ଭୁବନେଶ୍ବର

ଭୁବନେଶ୍ୱର, ଅକ୍ଟୋବର ୧୪ (ଲୋକାଲ ୱାୟାର) : ଭୁବନେଶ୍ୱର ଆରଟିଓ-୨ ବୁଧବାର ଏକ ଯାତ୍ରୀବାହୀ ବସକୁ ୫ ଲକ୍ଷ ୬୬ ହଜାର ଟଙ୍କାର ଜରିମାନା କରିଥିବା ନେଇ ଜଣେ ଅଧିକାରୀ କହିଛନ୍ତି ।

ଅଧିକାରୀଙ୍କ ସୂଚନା ଅନୁସାରେ, ଓଡି ୧୦ ଏଫ୍ ୦୪୦୯ ନମ୍ବର ବିଶିଷ୍ଟ ଏହି ବସଟି କୋରାପୁଟରୁ ଭୁବନେଶ୍ୱର ମଧ୍ୟରେ ଯାତାୟତ କରୁଛି ।

ହେଲେ ବସଟି ୨୦୧୯ ମସିହା ମେ’ ମାସରୁ ଏ ପର୍ଯ୍ୟନ୍ତ ଏମସି ଟ୍ୟାକ୍ସ ପୈଠ କରି ନାହିଁ । ବସଟିର ବୈଧ ଷ୍ଟେଜ୍ କ୍ୟାରେଜ୍ ପରମିଟ୍ ମଧ୍ୟ ନାହିଁ ।

ତେଣୁ ବସକୁ ଟ୍ୟାକ୍ସ ସହ ମୋଟ ୫ ଲକ୍ଷ ୬୬ ହଜାର ୯୮୧ ଟଙ୍କା ଜରିମାନା ଲଗାଯାଇଛି ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୫ (ଲୋକାଲ ୱାୟାର) : ଭୁବନେଶ୍ୱରର ମଞ୍ଚେଶ୍ୱର ବରୀମୁଣ୍ଡସ୍ଥିତ ବ୍ୟାଙ୍କ ଡକାୟତି ଘଟଣାରେ ସମ୍ପୃକ୍ତ ଥିବା ଜଣେ ଲୁଟେରାକୁ ଗିରଫ କରାଯାଇଛି ବୋଲି କମିଶନରେଟ୍ ପୁଲିସର ସୋମବାର ସୂଚନା ଦେଇଛି ।

ଗିରଫ ଲୁଟେରା ଜଣକ ବରିମୁଣ୍ଡ ଟାଙ୍ଗୀବନ୍ତ ଅଞ୍ଚଳର ସୌମ୍ୟ ରଞ୍ଜନ ଜେନା । ତା’ପାଖରୁ ନଗଦ ୫ ଲକ୍ଷରୁ ଅଧିକ ଟଙ୍କା, ବନ୍ଧୁକ ଓ ସ୍କୁଟି ଜବତ କରିଛି ପୁଲିସ ।

ଏହାସହ ଘଟଣାରେ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କୁ ଗିରଫ କରିବା ଲାଗି କମିଶନରେଟ୍ ପୁଲିସର ସ୍ପେଶାଲ ଟାସ୍କ ଫୋର୍ସ ଉଦ୍ୟମ ଜାରି ରଖିଛି ।

ସୂଚନାଯୋଗ୍ୟ, ସେପ୍ଟେମ୍ବର ୨୯ ତାରିଖରେ ବରୀମୁଣ୍ଡସ୍ଥିତ ବ୍ୟାଙ୍କ ଅଫ୍ ଇଣ୍ଡିଆ ଶାଖା ଭିତରେ ଦୁର୍ବୃତ୍ତ ପଶି ବନ୍ଧୁକ ଦେଖାଇ ୧୦ ଲକ୍ଷ ଟଙ୍କା ଲୁଟି ନେଇଥିଲେ ।

