ବାଲେଶ୍ଵର

ଭୁବନେଶ୍ୱର, ଅକ୍ଟୋବର ୨୩(ଲୋକାଲ ୱାୟାର): ତିର୍ତ୍ତୋଲ ଓ ବାଲେଶ୍ୱର ସଦର ଉପନିର୍ବାଚନରେ ନିୟୋଜିତ କର୍ମଚାରୀଙ୍କ ପାଇଁ ନିର୍ବାଚନ କମିଶନ ଶୁକ୍ରବାର ଅନୁକମ୍ପା ରାଶି ଘୋଷଣା କରିଛନ୍ତି ।

ନିର୍ବାଚନରେ ନିୟୋଜିତ ହୋଇଥିବା ପୁଲିସ, ଯବାନ କିମ୍ବା ଅନ୍ୟାନ୍ୟ କର୍ମଚାରୀମାନଙ୍କ ମଧ୍ୟରୁ କାହାରି କୌଣସି ଘଟଣା/ଦୁର୍ଘଟଣା କିମ୍ବା କୋଭିଡରେ ମୃତ୍ୟୁ ହେଲେ ସେମାନଙ୍କ ପରିବାରକୁ ସରକାର ୩୦ ଲକ୍ଷ ଟଙ୍କାର ଅନୁକମ୍ପା ରାଶି ପ୍ରଦାନ କରିବେ ।

ଏମାନଙ୍କ ମଧ୍ୟରେ ଭାରତ ଇଲେକ୍ଟ୍ରୋନିକ୍ସ ଲିମିଟେଡ୍ ଓ ଇସିଆଇଏଲର ଇଞ୍ଜିନିୟରମାନେ ମଧ୍ୟ ଅନ୍ତର୍ଭୁକ୍ତ ।

ଲୋକାଲ ୱାୟାର

ବାଲେଶ୍ୱର, ଅକ୍ଟୋବର ୨୨(ଲୋକାଲ ୱାୟାର): ବାଲେଶ୍ୱର ଜିଲ୍ଲାର ସୋରୋ ଥାନାଞ୍ଚଳରେ ଏକ ବଜ୍ରକାପ୍ତା ଉଦ୍ଧାର କରାଯାଇଥିବା ବେଳେ ଜଣଙ୍କୁ ଗିରଫ କରାଯାଇଥିବା ବନ ବିଭାଗର ସ୍ଥାନୀୟ ଅଧିକାରୀ କହିଛନ୍ତି ।

ବାଲେଶ୍ୱର ବନ୍ୟପ୍ରାଣୀ ଡିଭିଜନର ଡିଏଫଓ ବିୱାରଜ ପଣ୍ଡା କହିଛନ୍ତି, ସୋରୋ ଥାନା ଅନ୍ତର୍ଗତ ମହୁମୁହାଣ ଗ୍ରାମର ସୁଦର୍ଶନ ନାୟକ ଏକ ବଜ୍ରକାପ୍ତା ରଖିଥିବା ନେଇ ସୂଚନା ମିଳିବା ପରେ ବୁଧବାର ରାତି ଚଢ଼ାଉ କରାଯାଇଥିଲା ।

ସୋରୋ ଓ ନୀଳଗିରି ଡିଭିଜନର ଏସିଏଫ ସମୀର କୁମାର ସାହୁ ଓ ତପନ କୁମାର ପଣ୍ଡାଙ୍କ ନେତୃତ୍ୱରେ ଏହି ଚଢ଼ାଉ ହୋଇଥିଲା ।

ଜବତ ହୋଇଥିବା ମାଈ ବଜ୍ରକାପ୍ତାଟିର ଓଜନ ୧୦ କିଲୋ । ଅଭିଯୁକ୍ତକୁ ଗିରଫ କରାଯାଇଛି ଏବଂ ବଜ୍ରକାପ୍ତାଟିକୁ କୁଲଡିହା ଅଭୟାରଣ୍ୟରେ ଛାଡ଼ି ଦିଆଯିବ ବୋଲି ଅଧିକାରୀ କହିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୧୯(ଲୋକାଲ ୱାୟାର): ବାଲେଶ୍ୱର ସଦର ଓ ତିର୍ତ୍ତୋଲ ବିଧାନସଭା ନିର୍ବାଚନମଣ୍ଡଳୀର ଉପନିର୍ବାଚନ ପାଇଁ ସୋମବାର ପ୍ରାର୍ଥୀପତ୍ର ଯାଞ୍ଚ ଶେଷ ହୋଇଛି ।

