ଯାଜପୁର

ଯାଜପୁର, ଅଗଷ୍ଟ ୭ (ଲୋକାଲ ୱାୟାର) : ଯାଜପୁର ଜିଲ୍ଲା ଏନ୍‌ଏଚ୍‌-୧୬ ରଥିଆ ଛକ ନିକଟରେ ସଡକ ଦୁର୍ଘଟଣାରେ ତିନି ଜଣଙ୍କର ମୃତ୍ୟୁ ହୋଇଥିବା ବେଳେ ଦୁଇ ଜଣ ଗୁରୁତର ଅଛନ୍ତି ବୋଲି ଶୁକ୍ରବାର ଧର୍ମଶାଳା ପୁଲିସ କହିଛି ।

ପୁଲିସ୍ ସୂଚନା ଅନୁସାରେ, ଶୁକ୍ରବାର ଭୋରରୁ ଭୁବନେଶ୍ୱରରୁ ଏକ କାରରେ ଗୋଟିଏ ପରିବାରର ଚାରି ଜଣ ସଦସ୍ୟ ପଶ୍ଚିମବଙ୍ଗ ଯାଉଥିବା ବେଳେ ରଥିଆ ଛକରେ ଛିଡା ହୋଇଥିବା ଏକ ଟ୍ରକ୍ ପଛରେ କାର୍‌ଟି ପିଟି ହୋଇଥିଲା ।

ଘଟଣାସ୍ଥଳରେ ୨ ଜଣଙ୍କର ମୃତ୍ୟୁ ଘଟିଥିବା ବେଳେ ଧର୍ମଶାଳା ଡାକ୍ତରଖାନା ନେବେ ବାଟରେ ଜଣଙ୍କର ମୃତ୍ୟୁ ଘଟିଛି ।

ଆଉ ଦୁଇ ଜଣ ଗୁରୁତରଙ୍କୁ କଟକ ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଛି । ସେମାନଙ୍କ ମଧ୍ୟରେ ଜଣେ ମହିଳା ଅଛନ୍ତି ।

ପୁଲିସ୍ ଗାଡିକୁ ଜବତ କରି ତଦନ୍ତ ଚଳାଇଛି ।

ଲୋକାଲ ୱାୟାର

ଭୁବନେଶ୍ୱର, ଜୁଲାଇ ୨୨(ଲୋକାଲ ୱାୟାର): ସୁନ୍ଦରଗଡ଼ ଓ ଯାଜପୁର ଜିଲ୍ଲାରେ କୋଭିଡ୍ ପରିଚାଳନା ପାଇଁ ୫ କୋଟି ଟଙ୍କା ଲେଖାଏଁ ପ୍ରଦାନ କରିବାକୁ ବୁଧବାର କରୋନା ମୁକାବିଲା ସ୍ଥିତିର ସମୀକ୍ଷା ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଦେ୍ର୍ଦଶ ଦେଇଛନ୍ତି ।

ନିଷ୍ପତ୍ତି ଅନୁସାରେ, ରାଉରକେଲାର ଆଇଜିଏଚରେ ପ୍ଲାଜମା ଥେରାପି ଆରମ୍ଭ ସହ କୋଭିଡ୍ କେୟାର ସେଣ୍ଟରର ବେଡ୍ ୧୭୦୦କୁ ବୃଦ୍ଧି କରିବାକୁ ନିଷ୍ପତ୍ତି କରିଛନ୍ତି ।

ସୁନ୍ଦରଗଡ଼ ଓ ଯାଜପୁର ଜିଲ୍ଲାରେ ଜିଲ୍ଲାରେ କୋଭିଡ୍ ଯୋଦ୍ଧାଙ୍କ ଉଦ୍ୟମକୁ ମୁଖ୍ୟମନ୍ତ୍ରୀ ପ୍ରଶଂସା କରିଛନ୍ତି ।

