ରାୟଗଡା

ରାୟଗଡ଼ା,ଜାନୁଆରୀ ୧୦(ଲୋକାଲ ୱାୟାର) ରାୟଗଡ଼ା ଜିଲ୍ଲାର ସିଙ୍ଗାପୁରମ ରେଳ ଷ୍ଟେସନ ଠାରେ ରେଳ ଧାରଣାରେ ଦେଖା ଦେଇଥିବା ଫାଟର ମରାମତି ପରେ ରେଳ ଚଳାଚଳ ସ୍ୱାଭାବିକ ହୋଇଥିବା କହିଛନ୍ତି ରେଳବାଇର ଜନୈିକ ଅଧିକାରୀ ।

ଗୁରୁବାର ସକାଳେ ରାୟଗଡ଼ା ଷ୍ଟେସନ ଠାରୁ ୧୦ କିଲୋମିଟର ଦୂର ସିଙ୍ଗାପୁରମ ଷ୍ଟେସନ ଠାରେ ପ୍ଲାଟଫର୍ମ ନଂ ୧ ପାଖ ରେଳ ଧାରଣାରେ ଫାଟ ଥିବା ଜଣେ ଲାଇନ୍ସ ମ୍ୟାନ ଦେଖିବାକୁ ପାଇଥିଲେ ।

ସେ ସଙ୍ଗେ ସଙ୍ଗେ ଏ ସମ୍ପର୍କରେ ଷ୍ଟେସନ ମାଷ୍ଟରଙ୍କୁ ଜଣାଇଥିଲେ । ଏହି ସମୟରେ ସେହି ରୁଟରେ ଆସୁଥିବା ଦୁର୍ଗ-ବିଶାଖାପଟ୍ଟନମ ପାସେଞ୍ଜର ଟ୍ରେନକୁ ତତକ୍ଷଣାତ ପୂର୍ବରୁ ଅଟକାଇ ଦିଆଯାଇଥିଲା ।

ଇଞ୍ଜିନିୟରମାନେ ପହଞ୍ଚି ଟ୍ରାକ ମରାମତି କରିବା ପରେ ପ୍ରାୟ ଅଧଘଣ୍ଟା ମଧ୍ୟରେ ଟ୍ରେନଟି ଗନ୍ତବ୍ୟ ସ୍ଥଳ ଅଭିମୁଖେ ଯାତ୍ରା ଆରମ୍ଭ କରିଥିଲା । ଶୀତ ଦିନେ ସାଧାରଣତଃ ରେଳଧାରଣାରେ ଏପରି ଫାଟ ହୋଇଥାଏ ବୋଲି ଷ୍ଟେସନ ମାଷ୍ଟର କହିଛନ୍ତି ।

ସ୍ମରଣଯୋଗ୍ୟ, ଗତ ଡିସେମ୍ବର ୨୫ ତାରିଖରେ ରାୟଗଡ଼ା ଷ୍ଟେସନ ପାଖରେ ଏହିପରି ଟ୍ରାକରେ ଫାଟ ଦେଖା ଦେବାରୁ ହୀରାଖଣ୍ଡ ଟ୍ରେନକୁ ଘଣ୍ଟାଧିକ କାଳ ଅଟକି ରହିବାକୁ ପଡ଼ିଥିଲା ।

ଲୋକାଲ ୱାୟାର

ରାୟଗଡ଼ା,ଡିସେମ୍ବର ୨୫(ଲୋକାଲ ୱାୟର) ଭୁବନେଶ୍ୱର-ଜଗଦଲପୁର ହୀରାଖଣ୍ଡ ଏକ୍ସପ୍ରେସ୍ ସୋମବାର ସକାଳେ ଅଳ୍ପକେ ଏକ ଦୁର୍ଘଟଣାରୁ ବର୍ତ୍ତି ଯାଇଥିବା ଯାତ୍ରୀମାନେ ପ୍ରକାଶ କରିଛନ୍ତି ।