ଯାଞ୍ଚ ପରେ ବାଲେଶ୍ୱର ସଦରରେ ୬ ଜଣ ଓ ତିର୍ତ୍ତୋଲରେ ୯ ଜଣ ପ୍ରାର୍ଥୀ ରଣାଙ୍ଗନରେ ରହିଛନ୍ତି ।

ତିର୍ତ୍ତୋଲରେ ଥିବା ପ୍ରାର୍ଥୀମାନେ ହେଲେ ବିଜୟ ଶଙ୍କର ଦାସ(ବିଜେଡି), ରାଜକିଶୋର ବେହେରା (ବିଜେପି), ହିମାଂଶୁ ଭୂଷଣ ମଲ୍ଲିକ (କଂଗ୍ରେସ), ବିଜୟ କୁମାର ଭୋଇ (ଭାରତୀୟ କମୁ୍ୟନିଷ୍ଟ ପାର୍ଟି), ସ୍ୱାଧୀନ ପ୍ରାର୍ଥୀ ଅର୍ଜ୍ଜୁନ ଚରଣ ବେହେରା, ରମେଶ ଚନ୍ଦ୍ର ମଲ୍ଲିକ, ରବୀନ୍ଦ୍ରନାଥ ସେଠୀ, ଗୋଲାପ ମଞ୍ଜରି ଭୋଇ, ସଚିତ୍ର ମଲ୍ଲିକ ।

ବାଲେଶ୍ୱର ସଦର ଆସନରେ ଥିବା ପ୍ରାର୍ଥୀମାନେ ହେଲେ ମାନସ କୁମାର ଦତ୍ତ (ବିଜେପି), ସ୍ୱରୁପ କୁମାର ଦାସ (ବିଜେଡି), ମମତା କୁଣ୍ଡୁ )କଂଗ୍ରେସ), ସ୍ୱାଧୀନ ପ୍ରାର୍ଥୀ ଭାଗ୍ୟଦୁ୍ୟତ୍ ଦାସପଟ୍ଟନାୟକ, ବେଣୁଧର ବାରିକ ଓ ମହମ୍ମଦ ନୁମନ ଖାଁ ।

ଲୋକାଲ ୱାୟାର

ବାଲେଶ୍ୱର, ଅକ୍ଟୋବର ୧୭ (ଲୋକାଲ ୱାୟାର) : ବାଲେଶ୍ୱର ଜିଲ୍ଲା ନୀଳଗିରି ବ୍ଲକ୍ ଅନ୍ତର୍ଗତ ତେଲିପାଳ ଅଞ୍ଚଳରେ ଶନିବାର ଏକ ଉଡନ୍ତା ବେଲୁନ ଗଛରେ ଲାଗିଥିବା ସ୍ଥାନୀୟ ଲୋକେ କହିଛନ୍ତି ।

ବେଲୁନ୍‌ରେ କିଛି ଯନ୍ତ୍ରାଂଶ, କ୍ୟାମେରା ଲାଗିଥିବା ଦେଖିବାକୁ ମିଳିଥିଲା । ଯାହାକୁ ନେଇ ସ୍ଥାନୀୟ ଲୋକେ ଭୟଭୀତ ହୋଇଯାଇଥିଲେ ।

ଏହି ବେଲୁନ୍ କେଉଁଠୁ ଆସିଥିଲା ସେ ନେଇ ସ୍ପଷ୍ଟ ହୋଇ ନ ଥିବା ବେଳେ ପୁଲିସ ଘଟଣାର ତଦନ୍ତ ଚଳାଇଛି ।

