ମାଲକାନଗିରି

ମାଲକାନଗିରି, ଡିସେମ୍ବର ୩(ଲୋକାଲ ୱାୟାର): ସ୍ୱାଭିମାନ ଅଞ୍ଚଳ ଭାବେ ପରିଚିତ ମାଲକାନଗିରି ଜିଲ୍ଲାର ବିଚ୍ଛିନାଞ୍ଚଳରେ ବିଏସଏଫ କ୍ୟାମ୍ପକୁ ବିରୋଧରେ ମଙ୍ଗଳବାର ହଜାର ହଜାର ଆଦିବାସୀ ମେଳି ବାନ୍ଧିଥିବା ଦେଖିବାକୁ ମିଳିଛି ।

ଜୋଡ଼ାମ୍ବପଞ୍ଚାୟତ ହନ୍ତାଳଗୁଡ଼ା ଠାରେ ୭ଟି ପଞ୍ଚାୟତର ହଜାର ହଜାର ଆଦିବାସୀ ପୁରଷ, ମହିଳା ଏକାଠି ହୋଇ ରାଜ୍ୟ ସରକାରଙ୍କ ବିରୋଧରେ ବିଷୋଦଗାର କରିଥିଲେ ।

ରାଜ୍ୟ ସରକାର ଓ ଜିଲ୍ଲା ପ୍ରଶାସନ ନିକଟରେ ସେମାନେ ବାରମ୍ବାର ଦାବି କରୁଥିଲେ ମଧ୍ୟ କେହି କର୍ଣ୍ଣପାତ କରୁନଥିବା ଅଭିଯୋଗ କରିଥିଲେ ।

ଗତ ସେପ୍ଟେମ୍ବରରେ ରାଜୁ ହନ୍ତାଳ ନାମକ ଯୁବକକୁ ବିଏସଏଫ ଯବାନମାନେ ହତ୍ୟା କରିଥିଲେ ମଧ୍ୟ ଆଜି ପର୍ଯ୍ୟନ୍ତ ହତ୍ୟାକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇନଥିବା ଆଦିବାସୀମାନେ ଅଭିଯୋଗ କରିଥିଲେ ।

ଏହି ଅଞ୍ଚଳରୁ ବିଏସଏଫ କ୍ୟାମ୍ପ ଉଠା ନଗଲେ ଆଗକୁ ବଡ଼ ଧରଣର ଆନ୍ଦୋଳନ ହେବ ବୋଲି ଆଦିବାସୀମାନେ ଚେତାବନୀ ଦେଇଛନ୍ତି ।

ଲୋକାଲ ୱାୟାର

ମାଲକାନଗିରି, ନଭେମ୍ବର ୨୪(ଲୋକାଲ ୱାୟାର): ମାଲକାନଗିରି ଜିଲ୍ଲାରେ ଜଣେ ଖଣି ବ୍ୟବସାୟୀଙ୍କୁ ଧମକ ଦେଇ ଟଙ୍କା ମାଗିବା ଅଭିଯୋଗରେ ୫ ଜଣ ନକଲି ମାଓବାଦୀଙ୍କ ଗିରଫ କରାଯାଇଥିବା ମୋଟୁ ଥାନାଧିକାରୀ ରଘୁନାଥ ମାଝୀ ରବିବାର ସୂଚନା ଦେଇଛନ୍ତି ।

ମୋଟୁ ଥାନାଞ୍ଚଳର ପେଟା ଗ୍ରାମରେ ଏକ ଗ୍ରାନାଇଟ ଖଣି ରହିଛି । ବେଣୁ ଗୋପାଳ ରାଓ ଏହି ଖଣିର ମାଲିକ ।

କେତେକ ଯୁବକ ନିଜକୁ ମାଓବାଦୀ ପରିଚୟ ଦେଇ ତାଙ୍କଠାରୁ ୫୦ ଲକ୍ଷ ଟଙ୍କା ଦାବି କରିଥିଲେ ।

ଟଙ୍କା ନ ଦେଲେ ଖଣିରେ ବୋମା ପକାଇ ଧ୍ୱଂସ କରି ଦେବେ ବୋଲି ସେମାନେ ଧମକ ଦେଇଥିଲେ ।

ଏ ସମ୍ପର୍କରେ ଖଣି ମାଲିକ ଶ୍ରୀ ରାଓ ଥାନାରେ ଜଣାଇଥିଲେ । ଏକ ସ୍ୱତନ୍ତ୍ର ପୁଲିସ ଟିମ୍ ଧମକ ଦେଇଥିବା ଯୁବକମାନଙ୍କ ମୋବାଇଲ ଫୋନ୍ ଟ୍ରାକ୍ କରି ସେମାନଙ୍କୁ ଗିରଫ କରିଛି ।