ରାୟଗଡ଼ା ଜିଲ୍ଲାର ସିଙ୍ଗାପୁର ଷ୍ଟେସନରେ ବୈଷ୍ଣବ ଗୌଡ଼ ନାମକ ସିଗନାଲ ମ୍ୟାନ୍ ରେଳ ଧାରଣାରେ ଏକ ଫାଟ ହୋଇଥିବା ଦେଖିବା ପରେ ତୁରନ୍ତ ଷ୍ଟେସନ ମାଷ୍ଟରଙ୍କୁ ଅବଗତ କରାଇଥିଲେ । ଷ୍ଟେସନ ମାଷ୍ଟର ଜରୁରି ପଦକ୍ଷେପ ନେଇ ହୀରାଖଣ୍ଡକୁ ଅଟକାଇଥିଲେ ।

ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚିବା ପରେ ଟ୍ରାକ ମରାମତି ହୋଇଥିଲା ଏବଂ ପ୍ରାୟ ଦେଢ଼ ଘଣ୍ଟା ପରେ ଟ୍ରେନଟି ପୁନର୍ବାର ଗନ୍ତବ୍ୟ ସ୍ଥଳ ଅଭିମୁଖେ ଯାତ୍ରା କରିଥିଲା ।

ତେବେ ସାଧାରରତଃ ଶୀତଦିନେ ଅତ୍ୟଧିକ ଥଣ୍ଡାରେ ଏପରି ଭାବେ ଟ୍ରାକରେ ଫାଟ ସୃଷ୍ଟି ହେବା ଏକ ସାଧାରଣ ଘଟଣା । ତେଣୁ ଏଥିପାଇଁ ନିମୟିତ ପାଟ୍ରୋଲ ମ୍ୟାନକୁ ମୁତୟନ କରାଯାଇଥାଏ ବୋଲି ରେଳବାଇ ପକ୍ଷରୁ କୁହାଯାଇଛି ।

ଲୋକାଲ ୱାୟର

ରାୟଗଡ଼ା, ଡିସେମ୍ବର ୨୩(ଲୋକାଲ ୱାୟର) ମୟୁରଭଞ୍ଜ ଏବଂ ନବରଙ୍ଗପୁର ଜିଲ୍ଲା ପରେ ଏବେ ପୁଣି ରାୟଗଡ଼ା ଜିଲ୍ଲାର ଗୁଣୁପୁରରେ ରବିବାର ପୁଲିସ ଓ ବନବିଭାଗ ଅଧିକାରୀମାନେ ଏକ ବଜ୍ରକାପ୍ତା ର‌୍ୟାକେଟ ଉପରେ ଚଢାଉ କରି ଗୋଟିଏ ବଜ୍ରକାପ୍ତା ଜବତ କରିବା ସହ ୫ ଜଣଙ୍କୁ ଗିରଫ କରିଥିବା ଜଣେ ଅଧିକାରୀ କହିଛନ୍ତି ।

ପୁଲିସ ଓ ବନ ବିଭାଗର ସ୍ୱତନ୍ତ୍ର ଟିମ୍ ପାଟ୍ରେଲିଂ କରୁଥିବା ବେଳେ ଏକ କାରରେ ୫ ଜଣ ସନ୍ଦିଗ୍ଧଙ୍କୁ ଦେଖି ଅଟକାଇଥିଲେ । ସେମାନଙ୍କ ମଧ୍ୟରେ ଆନ୍ଧ୍ରର ପଲାସାରୁ ଆସିଥିବା ଦୁଇ ଜଣ ମହିଳା ମଧ୍ୟ ଥିଲେ । ଟିମ୍ ଗୋଟିଏ ବଜ୍ରକାପ୍ତା ଓ କାରକୁ ଜବତ କରିବା ସହ ୫ ଜଣଙ୍କୁ ଗିରଫ କରିଛି । ଜବତ କାରଟି ଭୁବନେଶ୍ୱରରେ ପଂଜିକୃତ ହୋଇଥିବା ଜଣାପଡ଼ିଛି ।

ସ୍ମରଣଯୋଗ୍ୟ, ଏହା ପୂର୍ବରୁ କ୍ରାଇମବ୍ରାଞ୍ଚର ଏସଟିଏଫ ନବରଙ୍ଗପୁରର ଉମରକୋଟ ଓ ମୟୁରଭଞ୍ଜର ଉଦଳାରୁ ବଜ୍ରକାପ୍ତା ଚଲୋଣ ର‌୍ୟାକେଟର ସଦସ୍ୟମାନଙ୍କୁ ଗିରଫ କରିବା ସହ କେତୋଟି ବଜାକାପ୍ତା ଜବତ କରିଥିଲେ ।

