ବଲାଙ୍ଗିର

ଭୁବନେଶ୍ୱର, ଡିସେମ୍ବର ୨୯(ଲୋକାଲ ୱାୟାର): ଭିଜିଲାନ୍ସ ପକ୍ଷରୁ ମଙ୍ଗଳବାର ଜଣେ ଲାବୋରେଟାରୀ ଆସିଷ୍ଟାଣ୍ଟ, ସମବାୟ ବ୍ୟାଙ୍କର ଜଣେ ଆସିଷ୍ଟାଣ୍ଟ ମ୍ୟାନେଜର ଏବଂ ଜଣେ କନିଷ୍ଠ କିରାଣିଙ୍କ ଘରେ ଚଢ଼ାଉ କରାଯାଇଥିବା ବେଳେ ସମସ୍ତଙ୍କର ସମ୍ପତ୍ତି ଏକ କୋଟି ଟଙ୍କାରୁ ଅଧିକ ବୋଲି ଜଣାପଡ଼ିଛି ।

ଗଞ୍ଜାମ ଜିଲ୍ଲା ଚିକିଟି କଲେଜ ଲାବୋରେଟାରୀ ଆସିଷ୍ଟାଣ୍ଟ କୈଳାସ ଚନ୍ଦ୍ର ମହାନ୍ତିଙ୍କ ଘରେ ହୋଇଥିବା ଚଢ଼ାଉରେ ତାଙ୍କର ୧ କୋଟି ୪୫ ଲକ୍ଷ ୮୩୭ ଟଙ୍କାରସ୍ଥାବର/ଅସ୍ଥାବର ସମ୍ପତ୍ତି ଠାବ ହୋଇଛି ।

ସେହିପରି ବଲାଙ୍ଗିର ଜିଲ୍ଲା କେନ୍ଦ୍ର ସମବାୟ ବ୍ୟାଙ୍କ ଆସିଣ୍ଟାଣ୍ଟ ମ୍ୟାନେଜର ସୁଧୀର କୁମାର ନନ୍ଦଙ୍କ ଘରେ ଚଢ଼ାଉରେ ତାଙ୍କର ୧ କୋଟି ୨୬ ଲକ୍ଷ ୩୯ ହଜାର ୮୨୪ ଟଙ୍କାର ସ୍ଥାବର/ଅସ୍ଥାବର ସମ୍ପତ୍ତି ଥିବା ଜଣାପଡ଼ିଛି ।

ଅନୁଗୁଳ ଆରଡବ୍ଲୁଏସଏସ କନିଷ୍ଠ କିରାଣି ରୋହିତେଶ୍ୱ ବାଗଙ୍କ ଘରେ ହୋଇଥିବା ଚଢ଼ାଉରେ ତାଙ୍କର ୧ କୋଟି ୧୪ ଲକ୍ଷ ୪୯ ହଜାର ୮୬୮ ଟଙ୍କାର ସମ୍ପତ୍ତି ଥିବା ଜଣାପଡ଼ିଛି ।

ଲୋକାଲ ୱାୟାର

ବଲାଙ୍ଗିର, ଡିସେମ୍ବର ୨୧(ଲୋକାଲ ୱାୟାର): ବଲାଙ୍ଗିର ଟାଉନ ପ୍ଲାନିଂ ଅଫିସର କିରାଣି ଜୀବଦିଶ ପାତ୍ରଙ୍କ ଘରେ ହୋଇଥିବା ଚଢ଼ାଉରେ ମୋଟ ୧ କୋଟି ୨୨ ଲକ୍ଷ ୩୧ ହଜାର ୨୯୦ ଟଙ୍କାର ସ୍ଥାବର/ଅସ୍ଥାବର ସମ୍ପତ୍ତି ଠାବ ହୋଇଥିବା ଭିଜିଲାନ୍ସ ପକ୍ଷରୁ କୁହାଯାଇଛି ।

ସୋମବାର ସକାଳେ ବଲାଙ୍ଗିର ସ୍ଥିତ ଶ୍ରୀ ପାତ୍ରଙ୍କ ବାସଭବନ, ବଲାଙ୍ଗିର ସ୍ଥିତ ସମ୍ପର୍କୀୟଙ୍କ ବାସଭବନ, ସଦର ଥାନା ଅନ୍ତର୍ଗତ ଶିଖାବେହଙ୍ଗାସ୍ଥିତ ପୈତୃକ ବାସଭବନ, ବଲାଙ୍ଗିରସ୍ଥିତ ସ୍ପେଶାଲ ପ୍ଲାନିଂ ଅଥରିଟି କାର୍ଯ୍ୟାଳୟ ଆଦି ସ୍ଥାନରେ ଏକକାଳୀନ ଚଢ଼ାଉ କରାଯାଇଥିଲା ।

