Government

କଟକ, ଫେବ୍ରୁଆରୀ ୨୮(ଲୋକାଲ ୱାୟାର): ଏଣିକି ରାଜ୍ୟରେ ହୋମଗାର୍ଡମାନେ ଦୈନିକ ୫ ଶହ ଟଙ୍କା ମଜୁରି ପାଇବେ ବୋଲି ଶୁକ୍ରବାର ହାଇକୋର୍ଟ ଏକ ନିର୍ଦ୍ଦେଶରେ ସ୍ପଷ୍ଟ କରିଥିବା ଜଣେ ବରିଷ୍ଠ ଆଇନଜୀବୀ ସୂଚନା ଦେଇଛନ୍ତି ।

ହୋମଗାର୍ଡଙ୍କ ଦରମା ନେଇ ସୁପ୍ରିମକୋର୍ଟ ଯେଉଁ ନିର୍ଦ୍ଦେଶ ଦେଇଛନ୍ତି ତାହା କାର୍ଯ୍ୟକାରୀ କରିବାକୁ ହାଇକୋର୍ଟ ରାଜ୍ୟ ସରକାରଙ୍କୁ ଏକ ମାମଲାର ଶୁଣାଣି ଅବସରରେ ହାଇକୋର୍ଟର ବିଚାରପତି ଜଷ୍ଟିସ୍ ବିଶ୍ୱନାଥ ରଥ ନିର୍ଦ୍ଦେଶ ଦେଇଛନ୍ତି ।

ଏଥିସହ ଆସନ୍ତା ତିନି ମାସ ମଧ୍ୟରେ ସପ୍ତମ ବେତନ କମିଶନ ଲାଗୁ କରିବାକୁ ମଧ୍ୟ କହିଛନ୍ତି ।

ଏହାଦ୍ୱାରା ରାଜ୍ୟରେ ପ୍ରାୟ ୧୮ ହଜାର ହୋମ୍ ଗାର୍ଡ ଉପକୃତ ହେବେ ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୨୭(ଲୋକାଲ ୱାୟାର): ରାଜ୍ୟର ୧୦ ମନ୍ଦିର, ୬ ମସଜିଦ୍‌, ୫ ଚର୍ଚ୍ଚ ଏବଂ ୨ଟି ଗୁରୁଦ୍ୱାର ପାଇଁ ଗୁରୁବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୩ କୋଟି ଟଙ୍କାର ଅନୁଦାନ ଘୋଷଣା କରିଥିବା ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।

ଘୋଷଣା ଅନୁଯାୟୀ, ଜଗତସିଂହପୁରର ଝଙ୍କଡ଼ ମା’ ସାରଳା ମନ୍ଦିର, ଯାଜପୁରର ବିରଜା ମନ୍ଦିର, କେନ୍ଦୁଝରର ପ୍ରଭୁ ବଳଦେବଜୀଉ ମନ୍ଦିର,
ବରଗଡ଼ର ନୃସିଂହନାଥ ମନ୍ଦିର, ଭଦ୍ରକର ମା’ ଭଦ୍ରକାଳୀ ମନ୍ଦିର, ବଲାଙ୍ଗୀରର ହରିଶଙ୍କର ମନ୍ଦିର, ବୌଦ୍ଧର ଜଗନ୍ନାଥ ମନ୍ଦିର, ଢେଙ୍କାନାଳ କପିଳାସର ଚନ୍ଦ୍ରଶେଖରଜୀଉ, ନବରଙ୍ଗପୁର ପାପଡ଼ାହାଣ୍ଡିର ନୀଳକଣ୍ଠେଶ୍ୱର ମନ୍ଦିର ଏବଂ କୋରାପୁଟର ଗୁପ୍ତେଶ୍ୱର ମନ୍ଦିରକୁ ୧ କୋଟି ଟଙ୍କା ଲେଖାଏଁ ଅନୁଦାନ ମିଳିବ ।

ସେହିଭଳି ପୁରୀର ଜାହାନିଆ ପୀର, ସୋନପୁରର ହାଜିର୍ ଅବଦୁଲ ସାକୁର ବାବା ତରଭା ସରିଫ୍ ମସଜିଦ୍‌, ଭୁବନେଶ୍ୱରର ୟୁନିଟ୍‌-୩ର ଜାମା ମସଜିଦ୍‌, ଖୋର୍ଦ୍ଧା କାଇପଦରର ହଜରତ୍ ବୁଖାରୀ ପୀର୍ ବାବା ପୀଠ, ଭଦ୍ରକ ଧାମନଗରର ଦରଘା -ଇ-ହୁଜୋର୍ ମୁଜାହିଦ୍ ଇ- ମିଲାତ୍ ଏବଂ ବାଲେଶ୍ୱରର ଭୁଜାଖିଆ ପୀର୍ (ହଜରତ୍ ସ୍ୱାଲେ ମହମ୍ମଦ) ପାଇଁ ୧ କୋଟି ଲେଖାଏଁ ଅନୁଦାନ ଘୋଷଣା ହୋଇଛି ।