ଲୋକାଲ ୱାୟର

କଟକ,ଅକ୍ଟୋବର ୨୯ (ଲୋକାଲ ଓ୍ବାୟର) ଗୁରୁତର ରୋଗଯୋଗୁଁ ଜଣେ ଯୁବତୀ ଡାହାଣ ହାତ ହରାଇଥିବା ବେଳେ ଉକ୍ତ ସ୍ଥାନରେ ଏକ କୁତ୍ରିମ ହାତ ଲଗାଇବା ପାଇଁ କଟକ ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ କଲେଜ ଓ ହସ୍ପିଟାଲ(ଏସସିବି)ର ପ୍ଲାଷ୍ଟିକ ସର୍ଜରୀ ବିଭାଗ ପଦକ୍ଷେପ ନେଉଥିବା ସୋମବାର ସୂଚନା ଦେଇଛି ।

ହସ୍ପିଟାଲର ପ୍ଲାଷ୍ଟିକ ସର୍ଜରୀ ବିଭାଗର ର ୧୨ ନମ୍ବର ଶଯ୍ୟାରେ ଚିକିତ୍ସିତ ହେଉଥିବା ମିତା ଶବରଙ୍କ ଡାହାଣ ହାତ ଅସ୍ବାଭାବିକ ଭାବେ ବୃଦ୍ଧିପାଇଥିଲା। ଉପାନ୍ତ ରାୟଗଡା ଜିଲ୍ଲା ପଦ୍ମପୁର ପେରୁପାଙ୍ଗ ଗ୍ରାମର ଏହି ଯୁବତୀ ପିଲାଦିନରୁ ମା ଓ ବାପାଙ୍କୁ ହରାଇଥିଲେ । ତାଙ୍କର ଭରଣ ପୋଷଣ ପାଇଁ ବଡ ଭଉଣୀ ସମସ୍ତ ଦାୟିତ୍ୱ ବହନ କରିଥିଲେ ।

ମାତ୍ର ମିତାଙ୍କୁ ସାତ ବର୍ଷ ବୟସ ହୋଇଥିବା ବେଳେ ତାଙ୍କ ଡାହଣ ହାତର ମାଂସ ଦିନକୁ ଦିନ ବଢିବାର ଲାଗିଥିଲା । ମାଂସ ଏପରି ବଢିଲା ଯେ ବାମ ହାତର ଠାରୁ ଡାହାଣ ହାତ ଦୁଇ ଗୁଣ ଅଧିକ ଓଜନ ହୋଇଗଲା ହାତର ଓଜନ ବେକ ଉପରେ ପ୍ରଭାବ ପକାଇଲା । ଏହି ଓଜନିଆ ହାତକୁ ନେଇ ଯାତାୟତ କରିବା ତାଙ୍କ ପାଇଁ ଅସମ୍ଭବ ଥିଲା । ଶେଷରେ ସେ ପାଠ ପଢିବା ଛାଡିଦେଲେ ।

ଖାଇବା ପିଇବା ଓ ଚଲାବୁଲା ଉପରେ ଏହାର ମଧ୍ୟ ପ୍ରଭାବ ପଡିଥିଲା । ଆର୍ଥିକ ଦ୍ରୁଷ୍ଟିରୁ ସ୍ବଚ୍ଛଳ ନ ଥିବାରୁ ତାଙ୍କ ଚିକିତ୍ସା ହୋଇପାରୁ ନଥିଲା। ଗ୍ରାମର କିଛି ସାମାଜିକ କର୍ମୀଙ୍କ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଥିଲେ । ଏହି ରୋଗର ନିରାକରଣ ପାଇଁ ଜିଲ୍ଲା ମୁଖ୍ୟଚିକିତ୍ସାଳୟରେ ସେପରି ସୁବିଧା ନଥିଲା ।

