରେଳବାଇ କର୍ତ୍ତୃପକ୍ଷ ଉକ୍ତ ରୁଟରେ ଚଳାଚଳ କରୁଥିବା ୧୩ଟି ଟ୍ରେନକୁ ବାତିଲ କରିଛନ୍ତି । ସମ୍ବଲପୁର-ରାୟଗଡ଼ା ଇଣ୍ଟରସିଟି ଏକ୍ସପ୍ରେସ୍ ଏବଂ ବିଶାଖାପଟ୍ଟନମ-ରାୟପୁର ପାସେଞ୍ଜର ଟ୍ରେନର ଅପ୍ ଓ ଡାଉନ୍ ଟ୍ରେନ ବାତିଲ ହୋଇଛି ।

ଲୋକାଲ ୱାୟର