ସମ୍ବଲପୁର

ସମ୍ବଲପୁର, ନଭେମ୍ବର ୨୧(ଲୋକାଲ ୱାୟାର): ସ୍ଥାନୀୟ ଜନପ୍ରତିନିଧିମାନଙ୍କ ସହ ଆଲୋଚନା କରିବା ପରେ ଚାଷୀ ଆନ୍ଦୋଳନ ପ୍ରତ୍ୟାହୃତ ହୋଇଥିବା ଚାଷୀ ସଙ୍ଗଠନର ନେତା ଗୁରୁବାର ଅପରାହ୍ଣରେ ସୂଚନା ଦେଇଛନ୍ତି ।

ଧାନ ସଂଗ୍ରହରେ ଟୋକନ ପ୍ରତ୍ୟାହାର ଦାବିରେ ସମ୍ବଲପୁର ଜିଲ୍ଲାର ବରେଇପାଲ୍ଲି ଏବଂ ଅନ୍ୟାନ୍ୟ କେତେକ ସ୍ଥାନରେ ଚାଷୀମାନେ ଗୁରୁବାର ସକାଳୁ ଧାନ ବସ୍ତା ଥୋଇ ରାସ୍ତାରୋକ କରିଥିଲେ ।

ପରେ ଚାଷୀ ନେତାମାନଙ୍କ ସହ ସେମାନଙ୍କ ସମସ୍ୟା ବାବଦରେ ମନ୍ତ୍ରୀ ସୁଶାନ୍ତ ସିଂହ ଏବଂ ବିଧାୟକ ରୋହିତ ପୂଜାରୀ ଆଲୋଚନା କରିଥିଲେ ।

ଟୋକନ ବ୍ୟବସ୍ଥା ପ୍ରତ୍ୟାହାର ହେବନାହିଁ ଏବଂ ଯେଉଁ ଚାଷୀମାନେ ଟୋକନ ପାଇ ନାହାନ୍ତି ତାହାର ବ୍ୟବସ୍ଥା ହେବ ବୋଲି ଚାଷୀନେତାଙ୍କୁ ପ୍ରତିଶ୍ରୁତି ଦିଆଯାଇଥିଲା ।

ପରେ ଚାଷୀ ନେତାମାନେ ସଙ୍ଗଠନର ବୈଠକରେ ଏ ନେଇ ଆଲୋଚନା କରିବା ପରେ ଆନ୍ଦୋଳନ ପ୍ରତ୍ୟାହୃତ ହେଲା ବୋଲି ସୂଚନା ଦେଇଛନ୍ତି ।

ଲୋକାଲ ୱାୟାର

ସମ୍ବଲପୁର, ନଭେମ୍ବର ୨୧ (ଲୋକାଲ ୱାୟାର): ଧାନ ସଂଗ୍ରହରେ ଅନ୍-ଲାଇନ୍ ଟୋକନ୍ ବ୍ୟବସ୍ଥାକୁ ବିରୋଧ କରି ପଶ୍ଚିମ ଓଡ଼ିଶାରେ ଚାଷୀଙ୍କ ଆନ୍ଦୋଳନ ତେଜିବାରେ ଲାଗିଥିବାବେଳେ ଗୁରୁବାର ବରଗଡ଼ ଜିଲ୍ଲାର ଚାଷୀମାନେ ଗୋଡ଼ଭଗାଠାରେ ଜାତୀୟ ରାଜପଥ ଅବରୋଧ କରିଛନ୍ତି।

ଆଜି ସକାଳୁ ଶତାଧିକ ଚାଷୀ ରାଜରାସ୍ତାରେ ଧାନବସ୍ତା ଥୋଇ ଧାରଣାରେ ବସିଥିବାରୁ ବରଗଡ଼ ଓ ସମ୍ବଲପୁର ମଧ୍ୟ ଯାତାୟାତ ବାଧାପ୍ରାପ୍ତ ହୋଇଛି।

ଟୋକନ୍ ବ୍ୟବସ୍ଥାକୁ ବିରୋଧ କରି ଗତକାଲି ଜିଲ୍ଲାର ଅତାବିରା ଓ ଭେଡେନ୍‌ରେ ଚାଷୀମାନେ ୧୨ ଘଣ୍ଟିଆ ବନ୍ଦ ପାଳନ କରିବା ପରେ ପରିସ୍ଥିତିକୁ ଦେଖି ଉତ୍ତରାଞ୍ଚଳ ଡିଆଇଜି ଚାଷୀଙ୍କ ସହ ବୈଠକ କରିଥିଲେ।