୧ କୋଟି ଲେଖାଏଁ ଅନୁଦାନ ପାଇବାକୁ ଥିବା ଚର୍ଚ୍ଚ ଗୁଡ଼ିକ ମଧ୍ୟରେ ଅଛି ଖୋର୍ଦ୍ଧାର ବାପ୍ଟିଷ୍ଟ୍ ଚର୍ଚ୍ଚ, କଟକ ଚାନ୍ଦିନୀଚୌକର ମାଉଣ୍ଟ୍ ହାଉସ୍ ଚର୍ଚ୍ଚ, ବଲାଙ୍ଗୀର ମିଶନ ପଡ଼ିଆ ପାଟଣା ରୋଡର ସିଏନଆଇ ଚର୍ଚ୍ଚ, କଳାହାଣ୍ଡିର ସେଣ୍ଟ୍ ପଲ୍ ପ୍ରୋଟେଷ୍ଟାଣ୍ଟ ଚର୍ଚ୍ଚ ଏବଂ ଭୁବନେଶ୍ୱରର ୟୁନିଟ୍‌-୪ର ଚର୍ଚ୍ଚ ଅଫ ଖ୍ରୀଷ୍ଟ୍ (ୟୁନିଅନ୍ ଚର୍ଚ୍ଚ) ।

ସୁନ୍ଦରଗଡ଼ ଷ୍ଟେସନ ରୋଡର ଗୁରୁ ସିଂହ ସାହେବ୍ ଗୁରୁଦ୍ୱାର ଓ ପୁରୀ ବଉଳି ମଠ ପାଇଁ ମଧ୍ୟ ୧ କୋଟି ଲେଖାଏଁ ଅନୁଦାନ ଘୋଷଣା କରାଯାଇଥିବା ସୂଚନା ଦିଆଯାଇଛି ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୨୭(ଲୋକାଲ ୱାୟାର): ଓଡ଼ିଶାର ଦ୍ୱିବାର୍ଷିକ ମେଗା ନିବେଶକ ସମ୍ମିଳନୀ ‘ମେକ୍ ଇନ୍ ଓଡ଼ିଶା କନକ୍ଲେଭ୍ ୨୦୨୦’ରେ କଣ୍ଟ୍ରି ପାର୍ଟନର ହେବାକୁ ଜାପାନ ରାଷ୍ଟ୍ରଦୂତ ସତୋଷୀ ସୁଜୁକିଙ୍କ ସହ ଗୁରୁବାର ଲୋକସେବା ଭବନରେ ଆଲୋଚନା ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁରୋଧ କରିଛନ୍ତି ।

ଗୁରୁବାର କେନ୍ଦ୍ର ପେଟ୍ରୋଲିୟମ ଓ ଇସ୍ପାତ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ଜାପାନ ରାଷ୍ଟ୍ରଦୂତଙ୍କ ସହ ଏକ ଉଚ୍ଚସ୍ତରୀୟ ପ୍ରତିନିଧି ଦଳ ମୁଖ୍ୟମନ୍ତ୍ରୀଙ୍କୁ ଭେଟିଥିଲେ ।

ଆଲୋଚନା କାଳରେ ମୁଖ୍ୟମନ୍ତ୍ରୀ ଜାପାନର ପ୍ରତିନିଧି ଦଳକୁ ଭୁବନେଶ୍ୱର ନିକଟରେ ସ୍ୱତନ୍ତ୍ର ଜାପାନ ଶିଳ୍ପ କ୍ଲଷ୍ଟର ଓ ଟାଉନସିପ୍ ସ୍ଥାପନ କରାଗଲେ ରାଜ୍ୟ ସରକାର ସବୁ ପ୍ରକାର ସହାୟତା ଦେବେ ବୋଲି ପ୍ରସ୍ତାବ ଦେଇଥିଲେ ।

ଜାପାନର ନିବେଶକମାନେ ଅଟୋମୋବାଇଲ, ଖାଦ୍ୟ ପ୍ରକ୍ରିୟାକରଣ, କେମିକାଲ୍ସ ଓ ପେଟ୍ରୋକେମିକାଲ୍ସ କ୍ଷେତ୍ରରେ ପୁଞ୍ଜିନିବେଶ କରିବାକୁ ମୁଖ୍ୟମନ୍ତ୍ରୀ ଆହ୍ୱାନ ଦେଇଥିଲେ ।

