ଭୁବନେଶ୍ୱର, ୦୫ ଡିସେମ୍ବର (ଲୋକାଲ ୱାୟାର): ଲାଲ ଓ ହଳଦୀ କ୍ୟାପସିକମ୍, ରେଡ୍ କୋବି, ଆଭାକାଡେ, ଚାଇନା କୋବି, ଆମେରିକାନ ପିଆଜ, ଆଇସବଲ୍, ସାଲାଡବକ୍ସ ପରି ବିଦେଶୀ ପରିବାର ସମ୍ଭାର ଆମ ଦେଶୀ ବଜାରରେ ।
ଏଇ ସବୁ ପରିବା ଦେଖିଲେ ଲାଗୁଛି ଦେଶୀ ସହରରେ ଏବେ ବିଦେଶୀ ପରିବା ରାଜ କରୁଛି । ସାଧାରଣତଃ ବେପାର ଆରମ୍ଭ କଲେ ଲୋକେ ଦେଶୀ ଆଉ ଓଡ଼ିଶାର ଜିନିଷ ବେପାର କରିବା କଥା ଚିନ୍ତା କରନ୍ତି ।
କାରଣ ବହୁ ଲୋକ ବେପାରର କ୍ଷତି ହେବାକୁ ଚାହିଁ ନଥାଆନ୍ତି । ସେଥିପାଇଁ କିଛି ନୂଆ କରିବା ଆଗରୁ ବହୁ ଥର ଭାବି ଥାଆନ୍ତି । ହେଲେ ଏଥିରେ ବ୍ୟତିକ୍ରମ ହେଉଛନ୍ତି ୩୨ ବର୍ଷୀୟ ମାନସ ।
ଯିଏକି ଲାଭ ଓ କ୍ଷତି ଚିନ୍ତାନକରି ବିଦେଶୀ ପରିବା ବେପାର କରିବାକୁ ଦୁଇ ପାଦ ଆଗକୁ ବଢ଼ାଇଥିଲେ ।
ଭୁବନେଶ୍ୱର ୟୁନଟ୍-୮ ଡିଏଭି ସ୍କୁଲ ଆଗକୁ ଗଲେ ଦେଖି ପାରିବେ ଏହି ରଙ୍ଗୀନ ପରିବାର ସମ୍ଭାର ।
ରାସ୍ତାକଡ଼କୁ ଲାଗି ବାପା(ଉପେନ୍ଦ୍ର କୁମାର ସାହୁ), ପୁଅ(ମାନସ ସାହୁ) ମିଶି ଦୀର୍ଘ ୮ବର୍ଷ ହେଲାଣି ଏଇ ସବୁ ପରିବା ବିକ୍ରି କରୁଛନ୍ତି । ରାଜଧାନୀ ଭୁବନେଶ୍ୱରରେ ଏଇ ବିଦେଶୀ ପରିବାର ଚାହିଦା ବଢ଼ିବାରେ ଲାଗିଛି ।
ସେଥିପାଇଁ ଭୁବନେଶ୍ୱରଠାରୁ ଆରମ୍ଭ କରି କଟକ, ଜଗତସିଂହପୁର,ଖୋର୍ଦ୍ଧା ପରି ଅନେକ ଜିଲ୍ଲାରୁ ଆସି ଏହି ପରିବା କିଣି ନେଇ ଯାଉଛନ୍ତି ସାଧରଣ ଲୋକ ।
ମାନସ କୁହନ୍ତି, ପ୍ରଥମେ ୟୁନିଟ୍-୧ ହାଟ ପାଖରେ ଗ୍ରୀନ କ୍ୟାପସିକମ୍ ବେପାର କରିବା ଆରମ୍ଭ କଲି । ସେଠାରେ ଯେତିକି ଟଙ୍କାର କ୍ୟାପସିକମ୍ କିଣିଥିଲି ସେଥିରୁ ୨୦୦ଟଙ୍କା ଲାଭ ହେଲା ।
ସେବେ ଠାରୁ ଭାବିଲି ସମସ୍ତଙ୍କ ପରି ଏ ସାଧାରଣ ପରିବା ବିକ୍ରି କରିବି ନାହିଁ । ଅନ୍ୟମାନଙ୍କଠାରୁ କିଛି ଭିନ୍ନ କରିବି । ଚିନ୍ତା କଲି ଯଦି ରଙ୍ଗୀନ ପରିବାର ପସରା ଖୋଲିବି ଲୋକ ତ ଦେଖିବାକୁ ପ୍ରଥମେ ଆସିବେ । ଦେଖୁ ଦେଖୁ ନେବା କଥା ଚିନ୍ତା କରିବେ ।