ଯନ୍ତ୍ରାଂଶ ପଡିଥିବା ସ୍ଥାନରୁ ଚାନ୍ଦିପୁର ସମନ୍ୱିତ ପରୀକ୍ଷା କେନ୍ଦ୍ର (ଆଇଟିଆର) ମାତ୍ର ୫୦ କିଲୋମିଟର ଦୂରରେ ଥିବାରୁ ମିସାଇଲ ପରୀକ୍ଷା ସମୟରେ ଏହାକୁ ବ୍ୟବହାର କରାଯାଇଥିବା ସନ୍ଦେହ କରାଯାଉଛି ।

ଲୋକାଲ ୱାୟାର

ବାଲେଶ୍ୱର, ଅକ୍ଟୋବର ୧୪ (ଲୋକାଲ ୱାୟାର) : ବାଲେଶ୍ୱର ଜିଲ୍ଳା ଡିଗିରିବାହୀ ଛକ ନିକଟରେ ବୁଧବାର ସକାଳେ ଏକ ବସ୍ ଧାନ ବିଲ ଭିତରେ ଓଲଟି ପଡ଼ିଥିବା ବେଳେ ୫ ଜଣ ଆହତ ହୋଇଛନ୍ତି ବୋଲି ସ୍ଥାନୀୟ ପୁଲିସ କହିଛି ।

ପୁଲିସ ସୂଚନା ଅନୁସାରେ, ୨୦ ଜଣ ଯାତ୍ରୀଙ୍କୁ ନେଇ ବସ୍‌ଟି କଷଫଳରୁ ବାଲେଶ୍ୱର ଆସୁଥିବା ବେଳେ ଭାରସାମ୍ୟ ହରାଇ ରାସ୍ତା କଡ଼ରେ ଥିବା ଧାନ ବିଲକୁ ଓଲଟି ପଡିଥିଲା ।

ଘଟଣାରେ ଆହତ ହୋଇଥିବା ୫ ଜଣଙ୍କ ମଧ୍ୟରୁ ଜଣେ ଗର୍ଭବତୀ ମଧ୍ୟ ଅଛନ୍ତି । ସମସ୍ତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି ।

ଲୋକାଲ ୱାୟାର

ବାଲେଶ୍ୱର, ଅକ୍ଟୋବର ୧୩(ଲୋକାଲ ୱାୟାର): ରାଜ୍ୟର ବିଭିନ୍ନ ସ୍ଥାନରେ ନିକଟରେ କେତେକ ବ୍ୟାଙ୍କ ଓ ଏଟିଏମ୍ ଲୁଟ୍ ହୋଇଥିବା ବେଳେ ମଙ୍ଗଳବାର ପୂର୍ବାହ୍ନରେ ବାଲେଶ୍ୱର ଜିଲ୍ଲାର ଭୋଗରାଇ ଅଞ୍ଚଳରେ ଏକ ବ୍ୟାଙ୍କରୁ ୨୦ ଲକ୍ଷ ଟଙ୍କା ଲୁଟ୍ ନେଇ ଅଭିଯୋଗ ହୋଇଥିବା ସ୍ଥାନୀୟ ପୁଲିସ କହିଛି ।

ଭୋଗରାଇ ବ୍ଲକ ଚୌକିସ୍ଥିତ ୟୁକୋ ବ୍ୟାଙ୍କକୁ ଆଜି ପୂର୍ବାହ୍ନରେ ୬ ଜଣ ଯୁବକ ଦୁଇଟି ବାଇକରେ ଆସିଥିଲେ । ସମସ୍ତେ ମୁହଁରେ ମାସ୍କ ପିନ୍ଧିଥିଲେ । ସେମାନେ ଗ୍ରାହକ ଭାବେ ବ୍ୟାଙ୍କ ଭିତରକୁ ଯାଇଥିଲେ ।

ଏହାପରେ ବନ୍ଧୁକ ଦେଖାଇ ଗ୍ରାହକ ଓ କର୍ମଚାରୀମାନଙ୍କୁ ଆତଙ୍କିତ କରାଇଥିଲେ । ସେ ସମୟରେ ବ୍ୟାଙ୍କର ମ୍ୟାନେଜର ନଥିଲେ ।

