ସୁନ୍ଦରଗଡ

ଭୁବନେଶ୍ୱର, ମାର୍ଚ୍ଚ ୨୧ (ଲୋକାଲ ୱାୟାର) : ଆଇଏଏସ ବିଷ୍ଣୁପଦ ସେଠୀ ସ୍ୱତନ୍ତ୍ର ରିଲିଫ କମିଶନର ଥିବାବେଳେ ବହୁ ପ୍ରାକୃତିକ ବିବିପର୍ଯ୍ୟୟକୁ ସଫଳତାର ସହ ପରିଚାଳନା କରିଥିବାରୁ ରବିବାର ରାଉରକେଲା ଏନ୍ଆଇଟିର ସମାବର୍ତ୍ତନ ସମାରୋହରେ ରାଜ୍ୟପାଳ ତାଙ୍କୁ ସମ୍ମାନିତ କରିଛନ୍ତି।

ଏହି ଅବସରରେ ମଞ୍ଚରେ ରାଷ୍ଟ୍ରପତି ରାମନାଥ କୋବିନ୍ଦ ଉପସ୍ଥିତ ଥିଲେ।

ଶ୍ରୀ ସେଠୀ ରାଉରକେଲା ଏନ୍ଆଇଟିର ପୂର୍ବତନ ଛାତ୍ର ଭାବେ ଏହି ସମ୍ମାନ ପାଇଛନ୍ତି । ସେ ଏନ୍ଆଇଟିରେ ୧୯୮୯ରେ ମେକାନିକାଲ ଇଞ୍ଜିନିୟରିଂ ଗ୍ରାଜୁଏଟ୍ ହୋଇଥିଲେ ।

ଲୋକାଲ ୱାୟାର

ରାଉରକେଲା, ଫେବ୍ରୁଆରୀ ୧୬(ଲୋକାଲ ୱାୟାର): ଶ୍ରୀପଞ୍ଚମୀରେ ପବିତ୍ର ତିଥିରେ ୨୦୨୩ ପୁରୁଷ ବିଶ୍ୱକପ୍ ହକି ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ପ୍ରସ୍ତୁତିର ଶୁଭାରମ୍ଭ କରିଛନ୍ତି ।

ଆଜି ଦିନିକିଆ ସୁନ୍ଦରଗଡ଼ ଗସ୍ତରେ ଆସି ମୁଖ୍ୟମନ୍ତ୍ରୀ ଜିଲ୍ଲା ପାଇଁ ୫ ହଜାର କୋଟି ଟଙ୍କାର ବିଭିନ୍ନ ପ୍ରକଳ୍ପର ଶୁଭାରମ୍ଭ କରିଛନ୍ତି । ରାଉରକେଲାଠାରେ ୨୦୨୩ ପୁରୁଷ ହକି ବିଶ୍ୱକପ୍ ଆୟୋଜନକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ଅନ୍ତର୍ଜାତୀୟ ମାନର ଷ୍ଟାଡିୟମର ଶିଳାନ୍ୟାସ କରିଛନ୍ତି ।

ଏହି ନୂତନ ଷ୍ଟାଡିୟମ ବିିଶିଷ୍ଟ ସଂଗ୍ରାମୀ ବିର୍ସା ମୁଣ୍ଡାଙ୍କ ନାମରେ ନାମିତ କରାଗଲା ବୋଲି ମୁଖ୍ୟମନ୍ତ୍ରୀ ଘୋଷଣା କରିଥିଲେ । ଏହି ଷ୍ଟାଡିୟମ ଦେଶର ସବୁଠାରୁ ବଡ଼ ହକି ଷ୍ଟାଡିୟମ ହେବ ।

ଏହା ଯୁବ ସମାଜ ମଧ୍ୟରେ ପ୍ରେରଣା ସୃଷ୍ଟି କରିବା ସହିତ ବଡ଼ ବଡ଼ ସ୍ୱପ୍ନ ଦେଖିବା ଓ ବଡ଼ ବଡ଼ କାମ କରିବା ପାଇଁ ଉତ୍ସାହ ସୃଷ୍ଟି କରିବ ବୋଲି ମୁଖ୍ୟମନ୍ତ୍ରୀ କହିଥିଲେ ।

ରାଉରକେଲା ସହିତ ବିଜୁବାବୁଙ୍କର ସମ୍ପର୍କ ବିଷୟ ସ୍ମରଣ କରି ମୁଖ୍ୟମନ୍ତ୍ରୀ କହିଥିଲେ ଯେ ରାଉରକେଲାରେ ଷ୍ଟିଲ ପ୍ଲାଣ୍ଟ ଠାରୁ ଆରମ୍ଭ କରି ଏନଆଇଟି ପର୍ଯ୍ୟନ୍ତ ସବୁଥିରେ ବିଜୁବାବୁଙ୍କ ସ୍ମୃତି ଭରି ରହିଛି ।