ଗିରଫ ଯୁବକମାନଙ୍କ ମଧ୍ୟରେ ଦୁଇ ଜଣଙ୍କ ଘର ଆନ୍ଧ୍ରରେ । ସମସ୍ତଙ୍କୁ କୋର୍ଟ ଚାଲାଣ କରାଯାଇଥିବା ଶ୍ରୀ ମାଝୀ କହିଛନ୍ତି ।

ଲୋକାଲ ୱାୟାର

ମାଲକାନଗିରି, ନଭେମ୍ବର ୧୮(ଲୋକାଲ ୱାୟାର): ମାଲକାନଗିରି ଜିଲ୍ଲାର କମାରଗୁଡ଼ା ପଞ୍ଚାୟତରେ ରବିବାର ଖରାପ ରାସ୍ତା ଯୋଗୁ ଆମ୍ବୁଲାନ୍ସ ଯାଇ ନପାରିବାରୁ ଡ୍ରାଇଭର ଷ୍ଟ୍ରେଚର ଓ ଅନ୍ୟ ଲୋକଙ୍କ ସହାୟତାରେ ଜଣେ ଗର୍ଭବତୀଙ୍କୁ ୪ କିଲୋମିଟର ବୋହି ଆମ୍ବୁଲାନ୍ସ ପର୍ଯ୍ୟନ୍ତ ଆଣି କର୍ତ୍ତବ୍ୟବୋଧତାର ଉଦାହରଣ ସୃଷ୍ଟି କରିଛନ୍ତି ।

ମାଲକାନଗିରି ବ୍ଲକ କାନ୍ଦିଗୁଡ଼ା ଗାଁର ରାମେ ମାଢ଼ି ରବିବାର ପେଟରେ ଯନ୍ତ୍ରଣା ଅନୁଭବ କରିବାରୁ ପରିବାର ଲୋକେ ଆଶାଦିଦିଙ୍କୁ ଖବର ଦେଇଥିଲେ ।

ତାଙ୍କ ଠାରୁ ଖବର ପାଇ ଆମ୍ବୁଲାନ୍ସ ଆସିଥିଲେ ମଧ୍ୟ ଖରାପ ରାସ୍ତା ଯୋଗୁ ଗ୍ରାମଠାରୁ ୪ କିଲୋମିଟର ଦୂର କମାରଗୁଡ଼ାରେ ଆମ୍ବୁଲାନ୍ସ ଅଟକି ରହିଥିଲା ।

ତେବେ ଆମ୍ବୁଲାନ୍ସ ଡ୍ରାଇଭର ଗାଡ଼ି ବସି ନରହି ଷ୍ଟ୍ରେଚର ଧରି ଗାଁକୁ ଚାଲିଥିଲେ ।

ପରିବାର ଲୋକ ଏବଂ ଅନ୍ୟମାନଙ୍କ ସହାୟତାରେ ଗର୍ଭବତୀ ରାମେ ମାଢ଼ିଙ୍କୁ ଷ୍ଟ୍ରେଚରରେ ବୋହି ବୋହି ଆମ୍ବୁଲାନ୍ସ ପର୍ଯ୍ୟନ୍ତ ଆଣିଥିଲେ ।

ସେଠାରୁ ତାଙ୍କୁ ଡାକ୍ତରଖାନା ନିଆଯାଇଥିଲା । ଆମ୍ବୁଲାନ୍ସ ଡ୍ରାଇଭରଙ୍କ ଏହି କାର୍ଯ୍ୟକୁ ଜିଲ୍ଲାବ୍ୟାପୀ ଲୋକେ ପ୍ରଶଂସା କରିଛନ୍ତି ।
ଲୋକାଲ ୱାୟାର