ଜାପାନ ରାଷ୍ଟ୍ରଦୂତ ଶ୍ରୀ ସୁଜୁକି କହିଛନ୍ତି, ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକଙ୍କ ସହ ରାଜ୍ୟରେ ପୁଞ୍ଜିନିବେଶ ସୁଯୋଗ ନେଇ ଥିବା ସମ୍ଭାବନା ସମ୍ପର୍କରେ ଆଲୋଚନା ହୋଇଥିଲା ।

ଓଡ଼ିଶାର ଇସ୍ପାତ, ପର୍ଯ୍ୟଟନ ସମେତ ବିଭିନ୍ନ କ୍ଷେତ୍ରରେ ପର୍ଯ୍ୟାପ୍ତ ନିବେଶ ସୁଯୋଗ ଥିବା ନେଇ ଜାପାନର ନିବେଶକଙ୍କୁ ଅବଗତ କରାଯିବ ।

ବୈଠକରେ ଇସ୍ପାତ ଓ ଖଣି ମନ୍ତ୍ରୀ ପ୍ରଫୁଲ୍ଲ ମଲ୍ଲିକ, ମୁଖ୍ୟ ସଚିବ ଅସିତ ତ୍ରିପାଠୀ, କେନ୍ଦ୍ର ଇସ୍ପାତ ସଚିବଙ୍କ ସହ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।

ଲୋକାଲ ୱାୟାର

ଜଗତସିଂହପୁର, ଫେବ୍ରୃଆରୀ ୨୬ (ଲୋକାଲ ୱାୟାର):ଜଗତସିଂହପୁର ଜିଲ୍ଲାର ଦାରିଦ୍ର‌୍ୟ ସୀମାରେଖା ତଳେ ଥିବା ଗ୍ରାମବାସୀଙ୍କୁ ଆଜି ପର୍ଯ୍ୟନ୍ତ ପ୍ରଧାନମନ୍ତ୍ରୀ ଆବାସ ଯୋଜନା ମାଧ୍ୟମରେ ପକ୍କା ଘରଟିଏ ମିଳୁନଥିବାରୁ ଅଧିକାଂଶ ସମୟରେ ଗ୍ରାମବାସୀମାନେ ଜିଲ୍ଲାପାଳଙ୍କ କାର୍ଯ୍ୟାଳୟ ଓ ବ୍ଲକ ଅଫିସ ସମ୍ମୁଖରେ ଧାରଣା ଦେଉଥିବା ଦେଖିବାକୁ ମିଳେ ।

ହେଲେ ଏବେ ଦେଖିବାକୁ ମିଳିଛି ଓଲଟା ଚିତ୍ର ।

ହିତାଧିକାରୀ ଘର କାର୍ଯ୍ୟ ଶେଷ କରୁନଥିବା ଅଭିଯୋଗ କରି ହିତାଧିକାରୀଙ୍କ ଘର ସମ୍ମୁଖରେ ଧାରଣା ଦେଇଛନ୍ତି ବ୍ଲକ ଓ ପଞ୍ଚାୟତ ଅଧିକାରୀ ।

ଘର କାମ ଅଧା ରହିଥିବାରୁ ବ୍ଲକ ଅଧିକାରୀଙ୍କ ଉପରେ ଜିଲ୍ଲା ପ୍ରଶାସନ ଓ ରାଜ୍ୟ ସରାକର ଚାପ ପ୍ରୟୋଗ କରୁଥିବା କହିଛି ବ୍ଲକ ପ୍ରଶାସନ ।

ଏହି ଜିଲ୍ଲାର ହଜାର ହଜାର ହିତାଧିକାରୀ ୨୦୧୬-୧୭ ପୂର୍ବରୁ ପିଏମଏୱାଇ ଯୋଜନା ମାଧ୍ୟମରେ ଘର ପାଇଥିଲେ ।

ହେଲେ ଦର ଦାମ ବୃଦ୍ଧି, ଅଳ୍ପ ଖର୍ଚ୍ଚ , ବ୍ଲକ ଓ ପଞ୍ଚାୟତ ଅଧିକାରୀଙ୍କ ଉଦାସୀନତା ମନୋଭାବ ଏବଂ ଅନ୍ୟାନ୍ୟ କାରଣ ଯୋଗୁଁ ଘର ନିର୍ମାଣ ଶେଷ ହୋଇନଥିଲା ।