ସୁନ୍ଦରଗଡ଼ରେ ଆରୋଗ୍ୟ ହାର ୮୫ % ହୋଇଥିବା ବେଳେ ଯାଜପୁରରେ ଅଛି ୮୬.୫% ।

ଯାଜପୁର ଜିଲ୍ଲା ପ୍ରଶାସନ ଜିଲ୍ଲା ଡିଏମଏଫରୁ ୧୩.୫ କୋଟି ଟଙ୍କା ଖର୍ଚ୍ଚ ହୋଇଥିବା ବେଳେ ସିଏମଆରଏଫରୁ ୫ କୋଟି ଟଙ୍କା ମଞ୍ଜୁର ହୋଇଛି ।

କୋଭିଡ୍ ଚିକିତ୍ସା ପାଇଁ ୨୫୦ ବେଡ୍ ବୃଦ୍ଧି କରାଯାଇଛି । ବୈଠକରେ ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସ, ମୁଖ୍ୟ ଶାସନ ସଚିବ, ମୁଖ୍ୟମନ୍ତ୍ରୀ କାର୍ଯ୍ୟାଳୟର ମୁଖ୍ୟ ଉପଦେଷ୍ଟା, ଉନ୍ନୟନ କମିଶନରଙ୍କ ସହ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।

ଲୋକାଲ ୱାୟାର

ଯାଜପୁର, ଜୁଲାଇ ୨୦ (ଲୋକାଲ ୱାୟାର) : ଯାଜପୁର ଜିଲ୍ଲା କଳିଙ୍ଗନଗର ଥାନା ନିମପଲ୍ଲୀ ଗାଁରେ ୨ ଜଣଙ୍କୁ ନିର୍ମମ ଭାବେ ହତ୍ୟା କରାଯାଇଛି ବୋଲି ସୋମବାର ସ୍ଥାନୀୟ ପୁଲିସ୍ କହିଛି ।

ମୃତକଙ୍କ ମଧ୍ୟରୁ ଜଣେ ପୁରୁଷ ଓ ଜଣେ ମହିଳା ଅଛନ୍ତି । କେଉଁ ପରସ୍ଥିତିରେ ଓ କିଏ ହତ୍ୟା କରଇଛି ତାହା ସ୍ପଷ୍ଟ ହୋଇନି ।

ଘଟଣାସ୍ଥଳରେ ପୁଲିସ୍ ପହଞ୍ଚି ମୃତଦେହ ଜବତ କରି ତଦନ୍ତ ଚଳାଇଛି ।

ଗୁଣିଗାରେଡି ସନ୍ଦେହରେ ଉଭୟଙ୍କୁ ହତ୍ୟା କରାଯଇଥିବା ସ୍ଥାନୀୟ ଲୋକ କହିଛନ୍ତି ।

ଉଲ୍ଲେଖଯୋଗ୍ୟ, ଗୁଣିଗାରେଡି ସନ୍ଦେହରେ ଛତରା ଗାଁରେ ଜଣେ ବୃଦ୍ଧାଙ୍କୁ ବି ହତ୍ୟା କରାଯାଇଥିଲା ।

ଲୋକାଲ ୱାୟାର

ଯାଜପୁର, ଜୁଲାଇ ୧୬ (ଲୋକାଲ ୱାୟାର) : ଯାଜପୁର ଜିଲ୍ଳା ଦାନଗଦୀ ବ୍ଲକ ଛତରା ଗାଁରେ ବୁଧବାର ଗୁଣିଗାରେଡି ସନ୍ଦେହରେ ଜଣେ ଯୁବକ ଟାଙ୍ଗିଆରେ ବୃଦ୍ଧାଙ୍କ ମୁଣ୍ଡ କାଟି ଦେଇଥିବା ସ୍ଥାନୀୟ ପୁଲିସ କହିଛି ।