ମାଲକାନଗିରି, ନଭେମ୍ବର ୧୭(ଲୋକାଲ ୱାୟାର): ମାଲକାନଗିରି ଜିଲ୍ଲାର ମାଥିଲି ଥାନାଞ୍ଚଳରେ ଏକ ପାଣି ଟ୍ୟାଙ୍କରରୁ ପୁଲିସ ୧୪ କୁଇଣ୍ଟାଲ ଗଞ୍ଜେଇ ଜବତ କରିବା ସହ ୨ ଜଣଙ୍କୁ ଗିରଫ କରିଥିବା ସ୍ଥାନୀୟ ପୁଲିସ ରବିବାର ସୂଚନା ଦେଇଛି ।

ମାଥିଲି ଥାନା ପୁଲିସ ରବିବାର ଗୋବିନ୍ଦପାଲ୍ଲୀ ତନଖି ଫାଟକରେ ଗାଡ଼ିମୋଟର ଯାଞ୍ଚ କରୁଥିବା ବେଳେ ମାଡକାପଦର ପାଶ୍ୱର୍ରୁ ଏକ ଟ୍ରାକ୍ଟର ପାଣି ଟ୍ୟାଙ୍କର ନେଇ ଆସୁଥିଲା ।

ପୁଲିସ ଗାଡ଼ି କାଗଜପତ୍ର ମାଗିଥିଲେ ମଧ୍ୟ ଡ୍ରାଇଭର ତାହା ଦେଖାଇ ପାରିନଥିଲା । ପୁଲିସ ସନ୍ଦେହରେ ପାଣି ଟ୍ୟାଙ୍କରକୁ ଯାଞ୍ଚ କରିବାରୁ ୧୪ କୁଇଣ୍ଟାଲ ୪୩ କିଲୋ ଗଞ୍ଜେଇ ଜବତ ହୋଇଥିଲା ।

ପୁଲିସ ଏହି ଘଟଣାରେ ଉତ୍ତରପ୍ରଦେଶ ମଥୁରା ଜିଲ୍ଲା ଶେରଗଡ଼ ଥାନାଞ୍ଚଳର ଉଦୟ ଚାନ୍ଦ(୩୬) ଓ ମାଲକାନଗିରି ମୁଦୁଲିପଡ଼ା ଥାନାଞ୍ଚଳର ସଦନ ପାଙ୍ଗି(୩୨)ଙ୍କୁ ଗିରଫ କରିଛି ।

ଉଲ୍ଲେଖଯୋଗ୍ୟ, ୨୦୧୮ ମସିହାରେ ମାଲକାନଗିରି ଜିଲ୍ଲାରେ ୧୦୨ଟି ଗଞ୍ଜେଇ ମାମଲାରେ ୧୭୯ ଜଣଙ୍କୁ ଗିରଫ କରାଯାଇଥିବା ବେଳେ ୧୭ ହଜାର ୧୧୮ କୁଇଣ୍ଟାଲ ଗଞ୍ଜେଇ ଜବତ ହୋଇଛି । ସେମାନଙ୍କ ମଧ୍ୟରୁ ୮୯ଜଣ ବାହାର ରାଜ୍ୟର ବାସିନ୍ଦା ।

ଲୋକାଲ ୱାୟାର

ମାଲକାନଗିରି, ନଭେମ୍ବର ୧୦(ଲୋକାଲ ୱାୟାର): ମାଲକାନଗିରି ଜିଲ୍ଲାର ଏମଭି-୭୯ ଥାନାଞ୍ଚଳର ଏକ ଆଦିବାସୀ ଗ୍ରାମରେ ଅଜଣା ରୋଗରେ ଦଇ ସପ୍ତାହରେ ୬ ଜଣ ଶିଶୁଙ୍କ ମୃତ୍ୟୁ ହେବା ଯୋଗୁ ଅଞ୍ଚଳବାସୀ ଆତଙ୍କିତ ହୋଇପଡ଼ିଛନ୍ତି ।

ପରିସ୍ଥିତି ଗୁରୁତର ହେଉଥିବା ଲକ୍ଷ୍ୟ କରି ଜିଲ୍ଲା ସ୍ୱାସ୍ଥ୍ୟ ବିଭାଗର ଏକ ଟିମ୍ ଉକ୍ତ ଗ୍ରାମକୁ ଯାଇ ରୋଗାକ୍ରାନ୍ତ ଶିଶୁମାନଙ୍କ ରକ୍ତ ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଇଥିବା ଜିଲ୍ଲାର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।