ଉତ୍ତରାଞ୍ଚଳ ଡିଆଇଜି ହିମାଂଶୁ ଲାଲ୍‌ଙ୍କ ସମେତ ବରଗଡ଼ ଏସ୍‌ପି, ଜିଲ୍ଲାପାଳ, ଯୋଗାଣ ଅଧିକାରୀ ଓ ଚାଷୀନେତାମାନେ ସାମିଲ ହୋଇଥିଲେ।

ଟୋକନ୍ ବ୍ୟବସ୍ଥା ସଂପୂର୍ଣ୍ଣ ଉଚ୍ଛେଦ ନହେବାଯାଏ ଆନ୍ଦୋଳନ ଜାରି ରହିବ ବୋଲି ଚାଷୀମାନେ ଜିଦରେ ଅଟଳ ରହିବାରୁ ଏହି ବୈଠକ ଫେଲ୍ ମାରିବା ପରେ ଆଜି ଚାଷୀମାନେ ରାଜରାସ୍ତା ଅବରୋଧ କରିଛନ୍ତି।

ସେପଟେ ସମ୍ବଲପୁର ଜିଲ୍ଲାରେ ମଧ୍ୟ ଚାଷୀଙ୍କ ଅସନ୍ତୋଷ ବଢ଼ିବାରେ ଲାଗିଛି।

ତୃଣମୂଳ ସ୍ତରରେ ଧାନ କିଣାବିକାକୁ ନେଇ ରହିଥିବା ସମସ୍ୟା ସଂପର୍କରେ ଅନଭିଜ୍ଞ ଅମଲାତନ୍ତ୍ର ଟୋକନ୍ ବ୍ୟବସ୍ଥା ଭଳି ଏକ ଉଦ୍ଭଟ ପରିକଳ୍ପନା କରିଥିବାରୁ ଏହାକୁ ଚାଷୀକୁଳ ଆଦୌ ଗ୍ରହଣ କରିବେ ନାହିଁ ବୋଲି ଚାଷୀନେତା ସରୋଜ କହିଛନ୍ତି।

ସେହିପରି ଚାଷୀନେତା ଲିଙ୍ଗରାଜ କହିଛନ୍ତି ଯେ, ପଶ୍ଚିମଓଡ଼ିଶାର ବିଭିନ୍ନ ଅଂଚଳରେ ଧାନଚାଷ ଓ ମଣ୍ଡିରେ ଥିବା ବିବିଧତାକୁ ନଜରରେ ନରଖି ସରକାର ରାଜଧାନୀରେ ରହି ତାକୁ ନିୟନ୍ତ୍ରିତ କରିବାର ପ୍ରୟାସ କରୁଛନ୍ତି।

ଏହା ଅଭାବୀ ଧାନବିକ୍ରିକୁ ପ୍ରୋତ୍ସାହିତ କରୁଥିବା ଲିଙ୍ଗରାଜ ଅଭିଯୋଗ ବାଢ଼ିଛନ୍ତି।

ଅନ୍ୟପକ୍ଷରେ ମିଳିଥିବା ସୂଚନା ଅନୁସାରେ, ଆଜି ସମ୍ବଲପୁର ବରେଇପାଲିରେ ପଶ୍ଚିମ ଓଡ଼ିଶାର ବିଭିନ୍ନ ଜିଲ୍ଲାର ଚାଷୀ ନେତାମାନେ ବୈଠକରେ ଏକାଠି ହେବାର କାର୍ଯ୍ୟକ୍ରମ ରହିଛି।

ଏହି ବୈଠକରେ ଚାଷୀମାନେ ଆଗାମୀ ପଦକ୍ଷେପ ସଂପର୍କରେ ନିଷ୍ପତ୍ତି ନେବେ ବୋଲି କୁହାଯାଇଛି।

ଲୋକାଲ ୱାୟାର

ସମ୍ବଲପୁର,ନଭେମ୍ବର ୧୮(ଲୋକାଲ ୱାୟାର): ରାଜ୍ୟ ସରକାର ଖରିଫ୍ ଧାନ ସଂଗ୍ରହରେ ଲାଗୁ କରିଥିବା ଟୋକନ ବ୍ୟବସ୍ଥା ବିରୋଧରେ ସମଗ୍ର ପଶ୍ଚିମ ଓଡ଼ିଶାରେ ଚାଷୀମାନେ ସୋମବାର ଆନ୍ଦୋଳନକୁ ଓହ୍ଲାଇଥିବା ବେଳେ ସମ୍ବଲପୁର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାନଗାଡ଼ି ରଖି ପ୍ରତିବାଦ ଜଣାଇଛନ୍ତି ।

