ଭଦ୍ରକ, ଅକ୍ଟୋବର ୨୬ (ଲୋକାଲ ଓ୍ବାୟର) କେନ୍ଦ୍ରର ସାଗରମାଳ ଯୋଜନାରେ ଭଦ୍ରକ-କେନ୍ଦ୍ରାପଡା ଜଳପଥ ବିକଶିତ କରିବା ପାଇଁ ସରକାର ନିଷ୍ପତ୍ତି ନେଇଥିବାରୁ ଏହା କାର୍ଯ୍ୟକ୍ଷମ ହେଲେ କଲିକତାରୁ ଆସୁଥିବା ପର୍ଯ୍ୟଟକ ଖୁବ ସହଜରେ ବିଶ୍ୱ ପ୍ରସିଦ୍ଧ ଭିତରକନିକାକୁ ଯାତାୟତ କରିପାରିବେ ବୋଲି ରାଜ୍ୟ ବାଣିଜ୍ୟ ବିଭାଗର ଜଣେ ଯନ୍ତ୍ରୀ ଶନିବାର କହିଛନ୍ତି ।
ଭଦ୍ରକ ଜିଲ୍ଲାରେ ଥିବା ଧାମରା ବନ୍ଦର ଏକ ଆର୍ନ୍ତଜାତିକ ବନ୍ଦରର ମାନ୍ୟତା ପାଇବାକୁ ଯାଉଥିବା ବେଳେ ଏହାର ନିକଟବର୍ତ୍ତୀ କାଳିନାଳୀ ଘାଟଠାରୁ କେନ୍ଦ୍ରାପଡା ଜିଲ୍ଲାର ତାଳଚୁଆ ଫେରିଘାଟକୁ ଯାତାୟତ କରୁଥିବା ଲୋକ ମାନଙ୍କ ସ୍ୱାର୍ଥକୁ ଦୃଷ୍ଟିରେ ରଖି ଏହାକୁ ସାଗରମାଳା ଯୋଜନାରେ ଅର୍ନ୍ତଭୁକ୍ତ କରିବା ପାଇଁ କେନ୍ଦ୍ର ସରକାରଙ୍କୁ ରାଜ୍ୟ ବାଣିଜ୍ୟ ବିଭାଗ ଅବଗତ କରାଇଥିଲା ।
କେନ୍ଦ୍ର ସରକାର ଏହାକୁ ସ୍ୱୀକୃତି ଦେବା ସହ କାଳିନାଳୀ ଘାଟରେ ମୃତ୍ତିକା ପରୀକ୍ଷା କରିବାକୁ ଆଦେଶ ଦେଇଥିଲେ । ଏହି ଆଦେଶ ପାଇବା ପରେ ଆଇ ଆଇ ଆଇ ଟି ଚେନ୍ନାଇର ଯନ୍ତ୍ରୀ ମାନେ ଆସି ଏହାର ପରୀକ୍ଷଣ କରିବା ସହ ଶେଷ ରିପୋର୍ଟ କେନ୍ଦ୍ର ସରକାରଙ୍କ ପାଖରେ ଦାଖଲ କରିଛନ୍ତି ।
ସାଗରମାଳା ଯୋଜନାରେ ଧାମରା ଠାରେ ଥିବା କାଳିନାଳୀ ଘାଟ ଏବଂ କେନ୍ଦ୍ରାପଡାର ତାଳଚୁଆ ଫେରିଘାଟରେ ୨ଟି ଅତି ଉନ୍ନତ ମାନର ଏରୋଫାକ୍ସ ଜେଟି ନିର୍ମାଣ କରାଯିବ ।
ଏଥିସହ ୨ ଜାହାଜ ପ୍ରତି ଘଂଟା ଅନ୍ତରରେ ୨ଟି ସ୍ଥାନରୁ ଛାଡିବ । ଏହି ଜାହାଜରେ ଟ୍ରକ,ବସ ଯାତାୟତ କରିବା ସୁବିଧା ହୋଇପାରିବା ସହ ଆଗାମୀ ଦିନରେ ଏହି ଜେଟିରୁ ମାଲ ପରିବହନ ମଧ୍ୟ ହୋଇ ପାରିବ ବୋଲି ସେ ସୂଚନା ଦେଇଛନ୍ତି ।
ଏହି ସେବା ଉପଲବଦ୍ଧ ହେବା ପରେ ଭିତରକନିକାକୁ ଯାତାୟତ କରିବା ପାଇଁ ସିଧାସଳଖ ବସ ଯୋଗେ ଟୁରିଷ୍ଟ ମାନେ ଆସି ଏହି ସ୍ଥାନ ବୁଲି ପାରିବେ ।ଏହା ଫଳରେ ରାଜ୍ୟ ସରକାରଙ୍କ ରାଜସ୍ୱ ବୃଦ୍ଧିପାଇବା ସହ ବହୁ ସଂଖ୍ୟାରେ ଟୁରିଷ୍ଟ ବସ ଯୋଗେ ଭିତରକନିକାକୁ ଯାଇ ପାରିବେ ।
ପ୍ରାଥମିକ ପ୍ରଦକ୍ଷେପ ସ୍ୱରୂପ ଧାମରା କାଳୀନାଳୀ ଠାରୁ ବଙ୍ଗୋପସାଗର ମୁହାଣ ଏବଂ କେନ୍ଦ୍ରାପଡା ଜିଲ୍ଲାର ତାଳଚୁଆ ଫେରିଘାଟ ପର୍ଯ୍ୟନ୍ତ ଥିବା ଜଳପଥକୁ ଡ୍ରେଜିଂ କରାଯିବ ଏବଂ ପ୍ରତି ମାସ ଏହି ମୁହାଣ ଅଂଚଳ ପୋତି ପଡୁଥିବାରୁ ଏହାକୁ ପ୍ରତିମାସରେ ଡ୍ରେଜିଂ କରାଯିବ ବୋଲି ସେ କହିଛନ୍ତି।
ଲୋକାଲ ଓ୍ବାୟର