ରାଉରକେଲାକୁ ଆଶାର ସହର- ସିଟି ଅଫ ହୋପ୍ ଭାବେରେ ବର୍ଣ୍ଣନା କରି ମୁଖ୍ୟମନ୍ତ୍ରୀ କହିଥିଲେ, କେବଳ ଓଡ଼ିଶା ନୁହେଁ, ଆଖପାଖ ରାଜ୍ୟର ଲୋକମାନେ ମଧ୍ୟ ଜୀବିକା ପାଇଁ ରାଉରକେଲାକୁ ଆସିଥାନ୍ତି ।

ସୁନ୍ଦରଗଡ଼ ଜିଲ୍ଲାର ମିଶନ ଶକ୍ତିର ମା’ ମାନଙ୍କୁ ସେମାନଙ୍କର ବିକାଶ କାମରେ ସହଯୋଗ ପାଇଁ ମୁଖ୍ୟମନ୍ତ୍ରୀ ଧନ୍ୟବାଦ ଜଣାଇବା ସହ ବାଲିଶଙ୍କରାର ଜୟନ୍ତୀ ଏକ୍କା କିପରି ଭୁବନେଶ୍ୱରର ମେକ୍ ଇନ ଓଡ଼ିଶା କନକ୍ଲେଭରେ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ, ସେ ବିଷୟ ବର୍ଣ୍ଣନା କରି ମୁଖ୍ୟମନ୍ତ୍ରୀ ଜୟନ୍ତୀଙ୍କ ନେତୃତ୍ୱର ଉଚ୍ଚ ପ୍ରଶଂସା କରିଥିଲେ ।

ଜନଜାତିର ପିଲାମାନଙ୍କ ଶିକ୍ଷା ସୁବିଧା ସହିତ ଜନଜାତି ସଂସ୍କୃତିର ସୁରକ୍ଷା ପାଇଁ ନିଆଯାଇଥିବା ପଦକ୍ଷେପ ସମ୍ପର୍କରେ ମୁଖ୍ୟମନ୍ତ୍ରୀ ଆଲୋଚନା କରିବା ସହ ମୁଣ୍ଡାରି ଓ ହୋ ଭାଷାକୁ ସମ୍ବିଧାନର ଅଷ୍ଟମ ପରିଚ୍ଛେଦରେ ଅନ୍ତର୍ଭୁକ୍ତ କରିବା ପାଇଁ କେନ୍ଦ୍ର ସରକାରଙ୍କ ନିକଟରେ ପୁଣି ଥରେ ଦାବି ଜଣାଇଥିଲେ ।

ମୁଖ୍ୟମନ୍ତ୍ରୀ କହିଥିଲେ ଯେ ୨୦୦୦ ମସିହାରେ ରାଜ୍ୟର ଯୋଜନା ବଜେଟ ମାତ୍ର ୨୮୦୦ କୋଟି ଟଙ୍କା ଥିବା ବେଳେ, ଆଜି ସୁନ୍ଦରଗଡ଼ ଜିଲ୍ଲା ପାଇଁ ପାଞ୍ଚ ହଜାର କୋଟି ଟଙ୍କାର ପ୍ରକଳ୍ପ ଆରମ୍ଭ କରାଯାଇଛି ।

ଏହାକୁ ମୁଖ୍ୟମନ୍ତ୍ରୀ ରୂପାନ୍ତରର ନମୁନା ତଥା ବିକାଶର ନମୁନା ଭାବରେ ବର୍ଣ୍ଣନା କରିବା ସହିତ ବିକାଶର ଏହି ଧାରାକୁ ଜାରି ରଖିବା ପାଇଁ ସମସ୍ତଙ୍କ ସହଯୋଗ କାମନା କରିଥିଲେ ।

କାର୍ଯ୍ୟକ୍ରମରେ ବହୁ ମନ୍ତ୍ରୀ, ସାଂସଦ ଓ ବିଧାୟକ ସାମିଲ ହୋଇଥିବା ବେଳେ ବିଶିଷ୍ଟ ହକି ତାରକା ଦିଲ୍ଲୀପ ତିର୍କୀ ଧନ୍ୟବାଦ ଦେଇଥିଲେ ।

