Special

ଭୁବନେଶ୍ବର, ନଭେମ୍ବର ୨୨ (ଲୋକାଲ ୱାୟାର): ଶୁକ୍ରବାର ସହିଦ ଲକ୍ଷ୍ମଣ ନାୟକଙ୍କ ୧୨୦ତମ ଜୟନ୍ତୀରେ ସାରା ରାଜ୍ୟ ତାଙ୍କ ତ୍ୟାଗ ଓ ବଳିଦାନକୁ ସ୍ମରଣ କରୁଛି।

ଏହି ଅବସରରେ ଆସନ୍ତୁ ଏହି ମହାନ ବିପ୍ଳବୀଙ୍କ ସଂପର୍କରେ ଜାଣିବା କିଛି ଜଣା ଅଜଣା କଥା-

୧- ସହିଦ ଲକ୍ଷ୍ମଣ ନାୟକ ୧୮୯୯ ମସିହା ନଭେମ୍ବର ୨୨ ତାରିଖରେ ଅବିଭକ୍ତ କୋରାପୁଟ ଜିଲ୍ଲା (ଏବର ମାଲକାନଗିରି)ର ତେନ୍ତୁଳିଗୁମ୍ମାରେ ଜନ୍ମଲାଭ କରିଥିଲେ ।

୨- ତାଙ୍କ ବାପା ପଦଲମ ନାୟକ ସେତେବେଳେ ଜୟପୁର ରାଜାଙ୍କ ନିକଟରେ ରେଭେନ୍ୟୁ କଲେକ୍ଟର୍ ବା ମୁସ୍ତାଦାର ଭାବେ କାର୍ଯ୍ୟ କରୁଥିଲେ ବି ତାଙ୍କ ପିଲାମାନେ ବିଳାସମୟ ଜୀବନଯାପନ କରୁନଥିଲେ।

୩- କୋଲାବ ନଦୀଠାରୁ ୧୩ କିଲୋମିଟର ଦୂରରେ ଥିବା ଏହି ଗାଁରେ ପଦଲମଙ୍କ ପରିବାର ରହୁଥିବାବେଳେ ସେଠାରେ ଲକ୍ଷ୍ମଣ ସାଙ୍ଗସାଥିଙ୍କ ସହ ଖେଳିବା ସହ କୋଲାବ ନଦୀ ଅଞ୍ଚଳକୁ ଖୁବ ଭଲ ପାଉଥିଲେ ।

୪- ୧୯୩୬ ମସିହା ଏପ୍ରିଲ ପହିଲାରେ ଓଡିଶା ସ୍ଵତନ୍ତ୍ର ରାଜ୍ୟ ମାନ୍ୟତା ପାଇବା ପରେ ପ୍ରଥମ ଗଭର୍ଣ୍ଣର ସାର୍ ଜନ୍ ହଷ୍ଟିନ ହବାକ୍ ତାଙ୍କ ଅଞ୍ଚଳକୁ ପରିଦର୍ଶନରେ ଆସିଥିଲେ। ଏହି ସମୟରେ ଅଞ୍ଚଳବାସୀଙ୍କଠାରୁ ବିଭିନ୍ନ ଜିନିଷପତ୍ର ନେବା ସହ ବେଠି ଖଟିବାକୁ କହିବାକୁ ସେ ବିଚଳିତ ହୋଇଯାଇଥିଲେ ।

୫- ସେ ଏସଂପର୍କରେ କଂଗ୍ରେସ ସଭାପତି ନୀଳକଣ୍ଠ ପାତ୍ରଙ୍କୁ ଜଣାଇ ଦୁଃଖପ୍ରକାଶ କରିଥିଲେ ଓ ନୀଳକଣ୍ଠ ଏହାକୁ ଖବରକାଗଜରେ ପ୍ରକାଶ କରିଦେବାରୁ ଇଂରେଜମାନେ ତାଙ୍କ ଅଞ୍ଚଳବାସୀଙ୍କଠାରୁ ନେଇଥିବା ଜିନିଷପତ୍ର ଫେରାଇ ଦେଇଥିଲେ ।

୬- ୧୯୩୭ ମସିହାରେ ରାଧାକୃଷ୍ଣ ବିଶ୍ବାସରାୟଙ୍କ ଜୟପୁର ନୂଆପୁଟସ୍ଥିତ ବାସଭବନରେ ମହାତ୍ମା ଗାନ୍ଧୀଙ୍କ ଆଦର୍ଶ ନୀତି ଓ ଶୃଙ୍ଖଳିତ ଜୀବନଯାପନ ସଂପର୍କରେ ଶିକ୍ଷାଲାଭ କରି ଲକ୍ଷ୍ମଣ ନିଜ ଘରକୁ ଫେରିଯାଇଥିଲେ ।

୭-୧୯୪୨ ମସିହା ଅଗଷ୍ଟ ୨୧ ତାରିଖରେ ଲକ୍ଷ୍ମଣ ନାୟକ କିଛି ସହଯୋଗୀଙ୍କ ସହ ମାଥିଲି ଥାନାରେ ତ୍ରିରଙ୍ଗା ପତାକା ଲଗାଇବାକୁ ଯାଇଥିଲେ ।

୮- ପୁଲିସ କର୍ମୀଙ୍କ ବିରୋଧ ଯୋଗୁଁ ସେଠାରେ ଉତ୍ତେଜନା ପ୍ରକାଶ ପାଇଥିଲା ଓ ପୁଲିସ କର୍ମୀମାନେ ଗୁଳି ଚାଳନା କରିଥିଲେ, ଯେଉଁଥିରେ ଫରେଷ୍ଟଗାର୍ଡ ଜି.ରାମାୟାଙ୍କ ମୃତ୍ୟୁ ଘଟିଥିଲା। ଏହି ଘଟଣାକୁ ନେଇ ପୁଲିସ ଲକ୍ଷ୍ମଣ ନାୟକଙ୍କୁ ବନ୍ଧୁକରେ ମାରି ଅଚେତ କରିଦେବା ସହ ମୃତ ବୋଲି ଭାବି ଜଙ୍ଗଲରେ ଫୋପାଡିଦେଇଚାଲିଯାଇଥିଲା ।

୯- ଚେତା ଫେରିବା ପରେ ଲକ୍ଷ୍ମଣ ଜଙ୍ଗଲ ରାସ୍ତା ଦେଇ ଜୟପୁରରେ ପହଞ୍ଚିଥିଲେ ଆଉ ସେପଟେ ପୁଲିସ ତାଙ୍କ ମୃତଦେହ ନପାଇ ଫରେଷ୍ଟଗାର୍ଡଙ୍କ ହତ୍ୟା ଅଭିଯୋଗରେ ତାଙ୍କୁ ଆତ୍ମସମର୍ପଣ କରିବାକୁ କହି ଲୋକଙ୍କୁ ଅତ୍ୟାଚାର କରୁଥିଲା ।

୧୦- ଲୋକଙ୍କ ଉପରେ ଅତ୍ୟାଚାର ସହିନପାରି ଲକ୍ଷ୍ମଣ ଫେରିଆସିବାରୁ ୧୯୪୨ ମସିହା ସେପ୍ଟେମ୍ବର ୨ ତାରିଖରେ ତାଙ୍କୁ ଗିରଫ କରାଯିବା ପରେ ୧୯୪୩ ମାର୍ଚ୍ଚ ୨୯ ତାରିଖରେ ପାଟଣା ହାଇକୋର୍ଟଙ୍କ ନିର୍ଦ୍ଦେଶକ୍ରମେ ତାଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା ।

ଲୋକାଲ ୱାୟାର

ଭୁବନେଶ୍ବର, ନଭେମ୍ବର ୨୨ (ଲୋକାଲ ୱାୟାର): ପ୍ରାକୃତିକ ସଂପଦରେ ଭରପୁର ଓଡ଼ିଶା ଲୁହାପଥର, କୋଇଲା, ବକ୍ସାଇଟ୍, ମାଙ୍ଗାନିଜ ଓ ଜିପସମ୍ ଭଳି ଖଣିଜ ପଦାର୍ଥ ପାଇଁ ସାରା ଦେଶରେ, ଏପରିକି ପୃଥିବୀରେ ମଧ୍ୟ ନାଁ କରିଛି।

ଏସବୁ ବାଦ୍ ରାଜ୍ୟରେ ଏଭଳି ଆହୁରି ଅନକେ ଖଣିଜ ଅଛି, ଯାହା ସଂପର୍କରେ ଆମେ କମ୍ ଜାଣୁ ବା ଯେଉଁଗୁଡ଼ିକ ସଂପର୍କରେ ଅଧିକ ଆଲୋଚନା ହୁଏନାହିଁ।

ଆସନ୍ତୁ ଜାଣିବା, ସେଭଳି କେତେକ ଖଣିଜ ପଦାର୍ଥ ସଂପର୍କରେ-

(୧) କୋଇଲା ଖଣିରେ ଭରପୁର ଓଡ଼ିଶା, ତେଣୁ ଏଠାକାର କେତେକ ସ୍ଥାନରେ ହୀରା ମଧ୍ୟ ମିଳେ। କାରଣ କୋଇଲାରୁ ହିଁ ହୀରାର ଉତ୍ପତ୍ତି ହୋଇଥାଏ।

ନୂଆପଡ଼ା ଜିଲ୍ଲାର କଲମିଦରାର ଉପତ୍ୟକା ଓ ମହାନଦୀର ପଥୁରିଆ ଶଯ୍ୟାରେ ହୀରା ମିଳେ।

(୨) ଅଗ୍ନି ମୃତ୍ତିକା ବା ଫାୟାର କ୍ଲେ ପାଇଁ ମଧ୍ୟ ଓଡ଼ିଶାର ବେଶ୍ ପରିଚିତି ରହିଛି।

ଏହି ମୃତ୍ତିକା ବିଶେଷକରି କଳକାରଖାନାରେ ବ୍ୟବହୃତ ହୁଏ।

ଫାୟାର୍ କ୍ଲେର ବିଶେଷତ୍ବ ହେଉଛି, ଯେତେ ଡିଗ୍ରୀ ତାପମାତ୍ରା ବୃଦ୍ଧି କଲେ ମଧ୍ୟ ଏହା ତକଳେ ନାହିଁ କି ତାର ଆକାରରେ କୌଣସି ପରିବର୍ତ୍ତନ ଘଟେନାହିଁ।