ଗୃହ ନିର୍ମାଣ କାର୍ଯ୍ୟ ଶେଷ ନ ହେବାରୁ ରାଜ୍ୟ ସରକାର ପ୍ରଶାସନ, ଜିଲ୍ଲା ଗ୍ରାମୀଣ ବିକାଶ ଏଜେନ୍ସି ଓ ବିଡ଼ିଓଙ୍କୁ ଡୋର ଟୁ ଡୋର କ୍ୟାମ୍ପେନିଂ ସହିତ ଗ୍ରାମସଭା କରି ହିତାଧିକାରୀଙ୍କୁ ଜାଗୃତ କରି ଗୃହ ନିର୍ମାଣ ସାରିବାକୁ ନିର୍ଦ୍ଦେଶ ଦେଇଥିଲେ ।

ବ୍ଲକ ଓ ପଞ୍ଚାୟତ ଅଧିକାରୀଙ୍କୁ ଦ୍ୱାରା ବାରମ୍ବାର ହିତାଧିକାରୀଙ୍କୁ ସୂଚିତ କରାଯାଇଥିଲେ ମଧ୍ୟ କୌଣସି ପରିବର୍ତ୍ତନ ଆସିନଥିଲା ।

ଗୃହ କାର୍ଯ୍ୟ ଶେଷ ହୋଇନଥିବାରୁ ପ୍ରଶାସନ ବ୍ଲକ ଓ ପଞ୍ଚାୟତ ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ନେଇଥିଲା ।

ତାଙ୍କ ଦରମା ବନ୍ଦ କରି ଦେବା ସହ କାହିଁକି ଗୃହ ନିର୍ମାଣ ଶେଷ ହୋଇ ନାହିଁ ତାହା ଉପରେ ସ୍ପଷ୍ଟିକରଣ ମାଗିଥିଲେ ।

ହରିଡା ବ୍ଲକ ଓ ପଞ୍ଚାୟତର ଅଧିକାରୀମାନେ ହିତାଧିକାରୀଙ୍କ ଘର ସମ୍ମୁଖରେ ଡ୍ରମ ବଜାଇ ଗୃହ ନିର୍ମାଣ ଶେଷ କରିବାକୁ କହିଥିଲେ ।

ଏହସହ ଗୃହ କାମ ଶେଷ କରି ନ ଥିଲେ ବାକି ଥିବା ଟଙ୍କା ସରକାରଙ୍କୁ ଫେରାଇବାକୁ କହିଥିଲେ ।

ଯଦି ଟଙ୍କା ଫେରାନ୍ତି ତାହାହେଲେ ତାଙ୍କ ନାମ ପ୍ରଧାନମନ୍ତ୍ରୀ ଆବାସ ଯୋଜାନା- ଗ୍ରାମୀଣର ୱେଟିଂ ଲିଷ୍ଟରେ ସ୍ଥାନ ପାଇବ ବୋଲି ବୁଝାଇଥିଲେ ।

କୌତୁହଳ କଥା ଯେ, ପିଏମଏୱାଇ ହିତାଧିକାରୀଙ୍କ ଉପରେ ଏହାର କୌଣସି ପ୍ରଭାବ ପଡିଲା ନାହିଁ ।

ଏହାପରେ କୁଜଙ୍ଗ ବ୍ଲକର ପଞ୍ଚାୟତ ଅଧିକାରୀମାନେ ଗୃହ କାର୍ଯ୍ୟ ଶେଷ କରିବା ପାଇଁ ଅଭିନବ ପନ୍ଥା ଗ୍ରହଣ କଲେ ।

କୁଜଙ୍ଗ ବ୍ଲକ ଏବିଡ଼ିଓ ସନ୍ତୋଷ ଶତପଥୀଙ୍କ ନେତୃତ୍ୱରେ ବ୍ଲକ ଅଧିକାରୀମାନେ କୁଜଙ୍ଗ ବ୍ଲକର ବାଲିଆ ପଞ୍ଚାୟତର ବଡଗାଁ ଗ୍ରାମର ମଧୁସ୍ମିିତା ଭୋଳଙ୍କ ଘର ସମ୍ମୁଖରେ ସାମୂହିକ ଧାରଣ ଦେବା ସହ ଶୀଘ୍ର ଘର କାମ ସାରିବାକୁ ଦାବି କରିଥିଲେ ।