ଲୁଟେରାମାନେ କ୍ୟାସ୍ କାଉଣ୍ଟରରେ ଥିବା ସମସ୍ତ ଟଙ୍କା ଲୁଟି ନେଇ ଦୁଇଟି ବାଇକରେ ପଶ୍ଚିମବଙ୍ଗ ଦିଗକୁ ଦ୍ରୁତି ଗତିରେ ଚାଲି ଯାଇଥିବା ପ୍ରତ୍ୟକ୍ଷଦର୍ଶୀମାନେ କହିଛନ୍ତି ।

ଅଭିଯୋଗ ପାଇବା ପରେ ପୁଲିସ ପହଞ୍ଚି ତଦନ୍ତ କରୁଛି । ବିଭିନ୍ନ ରାସ୍ତାକୁ ସିଲ୍ କରି ଗାଡ଼ିମୋଟର ତଲାସୀ କରାଯାଉଥିବା ସ୍ଥାନୀୟ ଜନୈକ ପୁଲିସ ଅଫିସର କହିଛନ୍ତି ।

ଲୋକାଲ ୱାୟାର

ବାଲେଶ୍ୱର, ଅକ୍ଟୋବର ୧୨ (ଲୋକାଲ ୱାୟାର): ବାଲେଶ୍ୱର ସଦର ଉପନିର୍ବାଚନ ତାତି ଜୋର ଧରିଥିବା ବେଳେ ନିର୍ବାଚନ ମଣ୍ଡଳୀ ଅନ୍ତର୍ଗତ ପରିଖି ପଂଚାୟତର ନନ୍ଦଛକ, ୱାର୍ଡ ନଂ-୯ର ବନ୍ୟା ପୀଡ଼ିତମାନେ ୧୨ ଦଫା ଦାବି ପୂରଣ ନହେଲେ ଭୋଟ ବର୍ଜନ ନିଷ୍ପତ୍ତି ନେଇଛନ୍ତି ।

ଦାବିଗୁଡ଼ିକ ମଧ୍ୟରେ ଲୁଣିବନ୍ଧ କେନାଲ ଉପରେ ପୋଲ, ସବୁଦିନିଆ ରାସ୍ତା, ଗାଁର ଗରିବ ଲୋକଙ୍କୁ ଘର, ଶୁଦ୍ଧ ପାନୀୟ ଜଳ ଯୋଗାଣ ଓ ଡ୍ରେନ ନିର୍ମାଣ ଆଦି ସାମିଲ ରହିଛି ।

ଜିଲ୍ଲା ପ୍ରଶାସନ ଓ ନେତାମାନଙ୍କ ଅବହେଳା ଯୋଗୁ ଗାଁର ୩ ଶହ ପରିବାରର ବେଶ ଦୟନୀୟ ସ୍ଥିତିରେ ରହୁଛନ୍ତି ।

ସ୍ୱାଧୀନତାର ୭୩ ବର୍ଷ ବିତି ଯାଇଥିଲେ ମଧ୍ୟ ଗାଁରେ ସରକାରୀ ଯୋଜନାରେ କୌଣସି ବିକାଶମୂଳକ କାମ ହୋଇନାହିଁ ।

ବାତ୍ୟା, ବନ୍ୟା ଭଳି ପ୍ରାକୃତିକ ବିପର୍ଯ୍ୟୟରେ ପ୍ରଭାବିତ ହେଉଥିବା ଗରିବ ଲୋକଙ୍କୁ ପକ୍କା ଘର ଖଣ୍ଡେ ମିଳି ପାରିନାହିଁ ।

ସରକାରୀ ଯୋଜନା ଗାଁରେ ପହଁଚି ପାରିନଥିବା ବେଳେ ଲୁଣିବନ୍ଧରେ ପୋଲ, ପକ୍କା ଘର, ସବୁଦିନିଆ ରାସ୍ତା, ଗରିବ ପରିବାରକୁ ଶୌଚାଳୟ ଭଳି ଅନ୍ୟାନ୍ୟ ସୁବିଧା ସେମାନଙ୍କ ପାଇଁ ସ୍ୱପ୍ନ ।