ଓଡ଼ିଶା ମାଟିରେ ୧୭୬ ନିୟୁତ ଟନ୍ ଅଗ୍ନି ମୃତ୍ତିକା ଗଚ୍ଛିତ ଥିବା ଏକ ତଥ୍ୟରୁ ଜଣାପଡ଼େ।

(୩) ମାଟି, ପଥର ଓ ଜଳଉତ୍ସରୁ ମିଳୁଥିବା ଥୋରିୟମ୍ ପାଇଁ ମଧ୍ୟ ଓଡ଼ିଶାର ନାଁ ରହିଛି।

ନ୍ୟୁକ୍ଲିୟର୍ ରିଆକ୍ଟରଗୁଡ଼ିକରେ ଏହା ଇନ୍ଧନ ଭାବେ ବ୍ୟବହୃତ ହୋଇଥାଏ।

କ୍ୟାମେରା ଲେନ୍ସ ଓ ଗବେଷଣାଗାରରେ ବ୍ୟବହାର ହେଉଥିବା ଅନ୍ୟ କେତେକ ସାମଗ୍ରୀରେ ମଧ୍ୟ ଏହା ବ୍ୟବହାର ହୁଏ।

ରାଜ୍ୟର ବରଗଡ଼, ଝାରସୁଗୁଡ଼ା, ଦେବଗଡ଼, ମୟୂରଭଞ୍ଜ ଓ ଯାଜପୁର ଜିଲ୍ଲା ଥୋରିୟମ୍ ପାଇଁ ପ୍ରସିଦ୍ଧ।

(୪) ଓଡ଼ିଶାରେ ଚୀନାମାଟି ବା ଚାଇନା କ୍ଲେର ଭଣ୍ଡାର ବି ରହିଛି।

ସେରାମିକ୍ ତଥା ରବର ଶିଳ୍ପ ପାଇଁ ଏହା ଏକ ଜରୁରୀ କଞ୍ଚାମାଲ।

ସେହିପରି ପେପର୍ କୋଟିଂ, ବୟନ ଶିଳ୍ପ ଏବଂ କୀଟନାଶକ ପ୍ରସ୍ତୁତିରେ ଏହାର ବ୍ୟବହାର ହୋଇଥାଏ।

ମୟୂରଭଞ୍ଜ, କେନ୍ଦୁଝର, ନବରଙ୍ଗପୁର, ରାୟଗଡ଼ା ଓ ବରଗଡ଼ ଜିଲ୍ଲାରେ ଚାଇନା କ୍ଲେ ଉପଲବ୍ଧ ହୋଇ ରହିଛି।

(୫) କଂକ୍ରିଟ୍ ପାଇଁ ସବୁଠାରୁ ବେଶି ଦରକାରୀ ସିମେଣ୍ଟର ଆତ୍ମା ହେଉଛି ଲାଇମଷ୍ଟେନ୍ ଆଉ ଓଡ଼ିଶାରେ ବିପୁଳ ପରିମାଣରେ ଏହି ଖଣିଜ ସଂପଦ ରହିଛି।

ଟୁଥପେଷ୍ଟ, ବିଭିନ୍ନ ରଂଗ ଓ ଅନ୍ୟ କେତେକ ରସାୟନିକ ସାମଗ୍ରୀ ପାଇଁ ମଧ୍ୟ ଏହା ହେଉଛି ପ୍ରମୁଖ କଞ୍ଚାମାଲ।

କୋରାପୁଟ, ମାଲକାନଗିରି, ନୂଆପଡ଼ା, ବଲାଙ୍ଗିର ଓ ବରଗଡ଼ ଜିଲ୍ଲାରେ ରାଇମଷ୍ଟୋନ୍ ଖଣି ରହିଛି।

(୬) ପେନସିଲ୍ ଠାରୁ ଆରମ୍ଭ କରି ସିଙ୍ଗିଲ୍ ୟୁଜ୍ ବ୍ୟାଟେରୀ, ଏପରିକି ନ୍ୟୁକ୍ଲିୟର୍ ରିଆକ୍ଟରରେ ବ୍ୟବହୃତ ହେଉଥିବା ଗ୍ରାଫାଇଟ୍ ପାଇଁ ବି ଓଡ଼ିଶାର ପ୍ରସିଦ୍ଧି ରହିଛି।

ଅନୁଗୁଳ, ବଲାଙ୍ଗିର ଓ କନ୍ଧମାଳ ଜିଲ୍ଲା ଏଥିପାଇଁ ପ୍ରସିଦ୍ଧ।

(୭) ଓଡ଼ିଶାରେ ରହିଛି ୪୮୦ କିଲୋମିଟ ବ୍ୟପ୍ତ ସୁଦୃଶ୍ୟ ଉପକୂଳ।

ଏହି ଉପକୂଳରେ ଭରିରହିଛି ସାମୁଦ୍ରିକ ବାଲି (ମିନେରାଲ୍ ସ୍ୟାଣ୍ଡ), ଯାହାକୁ ମଧ୍ୟ ପ୍ରାକୃତିକ ସଂପଦ ବା ଖଣିଜ ସଂପଦ ଭାବେ ଗଣାଯାଏ।

ହିସାବ ଅନୁସାରେ, ଓଡ଼ିଶାରେ ୮୨ ନିୟୁତ ଟନ୍ ଏହି ବାଲି ରହିଛି, ଯାହାରି ଭିତରେ ଇଲମିନାଇଟ୍ ଏବଂ ରୁଟାଇଲ୍ ଭଳି ପଦାର୍ଥ ଭରି ରହିଛି।

ଏହା ଖୁବ୍ ହାଲୁକା ହୋଇଥିବାରୁ ଉଡ଼ାଜାହାଜ ନିର୍ମାଣରେ ବ୍ୟବହୃତ ହୁଏ।

ଜିରିକୋନିୟମ୍, ମୋନାଜିଟ୍, ଗାର୍ନେଟ୍ ଓ ସିଲିମାନାଇଟ୍ ମଧ୍ୟ ଏହାର ଅନ୍ତର୍ଭୁକ୍ତ।

(୮) ଇସ୍ପାତ ଶିଳ୍ପ ପାଇଁ ସବୁଠାରୁ ଦରକାରୀ ସାମଗ୍ରୀ ହେଉଛି କ୍ରୋମାଇଟ୍ ଏବଂ ଓଡ଼ିଶା ଏହି ଦୃଷ୍ଟିରୁ ବେଶ୍ ଧନୀ ରାଜ୍ୟ ଭାବେ ଜଣାଶୁଣା।

ମୋବାଇଲ୍ ଫୋନ୍, ମେଡିକାଲ୍ ସରଞ୍ଜାମ ଏବଂ ଆଲୟଜ୍ ତିଆରିରେ ଏହା ବ୍ୟବହୃତ ହୁଏ।

ଯାଜପୁର ଜିଲ୍ଲାର ସୁକିନ୍ଦା ଉପତ୍ୟକାରେ ଦେଶର ୯୬ ପ୍ରତିଶତ କ୍ରୋମିୟମ୍ ଗଚ୍ଛିତ ରହିଛି।

ଲୋକାଲ ୱାୟାର

ଭୁବନେଶ୍ବର, ନଭେମ୍ବର ୨୨ (ଲୋକାଲ ୱାୟାର): ଗତ ବୁଧବାର ରାତିରେ ବେଶ୍ ଏକ ନାଟକୀୟ ଘଟଣାକ୍ରମରେ ସରକାର ରାଜ୍ୟ ପୁଲିସ ମହାନିର୍ଦ୍ଦେଶକ (ଡିଜିପି) ଥିବା ବିଜୟ କୁମାର ଶର୍ମାଙ୍କୁ ପଦରୁ ବିଦା କରିଦେବା ଘଟଣାକୁ ନେଇ ସବୁଠି ଚର୍ଚ୍ଚା।

ବଡ଼କଥା ହେଉଛି, ନୂଆ ଡିଜିପି ଅଭୟ କାର୍ଯ୍ୟରେ ଯୋଗ ଦେବା ଯାଏ ବି ବିଜୟଙ୍କୁ ସୁଯୋଗ ନଦେଇ ତତ୍କାଳ ପଦ ଛାଡ଼ିବାକୁ କୁହାଗଲା ଏବଂ ଗତକାଲି ସତ୍ୟଜିତ ମହାନ୍ତିଙ୍କୁ ମଧ୍ୟବର୍ତ୍ତୀକାଳୀନ ଦାୟିତ୍ବ ଦିଆଗଲା।

କେବଳ ଏତିକି ନୁହେଁ, ବିଜୟ ଅଗ୍ନିଶମ ବିଭାଗ ମୁଖ୍ୟ ଥିବାବେଳେ ବିଭିନ୍ନ ମଲ୍. ହୋଟେଲ୍ ତଥା ବ୍ୟାବସାୟିକ ପ୍ରତିଷ୍ଠାନଙ୍କୁ ଅଗ୍ନିଶମ ସୁରକ୍ଷା ସଂକ୍ରାନ୍ତ ପ୍ରମାଣପତ୍ର ଦେବାରେ ଅନିୟମିତତା ଅଭିଯୋଗର ତଦନ୍ତ ଲାଗି ଗଠିତ କମିଟି ବୈଠକ ଚବିଶ ଘଣ୍ଟା ଭିତରେ ବସିଥିବା ସୂଚନା ମିଳିଛି।

ଏଥିସହିତ ଅଗ୍ନିଶମ ବିଭାଗରେ ଗତକାଲି ବଡ଼ଧରଣର ଅଦଳବଦଳ ବି କରାଯାଇଛି।

ଏହା କେଉଁସବୁ ସଙ୍କେତ ଦେଉଛି, ତାହା ହିଁ ପାଲଟିଛି ଚର୍ଚ୍ଚାର ବିଷୟ।

ବିଜୟ ଦୁଇ ବର୍ଷ ଧରି ଅଗ୍ନିଶମ ବିଭାଗର ମୁଖିଆ ଥିଲେ ଏବଂ ଏହି ସମୟରେ ଅଗ୍ନିଶମ ସୁରକ୍ଷା ପ୍ରମାଣପତ୍ର ପ୍ରଦାନରେ ଅନିୟମିତତା ଅଭିଯୋଗ ଆସିଥିଲା ଓ ବିଜୟଙ୍କୁ ହଟାଇବା ପରେ ମୁଖ୍ୟ ଶାସନ ସଚିବଙ୍କ ନେତୃତ୍ବରେ ତଦନ୍ତ କମିଟି ଗଠନ ହୋଇଛି।