ଏହାପରେ କଟାମୁଣ୍ଡା ଧରି ଥାନାରେ ଆତ୍ମସମର୍ପଣ କରିଥିଲା ଅଭିଯୁକ୍ତ ଯୁବକ କାର୍ତ୍ତିକ କେରେଇ । ପୁଲିସ୍ ଅଭିଯୁକ୍ତକୁ ଗିରଫ କରିଛି ।

ସୂଚନା ଅନୁସାରେ, ଉକ୍ତ ଗାଁର ନନ୍ଦିନୀ ପୂର୍ତ୍ତି ଝଡାଫୁଙ୍ଗା କରନ୍ତି । ଦିନେ କାର୍ତ୍ତିକଙ୍କ ଦାଦା ପୁଅ ଭାଇଙ୍କୁ ଜ୍ୱର ହୋଇଥିଲା । ସେ ତାଙ୍କୁ ନନ୍ଦିନୀଙ୍କ ପାଖକୁ ନେଇଥିବା ।

ନନ୍ଦିନୀ ତାଙ୍କୁ ଝଡାଫୁଙ୍ଗା କରିଥିଲେ ଦେହ ଭଲ ହୋଇଯିବ ବୋଲି କହିଥିଲେ । ହେଲେ ପରେ ତାଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ହୋଇଥିଲା ।

ତାଙ୍କୁ କଟକ ବଡ ମେଡିକାଲ ଅଣାଯାଉଥିବା ବେଳେ ରାସ୍ତାରେ ତାଙ୍କର ମୃତ୍ୟୁ ଘଟିଥିଲା ।

ଏଥିପାଇଁ କାର୍ତ୍ତିକ ନନ୍ଦିନୀକୁ ସନ୍ଦେହ କରି ବୁଧବାର ସନ୍ଧ୍ୟା ହତ୍ୟା କରିଥିଲା ।

ପୁଲିସ୍ କଟାମୁଣ୍ଡ ଓ ଟାଙ୍ଗିଆଙ୍କୁ ଜବତ କରିବା ସହିତ ଘଟଣା ଅଧିକ ତଦନ୍ତ ଚଳାଇଛି ।

ଲୋକାଲ ୱାୟାର

ଯାଜପୁର, ଜୁଲାଇ ୧୪(ଲୋକାଲ ୱାୟାର): ଯାଜପୁର ଜିଲ୍ଲାରୁ କୋଲକାତା ଓ ରାଉରକେଲା ବସ୍ ଚଳାଚଳ ସମ୍ପୂର୍ଣ୍ଣ ବନ୍ଦ ରଖିବାକୁ ଜିଲ୍ଲା ପ୍ରଶାସନ ଘୋଷଣା କରିଥିବା ଜଣେ ଅଧିକାରୀ ମଙ୍ଗଳବାର କହିଛନ୍ତି ।

ସୁନ୍ଦରଗଡ଼ ଜିଲ୍ଲାରେ ଏକ କରୋନା ବ୍ୟାପି ଚାଲିଥିବା ବେଳେ ପଶ୍ଚିମବଙ୍ଗର ବିଭିନ୍ନ ସହରରେ ମଧ୍ୟ ଏହା ଅଣାୟତ୍ତ ହୋଇଛି ।

ଯାଜୁପର ଜିଲ୍ଲାକୁ ବହୁ ସଂଖ୍ୟକ ପ୍ରବାସୀ ପୂର୍ବରୁ ଆସିଥିବାରୁ ଏବେ ଜିଲ୍ଲା କରୋନା ମ୍ୟାପରେ ହଟସ୍ପଟ ହୋଇ ରହିଛି ।

ଏବେ ବସ୍ ଚଳାଚଳ କଲେ ସ୍ଥିତି ଅଧିକ ଖରାପ ହେବାର ଆଶଙ୍କା ଥିବାରୁ ଜିଲ୍ଲା ପ୍ରଶାସନ ଏହି ନିଷ୍ପତ୍ତି ନେଇଥିବା ଅଧିକାରୀ କହିଛନ୍ତି ।