ଲୋକାଲ ୱାୟାର

ରାଉରକେଲା, ଜାନୁଆରୀ ୬(ଲୋକାଲ ୱାୟାର): ରାଉରକେଲା ଇସ୍ପାତ କାରଖାନା (ଆରଏସପି)ର କୋଲ୍ କେମିକାଲ ବିଭାଗରେ ବୁଧବାର ପୂର୍ବାହ୍ନରେ ବିଷାକ୍ତ ଗ୍ୟାସ ସଂସ୍ପର୍ଶରେ ୪ ଜଣ ଠିକା ଶ୍ରମିକଙ୍କ ମୃତ୍ଯୁ ଘଟିବା ପରେ ଏହାର ଉଚ୍ଚସ୍ତରୀୟ ତଦନ୍ତ ପାଇଁ କର୍ତ୍ତୃପକ୍ଷ ନିର୍ଦ୍ଦେଶ ଦେଇଛନ୍ତି ।

ପ୍ରାଣ ହରାଇଥିବା ୪ ଜଣ ଶ୍ରମିକ ହେଲେ ବ୍ରହ୍ମାନନ୍ଦ ପଣ୍ଡା (୫୧), ଅଭିମନୁ୍ୟ ସା (୩୩), ରବିନ୍ଦ୍ର ସାହୁ (୫୯) ଏବଂ ଗଣେଶ ଚନ୍ଦ୍ର ପାହିଲ (୫୫) ।

ଗୁରୁତର ଅବସ୍ଥାରେ ସେମାନଙ୍କୁ ଇସ୍ପାତ ଜେନେରାଲ ହସପିଟାଲ ନିଆଯାଇଥିବା ବେଳେ ସେଠାରେ ଡାକ୍ତ ମୃତ ଘୋଷଣା କରିଥିଲେ ।

ଏହି ଘଟଣାରେ ଆରଏସପି କର୍ତ୍ତୃପକ୍ଷ କର୍ତ୍ତବ୍ୟରେ ଅବହେଳା ପାଇଁ ଏନର୍ଜି ମ୍ୟାନେଜମେଣ୍ଟ ବିଭାଗର ଡିଜିଏମ୍ ଜି. ବାରିକ ଏବଂ ସିସିଡିର ଡିଜିଏମ୍ ଏନ୍.ଦାସଙ୍କୁ ନିଲମ୍ବନ କରିଛନ୍ତି ।

ଦୁର୍ଘଟଣା କାହିଁକି ଓ କିପରି ହେଲା ତାହାର ଯାଞ୍ଚ ଲାଗି ମ୍ୟାଟେରିଆଲ ମ୍ୟାନେଜମେଣ୍ଟର ସିଜିଏମ୍(ଇନଚାର୍ଜ) ସି.ଆର.ମହାପାତ୍ର, ପ୍ରୋଜେକ୍ଟ ବିଭାଗର ସିଜିଏମ୍ ଏସ୍.କେ.ବେହେରା ଓ ସିଜିଏମ୍ ଏ.ଭି. ରାଜଜ ଶେଖରଙ୍କୁ ନେଇ ଏକ ଉଚ୍ଚସ୍ତରୀୟ କମିଟି ଗଠନ କରାଯାଇଛି ।

ତେବେ ପ୍ରତି ମୃତକଙ୍କ ପରିବାରର ଜଣକୁ କାରଖାନାରେ ସ୍ଥାୟୀ ଚାକିରି, ଠିକା ସଂସ୍ଥା ପକ୍ଷରୁ ଅଢ଼େଇ ଲକ୍ଷ ଟଙ୍କା ଲେଖାଏଁ ଏବଂ ଶବ ସକ୍ରାର ଲାଗି ୧୦ ହଜାର ଟଙ୍କା ଲେଖାଏଁ ପ୍ରଦାନ କରାଯିବ ବୋଲି କର୍ତ୍ତୃପକ୍ଷ ଘୋଷଣା କରିଛନ୍ତି ।

ଲୋକାଲ ୱାୟାର

ସୁନ୍ଦରଗଡ଼, ଜାନୁଆରୀ ୩(ଲୋକାଲ ୱାୟାର): ପାକିସ୍ତାନ ଜେଲରେ ୨୦ ବର୍ଷ ରହିବା ପରେ ଜନ୍ମଭୂମିକୁ ଫେରିଥିବା ସୁନ୍ଦରଗଡ଼ ଜିଲ୍ଲା କୁତ୍ରା ବ୍ଲକ ଅନ୍ତର୍ଗତ ଜଙ୍ଗରପଡ଼ାର ବିରଜୁ କୁଲୁ (୫୧) ପୁଣି ଥରେ ନିଖୋଜ ହୋଇ ଯାଇଥିବା ତାଙ୍କ ଭଉଣୀ ରବିବାର ସ୍ଥାନୀୟ ଥାନାରେ ଅଭିଯୋଗ କରିଛନ୍ତି ।

ଶନିବାର ରାତିରେ ସେ ଘରୁ କୁଆଡ଼େ ଚାଲି ଯାଇଥିବା ଭଉଣୀ ବେର୍ଣ୍ଣାଦେତ୍ ଅଭିଯୋଗରେ ଉଲ୍ଲେଖ କରିଛନ୍ତି ।