ଚଢ଼ାଉ ବେଳେ ବଲାଙ୍ଗିର ଆଦର୍ଶପଡ଼ାରେ ଏକ କୋଠା (୬୩ ଲକ୍ଷ ୩୦ ହଜାର ୯୯୩ ଟଙ୍କା), ବଲାଙ୍ଗିରରେ ଏକ ଜମି (୩୦ ହଜାର ଟଙ୍କା), ଏକ ଚାରିଚକିଆ (୩ ଲକ୍ଷ ୫୭ ହଜାର ୬୮୪ ଟଙ୍କା), ଏକ ବାଇକ (୪୩ ହଜାର ଟଙ୍କା), ବିଭିନ୍ନ ବ୍ୟାଙ୍କ ଓ ପୋଷ୍ଟ ଅଫିସରେ ଥିବା ଜମା (୨୪ ଲକ୍ଷ ୬୮ ହଜାର ୬୨ ଟଙ୍କା), ବିଭିନ୍ନ ବୀମା (୬ ଲକ୍ଷ ୫୬ ହଜାର ୧୭୬ ଟଙ୍କା), ସୁନା ଅଳଙ୍କାର (୧୧ ଲକ୍ଷ ୬୬ ହଜାର ୩୨୮ ଟଙ୍କା), ନଗଦ ୧ ଲକ୍ଷ ୪୭ ହଜାର ୨୫୨ ଟଙ୍କା ଏବଂ ଘରକରଣା ସାମଗ୍ରୀ (୧୦ ଲକ୍ଷ ୩୧ ହଜାର ୭୯୫ ଟଙ୍କା) ଠାବ କରାଯାଇଛି ।

ଲୋକାଲ ୱାୟାର

ବଲାଙ୍ଗୀର, ଡିସେମ୍ବର ୧୯ (ଲୋକାଲ ୱାୟାର): ଲକଡାଉନ ଯୋଗୁଁ ଗାଁକୁ ଫେରିଥିବା ପଶ୍ଚିମ ଓ ଦକ୍ଷିଣ ଓଡିଶାର ପ୍ରବାସୀ ଶ୍ରମିକମାନେ ପୁଣି ଫେରିବାକୁ ପ୍ରସ୍ତୁତ ହେଉଥିବା ସର୍ବେକ୍ଷଣରୁ ଜଣାପଡିଛି ।

ଅନ୍ତର୍ଜାତୀୟ ପ୍ରବାସୀ ଦିବସ ଅବସରରେ ଏଡ ଏଟ ଆକ୍ସନ ଓ ସହଯୋଗୀ ସଂସ୍ଥାଗୁଡିକ ଦ୍ୱାରା ଆୟୋଜିତ ୱେବିନାରରେ ପ୍ରବାସୀ ଶ୍ରମିକଙ୍କ ସ୍ଥିତିକୁ ନେଇ ହୋଇଥିବା ଆଲୋଚନାରୁ ଏହି ତଥ୍ୟ ଜଣାପଡିଛି ।

ସର୍ବେକ୍ଷଣରେ ୮୩୧ ପ୍ରବାସୀ ଶ୍ରମିକଙ୍କୁ ସାମିଲ କରାଯାଇଥିଲା । ଏଥିରେ ୨୮ ପ୍ରତିଶତ ମହିଳା ଥିଲେ ।

ପଶ୍ଚିମ ଓଡିଶାର ପ୍ରବାସୀମାନଙ୍କ ବୟସ ୨୫ରୁ ୪୪ ବର୍ଷ ହୋଇଥିବା ବେଳେ ଦକ୍ଷିଣ ଓଡିଶାର ପ୍ରବାସୀଙ୍କ ବୟସ ୧୫ରୁ ୩୪ ବର୍ଷ ଥିଲା ।

ପଶ୍ଚିମ ଓଡିଶାର ୫୩ ପ୍ରତିଶତ ପ୍ରବାସ ଫେରନ୍ତା ପୁଣି ଫେରିବାକୁ ଯୋଜନା କରୁଥିଲା ବେଳଏ ଦକ୍ଷିଣ ଓଡିଶାରେ ଏହି ସଂଖ୍ୟା ୬୦ ପ୍ରତିଶତ ବୋଲି ସର୍ବେକ୍ଷଣରୁ ଜଣାପଡିଛି ।

ଗାଁ କିମ୍ବା ଆଖପାଖରେ ସବୁଦିନେ ରୋଜଗାର ମିଳିବାର ସୁଯୋଗ ନଥିବାରୁ ସେମାନେ ଫେରିବାକୁ ମନସ୍ଥ କରିଛନ୍ତି ।

ପ୍ରବାସୀ ଶ୍ରମିକମାନେ ନିଜ ପୂର୍ବତନ ନିଯୁକ୍ତିଦାତା ଓ ସାଥୀ କର୍ମଚାରୀଙ୍କ ସହ ଯୋଗାଯୋଗରେ ରହିଛନ୍ତି ।

ଗାଁରେ କିମ୍ବା ଆଖପାଖରେ ସବୁଦିନିଆ ନିଯୁକ୍ତି ସୁଯୋଗ ନଥିବା ଓ ଏମଜିଏନଆରଇଜିଏସ ପାଉଣା ବିଳମ୍ବରେ ମିଳୁଥିବା ଯୋଗୁଁ ପରିବାର ପ୍ରତିପୋଷଣ ପାଇଁ ପ୍ରବାସ ଫେରନ୍ତା ଶ୍ରମିକମାନେ ପୁଣି ନିଜ ପୁରୁଣା କର୍ମସ୍ଥଳୀକୁ ଯିବାକୁ ଚାହୁଁଛନ୍ତି ।