ତେବେ ଅନିୟମିତତା ପାଇଁ ବିଜୟ ପଦ ହରାଇଥିବା କହିବା ସଂପୂର୍ଣ୍ଣ ଭାବେ ଠିକ୍ ହେବ ନାହିଁ ବୋଲି ପୂର୍ବତନ ଡିଜିପି ବିପିନ ବିହାରୀ ମିଶ୍ର ମତ ଦେଇଛନ୍ତି।

ତାଙ୍କ କହିବା ଅନୁସାରେ, କର୍ମଚାରୀଙ୍କୁ ଅଦଳବଦଳ କରିବା ସରକାରଙ୍କ କ୍ଷମତା ପରିସରଭୁକ୍ତ।

ପୂବର୍ତନ ପୁଲିସ ଡିଜି ସଂଜୀବ ମାରିକ୍ ମଧ୍ୟ ସମାନ ମତ ରଖିଛନ୍ତି।

ତେବେ ନିଜ ନାମ ପ୍ରକାଶ କରିବାକୁ ମନା କରି ଆଉ କେତେକ ବରିଷ୍ଠ ଆଇ.ପି.ଏସ୍. ଅଫିସର୍ କହିଛନ୍ତି ଯେ, ସରକାରୀ ବ୍ୟବସ୍ଥା ଭିତରେ ଅନେକ ଭଲ ଅଫିସର୍ ଥିଲେ ବି ହାତଗଣତି କିଛି ଲୋକଙ୍କ ପାଇଁ ପୂରା ପୁଲିସ ପ୍ରଶାସନ ବଦନାମ ହେଉଛି।

ଅନ୍ୟପକ୍ଷରେ କେବଳ ପୁଲିସ ବାହିନୀ ନୁହେଁ, ଅନ୍ୟ ବିଭାଗରେ ମଧ୍ୟ ଏଭଳି ଲୋକ ରହିବା ସ୍ବାଭାବିକ ବୋଲି ପୂର୍ବତନ ଡିଜିପି ବିପିନ ବିହାରୀ ମିଶ୍ର ମନ୍ତବ୍ୟ ରଖିଛନ୍ତି।

ଆଜି ଦୈନିକ ଖବରକାଗଜ ‘ସମ୍ବାଦ’ରେ ପ୍ରକାଶ ପାଇଛି- ‘ଯେଉଁ ସମୟରେ ବରିଷ୍ଠ ଆଇପିଏସ୍ ଅଫିସର୍ ବିଜୟ ଶର୍ମା ନିୟମିତ ବା ପୂର୍ଣ୍ଣକାଳୀନ ଡିଜି ଭାବେ ନିଯୁକ୍ତି ପାଇବା କଥା ବୋଲି ଆଶା କରାଯାଉଥିଲା, ଠିକ୍ ସେହି ସମୟରେ ରାଜ୍ୟ ସରକାର ତାଙ୍କୁ ଅତ୍ୟନ୍ତ କଠୋର ଦଣ୍ଡରେ ଦଣ୍ଡିତ କରିଛନ୍ତି।

ପୁଲିସ ମହାନିର୍ଦ୍ଦେଶକ ପଦରୁ ବିଦା କରିବା ସହିତ ଶ୍ରୀଶର୍ମାଙ୍କୁ ରାଜ୍ୟ ସରକାର ଅନିୟମିତତା ସଜାଲରେ ଛନ୍ଦି ଦେଇଛନ୍ତି।

ଏମିତି ଯେ ଗୋଟିଏ ଦିନରେ ତାଙ୍କର ଭାଗ୍ୟ ଗୃହ ବିଭାଗ ଭିତରେ ମୋଡ଼ି ମକଚି ହୋଇଯାଇଛି।’

ସେପଟେ ‘ସମାଜ’ ସମ୍ବାଦପତ୍ରରେ ମଧ୍ୟ ଏ ସଂକ୍ରାନ୍ତରେ ଦୁଇଟି ଖବର ପ୍ରକାଶ ପାଇଛି।

ପ୍ରଥମଟି ହେଉଛି ‘ବିଜୟ ଶର୍ମାଙ୍କ ବିରୋଧରେ ତଦନ୍ତ କମିଟିର ପ୍ରଥମ ବୈଠକ’ ଏବଂ ଦ୍ବିତୀୟଟି ‘ଅଗ୍ନିଶମ ସେବା ନିର୍ଦ୍ଦେଶାଳୟରୁ ହଟିଲେ ଦୁଇ ଅଧିକାରୀ’।

ଅଗ୍ନିଶମ ସୁରକ୍ଷା ସଂକ୍ରାନ୍ତ ସାର୍ଟିଫିକେଟ ପ୍ରଦାନରେ ଅନିୟମିତତା ନେଇ ସରକାର ଗଢ଼ିଥିବା ତଦନ୍ତ କମିଟିର ପ୍ରଥମ ବୈଠକ ଗତକାଲି ଲୋକସେବା ଭବନରେ ବସିଥିବା ନେଇ ‘ସମାଜ’ର ରିପୋର୍ଟରେ ଏଭଳି ଖବର ପ୍ରକାଶ ପାଇଛି- ‘ବୈଠକରେ ତଦନ୍ତର ରୂପରେଖ ନେଇ ଆଲୋଚନା ହେବା ସହ ଅଗ୍ନିଶମ ନିର୍ଦ୍ଦେଶାଳୟରୁ ଅଭିଯୋଗ ସମ୍ବନ୍ଧୀୟ ସମସ୍ତ ଫାଇଲକୁ ମଗାଯାଇଛି।

ଫାଇଲଗୁଡ଼ିକର ତର୍ଜମା କରାଯାଇ କି ପ୍ରକାର ଅନିୟମିତତା ହୋଇଛି ଏବଂ କେଉଁ ପରିସ୍ଥିତିରେ ଅଗ୍ନି ନିରାପତ୍ତା ପ୍ରମାଣପତ୍ର ଦେବାରେ ବିଳମ୍ବ କରାଯାଇଛି, ସେଦିଗ ପ୍ରତି ଧ୍ୟାନ ଦିଆଯିବ ବୋଲି ବୈଠକରେ ଆଲୋଚନା ହୋଇଛି।’

ଅନ୍ୟପକ୍ଷରେ’ପ୍ରଗତିବାଦୀ’ରେ ପ୍ରକାଶ ପାଇଛି ଯେ- ମଙ୍ଗଳବାର ‘ସଂଧ୍ୟାରେ ଅଗ୍ନିଶମ ସେବା ପ୍ରମାଣପତ୍ର ପ୍ରଦାନ କ୍ଷମତା ମହାନିର୍ଦ୍ଦେଶକଙ୍କ ହାତରୁ କାଢ଼ିନିଆଯାଇ କ୍ଷେତ୍ର କର୍ମଚାରୀଙ୍କୁ ଦିଆଯାଇଥିଲା ଓ ତାର ଚବିଶ ଘଣ୍ଟା ନପୂରୁଣୁ ମହାନିର୍ଦ୍ଦେଶକ ପଦବୀରେ ଥିବା ବିଜୟ ଶର୍ମାଙ୍କୁ ବିଦା କରିଦିଆଗଲା।

ବିଧାନସଭା ଅଧିବେଶନ ଚାଲିଥିବାବେଳେ ସାଧାରଣତଃ ଏପରି ବଡ଼ ନିଷ୍ପତ୍ତି ନିଆଯାଇନଥାଏ। କିନ୍ତୁ ସରକାର ସବୁକିଛି ବିଳମ୍ବିତ ସନ୍ଧ୍ୟାରୁ ମଧ୍ୟରାତ୍ର ସୁଦ୍ଧା ଏକ ବଡ଼ ଅପରେସନରେ ପୂର୍ଣ୍ଣାଙ୍ଗ କରିଦେଲେ।’

ଗଲା ୧୯ ବର୍ଷ ଭିତରେ ରାଜ୍ୟରେ ୧୫ ଜଣ ପୁଲିସ ମୁଖିଆ ବଦଳିସାରିଥିବାବେଳେ ଏହାକୁ ନେଇ ଗତକାଲି ବିଧାନସଭାରେ ମଧ୍ୟ ବିରୋଧୀ ସରକାରଙ୍କ ସମାଲୋଚନା କରିଛନ୍ତି।

ଡିଜିପି ପଦବୀ ସରକାରଙ୍କ ଲାଗି କଣ୍ଢେଇ ଭଳି ହୋଇସାରିଥିବା ସେମାନେ ଅଭିଯୋଗ ଉଠାଇଥିବାବେଳେ ଏହାକୁ ମଧ୍ୟ ‘ଟାଇମ୍ସ ଅଫ୍ ଇଣ୍ଡିଆ’ ଭଳି କେତେକ ଖବରକାଗଜ ଅଗ୍ରାଧିକାର ଦେଇଛନ୍ତି।

ବିଭିନ୍ନ ଖବରକାଗଜରେ ପ୍ରକାଶ ପାଇଥିବା ସମ୍ବାଦକୁ ନେଇ ହେଉଥିବା ଚର୍ଚ୍ଚା ଅନୁସାରେ, ବିଜୟ କୁମାର ଶର୍ମା ଅଗ୍ନିଶମ ବିଭାଗ ଦାୟିତ୍ୱରେ ଥିବାବେଳେ ବହୁ ହୋଟେଲ, ମେଡିକାଲ୍, ମଲ୍, ବ୍ୟାବସାୟିକ ପ୍ରତିଷ୍ଠାନ ଓ ଅନ୍ୟ ସଂସ୍ଥାର ସମସ୍ତ ଭିତ୍ତିଭୂମି ଥାଇ ବି ଫାୟାର ସେଫଟି ସାର୍ଟିଫିକେଟ୍ ପାଇନଥିଲେ।