ଅଭିଯୋଗ ମିଳିବା ପରେ ପୁଲିସ ତାଙ୍କୁ ଖୋଜିବା ପାଇଁ ଅଭିଯାନ ଆରମ୍ଭ କରିଥିବା ବେଳେ ପଡ଼ୋଶୀ ରାଜ୍ୟ ପୁଲିସର ସହାୟତା ମଧ୍ୟ ଲୋଡ଼ିଛି ।

ସ୍ମରଣଯୋଗ୍ୟ, ବିରଜୁ ୨୫ ବର୍ଷ ତଳେ ଘରୁ କୁଆଡ଼େ ଚାଲି ଯାଇଥିଲେ । ତେବେ ସେ ପାକିସ୍ତାନର ଲାହୋର ଜେଲରେ ବନ୍ଦୀ ଥିବା ମାସେ ତଳେ ପରିବାର ଲୋକେ ଖବର ପାଇଥିଲେ ।

ଭାରତ ସରକାରଙ୍କ ଉଦ୍ୟମ କ୍ରବେ ଗତ ଅକ୍ଟୋବର ୨୬ରେ ସେ ମୁକ୍ତ ହୋଇ ଅମୃତସରରେ ପହଞ୍ଚିଥିଲେ ।

ଓଡ଼ିଶାର ଯାଇଥିବା ଏକ ସ୍ୱତନ୍ତ୍ର ଟିମ୍ ତାଙ୍କୁ ସୁନ୍ଦରଗଡ଼ ଆଣି ନିଜ ଘରେ ଛାଡ଼ିଥିଲେ ।

ତାଙ୍କ ଚଳିବା ପାଇଁ ଜିଲ୍ଲା ପ୍ରଶାସନ ମଧ୍ୟ ତାଙ୍କୁ ରାସନ ସାମଗ୍ରୀ ଓ ଅର୍ଥ ସହାୟତା ଦେଇଥିଲା । ତେବେ ଏବେ ପୁଣି ସେ ନିଖୋଜ ହୋଇ ଯାଇଥିବା ଅଭିଯୋଗ ହୋଇଛି ।

ଲୋକାଲ ୱାୟାର

ସୁନ୍ଦରଗଡ଼, ଡିସେମ୍ବର ୨୯(ଲୋକାଲ ୱାୟାର): ଦୀର୍ଘ ତିରିଶ ବର୍ଷ ଧରି ଜଣେ ମହିଳାଙ୍କ ସହ ଲିଭ୍-ଇନ ସମ୍ପର୍କରେ ରହିବା ପରେ ତାଙ୍କୁ ହତ୍ୟା କରି ପୋତି ଦେଇଥିବା ଅଭିଯୋଗରେ ଅଭିଯୁକ୍ତକୁ ପୁଲିସ ଗିରଫ କରିଛି ।

ସୁନ୍ଦରଗଡ଼ ଜିଲ୍ଲା ତଳସରା ଥାନା ଅନ୍ତର୍ଗତ ସବଡେଗାରେ ଘଟିଛି ଏଭଳି ଅଭାବନୀୟ ଘଟଣା ।

ଅଭିଯୁକ୍ତ ଖେରୁ ନାୟକ ଗତ ଶନିବାରଠାରୁ ଏହି ହତ୍ୟାକାଣ୍ଡ ଘଟାଇଥିଲେ ମଧ୍ୟ ଏହା ଗତକାଲି ଗ୍ରାମବାସୀଙ୍କ ନଜରକୁ ଆସିଥିଲା ଏବଂ ସେମାନେ ଅଭିଯୁକ୍ତକୁ ଧରି ଆଜି ପୁଲିସକୁ ହସ୍ତାନ୍ତର କରିଛନ୍ତି ।

ଗ୍ରାମବାସୀ ଅଭିଯୋଗ କରିଛନ୍ତି, ଶକୁନ୍ତଳା ନାୟକ ନାମ୍ନୀ ମହିଳା ପ୍ରାୟୟ ୩୦ ବର୍ଷ ତଳେ ସ୍ୱାମୀ ଓ ଦୁଇଟି ସନ୍ତାନକୁ ଛାଡ଼ି ଖେରୁ ନାୟକ ସହ ସବଡେଗା ବସ୍ତିରେ ରହିବା ଆରମ୍ଭ କରିଥିଲା ।