୩୫ ବର୍ଷ ତଳେ ବାହା ହୋଇ ଆସିବା ଦିନ ଠାରୁ ଗାଁରେ ରାସ୍ତା ଖଣ୍ଡେ ନାହିଁ । ଗାଁର ଗୋଟିଏ ପଟେ ବୁଢାବଳଙ୍ଗ ଥିବା ବେଳେ ଅନ୍ୟ ପଟେ ଲୁଣି ବନ୍ଧ କେନାଲ ଥିବାରୁ ସବୁବେଳେ ବନ୍ୟା ଭୟ ଲାଗି ରହିଛି ।

ଗାଁ ଲୋକେ ନିଜେ ନିର୍ମାଣ କରିଥିବା ବାଉଁଶ ପୋଲରେ ପାରି ହୋଇ ସହର ଓ ଡାକ୍ତରଖାନା ଯାଇଥାନ୍ତି । ପ୍ରତିବର୍ଷ ପୋଲ ମରାମତି କରିବାକୁ ପଡେ ବୋଲି ମହିଳା ଭୋଟର ସୁବାସିନୀ ଟୁଡୁ କହିଛନ୍ତି ।

ଶୌଚାଳୟ, ଗାଁ ରାସ୍ତା, ପୋଲ ନିର୍ମାଣ ପାଇଁ ପ୍ରତିଶ୍ରୁତି ମିଳୁଥିଲେ ବି କାର୍ଯ୍ୟକାରୀ ହେଉନାହିଁ ।

ବନ୍ୟା ପରେ ସ୍ଥାନୀୟ ବିଡିଓ ଓ ଆରଆଇ ସ୍ଥିତି ସମୀକ୍ଷା କରିଥିଲେ ମଧ୍ୟ ଏଯାଏଁ ବନ୍ୟା ପୀଡ଼ିତଙ୍କୁ ସହାୟତା ମିଳିନାହିଁ ବୋଲି କିଛି ଗ୍ରାମବାସୀ ଅଭିଯୋଗ କରିଛନ୍ତି ।

ପ୍ରମୁଖ ଦାବିଗୁଡିକ ପୂରଣ ନହେବା ଯାଏଁ ଗ୍ରାମବାସୀମାନେ ଭୋଟରେ ଅଂଶଗ୍ରହଣ କରିବେ ନାହିଁ । ନେତାଙ୍କ ଅର୍ଥ ବଳ ଓ ଜିଲ୍ଲା ଅଧିକାରୀଙ୍କ ପ୍ରତିଶ୍ରୁତି ଦ୍ୱାରା ସେମାନେ ପ୍ରଭାବିତ ହେବେ ନାହିଁ ।

ନେତା ଓ ଜିଲ୍ଲା ପ୍ରଶାସନକୁ ଉଚିତ ଜବାବ ଦେବାର ଏହାହିଁ ପ୍ରକୃଷ୍ଟ ସମୟ ବୋଲି କହିଛନ୍ତି ପରିଖି ବିକାଶ ମଞ୍ଚର ସଭାପତି ଚାରୁଭଦ୍ର ଜାନା ।

ଲୋକାଲ ୱାୟାର

ବାଲେଶ୍ୱର, ଅକ୍ଟୋବର ୧୨ (ଲୋକାଲ ୱାୟାର) : ବାଲେଶ୍ୱର ସଦର ଉପନିର୍ବାଚନ ପାଇଁ ବିଜେପିର ପ୍ରଚାର କମିଟି ଅଧ୍ୟକ୍ଷ ହୋଇଛନ୍ତି ରଘୁନାଥ ମହାନ୍ତି ।

୧୩ ଜଣିଆ ପ୍ରଚାର କମିଟିର ଅଧ୍ୟକ୍ଷ ଭାବେ ରଘୁନାଥଙ୍କୁ ଦାୟିତ୍ୱ ଦେଇଛି ଦଳ ।

ବାଲେଶ୍ୱରରେ କେମିତି ପ୍ରଚାର ହେବ, କିଏ କିଏ ପ୍ରଚାର କରିବେ ଏବଂ ଲୋକଙ୍କ ପାଖରେ କେଉଁ ପ୍ରସଙ୍ଗ ଉଠାଇବେ ନେତା ତା’ର ଦାୟିତ୍ୱ ରଘୁନାଥଙ୍କ ଉପରେ ରହିଛି ।

