ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାରଙ୍କ ମନ୍ତ୍ରୀମଣ୍ଡଳରେ ବୁଧବାର ବଡ ଧରଣର ଅଦଳବଦଳ ହୋଇଛି । ଏହି ଅଦଳବଦଳରେ ୪୩ ନେତାଙ୍କୁ ମନ୍ତ୍ରୀ ପଦ ମିଳିଛି ।
ମନ୍ତ୍ରୀ ତାଲିକାରେ ଓଡିଶାରୁ ରାଜ୍ୟସଭାକୁ ନିର୍ବାଚିତ ସାଂସଦ ଅଶ୍ୱିନୀ ବୈଷ୍ଣବ ଓ ମୟୂରଭଞ୍ଜ ଲୋକସଭା ସାଂସଦ ବିଶ୍ୱେଶ୍ୱର ଟୁଡୁ ଅଛନ୍ତି ।
ବୈଷ୍ଣବ କ୍ୟାବିନେଟ ମନ୍ତ୍ରୀ ଭାବେ ଶପଥ ନେଇଥିବା ବେଳେ ଟୁଡୁଙ୍କୁ ରାଷ୍ଟ୍ରମନ୍ତ୍ରୀ ପାହ୍ୟା ମିଳିଛି । ପରବର୍ତୀ ସମୟରେ ବିଭାଗ ଆବଂଟିତ ହେବ ।
ଅଶ୍ୱିନୀ ବୈଷ୍ଣବ- ଓଡିଶାରୁ ରାଜ୍ୟସଭାକୁ ନିର୍ବାଚିତ ହୋଇଛନ୍ତି ଅଶ୍ୱିନୀ ବୈଷ୍ଣବ । ୧୯୯୪ ବ୍ୟାଚର ଓଡିଶା କ୍ୟାଡରର ପୂର୍ବତନ ଆଇଏଏସ ଅଧିକାରୀ ଅଶ୍ୱିନୀ ୨୦୧୯ରେ ବିଜେପିରେ ଯୋଗ ଦେବା ପରେ ତାଙ୍କୁ ଦଳ ରାଜ୍ୟସଭା ପ୍ରାର୍ଥୀ କରିଥିଲା ।
ଶାସକ ବିଜେଡିର ସମର୍ଥନରେ ସେ ନିର୍ବିରୋଧରେ ରାଜ୍ୟସଭାକୁ ନିର୍ବାଚିତ ହୋଇ ଅଧୀନସ୍ଥ ବିଧେୟକ କମିଟି, ପିଟିସନ କମିଟି, ବିଜ୍ଞାନ ଓ ପ୍ରଯୁକ୍ତି, ପରିବେଶ ଓ ଜଙ୍ଗଲ କମିଟିର ସଦସ୍ୟ ଭାବେ କାମ କରିଛନ୍ତି ।
କେନ୍ଦ୍ରୀୟ ଡେପୁଟେସନରେ ଯିବା ପୂର୍ବରୁ ଅଶ୍ୱିନୀ ବୈଷ୍ଣବ ବାଲେଶ୍ୱର ଓ କଟକ ଜିଲ୍ଲାପାଳ ଭାବେ କାମ କରିଛନ୍ତି ।
ଅଟଳ ବିହାରୀ ବାଜପେୟୀଙ୍କ ପ୍ରଧାନମନ୍ତ୍ରୀତ୍ୱ କାଳରେ ସେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ଉପ ସଚିବ ଭାବେ କାମ କରିଥିଲେ ଓ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତିରେ ପ୍ରମୁଖ ଭୂମିକା ତୁଲାଇଥିଲେ ।