ଏଭଳି ଶହ ଶହ ସାର୍ଟିଫିକେଟ୍ ବିଭାଗରେ ପଡ଼ିରହିଥିବା ଅଭିଯୋଗ ଉଠିଥିଲା।

ଜାଣି ଜାଣି ଏସବୁ ଆବେଦନକୁ ଚାପି ଦିଆଯାଇଥିବା ଅଭିଯୋଗ ବି ହୋଇଥିଲା।

ଅଳ୍ପଦିନ ତଳେ ଭୁବନେଶ୍ବର କଳ୍ପନା ଅଞ୍ଚଳର କନିକା ମଲ୍ ସମେତ ଆଉ କେତେକ ବ୍ୟାବସାୟିକ ପ୍ରତିଷ୍ଠାନ ଉପରେ କମିଶନରେଟ ପୁଲିସ ଚଢ଼ାଉ କରିଥିଲା ।

ଏପରିକି କନିକା ମଲ୍ ଅଞ୍ଚଳରେ ପୁଲିସ ୧୪୪ ଧାରା ଜାରି କରାଯାଇଥିଲା ।

ସବୁ ସର୍ତ୍ତ ପାଳନ କରିଥିଲେ ବି ଏଭଳି କେତେକ ମଲକୁ ନିୟମ ଅନୁସାରେ ଅଗ୍ନିଶମ ସୁରକ୍ଷା ପ୍ରମାଣପତ୍ର ମିଳିନଥିବା କୁହାଯାଉଛି।

ଏହାରି ଭିତରେ ଗତ ୧୯ ତାରିଖ ସରକାର ଅଗ୍ନିଶମ ବିଭାଗର ତଳିଆ ଅଧିକାରୀ ଫାୟାର ସେଫ୍ଟି ପ୍ରମାଣପତ୍ର ଦେଇପାରିବେ ବୋଲି ନିର୍ଦ୍ଦେଶ ଦେଲେ।

ସୂଚନାଯୋଗ୍ୟ, ଆଜିର ଖବରକାଗଜରେ ଡିଜିପି ବଦଳ ନେଇ ଯେଉଁସବୁ ତର୍ଜମା ପ୍ରକାଶ ପାଇଛି, ସେ ସଂପର୍କରେ ସରକାରୀ ଭାବେ କେହି ମୁହଁ ଖୋଲିନାହାନ୍ତି ଓ ଏସବୁ ପ୍ରସଙ୍ଗରେ ବିଦାୟୀ ଡିଜିପିଙ୍କ ମତାମତ ମଧ୍ୟ ଆମର ହସ୍ତଗତ ହୋଇନାହିଁ।

ଲୋକାଲ ୱାୟାର

ଭୁବନେଶ୍ୱର, ନଭେମ୍ବର ୨୨ (ଲୋକାଲ ୱାୟାର): ବାହାରୁ ଦେଖିଲେ ବିଶେଷ କିଛି ସ୍ୱାତନ୍ତ୍ର‌୍ୟ ଥିଲା ଭଳି ମନେ ହେବ ନାହିଁ । ହେଲେ ଯେତେବେଳେ ପାଖରେ ପହଞ୍ଚିଯିବେ ଅନୁଭବ କରିପାରିବେ ଏହି ସ୍ଥାନର ଆକର୍ଷଣ ।

ଆମେ କହୁଛୁ ଖୋର୍ଦ୍ଧା ଜିଲ୍ଲାର ଏକ ଛୋଟ ଗାଁ ମଙ୍ଗଳାଯୋଡ଼ି ବିଷୟରେ । ଚିଲିକା ହ୍ରଦର ଉତ୍ତର ଦିଗରେ ଅବସ୍ଥିତ ଏହି ଛୋଟ ଗାଁ । ଗାଁଟିର ଆକର୍ଷଣ କହିଲେ ଦେଶୀ ବିଦେଶୀ ପକ୍ଷୀଙ୍କ ସମାହାର ।

ଚିଲିକା ପାଖକୁ ଲାଗିଥିବାରୁ ଏକ ବିଶାଳ କର୍ଦ୍ଦମାକ୍ତ ଜଳାଶୟ ଏହି ଗାଁକୁ ଲାଗି ଅବସ୍ଥିତ ଯାହାକି ଚିଲିକା ହ୍ରଦରେ ହିଁ ମିଶିଛି ।

ଶୀତଦିନେ ଚିଲିକା ଆସୁଥିବା ବିଦେଶୀ ପକ୍ଷୀମାନଙ୍କ ମଧ୍ୟରୁ ଅନେକ ଏହି ଜଳଭୂମିକୁ ଖାଦ୍ୟ ଅନ୍ୱେଷଣରେ ଚାଲି ଆସନ୍ତି ।

ଅକ୍ଟୋବରରୁ ଫେବ୍ରୁଆରୀ ମାସ ମଧ୍ୟରେ ସାରା ମଙ୍ଗଳାଯୋଡ଼ିରେ ଗୁଞ୍ଜରିତ ହୋଇଥାଏ ଜାତିଜାତିକା ପକ୍ଷୀଙ୍କ କାକଳି ।

କେବଳ ବିଦେଶୀ ପକ୍ଷୀ ଯେ ମଙ୍ଗଳାଯୋଡ଼ିର ଅତିଥି ହୁଅନ୍ତି ତାହା ନୁହେଁ ।

ମଙ୍ଗଳାଯୋଡ଼ିରେ ଶୀତର ହାଲୁକା ପରଶଟିଏ ବାଜିଲା ମାତ୍ରେ ଦେଶୀ ପକ୍ଷୀମାନେ ବି ହାଜର ହୋଇଯାଆନ୍ତି ସେମାନଙ୍କ ବିଦେଶୀ ବନ୍ଧୁଙ୍କ ସହିତ ଆସର ଜମାଇବା ପାଇଁ ।

ଏହି ସମୟରେ ସେମାନଙ୍କ ପାଇଁ ଖାଦ୍ୟର ଅଭାବ ରହେ ନାହିଁ । ଛୋଟ ଛୋଟ ମାଛ, ଜଳଚର କୀଟପତଙ୍ଗ, ଗେଣ୍ଡା ଏମିତିକି ଛୋଟ ଛୋଟ ସାପ ମଧ୍ୟ ଏହିସବୁ ପକ୍ଷୀମାନଙ୍କ ଖାଦ୍ୟ ପାଲଟିଥାଆନ୍ତି ।

ଚିଲିକାର ଅଂଶବିଶେଷ ହୋଇଥିବାରୁ ମଙ୍ଗଳାଯୋଡ଼ିର ଆକର୍ଷଣ ଦିନକୁ ଦିନ ବଡ଼ିବାରେ ଲାଗିଛି ।

ଚିଲିକାରେ ଏବେ ବି ଲୁଚାଛପାରେ ପକ୍ଷୀ ଶିକାର ଚାଲିଛି ବୋଲି ଅଭିଯୋଗ ହୁଏ ।

ମାତ୍ର ମଙ୍ଗଳାଯୋଡ଼ିରେ ଏହା ସମ୍ଭବ ନୁହେଁ । କାରଣ ଗ୍ରାମବାସୀମାନେ ହିଁ ପକ୍ଷୀମାନଙ୍କୁ ସୁରକ୍ଷା ଯୋଗାଇ ଦେଉଛନ୍ତି । ଗ୍ରାମବାସୀମାନଙ୍କ କହିବା କଥା,ଏହି ପକ୍ଷୀମାନେ ଏବେ ସେମାନଙ୍କ ଜୀବିକାର୍ଜନର ଏକ ସାହାରା ପାଲଟିଛନ୍ତି ।

କିନ୍ତୁ ଆପଣ ଜାଣି ଆଶ୍ଚର୍ଯ୍ୟ ହେବେ, ଦିନେ ଏହି ଗାଁର ଲୋକମାନେ ହିଁ ପକ୍ଷୀମାନଙ୍କ ସବୁଠୁ ବଡ଼ ଶତ୍ରୁ ଥିଲେ ।

ହେଲେ ଦିନେ ସେହି ଗ୍ରାମର କିଛି ବ୍ୟକ୍ତି ଅନୁଭବ କଲେ ନିରୀହ ପକ୍ଷୀମାନଙ୍କୁ ଶିକାର କରି ସେମାନେ କେତେବଡ଼ ଭୁଲ୍ କରୁଛନ୍ତି ।

ବାସ୍ ସେବେଠାରୁ ଗ୍ରାମବାସୀ ଶପଥ କଲେ ଯେ ସେମାନେ ପକ୍ଷୀଙ୍କୁ ଶିକାର କରିବେ ନାହିଁ କି ପକ୍ଷୀ ଶିକାରୀମାନଙ୍କୁ ଗାଁ ଭିତରକୁ ପ୍ରବେଶ କରାଇଦେବେ ନାହିଁ ।

ମଙ୍ଗଳାଯୋଡ଼ିରେ ଇରାକ, ଇରାନ, ସର୍ବିଆ, ସାଇବେରିଆ ଏବଂ ହିମାଳୟରୁ ଜାତିଜାତିକା ପକ୍ଷୀ ଖାଦ୍ୟ ଅନ୍ୱେଷଣରେ ଆସିଥାଆନ୍ତି ।

ଶୀତଦିନେ ମଙ୍ଗଳାଯୋଡ଼ିରେ ୧୩୫ରୁ ଅଧିକ ପ୍ରଜାତିର ପକ୍ଷୀ ଦେଖିବାକୁ ମିଳନ୍ତି । ଇକୋ-ଟୁରିଜିମରେ ରୁଚି ରଖୁଥିବା ପର୍ଯ୍ୟଟକମାନଙ୍କ ପାଇଁ ମଙ୍ଗଳାଯୋଡ଼ି ନିଶ୍ଚିତ ଭାବେ ଏକ ଭଲ ବିକଳ୍ପ ।

ଆଉ ପକ୍ଷୀପ୍ରେମୀଙ୍କ କଥା ନ କହିବା ଭଲ । ଅକ୍ଟୋବର ମାସ ନ ସରୁଣୁ ହଜାର ହୋଇଯାଆନ୍ତି ଏହି ଛୋଟ ଗାଁ ଟିରେ । ଏଠାରେ ବୋଟ୍ ସଫାରିର ବ୍ୟବସ୍ଥା ଉପଲବ୍ଧ ।

ତିନିରୁ ଚାରି ଘଣ୍ଟା ବୋଟରେ ବସି ମଙ୍ଗଳାଯୋଡ଼ିର ସେହି ସନ୍ତସନ୍ତିଆ ଜଳଭୂମିରେ ବୁଲିଲେ ଦେଖିବାକୁ ମିଳିଥାଏ ଅଜଣା ଅନେକ ପକ୍ଷୀଙ୍କ ଦର୍ଶନ ।

କଳା ଡେଣାଥିବା ଷ୍ଟିଲ୍ଟ, ସ୍ୟାଣ୍ଡପାଇପର୍, ବାଇଗଣୀ ସ୍ୱାମ୍ପହେନ୍, ଓପନ୍ ବିଲ୍ ଷ୍ଟର୍କ, ଚମକଦାର ଆଇବିସ୍ ଆଦି ଅନେକ ସୁନ୍ଦର ପକ୍ଷୀ ।

କିପରି ଯିବେ  ?

