ସମ୍ବଲପୁର

ସମ୍ବଲପୁର, ଜାନୁଆରୀ ୪ (ଲୋକାଲ ୱାୟାର) : ବିଶ୍ୱବିଦ୍ୟାଳୟରେ ଅଧ୍ୟୟନରତ ପ୍ରତି ଛାତ୍ରଛାତ୍ରୀ ଅନ୍ତତଃ ୩ ଟି ଜିନିଷ ନିହାତି ଭାବେ କିଣିବା ଦରକାର । ଗୋଟିଏ ପାଠ୍ୟ ପୁସ୍ତକ, ଦ୍ୱିତୀୟରେ ଶଦ୍ଦକୋଷ ଓ ତୃତୀୟଟି ଏକ ଭଏସ୍ ରେକର୍ଡର ବୋଲି ଭାରତୀୟ ନୃତତ୍ୱ ସର୍ବେକ୍ଷଣର ନିର୍ଦେଶକ ପ୍ରଫେସର ବିନୟ କୁମାର ଶ୍ରୀବାସ୍ତବ ଗୁରୁବାର ସମ୍ବଲପୁର ବିଶ୍ୱବିଦ୍ୟାଳୟର ୫୨ ତମ ପ୍ରତିଷ୍ଠା ଦିବସରେ ମୁଖ୍ୟ ଅତିଥି ଭାବେ ଯୋଗଦେଇ କହିଛନ୍ତି ।

ସମ୍ମାନିତ ଅତିଥି ଭାବେ ଆଇଆଇଏମ୍ ସମ୍ବଲପୁରର ନିର୍ଦ୍ଦେଶକ ମହାଦେବ ଜୟଶ୍ୱାଲ ଯୋଗଦେଇଥିଲେ ।

ଏହି ଅବସରରେ ପଦ୍ମଶ୍ରୀ ଡ.ଚନ୍ଦ୍ରଶେଖର କମ୍ବାରାଙ୍କୁ ଗଙ୍ଗାଧର ଜାତୀୟ ସମ୍ମାନ ପ୍ରଦାନ କରାଯାଇଥିଲା । ୨୦୧୮ ବର୍ଷ ପାଇଁ ଶ୍ରେଷ୍ଠ ଖେଳାଳି ଭାବେ ଆଶିଷ ପାତ୍ରଙ୍କୁ ସ୍ୱର୍ଗତ ହାଡ଼ିବନ୍ଧୁ ସ୍ମୃତି ସମ୍ମାନ ପ୍ରଦାନ କରାଯାଇଥିଲା ।

ବିଶ୍ୱବିଦ୍ୟାଳୟ କୁଳପତି ପ୍ରଫେସର ଦୀପକ କୁମାର ବେହେରା ଉତ୍ସବରେ ଅଧ୍ୟକ୍ଷତା କରି ସ୍ୱାଗତ ଭାଷଣ ଦେବା ସହ ଶେଷରେ ପି.ଜି କାଉନସିଲ ଅଧ୍ୟକ୍ଷ ପ୍ରଫେସର ଏ.କେ. ଦାଶ ଧନ୍ୟବାଦ ଦେଇଥିଲେ ।

ଲୋକାଲ ୱାୟାର

ସମ୍ବଲପୁର, ଜାନୁଆରୀ ୩ (ଲୋକାଲ ୱାୟାର) : ସମ୍ବଲପୁର ସହରର ଗୋଇରା ମଠ ନିକଟରୁ ଗୁରୁବାର ସକାଳେ ମିଳିଥିବା କ୍ଷତ ବିକ୍ଷତ ମରଶରୀର ଜିଲ୍ଲାର ଜଣେ ଜଣାଶୁଣା ଆଲବମ ଅଭିନେତ୍ରୀଙ୍କର ବୋଲି ପୁଲିସ କହିଛି । ମୃତକ ସୀମରନ ସିଂ ଅନେକ ସମ୍ବଲପୁରୀ ଆଲବମରେ ଅଭିନୟ କରିଛନ୍ତି ।