ବାଜପେୟୀ ୨୦୦୪ରେ ନିର୍ବାଚନ ହାରିବା ପରେ ମଧ୍ୟ ବୈଷ୍ଣବ ତାଙ୍କ ବ୍ୟକ୍ତିଗତ ସଚିବ ଭାବେ କାମ କରୁଥିଲେ ।
ରାଜସ୍ଥାନର ଯୋଧପୁର ଠାରେ ୧୯୭୦ରେ ଜନ୍ମିତ ଅଶ୍ୱିନୀ ବୈଷ୍ଣବ ଜୟ ନାରାୟଣ ବ୍ୟାସ ବିଶ୍ୱବିଦ୍ୟାଳୟ , ରାଜସ୍ଥାନରୁ ୧୯୯୨ରେ ଇଲେକ୍ଟ୍ରୋନିକ ଓ କମୁ୍ୟନିକେସନ ଇଂଜିନିୟରିଂ ପାଠ୍ୟକ୍ରମରେ ସ୍ୱର୍ଣ୍ଣପଦକ ସହ ସ୍ନାତକ ଡିଗ୍ରୀ ହାସ କରିଥିଲେ ।
ପରେ ସେ ଆଇଆଇଟି, କାନପୁରରୁ ଏମ.ଟେକ ଡିଗ୍ରୀ ହାସଲ କରିଥିଲେ । ୧୯୯୪ରେ ସେ ୨୭ ର୍ୟାଙ୍କ ରଖି ସର୍ବଭାରତୀୟ ପ୍ରଶାସନିକ ସେବାରେ ସଫଳ ହୋଇଥିଲେ ।
୨୦୦୮ରେ ପେନସିଲଭାନିଆ ବିଶ୍ୱବିଦ୍ୟାଳୟର ହ୍ୱାର୍ଟନ ସ୍କୁଲରେ ଏମବିଏ କରିବାକୁ ଆମେରିକା ଯାଇଥିଲେ ଅଶ୍ୱିନୀ ।
ବିଶ୍ୱେଶ୍ୱର ଟୁଡୁ- ୨୦୧୯ ସାଧାରଣ ନିର୍ବାଚନରେ ଭାରତୀୟ ଜନତା ପାର୍ଟି (ବିଜେପି) ପ୍ରାର୍ଥୀ ଭାବେ ମୟୂରଭଞ୍ଜ ଲୋକସଭା ଆସନରୁ ବିଶ୍ୱେଶ୍ୱର ଟୁଡୁ ନିର୍ବାଚିତ ହୋଇଥିଲେ ।
ବିଶ୍ୱ ହିନ୍ଦୁ ପରିଷଦ ଓ ଆଦିବାସୀଙ୍କ କଲ୍ୟାଣ ସହ ସେ ଦୀର୍ଘ ୧୯ ବର୍ଷ ଧରି ଜଡିତ ଅଛନ୍ତି ।
ରାଜନୀତିକୁ ଆସିବା ପୂର୍ବରୁ ସେ ଓଡିଶା ଜଳସମ୍ପଦ ବିଭାଗରେ ବରିଷ୍ଠ ଯନ୍ତ୍ରୀ ଭାବେ କାର୍ଯ୍ୟରତ ଥିଲେ ।
ଉତ୍କଳମଣି ଗୋପବନ୍ଧୁ ଇନଷ୍ଟିଚୁ୍ୟଟ ଅଫ ଇଞ୍ଜିନିୟରିଂ, ରାଉରକେଲାରୁ ସେ ଇଲେକ୍ଟ୍ରିକାଲ ଇଞ୍ଜିନିୟରିଂରେ ଡିପ୍ଲୋମା କରିଛନ୍ତି ।
ଝାଡଖଣ୍ଡର ଆଦିବାସୀ ସମ୍ପ୍ରଦାୟ ଓ ଉତର ଓଡିଶାରେ ବିଜେପିର ଗଡ ମଜବୁତ କରିବାକୁ ମନ୍ତ୍ରୀମଣ୍ଡଳରେ ଟୁଡୁଙ୍କୁ ସାମିଲ କରାଯାଇଛି ବୋଲି ଅନୁମାନ କରାଯାଉଛି ।