ଜାତୀୟ ରାଜପଥ-୧୬ରେ ଭୁବନେଶ୍ୱରରୁ ବ୍ରହ୍ମପୁର ଯିବା ରାସ୍ତାରୁ ବାମ ପଟେ ୧୦ କିଲୋମିଟର ଭିତରକୁ ଗଲେ ପଡ଼ିଥାଏ ମଙ୍ଗଳାଯୋଡ଼ି । ଭୁବନେଶ୍ୱରରୁ ଏହି ସ୍ଥାନର ଦୂରତ୍ୱ ଆନୁମାନିକ ୭୫ କିମି । ବସ୍ କିମ୍ବା କାରରେ ଯାଇପାରିବେ ।

ମଙ୍ଗଳାଯୋଡ଼ିର ନିକଟସ୍ଥ ବସଷ୍ଟାଣ୍ଡ ହେଉଛି ଚାନ୍ଦପୁର ଟାଙ୍ଗି । ଟ୍ରେନରେ ଯିବାକୁ ଚାହୁଁଥିଲେ ନିକଟତମ ରେଳ ଷ୍ଟେସନ କାଳୁପଡ଼ା ଘାଟ ଏବଂ ମୁକ୍ତେଶ୍ୱର । ଖୋର୍ଦ୍ଧାରୋଡ ଷ୍ଟେସନରୁ ଏହା ଦୂରତ୍ୱ ପ୍ରାୟ ୩୦ କିଲୋମିଟର ।

କ’ଣ କରିବେ ?

ମଙ୍ଗଳାଯୋଡ଼ିରେ ବାର୍ଡ ୱାଚିଂ ଚିଲିକା ଠାରୁ ମଧ୍ୟ ଅଧିକ ସୁନ୍ଦର ମନେ ହୋଇଥାଏ ।

ଚିଲିକାର କୋଳାହଳ କିମ୍ବା ପର୍ଯ୍ୟଟକଙ୍କ ନାହିଁ ନଥିବା ଭିଡ଼ ମଙ୍ଗଳାଯୋଡ଼ିରେ ନଥାଏ ।

ପକ୍ଷୀମାନଙ୍କ ଉପରେ ଜ୍ଞାନ ରଖୁଥିବା ଜଣେ ସ୍ଥାନୀୟ ଗାଇଡ୍ କିମ୍ବା ବୋଟ୍ ଚାଳକଙ୍କୁ ସାଙ୍ଗରେ ନିଅନ୍ତୁ । ସେମାନେ ହିଁ ଆପଣଙ୍କୁ ପରାମର୍ଶ ଦେଇପାରିବେ କେଉଁ ପଟେ ଗଲେ ପକ୍ଷାମାନେ ଭଲ ଭାବରେ ଦେଖା ଦେବେ । ସାଙ୍ଗରେ ବାଇନାକୁଲର୍ ରଖିପାରନ୍ତି ।

କେତେକ ପ୍ରାଇଭେଟ୍ ଟୁର୍ ଅପରେଟର୍ ବାଇନାକୁଲର୍ ଭଡ଼ାରେ ଦେଉଛନ୍ତି । ସାଙ୍ଗରେ କ୍ୟାମେରା ରଖିପାରନ୍ତି ।

ବୋଟରେ ବସିଲା ବେଳେ ହାଲୁକା ସ୍ନାକ୍ସ ପାଖରେ ରଖନ୍ତୁ । ବୋଟରେ ବସି ଖାଇପାରନ୍ତି ।

ତେବେ ପାଣି ଭିତରକୁ ଆଦୌ ପଲିଥିନ କିମ୍ବା ପ୍ଲାଷ୍ଟିକ୍ ଜରି ଫିଙ୍ଗିବେ ନାହିଁ । ମଙ୍ଗଳାଯୋଡ଼ି ଗାଁରେ ନାଇଟ୍ ହଲ୍ଟ କରିବାର ବ୍ୟବସ୍ଥା ନଥିଲେ ବି କ୍ୟାମ୍ପିଂ କରିବାର ସୁବିଧା ଉପଲବ୍ଧ । ଅସ୍ଥାୟୀ ତମ୍ବୁରେ ରାତ୍ରୀଯାପନ କରିବାର ମଜା ନେଇପାରିବେ ।

ଆଉ ଗୋଟିଏ କଥା ଭୁଲିଗଲେ ଚଳିବ ନାହିଁ । ମଙ୍ଗଳାଯୋଡ଼ିରେ ମାଛ, ଚିଙ୍ଗୁଡ଼ି ଏବଂ କଙ୍କଡ଼ାର ସୁସ୍ୱାଦୁ ଖାଦ୍ୟ ଉପଲବ୍ଧ ।

ତେଣୁ ସମୟ ପାଇଲେ ମାଛ, କଙ୍କଡ଼ାର ସ୍ୱାଦ ଚାଖିବା ପାଇଁ ଭୁଲିବେ ନାହିଁ ।

ଆଉ କ’ଣ ଦେଖିବେ ?

ମଙ୍ଗଳାଯୋଡ଼ିରେ ବାର୍ଡ ୱାଚିଂ ବ୍ୟତୀତ ଆଉ ବିଶେଷ କିଛି ନାହିଁ । ଯଦି ସକାଳ ୮ଟା ଭିତରେ ସେଠାରେ ପହଞ୍ଚିି ପାରିବେ ତେବେ ଦିନ ୧୨ଟା ମଧ୍ୟରେ ଫେରିପାରନ୍ତି ।

ଆଗକୁ ଯାଇ ଚିଲିକା, ରମ୍ଭା କିମ୍ବା ତାମ୍ପରା ହ୍ରଦ ଦେଖିବାର ସୁଯୋଗ ପାଇପାରିବେ ।

ତେବେ ଏସବୁ ଦେଖିବାକୁ ହେଲେ ଚିଲିକା କିମ୍ବା ରମ୍ଭାରେ ଆପଣଙ୍କୁ ରାତ୍ରିଯାପନ କରିବାକୁ ହୋଇପାରେ ।

ତାମ୍ପରା ହ୍ରଦ ପାଖରେ ରାତ୍ରିଯାପନ କରିବାର ସୁବିଧା ଉପଲବ୍ଧ ନାହିଁ । ଯିବା କିମ୍ବା ଆସିବା ରାସ୍ତାରେ ବରୁଣେଇ ପାହାଡ଼ ଯାଇପାରିବେ ।

ମଙ୍ଗଳାଯୋଡ଼ିରେ ପ୍ରତିବର୍ଷ ଜାନୁଆରୀ ଶେଷ ସପ୍ତାହରେ ଚିଲିକା ବାର୍ଡ ଫେଷ୍ଟିଭାଲ ଆୟୋଜନ କରାଯାଇଥାଏ ।

ମଙ୍ଗଳାଯୋଡ଼ିରୁ ୭ କିଲୋମିଟର ଦୂରରେ ରହିଛି ବ୍ରାହ୍ମନ୍ଦି କୁମ୍ଭର ଗ୍ରାମ । ସେଠାରେ ଆପଣ ଦେଖିବାକୁ ପାଇବେ କୁୁମ୍ଭାରମାନେ କିପରି ଭଳି ଭଳି ମାଟି ପାତ୍ର ନିର୍ମାଣ କରୁଛନ୍ତି ।

ଲୋକାଲ ୱାୟାର

ଭୁବନେଶ୍ବର, ନଭେମ୍ବର ୨୧ (ଲୋକାଲ ୱାୟାର): ଗୁରୁବାର ରାଜନୀତି, ସାହିତ୍ୟ ,ସାମ୍ବାଦିକତା ତଥା ଆଧୁନିକ ଓଡ଼ିଶାର ନିର୍ମାଣ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ଉତ୍କଳ କେଶରୀ ହରେକୃଷ୍ଣ ମହତାବଙ୍କ ଜୟନ୍ତୀ ପାଳିତ ହେଉଛି ।

ଏହି ଅବସରରେ ଅନେକ କାର୍ଯ୍ୟକ୍ରମର ଆୟୋଜନ ହେଉଥିବାବେଳେ ଏହି ବିଶିଷ୍ଠ ବ୍ୟକ୍ତିଙ୍କ ସଂପର୍କରେ କିଛି ଜଣା ଅଜଣା କଥା ଆସନ୍ତୁ ଜାଣିବା ।

୧- ୨୧ ନଭେମ୍ବର, ୧୮୯୯ରେ ଭଦ୍ରକ ଜିଲ୍ଲାର ଅଗରପଡାରେ ହରେକୃଷ୍ଣ ମହତାବ ଜନ୍ମଗ୍ରହଣ କରିଥିଲେ। ତାଙ୍କ ବାପା ଥିଲେ କୃଷ୍ଣଚରଣ ମହତାବ ଓ ମା ତୋହଫା ଦେବୀ।