ସ୍ଥାନୀୟ ଲୋକମାନେ ସକାଳେ ଏକ ଯୁବତୀର କ୍ଷତ ବିକ୍ଷତ ମରଶରୀର ମହାନଦୀ ପୋଲ ତଳେ ପଡିଥିବାର ଦେଖି ପୁଲିସକୁ ଖବର ଦେଇଥିଲେ ।

ପୁଲିସ ଘଟଣା ସ୍ଥଳରେ ପହଞ୍ଚି ଶବକୁ ବ୍ୟବଚ୍ଛେଦ ପାଇଁ ପଠାଇବା ସହିତ ପାଖରେ ପଡିଥିବା ଏକ ଚମଡା ବ୍ୟାଗକୁ ଜବତ କରି ତଦନ୍ତ ଆରମ୍ଭ କରିଛି ।

ମୃତ୍ୟୁର କାରଣ ସ୍ପଷ୍ଟ ହୋଇନଥିଲେ ମଧ୍ୟ ଏହା ଏକ ହତ୍ୟା ବୋଲି ପୁଲିସ ସନ୍ଦେହ କରୁଛି ।

ସୀମରନ ନିକଟରେ ବଲାଙ୍ଗୀରର ଜଣେ ଯୁବକଙ୍କୁ ପ୍ରେମ ବିବାହ କରିଥିଲେ । ତାଙ୍କ ମା ଉକ୍ତ ଯୁବକଙ୍କ ବିରୋଧରେ ପୁଲିସ ନିକଟରେ ସୀମରନର ହତ୍ୟା ଅଭିଯୋଗ କରିଛନ୍ତି ।

ଲୋକାଲ ୱାୟାର

ସମ୍ବଲପୁର, ଜାନୁଆରୀ ୩ (ଲୋକାଲ ୱାୟାର) : ଜିଲ୍ଲାରେ କାଳିଆ ଯୋଜନା ହିତାଧିକାରୀ ଚିହ୍ନଟ ପକ୍ରିୟା ଆରମ୍ଭ ହୋଇଥିବା ଜିଲ୍ଲା କୃଷି ଅଧିକାରୀ (ଡିଡିଏ) ଖଗେନ୍ଦ୍ରନାଥ ଜେନା ଗୁରୁବାର କହିଛନ୍ତି ।

ସେ କହିଛନ୍ତି ଯେ, ବୁଧବାର ଠାରୁ ବ୍ଲକ ଗୁଡିକରେ ଫର୍ମ ପୂରଣ ପକ୍ରିୟା ଆରମ୍ଭ ହୋଇଛି । ସବୁଜ ଏବଂ ଲାଲ ବାକ୍ସ ରଖାଯାଇଛି । ପ୍ରଥମ ଦିନ ଆବେଦନପତ୍ର ପୂରଣ କରିବା ପାଇଁ ଏତେ ଆବେଦନକାରୀ ଆସିନଥିବା ବେଳେ ଆଜି ଆବେଦନକାରୀଙ୍କ ଭିଡ଼ ଜମିବାର ଆଶା କରାଯାଉଛି ।

କାଳିଆ ଯୋଜନାରେ ଲୋକଙ୍କୁ ସାମିଲ କରିବା ପାଇଁ ସଚେତନତା କାର୍ଯ୍ୟକ୍ରମ ଆୟୋଜିତ କରାଯାଉଛି । କ୍ଷୁଦ୍ର ଏବଂ ନାମମାତ୍ର ଭାଗଚାଷୀଙ୍କୁ ଆବେଦନପତ୍ର ପୂରଣ ପାଇଁ ସଚେତନ କରାଯାଉଛି ।

ଚାକିରିଆ ଏବଂ ପେନସନଭୋଗୀ କାଳିଆ ଏକ୍ସକ୍ଲୁସନ ତାଲିକା ଘୋଷଣା କରିନଥିଲେ ସମସ୍ୟାର ସମ୍ମୁଖୀନ ହୋଇ ପାରନ୍ତି । ବଡ଼ଚାଷୀଙ୍କୁ ବାଦ ଦେବା ପାଇଁ ସରକାରଙ୍କ ପାଖରେ ବର୍ତ୍ତମାନ ପର୍ଯ୍ୟନ୍ତ କୌଣସି ଚିହ୍ନଟ ପକ୍ରିୟା ନାହିଁ । ପ୍ରକୃତ ହିତାଧିକାରୀଙ୍କୁ ଏହି ଯୋଜନାରେ ଲାଭ ଦେବା ସରକାରଙ୍କ ମୁଖ୍ୟ ଲକ୍ଷ୍ୟ ଅଟେ ।