ଲୋକାଲ ୱାୟାର

ଭୁବନେଶ୍ୱର, ଅକ୍ଟୋବର ୧ (ଲୋକାଲ ୱାୟାର) : ଆଜି ବିଧାନସଭା ସମ୍ମୁଖରେ ଜଣେ ଯୁବକ ନିଜ ମା’ର ବେକରେ ଛୁରୀ ଲଗାଇ ତଣ୍ଟିକାଟିବାକୁ ଉଦ୍ୟମ କରୁଥିବା ବେଳେ ପୁଲିସ ଯୁବକକୁ କାବୁ କରି ନେଇଛି ।

ପୁଅ କବଳରୁ ମା’ଙ୍କୁ ଉଦ୍ଧାର କରିବା ପାଇଁ ପୁଲିସ୍‌କୁ ନାକେଦମ୍ ହେବାକୁ ପଡିଥିଲା । ମା’ଙ୍କୁ ଉଦ୍ଧାର କରିବା ପରେ ପୁଅକୁ ନିଜ ହେପାଜତକୁ ନେଇଛି ପୁଲିସ ।

ଉଭୟଙ୍କ ସ୍ୱାସ୍ଥ୍ୟ ପରୀକ୍ଷା ପରେ ଥାନାରେ ଅଟକ ରଖି ପୁଲିସ ପଚରାଉଚରା କରୁଛି ।

ଯୁବକ ଜଣକ କାହିଁକି ଏଭଳି କାଣ୍ଡ କରିଛି, ସେ ନେଇ ତଦନ୍ତ ଚଳାଇଛି ।

ପୁଲିସ୍ ପଚରାଉଚରା ବେଳେ ମହିଳା ଜଣକ କହିଛନ୍ତି, ଯୁବକ ଜଣକ ତାଙ୍କ ପୁଅ । ସେ ତାଙ୍କୁ ଡାକ୍ତରଖାନାକୁ ନେଇ ଆସିଥିଲେ ।

କିନ୍ତୁ ହଠାତ ବିଧାନସଭା ଆଗରେ ଆସି ତାଙ୍କ ବେକରେ ଛୁରୀ ଲଗାଇ ଚିତ୍କାର କରିଥିଲେ ।

ଘଟଣାସ୍ଥଳରେ କିଛି କାଗଜପତ୍ର ମିଳିଥିବା ବେଳେ ଯୁବକ ଜଣକ କିଛି ନେତା ମନ୍ତ୍ରୀଙ୍କ ନାଁରେ ଅଭିଯୋଗ ମଧ୍ୟ କରିଥିବା ସୂଚନା ମିଳିଛି ।

ବିଧାନସଭା ଚାଲିଥିବାରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ଏହା ସତ୍ତ୍ୱେ ବିଧାନସଭା ସମ୍ମୁଖରେ ଏଭଳି ଘଟଣା କେମିତି ଘଟିଲା ସେ ନେଇ ବିରୋଧୀ ପ୍ରଶ୍ନ କରିଛନ୍ତି ।

କଂଗ୍ରେସ ବିଧାୟକ ସୁର ରାଉତରାୟ ବିଧାନସଭା ସୁରକ୍ଷା ବ୍ୟବସ୍ଥାକୁ ସମାଲୋଚନା କରିବା ସହ ରାଜ୍ୟରେ ଆଇନଶୃଙ୍ଖଳା ଭୁଶୁଡି ପଡିଥିବା କହିଛନ୍ତି ।

ସେ କହିଛନ୍ତି, ଆଜି ଯଦି ଉକ୍ତ ଯୁବକ ଜଣକ ମୁଖ୍ୟମନ୍ତ୍ରୀ, କେଉଁ ମନ୍ତ୍ରୀ, ବିଧାୟକ ବା ମୋ ବେକରେ ଛୁରୀ ଲଗାଇଥାନ୍ତା, ତେବେ ଆଜି କ’ଣ ଅବସ୍ଥା ହୋଇଥାନ୍ତା ବୋଲି ସେ ପ୍ରଶ୍ନ କରିଛନ୍ତି ।

ଘଟଣା ଅତ୍ୟନ୍ତ ନିନ୍ଦନୀୟ, ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଉ ବୋଲି ସୁର ରାଉତରାୟ କହିଛନ୍ତି ।