ବାଲିଆ ପଞ୍ଚାୟତର କାର୍ଯ୍ୟକାରୀ ଅଧିକାରୀ ପ୍ରତାପ କୁମାର ମହାପାତ୍ର, ଗ୍ରାମ ରୋଜଗାର ସେବକ ପ୍ରକାଶ ଚନ୍ଦ୍ର ବେହେରା, ବ୍ଲକ ପ୍ରୋଜେକ୍ଟ ସହଯୋଗୀ ଜିତେନ୍ଦ୍ର ରାଉତ, ୱାର୍ଡର ସଦସ୍ୟ ପଦନ ସ୍ୱାଇଁ,ପଞ୍ଚାୟତ ପିଅନ ଭାଗ୍ୟଧର ମୋହାପରା ସମସ୍ତେ ପ୍ରଧାନମନ୍ତ୍ରୀ ଅବାସ ନିର୍ମାଣ ଶେଷ କରିବା ପାଇଁ ଧାରଣା ଦେଇଥିଲେ ।

ଏନେଇ ହିତାଧିକାରୀ ମଧୁସ୍ମିତା ଭୋଳ କହିଛନ୍ତି ଯେ, ତାଙ୍କୁ ଘର ନିର୍ମାଣ ପାଇଁ ୧.୨୦ ଲକ୍ଷ ଟଙ୍କାରୁ ତାଙ୍କୁ ୨୦୧୭-୧୮ରେ ୨୦ ହଜାର ଟଙ୍କା ମିଳିଥିଲା ।

ହେଲେ ଏହି ଦୁଇ ବର୍ଷ ଭିତରେ ମୋ ଶାଶୂ ଓ ଶାଶୂରଙ୍କ ମୃତ୍ୟୁ ହେବାରୁ ତାଙ୍କ ସୁଧକ୍ରିୟାରେ ଟଙ୍କା ଖର୍ଚ୍ଚ ହୋଇଯାଇଥିଲା ।

ତେଣୁ ୩୧ ମାର୍ଚ୍ଚ ୨୦୨୦ ସୁଦ୍ଧା ଘର କାର୍ଯ୍ୟ ଶେଷ କରିବି ବୋଲି ପ୍ରତିଶ୍ରୃତି ଦେବା ପରେ ଅଧିକାରୀମାନେ ଧାରଣାରୁ ଉଠିଥିବା ମଧୁସ୍ମିତା କହିଛନ୍ତି ।

ସୂଚନା ଅନୁସାରେ, ୨୦୧୯-୨୦୨୦ରେ କୁଜଙ୍ଗ ବ୍ଲକରେ ପିଏମଏୱାଇ ଯୋଜନା ମଧ୍ୟମରେ ୮୬୯ ଘରର ନିର୍ମାଣ କାର୍ଯ୍ୟ ସାରିବାକୁ ଲକ୍ଷ୍ୟ ରଖାଯାଇଛି ।

ହେଲେ ବର୍ତ୍ତମାନ ପର୍ଯ୍ୟନ୍ତ କେବଳ ୩୬୦ଟି ଘରର ନିର୍ମାଣ କାର୍ଯ୍ୟ ସରିଥିବା ବେଳେ ଆହୁରି ୫୦୯ଟି ଘର ଏ ପର୍ଯ୍ୟନ୍ତ ବାକି ରହିଛି ।

ସେହିଭଳି ବାଲିଆ ପଞ୍ଚାୟତରେ ୭୨ଟି ଘର କାମ ଶେଷ କରିବାକୁ ଲକ୍ଷ୍ୟ ରଖାଯାଇଥିବା ବେଳେ ୨୦ଟିର ଗୃହ କାର୍ଯ୍ୟ ସରିଥିବା ବେଳେ ଆହୁରି ୫୨ ଗୃହର ନିର୍ମାଣ ବାକି ରହିଛି ।

ଏବିଡ଼ିଓ ସନ୍ତୋଷ ଶତପଥୀ ସୂଚନା ଦେଇ କହିଛନ୍ତି ଯେ, ହିତାଧିକାରୀଙ୍କ ଗୃହ ନିର୍ମାଣ ଶେଷ କରିବା ନେଇ ଜାଗୃତ କରିବା ପାଇଁ ଏହା ଏକ ଅଭିନବ ପ୍ରୟାସ ।

ବ୍ଲକ ଓ ପଞ୍ଚାୟତ ଅଧିକାରୀଙ୍କ ଦରମା ବନ୍ଦ ହେବା ପରେ ସମସ୍ତ ଅଧିକାରୀ ମିଶି ୨୧ ଫେବ୍ରୃଆରୀରୁ କୁଜଙ୍ଗ ବ୍ଲକରେ ଏହି ପ୍ରୟାସ ଅରମ୍ଭ କରିଥିବା କହିଛନ୍ତି ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୨୬(ଲୋକାଲ ୱାୟାର): ବୁଧବାର ରାଜ୍ୟ ବିଧାନସଭାର ବେଜଟ ଅଧିବେଶନର ପ୍ରଥମ ପର୍ଯ୍ୟାୟ ଶେଷ ହୋଇଥିବା ବେଳେ ଆସନ୍ତା ମାର୍ଚ୍ଚ ୧୧ ତାରିଖରୁ ଦ୍ୱିତୀୟ ପର୍ଯ୍ୟାୟ ଆରମ୍ଭ ହେବ ।

