ବ୍ରହ୍ମପୁର, ଜାନୁଆରୀ ୨୩ (ଲୋକାଲ ୱାୟାର): ଗଂଜାମ ଜିଲ୍ଲା ବୁଗୁଡ଼ା ନିକଟ ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ବୁଢ଼ାଖୋଲ ନିକଟରେ ଇକୋ-ପାର୍କ ପ୍ରତିଷ୍ଠା କରାଯିବ ବୋଲି ବନ ବିଭାଗ ପକ୍ଷରୁ କୁହାଯାଇଛି।
ଆଗାମୀ ତିନି ବର୍ଷ ମଧ୍ୟରେ ଏଠାରେ ଇକୋ-ପାର୍କ କରାଯିବ ଓ ଏଥିପାଇଁ ୨ କୋଟି ୮୫ ଲକ୍ଷ ଟଙ୍କା ଖର୍ଚ୍ଚ ହେବ।
ନିକଟରେ ଜଙ୍ଗଲ ଓ ପରିବେଶ ମନ୍ତ୍ରୀ ବିକ୍ରମ କେଶରୀ ଆରୁଖ ପ୍ରସ୍ତାବିତ ଇକୋ-ପାର୍କ ପାଇଁ ଭିତ୍ତି ପ୍ରସ୍ତର ସ୍ଥାପନ କରିଛନ୍ତି।
ବୁଢା଼ଖୋଲ ପାହାଡ଼ ପାଦଦେଶରେ ଏଥିପାଇଁ ଜମି ନିରୂପଣ କରାଯାଇଛି।
ଏଥିରେ ଏକ ଜଳାଶୟ, ଇକୋ-ଟ୍ରେକିଂ ଓ ଔଷଧୀୟ ବଗିଚା ରହିବ।
ସେହିପରି ରାଜ୍ୟରେ ପ୍ରଥମ କରି ଏଠାରେ ଏକ ନକ୍ଷତ୍ର ବନ ପ୍ରତିଷ୍ଠା କରାଯିବ ବୋଲି ଘୁମୁସର ଦକ୍ଷିଣର ଡି.ଏଫ୍.ଓ. ସତ୍ୟନାରାୟଣ ବେହୁରା କହିଛନ୍ତି।
ବିଭିନ୍ନ ନକ୍ଷତ୍ରଙ୍କ ସହ ସଂପୃକ୍ତ ଔଷଧୀୟ ବୃକ୍ଷ ଏହି ଉଦ୍ୟାନରେ ରହିବ ଓ ଏଥିପାଇଁ କେନ୍ଦ୍ର ଆୟୁଷ ମନ୍ତ୍ରାଳୟ ଏହାକୁ ମଂଜୁରୀ ଦେଇଥିବା ସେ ସୂଚନା ଦେଇଛନ୍ତି।
ଏହି ଅଂଚଳରେ କୃଷ୍ଣସାର ମୃଗ ଦେଖିବାକୁ ମିଳନ୍ତି ଏବଂ ନିକଟରେ ଥିବା ବାଘୁଆ ଜଳଭଣ୍ଡାରରେ ପକ୍ଷୀଙ୍କ ସମାଗମ ଦେଖିବାକୁ ମିଳେ।
ଏସବୁ ଦୃଷ୍ଟିରୁ ବୁଢ଼ାଖୋଲ ପର୍ଯ୍ୟଟକଙ୍କୁ ଆକର୍ଷିତ କରିବ ବୋଲି ବନ ବିଭାଗ ଆଶା ରଖିଛି।
ବୁଢା଼ଖୋଲ ପାହାଡ଼ରେ ପ୍ରାଚୀନ ବୁଦ୍ଧମୂର୍ତ୍ତିର ଭଗ୍ନାବଶେଷ ଦେଖିବାକୁ ମିଳେ ଓ ଏହା ପ୍ରଥମ ଶତାବ୍ଦୀର ବୋଲି ଐତିହାସିକମାନେ କୁହନ୍ତି।
ସେହିପରି ଏଠାରେ ଏଠାରେ ଥିବା ସିଦ୍ଧିଗୁମ୍ଫା ମଧ୍ୟ ପର୍ଯ୍ୟଟକଙ୍କୁ ଆକର୍ଷିତ କରେ।
ସପ୍ତଦଶ ଶତାବ୍ଦୀରେ ଭଂଜ ରାଜାମାନଙ୍କ ଦ୍ବାରା ନିର୍ମିତ ପାଞ୍ଚଟି ଶିବ ମନ୍ଦିର ଏହି ପାହାଡ଼ରେ ରହିଛି।
ଲୋକାଲ୍ ଓ୍ବାୟାର୍