କିନ୍ତୁ ବିଗତ କିଛି ଦିନ ଧରି ଅନ୍ୟ ଜଣେ ମହିଳାଙ୍କ ସହ ଖେରୁ ସମ୍ପର୍କ ରଖିବା ଆରମ୍ଭ କରିଥିଲା ।

ଏହାକୁ ନେଇ ଶକ୍ତୁନ୍ତଳା ଓ ଖେରୁଙ୍କ ମଧ୍ୟରେ ମନାନ୍ତର ଆରମ୍ଭ ହୋଇଥିଲା । ସମ୍ପର୍କ ଥିବା ଅନ୍ୟ ମହିଳାଙ୍କ ସହ ମିଶି ଖେରୁ ଶକୁନ୍ତଳାଙ୍କୁ ହତ୍ୟା କରି ଘର ପଛ ପାଶ୍ୱର୍ରେ ମାଟି ତଳେ ପୋତି ଦେଇଥିଲା ।

ତେବେ ଅଚାନକ ଶକୁନ୍ତଳା ନିଖୋଜ ହୋଇ ଯିବାରୁ ଗ୍ରାମବାସୀ ସନ୍ଦେହ କରିଥିଲେ ।

ସେମାନେ ଗତକାଲି ଖେରୁକୁ ଅଟକ ରଖି ଲଗାତର ଜେରା କରିଥିଲେ । ଶେଷରେ ଖେରୁ କାନ୍ଦି କାନ୍ଦି ନିଜ ଅପରାଧ ସ୍ୱୀକାର କରିଥିଲା ।

ଲୋକଙ୍କ ଠାରୁ ଖବର ପାଇ ସ୍ଥାନୀୟ ପୁଲିସ ଗ୍ରାମରେ ପହଞ୍ଚି ଖେରୁକୁ ଗିରଫ କରିଛି । ମାଜିଷ୍ଟ୍ରେଟଙ୍କ ସମ୍ମୁଖରେ ମାଟି ଖୋଳି ବ୍ୟବଚ୍ଛେଦ ପାଇଁଁ ପଠାଯିବ ବୋଲି ସ୍ଥାନୀୟ ପୁଲିସ ଅଧିକାରୀ କହିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୨୫(ଲୋକାଲ ୱାୟାର): ଟସର ଚାଷ ପାଇଁ ପ୍ରସିଦ୍ଧି ପାଇଥିବା ସୁନ୍ଦରଗଡ଼ ଜିଲ୍ଲାର ଖୁଣ୍ଟଗାଁଠାରେ ଏକ ଅତ୍ୟାଧୁନିକ ଟସର ସିଲକ୍ ପାର୍କ ପ୍ରତିଷ୍ଠା କରାଯିବ ବୋଲି ରାଜ୍ୟ ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗ ପକ୍ଷରୁ କୁହାଯାଇଛି ।

ସୁନ୍ଦରଗଡ଼ ଜିଲ୍ଲାର ବଣେଇ, କୋଇଡ଼ା, ଲହୁଣିପଡ଼ା, ବିଶ୍ରା, ବଡ଼ଗାଁ ବ୍ଲକରେ ଟସର ଚାଷ କରାଯାଉଛି ।

ଚାଷୀମାନଙ୍କୁ ଆର୍ଥିକ ଓ ବୈଷୟିକ ସହାୟତା ଯୋଗାଇ ଦେବା ପାଇଁ ରେଶମ ନିର୍ଦ୍ଦେଶାଳୟ ଅଧୀନରେ ଏହି ଜିଲ୍ଲାରେ ୯ଟି ଚାଷୀ ସହଯୋଗ ସମିତି ରହିଛି ।

ଏହି ଜିଲ୍ଲାରେ ପ୍ରାୟତଃ ୬୦ ଲକ୍ଷରୁ ଅଧିକ ଟସର କୋଷା କ୍ରୟବିକ୍ରୟ ହେଉଥିବା ବେଳେ ୨ କୋଟିରୁ ଅଧିକ ଟଙ୍କାର କାରବାର ହେଉଛି ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୨୪(ଲୋକାଲ ୱାୟାର): ରାଉରକେଲାରେ ୨୦ ହଜାର ଦର୍ଶକ କ୍ଷମତାର ଏକ ବିଶ୍ୱସ୍ତରୀୟ ତଥା ଦେଶର ସର୍ବର୍ବୃହତ ହକି ଷ୍ଟାଡିୟମ ନିର୍ମାଣ ହେବ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁବାର କହିଛନ୍ତି ।

ଏହି ହକି ଷ୍ଟାଡିୟମ ବିଶ୍ୱର ଅନ୍ୟ ଷ୍ଟାଡିୟମ ପାଇଁ ଉଦାହରଣ ପାଲଟିବ । ବିଜୁ ପଟ୍ଟନାୟକ ୟୁନିଭରସିଟି ଆଣ୍ଡ ଟେକ୍ନୋଲୋଜି କ୍ୟାମ୍ପସ ପରିସରରେ ୧୫ ଏକର ପରିମିତ ଜମିରେ ଏହି ଷ୍ଟାଡିୟମ ଛିଡ଼ା ହେବ ବୋଲି ଏକ ଭିଡିଓ ବାର୍ତ୍ତାରେ ମୁଖ୍ୟମନ୍ତ୍ରୀ କହିଛନ୍ତି ।