ଘଟଣାପରେ କମିଶନରେଟ୍ ପୁଲିସ ଟ୍ୱିଟ୍ କରି କହିଛି ଯେ, ଘଟଣାଟି ବିଧାନସଭା ସିକ୍ୟୁରିଟି ପରିଧି ବାହାରରେ ଘଟିଥିଲା । ପୁଲିସ ଧୌର୍ଯ୍ୟର ସହ ମୁକାବିଲା କରି ମହିଳାଙ୍କୁ ମୁକୁଳାଇ ଥିଲା।

ଧୌର୍ଯ୍ୟ ଓ ବୃତ୍ତିଗତ ଦକ୍ଷତା ପାଇଁ ସଂପୃକ୍ତ ପୁଲିସକୁ ପ୍ରୋତ୍ସାହିତ କରାଯିବ । ମାନସିକ ବିକାରଗ୍ରସ୍ତ ସଂପୃକ୍ତ ଯବୁକଙ୍କୁ ଚିକିତ୍ସା ପାଇଁ କଟକ ଏସ୍‌ସିବି ମେଡିକାଲକୁ ପଠାଇ ଦିଆଯାଇଛି । କୌଣସି ସୁରକ୍ଷା ଭଙ୍ଗ ହୋଇନି ବୋଲି କମିଶନରେଟ୍ ପୁଲିସ ସ୍ପଷ୍ଟ କରିଛି ।

ଲୋକାଲ ୱାୟାର

ଭୁବନେଶ୍ୱର, ଅଗଷ୍ଟ ୧୭(ଲୋକାଲ ୱାୟାର): କମିଶନରେଟ ପୁଲିସରେ ସୋମବାର ବ୍ୟାପକ ଅଦଳବଦଳ କରାଯାଇ ବିଭିନ୍ନ ଥାନାରେ ନୂତନ ଅଧିକାରୀଙ୍କୁ ନିଯୁକ୍ତି ଦିଆଯାଇଥିବା ବିଭାଗୀୟ ବିଜ୍ଞପ୍ତିରୁ ପ୍ରକାଶବିଜ୍ଞପ୍ତି ଅନୁସାରେ, ଆଡିସନାଲ ଡିସିପି କିଶୋର ଚନ୍ଦ୍ର ପାଟ୍ଟଶାଣୀଙ୍କୁ ଭୁବନେଶ୍ୱର ଅର୍ବାନ ପୁଲିସ ଜିଲ୍ଲା (ୟୁପିଡି), ଆଡିସନାଲ ଡିସିପି ସୁବାଷ ଚନ୍ଦ୍ର ମହାନ୍ତିଙ୍କୁ କମିଶନେରେଟ ମୁଖ୍ୟାଳୟ ଆଇବି ଡିଭିଜନରେ ନିଯୁକ୍ତି ଦିଆଯାଇଛି ।

ଇନ୍ସପେକ୍ଟର ଭରତ ଚନ୍ଦ୍ର ସାହୁଙ୍କୁ କ୍ୟାପିଟାଲ ଥାନା, ଶରତ କୁମାର ସାହୁଙ୍କୁ ନୟାପଲ୍ଲୀ ଥାନା, ଯୁବରାଜ ସ୍ୱାଇଁଙ୍କୁ ଚନ୍ଦ୍ରଶେଖରପୁର ଥାନା, ଅରୁଣ କୁମାର ସ୍ୱାଇଁଙ୍କୁ ଖାରବେଳ ନଗର ଥାନା, ଗିରିଜା ଶଙ୍କର ଚକ୍ରବର୍ତ୍ତୀଙ୍କୁ ଲକ୍ଷ୍ମୀସାଗର ଥାନା, ବିଶ୍ୱରଞ୍ଜନ ସେନାପତିଙ୍କୁ ନନ୍ଦନକାନନ ଥାନା, ଦୀପକ କୁମାର ମିଶ୍ରଙ୍କୁ ଏୟାରଫିଲ୍ଡ ଥାନା, ଅଞ୍ଜଳି ଛୋଟରାୟଙ୍କୁ ଚନ୍ଦ୍ରଶେଖପୁରପୁର ଟ୍ରାଫିକ୍ ଥାନା, ଦୟାନିଧି ନାୟକଙ୍କୁ ଧଉଳି ଥାନା, ପ୍ରମୋଦ କୁମାର ପଟ୍ଟନାୟକଙ୍କୁ ତମାଣ୍ଡୋ ଥାନା, ବିରଞ୍ଚି ନାରାୟଣ ପତିଙ୍କୁ ଚୌଦ୍ୱାର ଥାନା, ରଶ୍ମିରଞ୍ଜନ ମହାପାତ୍ରଙ୍କୁ ବାଦାମବାଡ଼ି ଥାନା, ରବୀନ୍ଦ୍ର ନାଥ ବେହେରାଙ୍କୁ ଜଗତପୁର ଥାନା, ପ୍ରଦୀପ୍ତ କିଶୋର ନାୟକଙ୍କୁ ମର୍କତନଗର ଥାନା, ପଦ୍ମନାଭ ପ୍ରଧାନଙ୍କୁ ଖଣ୍ଡଗିରି ଥାନା, ହିମାଂଶୁ ଭୂଷଣ ସ୍ୱାଇଁଙ୍କୁ ସହିଦନଗର ଥାନାର ଅଧିକାରୀ ଭାବେ ନିଯୁକ୍ତି ଦିଆଯାଇଛି ।