ଲୋକାଲ ୱାୟାର

ସମ୍ବଲପୁର, ଜାନୁଆରୀ ୩ (ଲୋକାଲ ୱାୟାର) : ଭିମସାରରେ କାର୍ଯ୍ୟରତ ଡାକ୍ତରଙ୍କୁ ଓପିଡିରେ ଡ୍ୟୁଟି ସମୟରେ ମେଡିକାଲ ରେପ୍ରେଜେଣ୍ଟେଟିଭ ମାନେ ଏଣିକି ଦେଖା କରିପାରିବେନି ବୋଲି ଜଣେ ବରିଷ୍ଠ ଅଧିକାରୀ ଗୁରୁବାର କହିଛନ୍ତି ।

ଭିମସାର ଅଧିକ୍ଷକଙ୍କ କାର୍ଯ୍ୟାଳୟ ତରଫରୁ ଏନେଇ ଏକ ବିଜ୍ଞପ୍ତି ପ୍ରକାଶ କରାଯାଇଛି । ବିଭାଗୀୟ ମୁଖ୍ୟ, ମେଡିକାଲ ଅଧୀକ୍ଷକ ଓ ନିର୍ଦ୍ଦେଶକଙ୍କୁ ଏହି ଚିଠିର ନକଲ ମଧ୍ୟ ପ୍ରଦାନ କରାଯାଇଛି । ବିଜ୍ଞପ୍ତି ଅନୁସାରେ ଯଦି ଏହି ନିର୍ଦ୍ଦେଶ ଉଲ୍ଲଂଘନ ହୁଏ ତେବେ ସମ୍ପୃକ୍ତ ବିଭାଗର ମୁଖ୍ୟ ଏଥିପାଇଁ ଦାୟୀ ରହିବେ ।

ସୂଚନା ମୁତାବିକ, ଏନେଇ ପୂର୍ବରୁ ମଧ୍ୟ ସରକାରଙ୍କ ନିର୍ଦ୍ଦେଶ ରହିଥିବା ସତ୍ତ୍ୱେ ବୁର୍ଲା ମେଡିକାଲରେ କିଛି ଦିନ ହେଲା ଏହାର ଖୋଲାଖୋଲି ଉଲ୍ଲଂଘନ କରାଯାଉଥିବା ଅଭିଯୋଗ ହୋଇଥିଲା ।

ଓପିଡିରେ ରୋଗୀଙ୍କ ଭିଡ଼ ଥିବା ସମୟରେ କିଛି ଏମଆର୍ ଡାକ୍ତରଙ୍କ ସମ୍ମୁଖରେ ବସି ଚିକିତ୍ସାରେ ବାଧକ ସାଜୁଥିଲେ । ଏହାବାଦ୍ ରୋଗୀ ଲାଇନରେ ଛିଡ଼ା ହୋଇଥିବା ସତ୍ତ୍ୱେ କିଛି ଡାକ୍ତର ମଧ୍ୟ ଏମଆରଙ୍କ ସହ ବ୍ୟସ୍ତ ରହୁଥିଲେ ।

ଏହି ଘଟଣାଗୁଡିକର ଅଭିଯୋଗ ପରେ ଏପରି ନିଷ୍ପତ୍ତି ନିଆଯାଇଥିବା ସୂଚିତ କରାଯାଇଛି ।

ସମ୍ବଲପୁର, ଜାନୁଆରୀ ୨ (ଲୋକାଲ ୱାୟାର) : ଭିନ୍ନକ୍ଷମ ବିଦ୍ୟାର୍ଥୀଙ୍କ ଯାତାୟାତରେ ସୁବିଧା ପାଇଁ ଜି ଏମ ବିଶ୍ୱବିଦ୍ୟାଳୟରେ ରେମ୍ପ କରାଯିବ ବୋଲି ଜଣେ ବରିଷ୍ଠ ଅଧିକାରୀ ବୁଧବାର କହିଛନ୍ତି।