ମୁଖ୍ୟମନ୍ତ୍ରୀ କହିଛନ୍ତି, ୨୦୨୩ ବିଶ୍ୱକପ୍ ହକି ଟୁର୍ଣ୍ଣାମେଣ୍ଟର ମ୍ୟାଚ ଗୁଡ଼ିକ ଭୁବନେଶ୍ୱରର କଳିଙ୍ଗ ଷ୍ଟାଡିୟମ ଏବଂ ରାଉରକେଲାର ଏହି ଷ୍ଟାଡିୟମରେ ଅନୁଷ୍ଠିତ ହେବ ।

ସୁନ୍ଦରଗଡ଼ ଜିଲ୍ଲା ହକିର ଏକ ପାୱାର ହାଉସ୍ ଏବଂ ଏହି ଜିଲ୍ଲାରୁ ଅନେକ ହକି ଖେଳାଳି ଆନ୍ତର୍ଜାତିକ ସ୍ତରରେ ଭାରତ ପ୍ରତିନିିଧିତ୍ୱ କରିଛନ୍ତି ।

ଦିଲ୍ଲୀପ ତିର୍କୀ ଏବଂ ସୁନିତା ଲାକ୍ରାଙ୍କ ନେତୃତ୍ୱରେ ଭାରତୀୟ ଦଳ ଦେଶ ପାଇଁ ଅନେକ ଗୌରବ ଆଣିପାରିଛନ୍ତି ।

ସୁନ୍ଦରଗଡ଼ ଜିଲ୍ଲାର ଲୋକଙ୍କ ନିକଟରେ ଥିବା ହକି ପ୍ରେମ ବିଶ୍ୱର ଅନ୍ୟ କୌଣସି ସ୍ଥାନରେ ଦେଖିବାକୁ ମିଳେନାହିଁ ।

ଭାରତୀୟ ହକି ପ୍ରତି ସୁନ୍ଦରଗଡ଼ବାସୀଙ୍କ ଅବଦାନକୁ ସ୍ୱୀକୃତି ଜଣାଇ ଏହି ଆନ୍ତର୍ଜାତିକ ହକି ଷ୍ଟାଡିୟମ ନିର୍ମାଣ କରାଯିବ ।

ପ୍ରସ୍ତାବିତ ଷ୍ଟାଡିୟମରେ ସମସ୍ତ ପ୍ରକାର ଅତ୍ୟାଧୁନିକ ବ୍ୟବସ୍ଥା ରହିବ ଏବଂ ଏହା ଅନନ୍ୟ ଅଭିଜ୍ଞତା ଦେବ ।

ଏହା ଏହି ଅଞ୍ଚଳରେ କ୍ରୀଡ଼ା ମାନଚିତ୍ରକୁ ସମ୍ପୂର୍ଣ୍ଣ ପରିବର୍ତ୍ତନ କରିଦେବ । ହକି ପାଇଁ ବିଶ୍ୱରେ ଏହା ସର୍ବଶ୍ରେଷ୍ଠ ଷ୍ଟାଡିୟମ ହେବ ବୋଲି ଆଶା କରାଯାଉଥିବା ସେ କହିଛନ୍ତି ।

ସୁନ୍ଦରଗଡ଼ ଜିଲ୍ଲାର ସମସ୍ତ ୧୭ଟି ବ୍ଲକରେ ମଧ୍ୟ ଇତି ମଧ୍ୟରେ ସିନ୍ଥେଟିକ୍ ହକି ଟର୍ଫ ବିଛା କାମ ଆରମ୍ଭ ହୋଇସାରିଛି । ଯାହାକି ଜିଲ୍ଲାରେ ହକିର ବିକାଶକୁ ପ୍ରୋତ୍ସାହିତ କରିବ ।

ଉଲ୍ଲେଖଯୋଗ୍ୟ, ୨୦୨୩ ବିଶ୍ୱକପ୍ ହକି ପାଇଁ ପ୍ରସ୍ତୁତି ସ୍ୱରୂପ ଇତି ମଧ୍ୟରେ ହକି ଇଣ୍ଡିଆ, ଓଡ଼ିଶା ସରକାରଙ୍କ ବରିଷ୍ଠ ଅଧିକାରୀ ଏବଂ କ୍ରୀଡ଼ା ଓ ଯୁବସେବା ବିଭାଗର ଅଧିକାରୀମାନେ ଏକାଧିକବାର ରାଉରକେଲା ଗସ୍ତ କରି ସମୀକ୍ଷା କରିଛନ୍ତି ।