ବାଲେଶ୍ୱର ସଦର ବିଧାନସଭା ଆସନ ପାଇଁ ବିଜେପି ନିଜ ପ୍ରସ୍ତୁତି ଚୂଡାନ୍ତ କରିଛି ।

ଏହି ଆସନ ପାଇଁ ବିଜେପି ଦିବଙ୍ଗତ ବିଧାୟକ ମଦନମୋହନ ଦତ୍ତଙ୍କ ପୁଅ ମାନସ କୁମାର ଦତ୍ତଙ୍କୁ ପ୍ରାର୍ଥୀ କରିଛି । ଏନେଇ ଦଳ ଗତକାଲି ଘୋଷଣା କରିଛି ।

ଲୋକାଲ ୱାୟାର

ବାଲେଶ୍ୱର, ଅକ୍ଟୋବର ୧୧ (ଲୋକାଲ ୱାୟାର): ବାଲେଶ୍ୱର ସଦର ବ୍ଲକ ସଭାପତି ପୁଣି ବିଜେଡିରେ ଯୋଗ ଦେବା ପରେ ନିର୍ବାଚନୀ ତାତି ଜୋର ଧରିଛି ।

ନଭେମ୍ବର ୩ ଉପନିର୍ବାଚନ ପୂର୍ବରୁ ନାରାୟଣଙ୍କ ଘର ବାହୁଡ଼ା ଯୋଗୁଁ ନିର୍ବାଚନୀ ସମୀକରଣ ବଦଳିଛି ।

ପୂର୍ବରୁ ଲମ୍ବା ଥିବା ଆଶାୟୀ ପ୍ରାର୍ଥୀ ତାଲିକାରେ ନାରାୟଣଙ୍କ ନାମ ଯୋଡି ହୋଇଛି ।

ସକ୍ରିୟ ବିଜେଡି ନେତା ନାରାୟଣ ପ୍ରଧାନ ଗତ ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନୀତି ଓ ଆଦର୍ଶରେ ଅନୁପ୍ରାଣିତ ହୋଇ ବିଜେପିରେ ଯୋଗ ଦେଇଥିଲେ ।

ହେଲେ ମାତ୍ର ୪୮ ଘଣ୍ଟା ମଧ୍ୟରେ ଶୁକ୍ରବାର ସେ ପୁଣି ବିଜେଡିକୁ ଫେରି ଆସିଛନ୍ତି ।

ଜିଲ୍ଲା ସଭାପତି ରବୀନ୍ଦ୍ର ଜେନା ଦଳକୁ ମଜବୁତ କରିବା ପାଇଁ ବୁଥ ସ୍ତରରୁ ଅଭିଯାନ ଆରମ୍ଭ କରି ବିଜେଡି ସରକାରର ଉଲ୍ଲେଖନୀୟ ସଫଳତା ଲୋକଙ୍କ ପାଖରେ ପହଁଚାଇବାକୁ ଉଦ୍ୟମ କରୁଛନ୍ତି ।

ବିଜେଡି ସରକାରଙ୍କ ଉପରେ ଲୋକଙ୍କ ଆସ୍ଥା ରହିଛି । ଅନେକ କାର୍ଯ୍ୟକ୍ରମର ସଫଳ ରୂପାୟନ ହୋଇଛି । ଏସବୁ ବାର୍ତା ଭୋଟରଙ୍କ ପାଖରେ ପହଁଚାଇବାକୁ କର୍ମୀମାନେ ଉଦ୍ୟମ ଜାରି ରଖିଛନ୍ତି ।

ଗତ ନିର୍ବାଚନରେ ହାରିଥିବା ନେତାଙ୍କୁ ଦଳୀୟ ଟିକେଟ ମିଳିବ ନାହିଁ ବୋଲି ବିଜେଡି ନିଷ୍ପତି ନେଇଥିବାରୁ ବିଜେଡି ନେତା ତଥା ବାଲେଶ୍ୱର ସଦର ପୂର୍ବତନ ବିଧାୟକ ଜୀବନ ପ୍ରଦୀପ ଦାଶ ଟିକେଟ ଦୌଡରେ ନାହାନ୍ତି ।