ଏମଭି-୭୯ ଥାନା ଅନ୍ତର୍ଗତ ଟିଗଲପଞ୍ଚାୟତ ନିକଟବର୍ତ୍ତୀ ତାମନପାଲି ଆଦିବାସୀ ଗ୍ରାମରେ ଦୁଇ ସପ୍ତାହ ମଧ୍ୟରେ ୬ଜଣ ଶିଶୁଙ୍କ ମୃତ୍ୟୁ ହୋଇଥିବା ବେଳେ ୭ ଜଣ ଆକ୍ରାନ୍ତ ହୋଇଛନ୍ତି ।

କିଛି ଦିନ ହେଲା ଶିଶୁମାନେ ଜ୍ୱର ଓ ଝାଡ଼ାରେ ଆକ୍ରାନ୍ତ ଥିଲେ । ତେବେ ଅଚାନକ ଜଣଙ୍କ ପରେ ଜଣେ ଶିଶୁଙ୍କ ମୃତ୍ୟୁ ହୋଇଥିଲା ।

୭ ଆକ୍ରାନ୍ତ ଶିଶୁଙ୍କୁ କାଲିମେଳା ଡାକ୍ତରଖାନାରେ ଚିକିତ୍ସା ପରେ ଘରକୁ ପଠାଯାଇଛି ।

ଉଲ୍ଲେଖଯୋଗ୍ୟ, ୨୦୧୬ ମସିହାରେ ଜେଇ (ଜାପାନିଜ୍ ଏନସେଫାଲାଇଟ୍ସ ତଥା ମସ୍ତିଷ୍କ ପ୍ରଦାହ) ରୋଗରେ ଜିଲ୍ଲାରେ ଶତାଧିକ ଶିଶୁଙ୍କର ମୃତ୍ୟୁ ଘଟିଥିଲା ।

ସ୍ୱତନ୍ତ୍ର ଡାକ୍ତରୀ ଟିମଙ୍କ ଚିକିତ୍ସା ଫଳରେ ସେତେବେଳେ ରୋଗ ନିୟନ୍ତ୍ରଣକୁ ଆସିଥିଲେ ମଧ୍ୟ ଆଦିବାସୀମାନେ ଏବେ ବି ଡାକ୍ତରୀ ଚିକିତ୍ସା ପରିବର୍ତ୍ତେ ଗୁଣିଗାରେଡ଼ି ଓ ଦିଶାରୀମାନଙ୍କ ଉପରେ ବେଶି ନିର୍ଭର କରୁଛନ୍ତି ।

ଏବେ ଦୁଇ ଦିନ ମଧ୍ୟରେ ୬ ଜଣ ଶିଶୁଙ୍କ ମୃତ୍ୟୁ ହେବା ପରେ ଲୋକମାନେ ଦିଶାରୀମାନଙ୍କ ପାଖକୁ ଦୌଡ଼ବା ଆରମ୍ଭ କରିଥିବା ଦେଖିବାକୁ ମିଳିଛି ।

ଜିଲ୍ଲା ମୁଖ୍ୟ ସ୍ୱାସ୍ଥ୍ୟ ଅଧିକାରୀ ଡା ଅଜୟକୁମାର ବୌଠାରୁ ସ୍ୱତନ୍ତ୍ର ଡାକ୍ତରୀ ଦଳ ନେଇ ଗ୍ରାମରେ ଆକ୍ରାନ୍ତ ଶିଶୁମାନଙ୍କ ରକ୍ତ ନମୁନା ସଂଗ୍ରହ କରି ପରୀକ୍ଷା ପାଇଁ ଭୁବନେଶ୍ୱର ପଠାଇଛନ୍ତି ।

ଡାକ୍ତରୀ ଟିମ୍ ଗ୍ରାମରେ ଏବେ କ୍ୟାମ୍ପ୍ କରି ରହିଛନ୍ତି । ତେବେ ଏହା କୌଣସି ଭୟାନକ ରୋଗ ନୁହେଁ ବରଂ ଥଣ୍ଡାରୁ ନିମୋନିଆରେ ଆକ୍ରାନ୍ତ ହୋଇ ଶିଶୁମାନଙ୍କ ମୃତ୍ୟୁ ହୋଇଥିବା ସେ କହିଛନ୍ତି ।