୨- ଭଦ୍ରକ ହାଇସ୍କୁଲରୁ ମାଟ୍ରିକ୍ ପାସ କରିବା ପରେ ସେ କଟକର ରେଭେନ୍ସା କଲେଜରେ ପଢିଥିଲେ। ତେବେ ୧୯୨୧ ମସିହାରେ ପାଠପଢ଼ା ଛାଡ଼ି ସ୍ଵାଧୀନତା ଆନ୍ଦୋଳନରେ ସାମିଲ ହୋଇଥିଲେ।

୩- ୧୯୧୯ରୁ ୧୯୨୧ ମସିହା ଯାଏ ଓଡ଼ିଶା କଂଗ୍ରେସର ଅଗ୍ରଗଣ୍ୟ ବ୍ୟକ୍ତିତ୍ବଙ୍କ ମଧ୍ୟରୁ ସେ ଜଣେ ଥିଲେ ଏବଂ ୧୯୨୩-୨୪ରେ ଓଡ଼ିଶା ପ୍ରଜା ଆନ୍ଦୋଳନର ନେତୃତ୍ୱ ନେଇ ଜେଲ୍ ଯାଇଥିଲେ।

୪- ୧୯୨୪ରୁ ୧୯୨୮ ମଧ୍ୟରେ ସେ ବାଲେଶ୍ୱର ଜିଲ୍ଲା ବୋର୍ଡର ଚେୟାରମ୍ୟାନ ଭାବେ ନିର୍ବାଚିତ ହୋଇଥିଲେ ଓ ୧୯୨୪ରେ ତତ୍କାଳୀନ ବିହାର-ଓଡ଼ିଶା ପ୍ରଦେଶର ସଭ୍ୟ ହୋଇଥିଲେ ।

୫- ୧୯୩୦-୩୧ରେ ବାଲେଶ୍ୱରର ଇଞ୍ଚୁଡ଼ିଠାରେ ଲବଣ ସତ୍ୟାଗ୍ରହ ଓ ଆଇନ ଅମାନ୍ୟ ଆନ୍ଦୋଳନକୁ ପରିଚାଳନା କରି ସେ ଦୁଇ ଥର ଜେଲ ଯାଇଥିଲେ।

୧୯୩୬ରେ ନିଖିଳ ଭାରତ କଂଗ୍ରେସ କାର୍ଯ୍ୟକାରୀ କମିଟିର ସଭ୍ୟ ମନୋନୀତ ହୋଇ ୧୯୪୬ ପର୍ଯ୍ୟନ୍ତ ଅବସ୍ଥାପିତ ଥିଲେ ଏବଂ ୧୯୩୭ରେ ସେ ଓଡ଼ିଶା ରାଜ୍ୟ କଂଗ୍ରେସରେ ସଭାପତି ମନୋନୀତ ହୋଇଥିଲେ।

୬- ୧୯୩୮ରେ ସେ ଜାତୀୟ କଂଗ୍ରେସର କାର୍ଯ୍ୟକାରୀ ସମିତି ସଭ୍ୟରୂପେ ମନୋନୀତ ହେବା ପରେ ଅର୍ଥାତ ୧୯୪୬ରୁ ଚାରିବର୍ଷ ପାଇଁ ଓଡିଶାର ପ୍ରଧାନମନ୍ତ୍ରୀ ଦାୟିତ୍ବ ଗ୍ରହଣ କରିଥିଲେ। ପୁନର୍ବାର ୧୯୫୬ରୁ ୧୯୬୧ ପର୍ଯ୍ୟନ୍ତ ଓଡ଼ିଶାର ମୁଖ୍ୟମନ୍ତ୍ରୀ ଭାବେ କାର୍ଯ୍ୟ କରିଥିଲେ ।

୭- ୧୯୫୦ରୁ ୧୯୫୨ ପର୍ଯ୍ୟନ୍ତ ଡକ୍ଟର ମହତାବ କେନ୍ଦ୍ର ଶିଳ୍ପ, ବାଣିଜ୍ୟ ଓ ଯୋଗାଣ ମନ୍ତ୍ରୀ ଭାବେ ଅବସ୍ଥାପିତ ହେବା ପରେ ୧୯୫୫-୫୬ରେ ସେ ବମ୍ବେର ପ୍ରଥମ ଓଡିଆ ରାଜ୍ୟପାଳ ହେବାର ସୌଭାଗ୍ୟ ଅର୍ଜନ କରିଥିଲେ ।

୮- ଗଡ଼ଜାତ ମିଶ୍ରଣ, ଭୁବନେଶ୍ୱରରେ ନୂଆ ରାଜଧାନୀ ପ୍ରତିଷ୍ଠା, ଓଡ଼ିଶା ଟେକ୍ସଟାଇଲ୍ ମିଲ୍ ପ୍ରତିଷ୍ଠା, କଟକ ଆକାଶବାଣୀ କେନ୍ଦ୍ର ପ୍ରତିଷ୍ଠା, ବାରବାଟୀ ଷ୍ଟାଡିୟମ ନିର୍ମାଣ ଓ ହୀରାକୁଦ ବନ୍ଧ ନିର୍ମାଣରେ ତାଙ୍କର ଯଥେଷ୍ଟ ଭୂମିକା ରହିଥିଲା। ସେ ମଧ୍ୟ ଥିଲେ ଓଡିଶା ଅଲମ୍ପିକ ଆସୋସିଏସନର ପ୍ରତିଷ୍ଠାତା।

୯- ୧୯୨୩ରେ ଡକ୍ଟର ମହତାବ ସାପ୍ତାହିକ ଖବରକାଗଜ ପ୍ରଜାତନ୍ତ୍ର ପ୍ରତିଷ୍ଠା କରିଥିଲେ, ଯାହା ପରେ ଦୈନିକ ଭାବେ ଆତ୍ମପ୍ରକାଶ କରିଥିଲା। ଏଥିସହିତ ସେ ମାସିକ ସାହିତ୍ୟ ପତ୍ରିକା ଝଙ୍କାର ଓ ଶିଶୁ ପତ୍ରିକା ମୀନା ବଜାର ପ୍ରକାଶନ ଆରମ୍ଭ କରିଥିଲେ। ତାଙ୍କ ଦ୍ବାରା ପ୍ରତିଷ୍ଠିତ ବିଷୁବ ମିଳନ ସାରା ରାଜ୍ୟର କବି, ଲେଖକଙ୍କ ମିଳନସ୍ଥଳୀ ଥିଲା। ସେ ମଧ୍ୟ ଅନେକ ଉପନ୍ୟାସ, ଗଳ୍ପ, କବିତା ଓ ଆତ୍ମଜୀବନୀର ଲେଖକ।

୧୦- ଡକ୍ଟର ମହତାବଙ୍କୁ ଆନ୍ଧ୍ର ବିଶ୍ୱବିଦ୍ୟାଳୟରୁ ସମ୍ମାନଜନକ ଡକ୍ଟରେଟ ଡିଗ୍ରୀ ପ୍ରଦାନ କରାଯାଇଥିଲା। ଏଥିସହିତ ସେ ଉତ୍କଳ ବିଶ୍ୱବିଦ୍ୟାଳୟରୁ ଡି.ଲିଟ. ଓ ଆଇନରେ ସାଗର ବିଶ୍ୱବିଦ୍ୟାଳୟରୁ ଡକ୍ଟରେଟେ ଉପାଧି ପାଇଥିଲେ।

ଲୋକାଲ ୱାୟାର

ଜଗତସିଂହପୁର, ନଭେମ୍ବର ୨୧ (ଲୋକାଲ ୱାୟାର): ଦରକାର ପଡୁନି ପେଟ୍ରୋଲ କି ପ୍ରଦୂଷଣର ଚିନ୍ତା ନାହିଁ, ଥରେ ବ୍ୟାଟେରି ଚାର୍ଜ କରିଦେଲେ ଆରାମରେ ବାଇକଟି ଯାଇପାରୁଛି ୪୦ କିଲୋମିଟର ବାଟ।

ବ୍ୟାଟେରି ସାହାଯ୍ୟରେ ଏଭଳି ବାଇକ୍ ଚଳାଇ ଏବେ ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି ଜଗତସିଂହପୁର ଜିଲ୍ଲା ନୂଆଗାଁ ଅନ୍ତର୍ଗତ ବେଣାପଡ଼ା ଗାଁର ପ୍ରଦୀପ ମହାପାତ୍ର।

ସ୍ଥାନୀୟ ମୁଣ୍ଡଲୋ ବଜାରରେ ମେକାନିକାଲ୍ ବିଷୟରେ ଆଇଟିଆଇ ଶିକ୍ଷା ଗ୍ରହଣ କରିଥିବା ପ୍ରଦୀପଙ୍କର ଏକ ଗ୍ରୀଲ୍ ଓ ଆଲମିରା ଦୋକାନ ଅଛି, ହେଲେ ନିଶା ତାଙ୍କର ବାଇକକୁ ନେଇ ପରୀକ୍ଷାନିରୀକ୍ଷା।

ଏହି ପରୀକ୍ଷାନିରୀକ୍ଷା ଭିତରେ ସେ ଏକ ୧୨ ଭୋଲ୍ଟର ବ୍ୟାଟେରି ସହାୟତାରେ ବାଇକ୍ ଚଳାଇବାରେ ସଫଳ ହୋଇଛନ୍ତି।

ପ୍ରଦୀପଙ୍କ କହିବା ଅନୁସାରେ, ଏହି ବ୍ୟାଟେରି ସଂପୂର୍ଣ୍ଣ ଚାର୍ଜ ହେବାକୁ ପ୍ରାୟ ଏକ ଘଣ୍ଟା ସମୟ ନେଉଛି ଏବଂ ଏଥିରୁ ଧୂଆଁ ବାହାରି ପରିବେଶ ପ୍ରଦୂଷଣ କରିବାର ଡର ବି ନାହିଁ।

ଗୋଟେ ପୁରୁଣା ମଟରସାଇକେଲକୁ ଏଭଳି ନୂଆ ରୂପ ଦେବାରେ ୨୦ ହଜାର ଖର୍ଚ୍ଚ ହେଉଥିବା ପ୍ରଦୀପ କହିଛନ୍ତି।