ଦଳୀୟ ସମସ୍ୟା ଯୋଗୁଁ ସେ ଅସନ୍ତୁଷ୍ଟ ଥିଲେ ମଧ୍ୟ ବିଜେଡିରେ ଅଛନ୍ତି । ଅନ୍ୟ କୌଣସି ଦଳରେ ଯୋଗ ଦେବାର ଯୋଜନା ନାହିଁ ବୋଲି ସେ କହିଛନ୍ତି ।

ନାରାୟଣ ପ୍ରଧାନ ବିଜେପିରେ ଯୋଗ ଦେବା ପରେ ବାଲେଶ୍ୱର ସଦରର ଦୁଇ ବିଜେଡି ନେତା ଓ କିଛି ସରପଞ୍ଚ ବିଜେପିରେ ଯୋଗ ଦେବେ ବୋଲି ଚର୍ଚ୍ଚା ହେଉଥିଲା ।

ବିଜେଡି ଏହାର ସୁରାକ୍ ପାଇ ପୁଣି ନାରାୟଣଙ୍କୁ ଦଳକୁ ଫେରାଇ ଆଣିଥିବାରୁ ଦଳୀୟ ସ୍ଥିତି ଓ ବିଜେଡିର ଭୋଟ ବଢିଛି ବୋଲି ରାଜନୈତିକ ପର୍ଯ୍ୟବେକ୍ଷକମାନେ କହିଛନ୍ତି ।

ତେବେ ନାରାୟଣ ପ୍ରଧାନ ପୁଣି ବିଜେଡିକୁ ଫେରିଯିବା ଘଟଣାର ପ୍ରଭାବ ଦଳ ଉପରେ ପଡ଼ିବ ନାହିଁ ବୋଲି ବିଜେପି ଜିଲ୍ଲା ସଭାପତି ଉମାକାନ୍ତ ମହାପାତ୍ର କହିଛନ୍ତି ।

ସେପଟେ ପ୍ରଦେଶ କଂଗ୍ରେସ କମିଟିର ପର୍ଯ୍ୟବେକ୍ଷକ ଡଃ ଏ. ଚେଲ୍ଲାକୁମାର ଶନିବାର କୃଷକ ବଞ୍ଚାଅ ଶୋଭାଯାତ୍ରା ଆୟୋଜନ କରି ବିଜେଡି ଓ ବିଜେପି ସରକାରକୁ ସମାଲୋଚନା କରିଥିଲେ ।

କୃଷି ଓ କୃଷକଙ୍କ ସ୍ୱାର୍ଥକୁ କଂଗ୍ରେସ ଦଳ ହିଁ ସବୁବେଳେ ପ୍ରାଥମିକତା ଦେଇ ଆସିଛି ।

ନୂଆ କୃଷି ନୀତିରେ ଏମଏସପି ବ୍ୟବସ୍ଥା ନଥିବାରୁ ଏହା ଚାଷୀମାନଙ୍କ ଅର୍ଥନୀତିକୁ ପ୍ରଭାବିତ କରିବ ।

ଆଗାମୀ ତିନି ଦିନ ଭିତରେ ବାଲେଶ୍ୱର ସଦର ଉପନିର୍ବାଚନ ପାଇଁ ପ୍ରାର୍ଥୀ ଘୋଷଣା କରାଯିବ ବୋଲି ସେ କହିଥିଲେ ।

ପ୍ରଚାର ବେଳେ ଶିକ୍ଷା, କୃଷି, ଜଳସେଚନ, ଶିଳ୍ପ ଓ କୃଷକଙ୍କ ବିକାଶ ପାଇଁ କଂଗ୍ରେସ କରିଥିବା କାମ ଲୋକଙ୍କ ପାଖରେ ପହଁଚାଇବୁ ବୋଲି ପିସିସି ସାଧାରଣ ସମ୍ପାଦକ ସଞ୍ଜୀବ କୁମାର ଗିରି କହିଛନ୍ତି ।

ଲୋକାଲ ୱାୟାର