ଏସଆଇ ମହମ୍ମଦ ଜାମସେଦଙ୍କୁ ଖଣ୍ଡଗିରି ଥାନାରେ, ଶୁଭ୍ରାନ୍ତ କୁମାର ଜେନାଙ୍କୁ ଚନ୍ଦକା ଥାନାରେ, ସଙ୍ଗୀତା ଦାଶଙ୍କୁ ଲିଙ୍ଗରାଜ ଥାନାରେ, ସଞ୍ଜୁକ୍ତା ସାହୁଙ୍କୁ ସହିଦନଗର ଥାନାରେ, ହରିକୃଷ୍ଣ ପ୍ରଧାନଙ୍କୁ ବନମାଳିପୁର ଫାଣ୍ଡିରେ, ଶୁଭଶ୍ରୀ ଶୁଭସ୍ମିତା ଗୁରୁଙ୍କୁ କମିଶନେରେଟ ମୁଖ୍ୟାଳୟ ଏବଂ ଜଟଣୀ ଥାନାର ଏଏସଆଇ ଫକୀର ଚରଣ ପ୍ରଧାନଙ୍କୁ ଜେଏମଏଫସି କୋର୍ଟରେ ନିଯୁକ୍ତି ଦିଆଯାଇଛି ।

ଲୋକାଲ ୱାୟାର

ଚନ୍ଦ୍ରଶେଖରପୁର, ଜୁନ ୮ (ଲୋକାଲ ୱାୟାର) କରୋନା ମହାମାରୀରୁ ରକ୍ଷା ପାଇବା ପାଇଁ ନେଇ ସାରା ବିଶ୍ବ ବାସୀ ସାବଧାନତା ଅବଲମ୍ବନ କରୁଥିବା ବେଳେ ସମସ୍ତ ପ୍ରତିଷେଧକ ବ୍ୟବସ୍ଥା ସତ୍ବେ ଜାଣତରେ ହେଉ ବା ଅଜାଣତରେ ହେଉ ଜଣେ କର୍ମଚାରୀଙ୍କ ଅସାବଧାନତା କିପରି ଏକ କମ୍ପାନୀକୁ ଅସୁବିଧାରେ ପକାଇପାରେ ଗୋଟିଏ କମ୍ପାନୀର ଜଣେ ପ୍ରମୁଖ ଅଧିକାରୀ ଲୋକାଲ ୱାୟାର ସହ ଆଲୋଚନା ବେଳେ ବର୍ଣନା କରିଛନ୍ତି ।

ଭୁବନେଶ୍ୱର ଚନ୍ଦ୍ରଶେଖରପୁର ଅଂଚଳର ନୀଳାଦ୍ରି ବିହାର ଠାରେ ଥିବା ଏକ ସୂଚନା ପ୍ରଯୁକ୍ତି ସେବା ପ୍ରଦାନ କରୁଥିବା କମ୍ପାନୀରେ ଜଣେ କର୍ମଚାରୀ ପଜିଟିଭ ଚିହ୍ନଟ ହେବା ପରେ ସ୍ଥାନୀୟ ପ୍ରଶାସନ କମ୍ପାନୀର ସମ୍ପୃକ୍ତ ଅଫିସକୁ ସିଲ କରିଛନ୍ତି।