ବୁଧବାର ବାଚସ୍ପତି ଆସନ୍ତା ମାର୍ଚ୍ଚ ୧୧ ତାରିଖ ସକାଳ ସାଢ଼େ ୧୦ଟା ପର୍ଯ୍ୟନ୍ତ ଗୃହକୁ ମୁଲତବୀ ଘୋଷଣା କରିଛନ୍ତି ।

ଫେବ୍ରୁଆରୀ ୧୪ରୁ ବଜେଟ ଅଧିବେଶନର ପ୍ରଥମ ପର୍ଯ୍ୟାୟ ଆରମ୍ଭ ହୋଇଥିଲା।

୧୮ ତାରିଖରେ ଅର୍ଥ ମନ୍ତ୍ରୀ ନିରଞ୍ଜନ ପୂଜାରୀ ୨୦୨୦-୨୧ ଆର୍ଥିକ ବର୍ଷ ପାଇଁ ବଜେଟ ଆଗତ କରିଥିଲେ ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୨୬(ଲୋକାଲ ୱାୟାର): ଲୋକସେବା ଭବନରେ ବୁଧବାର ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ‘ମୋ ସରକାର’ରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗକୁ ସାମିଲ କରାଯାଇଥିବା ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।

ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଥିଲେ, ତହସିଲ ଓ ସବରେଜିଷ୍ଟ୍ର କାର୍ଯ୍ୟାଳୟକୁ ଆସୁଥିବା ଲୋକମାନଙ୍କୁ ଗୁଣାତ୍ମକ ସେବା ଯୋଗାଇବା ଦିଗରେ ଅଧିକାରୀମାନେ ତତ୍ପର ହେବା ଉଚିତ ।

ଗତ ଡିସେମ୍ବର ରୁ ୫ଟି ରେ ଇ-ସାର୍ଟିଫିକେଟ କାର୍ଯ୍ୟକ୍ରମ ଆରମ୍ଭ ହେବା ପରେ ୨ ଲକ୍ଷ ଲୋକ ବିଭିନ୍ନ ସାର୍ଟିଫିକେଟ ପାଇଁ ଆବେଦନ କରିଥିବା ବେଳେ ୧.୩୫ ଲକ୍ଷ ଲୋକ ଅଫିସକୁ ନ ଆସି ସାର୍ଟିଫିକେଟ ପାଇପାରିଛନ୍ତି ।

କାର୍ଯ୍ୟକ୍ରମରେ ରାଜସ୍ୱ ମନ୍ତ୍ରୀ ସୁଦାମ ମାର୍ଣ୍ଡି, ମୁଖ୍ୟ ଶାସନ ସଚିବ ଅସିତ ତ୍ରିପାଠୀ, ରାଜସ୍ୱ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର, ୫ ଟି ସଚିବ ଭିକେ ପାଣ୍ଡିଆନ ଉପସ୍ଥିତ ଥିଲେ ।

୫-ଟି ସଚିବ ଏହି ଅବସରରେ ଆଠଗଡ଼, କରଞ୍ଜିଆ, ଚମ୍ପୁଆ, ଝାରସୁଗୁଡ଼ା ତହସିଲଦାର ଏବଂ ଭଞ୍ଜନଗର, କାମାକ୍ଷାନଗର ସବ-ରେଜିଷ୍ଟ୍ରାରଙ୍କ ସହ ଭିଡିଓ କନଫରେନ୍ସିଂରେ ଆଲୋଚନା କରିଥିଲେ ।

ଲୋକାଲ ୱାୟାର

ଭୁବନେଶ୍ୱର, ଫେବ୍ରୁଆରୀ ୨୫(ଲୋକାଲ ୱାୟାର): ବହୁ ଲର୍ଣ୍ଣର୍ସ ଲାଇସେନ୍ସ (ଏଲଏଲ୍‌)ଧାରୀ ଫାଇନାଲ ଟେଷ୍ଟ ଦେବାକୁ ଆସୁନାହାନ୍ତି ।