ଉଲ୍ଲେଖଯୋଗ୍ୟ, କୋଲକାତାକୁ ବସ୍ ଚଳାଚଳ ବନ୍ଦ ରଖିବାକୁ ଗତକାଲି ଭଦ୍ରକ ଜିଲ୍ଲା ପ୍ରଶାସନ ମଧ୍ୟ ଘୋଷଣା କରିଥିଲା ।

ଲୋକାଲ ୱାୟାର

ଭୁବନେଶ୍ୱର, ଜୁଲାଇ ୬ (ଲୋକାଲ ୱାୟାର) : ଯାଜପୁର ଜିଲ୍ଲା ଧର୍ମଶାଳା ଥାନା ମର୍ଜାପୁର ଗାଁରେ ଗୋଟିଏ ପରିବାରର ୩ ଜଣଙ୍କୁ ଦୁର୍ବୃତ୍ତମାନେ ମରଣାନ୍ତକ ଆକ୍ରମଣ କରିଥିବା ସୋମବାର ସ୍ଥାନୀୟ ପୁଲିସ କହିଛି ।

ଆକ୍ରମଣରେ ମହିଳାଙ୍କ ମୃତ୍ୟୁ ହୋଇଛି । ମହିଳାଙ୍କ ସ୍ୱାମୀ ଓ ଝିଅଙ୍କୁ ଗୁରୁତର ଅବସ୍ଥାରେ କଟକ ମେଡିକାଲ ସ୍ଥାନାନ୍ତର କରାଯାଇଛି ।

ବର୍ତ୍ତମାନ ସୁଦ୍ଧା ଆକ୍ରମଣର କାରଣ ଅସ୍ପଷ୍ଟ ରହିଥିବା ବେଳେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ।

ସୂଚନା ଅନୁସାରେ, ମୃତ ମହିଳା ଜଣକ ତରୁଲତା ବିଶ୍ୱାଳ । ସେ ଦୀର୍ଘ ୨୫ବର୍ଷ ହେବ ମିର୍ଜାପୁର ମହାନ୍ତି ସାହିରେ ଏକ ଭଡା ଘରେ ରହି ଆସୁଥିଲେ । ତାଙ୍କ ସହ ତାଙ୍କ ସ୍ୱାମୀ ଓ ଝିଅ ରହୁଥିଲେ ।

ତରୁଲତା ନିକଟସ୍ଥ ମିର୍ଜାପୁର ଅନନ୍ତ କୁମାରୀ ବାଳିକା ବିଦ୍ୟାଳୟରେ ଶିକ୍ଷକତା କରୁଥିଲେ ।

ଆଜି ସକାଳୁ ତରୁଲତା ରହୁଥିବା ଭଡାଘର ଅଗଣାରେ ତାଙ୍କ ମୃତ ଦେହ ପଡିଥିବାର ପଡୋଶୀ ଲୋକେ ଦେଖି ଘଟଣା ସମ୍ପର୍କରେ ଜାଣି ପାରିଥିଲେ ।

ଏହାପରେ ଖବର ପାଇ ପୁଲିସ୍ ପହଞ୍ଚି ଗୁରୁତର ବାପଝିଅଙ୍କୁ ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲା ।

ହେଲେ ସେଠାରେ ଅବସ୍ଥା ଗୁରୁତର ହେବାରୁ ସେମାନଙ୍କୁ କଟକ ସ୍ଥାନାନ୍ତର କରାଯାଇଛି।

ଲୋକାଲ ୱାୟାର

ଯାଜପୁର, ଜୁନ୍ ୨୯ (ଲୋକାଲ ୱାୟାର) : ଯାଜପୁର ଜିଲ୍ଲାର ସମସ୍ତ ସରକାରୀ ଅଫିସ୍‌କୁ ସାଧାରଣ ଲୋକଙ୍କ ଆସିବା ଉପରେ ସୋମବାର କଟକଣା ଲଗାଇଛନ୍ତି ଯାଜପୁର ଜିଲ୍ଲାପାଳ ରଞ୍ଜନ କୁମାର ଦାସ ।