ସର୍ବେକ୍ଷଣରେ ଆରଏଆରଇର ଅନଙ୍ଗ ନେଗି, କର୍ତବ୍ୟର ଅଶୋକ ପଟ୍ଟନାୟକ, ସେବାଜଗତର ସତ୍ୟ ପଟ୍ଟନାୟକ, ଜାଗୃତିର କୈଳାସ ଦଣ୍ଡପାଟ, ଅରୁଣାର ଲୋକନାଥ ମିଶ୍ର, ପିଏପିର ପ୍ରଶାନ୍ତ ନାୟକ ଓ ପର୍ଦ୍ଦାର ରୁଦ୍ର ପଟ୍ଟନାୟକ ଭାଗ ନେଇଥିଲେ ।

ସରକାର ନୂଆ ବିଭାଗ ଖୋଲି ପ୍ରବାସୀ ଶ୍ରମିକଙ୍କ ସମସ୍ୟା ସମାଧାନ କରିବା ଉଚିତ ।

ପ୍ରବାସୀ ଶ୍ରମିକମାନଙ୍କ ସୁରକ୍ଷା ତଥା ସେମାନଙ୍କ ସୂଚନା ରଖିବା ପାଇଁ ଅନ୍ତଃରାଜ୍ୟ ସମନ୍ୱୟ ଓ ସହଯୋଗ ରହିବା ଦରକାର ବୋଲି ୱେବିନାରରେ ଭାଗ ନେଇ ଏଡ ଆଟ ଆକ୍ସନ ଦକ୍ଷିଣ ଏସିଆର ନିଦେ୍ର୍ଦଶକ ପ୍ରବାସ ଓ ଶିକ୍ଷା ଉମି ଡାନିଏଲ କହିଛନ୍ତି ।

ୱେବିନାରରେ ସିଭିଲ ସୋସାଇଟି ସଂଗଠନ, ଗବେଷକ, ଗଣମାଧ୍ୟମ ଓ ଜାତିସଂଘର ବିଭିନ୍ନ ବିଭାଗର ପ୍ରାୟ ୫୫ ପ୍ରତିନିଧି ଭାଗ ନେଇ ନିଜ ନିଜ ମତ ଉପସ୍ଥାପନ କରିଥିଲେ ।

ଲୋକାଲ ୱାୟାର

ବଲାଙ୍ଗୀର, ଡିସେମ୍ବର ୧୮ (ଲୋକାଲ ୱାୟାର): ବଲାଙ୍ଗୀର ଜିଲ୍ଲା ଆଠଗାଁ ପଞ୍ଚାୟତ ଅନ୍ତର୍ଗତ ତଣ୍ଡାମୁଣ୍ଡା ଗାଁର ଚାଷୀମାନେ ମୁଖ୍ୟତଃ ପନିପରିବା ଚାଷ ଉପରେ ନିର୍ଭରଶୀଳ ।

ଗାଁର ଚାଷୀମାନେ କୋବି, ଲଙ୍କା, କଲରା, ଭେଣ୍ଡି, ମୂଳା ଓ ଅନ୍ୟାନ୍ୟ ପନିପରିବା ଚାଷ କରି ବଜାରରେ ବିକ୍ରି କରିଥାନ୍ତି ।

ଚଳିତ ବର୍ଷ ରିଲାଏନ୍ସ ଫାଉଣ୍ଡେସନ ତରଫରୁ ଗାଁର ୨୦ ଯୁବ ଓ ଉଦ୍ୟମୀ ଚାଷୀଙ୍କୁ ବ୍ରକୋଲି ଚାଷ ସମ୍ପର୍କିତ ପ୍ରଶିକ୍ଷଣ ନେଇଥିଲେ ।

ବ୍ରକୋଲି ଏକ ଉନ୍ନତ ମାନର ପରିବା ହୋଇଥିବାରୁ ଚାଷୀମାନେ ଏହାକୁ ବଲାଙ୍ଗୀର ବଜାରରେ ଏହାର ଚାହିଦା ବେଶ ଭଲ ରହିଛି ।

ନର୍ସରୀରୁ ୨୦/୨୧ ଦିନର ଚାରା ଆଣି ପ୍ରସ୍ତୁତ କ୍ଷେତରେ ଲଗାଇ ନିୟମିତ ବ୍ୟବଧାନରେ ପାଣି ଦିଆଯାଏ । ସାଧାରଣତଃ ଶୀତଦିନେ ବ୍ରକୋଲି ଚାଷ ହେଉଥିବାରୁ ଏଥିରେ ରୋଗପୋକ ସମ୍ଭାବନା କମ୍ ଥାଏ ।

ରିଲାଏନ୍ସ ଫାଉଣ୍ଡେସନ ପକ୍ଷରୁ ଆମକୁ ବିହନ ଯୋଗାଇ ଦିଆଯାଏ । ବ୍ୟବସାୟୀମାନେ ଆମ ଠାରୁ କିଲୋଗ୍ରାମ ପ୍ରତି ୬୦ ଟଙ୍କା ଦରରେ ବ୍ରକୋଲି କିଣୁଛନ୍ତି ବୋଲି ଯୁବ ଚାଷୀ ଶ୍ରୀକାନ୍ତ ସାଏ କହିଛନ୍ତି ।