୦୪.୦୬.୨୦୨୦ଠାରୁ ୧୭.୦୬.୨୦୨୦ ପର୍ଯ୍ୟନ୍ତ ପ୍ରଶାସନ ନିରୀକ୍ଷଣରେ ରଖିଥିବା ସଂସ୍ଥାର କୋଠା ସାମ୍ନାରେ ପୋଷ୍ଟର ମାରିଛି ।

ଏହି ସଂସ୍ଥା ମୁଖ୍ୟତଃ କଲ ସେଣ୍ଟର କାର୍ଯ୍ୟ ମାଧ୍ୟମରେ ବହୁ ସରକାରୀ ଓ ବେସରକାରୀ ସଂସ୍ଥାକୁ ବର୍ଷ ବର୍ଷ ହେଲା ସେବା ଯୋଗାଇ ଆସୁଛି ଏହା ଛଡା ରାଜଧାନୀର ଅନ୍ୟତ୍ର ମଧ୍ୟ ଏହାର ଏକ କେନ୍ଦ୍ର ରହିଛି।

ସରକାରଙ୍କ ସବୁ ନିୟମକୁ ମାନି ଲକଡ଼ାଉନ ସମୟରେ ସଂସ୍ଥା କାର୍ଯ୍ୟକରି ଆସୁଥିଲା।

ପ୍ରତ୍ଯେକ ଦିନ ଅଫିସ ସାନିଟାଇଜ କରିବା ସହ, ମାସ୍କ, ଗ୍ଲୋଭ, ସାମାଜିକ ଦୂରତା ଏପରିକି କେବଳ ୨୫ପ୍ରତିଶତ କର୍ମଚାରୀ ଙ୍କୁ ନେଇ କାମ କରି ଆସୁଥିଲା।

କିନ୍ତୁ ଜଣେ କର୍ମଚାରୀଙ୍କ ମଧ୍ୟରେ ଅଚାନକ ଲକ୍ଷଣ ଦେଖାଦେବା ପରେ ସଂସ୍ଥା ପକ୍ଷରୁ ପ୍ରଶାସନକୁ ସୂଚନା ଦିଆଯାଇଥିଲା ।

ପ୍ରଶାସନ ନମୂନା ପରୀକ୍ଷା ପରେ ସମ୍ପୃକ୍ତ କର୍ମଚାରୀଙ୍କୁ ପଜିଟିଭ ପାଇଥିଲେ ଓ ଅଫିସକୁ ସିଲ କରିଥିଲେ।

ନିଜ କର୍ମଚାରୀ ଓ ରାଜ୍ୟକୁ ମହାମାରୀ ଦାଉରୁ ରକ୍ଷା ପାଇଁ ସଂସ୍ଥା ସବୁ ପ୍ରକାର ଚେଷ୍ଟା ଏବଂ ସହଯୋଗ କରୁଥିଲେ ମଧ୍ୟ ଜଣକ ଅସାବଧାନତା ସମସ୍ଯା ସୃଷ୍ଟିକରିପାରେ ବୋଲି ସେ କହିଛନ୍ତି।

ଲକଡାଉନ ପୂର୍ବରୁ ସମ୍ପୃକ୍ତ ସଂସ୍ଥାର ଉକ୍ତ ଅଫିସରେ ୫ଶହରୁ ଉର୍ଦ୍ଧ କର୍ମଚାରୀ ଅଫିସ ଆସି ବିଭିନ୍ନ ପ୍ରୋଜେକ୍ଟ ରେ କାମକରୁଥିବାବେଳେ ଲକଡାଉନ ପାଇଁ ସୀମିତ ସଂଖ୍ୟକ କର୍ମଚାରୀ ଆସୁଥିଲେ ।