ଆସନ୍ତା ଜୁଲାଇ ୮ ତାରିଖ ମଧ୍ୟରାତ୍ରୀ ପର୍ଯ୍ୟନ୍ତ ଲୋକଙ୍କୁ ସରକାରୀ ଅଫିସ ଆସିବାକୁ ବାରଣ କରାଯାଇଛି।

ଗତ ୨୪ ଘଣ୍ଟାରେ ଜିଲ୍ଲାରେ ଚିହ୍ନଟ ହୋଇଥିବା ୪୦ କରୋନା ଆକ୍ରାନ୍ତଙ୍କ ମଧ୍ୟରୁ ଜିଲ୍ଲା ପ୍ରଶାସନର ଜଣେ ବରିଷ୍ଠ ଅଧିକାରୀ ଥିବା ଜଣାପଡ଼ିବା ପରେ ଜିଲ୍ଲାପାଳ ଏହି ନିଷ୍ପତ୍ତି ନେଇଛନ୍ତି।

ଉଲ୍ଲେଖଯୋଗ୍ୟ, ଯାଜପୁର ଜିଲ୍ଲାରେ ଏ ପର୍ଯ୍ୟନ୍ତ ୪୮୬ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୩୫୧ ଜଣ ସୁସ୍ଥ ହୋଇଛନ୍ତି । ୧୩୫ ଜଣ ଚିକିତ୍ସିତ ହେଉଛନ୍ତି ।

ଲୋକାଲ ୱାୟାର

ଯାଜପୁର, ଜୁନ୍ ୨୯(ଲୋକାଲ ୱାୟାର): ଏଣିକି ବନ୍ଧୁକ ଲାଇସେନ୍ସ, ମଦ ଲାଇସେନ୍ସ, ଅନ୍ୟାନ୍ୟ ଲାଇସେନ୍ସ ଏବଂ ଅନୁମତି ନବୀକରଣ ପାଇଁ ଆବେଦନକାରୀମାନଙ୍କୁ ଗଛ ଲଗାଇବାକୁ ହେବ ।

ଜୁନ୍ ୨୬ ତାରିଖ ଦିନ ଯାଜପୁର ଜିଲ୍ଲା ପ୍ରଶାସନ ଏକ ନିର୍ଦ୍ଦେଶନାମା ଜାରୀ କରିଛି ।

ମିଳିଥିବା ସୂଚନା ଅନୁସାରେ ଜଣେ ବନ୍ଧୁକ ଲାଇସେନ୍ସ ଆବେଦନ ଧାରୀଙ୍କୁ ଅତି କମରେ ୧୦ଟି ଗଛ ଲଗାଇବାର ନିୟମ ରଖାଯାଇଥିବା ବେଳେ ବନ୍ଧୁକ ଲାଇସେନ୍ସ ନବୀରକରଣ କରିବା ପାଇଁ ଜଣେ ବ୍ୟକ୍ତିଙ୍କୁ ଅତି କମ୍ ରେ ୫ଟି ଗଛ ଲଗାଇବାକୁ ହେବ ।

ସେହିପରି ମଦ ଦୋକାନ ଲାଇସେନ୍ସ ପାଇବାକୁ ଚାହୁଁଥିବା ଦରଖାସ୍ତଧାରୀଙ୍କୁ ଅତି କମ୍ରେ ୧୦ଟି ଗଛ ଲଗାଇବା ବାଧ୍ୟତାମୂଳକ ହୋଇଥିବା ବେଳେ ମଦ ଦୋକାନ ଲାଇସେନ୍ସ ନବୀକରଣ ପାଇଁ ଦୋକାନ ମାଲିକଙ୍କୁ ୫ଟି ଗଛ ଲାଗାଇବାକୁ ହେବ ।