ମଙ୍ଗଳବାର ବିଧାୟକଙ୍କ ଘର ସମ୍ମୁଖରେ ପୂର୍ବାହ୍ନ ୧୦ଟାରୁ ଧାନ ରଖି ପ୍ରତିବାଦ କରାଯିବ ବୋଲି ପଶ୍ଚିମ ଓଡ଼ିଶା କୃଷକ ସୁରକ୍ଷା ସଙ୍ଗଠନ ଆବାହକ ଅଶୋକ ପ୍ରଧାନ କହିଛନ୍ତି ।

ସୋମବାର ପୂର୍ବାହ୍ନରେ ଜିଲ୍ଲାପାଳଙ୍କ କାର୍ଯ୍ୟାଳୟ ନିକଟରେ ହୋଇଥିବା କୃଷକ ସଙ୍ଗଠନର ଜରୁରି ବୈଠକରେ ସଦସ୍ୟମାନେ ଟୋକନ ବ୍ୟବସ୍ଥାର ଦୃଢ଼ ପ୍ରତିବାଦ କରିଥିଲେ ।

ଚାଷୀମାନଙ୍କ ସହ ଉପଜିଲ୍ଲାପାଳ ଅନିରୁଦ୍ଧ ପ୍ରଧାନ ଆଲୋଚନା କରିଥିଲେ ମଧ୍ୟ ଚାଷୀମାନଙ୍କ ଅସନ୍ତୋଷ ଥମି ନଥିଲା ।

ସେମାନେ ଜିଲ୍ଲାପାଳଙ୍କ କାର୍ଯ୍ୟାଳୟର ସମ୍ମୁଖ ଓ ପଛ ପାଶ୍ୱର୍ରେ ଧାନ ଗାଡ଼ି ରଖି ଅବରୋଧ କରିଥିଲେ । ଅପରାହ୍ଣ ୫ଟା ପରେ ଚାଷୀମାନେ ଧାନ ଗାଡ଼ି ହଟାଇଥିଲେ ।

ଉଲ୍ଲେଖଯୋଗ୍ୟ, ଗତ ୧୫ ତାରିଖ ଠାରୁ ଖରିଫ ଧାନ ସଂଗ୍ରହ ପାଇଁ ପ୍ରଶାସନ ଘୋଷଣା କରିଥିବା ବେଳେ ଟୋକନ ବିବାଦ ପାଇଁ ଧାନ ସଂଗ୍ରହ ହୋଇପାରିନାହିଁ ।

ବିଭିନ୍ନ ମଣ୍ଡିରେ ହଜାର ହଜାର ବସ୍ତା ଧାନ ପଡ଼ିରହିଛି । ସରକାର ଏହାର ସମାଧାନ ନକଲେ ଆଗକୁ ଚାଷୀ ଆନ୍ଦୋଳନ ବ୍ୟାପକ ହେବ ବୋଲି ସଙ୍ଗଠନ ପକ୍ଷରୁ ଚେତାବନୀ ଦିଆଯାଇଛି ।

ଲୋକାଲ ୱାୟାର

ସମ୍ବଲପୁର, ନଭେମ୍ବର ୧୬ (ଲୋକାଲ ୱାୟାର) ସମ୍ବଲପୁର ଜିଲ୍ଲା କଲାଟିକୁଦ ବନବିଭାଗ ଅନ୍ତର୍ଗତ ଯୁଜୁମୁରାରେ ଏକ ଛୁଆ ହାତୀର ମୃତଦେହ ଉଦ୍ଧାର ହୋଇଥିବାବେଳେ ସେଠାରେ ବର୍ଷକରେ ତିନିଟି ହାତୀଙ୍କର ମୃତ୍ୟୁ ହୋଇଛି ।