ଏଥିପାଇଁ କେନ୍ଦ୍ରୀୟ ପୂର୍ତ୍ତ ବିଭାଗ ପକ୍ଷରୁ ଡିଜାଇନ ପ୍ରସ୍ତୁତ କରାଯାଇଛି ବୋଲି ବିଶ୍ୱବିଦ୍ୟାଳୟର ଉପକୁଳସଚିବ ଉମାଚରଣ ପତି କହିଛନ୍ତି । ଏଲଜି-୧ ସାମ୍ନାରେ ଏହି ରେମ୍ପ ତିଆରି କରାଯିବ ।

ବର୍ତ୍ତମାନ ସମୟରେ ଅଧିକରୁ ଅଧିକ ଦିବ୍ୟାଙ୍ଗ ବିଦ୍ୟାର୍ଥୀ ପଢିବାକୁ ଆଗ୍ରହ ପ୍ରକାଶ କରୁଛନ୍ତି ଓ ଆସୁଛନ୍ତି । ସେମାନେ ଉପର ମହଲାରେ ଥିବା ବିଭାଗ ଗୁଡିକୁ ଅଧ୍ୟୟନ ପାଇଁ ଯିବାରେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ।

ସେମାନଙ୍କୁ ଛାଡିବା ପାଇଁ ଆସୁଥିବା ଅଭିଭାବକ ମାନେ ମଧ୍ୟ ସେମାନଙ୍କୁ ଟେକି କରି ନେଇ ଛାଡିବାରେ ବହୁ ହଇରାଣ ହେଉଛନ୍ତି ।

ତେଣୁ, ସେମାନଙ୍କ ପଢିବା କିଭଳି ସହଜ ହୋଇପାରିବ ସେଥିପାଇଁ ଆବଶ୍ୟକୀୟ ସୁବିଧା ଯୋଗାଇ ଦେବା ପାଇଁ ସମସ୍ତେ ଯତ୍ନବାନ ହେବ। ଉଚିତ ବୋଲି ଉପକୁଳସଚିବ କହିଛନ୍ତି ।

ସମ୍ବଲପୁର, ଡିସେମ୍ବର ୩୦ (ଲୋକାଲ ୱାୟର) ଛତିଶଗଡ଼ରେ ନବଗଠିତ କଂଗ୍ରେସ ସରକାରର ଜଣେ ମନ୍ତ୍ରୀ ମହାନଦୀର ଆରମ୍ଭରୁ ଶେଷ ପର୍ଯ୍ୟନ୍ତ ତାଙ୍କ ରାଜ୍ୟର ସମ୍ପୂର୍ଣ୍ଣ ହକ୍ ବୋଲି କହିବା ପରେ ପୁଣି ଥରେ ମହାନଦୀ ବିବାଦ ଚର୍ଚ୍ଚାର ପରିସରକୁ ଆସିଛି ।

ଛତିଶଗଡ଼ର କୃଷି ଓ ଜଳସମ୍ପଦ ମନ୍ତ୍ରୀ ରବୀନ୍ଦ୍ର ଚୌବେ କହିଛନ୍ତି, ମହାନଦୀର ଉତ୍ପତ୍ତି ସ୍ଥଳରୁ ଶେଷ ମୁଣ୍ଡ ଯାଏ ତାଙ୍କ ରାଜ୍ୟର ଅଧିକାର ରହିଛି । ତାଙ୍କର ଏହି ମନ୍ତବ୍ୟରୁ ହିଁ ଛତିଶଗଡ଼ ସରକାରଙ୍କ ଆଭିମୁଖ୍ୟ ପୁଣି ଥରେ ସ୍ପଷ୍ଟ ହୋଇଛି । ରାଜ୍ୟରେ ବିଜେପି ସରକାର କ୍ଷମତାରୁ ଯିବା ପରେ ଏବେ କଂଗ୍ରେସ ଦାୟିତ୍ୱ ନେଇଛି । ତେଣୁ ଉଭୟ ରାଜ୍ୟ ମଧ୍ୟରେ ବିବାଦ ସମାଧାନ ଆଡ଼କୁ ଯିବ ବୋଲି ଧାରଣା ହୋଇଥିଲା ।