ଗତବର୍ଷ ଅଳ୍ପ ଜମିରେ ବ୍ରକୋଲି ଚାଷ କରିଥିଲି । ଲାଭ ଭଲ ହେବାରୁ ଚଳିତ ବର୍ଷ ଅଧିକ ଜମିରେ କୋବି ଚାଷ କରିଛି । ଏହା ୬୦ରୁ ୮୦ ଦିନିଆ ଫସଲ ବୋଲି ଯୁବ ଚାଷୀ ରଘୁ ପ୍ରଧାନ କହିଛନ୍ତି ।

ତେବେ ମଣ୍ଡି ବ୍ୟବସ୍ଥା ଓ ଅନ୍ୟ ବିକଳ୍ପ ସୁବିଧା ନଥିବାରୁ ବ୍ରକୋଲି ଅଭାବୀ ବିକ୍ରି ହେବାର ଆଶଙ୍କା ରହିଛି । ଏସବୁ ଅବ୍ୟବସ୍ଥା ଦୂରେଇବାକୁ ଉଦ୍ୟମ ହେଲେ ଚାଷୀମାନେ ଅଧିକ ଲାଭ ପାଇପାରିବେ ବୋଲି ଚାଷୀ ସିନ୍ଧୁ ସାଏ କହିଛନ୍ତି ।

ପରୀକ୍ଷାମୂଳକ ଭାବେ ହୋଇଥିବା ବ୍ରକୋଲି ଚାଷରୁ ହେଉଥିବା ଲାଭକୁ ଦେଖି ଗାଁର ଅନ୍ୟ ଚାଷୀମାନେ ଏହି ଚାଷ ପାଇଁ ଆଗେଇ ଆସିବେ ବୋଲି ଫାଉଣ୍ଡେସନର ଜଣେ ଅଧିକାରୀ କହିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୧୮(ଲୋକାଲ ୱାୟାର): ପଶ୍ଚିମ ଓଡ଼ିଶାର ଏକ ପ୍ରମୁଖ ପର୍ଯ୍ୟଟନ ସ୍ଥଳୀ ହରିଶଙ୍କର । ବର୍ଷ ତମାମ ଏଠାକୁ ପର୍ଯ୍ୟଟକ ବୁଲିବାକୁ ଆସିଥାନ୍ତି ।

ତେଣୁ ତାକୁ ଦୃଷ୍ଟିରେ ରଖି ସ୍ଥାନୀୟ ଅଞ୍ଚଳର ବିକାଶ ଓ ପର୍ଯ୍ୟଟନ ଭିତ୍ତିଭୂମି ସଜାଡ଼ିବାକୁ ଉଦ୍ୟମ ଆରମ୍ଭ କରିଛି ଓଡ଼ିଶା ପର୍ଯ୍ୟଟନ ବିଭାଗ ।

ଗୁରୁବାର ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି)ର ଅଧ୍ୟକ୍ଷା ଶ୍ରୀମୟୀ ମିଶ୍ର, ବିଭାଗୀୟ ନିଦେ୍ର୍ଦଶକ ସଚ୍ଚିନ ରାମଚନ୍ଦ୍ର ଯାଦବ ହରିଶଙ୍କର ବୁଲି ଦେଖିବା ସହିତ ଏହାର ଉନ୍ନତିକରଣ ଲାଗି ପଦକ୍ଷେପ ସମ୍ପର୍କରେ ଆଲୋଚନା କରିଛନ୍ତି ।

ଏହି ପରିଦର୍ଶନ କାଳରେ ବଲାଙ୍ଗୀର ଜିଲ୍ଲାପାଳ ଉପସ୍ଥିତ ରହି ଅତୀତରେ ନିଆଯାଇଥିବା ପଦକ୍ଷେପ ସମ୍ପର୍କରେ ଅବଗତ କରିବା ସହ ଆଗକୁ ପର୍ଯ୍ୟଟକଙ୍କୁ ଆକର୍ଷିତ କଲାଭଳି ଏବଂ ସେମାନଙ୍କ ସୁବିଧା ଲାଗି କି କି ବ୍ୟବସ୍ଥା ଗ୍ରହଣ କରାଯିବ ।

ସେଥିପାଇଁ କ’ଣ ଯୋଜନା ରହିଛି ତାକୁ ବିସ୍ତୃତ ଭାବେ କହିଥିଲେ । ହରିଶଙ୍କର ଓ ଏହାର ଆଖପାଖରେ ଥିବା ପର୍ଯ୍ୟଟନସ୍ଥଳୀଗୁଡ଼ିକୁ ଆକର୍ଷିତ କରିବା ଲାଗି ପଦକ୍ଷେପ ନିଆଯାଉଥିଲା ବେଳେ ବିଭାଗୀୟ ଅଧିକାରୀଙ୍କ ଅଚାନକ ଗସ୍ତ ଅଞ୍ଚଳବାସୀଙ୍କ ମନରେ ଉତ୍ସାହ ସୃଷ୍ଟି କରିଛି ।

