ନୂଆଦିଲ୍ଲୀ, ଜାନୁଆରୀ ୨୧(ଲୋକାଲ ୱାୟାର): ଜାନୁଆରୀ ୨୬ର ଅବ୍ୟବହିତ ପୂର୍ବରୁ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଦ୍ୱାରା ନୂଆଦିଲ୍ଲୀରେ କେନ୍ଦ୍ରାପଡ଼ା ଜିଲ୍ଲାର ପୂର୍ଣ୍ଣିମା ଗିରି (୧୫ ବର୍ଷ ୯ ମାସ), ସବିତା ଗିରି (୧୫ ବର୍ଷ) ଏବଂ ଅନୁଗୁଳ ଜିଲ୍ଲାର ଶ୍ରୀମତୀ ବଦ୍ରା(୧୦ ବର୍ଷ ୪ ମାସ) ସାହସିକତା ପୁରସ୍କାରରେ ସମ୍ମାନିତ ହେବେ ।
ସ୍ମରଣଯୋଗ୍ୟ, ୨୦୧୯ ଜାନୁଆରୀ ୨ ତାରିଖରେ କେନ୍ଦ୍ରାପଡ଼ା ଜିଲ୍ଲାର ହୁକିଟୋଲାରେ ପ୍ରାୟ ୫୨ ଜଣ ଲୋକ ପିକନିକ୍ ସାରି ଏକ ବୋଟରେ ଫେରୁଥିବା ବେଳେ ସନ୍ଧ୍ୟା ସମୟରେ ମହାକାଳପଡ଼ାର ନିପାଣିଆ ନଦୀରେ ବୋଟଟି ବୁଡ଼ି ଯାଇଥିଲା ।
ଲୋକଙ୍କ ଆର୍ତ୍ତ ଚିତ୍କାର ଶୁଣି ନଦୀ କୂଳରେ ରହୁଥିବା ଏକ ପରିବାରର ଦୁଇ ଝିଅ ପୂର୍ଣ୍ଣିମା ଓ ସବିତା ନିଜ ଜୀବନକୁ ଖାତିର ନ କରି କୁମ୍ଭୀରରେ ଭରପୁର ଉକ୍ତ ନଦୀର ୧୬ ଫୁଟ ଗଭୀର ଥଣ୍ଡା ଜଳ ମଧ୍ୟକୁ ଲମ୍ଫ ମାରିଥିଲେ ।
ସେମାନେ ମୃତ୍ୟୁ ମୁଖରୁ ୧୨ ଜଣ ଯାତ୍ରୀଙ୍କୁ ଉଦ୍ଧାର କରିବାରେ ସଫଳ ହୋଇଥିଲେ । ବୋଟ ଯାତ୍ରୀଙ୍କ ମଧ୍ୟରୁ ୧୧ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟମାନେ ପହଁରି ପହଁରି କୂଳକୁ ଚାଲି ଆସିଥିଲେ ।
ଏହି ସାହସିକତା ପାଇଁ ଆଇସିସିଡବ୍ଲୁ (ଇଣ୍ଡିଆନ କାଉନସିଲ ଫର ଚାଇଲ୍ଡ ୱେଲଫେୟାର) ପକ୍ଷରୁ ଉଭୟଙ୍କୁ ଜାତୀୟ ସାହସିକତା ପୁରସ୍କାର (ଧ୍ରୁବ ପୁରସ୍କାର) ପାଇଁ ମନୋନୀତ କରାଯାଇଥିଲା ।
ସେହିପରି ଅନୁଗୁଳ ଜିଲ୍ଲା ତାଳଚେର ଅଞ୍ଚଳର ଶ୍ରୀମତୀ ବଦ୍ରା ସାଙ୍ଗ ପ୍ରମିଳା ମଣ୍ଡଳ ସହ ୨୦୧୮ ନଭେମ୍ବର ୨୭ ତାରିଖରେ ନିଜ ଘର ପାଖ ଟ୍ରେନ ଲାଇନ ଅତିକ୍ରମ କରୁଥିବା ବେଳେ ପ୍ରମିଳା ଟ୍ରେନ ଲାଇନ ଉପରେ ପଡ଼ି ଯାଇଥିଲା । ଟ୍ରେନ ମୁହଁରୁ ତାକୁ ରକ୍ଷା କରିବାରେ ଶ୍ରୀମତୀ ସଫଳ ହୋଇଥିଲା ।
ତେବେ ପ୍ରମିଳାର ଗୋଟିଏ ଗୋଡ଼ ଟ୍ରେନ ଚକା ତଳେ ରହି ଯାଇଥିଲା । ଶ୍ରମୀତୀ ଯେ କେବଳ ପ୍ରମିଳାକୁ ଉଦ୍ଧାର କରିବାରେ ସଫଳ ହୋଇଥିଲା, ତାହା ନୁହେଁ ତାକୁ କାନ୍ଧରେ ବୋହି ପ୍ରାୟ ୩ଶହ ମିଟର ପର୍ଯ୍ୟନ୍ତ ଘରକୁ ବୋହି ନେଇଥିଲା ।
ପରେ ପ୍ରମିଳାକୁ କଟକ ବଡ଼ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା ଏବଂ ତାର ଜୀବନ ବଞ୍ଚି ଯାଇଥିଲା ।
ଏହି ସାହସିକତା ପାଇଁ ଶ୍ରୀମତୀକୁ ଆଇସିସିଡବ୍ଲୁ ଦ୍ୱାରା ଜାତୀୟ ସାହସିକତା ପୁରସ୍କାର (ପ୍ରହ୍ଲାଦ ପୁରସ୍କାର) ପାଇଁ ମନୋନୀତ କରାଯାଇଥିଲା ।
ଉଲ୍ଲେଖଯୋଗ୍ୟ, ଚଳିତ ବର୍ଷ ଜାତୀୟ ସାହସିକତା ପୁରସ୍କାର ପାଇଁ ୧୨ଟି ଜିଲ୍ଲାରୁ ମନୋନୀତ ହୋଇଥିବା ୨୨ ଜଣଙ୍କ ମଧ୍ୟରେ ୧୦ ବାଳିକା ଓ ୧୨ ବାଳକ ଅଛନ୍ତି । ସେମାନଙ୍କ ମଧ୍ୟରୁ ଜଣଙ୍କୁ ମରଣୋତ୍ତର ଭାବେ ସମ୍ମାନିତ କରାଯିବ ।
ଲୋକାଲ ୱାୟାର