ବ୍ୟାଟେରିରେ ପୁରୁଣା ବାଇକ୍ ଚଳାଇ ସମସ୍ତଙ୍କୁ ଆକର୍ଷିତ କରିପାରିଥିବା ପ୍ରଦୀପ ଏବେ କେମିତି ବ୍ୟାଟେରି ସହାୟତାରେ କାର୍ ଚଳାଇବେ, ତାକୁ ନେଇ କାମ ଆରମ୍ଭ କରିଦେଇଛନ୍ତି ଆଉ ତାଙ୍କର ଆଶା, ସେ ଏଥିରେ ମଧ୍ୟ ସଫଳ ହେବେ।

ତାଙ୍କ କହିବା ଅନୁସାରେ, ଗଲା ୧୨ ବର୍ଷ ହେଲା ସେ ପରିବେଶକୁ ସହାଇଲା ଭଳି ଗାଡ଼ି ତିଆରି କରିବା କାମରେ ଲାଗିଥିଲେ ଆଉ ତାହା ଏବେ ଫଳବତୀ ହୋଇପାରିଛି।

ବଡ଼କଥା ହେଉଛି, ପ୍ରଦୀପଙ୍କ ଏହି ସଫଳତା ଦେଖିବା ପରେ ଆଖପାଖ ଅଞ୍ଚଳର କିଛି ଲୋକ ସେମାନଙ୍କ ବାଇକରେ ମଧ୍ୟ ଏଭଳି ବ୍ୟାଟେରି ଲଗାଇବାକୁ ଆଗଭର ହେଲେଣି।

ସେମାନଙ୍କ କହିବା ଅନୁସାରେ, ଏହି ଗାଡ଼ି ଚଳାଇଲେ ପ୍ରଦୂଷଣ ସାର୍ଟିଫିକେଟର ଆବଶ୍ୟକତା ନାହିଁ, କାରଣ ଏଥିରୁ ଧୂଆଁ ବା ସେଭଳି ବିଷାକ୍ତ ଗ୍ୟାସ ବାହାରିବାର ସମ୍ଭାବନା ହିଁ ନାହିଁ।

ପ୍ରଦୀପଙ୍କ ଏହି କାମ ପ୍ରଶଂସନୀୟ ବୋଲି ଆଞ୍ଚଳିକ ପରିବହନ ଅଧିକାରୀ ବିଜୟ କୁମାର ନାୟକ କହିଛନ୍ତି।

ଲୋକାଲ ୱାୟାର

ବ୍ରହ୍ମପୁର, ନଭେମ୍ବର ୧୯ (ଲୋକାଲ ୱାୟାର): ବର୍ଜ୍ୟବସ୍ତୁକୁ ନେଇ ଏବେ ସମସ୍ତଙ୍କୁ ଚିନ୍ତା ଘାରିଥିବାବେଳେ ଏସବୁ ସାମଗ୍ରୀକୁ ବ୍ୟବହାର କରି ଆକର୍ଷଣୀୟ ଘରସଜା ଓ ଅନ୍ୟ ସାମଗ୍ରୀ ପ୍ରସ୍ତୁତ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି ଲେଖିକା ତଥା ଗୃହିଣୀ ରେଶମା କଦଓ୍ବଥ୍।

ଗୋପାଳପୁର ଆର୍ମି ଡିଫେନ୍ସ କଲେଜରେ ଜଣେ ଅଧିକାରୀ ଭାବେ କାର୍ଯ୍ୟରତ ସତୀଶ କଦଓ୍ବଥଙ୍କ ପତ୍ନୀ ରେଶମା ଦୀର୍ଘ ଦୁଇ ଦଶନ୍ଧି ହେଲା ଏହି କାମରେ ଲାଗିଛନ୍ତି।

ନଡ଼ିଆ ସଢେଇରୁ ଟ୍ରେ, ଛୋଟ ଛୋଟ କାଠଖଣ୍ଡରୁ କାନ୍ଥଘଣ୍ଟା ଡିଜାଇନ୍, ଛିଣ୍ଡା କପଡ଼ାରୁ ତକିଆ ଖୋଳ ଭଳି ଅନେକ ସାମଗ୍ରୀ ତିଆରି କରି ସେ ତାଙ୍କ ହାତର ଯାଦୁ ଦେଖାଇଚାଲିଛନ୍ତି।

ସେହିପରି ଅଦରକାରୀ କାଠ ଓ ସାଇକେଲର ଅବ୍ୟବହୃତ ଅଂଶକୁ ନେଇ ରେଶମା ଡିଜାଇନ୍ କରିଥିବା ଡାଇନିଂ ଟେବୁଲ୍ ଆଉ ଛୁଆଙ୍କ ପୁରୁଣା ପୋଷାକ ବ୍ୟବହାର କରି କପଡ଼ା ବ୍ୟାଗ୍ ତଥା ଟେଲିଫୋନ୍ ମ୍ୟାଟ୍ ଦେଖିଲେ ଯେକେହି ଆକର୍ଷିତ ହେବ।

କେବଳ ଏତିକି ନୁହେଁ, ବିଭିନ୍ନ ଅଦରକାରୀ ସାମଗ୍ରୀରୁ ରେଶମା ତାଙ୍କ ଘରକୁ ବେଶ୍ ସୁନ୍ଦର ଭାବେ ସଜାଇଛନ୍ତି।

କ୍ରିଏଟିଭ୍ ମ୍ୟୁଜିଙ୍ଗସ୍ ଅଫ୍ ଏନ୍ ଆର୍ମି ଓ୍ବାଇଫ୍ ଓ ଫର୍ ଦ ଲଭ୍ ଅଫ୍ କ୍ରିଏଟିଭିଟି ଭଳି ଦୁଇଟି କଫି ଟେବୁଲ୍ ପୁସ୍ତକର ଲେଖିକା ରେଶମାଙ୍କ କହିବା ଅନୁସାରେ, ସେ କେବେ ତକିଆ ଖୋଳ କି କପଡ଼ା ବ୍ୟାଗ୍ କିଣିନାହାନ୍ତି, ଯେତେବେଳେ ଦରକାର ହୋଇଛି ନିଜ ହାତରେ ହିଁ ତିଆରି କରିଛନ୍ତି।

ଉଲ୍ଲେଖଯୋଗ୍ୟ ଯେ, ଫର୍ ଦ ଲଭ୍ ଅଫ୍ କ୍ରିଏଟିଭିଟି ପୁସ୍ତକରେ ରେଶମା ବର୍ଜ୍ୟବସ୍ତୁକୁ ନେଇ କିପରି ଭଳିକି ଭଳି ସୁନ୍ଦର ଘରକରଣା ସାମଗ୍ରୀ ପ୍ରସ୍ତୁତ କରାଯାଇପାରେ, ସେ ସଂପର୍କରେ ସୂଚନା ଦେଇଛନ୍ତି।

ବିବାହ ପୂର୍ବରୁ ରେଶମା ଏସବୁ କାମରେ ହାତ ଦେଇ ଘର ଲୋକଙ୍କ ଦୃଷ୍ଟି ଆକର୍ଷଣ କରିଥିଲେ, ତାଙ୍କ କଳ୍ପନା ଶକ୍ତିକୁ ସମସ୍ତେ ପ୍ରଶଂସା କରୁଥିଲେ, ଆଉ ଏବେ ପିଲାମାନେ ବଡ଼ ହେଲା ପରେ ପୁଣି ସେହି କାମରେ ହାତ ଦେଇଥିବା କହିଛନ୍ତି।

ମନସ୍ତତ୍ତ୍ବରେ ସ୍ନାତକୋତ୍ତର ରେଶମା କେରଳର ମୂଳ ବାସିନ୍ଦା ହୋଇଥିବା ବେଳେ ଏବେ ଦୈନିକ ଦୁଇ ଘଣ୍ଟା କାଳ କିଭି ଘରସଜ୍ଜା ସାମଗ୍ରୀ ପ୍ରସ୍ତୁତ କରନ୍ତି।

ଅଦରକାରୀ ସାମଗ୍ରୀରୁ କିଭଳି ଘର ପାଇଁ ଦରକାରୀ ସାମଗ୍ରୀ ପ୍ରସ୍ତୁତ କରିହେବ, ସେନେଇ ସୋସିଆଲ୍ ମିଡିଆରେ ବି ରେଶମା ଲେଖାଲେଖି କରନ୍ତି, ଏହା ବେଶ୍ ଲୋକପ୍ରିୟ ଓ ତାଙ୍କର ତେର ହଜାର ଫଲୋୟର୍ସ ଅଛନ୍ତି।

ଲୋକାଲ ୱାୟାର

ଭବାନୀପାଟଣା, ନଭେମ୍ବର ୧୮ (ଲୋକାଲ ୱାୟାର): ସମୁଦାୟ ୧୨ ଏକରର ଗୋଟେ ଉଦ୍ୟାନ, ଯାହାରି ଭିତରେ ଭରି ରହିଛି ଶହ ଶହ ପ୍ରକାର ବିରଳ ଓ ଲୁପ୍ତପ୍ରାୟ ଉଦ୍ଭିଦ, ୭୩ ପ୍ରକାର ମନ୍ଦାର ଫୁଲ ସାଙ୍ଗକୁ ୧୫୩ ପ୍ରକାର ଗୋଲାପ, ତା ସହିତ ୫୫ ପ୍ରକାର ବିଭିନ୍ନ କିସମର ଲତା, ପୁଣି ଫଳ ବଗିଚା, ଅନେକ ବନସାଇ ଆହୁରି ଅନେକ କିଛି।

ଏହା କେଉଁ ସରକାର ବା ବହୁରାଷ୍ଟ୍ରୀୟ କମ୍ପାନୀ କରିଥିବା ପାର୍କର କାହାଣୀ ନୁହେଁ, ଇଏ ହେଉଛି ଦୁଇ ଜଣ ସାଧାରଣ ବ୍ୟକ୍ତିଙ୍କ ଉଦ୍ୟମରେ ଗଢ଼ିଉଠିଥିବା ପାର୍କ, ଯାହା ଦେଖିଲେ ଯେକେହି ବିସ୍ମିତ ହେବେ।