ଗତମାସରେ ହରିଶଙ୍କରକୁ ଯାତାୟାତ ନିମନ୍ତେ ବଲାଙ୍ଗୀରରୁ ହରିଶଙ୍କର ମଧ୍ୟରେ ୨୫ ସିଟ୍ ବିଶିଷ୍ଟ ଶୀତତାପ ନିୟନ୍ତ୍ରିତ ବସ୍ ଚଳାଚଳ ଆରମ୍ଭ ହୋଇଛି ।

ହରିଶଙ୍କର ଭିତ୍ତିଭୂମି ବିକାଶ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୧କୋଟି ଟଙ୍କା ଯୋଗାଇ ଦେବା ପରେ ପ୍ରଥମ ପଦକ୍ଷେପ ସ୍ୱରୂପ ଏହି ନିଷ୍ପତ୍ତି ନିଆଯାଇଛି ।

ଏହାର କିଛିଦିନ ପୂର୍ବରୁ ଓଟିଡିସି ଅଧ୍ୟକ୍ଷା ଶ୍ରୀମୟୀ ମିଶ୍ର ନୃସିଂହନାଥ ଓ ଅନ୍ୟାନ୍ୟ ପର୍ଯ୍ୟଟନସ୍ଥଳୀ ପରିଦର୍ଶନ କରି ସେଠାରେ ଭିତ୍ତିଭୂମି ସଜଡ଼ାଯିବ ବୋଲି ପ୍ରତିଶ୍ରୁତି ଦେଇଥିଲେ ।

ଲୋକାଲ ୱାୟାର

ବରଗଡ଼, ଡିସେମ୍ବର ୧୬(ଲୋକାଲ ୱାୟାର): ଭିଜିଲାନ୍ସ ଚଢ଼ାଉରେ ବରଗଡ଼ ଜିଲ୍ଲା ବିଜେପୁର ବ୍ଳକ ଗଣ୍ଠିଆପାଲି ପଞ୍ଚାୟତ ହାଇସ୍କୁଲ ପ୍ରଧାନ ଶିକ୍ଷକ ପ୍ରମୋଦ ପାଣିଗ୍ରାହୀଙ୍କର ୪ କୋଟି ଟଙ୍କାରୁ ଅଧିକ ପରିମାଣର ସମ୍ପତ୍ତି ଥିବା ଜଣାପଡ଼ିଥିବା ଅଧିକାରୀ ବୁଧବାର କହିଛନ୍ତି ।

ତାଙ୍କ କାର୍ଯ୍ୟାଳୟ ଓ ଘରେ ଚଢ଼ାଉ ବେଳେ ୪ କୋଟି ୪ ଲକ୍ଷ ୩୮ ହଜାର ୨୨୧ ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ଠାବ ହୋଇଛି ।

ବରଗଡ଼ ଜିଲ୍ଲା ବରପାଲି ବ୍ଲକ ତିଲେଇମାଲସ୍ଥିତ ପ୍ରମୋଦଙ୍କ ପୈତୃକ ଘର, ସୋନପୁର ଜିଲ୍ଲା ଡୁଙ୍ଗୁରିପାଲିସ୍ଥିତ ବାସଭବନ, ବଲାଙ୍ଗୀର ଜିଲ୍ଲା ଆଗଲପୁରସ୍ଥିତ ଘର ଏବଂ ବରଗଡ଼ ଜିଲ୍ଲା ଗଣ୍ଠିଆପାଲି ହାଇସ୍କୁଲରେ ଏକକାଳୀନ ଚଢ଼ାଉ ହୋଇଥିଲା ।

ଠାବ ହୋଇଥିବା ସମ୍ପତ୍ତି ମଧ୍ୟରେ ଚାରୋଟି କୋଠା (୩ କୋଟି ୧୧ ଲକ୍ଷ ଟଙ୍କା), ବିଭିନ୍ନ ଗାଡ଼ି (୧୪ ଲକ୍ଷ ୫୪ ହଜାର ୨୧୯ ଟଙ୍କା), ୧୫ ଲକ୍ଷ ୬୩ ହଜାର ଟଙ୍କାର ବୀମା, ୮ ଲକ୍ଷ ୪୯ ହଜାର ଟଙ୍କାର ୩୧୭ ଗ୍ରାମର ସୁନାଗହଣା, ବ୍ୟାଙ୍କ ଲକରରେ ଥିବା ୪ ଲକ୍ଷ ୮୯ ହଜାର ଟଙ୍କାର ୧୯୦ ଗ୍ରାମ ସୁନାଗହଣା, ୧ ଲକ୍ଷ ୮୬ ହଜାର ଟଙ୍କାର ଇଲେକ୍ଟ୍ରୋନିକ୍ସ ସାମଗ୍ରୀ, ୩ ଲକ୍ଷ ୫ ହଜାର ଟଙ୍କାର ଆସବାବପତ୍ର, ୫୬ ହଜାର ଟଙ୍କାର ଜମାରାଶି, ୫ ଲକ୍ଷ ୫୬ ହଜାର ୬୦୦ ଟଙ୍କାର ବ୍ୟାଙ୍କ ଜମା ଏବଂ ନଗଦ ୧୯ ଲକ୍ଷ ୨୬ ହଜାର ଟଙ୍କା ଥିବା କହିଛନ୍ତି ବରଗଡ଼ ଭିଜିଲାନ୍ସ ଡିଏସପି ପରମେଶ୍ୱର କିଷାନ ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୭ (ଲୋକାଲ ୱାୟାର) : ଓଡ଼ିଶାରେ ଶୀତ ବଢୁଥିବା ବେଳେ ଦକ୍ଷିଣ ଓ ପଶ୍ଚିମ ଓଡ଼ିଶାର ପ୍ରଚଣ୍ଡ ଜାଡ଼ ଅନୁଭୂତ ହେଉଛି ।