ସେ ଦିନକୁ ଦେଖିଲେ ୮ବର୍ଷର ମୋ ବେପାର । ଆଜି ଯାଏ ଏଥିରୁ ଆମ ଘର ଚଳୁଛି । ଆଉ ଭଲ ଦୁଇ ପଇସା ରୋଜଗାର ବି ହେଉଛି ।
ମୋ ପାଖରେ ୪୦ପ୍ରକାରର ବିଦେଶୀ ପରିବା ରହିଛି ।
ସେଥିରୁ ଅନେକ ରହିଛି ଲୋକଙ୍କ ବରାଦି । ମୁଁ ଅଧିକ ଦିନର ପରିବା ଆଣି ବିକ୍ରି କରେନା । ପରିବା ତିନି ରୁ ଚାରି ଦିନ ଭିତରେ ଶେଷ ହୋଇଯାଏ ।
ବେଙ୍ଗାଲୁରୁ, ଦିଲ୍ଲୀ, କୋଲକତାର ଡିଲରଙ୍କୁ ଫୋନ୍ କରି ଅର୍ଡର ଦେଲେ ସକାଳୁ ଟ୍ରେନରେ ପରିବା ପହଞ୍ଚି ଯାଏ । ୪ ଦିନ ପାଇଁ ୪୦ ହଜାର ଟଙ୍କାର ମାଲ୍ ମଗାଇଥାଏ ।
ସବୁ ତକ ବି ବିକ୍ରି ହୋଇଯାଏ । ବହୁ ବଡ଼ ବଡ଼ ଲୋକ ଆସି ପରିବା ନିଅନ୍ତି । ମୂଲଚାଲ କରନ୍ତି ନାହିଁ ଯେତିକି ଦାମ୍ ସେତିକି ଦେଇ ସେମାନେ କିଣି ନିଅନ୍ତି ।
ଲକ୍ ଡାଉନ୍ ପାଇଁ ବେପାର ମାନ୍ଦା ଥିବାରୁ ଏବେ କମ୍ ଭେରାଇଟିର ପରିବା ରଖିଛି ବୋଲି ମାନସ କୁହନ୍ତି । ସେଥିରୁ ଚାଇନିଜ୍ ଧନିଆ, ବେବି କର୍ଣ୍ଣ,ଚେରି ଟମାଟୋ, ବ୍ରେଜଲି(ଏକ ପ୍ରକାର ତୁଳସୀ ),ସିମଲା ଲଙ୍କା, ହଳଦୀ ଓ ସବୁଜ ଆମେରିକାନ ଜୁଟୁନୀ, ବେବି ପକଚୋଇ, ବ୍ରୋକୋଲି, ଏକ ପ୍ରକାର ବିଦେଶୀ ଅଦା ପରି ଅନେକ ପରିବା ବିକ୍ରି ହେଉଛି ।
ଯାହା ଦେଖିବାକୁ ବେଶ୍ ସୁନ୍ଦର । ଏହି ସବୁ ପରିବାର ଶହ ହିସାବରେ ବିକ୍ରି ହେଉଛି । କାହାର ଦାମ୍ ୨୫୦ ତ ଆଉ କାହାର ଦାମ୍ ୩୦୦ ଏବଂ ୫୦୦ ରହିଛି ।
ମାନସ କୁହନ୍ତି ମୋର ଏଇ ପରିବାର ଚାହିଦା ବହୁତ ଅଧିକ, ଏହା ଅଧିକ କ୍ୟାଲୋରୀ ଯୁକ୍ତ ହୋଇଥିବାରୁ ପ୍ରତିଦିନ ଲୋକ କିଣି ନେଇ ଯାଉଛନ୍ତି । ଦିନକୁ ୬୦୦ରୁ ଅଧିକ ଟଙ୍କା ଲାଭ ହେଉଛି ।
ଏହି ବିଦେଶୀ ପରିବା ସହିତ ବିଭିନ୍ନ ପ୍ରକାରର ମିଠା, କୋବି ବିକ୍ରି କରିଥାଏ । ବାପା ଓ ମୁଁ ପାଳି ପାଳି କରି ବସିଥାଉ । ସକାଳ ୯ରୁ ରାତି ୧୦ଯାଏ ଆମେ ବିକ୍ରି ବଟା କରୁ ।
ଏତେ ବର୍ଷ ହେଲା ଏସବୁ ପରିବା ବିକ୍ରି କରୁଥିଲେ ମଧ୍ୟ ଅଧିକାଂଶ ଲୋକ ଜାଣି ପାରୁନାହାନ୍ତି । ଯଦି କୌଣସି ପ୍ରକାରେ ପ୍ରଚାର ପ୍ରସାର ହୋଇପାରନ୍ତା ତା ହେଲେ ଆମେ ବି ଟିକେ ଲାଭବାନ ହୋଇପାରନ୍ତୁ ।
ଲୋକାଲ ୱାୟାର