ଲୋକାଲ ୱାୟାର

ରାଉରକେଲା, ଡିସେମ୍ବର ୧୮(ଲୋକାଲ ୱାୟାର): ରାଉରକେଲାର ସହରର ଏସଟିଆଇ ଫ୍ଲାଇ ଓଭର ବ୍ରିଜରେ ଶୁକ୍ରବାର ସନ୍ଧ୍ୟାରେ ଲୁଟେରାଙ୍କ ଗୁଳିମାଡ଼ରେ ଜଣେ ବ୍ୟକ୍ତି ନିହତ ହୋଇଥିବା ବେଳେ ତାଙ୍କ ଠାରୁ ଲକ୍ଷାଧିକ ଟଙ୍କାର ସୁନା ଅଳଙ୍କାର ଲୁଟ ହୋଇଛି ।

ଏସଟିଆଇର ଏକ ଜୁଏଲର୍ସରେ କାମ କରୁଥିବା ସରୋଜ କୁମାର ସାହୁ ସନ୍ଧ୍ୟାରେ ଅଳଙ୍କାର ବ୍ୟାଗ ନେଇ ଦୋକାନରୁ ଗଙ୍ଗାଧରପାଲ୍ଲୀସ୍ଥିତ ଘରକୁ ବାଇକରେ ଫେରୁଥିଲେ ।

ଫ୍ଲାଇଓଭରରେ ଅଚାନକ ତିନି ଜଣ ଦୁର୍ବୃତ୍ତ ଏକ ବାଇକରେ ଆସି ତାଙ୍କ ଉପରକୁ ତିନି ରାଉଣ୍ଡ ଗୁଳିମାଡ଼ କରିଥିଲେ । ସରୋଜଙ୍କ ମୁଣ୍ଡ, ପିଠି ଓ ଛାତିରେ ଗୁଳି ବାଜିଥିଲା ।

ତାଙ୍କୁ ଗୁରୁତର ଅବସ୍ଥାରେ ଆଇଜିଏଚରେ ଭର୍ତ୍ତି କରାଯାଇଥିବା ବେଳେ ମୃତ୍ୟୁ ହୋଇ ଯାଇଛି । ରାଉରକେଲା ଏସପି କେ. ଶିବା ସୁବ୍ରମଣି ପହଞ୍ଚି ଘଟଣାର ତଦନ୍ତ କରିଛନ୍ତି ।

ଉଲ୍ଲେଖଯୋଗ୍ୟ, ବ୍ରାହ୍ମଣୀତରଙ୍ଗ ଥାନା ଅନ୍ତର୍ଗତ ସିଂହଟୋଲାରେ ଗତ ୧୪ ତାରିଖ ରାତିରେ ଜଣେ ସୁନା ବ୍ୟବସାୟୀ ପତ୍ନୀ ଓ ପୁଅକୁ ନେଇ ବାଇକରେ ଯାଉଥିବା ବେଳେ ଗୁଳିମାଡ଼ ହୋଇଥିଲା । କିନ୍ତୁ ସେମାନେ ଅଳ୍ପକେ ବର୍ତ୍ତି ଯାଇଥିଲେ ।

ଲୋକାଲ ୱାୟାର

ରାଉରକେଲା, ଡିସେମ୍ବର ୧୬ (ଲୋକାଲ ୱାୟାର): ଶହ ଶହ କୋଟି ଟଙ୍କାର ଜିଏସଟି (ବସ୍ତୁ ଓ ସେବା କର) ଠକେଇର ଗଡ ପାଲଟିଛି ଇସ୍ପାତ ନଗରୀ ରାଉରକେଲା ।

କୋଏଲ ନଗରର ଜଣେ ପରିବା ଦୋକାନୀଙ୍କୁ ୧୦୦ କୋଟି ଟଙ୍କାର ଜିଏସଟି ଠକେଇ ନୋଟିସ ମିଳିବାର ଦିନକ ପରେ ୩୦୦ କୋଟି ଟଙ୍କାର ଜିଏସଟି ଠକେଇ ଅଭିଯୋଗରେ ଜଣକୁ ଗିରଫ କରାଯାଇଛି ।

ଗରିବ ଓ ଶ୍ରମିକ ଶ୍ରେଣୀର ଲୋକଙ୍କ ନାମରେ କିଛି ଅସାଧୁ ବ୍ୟବସାୟୀ ନକଲି କମ୍ପାନୀ ଖୋଲି ଟଙ୍କା ନେଣଦେଣ କରୁଛନ୍ତି ।