ଗତ ୨୪ ଘଣ୍ଟା ମଧ୍ୟରେ ୧୨ଟି ସହରର ସର୍ବନିମ୍ନ ତାପମାତ୍ରା ୧୪ ଡିଗ୍ରୀ ତଳକୁ ଖସିଥିବା ବେଳେ ଫୁଲବାଣୀରେ ସବୁଠାରୁ କମ୍ ୮.୫ ଡିଗ୍ରୀ ସେଲସିୟସ ତାପମାତ୍ରା ରେକର୍ଡ ହୋଇଛି ବୋଲି ଭୁବନେଶ୍ୱରସ୍ଥିତ ପାଣିପାଗ ବିଭାଗର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ସୋମବାର ସୂଚନା ଦିଆଯାଇଛି ।

ସର୍ବନିମ୍ନ ୧୪ ଡିଗ୍ରୀ ସେଲସିୟସ ତଳେ ଥିବା ୧୨ ସହର ହେଲା, ସୋନପୁର (୮.୮), ଦାରିଙ୍ଗିବାଡ଼ି (୯), ଅନୁଗୁଳ (୧୦.୬), କୋରାପୁଟ (୧୦.୬), ଭବାନୀପାଟଣା (୧୧.୬), ସୁନ୍ଦରଗଡ଼ (୧୩), ମାଲକାନଗିରି (୧୩), ବୌଦ୍ଧ (୧୩), ତାଳଚେର (୧୩.୩), ଝାରସୁଗୁଡ଼ା, (୧୩.୪) ଏବଂ ବଲାଙ୍ଗୀରରେ (୧୩.୫) ।

ତେବେ ଭୁବନେଶ୍ୱରରେ ତାପମାତ୍ରା ୧୭.୬ ଡିଗ୍ରୀ ସେଲସିୟସ ରହିଥିବା ବେଳେ କଟକରେ ୧୬.୪ ଡିଗ୍ରୀ ଅଛି ।

ଅନ୍ୟପଟେ ଚାନ୍ଦବାଲି ଏବଂ ରାୟଗଡ଼ାରେ ଅତିଘନ କୁହୁଡ଼ି ହୋଇଥିବା ବେଳେ ଦୃଶ୍ୟମାନ ଦୂରତା ୪୦ ମିଟର ରହିଥିଲା ।

ସେହିଭଳି ପାରାଦୀପ, ସୋନପୁର ଏବଂ ବୌଦ୍ଧରେ ମଧ୍ୟ ଘନକୁହୁଡି ରହିଥିଲା । ପାରାଦୀପଠାରେ ଦୃଶ୍ୟମାନ ଦୂରତା ୫୦ ମିଟର ଥିବାବେଳେ ସୋନପୁର ଏବଂ ବୌଦ୍ଧ ଠାରେ ଦୃଶ୍ୟମାନ ଦୂରତା ୧୦୦ ମିଟର ରହିଥିଲା ।

ଭୁବନେଶ୍ୱର, କଟକ, କୋରାପୁଟ ଏବଂ ନୟାଗଡ଼ରେ ହାଲୁକା କୁହୁଡି ରହିଥିଲା ।

ଲୋକାଲ ୱାୟାର

ବଲାଙ୍ଗୀର, ଡିସେମ୍ବର ୬ (ଲୋକାଲ ୱାୟାର): ରାସ୍ତା କଡ଼ରେ ଗଦା ହୋଇଥିବା କୁଢ଼ କୁଢ଼ ଅଳିଆ ପ୍ରଦୂଷଣ ବଢ଼ାଇବା ସହ ବିଭିନ୍ନ ପ୍ରକାର ରୋଗର ଗନ୍ତାଘର ପାଲଟିଥାଏ ।

ବଲାଙ୍ଗୀର ସହର ମଧ୍ୟ ଏଥିରୁ ବାଦ ପଡ଼ିନଥିଲା । ସହରରୁ ଦିନକୁ ବାହାରୁଥିବା ୭ ଟନ ବର୍ଜ୍ୟ ପୌର ସଂସ୍ଥାର ଚିନ୍ତାର କାରଣ ପାଲଟିଥିଲା ।

ହେଲେ ବିଜାଖମଣ ଠାରେ ମାଇକ୍ରୋ କମ୍ପୋଷ୍ଟିଂ କେନ୍ଦ୍ର ସ୍ଥାପିତ ହେବା ପରେ ବଲାଙ୍ଗୀର ସହରର ବର୍ଜ୍ୟ ପରିଚାଳନା ସ୍ଥିତି ବଦଳିବାକୁ ଆରମ୍ଭ କରିଛି ।