ତେବେ ଅଫିସ ସିଲ ହେବାରୁ ଘରେ ରହି ସମସ୍ତ କର୍ମଚାରୀ କାମ କରିବେ।

ତେବେ ଅଫିସ ବନ୍ଦ ହେବା ଦ୍ଵାରା ନିଶ୍ଚିତ ଭାବେ କାମ ଠିକ ସମୟରେ ଶେଷ ହୋଇପାରିବ ନାହିଁ ।

ଏଥିଯୋଗୁଁ କମ୍ପାନୀକୁ ଆର୍ଥିକ କ୍ଷତିର ସାମ୍ନା କରିବାକୁ ପଡିବ ।

ଅନେକ କର୍ମଚାରୀ ନିଜ ଘରକୁ ଚାଲି ଯାଇଥିବାରୁ ସେମାନଙ୍କ ଫେରିବାକୁ ନେଇ ମଧ୍ୟ ସଂଶୟ ରହିଛି।

ଉପଯୁକ୍ତ ସମୟରେ ପ୍ରୋଜେକ୍ଟ କାମ ଆରମ୍ଭ ନ ହେଲେ କର୍ମଚାରୀ ଅଭାବରୁ ହାତରୁ କାମ ଚାଲି ଯିବାର ଆଶଙ୍କା ରହିଛି ।

ଅଫିସ ଖୋଲିଲେ ଆଗକୁ କମ୍ପାନୀପାଇଁ ଏହିସବୁ ଚ୍ୟାଲେଞ୍ଜ ରହିଥିବା ସେ ଲୋକାଲ ୱାୟାରକୁ କହିଛନ୍ତି।

ଲୋକାଲ ୱାୟାର

ଭୁବନେଶ୍ବର, ଏପ୍ରିଲ ୩ (ଲୋକାଲ ୱାୟାର): ରାଜ୍ୟ ସରକାର ଶୁକ୍ରବାର ଭୁବନେଶ୍ୱର , ଭଦ୍ରକ ଓ କଟକ ସହରରେ କରୋନା ସଂକ୍ରମଣ ରୋକିବା ପାଇଁ ଆଜି ରାତି ଆଠଟାରୁ ୪୮ ଘଣ୍ଟା ପର୍ଯ୍ୟନ୍ତ ସମ୍ପୂର୍ଣ୍ଣ ସକ୍ ଡାଉନ୍ ବା କର୍ଫ୍ୟୁ ଭିତରେ ରଖିଥିବା ନିର୍ଦ୍ଦେଶ ଦେଇଥିବା ବେଳେ ଭୁବନେଶ୍ୱର ରେ କେଉଁ କେଉଁ ଔଷଧ ଦୋକାନ ଖୋଲା ରହିବ ତାର ଏକ ତାଲିକା ପ୍ରକାଶ କରିଛନ୍ତି ।

ସେ ଗୁଡିକ ହେଲା ଖଣ୍ଡଗିରି ଥାନା ଅନ୍ତର୍ଗତ ସମ ହସ୍ପିଟାଲ ନିକଟସ୍ଥ ସଞ୍ଜିବନୀ ମେଡିକାଲ ଷ୍ଟୋର, ଜାଗମରାର ଶାନ୍ତି ମେଡ଼ିସିନ ଷ୍ଟୋର, ପାତ୍ରପଡାର ଦୀପକ ମେଡ଼ିସିନ ଷ୍ଟୋର ।

ଠିକ୍ ସେହି ପରି ନୟାପଲ୍ଲୀରେ ଲାଭେଣ୍ଡର ହୋଟେଲ ନିକଟସ୍ଥ ମେଡପ୍ଲସ, ସିଆରପି ଛକର କ୍ୟାପିଟାଲ ଡ୍ରଗ, ଜୟଦେବ ବିହାର ଅଞ୍ଚଳର ଆପାଲୋ ଫର୍ମାସୀ ମେଡ଼ିସିନ ଷ୍ଟୋର ଖୋଲା ରହିବ।