ଶିଶୁମାନଙ୍କୁ ବିଳମ୍ବରେ ଡାକ୍ତରଖାନା ଅଣାଯାଉଥିବାରୁ ଏଭଳି ସ୍ଥିତି ହେଉଥିବା ସେ କହିଛନ୍ତି ।

ଲୋକାଲ ୱାୟାର

ମାଲକାନଗିରି, ନଭେମ୍ବର ୨(ଲୋକାଲ ୱାୟାର): ମାଲକାନଗିରି ଜିଲ୍ଲାର ମାଓ ଅଧ୍ୟୁଷିତ ବିଚ୍ଛିନ୍ନାଞ୍ଚଳ (ସ୍ୱାଭିମାନ ଅଞ୍ଚଳ)ର ଅର୍ଥନୈତିକ ବିକାଶ ପାଇଁ ଓଡ଼ିଶା ସରକାର ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛନ୍ତି ।

ଏଥିପାଇଁ ସ୍ୱୟଂ ସହାୟକ ଗୋଷ୍ଠୀଗୁଡ଼ିକୁ କୁକୁଡ଼ା ଓ ବତକ ଭାଡ଼ି, ଛେଳି, ସିଲେଇ ମେସିନ, ପତ୍ର ପ୍ଲେଟ ତିଆରି ମେସିନ ଯୋଗାଇ ଦିଆଯିବ ବୋଲି ଜଣେ ଅଧିକାରୀ କହିଛନ୍ତି ।

ସାମାଜିକ ଅର୍ଥନୈତିକ ପରିବର୍ତ୍ତନ ଓ ଉତଥାନ ଯୋଜନାରେ ସ୍ୱାଭିମାନ ଅଞ୍ଚଳ ବାସିନ୍ଦାଙ୍କ ପାଇଁ ୧୦୦ କୋଟି ଟଙ୍କାର କାର୍ଯ୍ୟକ୍ରମ ହାତକୁ ନିଆଯିବ ।

୩୭୮ଟି ସ୍ୱୟଂ ସହାୟକ ଗୋଷ୍ଠୀକୁ କୁକୁଡ଼ା ପାଳନ, ଛେଳିପାଳନ, ମାଛ ଚାଷ, ଜୈବିକ ପରିବା ଚାଷ, ଜୈବିକ ହଳଦୀ ଚାଷ, ଛତୁ ଚାଷ, ପତ୍ର ପ୍ଲେଟ ତିଆରି ଓ ସାନିଟାରୀ ନ୍ୟାପକିନ ତିଆରି ପାଇଁ ସରକାର ସହାୟତା ପ୍ରଦାନ କରିବେ । ଏସବୁ ୟୁନିଟ ଦ୍ୱାରା ଆଦିବାସୀମାନେ ଜୀବିକାର୍ଜନ କରିପାରିବେ ।

ଏହି ଅଞ୍ଚଳରେ ମାଣ୍ଡିଆ ଚାଷ ଅଧିକ ହେଉଥିବାରୁ ସରକାର ୪ଟି ମାଣ୍ଡିଆ ପ୍ରକ୍ରିୟାକରଣ ୟୁନିଟ ସହ ଷ୍ଟୋରେଜ ସୁବିଧା, ପ୍ୟାକିଂ ଓ ବ୍ରାଣ୍ଡିଂ ୟୁନିଟ ନିର୍ମାଣ ଯୋଜନା ରଖିଛନ୍ତି ।

ସ୍ୱାଭିମାନ ଅଞ୍ଚଳକୁ ମୁଖ୍ୟସ୍ରୋତ ସହ ଯୋଡ଼ିବାକୁ ୯୧୦ ମିଟର ଲମ୍ବ ପୋଲ ତିଆରିର ବର୍ଷକ ପରେ ସରକାର ଏହି ଉଦ୍ୟମ ଆରମ୍ଭ କରିଛନ୍ତି ।