ବିଜାଖମଣ ମାଇକ୍ରୋ କମ୍ପୋଷ୍ଟିଂ କେନ୍ଦ୍ରରେ ପ୍ରଥମେ କଠିନ ଓ ଓଦା ବର୍ଜ୍ୟ ଅଲଗା କରାଯାଏ । ଗୋଟିଏ ୟୁନିଟରେ ଓଦା ବର୍ଜ୍ୟକୁ ପ୍ରକ୍ରିୟାକରଣ କରାଯାଇ ସେଥିରୁ ସାର ପ୍ରସ୍ତୁତ କରାଯାଏ ।

ଅନ୍ୟ ୟୁନିଟରେ କଠିନ ବର୍ଜ୍ୟକୁ ଅଲଗା କରି ପୁନଃବ୍ୟବହାର ଯୋଗ୍ୟ କରି କବାଡ଼ିବାଲା ଓ ଜରିଗୋଟାଳିଙ୍କୁ ସେମାନଙ୍କ ବ୍ୟବସାୟ ପାଇଁ ଦିଆଯାଉଛି ।

ପ୍ଲାଷ୍ଟିକ ଓ ପଲିଥିନ ଭଳି ନଷ୍ଟ ହେଉନଥିବା ସାମଗ୍ରୀ ସିମେଣ୍ଟ ଫ୍ୟାକ୍ଟ୍ରିକୁ ପଠା ଯାଇଥାଏ ।

ବଲାଙ୍ଗୀର ସହରର ବର୍ଜ୍ୟ ପରିଚାଳନା ପାଇଁ ବିଜାଖମଣ ଡମ୍ପିଂ ୟାର୍ଡରେ ସ୍ଥାପିତ ଏମସିସିର ଦୈନିକ କ୍ଷମତା ୫ ଟନ ରହିଛି ।

ଏଠାରୁ ଜୈବ ସାର ଉତ୍ପାଦନ ଆରମ୍ଭ ହୋଇଛି ।

ଲୋକେ ଏଣେତେଣେ ଅଳିଆ ଫିଙ୍ଗି ପ୍ରଦୂଷଣ ନକରି ତଥା ଅଳିଆ ପୋଡି ପରିବେଶ ପ୍ରଦୂଷିତ ନକରି ମୁ୍ୟନିସିପାଲିଟିକୁ ଅଳିଆ ଦେବାକୁ ଅନୁରୋଧ କରାଯାଉଛି ବୋଲି ବଲାଙ୍ଗୀର ମୁ୍ୟନିସିପାଲିଟି କାର୍ଯ୍ୟନିର୍ବାହୀ ଅଧିକାରୀ ବିପିନ ଦୀପ କହିଛନ୍ତି ।

ଏମସିସିରୁ ଉତ୍ପାଦିତ ସାର କିଲୋପ୍ରତି ୨୦ ଟଙ୍କାରେ ବିକ୍ରି ହେଉଛି । ଏପର୍ଯ୍ୟନ୍ତ ଆମେ ୩ ହଜାର ଟଙ୍କାର ସାର ବିକ୍ରି କରି ସାରିଲୁଣି ।

ଏହାବ୍ୟତୀତ ବଲାଙ୍ଗୀର ମୁ୍ୟନିସିପାଲିଟି ପକ୍ଷରୁ ରାତିରେ ଅଳିଆ ସଫା ଓ ଓଳାଇବା କାମ କାମ ସପ୍ତାହେ ହେଲା ଆରମ୍ଭ ହୋଇଛି ବୋଲି ବଲାଙ୍ଗୀର ମୁ୍ୟନିସିପାଲିଟିରେ କାର୍ଯ୍ୟରତ ଶିକ୍ଷାନବୀଶ ଆଇଏଏସ ଅଧିକାରୀ ମନୋଜ ମହାଜନ କହିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୬ (ଲୋକାଲ ୱାୟାର) : ଓଡ଼ିଶାର ଅଧିକାଂଶ ସହରରେ ରାତିରେ ସର୍ବନିମ୍ନ ତାପମାତ୍ରା ଖସୁଥିବା ବେଳେ ଗତ ୨୪ ଘଣ୍ଟା ମଧ୍ୟରେ ୧୪ଟି ସହରର ସର୍ବନିମ୍ନ ତାପମାତ୍ରା ୧୪ ଡିଗ୍ରୀ ତଳକୁ ଖସିଛି ।

ସୋନପୁରରେ ସବୁଠାରୁ କମ୍ ୭.୬ ଡିଗ୍ରୀ ସେଲସିୟସ ତାପମାତ୍ରା ରେକର୍ଡ ହୋଇଛି ବୋଲି ଭୁବନେଶ୍ୱରସ୍ଥିତ ପାଣିପାଗ ବିଭାଗର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ରବିବାର ସୂଚନା ଦିଆଯାଇଛି ।