ସେହିପରି କ୍ୟାପିଟାଲ ଥାନା ଅନ୍ତର୍ଗତ ରାଜମହଲ ଛକରେ ଥିବା ରବୀନ୍ଦ୍ର ମେଡିକାଲ ହଲ, ଏକାମ୍ର ରୋଡର ମହାନ୍ତି ଡ୍ରଗ ହାଉସ, ଫରେଷ୍ଟ ପାର୍କ ନିକଟସ୍ଥ ଅତିଭା ଫାର୍ମା ସହିତ ମଞ୍ଚେଶ୍ଵର ପଳାଶୁଣିର ସ୍ଵୋର୍ଣ୍ଣିମା ମେଡିସିନ ଷ୍ଟୋର, ରସୁଲଗଡ ଛକର ଦ ମେଡ଼ିସିନ, ଭିଏସଏସ ନଗରର ଅପ୍ଟିଭାଲ ହେଲଥ ସଲ୍ୟୁସନ ଖୋଲା ରହିବ ।

ଚନ୍ଦ୍ରଶେଖରପୁରର ଶୈଳଶ୍ରୀ ବିହାରସ୍ଥିତ ଆପୋଲୋ ଫାର୍ମାସୀ, ଡିଷ୍ଟ୍ରିକ୍ଟ ସେଣ୍ଟରର ଆପୋଲୋ ଫାର୍ମାସୀ, ନାଲକୋ ଛକର ଓମ ଫାର୍ମାସୀ ଏବଂ ଇନଫୋସିଟିର ନୀଳାଦ୍ରି ବିହାର ମେଡପ୍ଲସ, ମ୍ୟାଗ୍ନେଟ ଛକର ରବୀନ୍ଦ୍ର ମେଡ଼ିସିନ ଷ୍ଟୋର ଓ ପଟିଆସ୍ଥିତ ମେଡ଼ପ୍ଲସ ଔଷଧ ଦୋକାନ ଖୋଲା ରଖିବା ପାଇଁ ଅନୁମତି ପାଇଛନ୍ତି।

ସେହିଭଳି ସହିଦନଗର ଅଞ୍ଚଳର ଆପୋଲୋ ଫାର୍ମାସୀ, ପ୍ରେସ ଛକ ଆପୋଲୋ ଫାର୍ମାସୀ, ଆଚାର୍ଯ୍ୟ ବିହାର ଆପୋଲୋ ଫାର୍ମାସୀ ଓ ଖାରବେଳନଗରର ରବୀନ୍ଦ୍ର ହେଲଥ କେୟାର, ମଧୁସୂଦନ ନଗରର ଆପୋଲୋ ଫାର୍ମାସୀ, ଜନପଥର ରଞ୍ଜନ ମେଡିକାଲ ଷ୍ଟୋର ଖୋଲl ରଖିବାକୁ କୁହାଯାଇଛି ।

ଧଉଳି ଥାନାଞ୍ଚଳର ଲିଙ୍ଗିପୁରସ୍ଥିତ ପ୍ରକାଶ ମେଡିକାଲ ଷ୍ଟୋର, ନୀଳାଞ୍ଚଳ ମେଡିକାଲ ଷ୍ଟୋର, ବାସୁଦେବ ମେଡ଼ିସିନ ଷ୍ଟୋର ଖୋଲିବ ଏବଂ ଲିଙ୍ଗରାଜ ଥାନାଞ୍ଚଳର ବିବେକାନନ୍ଦ ମାର୍ଗସ୍ଥିତ ମେଡପ୍ଲସ, ସାମନ୍ତରାପୁର ମେଡପ୍ଲସ ଖୋ ରଖିବାକୁ ବିଏମସି ଅନୁମତି ଦେଇଛି ।

ବିମାନବନ୍ଦର ଥାନା ଅନ୍ତର୍ଗତ ଭୀମଟାଙ୍ଗୀ ରୋଡ ମେଡପ୍ଲସ, ପୁନମା ଗେଟ ଛକର ଆପୋଲୋ ଫାର୍ମାସୀ, ସୁନ୍ଦରପଦା ମେଡପ୍ଲସ, ପୋଖରୀପୁଟ ମେଡପ୍ଲସ ସହିତ ବଡଗଡ ଥାନାଞ୍ଚଳର ବିଜେବି ନଗର ଆପୋଲୋ ଫାର୍ମାସୀ, ଟଙ୍କପାଣିରୋଡ ମେଡପ୍ଲସ ଓ ମହାବୀର ମେଡିକାଲ ହଲ ଖୋଲା ରଖିବାକୁ ଅନୁମତି ପାଇଛନ୍ତି।