କଳାହାଣ୍ଡି ଜିଲ୍ଲା ସଦର ମହକୁମା ଭବାନୀପାଟଣାଠାରୁ ଥୁଆମୂଳରାମପୁର ରାସ୍ତାରେ ଚାରି କିଲୋମିଟର ବାଟ ଗଲା ପରେ ପଡ଼େ ସାଇଧାମ୍ ମନ୍ଦିର, ଏହି ମନ୍ଦିରକୁ ଲାଗି ରହିଛି ଏକ ପାର୍କ, ଯାହାର ନାଁ ସାଇଧାମ ଭାଗୀରଥି ପାର୍କ।

କଳାହାଣ୍ଡି ଜିଲ୍ଲାର ଜଣାଶୁଣା ସମାଜସେବୀ ପ୍ରମୋଦ ଖମାରୀଙ୍କ ଉଦ୍ୟମରେ ଏହି ପାର୍କ ନିର୍ମିତ ହୋଇଥିବାବେଳେ ଏହାର ଡିଜାଇନର୍ ହେଉଛନ୍ତି ସ୍ଥାନୀୟ ବିଜ୍ଞାନ ଶିକ୍ଷକ ପ୍ରକୃତି ବନ୍ଧୁ ରବୀନ୍ଦ୍ର କୁମାର ପଟ୍ଟନାୟକ।

ବର୍ଷ ବର୍ଷ ଧରି ପଡ଼ିଆ ପଡ଼ିଥିବା ଏକ ଜାଗାକୁ କେମିତି ସବୁଜିମାରେ ଭର୍ତ୍ତି କରାଯାଇପାରେ ଓ ସମସ୍ତଙ୍କୁ ଆକର୍ଷିତ କରାଯାଇପାରେ, ତାକୁ କରି ଦେଖାଇଛନ୍ତି ପ୍ରମୋଦ ଓ ରବୀନ୍ଦ୍ର।

ଆପଣ ପାର୍କର ମୁଖ୍ୟ ଗେଟରୁ ଭିତରକୁ ପ୍ରବେଶ କଲାବେଳେ ଦେଖିବେ ଏକ ସୁଦୃଶ୍ୟ ବିଶାଳକାୟ ଗଣେଶଙ୍କର ପ୍ରତିମୂର୍ତ୍ତି, ତାପରେ ବିଭିନ୍ନ କିସମର ସୁନ୍ଦର ଓ ସୁସଜ୍ଜିତ ଫୁଲ।

ଏସବୁ ଫୁଲ ବଗିଚାକୁ ଲାଗି ରହିଛି ବିରାଟ ଘାସ ପଡ଼ିଆ, ତା ଭିତରେ ଛୋଟ ଛୋଟ ଛୁଆଙ୍କ ଲାଗି ଉଦ୍ଦିଷ୍ଟ ଅନେକ ଦୋଳି।

ଘାସ ପଡ଼ିଆର ସ୍ଥାନେ ସ୍ଥାନେ ହାତୀ, ଜିରାଫ, ଓଟ, ଭାଲୁ, ସିଂହ ଭଳି ଅନେକ ଜୀବଜନ୍ତୁଙ୍କର ଅବିକଲ ପ୍ରତିକୃତି ବି ଆପଣଙ୍କୁ ଆକର୍ଷିତ କରିବ।

କେବଳ ଏତିକି ନୁହେଁ, ୧୨ ଏକର ପରିମିତ ଏହି ପାର୍କରେ ବହୁ ଅଦରକାରୀ ସାମଗ୍ରୀ ବ୍ୟବହାର କରାଯାଇ ତାକୁ ସୁନ୍ଦରତାରେ ଭରି ଦିଆଯାଇଥିବାର ଦୃଶ୍ୟରାଜି ବି ଆପଣଙ୍କୁ ଛୁଇଁବ।

କେଉଁଠି ଭଙ୍ଗା ପଥରକୁ ନେଇ କଳା ତ କେଉଁଠି ଅଦରକାରୀ କାଚ ଓ ପ୍ଲାଷ୍ଟିକ୍ ବୋତଲକୁ ନେଇ କଳାକୃତି, ପୁଣି କେଉଁଠି ଅଲୋଡ଼ା କାଠ ଓ ବାଉଁଶର କଳା କାରିଗରୀ।

ବର୍ଜ୍ୟବସ୍ତୁକୁ ବ୍ୟବହାର କରି ତାରି ଭିତରେ କେମିତି ସୃଜନର ପ୍ରାଣ ସଂଚାର କରାଯାଇପାରେ, ତାହା ଆପଣ ଏହି ପାର୍କକୁ ଗଲେ ଜାଣିପାରିବେ।

ସେହିପରି ଏହି ପାର୍କ ଭିତରେ ରହିଛି ଏକ ସ୍ବତନ୍ତ୍ର ଆଦିବାସୀ ସଂଗ୍ରହାଳୟ, ଯେଉଁଥିରେ ଆଦିବାସୀମାନେ ବ୍ୟବହାର କରୁଥିବା ବିଭିନ୍ନ ବାଦ୍ୟଯନ୍ତ୍ର, ଅଳଙ୍କାର ଓ ପାରମ୍ପରିକ ଅସ୍ତ୍ରଶସ୍ତ୍ର ପ୍ରଦର୍ଶିତ ହୋଇଛି।

ଆଉ କେବଳ ପ୍ରକୃତି, ବିଜ୍ଞାନ, ଐତିହ୍ୟ କି କଳା ନୁହେଁ, ପୌରାଣିକ ଥିମକୁ ନେଇ ବି ଅନେକ ଆକର୍ଷଣୀୟ କଳାକୃତି ଏହି ଉଦ୍ୟାନରେ ସ୍ଥାନ ପାଇଛି।

ଗଛଲତା ଓ ପରିବେଶ ପ୍ରତି ପିଲାଦିନୁ ତାଙ୍କର ଆକର୍ଷଣ ଥିବାବେଳେ ଏହାକୁ ରୂପାୟିତ କରିବା ପାଇଁ ସମାଜସେବୀ ପ୍ରମୋଦ ଖମାରୀ ହିଁ ତାଙ୍କୁ ସୁଯୋଗ ଦେଇଥିଲେ ବୋଲି କୁହନ୍ତି ରବୀନ୍ଦ୍ର।

ତାଙ୍କ କହିବା ଅନୁସାରେ, ଏହି ପାର୍କରେ ଶହ ଶହ ଲୁପ୍ତପ୍ରାୟ ଉଦ୍ଭିଦ ଥିବାବେଳେ ଏନେଇ ସାଇଣ୍ଟିଫିକ୍ ପ୍ଲାଣ୍ଟ, ଔଷଧୀୟ ଗଛଲତା ସାଙ୍ଗକୁ ବନ୍ୟ ଲତା, ବିଭିନ୍ନ ପ୍ରକାର ଲିଆଣ୍ଡର୍, ସ୍ବଦେଶୀ ଫୁଲ ଇତ୍ୟାଦି ଭରି ରହିଛି।

ତା ସହିତ ଆଦିବାସୀଙ୍କ ଜଗତ ନାଁରେ ଏକ ଛୋଟିଆ ଥିମ୍ ପାର୍କ ବି ଏହା ଭିତରେ କରାଯାଇଛି, ଯାହାର ଉଦ୍ଦେଶ୍ୟ ହେଉଛି ଆଦିବାସୀବହୁଳ କଳାହାଣ୍ଡି ଜିଲ୍ଲାର କଳା, ସଂସ୍କୃତି ତଥା ଆଦିବାସୀ ଜନଜୀବନ ଉପରେ ଲୋକଙ୍କୁ ସଚେତନ କରିବା।

ଏସବୁ ବାଦ୍ ଏହି ପାର୍କର ଅନ୍ୟସବୁ ଆକର୍ଷଣ ହେଉଛି ଏହାରି ଭିତରେ ଥିବା ପ୍ରାକୃତିକ ଜଙ୍ଗଲୀ ଝରଣା, କାର୍ଟୁନ୍ କ୍ଲବ୍ ଓ ସେଲ୍ଫି ପଏଣ୍ଟ।

ପରିବେଶ ପ୍ରତି ସଚେତନତାର ବାର୍ତ୍ତା ଦେବାକୁ ଏହି ପାର୍କ ପରିସରରେ ପ୍ଲାଷ୍ଟିକ୍, ଗୁଟଖା ସମେତ ମଦ ଓ ଅନ୍ୟ ନିଶାଦ୍ରବ୍ୟ ନିଷେଧ କରାଯାଇଥିବା ରବୀନ୍ଦ୍ର କହିଛନ୍ତି।

ପ୍ରକୃତି ଓ ପରିବେଶକୁ ଭଲପାଇବା ସାଙ୍ଗକୁ କଳାହାଣ୍ଡିର କଳା ସଂସ୍କୃତି ପ୍ରତି ଓ କଳାହାଣ୍ଡି ପ୍ରତି ଲୋକଙ୍କୁ ଆକର୍ଷିତ କରିବା ଲାଗି ସାଇଧାମ୍ ଭାଗୀରଥି ପାର୍କ ପ୍ରତିଷ୍ଠା କରାଯାଇଥିବା ଏହାର ପ୍ରମୁଖ ତତ୍ତ୍ବାବଧାରକ ପ୍ରମୋଦ ଖମାରୀ କହିଛନ୍ତି।

ସେ କହିଛନ୍ତି ଯେ, ଆଗାମୀ ଦିନରେ ଏହି ପାର୍କ ପରିସରରେ ବୋଟିଂ କ୍ଲବ୍ ସାଙ୍ଗକୁ ଆକ୍ବାରିୟମ୍ ଓ ମ୍ୟୁଜିକାଲ୍ ଫାଉଣ୍ଟେନ୍ କରିବା ତାଙ୍କ ସ୍ବପ୍ନ ରହିଛି।

ଏଥିପାଇଁ କାମ ଆରମ୍ଭ ହୋଇଯାଇଥିବା ପ୍ରମୋଦ ସୂଚନା ଦେଇଛନ୍ତି।

ନିଜସ୍ବ ଉଦ୍ୟମରେ ଦୁଇ ଜଣ ବ୍ୟକ୍ତି ଏକାଠି ହୋଇ ଅସମ୍ଭବକୁ ବି ଯେ ସମ୍ଭବ କରିପାରିବେ, ଏହି ପାର୍କ ହେଉଛି ତାର ପ୍ରମାଣ।

ଲୋକାଲ ୱାୟାର