ଏହି ଅଞ୍ଚଳରେ ରହୁଥିବା ଲୋକେ ବର୍ଷ ବର୍ଷ ଧରି ଦାରିଦ୍ର‌୍ୟ ଭୋଗି ଆସୁଛନ୍ତି ।

ମାଓବାଦୀ କାର୍ଯ୍ୟକଳାପ ଭୟ ଓ ଯୋଗାଯୋଗ ବ୍ୟବସ୍ଥାର ଅଭାବ ତଥା ଭୌଗୋଳିକ ପ୍ରତିବନ୍ଧକ ଯୋଗୁ ଜୀବିକା, କୃଷି, ଶିକ୍ଷା ଓ ସ୍ୱାସ୍ଥ୍ୟ ସହିତ ଜଡ଼ିତ ଅନେକ ବିକାଶମୂଳକ କାର୍ଯ୍ୟକ୍ରମ ଆଦିବାସୀମାନଙ୍କ ନିକଟରେ ପହଞ୍ଚି ପାରୁନାହିଁ । ଆମେ ଏବେ ଏଠାକାର ଆଭ୍ୟନ୍ତରୀଣ ଅଞ୍ଚଳର ବିକାଶ ପାଇଁ ଦୃଢ଼ ପଦକ୍ଷେପ ନେବୁ ବୋଲି କହିଛନ୍ତି ମାଲକାନଗିରି ଜିଲ୍ଲାପାଳ ମନୀଷ ଅଗ୍ରୱାଲ ।

୯ଟି ଗ୍ରାମ ପଞ୍ଚାୟତର ୧୫୧ ଗାଁରେ ଆନ୍ଧ୍ର-ଓଡ଼ିଶା ସୀମା ସ୍ପେଶାଲ ଜୋନାଲ କମିଟିର ମାଓବାଦୀ କମାଣ୍ଡରମାନେ ସକ୍ରିୟ ଥିବାରୁ ରାଜ୍ୟ ପୁଲିସ ପାଇଁ ଏହା ମୁଣ୍ଡ ବ୍ୟଥାର କାରଣ ପାଲଟିଛି ।

ଗୋଟିଏ ପଟେ ବାଲିମେଳା ଜଳଭଣ୍ଡାର ଓ ଅନ୍ୟ ପଟେ ଦୁର୍ଗମ ପାହାଡ଼ ମଧ୍ୟରେ ଦୀର୍ଘ ୪ ଦଶନ୍ଧି ଧରି ଫସି ରହିଥିବା ଏହି ଅଞ୍ଚଳ ସରକାରଙ୍କ ଯୋଜନାଗୁଡ଼ିକର ସୁଫଳ ପାଇ ପାରୁନାହିଁ ।

ତେବେ ସରକାର ଗତବର୍ଷ ଜୁଲାଇରେ ସେତୁ ନିର୍ମାଣ କରିବା ପରେ ଦଶନ୍ଧି ଦଶନ୍ଧି ଧରି ଅଲଗା ରହିଥିବା ଏହି ଅଞ୍ଚଳର ପ୍ରାୟ ୩୭ ହଜାର ଲୋକ ମୁଖ୍ୟସ୍ରୋତରେ ସାମିଲ ହୋଇଥିଲେ ।

ଦୀର୍ଘଦିନରୁ ପଡ଼ି ରହିଥିବା ସେତୁ ନିର୍ମାଣ ଶେଷ ହୋଇଥିଲେ ମଧ୍ୟ ପାହାଡି଼ଆ ଆଭ୍ୟନ୍ତରୀଣ ଅଞ୍ଚଳରେ ଯୋଗାଯୋଗ ବ୍ୟବସ୍ଥା ଅଭାବ ଯୋଗୁ ଉନ୍ନତ ଭିତ୍ତିଭୂମି ସତ୍ତେ୍ୱ ଅଞ୍ଚଳର ଅର୍ଥନୈତିକ ବିକାଶ ହୋଇ ପାରୁନାହିଁ ।

ଅଣ୍ଡ୍ରାପାଲି, ଯୋଡାମ୍ବ ଓ ଯନ୍ତ୍ରୀ ପଞ୍ଚାୟତର ଗାଁଗୁଡ଼ିକରେ ପହଞ୍ଚିବା ପାଇଁ ବାଲିମେଳା ଜଳଭଣ୍ଡାରରୁ ୯ ଘଣ୍ଟା ବୋଟରେ ଯିବାକୁ ପଡ଼େ ଓ ବୋଟରୁ ଓହ୍ଲାଇ ୪ ଘଣ୍ଟା ଚାଲିବାକୁ ପଡ଼େ ।