ଲକ୍ଷ୍ମୀସାଗର ଅଞ୍ଚଳର ନାସନାଲ ମେଡପ୍ଲସ, ଡ୍ରଗ ହାଉସ ଓ ସ୍ଥାନୀୟ ଆପାଲୋ ଫାର୍ମାସୀ ଖୋଲା ରହିବ ବୋଲି ସୂଚନା ମିଳିଛି ।

ଉଲ୍ଲେଖଯୋଗ୍ୟ, ସଟଡାଉନରେ ରାଜଧାନୀର ୧୩ଟି ସ୍ଥାନରେ ଥିବ ସମୁଦାୟ ୩୯ଟି ଔଷଧ ଦୋକାନ ଖୋଲା ରହିବ ।

ଲୋକାଲ ୱାୟାର

ଭୁବନେଶ୍ୱର,ମାର୍ଚ୍ଚ ୧୫ (ଲୋକାଲ ୱାୟାର) : କରୋନା ସଂକ୍ରମଣକୁ ନେଇ ରାଜ୍ୟ ସରକାର ଜନଗହଳିପୂର୍ଣ୍ଣ ସ୍ଥାନକୁ ଅଧିକ ନବାହାରିବା ପାଇଁ ପରାମର୍ଶ ଦେଇଥିବାରୁ ମଲ୍ ଏବଂ ସୁପର ମାର୍କେଟ ପାଇଁ ଆଡଭାଇଜରୀ ଜାରି କରାଯାଇଛି ।

ଏ ନେଇ ପୁଲିସ କମିଶନର ସୁଧାଂଶୁ ଷଡ଼ଙ୍ଗୀ ଟ୍ୱିଟ୍ କରି କହିଛନ୍ତି ଯେ, ସପିଂ ମଲ ଓ ସୁପର ମାର୍କେଟ ଭିତରକୁ ଏକ ନିଦ୍ଦିଷ୍ଟ ସମୟରେ ସୀମିତ ଲୋକଙ୍କୁ ଛଡା ଯିବ ।

ମଲ ଭିତରେ ଲୋକମାନେ ପରସ୍ପର ଭିତରେ ୬ ଫୁଟ ଦୂରତା ରଖିବେ ।

ସେହିଭଳି ମଲର ବିକ୍ରେତା ମୁହଁରେ ମାସ୍କ ବ୍ୟବହାର କରିବା ସହ ହାତକୁ ପରିଷ୍କାର ରଖିବାକୁ କୁହାଯାଇଛି ।

ଏହାସହ ମଲର ସବୁ କାଉଣ୍ଟରରେ ଆଲକୋହଲ ଯୁକ୍ତ ସାନିଟାଇଜର ରଖିବାକୁ ବି ଆଡଭାଇଜରୀ ଜାରି କରାଯାଇଛି ।

ଲୋକାଲ ୱାୟାର

ଚନ୍ଦ୍ରଶେଖରପୁର, ମାର୍ଚ୍ଚ ୮ (ଲୋକାଲ ୱାୟାର) ଭୁବନେଶ୍ବରର ଚନ୍ଦ୍ରଶେଖରପୁରରେ ରବିବାର ସନ୍ଧ୍ୟାରେ ଏକ ନୂଆ ଫାଷ୍ଟ ଫୁଡ ହୋଟେଲର ଉଦଘାଟନ ହେବ ବୋଲି ହୋଟେଲର ଉଦ୍ୟୋକ୍ତା କହିଛନ୍ତି।

ତନିଷ୍କ ଜୁଏଲାରୀ ସାମନାରେ ଆନନ୍ଦ ଫୁଡ ପ୍ଲାଜା ନାମରେ ଖୋଲିଥିବା ଏହି ହୋଟେଲରେ ବିଭିନ୍ନ ପ୍ରକାରର ଉତ୍ତମ ମାନର ଫାଷ୍ଟ ଫୁଡ ଗ୍ରାହକଙ୍କୁ ଆକର୍ଷିତ କରିବ ବୋଲି ସେ ଲୋକାଲ ୱାୟାରକୁ କହିଛନ୍ତି ।

ଲୋକାଲ ୱାୟାର