ଚିକିତ୍ସାଳୟର ସିଡିଏମଓ ତାଙ୍କୁ ବଡ ଡାକ୍ତର ଖାନାକୁ ଚିକିତ୍ସା ପାଇଁ ସ୍ଥାନାନ୍ତରିତ କରିଥିଲେ । ଅଗଷ୍ଟ ମାସରୁ ତାଙ୍କୁ ଏସସିବିର ପ୍ଲାଷ୍ଟିକ ସର୍ଜରୀରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । ପ୍ଲାଷ୍ଟିକ ସର୍ଜରୀର ବିଭାଗୀୟ ମୁଖ୍ୟ ପ୍ରଫେସର ଅନ୍ନଦା ପଟ୍ଟନାୟକଙ୍କ ନେତୃତ୍ୱରେ ମିତାଙ୍କ ଚିକିତ୍ସା ପାଇଁ ଏକ ସ୍ୱତନ୍ତ୍ର ଡାକ୍ତରୀ ଦଳ ଗଠନ କରାଯାଇଥିଲା ।

ଏହି ରୋଗଟି କଣ ସେ ସମ୍ପର୍କରେ ଗବେଷଣା ଚାଲିବା ସହ ତାଙ୍କ ଚିକିତ୍ସା ପାଇଁ ହାତରୁ ମାଂସ ସଂଗ୍ରହ କରାଯାଇ ବାୟୋପିସ,ଏଫଏନଏସି, ସିଟି ସ୍କାନ, ଏକ୍ସରେ, ଥାଇରଡ ଆଦି ବିଭିନ୍ନ ପରୀକ୍ଷା କରଯାଇଥିଲା । ପରୀକ୍ଷାରୁ ଜଣା ପଡିଥିଲା ଯେ, ଏହି ରୋଗ ପ୍ଲେକ୍ସିଫର୍ମ ନ୍ୟୁଫାଇବ୍ରୋମା ।

ଏହା ଜଣାପଡିବା ପରେ ଡାହଣ ହାତର ମାଂସ ପିଣ୍ଡୁଳାର କିଛି ଅଂଶ ପ୍ରଥମେ ଅସ୍ତ୍ରପଚାର କରାଯାଇ କଟାଯାଇଥିଲା । ହାତକୁ ରକ୍ଷା କରିବା ପାଇଁ ଡାକ୍ତରୀ ଟିମ ବହୁ ଚେଷ୍ଟା କରିଥିଲେ । ମାତ୍ର ଅପରେସନ ପରେ ହାତ ସଂକ୍ରମିତ ହେବାରୁ ତାଙ୍କର ଅବସ୍ଥା ଗୁରୁତର ହେବାରେ ଲାଗିଥିଲା । ତାଙ୍କ ଜୀବନ ପ୍ରତି ବିପଦ ଥିବାରୁ ଦ୍ୱିତୀୟ ଥର ପାଇଁ ଡାକ୍ତରୀ ଟିମ ଅସ୍ତ୍ରପଚାର କରିଥିଲେ ।

ଏହି ଅସ୍ତ୍ରପଚାରରେ ପ୍ରାୟ ତେର କେଜି ମାଂସ ଥିବା ମିତାଙ୍କ ଡାହଣ ହାତକୁ ସମ୍ପୂର୍ଣ୍ଣ ଭାବେ କାନ୍ଧ ନିକଟରୁ ଅଲଗା କରି ଦିଆଯାଇଛି । ମିତାଙ୍କ ଅବସ୍ଥା ବର୍ତ୍ତମାନ ସ୍ଥିର ରହିଛି । କିଛି ଦିନ ଚିକିତ୍ସାଧିନ ରହିବା ପରେ ତାଙ୍କର କୃତ୍ରିମ ହାତ ଲଗାଯିବ ।

ଏହି କୃତ୍ରିମ ହାତ ସାହାଯ୍ୟରେ ମିତା ସମସ୍ତ କାର୍ଯ୍ୟ କରି ପାରିବେ। ତାଙ୍କୁ ସରକାରୀ ସ୍ତରରେ ସମସ୍ତ ପ୍ରକାର ଚିକିତ୍ସା ଯୋଗାଇ ଦିଆଯାଉଛି ବୋଲି ମେଡିକାଲ କର୍ତ୍ତୃପକ୍ଷ ଲୋକାଲ ଓ୍ବାୟରକୁ କହିଛନ୍ତି ।

ଲୋକାଲ ଓ୍ବାୟର