ରାସ୍ତା ନଥିବାରୁ ଆମେ ଚାରି କିଲୋମିଟର ଚାଲି ଚାଲି କିମ୍ବା ଗଧ ବା ଘୋଡ଼ା ପିଠିରେ ସବାର ହୋଇ ଯାଉ । ପିଡିଏସ ଚାଉଳ, କିରାସିନି ଆଣିବାକୁ ପଚାଶ କିଲୋମିଟରରୁ ଅଧିକ ଯିବାକୁ ପଡ଼େ ବୋଲି ଅଞ୍ଚଳର ବାସିନ୍ଦା ସୁଦର୍ଶନ ଖରା କହିଛନ୍ତି ।

ସ୍ୱାଭିମାନ ଅଞ୍ଚଳରେ ଥିବା ପେପରମେଟଲା କ୍ଲଷ୍ଟର ସମ୍ବଳ କେନ୍ଦ୍ରର ସଂଯୋଜକ ସାଧନ ସରକାର କୁହନ୍ତି ସେ ବୋଟରେ ଯାତ୍ରା କରି, ଅନେକ ରାସ୍ତା ଚାଲି ଚାଲି ଓ ଘୋଡ଼ାରେ ବସି କ୍ଲଷ୍ଟରରେ ଥିବା ସ୍କୁଲ ପରିଦର୍ଶନ କରନ୍ତି । ଏହା ଓଡ଼ିଶାର ଅନ୍ୟତମ ଦୁର୍ଗମ ଅଞ୍ଚଳ ।

ଏହି ଅଞ୍ଚଳରେ ଥିବା ଅଙ୍ଗନବାଡ଼ି ମାଧ୍ୟମରେ ପିଲାଙ୍କ କୁପୋଷଣ ସମସ୍ୟା ଦୂରେଇବା ପାଇଁ ଗର୍ଭବତୀ ମହିଳା, ସ୍ତନ୍ୟପାନ କରାଉଥିବା ମହିଳା ଓ ଶିଶୁମାନଙ୍କ ପାଇଁ ସରକାର ଅଧିକ ଦୁଇ ପ୍ୟାକେଟ ଛତୁଆ ଦେବାକୁ ଯୋଜନା ରଖିଛନ୍ତି ।

ଏହି ଅଞ୍ଚଳର ଲୋକଙ୍କ ମଧ୍ୟରେ ଶିକ୍ଷାର ପ୍ରସାର କରାଇବା ପାଇଁ ଶିକ୍ଷକମାନଙ୍କ ରହିବା ବ୍ୟବସ୍ଥା, ଖେଳପଡ଼ିଆ ଥିବା ଶିକ୍ଷା କେନ୍ଦ୍ର ବଡ଼ପଡ଼ା ଅଞ୍ଚଳରେ ନିର୍ମାଣ ହେବ ।

ଅଧିକାରୀମାନେ କହିଛନ୍ତି ରାଜ୍ୟ ସରକାର ଗ୍ରାମୀଣ ବିକାଶ ମନ୍ତ୍ରାଳୟକୁ ୫୫.୫ କୋଟି ଟଙ୍କାର ପ୍ରସ୍ତାବ ଦେଇଛନ୍ତି । ଏହି ପ୍ରସ୍ତାବରେ ବାମପନ୍ଥୀ ଉଗ୍ରବାଦ ପ୍ରଭାବିତ ଅଞ୍ଚଳରେ ରାସ୍ତା ସୁବିଧା କାର୍ଯ୍ୟକ୍ରମରେ ୧୨୦ କିଲୋମିଟର କଂକ୍ରିଟ ରାସ୍ତା ନିର୍ମାଣ ପ୍ରସ୍ତାବ ରହିଛି ।

ଗ୍ରାମୀଣ ବିକାଶ ମନ୍ତ୍ରାଳୟ ଦ୍ୱାରା ନିର୍ମାଣ ହେବାକୁ ଥିବା ଏହି କଂକ୍ରିଟ ରାସ୍ତା ମାଓ ଗତିବିଧି ଥିବା ପେପରମେଟଲା, ପଣସପୁଟ, କୁନ୍ତୁଲପଦର, ମୁସ୍ରୁଗୁଡା, ଯୋଡ଼ାମ୍ବ, ଲଖମିପୁରମ ଓ କୁମୁଡ଼ା ଆଦି ସ୍ଥାନକୁ ଯୋଡ଼ିବ ।