ସମାନଭାବେ କୌଣସି ସଙ୍ଗଠନ, ସୋସାଇଟି ରେଜିଷ୍ଟ୍ରେସନ୍ ଆକ୍ଟ ୧୮୬୦ ଅଧୀନରେ ନିଜର ରେଜିଷ୍ଟ୍ରେସନ୍ କରାଇବାକୁ ଚାହୁଁଥିଲେ ତାକୁ ଅତି କମରେ ୧୦ଟି ଗଛ ଲଗାଇବାକୁ ନିୟମ ରଖାଯାଇଥିବା ବେଳେ ନିଜ ସଙ୍ଗଠନର ନବୀକରଣ ପାଇଁ ୫ଟି ଗଛ ଲଗାଇବାର ନିୟମ ରଖାଯାଇଛି ।

ପୋଷ୍ଟାଲ୍ ଏଜେଣ୍ଟଙ୍କୁ ମଧ୍ୟ ନିଜର ଏଗ୍ରିମେଣ୍ଟ ନବୀକରଣ ପାଇଁ ୧୦ଟି ଗଛ ଲଗାଇବାକୁ ପଡ଼ିବ ।

ଖଣି ଓ କ୍ଷୁଦ୍ର ଜଙ୍ଗଲ ଲାଇସେନ୍ସ ପାଇଁ ସଂପୃକ୍ତ ବ୍ୟକ୍ତିଙ୍କୁ ଅତି କମରେ ୫୦ଟି ଗଛ ଲଗାଇବାକୁ ହେବ ।

ଏନେଇ ସେମାନଙ୍କୁ ଜିଲ୍ଲାପାଳଙ୍କ କାର୍ଯ୍ୟାଳୟରେ ଏକ ପ୍ରତିଶ୍ରୁତିପତ୍ର ଦାଖଲ କରିବାକୁ ହେବ ବୋଲି ଯାଜପୁର ଜିଲ୍ଲାପାଳ ରଞ୍ଜନ କୁମାର ଦାସ କହିଛନ୍ତି ।

ପ୍ରତିବର୍ଷ ଜିଲ୍ଲାରେ ଅନେକ ଲୋକ ବନ୍ଧୁକ, ମଦ ଓ ଅନ୍ୟାନ୍ୟ ଲାଇସେନ୍ସ ପାଇଁ ଆବେଦନ କରିଥାନ୍ତି ।

ଏଭଳି ସ୍ଥଳେ ଲାଇସେନ୍ସଧାରୀଙ୍କ ପାଇଁ ଓ ଲାଇସେନ୍ସ ଆବେଦନକାରୀଙ୍କ ପାଇଁ ଗଛ ଲଗାଇବା ଏକ ସଙ୍କେତ ଭଳି କାମ କରିବ ।

ଆବେଦନକାରୀମାନେ କେବଳ ଗଛ ଲଗାଇବେ ନାହିଁ ବରଂ ଗଛର କିପରି ଯତ୍ନ ନେଉଛନ୍ତି ସେ ସମ୍ପର୍କିତ ଫଟୋ ମଧ୍ୟ ଜିଲ୍ଲା ପ୍ରଶାସନ ପାଖରେ ପଇଠ କରିବେ । ଏସବୁକୁ ଦେଖି ଲାଇସେନ୍ସ ଦିଆଯିବା ସହ ଏହା ପରିବେଶ ସୁରକ୍ଷା ଦିଗରେ ବି ସହାୟକ ସାବ୍ୟସ୍ତ ହେବ ।

ଏ ବାବଦରେ ଜାରକା ଅଞ୍ଚଳର ଜଣେ ପଥର ଖଣି ଲାଇସେନ୍ସଧାରୀ ସନ୍ତୋଷ ଦାସ କହିଛନ୍ତି ଜିଲ୍ଲା ପ୍ରଶାସନର ଏଭଳି ପଦକ୍ଷେପକୁ ଆମେ ସ୍ୱାଗତ କରୁଛୁ ।