ଅକ୍ଟୋବର ୨୩ରେ ରାଉରକେଲାର ୧୮ ଜଣଙ୍କ ବ୍ୟାଙ୍କ ଆକାଉଂଟ ମାଧ୍ୟମରେ ୪୨ କୋଟି ଟଙ୍କା ଟିକସ ଠକେଇ ଅଭିଯୋଗ ହୋଇଥିଲା ।

ସେହି ମାସରେ ରାଉରକେଲାର ସେକ୍ଟର ୨୦ରେ ରହୁଥିବା ଜଣେ ଡ୍ରାଇଭରଙ୍କ ବିରୋଧରେ ୨୩.୯୬ କୋଟି ଟଙ୍କାର ଜିଏସଟି ଓ ନକଲି ବିଲ୍ ଦ୍ୱାରା ୪.୩୧ କୋଟି ଟଙ୍କାର ସିଜିଏସଟି ଓ ଏସଜିଏସଟି ଠକେଇ ହୋଇଥିଲା ।

ଲୋକାଲ ୱାୟାର

ଭୁବନେଶ୍ୱର, ଡିସେମ୍ବର ୭ (ଲୋକାଲ ୱାୟାର) : ଓଡ଼ିଶାରେ ଶୀତ ବଢୁଥିବା ବେଳେ ଦକ୍ଷିଣ ଓ ପଶ୍ଚିମ ଓଡ଼ିଶାର ପ୍ରଚଣ୍ଡ ଜାଡ଼ ଅନୁଭୂତ ହେଉଛି ।

ଗତ ୨୪ ଘଣ୍ଟା ମଧ୍ୟରେ ୧୨ଟି ସହରର ସର୍ବନିମ୍ନ ତାପମାତ୍ରା ୧୪ ଡିଗ୍ରୀ ତଳକୁ ଖସିଥିବା ବେଳେ ଫୁଲବାଣୀରେ ସବୁଠାରୁ କମ୍ ୮.୫ ଡିଗ୍ରୀ ସେଲସିୟସ ତାପମାତ୍ରା ରେକର୍ଡ ହୋଇଛି ବୋଲି ଭୁବନେଶ୍ୱରସ୍ଥିତ ପାଣିପାଗ ବିଭାଗର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ସୋମବାର ସୂଚନା ଦିଆଯାଇଛି ।

ସର୍ବନିମ୍ନ ୧୪ ଡିଗ୍ରୀ ସେଲସିୟସ ତଳେ ଥିବା ୧୨ ସହର ହେଲା, ସୋନପୁର (୮.୮), ଦାରିଙ୍ଗିବାଡ଼ି (୯), ଅନୁଗୁଳ (୧୦.୬), କୋରାପୁଟ (୧୦.୬), ଭବାନୀପାଟଣା (୧୧.୬), ସୁନ୍ଦରଗଡ଼ (୧୩), ମାଲକାନଗିରି (୧୩), ବୌଦ୍ଧ (୧୩), ତାଳଚେର (୧୩.୩), ଝାରସୁଗୁଡ଼ା, (୧୩.୪) ଏବଂ ବଲାଙ୍ଗୀରରେ (୧୩.୫) ।

ତେବେ ଭୁବନେଶ୍ୱରରେ ତାପମାତ୍ରା ୧୭.୬ ଡିଗ୍ରୀ ସେଲସିୟସ ରହିଥିବା ବେଳେ କଟକରେ ୧୬.୪ ଡିଗ୍ରୀ ଅଛି ।

ଅନ୍ୟପଟେ ଚାନ୍ଦବାଲି ଏବଂ ରାୟଗଡ଼ାରେ ଅତିଘନ କୁହୁଡ଼ି ହୋଇଥିବା ବେଳେ ଦୃଶ୍ୟମାନ ଦୂରତା ୪୦ ମିଟର ରହିଥିଲା ।

ସେହିଭଳି ପାରାଦୀପ, ସୋନପୁର ଏବଂ ବୌଦ୍ଧରେ ମଧ୍ୟ ଘନକୁହୁଡି ରହିଥିଲା । ପାରାଦୀପଠାରେ ଦୃଶ୍ୟମାନ ଦୂରତା ୫୦ ମିଟର ଥିବାବେଳେ ସୋନପୁର ଏବଂ ବୌଦ୍ଧ ଠାରେ ଦୃଶ୍ୟମାନ ଦୂରତା ୧୦୦ ମିଟର ରହିଥିଲା ।

ଭୁବନେଶ୍ୱର, କଟକ, କୋରାପୁଟ ଏବଂ ନୟାଗଡ଼ରେ ହାଲୁକା କୁହୁଡି ରହିଥିଲା ।

ଲୋକାଲ ୱାୟାର