ଡ୍ରାଇଭିଂ ଲାଇସେନ୍ସ ପାଇବାକୁ କଡ଼ା ପରୀକ୍ଷା ଦେବାକୁ ପଡୁଛି ।

ବାଣିଜ୍ୟ ଓ ପରିବହନ ବିଭାଗ ସୂତ୍ରରୁ ଜଣାପଡ଼ିଛି ଆଞ୍ଚଳିକ ପରିବହନ କାର୍ଯ୍ୟାଳୟ (ଆରଟିଓ) ଗୁଡ଼ିକ ଗତ ଛଅ ମାସରେ ୧୧.୨ ଲକ୍ଷ ଲର୍ଣ୍ଣର୍ସ ଲାଇସେନ୍ସ ପ୍ରଦାନ କରିଛନ୍ତି ଓ ତିନି ଲକ୍ଷ ଆବେଦନ ପଡ଼ିରହିଛି ।

ଏହି ସମୟରେ ୩.୫ ଲକ୍ଷ ଡ୍ରାଇଭିଂ ଲାଇସେନ୍ସ ପ୍ରଦାନ କରାଯାଇଛି ଓ ୨.୭ ଲକ୍ଷ ଆବେଦନ ପଡ଼ିରହିଛି ।

ଲର୍ଣ୍ଣର୍ସ ଲାଇସେନ୍ସ ଧାରୀ ଛଅ ମାସରେ ଫାଇନାଲ ପରୀକ୍ଷା ଦେବାକୁ ନଆସିଲେ ସେମାନଙ୍କୁ ପୁଣି ଥରେ ଆବେଦନ କରିବାକୁ ପଡ଼ିବ ।

ପୂର୍ବରୁ ଆରଟିଓଗୁଡ଼ିକ ଡ୍ରାଇଭିଂ ସିମୁଲେଟର ଦ୍ୱାରା ପରୀକ୍ଷା କରାଉଥିଲେ ଓ ଆବେଦନକାରୀଙ୍କ ଦ୍ୱୈତ ନିୟନ୍ତ୍ରଣ ଥିବା ଚାରି ଚକିଆ ଗାଡ଼ି ବ୍ୟବହାର ଅନୁମତି ଦେଉଥିଲେ ।

କେତେକ କ୍ଷେତ୍ରରେ ଆବେଦନକାରୀମାନେ ଡ୍ରାଇଭିଂ ଶିଖୁଥିବା ଇନଷ୍ଟିଚ୍ୟୁଟର ଗାଡ଼ିରେ ତଥା ତାଲିମଦାତାଙ୍କ ସହାୟତା ନେଇ ପରୀକ୍ଷା ଦେଇ ପାରୁଥିଲେ ।

ଲାଇସେନ୍ସ ଆଶାୟୀଙ୍କୁ କାଗଜପତ୍ର ଠିକ୍ କରିବାକୁ ପର୍ଯ୍ୟାପ୍ତ ସମୟ ଦେବା ପରେ ଏବେ ରାଜ୍ୟ ସରକାର ଲାଇସେନ୍ସ ପ୍ରଦାନ ନିୟମ କଡ଼ାକଡ଼ି ପାଳନ କରିବାକୁ ନିଷ୍ପତ୍ତି ନେଇଛନ୍ତି ।

ବାଣିଜ୍ୟ ଓ ପରିବହନ ବିଭାଗ ରାଜ୍ୟରେ ଥିବା ସମସ୍ତ ଆରଟିଓମାନଙ୍କୁ ଡ୍ରାଇଭିଂ ସିମୁଲେଟର ଓ ଦ୍ୱୈତ ନିୟନ୍ତ୍ରଣ ଥିବା ଚାରି ଚକିଆ ଗାଡ଼ି ବ୍ୟବହାର କରି ଡିଏଲ ପାଇଁ ଡ୍ରାଇଭିଂ ଟେଷ୍ଟ ଅନୁମତି ନଦେବାକୁ ନିର୍ଦ୍ଦେଶନାମା ଜାରି କରିଛନ୍ତି ।

ଆରଟିଓ ଓ ପ୍ରଦୂଷଣ ପରୀକ୍ଷଣ କେନ୍ଦ୍ରରେ ଲାଗୁଥିବା ଭିଡ଼କୁ ଦେଖି ରାଜ୍ୟ ସରକାର ନଭେମ୍ବର ୨୦୧୯ରେ ମୋଟରଯାନ (ସଂଶୋଧନ) ନିୟମ ପ୍ରବର୍ତ୍ତନ ତିନି ମାସ କୋହଳ କରିଥିଲେ ।