ମୋର ପଥର ଖଣି ଲାଇସେନ୍ସ ନବୀକରଣ ପାଇଁ ମୋତେ ଖୁବ୍ ଶୀଘ୍ର ୫୦ଟି ଗଛ ଲଗାଇବାକୁ ହେବ ଓ ମୁଁ ଏହି କାମ ଶୀଘ୍ର ଆରମ୍ଭ କରିବି ।

ଏ ବାବଦରେ ପରିବେଶବିତ୍ ହେମନ୍ତ ରାଉତ କହିଛନ୍ତି ସବୁଜ କରିଡର ତିଆରି କରିବାକୁ ଜିଲ୍ଲା ପ୍ରଶାସନ ନେଇଥିବା ଏହି ପଦକ୍ଷେପ ବାସ୍ତବିକ ସ୍ୱାଗତ ଯୋଗୁଁ ଏହାକୁ ସାଧାରଣରେ ଖୁବ୍ ପ୍ରଶଂସା କରାଯାଉଛି ।

ଲୋକାଲ ୱାୟାର

ଯାଜପୁର, ଜୁନ୍ ୯ (ଲୋକାଲ ୱାୟାର) : ଅନ୍‌ଲାଇନ୍‌ରେ ଅନୁଷ୍ଠିତ ହୋଇଥିବା କୋଭିଡ୍‌-୧୯ ଆନ୍ତର୍ଜାତିକ ଚଳଚ୍ଚିତ୍ର ମହୋତ୍ସବରେ ଯାଜପୁର ରୋଡ୍‌ର ହିତେଶ କୁମାରଙ୍କୁ ଚଳଚ୍ଚିତ୍ର ‘ଜୟତୁ ଜୟତୁ ଭାରତମ୍‌’ ପାଇଁ ଶ୍ରେଷ୍ଠ ମ୍ୟୁଜିକାଲ ପୁରସ୍କାର ମିଳିଛି ।

ଚଳଚ୍ଚିତ୍ର ମହୋତ୍ସବରେ କୋଭିଡ୍ ଯୋଦ୍ଧାମାନଙ୍କୁ ସମ୍ମାନ ଜଣାଇ ହିତେଶ ପ୍ରସ୍ତୁତ କରିଥିବା ୭ ମିନିଟ୍‌ର ‘ ଜୟତୁ ଜୟତୁ ଭାରତମ୍‌’ ଚଳଚ୍ଚିତ୍ର ପ୍ରଦର୍ଶିତ ହୋଇଥିଲା ।

ଏଥିରେ କରୋନା ମାହାମାରୀ ସମୟରେ ସୁରକ୍ଷା କବଚ ଭାବେ ଛିଡା ହୋଇଥିବା ଡାକ୍ତର, ସ୍ୱାସ୍ଥ୍ୟକର୍ମୀ, ପୁଲିସ, ସଫେଇ କର୍ମଚାରୀ ଏବଂ ଅନ୍ୟାନ୍ୟ ଜରୁରୀକାଳୀନ ଓ ଅତ୍ୟାବଶ୍ୟକ ସେବା ଯୋଗାଉଥିବା କୋଭିଡ୍ ଯୋଦ୍ଧାଙ୍କୁ ମୁଖ୍ୟ ଅଭିନେତା ଭାବେ ପ୍ରତିପାଦିତ କରାଯାଇଛି ।

ଓରିଫାର୍ମିଂ ତରଫରୁ ଏପ୍ରିଲ ୨୮ରୁ ଜୁନ୍ ୩ ପର୍ଯ୍ୟନ୍ତ ଏହି ଚଳଚ୍ଚିତ୍ର ମହୋତ୍ସବ ଅନୁଷ୍ଠିତ ହୋଇଥିଲା ।