ଉଲ୍ଲେଖଯୋଗ୍ୟ, ଛତିଶଗଡ଼ରେ ନୂଆ ସରକାର ଗଠନ ପରେ ଓଡ଼ିଶା ପିସିସି ମୁଖ୍ୟ ନିରଞ୍ଜନ ପଟ୍ଟନାୟକ ଛତିଶଗଡ଼ ଗସ୍ତରେ ଯାଇଥିଲେ । ସେଠାରୁ ସେ ଫେରି ଶୀଘ୍ର ଦୁଇ ରାଜ୍ୟ ମଧ୍ୟରେ ମହାନଦୀ ବିବାଦର ସମାଧାନ ହୋଇଯିବ ବୋଲି ରାଜ୍ୟବାସୀଙ୍କୁ ନିର୍ଭର ପ୍ରତିଶ୍ରୁତି ଦେଇଥିଲେ । କିନ୍ତୁ ଏବେ ସେହି ଆଶା ପୁଣି ମଉଳି ଯାଇଛି ଏବଂ ଓଡ଼ିଶା ସରକାର ଟ୍ରିବ୍ୟୁନାଲର ରାୟକୁ ହିଁ ଆଶ୍ରା କରିବେ ।

ସ୍ମରଣଯୋଗ୍ୟ, ୨୦୧୬ ଜୁନରେ ସୃଷ୍ଟି ହୋଇଥିଲା ମହାନଦୀ ବିବାଦ । ମହାନଦୀ ଉପରେ ତତକାଳୀନ ରମଣ ସରକାର ନିର୍ମାଣ କରିଥିବା ୬ଟି ବ୍ୟାରେଜ୍ ସମେତ ମହାନଦୀର ଶାଖାରେ ନିର୍ମାଣ ହେଉଥିବା ପ୍ରକଳ୍ପ ଉପରେ ଓଡ଼ିଶା ଆପର୍ତ୍ତି ଉଠାଇଥିଲା । ଓଡ଼ିଶା ସରକାର ସୁପ୍ରିମକୋର୍ଟରେ ଆବେଦନ କରିବା ପରେ ଟ୍ରିବ୍ୟୁନାଲ ଗଠନ ହୋଇ ଏହାର ଶୁଣାଣି ଚାଲିଛି ।

ଲୋକାଲ ୱାୟର

ସମ୍ବଲପୁର, ଡିସେମ୍ବର ୩୦ (ଲୋକାଲ ୱାୟାର) : ସମ୍ବଲପୁର ସହରରେ ଖୁବଶୀଘ୍ର ଏକ ଇକୋ-ପାର୍କ ନିର୍ମାଣ କରାଯିବ ବୋଲି ଜିଲ୍ଲାପାଳ ସମର୍ଥ ବର୍ମା ରବିବାର କହିଛନ୍ତି ।

ସମ୍ବଲପୁର ମହାନଗର ନିଗମ ଓ ବନ ବିଭାଗର ମିଳିତ ସହଭାଗିତାରେ ସହରର କୁଳୁଥକାନି ଅଞ୍ଚଳରେ ଏହି ପାର୍କ ନିର୍ମାଣ ହେବ । ଏଥିପାଇଁ ପ୍ରାୟ ୭ ଏକର ଜମି ଚିହ୍ନଟ ହୋଇଛି ।

ସମ୍ବଲପୁର ଉପଖଣ୍ଡ ବନ ଅଧିକାରୀ ଡାକ୍ତର ସଞ୍ଜୀତ କୁମାର କୁହନ୍ତି , ଏହି ପ୍ରକଳ୍ପ ନେଇ ଏକ ପ୍ରାରମ୍ଭିକ ରିପୋର୍ଟ ପ୍ରସ୍ତୁତ କରାଯାଇଛି । ତଦନୁସାରେ, ଉକ୍ତ ପ୍ରକଳ୍ପ ପାଇଁ ଚିହ୍ନଟ ଜମିରେ ବୃକ୍ଷ କଟାନଯାଇ ପାର୍କ ନିର୍ମାଣ ହେବ ।
ଏହା ସହିତ ନୂତନ ଔଷଧୀୟ ବୃକ୍ଷ ରୋପଣ କରାଯିବ ।