ଲୋକାଲ ୱାୟାର

ମାଲକାନଗିରି, ନଭେମ୍ବର ୨ (ଲୋକାଲ ୱାୟାର): ମାଲକାନଗିରି ଜିଲ୍ଲା ମାଥିଲି ଥାନା ଅନ୍ତର୍ଗତ ମାଳିଗୁଡ଼ା ଗାଁରେ ଗୁଣି ଗାରେଡ଼ି ସନ୍ଦେହରେ ବାପପୁଅଙ୍କୁ ହତ୍ୟା କରାଯାଇଥିବା ଶନିବାର ଅଭିଯୋଗ ହୋଇଛି।

ମାଥିଲି ଥାନା ଆଇଆଇସି ଜନ୍ କୁଜୁରଙ୍କ ସୂଚନା ଅନୁସାରେ, ଗତକାଲି ବିଳମ୍ବିତ ରାତିରେ ଗାଁର ଦୁଇ ଜଣ ବ୍ୟକ୍ତି ଗୁଣି ଗାରେଡ଼ି ସନ୍ଦେହରେ ସଦନ ମାଳି ଓ ତାଙ୍କ ପୁଅ ନୀଳାଦ୍ରି ମାଳିଙ୍କୁ ପିଟି ପିଟି ହତ୍ୟା କରିଛନ୍ତି।

ହତ୍ୟାକାଣ୍ଡ ପରେ ଦୁଇ ଅଭିଯୁକ୍ତ ମାଥିଲି ଥାନାରେ ଆସି ଆତ୍ମସମର୍ପଣ କରିଛନ୍ତି।

ସେପଟେ ଗାଁ ମୁଣ୍ଡ ନଦୀକୂଳରୁ ବାପପୁଅଙ୍କ ମୃତଦେହ ମିଳିଥିବାବେଳେ ପୁଲିସ ତଦନ୍ତ ଚଳାଇଛି।

ସୂଚନାଯୋଗ୍ୟ, ସଦନଙ୍କ ପରିବାର ଗୁଣି ଗାରେଡ଼ି କରୁଥିବା ସନ୍ଦେହରେ ଗାଁଲୋକ ସେମାନଙ୍କୁ ବାସନ୍ଦ କରିଦେଇଥିଲେ।

ଲୋକାଲ ୱାୟାର

ମାଲକାନଗିରି, ଅକ୍ଟୋବର ୧୭ (ଲୋକାଲ ୱାୟାର): ରୋଗୀଙ୍କୁ ପ୍ରବର୍ତ୍ତାଇ ଜିଲ୍ଲା ମୁଖ୍ୟ ଚିକିତ୍ସାଳୟ ବଦଳରେ ଘରୋଇ କ୍ଲିନିକରେ ଚିକିତ୍ସା କରାଇ ଅର୍ଥ ଲୁଟ୍ ଅଭିଯୋଗରେ ଗୁରୁବାର ମାଲକାନଗିରି ପୁଲିସ ଏକ ଘରୋଇ କ୍ଲିନିକ୍ ମାଲିକ ଓ ଜଣେ ଦଲାଲଙ୍କୁ ଗିରଫ କରିଛି।

ଗିରଫମାନେ ହେଲେ କ୍ଲିନିକ୍ ମାଲିକ ବସନ୍ତ ସାହୁ ଓ ଦଲାଲ୍ ଦିବ୍ୟପ୍ରକାଶ ମିଶ୍ର।

ଜିଲ୍ଲା ମୁଖ୍ୟ ଚିକିତ୍ସାଳୟ ନିକଟରେ କ୍ଲିନିକ୍ କରି ବସନ୍ତ, ଦିବ୍ୟପ୍ରକାଶ ମାଧ୍ୟମରେ ରୋଗୀଙ୍କୁ ଲୁଟୁଥିବା ଅଭିଯୋଗ ହୋଇଥିଲା।

ଏହାକୁ ନେଇ ପୁଲିସ ଉଭୟଙ୍କୁ ଗିରଫ କରିଥିବା ସୂଚନା ମିଳିଛି।

ଲୋକାଲ ୱାୟାର