ପ୍ରତିଯୋଗିତାରେ ୨୪୦୦ ପ୍ରତିଯୋଗୀଙ୍କ ୮୦୦ ଚଳଚ୍ଚିତ୍ର ପ୍ରଦର୍ଶିତ ହୋଇଥିଲା ।

ସେଥିରୁ ଭାରତ ୨୦ଟି ପରୁସ୍କାର ପାଇଥିବା ବେଳେ ଅନ୍ୟ ଦେଶଗୁଡ଼ିକ ୧୦ଟି ପୁରସ୍କାର ପାଇଛନ୍ତି । ଭାରତର ୨୦ ପୁରସ୍କାରୁ ୧୦ଟି ଓଡ଼ିଶାର କଳାକାରମାନଙ୍କ ହାତକୁ ଆସିଛି ।

ଏହି ପ୍ରତିଯୋଗିତାର ବିଚାରକ ଥିଲେ ଫ୍ରାନ୍ସର ମିସ୍ ମାରିଆନି ବରଗୋ, ଭାରତରୁ ଏମ୍‌. ମନିରାମ, ଆଫଗାନିସ୍ତାନରୁ କ୍ୱାଗ୍ରାଥୁଲ୍ଲା ତାମ୍ଭି ଓ କଙ୍ଗୋର ରିଚାର୍ଡ ।

ଲୋକାଲ ୱାୟାର

ଯାଜପୁର, ମେ’ ୨୬ (ଲୋକାଲ ୱାୟାର) : ଯାଜପୁର ଜିଲ୍ଲା କୋରେଇ ଥାନା ଅନ୍ତର୍ଗତ ରଗଡି ଗ୍ରାମରେ ଥିବା ଏକ ୩୦ ଫୁଟ ଉଚ୍ଚ ନିର୍ମାଣାଧୀନ ଘରୋଇ ବିଦ୍ୟୁତ ଟ୍ରାନ୍ସଫର୍ମର ଉପରକୁ ସୋମବାର ଜଣେ ୬ ବର୍ଷର ନାବାଳକ ଚଢିଯାଇଥିଲା ।

ବାଳକ ଜଣକ ଦୁଷ୍ମନ୍ତ ମାଝୀଙ୍କ ପୁଅ ଖୁଦା ମାଝୀ ।

ଖୁଦା ଗତକାଲି ସନ୍ଧ୍ୟା ୪ଟାରେ ଟ୍ରାନ୍ସଫର୍ମର ଶୀର୍ଷରେ ଛିଡା ହୋଇ ନିର୍ଭୟରେ ଜାତୀୟ ରାଜପଥରେ ଯାତାୟତ କରୁଥିବା ଗାଡି ଗୁଡିକ ଦେଖିୁଥିଲା ।

ଏହା ଦେଖିବା ପରେ ଲୋକମାନେ ତାକୁ ତଳକୁ ଓହ୍ଲାଇବାକୁ ତାଗିଦ କରିଥିଲେ । ଏହାପରେ ସେ ତଳକୁ ଓହ୍ଲାଇଥିଲା ବୋଲି ସ୍ଥାନୀୟ ବାସିନ୍ଦା ରଞ୍ଜନ ଦାସ କହିଛନ୍ତି ।

ଟ୍ରାନ୍ସଫର୍ମରଟି କିଛି ବର୍ଷ ପୂର୍ବେ ନିର୍ମାଣ ହୋଇଥିଲେ ମଧ୍ୟ ବିଦ୍ୟୁତ ସଂଯୋଗ ହୋଇନଥିବାରୁ ଶିଶୁଟିର ଜୀବନ ବଞ୍ଚି ଯାଇଛି ବୋଲି ଜେଇ ସଞ୍ଜୟ ବିଶ୍ୱାଳ କହିଛନ୍ତି ।

ମଙ୍ଗଳବାର ଶିଶୁର ପରିବାରକୁ ସାକ୍ଷାତ କରି ପିଲାକୁ ଟ୍ରାନ୍ସଫର୍ମର ପାଖକୁ ନ ଛାଡିବା ପାଇଁ ବୁଝାଇଛୁ ବୋଲି ଶ୍ରୀ ବିଶ୍ୱାଳ କହିଛନ୍ତି।

ଲୋକାଲ ୱାୟାର