ସର୍ବନିମ୍ନ ୧୪ ଡିଗ୍ରୀ ସେଲସିୟସ ତଳେ ଥିବା ୧୪ ସହର ହେଲା, ଫୁଲବାଣୀ (୮.୩), ଦାରିଙ୍ଗିବାଡ଼ି (୯), ଅନୁଗୁଳ (୧୦), ଭବାନୀପାଟଣା (୧୦.୨), କୋରାପୁଟ (୧୧.୬), ତାଳଚେର (୧୧.୯), ସୁନ୍ଦରଗଡ (୧୨), କେନ୍ଦୁଝର (୧୨.୪), ବଲାଙ୍ଗୀର (୧୨.୮), ଝାରସୁଗୁଡ଼ା (୧୩), ବାରିପଦା (୧୩.୪), ହୀରାକୁଦ (୧୩.୬) ଓ ସମ୍ବଲପୁର (୧୪.୭) ।

ତେବେ ଭୁବନେଶ୍ୱରରେ ତାପମାତ୍ରା ୧୭.୬ ଡିଗ୍ରୀ ସେଲସିୟସ ରହିଥିବା ବେଳେ କଟକରେ ୧୫.୮ ଡିଗ୍ରୀ ଅଛି ।

ଅନ୍ୟପଟେ ଚାନ୍ଦବାଲିରେ ଆଜି ଅତିଘନ କୁହୁଡ଼ି ହୋଇଥିବା ବେଳେ ଦୃଶ୍ୟମାନ ଦୂରତା ୩୦ ମିଟର ରହିଥିଲା ।

ସେହିଭଳି ପାରାଦୀପରେ ଘନକୁହୁଡି ଦୃଶ୍ୟମାନ ଦୂରତା ୫୦ ମିଟର ଥିବାବେଳେ ଭୁବନେଶ୍ୱର, କଟକ ଏବଂ ଫୁଲବାଣୀରେ ଦୃଶ୍ୟମାନ ଦୂରତା ୮୦୦ ମିଟରରୁ କମ ଥିଲା ।

ଲୋକାଲ ୱାୟାର

ବଲାଙ୍ଗିର, ଡିସେମ୍ବର ୪ (ଲୋକାଲ ୱାୟାର): ବଲାଙ୍ଗିର ଜିଲ୍ଲା ତୁଷୁରା ଥାନା ଅନ୍ତର୍ଗତ ଜମ୍ଭେଲ ଛକ ନିକଟରେ ଶୁକ୍ରବାର ଅପରାହ୍ଣରେ ବୋଲେରୋ ଧକ୍କାରେ ଏକ ବାଇକ ଜଳି ଯାଇଥିବା ବେଳେ ବାଇକରେ ଥିବା ଏକ ପରିବାରର ବାପା-ମା’ ଓ ଜଣେ ଜଣେ ପୁଅ ପ୍ରାଣ ହରାଇଥିବା ବେଳେ ଅନ୍ୟ ଜଣେ ୮ ମାସର ପୁଅ ବର୍ତ୍ତି ଯାଇଛି ।

ପୁଲିସ ସୂତ୍ରରୁ ପ୍ରକାଶ, କଳାହାଣ୍ଡି ଜିଲ୍ଲା ରିଷିଡ଼ାର ତରଣୀସେନ ବିଶି(୩୭) ଅସୁସ୍ଥ ଥିବା ସାନ ପୁଅକୁ ନେଇ ବାଇକରେ ବଲାଙ୍ଗିର ଡାକ୍ତରଖାନାକୁ ଯାଇଥିଲେ । ସାଙ୍ଗରେ ପତ୍ନୀ ଓ ବଡ଼ ପୁଅ ଶମ୍ଭୁ (୪) ମଧ୍ୟ ଥିଲେ ।

ବଲାଙ୍ଗିରରୁ ଫେରୁଥିବା ବେଳେ ଜମ୍ଭେଲ ଛକ ନିକଟରେ ବିପରୀତ ଦିଗରୁ ଆସୁଥିବା ଏକ ବୋଲେରୋ ଧକ୍କା ଦେଇଥିଲା । ଭୟଙ୍କର ଦୁର୍ଘଟଣାରେ ବାଇକଟି ରାସ୍ତା ତଳକୁ ଖସି ସମ୍ପୂର୍ଣ୍ଣ ଜଳି ଯାଇଥିଲା ।

ଘଟଣାସ୍ଥଳରେ ତରଣୀସେନ ଓ ପୁଅ ଶମ୍ଭୁଙ୍କର ମୃତ୍ୟୁ ହୋଇଥିଲା । ଡାକ୍ତରଖାନା ନେବା ବାଟରେ ନିକିତାଙ୍କର ମୃତ୍ୟୁ ହୋଇଥିଲା ।

ଛୋଟ ଶିଶୁ ପୁତ୍ରଟି ଏବେ ଡାକ୍ତରଖାନାରେ ଚିକିତ୍ସିତ ହେଉଛି । ଦୁର୍ଘଟଣା ପରେ ସ୍ଥାନୀୟ ଲୋକେ ମୃତକଙ୍କ ପରିବାରକୁ କ୍ଷତିପୂରଣ ଦାବିରେ ରାସ୍ତା ଅବରୋଧ କରିଛନ୍ତି ।

ଲୋକାଲ ୱାୟାର