ଆରଟିଓ, କଟକ ଦୁଇଟି ସିଡିଏ ସେକ୍ଟର -୬ରେ ଲର୍ଣ୍ଣର୍ସ ଲାଇସେନ ଆବେଦନକାରୀଙ୍କ ପାଇଁ ଥିବା ସହାୟତା କେନ୍ଦ୍ରରେ ଦୁଇଟି ଟଚ୍ ସ୍କ୍ରିନ କଂପ୍ୟୁଟର ଲଗାଇଛନ୍ତି ।

ମୁଖ୍ୟ ପରୀକ୍ଷା ଦେବା ପୂର୍ବରୁ ସେମାନେ ମକ୍ ଟେଷ୍ଟ ଦେଇ ପାରିବେ ।

ଯଦି ଆମକୁ ସକାରାତ୍ମକ ପ୍ରତିକ୍ରିୟା ମିଳେ ତେବେ ଏହି ବ୍ୟବସ୍ଥା ରାଜ୍ୟର ସମସ୍ତ ଟେଷ୍ଟ ସେଂଟରରେ ଆରମ୍ଭ ହେବ ।

ଆମେ ହସ୍ତଚାଳିତ କମ୍ପ୍ୟୁଟରକୁ ଟଚ୍ ସ୍କ୍ରିନରେ ବଦଳାଇବୁ ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି ।

ସ୍ଲଟ ସମୟର ୪୫ ମିନିଟ ପୂର୍ବରୁ ପହଁଚିବାକୁ ଆବେଦନକାରୀଙ୍କୁ କୁହାଯାଇଛି ।

ଆବେଦନକାରୀ ଫର୍ମ ଭରି ଆବଶ୍ୟକ କାଗଜପତ୍ର ଅପଲୋଡ କରି, ଫି ପ୍ରଦାନ କରି ଅନଲାଇନରେ ସ୍ଲଟ ବୁକ କରିପାରିବେ ।

ସେମାନେ କାଗଜପତ୍ର ଯାଞ୍ଚ ପାଇଁ ସିଧାସଳଖ ଟେଷ୍ଟ କେନ୍ଦ୍ରକୁ ଯିବେ ଓ ବାୟୋମେଟ୍ରିକ୍ସ ଦ୍ୱାରା ଟେଷ୍ଟ ଦେବେ ।

ଲୋକାଲ ୱାୟାର

ଭୁବନେଶ୍ୱର,ଫେବ୍ରୁଆରୀ ୨୫(ଲୋକାଲ ୱାୟାର): ୨୦୧୮-୧୯ରେ ଓଡ଼ିଶାର ଋଷିକୂଲ୍ୟା ମୁହାଣକୁ ବିରଳ ଅଲିଭ ରିଡଲେ ଅଣ୍ଡା ଦେବାକୁ ଆସିନାହାନ୍ତି ବୋଲି ବିଧାନସଭାରେ ଏକ ପ୍ରଶ୍ନର ଉତ୍ତରରେ କହିଛନ୍ତି ଜଙ୍ଗଲ ଓ ପରିବେଶ ମନ୍ତ୍ରୀ ।

ଋଷିକୂଲ୍ୟା ମୁହାଣ ବେଳାଭୂମିରେ ୨୦୧୪-୧୫ରେ ୩.୯ ଲକ୍ଷ, ୨୦୧୬-୧୭ରେ ୩. ୭୧ ଲକ୍ଷ ଓ ୨୦୧୭-୧୮ରେ ୪. ୪୫ ଲକ୍ଷ କଇଁଛ ଅଣ୍ଡା ଦେଇଛନ୍ତି ।

ସେ କହିଛନ୍ତି, ସରକାରଙ୍କ ବହୁ ପଦକ୍ଷେପ ସତ୍ତ୍ୱେ ଋଷିକୂଲ୍ୟା ମୁହାଣରେ ଶହ ଶହ ଅଲିଭ ରିଡଲେ କଇଁଛ ମୃତ୍ୟୁମୁଖରେ ପଡ଼ୁଛନ୍ତି ।

ଋଷିକୂଲ୍ୟା ନଦୀ ମୁହାଣରେ ନଭେମ୍ବର ଠାରୁ ମେ ମାସ ପର୍ଯ୍ୟନ୍ତ ଉକୂଳରୁ ୨୦ କିମି ସମୁଦ୍ର ଭିତରକୁ ଯନ୍ତ୍ରଚାଳିତ ବୋଟ୍ ତଥା ମାଛମରା ଉପରେ କଟକଣା କରାଯାଇଛି । ନଜର ରଖିବାକୁ ୯ଟି ସୁରକ୍ଷା ଶିବିର ରହିଥିବା ସେ କହିଛନ୍ତି ।

ଲୋକାଲ ୱାୟାର