ହେଲେ ଏହି ପ୍ରକଳ୍ପ ପାଇଁ କେତେ ତାଙ୍କ ଖର୍ଚ୍ଚହେବ ବ୍ୟୟ ବରାଦ ହୋଇନାହିଁ । ଅନ୍ତିମ ପ୍ରକଳ୍ପ ରିପୋର୍ଟ ପ୍ରସ୍ତୁତ ହେଲେ ବ୍ୟୟ ବରାଦ କରାଯିବ ବୋଲି ସେ କହିଛନ୍ତି ।

ଲୋକାଲ ୱାୟାର

ସମ୍ବଲପୁର, ଡିସେମ୍ବର ୩୦(ଲୋକାଲ ୱାୟର) ଫାଇନାଲ ବିଲ୍ କରାଇ ଦେବାକୁ ଜଣେ ଠିକାଦାରଙ୍କ ଠାରୁ ୨୧ ହଜାର ଟଙ୍କା ଲାଞ୍ଚ ନେଉଥିବା ବେଳେ ଶନିବାର ସନ୍ଧ୍ୟାରେ ଦେବଗଡ଼ କ୍ଷୁଦ୍ର ଜଳସେଚନ ବିଭାଗ ନିର୍ବାହୀ ଯନ୍ତ୍ରୀ ଇଂ. ରବିନ୍ଦ୍ର ମେହତୋ ଭିଜିଲାନ୍ସ ଅଧିକାରୀମାନଙ୍କ ହାତରେ ପଡ଼ିଛନ୍ତି ।

ପୁରୁଣାଗଡ଼ ନିବାସୀ ଦିଲ୍ଲୀପ କୁମାର (୩୬) ଦେବଗଡ଼ କ୍ଷୁଦ୍ର ଜଳସେଚନ ଡିଭିଜନରୁ ୭୨,୪୪,୮୫୭ ଟଙ୍କାର ଏକ କୋଠା କାମର ଠିକା ନେଇ ନିର୍ମାଣ କରିଥିଲେ । ଏହାର ଫାଇନାଲ ବିଲ୍ ପାଇଁ ସେ ଦୌଡ଼ୁ ଥିବା ବେଳେ ନିର୍ବାହୀ ଯନ୍ତ୍ରୀ ଲାଞ୍ଚ ମାଗିଥିଲେ । ଏଥିପାଇଁ ଶ୍ରୀ ପାଢ଼ୀ ସମ୍ବଲପୁର ଭିଜିଲାନ୍ସ ଏସପିଙ୍କ ଦ୍ୱାରସ୍ଥ ହୋଇଥିଲେ ।

ଭିଜିଲାନ୍ସ ଡିଏସପି ପରମେଶ୍ୱର କିସାନ, ଡିଏସପି ଦିଲ୍ଲୀପ କର ଓ ଡିଏସପି ଦାଶରଥୀ ସେଠୀ ପ୍ରମୁଖଙ୍କୁ ନେଇ ଗଠିତ ସ୍କ୍ୱାଡ୍ ଚଢ଼ାଉ କରି ଶ୍ରୀ ମେହତୋ ଲାଞ୍ଚ ନେଉଥିବା ବେଳେ ତାଙ୍କୁ ଧରିବା ସହ ଲାଞ୍ଚ ଟଙ୍କା ଜବତ କରିଛନ୍ତି । ଭିଜିଲାନ୍ସ ସ୍କ୍ୱାଡ୍ ଶ୍ରୀ ମେହତୋଙ୍କ ସରକାରୀ ବାସଭବନରେ ଚଢ଼ଉ କରିଛନ୍ତି ।

ଲୋକାଲ ୱାୟର