ଆଜି ସକାଳୁ ଛୁଆ ହାତୀଟିର ମୃତଦେହ ଦେଖି ସ୍ଥାନୀୟ ଲୋକେ ବନବିଭାଗକୁ ଜଣାଇବା ପରେ ତାର ବ୍ୟବଚ୍ଛେଦ ହୋଇଥିଲା ।

ବ୍ୟବଚ୍ଛେଦ ରିପୋର୍ଟ ସ୍ପଷ୍ଟ ହୋଇନଥିବା ବେଳେ ବେଆଇନ ଶିକାର ଯୋଗୁଁ ମୃତ୍ୟୁ ହୋଇନଥିବା ଜଣାପଡିଛି।

ଉଲ୍ଲେଖଯୋଗ୍ୟ, ଏହା ପୂର୍ବରୁ ସେଠାରେ ଅକ୍ଟୋବର ୨୩ ଓ ନଭେମ୍ବର ୨୪ରେ ଦୁଇଟି ହାତୀଙ୍କର ମୃତ୍ୟୁ ହୋଇସାରିଛି ।

ଲୋକାଲ ୱାୟାର

ସମ୍ବଲପୁର, ନଭେମ୍ବର ୧୧ (ଲୋକାଲ ୱାୟାର): ସମ୍ବଲପୁରସ୍ଥିତ ବୀର ସୁରେନ୍ଦ୍ର ସାଏ ଷ୍ଟାଡିମୟର ଦର୍ଶକ କ୍ଷମତା ୨୧ ହଜାରକୁ ବୃଦ୍ଧି କରାଯିବ ବୋଲି ଜଣେ ବରିଷ୍ଠ ଅଧିକାରୀ ସୋମବାର ସୂଚନା ଦେଇଛନ୍ତି । ଏହି ଷ୍ଟାଡିୟମର ଦଶକ କ୍ଷମତା ଏବେ ୧୭ ହଜାର ରହିଛି ।

ଏକ ନୂତନ ଗ୍ୟାଲେରୀ ନିର୍ମାଣ ପାଇଁ ଡିଜାଇନ ପ୍ରସ୍ତୁତ ସରିଛି, ଯେଉଁଠାରେ କି ୪ ହଜାର ଦର୍ଶକ ବସିବାର ସୁବିଧା ରହିବ । ଉଲ୍ଲେଖଯୋଗ୍ୟ, ଗତ ଫେବ୍ରୁଆରୀ ମାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଷ୍ଟାଡିୟମର ବିକାଶ ପାଇଁ ୩ କୋଟି ଟଙ୍କା ମଂଜୁର କରିଥିଲେ ।

ଏହି ଅର୍ଥରେ ଷ୍ଟାଡିମୟରେ ନୂତନ ଦର୍ଶକ ଗ୍ୟାଲେରୀ ସହିତ ଶହେ ଶଯ୍ୟା ବିଶିଷ୍ଟ ଏକ ଡର୍ମିଟୋରୀ ନିର୍ମାଣ କରାଯିବ ବୋଲି କହିଛନ୍ତି ସମ୍ବଲପୁର ଜିଲ୍ଲା କ୍ରୀଡ଼ା ସଂଘର ସମ୍ପାଦକ ଦୁଲାଲ ଚନ୍ଦ୍ର ପ୍ରଧାନ ।

ନୂତନ ନିର୍ମାଣ କାମର ଦାୟିତ୍ୱ ପୂର୍ତ୍ତ ବିଭାଗକୁ ଦିଆଯାଇଛି । ଆସନ୍ତା ମାସ ପ୍ରେସ୍ ରୁମ ଓ ପାଭିଲିୟନର ମଧ୍ୟ ନବୀକରଣ କରାଯିବ ।

ଆସନ୍ତା ମାସ ସୁଦ୍ଧା ଏସବୁ ନିର୍ମାଣ କାମ ଆରମ୍ଭ ହେବ ଏବଂ ୬ ମାସ ମଧ୍ୟରେ ଶେଷ କରାଯିବାର ଯୋଜନା ରହିଛି । ଏଥିସହ ଷ୍ଟାଡିୟମରେ ଯେପରି ଦିବାରାତ୍ର ମ୍ୟାଚ ହୋଇପାରିବ ତାହାର ମଧ୍ୟ ଶୀଘ୍ର ବ୍ୟବସ୍ଥା କରାଯିବ ବୋଲି ଶ୍ରୀ ପ୍ରଧାନ କହିଛନ୍ତି ।

ଲୋକାଲ ୱାୟାର